174. الطرح العام لشركة Act Financial من الفكرة إلى التنفيذ - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
شركة أكت فاينانشال وضيفنا أ/ مصطفى عبد العزيز من أوائل الناس اللي دعمونا من أول ما بدأنا كلام ينور، النهاردة حابين نبارك لهم على انجاز كبير حققته الشركة الفترة دي وهو الطرح العام في البورصة المصرية
الهدف من حلقة النهاردة مش اننا ننصحك تشتري أو تبيع أسهم في شركة أكت فاينانشال، هدفنا اننا ننقلك التجربة من أول الفكرة لحد التنفيذ ونشوف المراحل اللي مرت بيها الشركة لحد ما وصلت للطرح العام في البورصة المصرية
أ/ مصطفى عبد العزيز هو العضو المنتدب والشريك المؤسس لشركة ACT Financial خبرة كبيرة في أسواق رأس المال في مصر والشرق الأوسط وشمال إفريقيا
تقدروا تتواصلوا مع مصطفى على: Mostafa Abdelaziz @LinkedIn
الحلقات السابقة مع مصطفى عبد العزيز كان فيها معلومات مهمة ليها علاقة بحلقة النهاردة لو حابب ترجع تسمع الحلقات: 9 85 86
:في الجزء الأول
(03:30) لو ممكن في الأول تشرح لنا باختصار إيه هي أكت فاينانشالوبتعملوا ايه بالظبط؟
(05:30) هل في شركات في البورصة المصرية عندها نفس الموديل اللي أنتم شغالين بيه ولا أكت فاينانشالتعتبر أول شركة تحقق المعادلة دي؟
(10:05) انتم بتاخدوا حصص أقلية في الشركات اللي على البورصة وبيحاولوا تنشطوا الإدارة فيها، عايز أعرف بتساعدوا الشركات دي ازاي؟
(16:27) لاحظت إنكم مركزين أكتر على عدد محدود من الشركات أو قطاع معين، على عكس شركات إدارة الأصول اللي بتوزع استثماراتها على عدد كبير من الأسهم، هل أنتم برضه متركزين في قطاع أو شركتين بالأساس؟
(18:33) لو حد عايز يبقى مستثمر معاكوا، يعمل ده إزاي؟ هل لو اشترى أسهم أكت اللي موجودة في البورصة ابقى كده شريك معاكوا بشكل مباشر؟
(19:58) هل حصل أي تخارج من المديرين أو الموظفين خلال الطرح العام؟ يعني هل حد من الإدارة باع حصته ولا كل الفلوس اللي جمعت داخلة جديدة للشركة؟
(22:35) زي ما فيه إفصاحات على الشراء من الإدارة، فيه برضه إفصاحات على البيع؟
(24:25) إمتى قررتوا تطرحوا الشركة في البورصة، إيه الوقت المناسب؟
(27:28) عشان تبقى جاهز للطرح، المفروض تبدأ تحضر من قبلها بسنتين أو تلاتة؟
استنوا الجزء الثانى مع مصطفى عبد العزيز الاسبوع الجاي
اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلا بيكم في حلقة جديدة من بودكاست كلام ينور، النهاردة معانا الأستاذ مصطفى عبد العزيز
بشكر مصطفى إن هو شرفنا تاني بعد ما عمل معايا حلقتين حلقة رقم 9 والحلقة رقم 85 واتذاعت على جزئين 85 و86 فشكرا جدا لمصطفى، أنا باذكر الحلقات القديمة دي عشان لو حد حابب يرجع يسمع الحلقات دي لإن كان فيها معلومات مهمة لها علاقة بحلقة النهاردة فمرسي جدا يا مصطفى على وقتك معانا أنا سعيد جدا إن أنت جيت معانا النهارده بعد إنجاز كبير أو حاجة كبيرة حصلت لأكت فاينانشال
أكت فايننشال هي معانا في البودكاست من أوائل الناس اللي كانوا بيدعمونا، ومصطفى يعني صديق عزيز من زمان، النهارده عايز أباركله على طرح الشركة بتاعته في البورصة المصرية فمبروك يا مصطفى أول حاجة عايز أباركلك على الخطوة الكبيرة دي
مصطفى: لا شكرا، أنت يعني كنت شايف يعني أو شاهد على القصة من بدايتها خالص، وشفت الشركة وهي فكرة وشفت الشركة وهي بتتأسس وشفت الشركة وهي بتكبر والنهاردة بتطرح في البورصة فيمكن شفنا مراحل الحدوتة كلها بناء القصة كله من من أوله لآخره يعني
عمر: لأ، هي حاجة تفرحنا طبعا ونشوف شركات بتبتدي من فكرة وتوصل لحد البورصة يعني ده من الحاجات البورصة مهمة جدا بتعملها إن هي تأخد الشركات حتى وتروح بيها بقى في حتة تانية بإذن الله يعني بعد وجودك علناً كده إن شاء الله تبقى دي خطوة كمان تزق القصة لقدام لسه كمان أكبر من إللي حصل يعني إن شاء الله
مصطفى: إن شاء الله يعني هي دايما بنقول إن الخطوة دي على قد ما تبان انها هدف بس هي بداية مرحلة مهمة قوي وبداية مرحلة جديدة خالص بتاخد الشركة في حتة تانية برأس مال مختلف بهيكل ملكية مختلف بحوكمة مختلفة لإدارة الشركة، يعني كل حاجة بتتغير يمكن هنتكلم عليها أكتر في البودكاست شكل الشركة قبل وبعد الطرح، بس هي بعد الطرح الهيكل بتاع الشركة كله بيتهيألي بيختلف تماما يعني
عمر: بالظبط وإن شاء الله دي يعني أنا دايما بقول كده إن الناس بتبقى متخيلة زي ما أنت قلت بالظبط إن الهدف هو الطرح، لأ هو الهدف مش الطرح، الطرح دي نقطة أصلا ممكن تبقى إللي بعديها كتير جدا، شوفنا حتى شركات عالمية كبيرة جدا الماركت كاب بتاعها والقيمة السوقية والسوق بتاعها كبر جدا جدا بعد ما اطرحت في الاسواق يعني دي بتبقى خطوة أصلا عشان تكبر بشكل أسرع
مصطفى: مظبوط
(03:30)
عمر: عايز أبتدي كده معاك، يعني أول حاجة عايز أقولها للناس اللي بتسمعنا أول مرة ومتعرفش أكت فاينانشال خلينا ناخد كده ملخص سريع مين أكت فاينانشال ، بتعملوا إيه وإيه المجال بتاعكوا والكلام ده كله؟
مصطفى: أكيد، إحنا شركة استثمار مصرية بتستثمر في شركات مصرية، أسسنا الشركة في 2015 بهدف فكرة الاستثمار النشط اللي هو الإستثمار المؤثر، تخصصنا شوية في حتة اسمها اللي هي الإعتماد أننا بنستثمر في حصص أقلية مؤثرة في شركات مقيدة، بحيث إن احنا نبقى مستثمر مؤثر في شركات بحصص معينة والتأثير بتاعنا ده أو وجودنا كمستثمر نشط جوا الشركة بيخلق قيمة لفرصة الاستثمار اللي بنخش فيها دي بنتخارج، فديرنا استثمارات كتير دخلنا في استثمارات كتير وتخارجنا، الهدف من وجودنا في الاستثمارات دي هو تحقيق أعلى عائد على حقوق الملكية وعلى رأس مال الشركة والحمد لله اتوفقنا في كده من أول ما أسسنا الشركة في 2015 ولما وصلنا لحجم معين من النجاحات والاستثمارات والقطاعات إللي دخلنا فيها وخرجنا منها وحققنا عوائد معينة بنسب كبيرة لمساهمين الشركة قلنا بقى نشارك التجربة دي مع عدد أكبر من المساهمين في شكل زيادة رأس مال في شكل طرح في البورصة،إن الناس تخش تستثمر في سهم أكت كشركة استثمارية تستثمر في شركات في قطاعات متعددة بشكل نشط وبشكل معتمد على آه خلق قيمة كبيرة للاستثمارات دي في أسرع فرصة ممكنة، وتوزيع أرباحها على المساهمين
(05:30)
عمر: هل في شركات شبهك في البورصة المصرية؟ أو عملت نفس الموديل ده أو طرحت في البورصة؟ ولا أكتف فايننشال تعتبر هي أول واحدة وصلت للمعادلة دي؟
مصطفى: لا والله بص هي ويمكن ده كان كان شوية تحدي وإحنا بنسوق الشركة عادة وأنت بتسوق الطروحات المستثمرين بيبقو عايزين يقارنوك بشركة تانية، يقولك يعني إنت شبه شركة كذا، ففي بعض الناس في الأول كانت تقول لك يعني أنت شبه البنوك الاستثمارية مثلا شبه مثلا شركات إدارة الأصول مثلا بتدير فلوس ناس، فنقول لهم لأ إحنا مش بندير فلوس ناس، إحنا صحيح عندنا تحالفات مع بعض المستثمرين، لكن إحنا مش شركة إدارة أصول، إحنا شركة استثمار فيقول لك أه يعني أنت مثلا شركة استثمار شبه شركة كذا مثلا، فنقول له لأ، بس شركة الاستثمار دي دي شركة عندها شركات تابعة بتاخد حصص حاكمة في قطاعات معينة أو في شركات معينة، فاهم فنموذج العمل بالشكل بتاعنا ده مكنش له نموذج مماثل في مصر، ولا حتى يمكن في المنطقة، يعني يمكن فيه شوية حاجات في أمريكا طبعا في حتة الاستثمار النشط ده موجودة، فكنا ينضرب بيها الأمثلة بنوضح بيها للناس شوية، بس طبعا خلتنا فيه شوية مجهود في الأول على فكرة توضيح بزنس مودل ده إن هو بزنس مودل مختلف في شوية مزايا إن أنت بتقدر تستثمر بشكل سريع، لأن إحنا كل استثماراتنا حتى الآن كانت في أسهم مقيدة، فبتقدر تاخد قرار الاستثمار بشكل سريع، تقدر تخش في الاستثمار بشكل سريع، تقدر تعيد تقييم استثماراتك أو تخلق قيمة لقيمة الأسهم إللي أنت بتستثمر فيها دي بشكل سريع، وتقدر تتخارج من الاستثمار بشكل سهل على عكس أو الاستثمار في شركات غير مقيدة بيبقى طبعا الفحص النافي للجهالة اللي بتعمله على الشركات دي بياخد وقت طويل جدا، الاتفاق على تقييم للشركات دي بياخد وقت طويل جدا، لأن عكس البورصة البورصة بتبقى عارف وإنت بتشتري السهم، النهارده أنا عارف قيمة السهم النهار ده كام فأقدر آخد قرار إذا كنت عاجبني التقييم ولا لأ، عكس الشركات الغير مقيدة، القدرة على إحداث تغيير بيفرق كتير في الشركات المقيدة، فالنموذج ده يمكن مختلف شوية مش زي النماذج التانية إللي موجودة في مصر أو في المنطقة وده كان الأول صعب شوية بس برضه كان ميزة لإن الناس كانت مهتمة إنها تسمع حدوتة جديدة شكل جديد لشركات الاستثمار خصوصاً إن الحمد لله يمكن يعني علشان أنا موجود في الشركة من ساعة التأسيس للنهاردة فرقت كتير أوي، وإحنا بنقول للناس شركائنا يخشو معانا في الأول عند التأسيس، وإنت بتتكلم مع الناس، النهاردة في الأول عند التأسيس كان الموضوع مجرد فكرة، النهاردة أنت عندك 10 سنين فيهم بيانات الاعتماد فيهم ميزانيات، فيهم أرقام، فيهم استثمارات حصلت وتم التخارج منها، وتم توزيع الأرباح، فخلاص البزنس مودل بقى ممتحن يعني عندك 10 سنين من النجاحات الحمد لله المتكررة فالبزنس موديل بقى ممتحن فالناس بقت مصدقة اللي بتسمعه أكتر من الأول
عمر: وأنت زي ما قلت أنت عندك نماذج لشركات عالمية بالذات في البورصة الأمريكية بتعمل نفس الموضوع، فأنت مش بتخترع حاجة جديدة
مصطفى : بالظبط في ناس بتحاول تمصرها تاخد ممكن حتة من نموذج على حتة تانية من نموذج بتحاول تشوف إيه المناسب لشكل الاستثمار، إحنا حتى يمكن أنا فاكر وإحنا بنسمي الشركة أكت كان الهدف من الاسم إن أنت بتتحرك وبتتكيف وبتبقى فيه نشاط وفي أكشن في الموضوع إن أنت بتتكيف للظروف، لإن في اقتصاديات شبه مصر، انت لازم تبقى دايما بتتحرك مع السوق، تعرف تخش في استثمار، تعرف تغير اتجاهك بسرعة، وتعرف تاخد قرار أسرع من الاستثمارات اللي ممكن تبقى طويلة الأجل بزيادة ممكن تبقى فيها مخاطرة إن الدنيا تتغير لأن ظروف الماركت بالذات، العشر سنين اللي فاتو دول إحنا شفنا تقلبات كبيرة قوي من تغيرات داخلية لتغيرات إقليمية لتغيرات عالمية، يعني إحنا لو تبص للعشر سنين إللي أنا بكلمك عليهم دول إحنا بنتكلم فيهم على كذا تعويم حصل بنتكلم فيهم على كورونا حصلت بنتكلم فيهم على حروب أوكرانيا وتأثيرها على الاقتصاد العالمي، والقلق الجيوسياسي الموجود في المنطقة عندنا فكل دي تغيرات لازم إنت تبقى جاهز بإن أنت تعرف تتحرك، فاهم فنموذج العمل لازم يبقى منرن ومطاط إنك تعرف تتحرك بيه بسرعة
(10:05)
عمر: أنت ما بتاخدش حصص حاكمة في الشركات، يعني أنت ذكرتها كده في نص كلامك، أنت بتاخد نسبة أقلية في شركات موجودة على البورصة وبتحاول تعمل شوية نشاط اللي هو مثلا يا جماعة فيه مثلا حاجة ممكن تتعمل أحسن في الإدارة في الكلام ده، عايز أتكلم برضو على التفاعليه كمفهوم إن أنت إزاي ممكن وجودك كمستثمر يأثر على نتائج أعمال الشركة اللي انت اشتريتها في المستقبل هل أنت بتساعدهم، بتديهم نصايح، بتقابل الإدارات حتة التفاعل نفسها بقى شكلها عامل إزاي؟
مصطفى: بص هي الهدف من وجود الشركات أو الاستثمار في شركات مقيدة في البورصة، مش هدف على قد ما هو بيحل مشاكل كتير قوي، يعني زي ما قلت لك أنت أولا بتحل مشاكل أزمة الاتفاق على تقييم، لأن أنا النهاردة لو رحت لشركة غير مقيدة وقعدت مع صاحبها بافتراض انها شركة شغالة كويس، وحاولت استثمر فيها معاه، فهو هيبيعهالي بقيمتها العادلة مش مضطر يبيعها لي بخصم عن قيمتها العادلة، مظبوط؟ لإنه مش مضطر على كده، لكن عكس البورصة بقى، البورصة عادة ما بتلاقي فيها شركات بتتداول بأقل بكثير من قيامها العدلة لأسباب بقى ممكن يطول شرحها، هي ليه الشركات أحيانا بيتم تداولها بأقل من قيامها العادلة في أسباب كتير، فوجودك أولا دي أول حاجة بتخش تاخد فيها حصة الأقلية، طبعا وجودك كحصة أقلية بيخليك عندك ومرونة أكتر في الدخول وفي الخروج، لأن أنت لو خدت حصة حاكمة بقيت خلاص أنت المتحكم في الشركة لازم يبقى التخارج منها يتم بشكل إستراتيجي بشكل مختلف شوية خصوصاً كمان لو أنت بتشتغل على شركات مقيدة ففي يعني قواعد معينة للقيد ده إن أنت لو خدت حصة تتخطى نسبة معينة لازم تشتري الشركة بالكامل مينفعش تاخد مثلا 50 أو 60 % من الشركة فقط لا خلاص لو عديت 33% من الشركة في القانون المصري لازم تعمل عرض شراء على إجمالي أسهم الشركة فاحنا قلنا طب خلاص في فرصة كويسة إن احنا ناخد حصص أقلية مؤثرة بمعنى إيه أقلية مؤثرة إن أنا مش متحكم مش أنا الحصة الحاكمة، بس أنا حصة كبيرة كفاية إن الإدارة والجمعية كمساهمين الشركة يسمعوا رأيي وقلنا طب خلاص النهارده مصر فيها شركات كويسة جدا بتتداول في البورصة المصرية، باقل بكتير من قيامها العادلة لأسباب زي ما قلنا يطول شرحها، فأنا إيه إللي يخليني أروح آخد شركات أو استثمر في شركات فيها مشاكل عشان أحل المشاكل عشان قيمتها تطلع، لما أنا ممكن ألاقي شركات جيدة، يعني احنا كل الاستثمارات اللي دخلنا فيها هي شركات قوية، شركات عندها براند نيم قوي جدا في مصر، عندها ميزانيات قوية وكل حاجة بس أنت وجودك كتفاعل أو نشاط بتعمله بنسميه بمعنى إن الشركة بتبقى عادة الإدارة بتبقى مركزة قوي في الأعمال التشغيلية بتاعها في الشغل إللي هما بيعرفوا يعملوه، بس مش شرط تكون الإدارة مركزة في قيمة الاستثمار بتاع المستثمر، الناس بتنسى زي ما ورين بافت بيقول كده يعني فاهم الناس بتنسى الإدارة بتنسى إن هم شغالين من أجل هدف واحد، إن قيمة الاستثمارات بتاعت مساهمين الشركة تعلى لأن في الآخر هي ده هدفه تأسيس الشركات عموما، أي حد بيأسس شركة وبيستثمر فيها يستثمر فيها عشان يعمل فلوس عشان يكسب فلوس على حصته، فالإدارة ساعات ما بتركزش في قيمة استثمارات المساهمين بتاعهم، فده بيبقى يخش بقى بيبقى دورنا إحنا ننصح الشركات دي إزاي ممكن يعملوا إيه عشان قيمة أسهمهم تطلع، عشان الناس تشوف القيمة بتاعت الشركة دي عشان الناس تبقى مستعدة تدفع مضاعفات أكبر في الشركة دي عشان شايفين قيمة معينة، هل مثلا في اندماجات أو استحوازات معينة ممكن الشركات دي تعملها فتفيد الشركة أو تفيد التقييم بتاع الشركة هل هيكل الملكية لو اتغير بشكل معين ده يفيد القيمة والتقييم بتاع الشركة ولا لأ؟ كل ده اللي نحنا بنقعد نشتغل عليه بقى مع إدارة الشركة ومع المساهمين بتوع الشركة، بحيث نوصل لأحسن قيمة نقدر نطلعها من الشركات دي في أسرع فرصة وبعد كده بنتخارج ونخش في استثمارات أخرى
(14:47)
عمر: يعني أنت بتوقف جنب المساهم يعني أنت دورك يعني الشركات إللي أنت بتشتريها بتحاول زي ما تقول بترجع الإدارات للكونسبت الرئيسي إن هما نزلوا للبورصة عشانه إن هما يعملوا خلق أو زيادة في الاسهم أو أيا كان بقى مسماها إن أنت بتبقى واقف جنب المستثمر يعني
مصطفى: بالظبط كده، وبساعد الإدارة لإن احياناً تبقى الإدارة بتحاول وعايزة بس هو ممكن يكون معندوش الخبرة الكافية في بعض الأبعاد إللي ليها علاقة بالأسهم، وبالتعامل مع المستثمرين، والكلام ده لأن دي خبرتنا ممكن طبعا الإدارة بيبقى عندهم خبرة أكبر في إدارة النشاط نفسه علشان كده إحنا دايما حتى مبنحبش نخش في شركات تكون فيها إدارة سيئة مش عارفة تدير النشاط، بالعكس إحنا كل الشركات إللي دخلنا فيها إدارات ناجحة، بس إحنا بنساعدهم إن إيدينا في إيديهم نقدر نخلق قيمة أكبر لحقوق المساهمين، وأكبر دليل على إن إحنا مع بعض في كفة واحدة كلنا إن إحنا في الآخر بنبقى أكبر مساهم في الشركة دي لإن إحنا بناخد من أكبر الحصص اللي بتبقى في الشركة بتبقى إحنا ففي الآخر إحنا مساهمين في الشركة إحنا عندنا الاهتمام، إحنا مش جايين نبعلكم نصيحة أو نساعدكم مقابل مثلا إن إحنا ناخد أتعاب على المساعدة دي أو كده لأ، بالعكس إحنا حاطين رأس مال الشركة بتاعنا جوا استثمار جوا الشركة دي فكلنا من مصلحتنا إن الاستثمار ده تبقى قيمته أعلى، عشان كده كل الناس بتبقى مرحبه وشايفين بتاعة القيمة وجود مستثمر نشط داخل الشركة لإن نحنا ملناش غير هدف واحد إن نحنا في الآخر نرفع قيمة استثمارنا وبالتباعية استثمارات كل المساهمين اللي معانا في الشركة
(16:27)
عمر: يعني أنا برضو لاحظت حاجة في البزنس موديل بتاعك، أنت قلت كلمة شركات إدارة الأصول، شركات إدارة الأصول بتبقى دايما موزعة استثماراتها في شركات كتير، يعني بتلاقي المحافظ فيها 30 سهم، 40 سهم، إللي أنا فاهمه إن النشاط برضو بيبقى مركز على شركات معينة أو قطاع معينه يعني مبيبقاش عدد الأسهم كبير، هل ده موجود عندكم برضه؟ إن أنت بتبقى استثماراتك متركزة في قطاع معين أو في شركة معينة بنسبة كبيرة من رأس مالك؟
مصطفى: مظبوط آه، لأن هي طبعا زي ما اتفقنا احنا بيبقى فيه مجهود بيتحط في الاستثمار، فاحنا مبنختارش يعني إي شركة إدارة الأصول زي ما أنت قلت بتبقى شركة قايمة على إن هي بتحاول تختار عدد كبير من الأسهم متوزع فيها المخاطرة على عدد كبير من الاستثمارات ويشوف إيه أرخص استثمارات موجودة فرص في السوق ويبدء يحط فيها التوزيعة بتاعت استثماراته، إحنا ما بنعملش كده، إحنا زي ما قلت لك إحنا بنخش بناخد حصة كبيرة في الشركة فلازم استثماراتنا تبقى متركزة في عدد شركات معين عادة بنستهدف 3 شركات نستثمر فيها بحيث نحط فيها رأس مالي يبقى الرأسمال ده مؤثر لأن أنا مش عايز أبقى واخد نطاق واسع أبقى عندي 0.5% من الشركة ديت 0.5% من الشركة ديت و0.5% من الشركة دي لأ، أنا عايز يبقى عندي 20% من شركة اكس، عايز يبقى عندي 30% من شركة واي، عايز يبقى عندي 10% منشركة زد وأبدأ أتحرك بوجودي ده، فلازم أبقى عندي حصة مؤثرة، ثانيا عايز أبقى مركز عشان أعرف أبقى بغير في الشركة، لأن أنا زي ما قلت لك أنا مستثمر نشط النشاط فيه مجهود، مش مجرد إن فيه اختيار للأسهم الجيدة على قد ما هو فيها خلق للقيمة ففي جهد بيتحط إن أنا إزاي هقدر أطلع قيمة كبيرة من الاستثمارات إللي أنا بخش فيها في السهم إللي أنا دخلته أو في الشركة إللي أنا دخلتها، فبتبقى فعلا مركز جداً زي ما أنت قلته عادة بنستهدف 3 أسهم أو 3 شركات
(18:33)
عمر: تمام، يعني هنا النهارده لو أنا عايز أبقى مستثمر معاك مع وجودك في البورصة، فأنا لو اشتريت السهم من أسهم أكت اللي هي موجودة على البورصة فأنا بعتبر شريك معاك على طول مباشرة، صح؟ يعني عشان برضو الناس إللي هي مش فاهمة قوي فكرة طب أنا لو عايز أستثمر معاك أستثمر معاك إزاي عن طريق شراء أسهمك، مظبوط كده؟
مصطفى: بالظبط هو سهم أكت هو النهارده، إحنا كلنا كمؤسسين وكأعضاء مجلس الإدارة إللي أسسوا الشركة، وكمؤسسين تنفيذيين وكمستثمرين جدد، النهاردة بمجرد إن السهم بقى مقيد في البورصة، بقى خلاص كلنا مع بعض شركة، فبمجرد أي حد بيشتري السهم بتاع الشركة بيبقى خلاص هو شريك في قصة الاستثمار بتاعت أكت، أكت بقى بتعمل إيه برأس المال اللي جواها بتعمل إستثمارات بتحاول إنها تطلع أكبر قيمة مضافة ممكنة على استثماراتها، دائما بنستهدف إن احنا نعمل عائد على الاستثمار وعائد على حقوق الملكية يكون كبير يشجع الناس إنها تخش دايما معانا، ويشجع المستثمرين الموجودين معانا إنهم يبقوا راضيين عن الأداء ده، وبنحاول نطلع عائد كبير على الاستثمار بحيث إن هو يسمحلنا إن إحنا دايما نوزع كوبونات أرباح على المساهمين إللي جوا الشركة فأي حد طبعا بيبقى حامل للسهم بيبقى واخد نفس حقوق كل المساهمين إللي موجودين جوا الشركة
(19:58)
عمر: طيب أنا عارف دي معلومات عامة هل حصل أي تخارج من المديرين أو الناس الموظفين إللي موجودين جوه أكت في الطرح العام؟ للناس برضو إللي هي مش عارفة قوي أنت الشركة يا بتلم فلوس تخش زي زيادة رأس مال جوه الشركة، أو بيحصل بيع من الحصص بتاع المديرين إللي جوا الشركة، فهل حصل أي بيع من المديرين؟ ولا الفلوس الجديدة كلها داخله فريش الشركة؟
مصطفى: لا هو زي ما أنت قلت هو في الآخر الطرح بيبقى بإنك بتدي أسهم لمستثمرين جداد، فيا بتصدر لهم أسهم جديدة وتديهالهم عن طريق زيادة رأس المال، يا بتديهم جزء من أسهمك، ك من المؤسسين يا جزء وجزء احنا اللي عملناه، وده يمكن برضه كان هدفه برضه إن احنا نوضح للناس إن محدش شايف فرصة استثمار أحسن لأنه عادة بيجيلك السؤال، لو أنت بتبيع أسهم أكت طب هتاخد فلوس تعمل بيها إيه تاني؟ يعني لو أنت شايف إن الفرصة الاستثمارية هنا أحسن، وده فعلا اللي احنا شايفينه، لو في أي حد من المستثمرين الحاليين موجودين في أكت، عايز يبيع فده معناه إن هو شايف إن عنده فرصة استثمار كويسة، بصراحة كان أحسن حاجة في الطرح إن هو كان بالكامل زيادة رأس مال مفيش حد من الإدارة التنفيذية خالص باع والألطف من كده كمان إن مفيش حتى من المساهمين إللي كانوا دخلو من زمان في الشركة غير الإدارة التنفيذية، يعني المستثمرين الماليين أو المستثمرين إللي دخلوا معانا في الشركة، محدش منهم حد يبيع خالص، بالعكس ده يمكن فيه ناس بتشتري سهم يعني فيه إفصاحات كتيرة على الشراء إللي موجود في السوق، فالمستثمرين محدش منهم عايز يتخارج من الشركة كلها كانت أسهم زيادة رأس مال، وده بيطمن قوي المستثمر اللي داخل إن هو حاسس إن هو داخل أولا متطمن إن مفيش حد عايز يتخارج من السهم فده بيطمنه لأن مؤسسين الشركة والناس إللي موجودة فيها عاجبهم البزنس موديل، وقاعدين ومكملين ومشاركين بعض وده أكبر إثبات على إن احنا في رؤية مشتركة، وتاني حاجة إن الاكتتاب في الصورة زيادة رأس المال ده الهدف الأسمى من قيد الشركات في البورصة، إن في الآخر قيد الشركات في البورصة، هدفه الرئيسي إن إنت إزاي تدخل رؤوس أموال جوا الشركات تساعدها على النمو فإزاي نقدر ندخل مستثمرين جدد بالميكانيزم بتاعت وجودها مقيدة في البورصة المصرية، والناس تحط فلوس الفلوس دي تخش في زيادة رأس مال، فيبقى الشركة معاها راس مال أكبر تستثمره وتكبر وتكبر من استثماراتها ونشاطها في السوق، فده طبعا بيبقى مفيد أكثر بكتير في حالة قيد الشركات عن طريق زيادة رؤوس أموالها مش عن طريق تخارج من المستثمرين الحاليين
(22:35)
عمر: تمام، وطبعا زي ما أنت بتقول كده زي ما بيبقى فيه إفصاحات على الشراء من الإدارة برضو بيبقى فيه إفصاحات على البيع من الإدارة، يعني لو في أي يوم من الأيام بيحصل تخارج يعني الناس بالعكس هي الشفافية أنا بحب الأسهم أو الشركات اللي بتبقى في البورصة لأن مستوى الإفصاح بيبقى أعلى بكتير لو الإدارة بتغير اللي هي بتعمله، بتبيع أسهمها، الكلام ده كله ميزانيتك برضو هتبين حاجات كتير جدا على طريقة إدارة شركتك فزي ما قلنا في أول الحلقة مرحلة جديدة وحاجات يعني هتشوفها إن المستثمر العادي يقدر يشوفها ويقدر ياخد أكسيس عليها برضو عايز أوضح إن هدف الحلقة دي مش إن إحنا بننصح إن أنت تشتري أسهم أكت أو لأ إحنا بنتكلم بشكل عام على تجربة حد ابتدى من فكره ووصل للبورصة وإن شاء الله يبقى في حتة تانية بعد الطرح بتاع شركته لإن أنا أعتقد فيه ناس كتير جدا نفسها تمر بنفس التجربة وبقية الحلقة النهاردة هنتكلم على إزاي بقى؟ إيه إللي حصل في التجربة دي، بس برضو يعني عايز أكرر إن ده مش هدف الحلقة، إن هو والله أسهم أكت هتطلع أو هتنزل أو الكلام ده، وأعتقد برضو أنت متفق معايا بنفس الموضوع
مصطفى: لأ مظبوط، يعني هو الهدف الرئيسي هو إن إحنا نشارك الناس تجربة القيد في البورصة عموما الادراج في البورصة ده بيفيد في إيه؟ معناه إيه؟ مرحلة ما قبل القيد، ومرحلة ما بعد القيد، يعني مشاركة الخبرة بصراحة هو كان الهدف الرئيسي لما تكلمنا واتفقنا ان احنا نعمل الحلقة دي فمش الهدف منه خالص التسويق لنموذج العمل بتاع أكت أو لسهم أكت أو لأ، الهدف منه هو مشاركة أكتر لتفاصيل عملية الطرح نفسه كطرح لشركة
(24:25)
عمر: تعالى نبتدي بقى من الحتة دي، إمتى خدتوا القرار إن أنتوا هتطرحوا؟ وليه؟ يعني إمتى حصل كده قلت أهو دلوقتي حالا وقت الطرح لإن ممكن الشركات تبقى شغالة ومشغولين ومركزين في البزنس بتاعهم ومش عايز يوجع دماغه تاني أنت هتروح هتعمل إفصاحات كتيرة، هتبقى مال عام، هتبقى هتبقى هتبقى.. إمتى حسيت إن القرار ده جه السؤال ده بسأله عشان لو حد في نفس المراحل دي إيه إللي يشوفه في نفسه أو في شركته عشان يقول يلا أنا مستعد أطرحه؟
مصطفى: طيب بص هو هنا فيه نقطتين مهمين فيه أول نقطة إن هو الطبيعي إن المفروض أي حد بيعمل أي شركة فهو بيعملها في البورصة لأنه ده الطبيعي لو أنت عايز تكبر بشركتك مش من الطبيعي إن أنت تروح تدور على مساهم واحد صاحبك، وبعدين واحد صاحبك يقولك أنا عندي واحد قريبي يخش معاك وكلام ده الطبيعي إن أي حد بيأسس شركة فهو بيطمح في وجودها على البورصة عموما يمكن الثقافة دي لسه مش موجودة عندنا في أسواقنا بشكل كبير بس هو ده المفروض يبقى التفكير الطبيعي فده أول نقطة، تاني نقطة يمكن هي اللي مختلفة شوية في شركتنا عن اي حد لو عنده نشاط تاني إن إحنا الخلفية بتاعتنا كابيتال ماركت، سوق المال والبورصة والأسهم والإستثمار، فاحنا من ساعة ما أسسنا الشركة واحنا يعني واعدين حتى المساهمين بتاعنا، إن احنا بنأسس الشركة دي عشان نطرحها في يوم من الأيام، فخطتة الطرح كانت من بداية التأسيس، زي ما قلتلك ده عشان احنا جايين من الخلفية دي وعندنا النية دي من الأول وتاني حاجة عشان أنا شايف إن هو ده المفروض يبقى الهدف الطبيعي بتاع أي شركة بيتم تأسيسها في أي حتة في العالم، إن إنت إيه الطبيعي إن إنت يبقى عندك راس مالك مكون من ديون واسهم من ديون بتاخدها لو احتجت من البنوك أو تمويل من البنوك، واسهم بتجيلك من شركات في أسهم، فالأسهم دي بتيجي يا إما في دائرة مغلقة عن طريق بعض المعارف، يا إما الطبيعي عشان تكبر تخش البورصة، فدي كانت النية اللي من الأول من حيث التأسيس، وده يمكن اللي مهم برضه في المرحلة اللي هو قبل ما تقول أنا عايز أطرح إنه إنت بتأسس الشركة أو قبل ما بتنوي تطرح بفترة طويلة جدا تبقى في دماغك الخطوات دي لأن ده بيفرق معاك في حاجات كتيرة قوي يفرق معاك في حوكمة الشركة يفرق معاك في الميزانيات بتاعت الشركة، يفرق معاك في طريقة الشغل، جوا الشركة طريقة إدارة الجمعيات العمومية اللي بتعملها للمساهمين إللي موجودين بطريقة إدارة مجالس الإدارة بتاعت الشركة، ومحاضر المجالس والكلام ده كله بحيث إنه ورقك يبقى دايما متزبط بحيث إن إنت تبقى جاهز للقيد أول ما تنوي فإحنا عشان كنا ناويين على كدا من الأول، فعملنا الشركة بهيكلة قابلة للطرح في أي وقت من الأوقات دي، يمكن كانت المرحلة الأولانية
(27:28)
عمر: أه أنت شايف كده فقبل ما تطرح بسنتين بتلاتة بأربعة أيا كان الوقت ده أنت لو حد جه بص على ورقك أنت جاهز إن أنت تطرح
مصطفى: بالظبط
عمر: كجاهزية، عشان انت قريب من المطبح
مصطفى: بالظبط كده، عشان انا قريب من المطبخ فدايما أنصح الناس إن أنت لازم يبقى عندك مراقب حسابات قوي من الأول عندك ميزانياتك واضحة، عندك هيكل الموظفين، وبنية الشركة واضحه، الجهات الرقابية، ورقك مع الجهات الرقابية، وترخيصك والكلام من ده جاهز ومفيش أي مشاكل ومفهوش حاجة متعطلة، وكلام من ده فده الحمد لله دي كانت المرحلة الأولانية ودي عملناها زي ما بقولك من يوم حتى ما أسسنا الشركة من 10 سنين يعني ما جيناش مثلا قلنا من سنتين كده طب يلا بقى نبدأ نجهز ورقنا لأ ده دايما كل ما بيبقى بدري أكتر كل ما بيفيدك أكتر في قرار الطرح
(28:13)
عمر: يبقى أهم نصيحة لرائد الأعمال إن هو يبقى عنده الحالة النفسية اللي هي أكنك أنت بتعلي المعايير بتاعة الشركة، حتى قبل ما أنت تحتاج تعلي المعايير بالظبط كده
مصطفى: مظبوط كده، جاهز في أي وقت، وده بيفرق معاك جدا كمان حتى في تقييمك يعني أنت لما بتيجي تقيم الشركة بتبقى أسهل لك بقى أنت خلاص خدت قرار عايز زيادة رأس مال تقدر تعمل زيادة رأس مال بسرعة تنزل في الطرح في البورصة بسرعة تقدر تاخد تقييم واضح لأنك ورقة جاهز مفيش حاجة مدارية منه، كلام من ده ففطبعا دي نقطة مهمة، إحنا بقى لما جينا أخدنا القرار تقريبا من قبل ما نطرح الشركة، مثلا بحوالي أربع شهور، ودي كانت طبعا تصنف عملية سريعة جد ا في تاريخ الطروحات، لأن أنت في خلال أربع شهور بس قدرت بقى زي ما قلت لك ورقنا جاهز، رحنا قدمنا الورق لهيئة الرقابة المالية، عملنا التقييم بتجيب حد مستشار مالي مستقل يعمل لك التقييم، بتجيب بقى مستشاريين معينين، بتجيب مثلا حد اسمه مدير الطرح، مدير الطرح ده هو اللي بيدير العملية بتاعت الطرح والتنسيق مع هيئة الرقابة المالية بتجيب المستشار المالي المستقل زي ما قلت لك بيعمل تقييم عادل للشركة بحيث تبقى عارف أو تعتمد القيمة دي تقدر تنزل بيها الطرح بتجيب مستشار قانوني، هو اللي يبقى بيدير معاك عملية نشرة الطرح وإدارة الملف القانوني بالكامل بتنسق مع مراقب الحسابات اللي موجودة عندك عشان يجهز الميزانيات ويطلع التقارير بتاعته كمراقب حسابات على أداء الشركة، ممكن تجيب مسوق أو وكيل توظيف بيسوق للعملا بتاعته كشركات سمسرة فدرنا العملية دي كلها ما بين كل الشركاء إللي اشتغلو معانا على القصة دي لحد ما وصلنا إن احنا قدرنا نرفع زيادة راس مالنا، ونجيب عدد كبير جدا من المساهمين دخلوا معانا في الطرح، وبدأنا نتداول على السهم إي من ثلاث أسابيع تقريبا
عمر: هايل، شكراً جداً على وقتكم معانا النهاردة ده كان الجزء الأول في حلقة مصطفى وان شاء الله نشوفكم الاسبوع الجاي
Translation of some words and terms:
Milestone مرحلة حاسمة / محطة
Listing إدراج
Publicly علنًا / بشكل علني
Target هدف
Phase مرحلة
Brief موجز
Active Investment استثمار نشط
Private Investment Public Equities استثمار خاص في الأسهم العامة
Create Value خلق قيمة
Formula صيغة
Challenge تحدي
Investment Banks بنوك استثمارية
Comparable قابل للمقارنة
So Far حتى الآن
Due Diligence العناية الواجبة
Credential مؤهل
Tested مُختَبر
Adapt يتكيف
Volatility تقلبات
Activism نشاط
Investment Banking Turned Around إعادة هيكلة الخدمات المصرفية الاستثمارية
Operational Business عمل تشغيلي
Shareholder مساهم
Creation إنشاء
Exposer تعرض
Public Information معلومات عامة
Culture ثقافة
Scale Up توسيع النطاق
Standards معايير
Placement Agent وكيل الاكتتاب
Partners شركاء
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي #الطرح_العام #أكت_فايننشال #الجزء_الأول