175. الطرح العام لشركة Act Financial من الفكرة إلى التنفيذ - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بنكمل الجزء الثاني من حوارنا مع أ/ مصطفى عبد العزيز، بنتكلم النهاردة أكتر عن تجربة طرح الشركة للاكتتاب العام، خطوات التحضير والعقبات اللي واجهتهم، وإزاي الشركات ممكن تستغل الفرص الاستثمارية حتى في الظروف الصعبة للسوق
ACT Financial أ/ مصطفى عبد العزيز هو العضو المنتدب والشريك المؤسس لشركة خبرة كبيرة في أسواق رأس المال في مصر والشرق الأوسط وشمال إفريقيا
Mostafa Abdelaziz @LinkedIn :تقدروا تتواصلوا مع مصطفى على
الحلقات السابقة مع مصطفى عبد العزيز كان فيها معلومات مهمة ليها علاقة بحلقة النهاردة لو حابب ترجع تسمع الحلقات: 9 85 86
:الجزء الثاني
(01:59) إيه أكبر العقبات اللي واجهتك خلال فترة التحضير للطرح في البورصة؟ وإزاي قدرت تتغلب عليها؟ -
(05:19) مين شركاء النجاح اللي ساعدوك في الطرح؟ -
(10:17) لو حد عنده شركة وعايز يطرحها في البورصة، إيه الخطوات اللي لازم ياخدها؟ -
(14:15) بعد ما خدت الموافقة من الهيئة، إيه اللي حصل خلال الفترة دي لحد ما نزلتوا البورصة؟ -
(15:20) إيه هو الـ Roadshow؟ وإزاي بيتم التحضير ليه؟ ورد فعل المستثمرين كان إيه لما عرضت عليهم فكرة الطرح؟ -
(19:07) إزاي بتحدد سعر السهم في الطرح؟ وهل السعر اللي بنشوفه في الطرح بيبقى مبني على تقييم عادل؟ -
(27:00) في أول يوم إدراج، الأسهم طلعت 30%، هل كنت متوقع ده؟ وإيه كان رد فعل الإدارة؟ -
حلقة مليانة تفاصيل مهمة لأي رائد أعمال بيفكر يطرح شركته في البورصة أو حتى عايز يفهم أكتر عن عملية الطرح العام. استنونا الجزء التالت من حوارنا مع مصطفى عبد العزيز الاسبوع الجاي
اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور، النهاردة معانا الجزء التاني من الحلقة بتاعة مصطفى عبد العزيز شركة أكت فاينانشال الحلقة دي هنتكلم فيها أو هنغطي فيها مواضيع زي الطرح بتاع الشركة حصل فيه ايه والخطوات، إيه المشاكل مين بيستخدموهم عشان يعرفوا يطرحوا في الاسواق، الجهات المختصه وهكذامعلومات كتير جداً من وجهة نظري مهمه للناس اللي عندها بيزنس وبتفكر في يوم من الأيام تطرح شركتها دي تجربة من ارض الواقع تجربة حقيقية حصلت السنة دي ومفيش احسن من مصطفى انه يغطلنا الموضوع ده انا دايماً بفكر الناس ان احنا مش هدفنا من الحلقة دي اننا ننصح بشراء شركات معينة دايماً تسأل وتستفسر وتبص على التحليلات المختلفة وتاخد قرار، الهدف من الحلقة دي أكتر ان انت تمشي مع مصطفى الرحلة دي وطبعاً هما كانوا معانا قبل ما يطرحوا من سنتين يمكن أو اكتر ودلوقتي طرحوا في السوق وهنشوفهم ان شاء الله في المستقبل هيعملوا ايه هسيبكوا مع الجزء التاني
(01:59)
عمر: إيه أكبر عقبات شفتها أو مشاكل في الأربع شهور اللي أنت نويت إن أنت تطرح فيه وتنزل فيها من وجهة نظرك شفتها وإزاي حلتها، يعني خلينا نتكلم على حاجة أو إتنين بس مش لازم يعني نتكلم على صعوبات كتير، أنت كمصطفى في تجربتك أنت يعني أنا عارف إن كل واحد ممكن يمر بتجربة مختلفة يعني
مصطفى: بص أنت دايما بيبقى عندك التخوف بتاع ظروف السوق، يعني دايما تيجي تكلم أي شركة حتى أو حاجة يقول لك أصل ظروف السوق مش مناسبة، وهي دائما بتبقى الجدال الناحية التانية أو بنقول للناس والله ما هو لو أنت عندك المنتج الكويس ظروف السوق هتبقى مناسبة، لأن دايما السوق محتاج فرصة استثمارية كويسة، فلو قدرت تخلق نموذج استثماري كويس ومناسب فهو دائما ليه السوق بتاعه، ففي الأول أول ما جينا نطرح الشركة، سمعنا الكلام ده كتير فاهم تحديات كتيرة في فكرة إن هو إيه أصل السوق مش مناسب، أصل مفيش طروحات، واحنا شفناها فرصة مش تحدي لأنه فعلا أنت لو جيت بصيت يا عمر على السوق المصري البورصة المصرية في آخر أربع أو خمس سنين، هو تقريبا مفيش غير 3 طروحات حصلت في السوق المصري وده مش طبيعي يعني المفروض الطبيعي إن إنت بتوصل إن إنت ممكن يبقى عندك طرح كل شهر أو شهرين فالمفروض السوق يبقى نشط أكتر من كده خالص فاحنا شفنا إن ده تحدي بس في نفس الوقت شفنا فرصة، والحمد لله تم إثبات فعلا إن هو فرصة وتم تسويقه بشكل جيد، وتم الطلب عليه يمكن يمكن كان تاريخي، يعني يمكن مكنش فيه طرح جاله هذا العدد من المساهمين ومش متأكد أوي إحصائيا يعني بس يعني قد يكون في تاريخ البورصة المصرية يجيلك هذا العدد من المكتتبين اللي عايزين يكتتبه في إكتتاب الشركة، فده كان أكبر إثبات على إن حتى وظروف السوق مش كويسة، وإن مفيش طروحات وكلام من ده لما بيبقى عندك المنتج الصح وبتشرحه للناس بالشكل الصح، بيجيلك شهيه وبيجيلك ناس بتشارك معاك فيه، طبعا بيبقى في عادة تحديات بس يمكن دي ما قابلتناش أوي لأن احنا كنا جاهزين ليها فكرة إن الشركة متبقاش جاهزة عادة لما بتيجي تتكلم مع الشركات تطرح في البورصة أو تحدي بالنسباله بيبقى أصل السنة اللي فاتت الميزانية مش عارف إيه، أصل أنا لسه معملتش الفحص الضريبي أصل أنا ناقصني، مش عارف إيه، أصل أنا المراقب الحسابات بتاعي مش معتمد، أصل هيكل الموظفين بتاعي محتاج تغيير علشان أنا عندي وظيفة ناقصة ماتمش تعيينها فده عادة بيبقى أكتر حاجة بتعطل الطروحات، فيه شركات بتقعد السنتين بتظبط نفسها عشان تجهز نفسها تطرح ده عادة بيبقى اكبر مشكلة ودائما زي ما قلت من شوية أنصح أي حد عنده أي شركة، أنت مش لازم تبقى مكرر إنك هتعمل إدراج لشركتك النهاردة، بس لازم حتى تأخد نصيحة هو أنا إزاي أبقى جاهز، فممكن تاخد نصيحة بقى من بنك استثماري من شركة إدارة طروحات من شركة اكتتابات بحيث إنك دائما تبقى عندك الجاهزين النسبية لإن ده بيبقى أكبر تحدي دائما إن الشركات مش جاهزة ورقيا لإدارة عملية طرح سريعة وبتاخد وقت طويل جدا عشان تظبط نفسها تبقى جاهزة
(05:19)
عمر: طيب أنت في المرحلة دي بيبقى عندك زي يقولوا مثلا كلمة كليشيه شوية اللي هو شركاء النجاح أو الناس اللي هما الشركاء اللي من بره أكت، يعني فيه ناس ساعدوك عشان تنزل أكيد أنت معندكش كل الموظفين اللي في الدنيا اللي هما هيعملوا انت أكيد محتاج بنك استثماري مثلا، محتاج محاميين محتاج تستعين بمصادر خارجية أولا عايز أعرف مين الناس الخارجية اللي بيساعدوك تنزل في البورصة، حتى لو الناس دي بيعملوا اللي أنت بتعرف تعمله أصلا، بس انت برضه بتعينهم عشان هو هيضيف لك حاجة وكالة تسويق أيا كان، مين الشركاء دول؟ وأنا فهمت إن أنت كنت جاهز بس اللي بتكلم أكتر للناس اللي هي مش شايفة ال الحتة دي من الموضوع
مصطفى: طبعا لأ، بصي إحنا يعني إيه هي العملية وأنا يعني سعيد اني بشارككم التجربة كاملة عشان الناس تبقى عارفة برضه إن الموضوع يمكن الحمد لله احنا عندنا خبرة في إدارته، بس في الآخر هو في ناس كتير قوي اشتغلت على الملف ده عشان يطلع بالنجاح ده
من أول المستشار القانوني احنا جبنا مستشار قانوني معانا اللي هو معتوق بسيوني، قعد يظبط القصة معانا نراجع الورق، نقدم الملفات بتاعت القيد في البورصة، وإدارة عملية نشرة الطرح والكلام من ده فده أول مثلا شريك كان مهم جدا في العملية
كان معانا مثلا مدير للطرح اللي هو شركة زيلا كابيتال اللي هي المسؤول عن إدارة وتمثيل الشركة قدام هيئة الرقابة المالية وإدارة عملية نشرت الطرح والإجراءات مع المستشار القانوني، فشركة زيلا كابيتال مثلا كانوا هما مدير الطرح اللي بيديروا عملية الطرح
بعد كده جبنا شركة اللي بتعمل تقييم المستشار المالي المستقل عشان تطلع قيمة عادلة للسهم عشان أنت تقدر تعمل تقييم، مينفعش أنت تيجي تعمل الطرح بتاعك، وتقول والله أنا شايف شركتي تساوي كذا لازم تجيب حد مستقل يكون معتمد من هيئة الرقابة المالية يعملك التقييم، فجبنا شركة فاكت لدراسات القيمة العادلة عشان دي شركة معتمدة من الهيئة، الهيئة العامة للرقابة المالية عشان تعمل تقييم للسهم، وبيعملوا دراسة كبيرة لتقييم السهم بشكل مستقل، بحيث يقدمه الملف ده للمساهمين اللي داخلين
جبنا معانا مسوق رسمي اللي هو كان شركة مباشر بحيث إن هو يساعدنا في التسويق لبعض العملاء اللي موجودين، لأن أنت في الآخر بتحتاج تحكي الحدوتة والطرح ده وتشاركه مع عدد كبير من المساهمين، فأنا كشركة مببقاش عارف مين المستثمرين الموجودين في السوق، فلازم بتعين معاك مسوق رسمي اللي هو شركة مباشر مثلا اللي عيناه
بعد كده مثلا جبنا البنك العربي الأفريقي كان هو مثلا البنك متلقي الإكتتاب، فكان هو اللي بيستلم طلبات الاكتتاب من الناس كزيادة راس مال فبياخد الفلوس من كل مكتتب يخليها عنده في الحساب عشان يصدر بيها الأسهم ويرجع للناس أسهمهم فدا كان جزء مهم من شركاء النجاح اللي معانا دول شركاء النجاح اللي نحنا إيه اتفقنا معاهم أو تعاقدنا معاهم
في شركاء نجاح تانين بقى كانوا مفيدين جدا في العملية بس يمكن ما كانوش في أساس الاتفاق في الأول، بس يمكن فدونا في حاجات فادت بشكل كبير جدا اللي هي مثلا شركات السمسرة، شركات تداول الأوراق المالية اللي موجودة في مصر بشكل عام ليه لإن إحنا عملنا حاجة كانت كويسة قوي في الطرح ده إن إحنا صحيح جبنا شركة مباشر كمسوق رسمي للطرح لكن مكانش في حصر يعني ما كانوش هم المسوق الأوحد أو الوحيد اللي ليه حق التسويق للإكتتاب ده، على عكس معظم الطروحات اللي بتحصل في كل حتة، لا احنا قلنا يا جماعة أي شركة تداول من حقها تسوق، الكلام ده لعملائها فأذكر شركة ثاندر مثلا شركة ثاندر من أكتر الناس اللي ساعدت جدا برضه من شركات السمسرة في التسويق للطرح لعملائها، وكان في عدد كبير جد ا من المكتتبين دخلوا عن طريق التسويق اللي حصل من شركة ثاندر بالإضافة طبعا لبقية شركات التداول، الأوراق المالية اللي دخلت عملائها في الاكتتاب، يمكن الاكتتاب الخاص دخل لنا أكثر من 39 شركة سمسرة عادة في معظم الطروحات اللي حصلت في مصر بيبقى شركة وحدة شركة سمسرة وحدة بس هي اللي بتاخد الطرح الخاص إحنا كان عندنا 39 شركة سمسرة دخلوا في الطرح الخاص، فكل دول يعتبروا شركاء نجاح، طبعا كان في تغطية إعلامية ففي حملات على سوشيال ميديا حصلت في شرح للبزنس موديل حصل في محتوى على السوشيال ميديا وكلام من ده كل دول يعتبروا شركاء نجاح، فالموضوع في إدارة الملف بالكامل كان في أبعاد كتيرة قوي، يمكن زي ما قلت احنا عشان من المجال فعرفنا ندير المنظومة كلها لكن في الآخر طبعا كان معانا آه شريك قوي في كل ملف هو اللي بينصحنا وبيساعدنا نوصل لأحسن نتيجة منه
(10:17)
عمر: هايل حلو جدا، انا برضه بأتكلم في الحتة دي بالذات، ليه؟ لأن أنا بحسها حتة مش كل الناس هتبقى عارفاها حتى اللي عندهم شركات كبيرة، وعمره ما طرح في البورصة أو مش لامس أرض الواقع في البورصة مركز بس على شغله والكلام ده، ما يعرفش إن فيه حاجات كتير قوي قوي قوي، ورا لازم تتعمل عشان بس تنزل البورصة، فأعتقد يعني شكرا جدا يا مصطفى، والله على إنك فاتح الشفافية بتاعة العملية، وإن أنت بتشاركنا التجربة بتاعتك حتى بأسامي الناس، بأسامي الشركاء
مصطفى: يعني دي كده التجربة كاملة يعني لإن بجد زي ما قلت لك هو ده الهدف الحقيقي من الحلقة إن إحنا نشارك التجربة وانا بجد والله يعني مش كلام كليشيه برضه بس هو فعلا هو المنظومة كلها بتكتمل بتفعيل دور البورصة، يعني زي ما بقول لك يا عمر والله بجد هي مش رفاهية مش فكرة انه هو انا عامل شركة، هو تفتكر انا مفروض اطرح في البورصة ولا لأ؟ هو ده في رأيي مش مفروض يبقى سؤال، هو السؤال يبقى مفروض اطرح في البورصة امتى؟ آه طبعا لازم تستنى مستوى معين، حجم معين، طريقة معينة، توقيت معين، كل ده مفهوم، بس هي الطريقة الأمثل لزيادة حجم الشركة من خلال البورصة، ماهو نظريا هتجيب زيادة رؤوس أموال منين؟ زي ما بقولك يا هتجيب من صحابك وقرايبك يا هتجيب من مستثمرين، عشان تجيب من مستثمرين، لازم تروح البورصة، ملهاش حل تاني
(10:17)
عمر: أه، وبعدين أنت كمان حتى لو أنت مش جاهز تطرح النهارده، لو أنت بالعقلية بتاعة أكنك أنت جوه البورصة، فأنت الحوكمة بتاعتك هتبقى عليت من الأول، طريقة إدارة ملفات الشركة، طريقة مجلس الإدارة المحاضر، زي ما انت بتقول كده بالظبط المجلس بتاعك شكله عامل إزاي؟ بيقولوا لك إيه؟ بيساعدوك إزاي؟ الكلام ده كله الجاهزية نفسها
مصطفى: وفي جاذبية برضه كبيرة جدا يا عمر خلي بالك وأنت شركة مقيدة، السوق بيشوفك بشكل مختلف، فاهم لإن ده يعتبر تسويق كبير جدا بيحصل لناس كتيرة جدا لعدد كبير جدا بتفهم النشاطك والكلام من ده، فأنت النهارده بغض النظر عن دور البورصة في زيادة رؤوس الأموال بس هي ليها مزايا تانية كتير زي ما قلتلك التسويق، تسويق كبير جدا بيحصل لك وأنت شركة سهم مقيد في البورصة عن وأنت شركة مغلقة ممكن ميبقاش كل الناس تسمع عنك أو تعرف تفاصيل المنتج بتاعتك أو الخدمة بتاعتك اللي بتقدمها فكرة الحوكمة وإجبارك على احترام هيكلة معين أو ترتيبة معينة لإدارة الشركة بنموذج عمل معين سواء قبل الطرح عشان تبقى جاهز أو سواء بعد الطرح عشان تبقى مناسب وموافق مع اشتراطات البورصة والجهات الرقابية
طريقة شغلك بتخليك دايما تحت ضغط عشان أنت دايما محتاج تفصح عن كل حاجة، فأنت دايما كإدارة عليك الضغط بتاع فكرة إن أنا عندي نتائج أعمال ربع سنوية، فأنا مش مريح أنا لازم دايما أثبت نفسي عشان الربع اللي جاي أروح أقابل الناس في الجمعية وأقابل المساهمين اللي داخلين في البورصة في الجمعية، وأشرح لهم نموذج العمل بتاعنا، وأقول له أنا عملت إيه الربع اللي فات وأنا ناوي أعمل إيه الربع اللي جاي، كل ده حاجات مبتحصلش غير وأنت في شركة مقيدة، سيولة فاهم
حد من الشركاء بتوعك حب يتخارج في يوم من الأيام خلاص بقى عنده سهم مقيد في البورصة، يقدر يتخارج منه في يوم من الأيام، بدل ما يبقى في خلافات في شركات عائلية أو بعد عمر طويل يبقى حصص موروثة لعائلات والناس مش عارفة تقسمها وكل ده بيتحل ببساطة بفكرة القيد في البورصة فعشان كده بقول لك السؤال مش هو المفروض الناس تقيد شركاتها في البورصة ولا لأ على قد ما هو السؤال هو أنا اقيد شركتي في البورصة إمتى؟ بس يعني دي الحالة الدماغية بتاعت الرواد الأعمال اللي لازم يبقوا فيها، فاهم انا ده التارجت بتاعي أنا شايفه أنا رايح له، ونشوف بقى إيه أحسن طريقة أوصل له، وأحسن توقيت أنزل فيه
(14:15)
عمر: حلو جدا، إحنا هنا كده اتكلمنا بشكل سريع، الموضوع ممكن ياخد وقت أكتر من كده بكتير أكيد، بس اتكلمنا بشكل سريع على المرحلة ما قبل الإدراج، عايز بقى أتكلم على المرحلة بتاعت الإدراج نفسها، أخدت قرار أنت قعدت أربع شهور خلصت ورقك، قدمت ورقك والهيئة وافقت عليك، أنت خلاص نازل فمن هنا بقى عملية الإدراج بقى كان مدتها قد إيه يا مصطفى يعني من ساعة ما خدت الموافقة، لحد ما طرحت تقريبا قد إيه شهر شهرين في الرينج ده؟
مصطفى: تقريبا أه يعني بتبقى في حدود مثلا شهر، إن أنت مثلا تفتح بقى باب الاكتتاب الخاص اللي هو الطرح الخاص اللي هو بيبقى المستثمرين بملاءة مالية معينة أو مؤسسات أو كده وبتفتح بعديها باب الاكتتاب للطرح العام اللي هو مفتوح لكل الجمهور يقدر يكتتب فيه بأي شكل هو حابه وبس وبعد كده يبتدي التداول، فآه العملية دي من بدايتها لأخرها تقريبا بتاخدلها مثلا تقريبا شهر يعني
(15:20)
عمر: حلو، انا بقى أسئلتي هنا في الحتة دي، أنا عايز أعرف الشهر ده بقى أول سؤال عندي في الحتة بتاعة العملية نفسها للناس اللي متعرفش في حاجة اسمها Roadshow الحملة الترويجية للاكتتاب العام إنت بتبتدي تروح تقابل مستثمرين المحتملين اللي أنت بتشرح لهم الشركة، إحنا بنعمل إيه؟ بتعمل تعليم، خاصة إن أنت مثلا مش شركة بتصنع عربيات في حاجة معروفة، شركة فورد مثلاً، أنا شركة مش عارف إيه، فأنا زي الحاجات التانية، فأنت النهارده بتعمل تعليم في الحملة الترويجية عايز أتكلم معاك على إيه هو الـ Roadshow وعملت إيه؟ ورد الفعل المستثمرين كان شكله عامل إزاي؟
مصطفى: بص زي ما قلتلك هي Roadshow ده باختصار هو تسويق للطرح إن أنت إزاي بتشرح أو بتعمل وعي أو شرح أو تعليم للناس على الطرح، هو إيه الطرح؟ عبارة عن إيه؟ هي إيه الشركة بتعمل إيه؟ طب شكل الطرح إيه؟ طب حجم الطرح إيه؟ طب الطرح ده زيادة رأس مال ولا تخارج؟ طب هو التقييم بتاع الشركة تحسب إزاي؟ طب هو أنا ليه أخش الشركة دي ما أخش غيرها؟ يعني كل دي أسئلة بتدور، فده زي ما قلتلك في نوعين من المستثمرين، وفيه أدوات كتير في الRoadshow ده أو في طريقة التسويق أو في طريقة التعليم اللي بتحصل نوعين من المستثمرين زي ما قلت لك في الطرح الخاص للمستثمرين ذوي الملائة المالية أو للمؤسسات، فدي بتبقى ناس من حقها تكتتب بحصص كبيرة في الشركة، فدي بيتم التنسيق مع شركات التداول وده اللي إحنا عملناه، يمكن إن إحنا سوقنا لكل شركات التداول اللي موجودة في مصر، بحيث إن شركات التداول بتاعت الأوراق المالية هي دي اللي عندها الوصول او العلاقات مع المستثمرين اللي بيستثمروا في البورصة المصرية بشكل عام بالإضافة إن مدير الطرح بيدير الملف ده معاك فإنت النهاردة بتسوق الطرح عن طريق مدير الطرح وعن طريق شركات التداول للمساهمين وبتعمل لقاءات مع بعضهم بتشرح لهم هو ليه بقى الشركة دي كويسة؟ ليه الطرح ده كويس؟ طب إيه الإجراءات بتاعة الاكتتاب؟ طب ليه أكتتب؟ طب الحد الأقصى، الحد الأدنى، تقييم يتحسب إزاي؟ كل الحاجات، فده نوع من أنواع التسويق، تاني نوع من أنواع التسويق هو التسويق للطرح العام، إزاي تشرح لعدد أكبر من المساهمين من غير ما تقابلهم بقى طبعا مش هيبقى عندك رفاهية إن أنت تقابل شخص شخص تشرحله القصة فبتستخدم شوية حملات على سوشيال ميديا زي ما شرحت إن إنت ممكن تعمل إنترفيو وتتكلم مع الميديا، تشرح للشركات السمسرة ففي بعض شركات السمسرة وبعض مراكز البحوث بدأوا يكتبوا أوراق بحثية عن الإكتتاب وعن الشركة، فيبعتوها لعدد كبير من عملائهم على الإيميل، بدأت بعض الشركات تعمل حملات تسويقية على السوشيال ميديا عشان تستقطب عدد من المستثمرين أو المكتتبين يخشوا في الطرح، فكل دي بقى بتبقى حملات تسويقية بتحصل تصنف تحت طائلة الروتشو أو مرحلة التسويق للطرح ودي بتحصل عادة قبل فتح باب الطرح على طول بعد ما بتخلص إجراءاتك، وبعد ما بتاخد موافقة هيئة الرقابة المالية وتنشر نشرة الطرح، نشرة الطرح دي اللي هي بتبقى اللي فيها كل الإجراءات وكل الشروط والقواعد والافصاحات اللي الهيئة بتبقى طالباها منك بتعملها بيبقى ملف كبير كده، بيتنشر في الجرايد وبيتبعت للناس بيبقى منشور على شاشات البورصة لو حد عايز يقرأ أي حاجة شايف بقى ميزانيات الشركة التاريخية كلها، شايف إجراءات الطرح، شايف كل الإصلاحات بتاعت الشركة وكل حاجة من بعديها بقى بتبدأ تسوق بقى بشكل مكثف الطرح ده بحيث إنك توصل المعلومة لأكبر عدد ممكن من المكتتبين
(19:07)
عمر: تمام هايل حلو جدا، التسعير، أنت قلت في النص كده انت بتشرح للمستثمرين طريقة التسعير، إزاي بقى أنت كشركة أنت اللي بتقول أنت بتروح لمقيم بيقيمك؟ أنت قلت من الشركاء اللي كانو معاك حد بيقيمك، بس أنت كشركة إزاى بتفكر في سعر سهمك في الطرح مش بتكلم على التداول، وما بعد التداول، بس بتكلم على الطرح، إزاي أنا كرائد أعمال أقيم شركتي أو إيه اللي محتاج أعمله عشان أقيم شركتي عشان اعرف انا هيجيلي كام ما انا هبيع حصة منها، أنا إزاي أقيمها فعايز أتكلم ع على السعر؟
مصطفى: ماشي بصي هي طبعا زي ما قلتلك هو دايما ده بيبقى دور يمكن إحنا تاني في وضعنا، إحنا الموضوع كان شوية مختلف عشان دي شغلتنا برضه تقييم الأسهم تقييم الشركات وإدارة عمليات الطروحات وكلام من ده عندنا فيها باع طويل بس عادة أي شركة بتطرح في البورصة بيبقى عندها مدير طرح، مدير الطرح ده هو بيبقى بمثابة المستشار بتاع العملية دي، بيقوله والله بص أنا شايف دي الوقت السوق يقدر يشوفك، طبعا لما بتبقى شركة ليك نموذج عمل مماثل مقيد في البورصة بيبقى أسهل تقييمك عشان كده زي ما ذكرنا في أول الحلقة هو مكانش فيه نموذج عمل شبه أكت فبيبقى في بقى بعض الإرشادات اللي بتيجي ممكن من مدير الطرح يقوله والله أنت لازم تقيم بالمضاعف ده، أو بطريقة التقييم دي ويبدأ يبقى فيه كلام أو إتفاق على هي القيمة شكلها عامل إزاي؟ تجيب مستشار مالي مستقل، مستشار مالي مستقل، بيطلع لك قيمة عادلة للسهم، بيقولك والله الشركة النهارده بالتقييمات دي بطرق التقييم دي وده لازم يجي المستشار مالي معتمد مستقل برا الشركة خالص، ومعتمد من هيئة الرقابة المالية، وبيقدم تقريره لهيئة الرقابة المالية إن أنا ده التقرير بتاع القيمة العادلة، أنا دراسة القيمة العادلة بتاعت الشركة دي، أنا مقيم فيها الشركة بالسعر ده، بس أنت بقى كشركة أو كإدارة أو مساهمين للشركة دي بتبدأ تاخد قرار طب هل أنا عايز أطرح الشركة بنفس القيمة اللي طلعت من المستشار المالية المستقل ولا تراحها بقيمة أقل فدا يدي شوية حافز للمكتتبين إن هم يلاقوا إن فيه فرصة استثمارية ده بيبقى قرار داخلي بقى جوه كل شركة فيه بعض الشركات بتقول لك لا والله أنا بطرح الشركة بالقيمة العدلة اللي طلعت، أنا ما أقدرش كده كده إجرائيا وقانونيا متقدرش تطرح الشركة بأكتر من قيمتها العدل، فلو المستشار المالي المستقل طلع قيمة إنت من حقك كشركة تطرح بالقيمة دي أو بأقل منها، فإحنا مثلا في حالتنا قلنا لأ عشان تشجيعا للسوق زي ما قلت لك إن السوق مفيهوش طروحات بقاله فترة طويلة، وكلام من ده إحنا نعمل خصم على القيمة العادلة دي بحيث نشجع المكتتبين إن هم يكتتبوا في الشركة ويبقوا مشاركين في جزء على الخصم على القيمة العدلة دي فعملنا خصم على القيمة العادلة دي بحيث إننا نشجع الناس إنها تخش بس في الآخر التقييم بيبقى عن طريق المستشار المالي المستقل، الإسترشاد بالسوء يقبل إيه وميقبلش إيه بيبقى عن طريق مدير الطرح ووكلائه من شركات التداول الأوراق المالية والقرار النهائي بيبقى للشركة أنها تقيم طرحها على قد ايه بالظبط بعد المشورة دي
عمر: المعلومات دي عامه صح؟ يعني معلومة القيمة العادلة للسهم دي بتبقى مطروحة في نشرة الاكتتاب بتاعك صح؟
مصطفى: طبعا بيتم نشر ملخص التقرير بيبقى موجود في النشرة، هي القيمة اتحسبت إزاي؟ لأن المستشار المالي المستقل كل شركة بيقيمها بطريقة، فهو شايف إن الشركة دي يبقى التقييم فيها على طريقة مثلا إنه هيعمل مثلا تدفقات نقدية مثلا بيعمل تخفيض على التدفقات النقدية بيقيم بيها، أو مثلا لا الشركة دي أنا هقيمها بطريقة مضاعف الربحية فكل شركة بتقيمها بطريقة وعادة بيقيمها بكذا طريقة كمان وبياخد متوسط عشان ما يبقاش معتمد على طريقة واحدة للتقييم، وبيتم نشر التقرير ده بحيث إن أي حد بيكتتب في الشركة يبقى عارف المستشار المالي مستقل هو مطلع القيمة العدلة كام، ومش بس كام ومطلعها إزاي بحيث إن هو يقدر يناقشه فيها كمان لو هو عنده الخبرة الكافية أو يستخدم شركة السمسرة بتاعته أو مركز البحوث اللي بيشتغل معاه إن هو بيتناقش أو بيحلل التقييم ده ممكن يقولك، لأ والله التقييم ده مبالغ فيه، أنا رأيي إن الشركة تساوي أقل من كده، آه والله، التقييم ده منصف جداً، آه والله أنا التقييم ده ظالم للشركة أنا شايف الشركة تسوي أكتر من كده، فبيبقى في شفافية كاملة في عرض طريقة التقييم اتعملت إزاي
عمر: طيب بما إنها معلومات عامة في حالة آكت القيمة العادلة جت قد إيه؟ وسعر الطرح كان قد إيه؟ أنا مليش دعوة بأسعار السوق وبيتداول فين والكلام ده مش ده اهتمامي، أنا بتكلم في الطرح العام نفسه السعر كان كام في القيمة العادلة بما إنها معلومات عامة يعني عشان محدش بس يدور ويفتح الورق، إحنا عندنا المعلومة على طول، فقولنا كده القيمة العادلة جت قد إيه، وتقريبا سعر الطرح كان كام؟
مصطفى: والله بص إحنا القيمة العادلة اللي طلعت من المستشار المالي المستقل طلع 4 جنيه، 54 قرش للسهم، هديك بس يعني عشان تبقى عارف الخصومات اللي حصلت أو طريقة التقييم، فهو كان طلع كذا قيمة عادلة عمل فيهم متوسط لأنه هو استخدم كذا طريقة تقييم زي ما شرحت ويطلع بيهم متوسط، إن متوسط القيمة العادلة لحقوق الملكية بتاعت الشركة هي 4 جنيه 54 قرش، بعد كده عمل عليها خصمين عادة بيتعملوا كاسترشادي من هيئة الرقابة المالية اللي هو 10% خصم للسيولة علشان هو لسه الشركة جديدة فلسه ممكن يكون معلهاش سيولة كافية، وبيعمل 10% خصم تاني عشان دي حصة أقلية مش حصة آه كنترول، بمعنى إيه إن تقييم الشركة على بعض هو شايفها يساوي 4 جنيه 54 قرش لكل سهل لو هتشتري الشركة كاملة بس بما إني بطرح حصة أقلية اللي هي الحصة نسبتها صغيرة في الشركة فا بعمل عليها خصم إن دي أقلية مش تقييم الكامل يعني، فعمل 10% تانيين، وبعد كده روحنا إحنا جايين، قلنا لأ، خلاص إحنا هننزل بقى نزل من 4.54 نزل لـ 3.63 قلنا لأ إحنا كمان 20% خصم إضافي تشجيعا للمكتتبين إن هو يبقى شايف ال أو معانا، فنزلنا بسعر الطرح لـ 2.90 بس نزل السهم تداول فعلا بـ 2.90 جنيه تم تغطية السهم بشكل كبير والحمد لله أول يوم تداول طلع 30% فبقى كل المكتتبين اللي دخلوا استفادوا وحسوا بقيمة الخصم اللي حصل ده إنهم بقوا داخلين بقيمة كويسة وخدوا الطالعة بتاعة الاستثمار بتاعهم في البورصة
عمر: تمام وإحنا برضه إحنا بنقول القيمة العادلة دي هي طريقة من الطرق الاسترشادية يعني زي ما أنت قلت في أول الحلقة فيه شركات بتقعد فترة طويلة بتشتغل فوق القيمة العادلة بتاعتها، وفيه شركات بتقعد فترة طويلة تحت القيمة العادلة، فده بقى يرجع لحالة السوق والأخبار وحاجات كتير جدا، يعني مش هنخش فيها النهار بتشتغل ده
مصطفى: بس فيه نقطة مهمة تانية يا عمر إن القيمة العادلة دي كمان بتتغير، يعني هي عدالتها في إنها بتتغير مع التغيرات الشركة ومع تغيرات الظروف وممكن تبقى القيمة العادلة للشركة بظروف معينة ممكن تبقى بعد ثلاث شهور القيمة العادية دي اتغيرت نتيجة تطورات مختلفة الشركة مثلا عملت أداء كويس أوي، فالمقيم يرفع القيمة العادلة أو الشركة مثلا طلع قرار يضرها ينزل القيمة العادلة، بعد كده فهي دي قيمة متغيرة برضه دايما عشان كده مراكز البحوث وشركات الاستثمار دايما بتطلع توصيات على الأسهم بشكل مستمر بحيث إنها توضح للناس دايما القيم العادلة بتاعت الشركات كام
(27:00)
عمر: حلو أوي، أنا أسئلتي الجاية دلوقتي ايه اللي حصل في أول يوم ليستنج؟ لإن ده دايما يوم كبير بيحصل، أنت قلت الأسهم طلعت يمكن 30% في أول يوم، وده بسبب إن أنتوا كنتوا مديين التخفيض للمساهمين بتاعكوا، وأكيد كنت قايل الكلام ده وانت بتشرح للمساهمين أصلا، يعني الكلام ده عام يعني مش حاجة مثلا سرية، أنا أعتقد أنت يعني ذكرتها أكيد للمساهمين بأو في ال الطرح بتاعك فا فدا فدا بيب بيبقى حاجة كويسة تشجع المستثمرين لما يشوفو الأسهم طالعة في التداول والكلام ده كله ممكن يشجع ناس آه جديدة تيجي معرفتش تاخد مثلا كميات في الطرح اللي هي عايزاها والكلام ده كله، فأنت كلمتني على الموضوع ده رد فعل السوق بشكل عام فاجأك حسيت إن أنت متفاجئ قبل ما شفت الكلام ده، ولا ولا لأ كإدارة يعني هل اتبسطتوا من الأداء بتاع الأسهم في الطرح العام كله وكعملية وأول يوم تداول أو في الفترة الأولى؟
مصطفى: والله بص بصراحة اللي فاجئنا كان الإقبال وعدد المكتتبين هو ده اللي كان يمكن مختلف لان انا زي ما قلتلك السوق بقاله كتير مفهوش طروحات، ففكرة إن إنت يجيلك أكتر من 20,000 مكتتب، ودي عمرها ما حصلت زي ما قلتلك قبل كده في تاريخ الاكتتابات يعني مش عايز بس أجزم إحصائيا إن أنا صح بس يعني على قد الذاكرة يعني تقريبا عمري ما شفت كعدد
عمر: كأعداد أه ممكن بقى مصرية اتصالات مثلا في 2006 مثلا أو حاجة اللي هو أنت عايز حاجة كبيرة قوي، أنا فاكر مثلا
مصطفى: أه أنا حتى برضو مش متأكد إن كان فيه هذا العدد، بس يمكن وارد يعني م من زمان قوي 20 سنة فمش متذكرة، بس يعني حاجة كده فده بصراحة كانت أكبر مفاجأة بالنسبة لنا التغطية كانت خطيرة إن أنت الطرح الخاص بتاعك هتغطى أكثر من 20 مرة، طرح العالم اتغطى أكتر من 55 مرة، عدد مكتتبين كبير فخلاص، فبصراحة لما ده حصل أنت تطمنت شوية بقى فلما الأسهم بدأت تتداول عارف خلاص ما تفاجئتش بقى ما أنت شفته الطلب وشفت الأقبال، وشفت الشهية جاية على الأسهم إزاي وبتاع فخلاص فمتوقع بقى لما يجيلك كل عدد من الناس عايزة تكتتب وعايزة تشتري الشركة، فمن الطبيعي إن الأسهم تبدأ تتحرك، فالسهم الحمد لله متداول دلوقتي بقاله 3 أسابيع ومحافظ على نسب تداول كويسة وزي ما قلتلك في أول يوم عمل تقريبا 30% أوحاجة ب30% في أول يوم تداول، وبدأ بقى يتحرك حوالين الرينج ده من ساعتها
عمر: فالأداء بشكل عام مرضي
مصطفى: أه، مرضي جدا، تمام
عمر: بكده نكون وصلنا لنهاية الجزء التاني ان شاء الله هنلعب الجزء الاخير الاسبوع الجاي وشكراً جداً على وقتكم وان شاء الله اشوفكم الاسبوع الحاي
Translation of some words and terms:
Due Diligence العناية اللازمة
Argument جدال
Challenges تحديات
Active نشط
Demand طلب
Appetite شهية
Partners شركاء
Investment Bank بنك استثماري
Outsource مصادر خارجية
Marketing Agencies وكالات التسويق
Process عملية
Share مشاركة
Placement Agent وكيل تسويق
Core الجوهر
Exclusivity الحصرية
Media Coverage التغطية الإعلامية
Potential محتمل
Roadshow حملة ترويجية
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي #الطرح_العام #أكت_فايننشال #الجزء_الثاني