140. ازاي تقيم أدائك في البورصة (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
عمرك فكرت ازاي الأسواق أدائها بيتقاس؟ يعني إيه المقايس اللي بنحدد على أساسه اذا كان السوق ده طالع بشكل كويس فأقدر أبيع أو نازل بشكل جامد فقدر أشتري؟ أو ازاي أقيم العوائد بتاعتي في الاستثمار؟ في حلقة النهاردة بنتكلم عن مؤشرات أسواق المال ، وازاي تقيم أدائك في البورصة
00:44 المقدمة -
01:46 ازاي بنقيس أداء الأسواق؟ -
02:27 حساب الفايدة المركبة -
04:12 الفرق ما بين صندوق الاستثمار والبنك في توقع العوائد؟ -
06:28 هل صندوق الاستثمار بيضيف قيمة المخاطره اللي أنا باخدها؟ -
09:42 الجهات المرخصة لإصدار المؤشرات؟ -
11:09 ما هو المؤشر؟ -
11:50 طرق حساب المؤشرات -
14:25 إعادة توازن المؤشر -
15:38 ازاي المؤشر ميخليش شركة تسيطر على أداء بلد واحده؟ -
16:20 المؤشر ممكن يساعدني أستهدف نوع معين من الاستثمار -
17:38 المؤشرات هي طريقة لمحاسبة صندوق الاستثمار اللي أنا حاطت فلوسي فيه -
18:42 المؤشرات بتهدي تذبذب عوائد الاستثمار -
20:20 ليه محتاج أفهم المؤشر؟ -
20:50 المؤشر هو أداة قياسية لأدائي أنا كشخص في الاستثمار -
21:28 فوائد المؤشرات -
23:13 المؤشر بيساعدني أتوقع أداء صندوق استثمار حديث ليس له عوائد تاريخيه -
25:55 الخاتمة -
حلقة النهاردة الهدف منها انها تفتّحلك أسئلة وتساعدك تاخد القرار الصح في طريق الاستثمار فلو سمعت الحلقة كلها وحسيت انك مفهمتش كل حاجه في موضوع المؤشرات متقلقش أنت مش محتاج تحسب الحسبه أنت بس محتاج تقيس نفسك عليها وتعرف ازاي تقيم أدائك او أداء صندوق الاستثمار بتاعك
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
اهلاً بيكوا في حلقة جديدة من كلام ينور قبل ما ابتدي النهاردة كنت عايز أقول للناس احنا إن شاء الله هنبتدي قريب لايف على كلوب هاوس وتويتر ، اللقاءات دي ممكن مثلاً نعملها مرة في الإسبوع ، الهدف إن يبقى في تفاعل بين الناس أو تفاعل مع الناس بمعنى أصح يعني ، لو عندك اسئلة لو في حاجات معينة مثلاً مش مفهومه في الحلقات تقدر تسألها على طول وبرده هيبقى معايا ضيوف ممكن ندعو ناس من اللي بيظهروا معانا في الحلقات أنهم يتكلموا فحضرتك هتلاقي الروابط بتاعتهم موجودة على الصفحة بتاعتنا على إنستجرام ممكن تعملنا إضافة للحسابات دي ووقت ما هنطلع لايف بيجيلك تنبيه فأتنمى نشوف الناس هناك ويمكن بدءاً من الإسبوع اللي جاي أو اللي وراه نبتدي نعمل إن شاء الله جلسات اللايف دي
01:46
حلقة النهاردة حلقة بنتكلم فيها على موضوع ليه علاقة شوية بالبورصة أو الاستثمار بشكل عام وكنت عايز ابتدي بسؤال اسأله ليك كده : هل عمرك فكرت ازاي الأسواق أدائها بيتقاس؟ يعني سوق أسهم في بلد معينه ازاي بنقسيه؟ بنقول هو طالع بشكل كويس أو نازل كتير.. ازاي يعني؟ يعني هل في طريقة معينة الناس أتفقت عليها أنها تقيس الأداء ده وده اللي أنا هحاول أغطيه النهاردة إن شاء الله في الحلقة بتاعة النهاردة
02:27
أول سؤال أنا هسأله لنفسي عشان أسهل وأبسط الموضوع لما بروح أحط فلوسي في البنك والبنك بيوعدني انه مثلاً هيديني 10% إيه اللي بيحصل في الحالة دي؟ انا بروح أحط 100 جنية أو دولار في البنك ، والبنك بيقولي أنا آخر السنة الـ 100 دي لو فتحت حسابك هتلاقي في 10 زيادة 110 يبقى هنا مقياس الأداء هو معدل الفايدة اللي بتنزلي على الحساب بتاعي وبيتفق معايا على إيه كمان؟ بيتفق انه هيديني الـ 10 دول مره واحده في آخر السنة ولا هيديهملي كل ربع ولا مرتين في السنة اللي هو نصف سنوي كده الموضوع سهل مفهوم ، بسيط واضح مفهوش أي تعقيد ولكن لما بتعيد استثمار الفلوس هيبتدي المصطلح ده يتعقد شوية بمعنى إيه.. يعني إيه أعيد اسثتمار الفلوس يعني الـ 110 بعد أول سنة هل البنك هيديني 10% على الـ 100 أصل المبلغ بتاعي ولا هنا هيبتدي يديني على الـ 10 اللي أنا أخدت عليها فوايد؟ هنلاقي في الاستثمار المركب أو الفايدة المركبة بيقولك لأ أنت ابتديت السنة التانية بتاعتك بـ 110 فأنا هديك 10% على الـ 110 فهديك 11 دولار في السنة التانية وهنبتدي السنة التالتة معانا 121 وهبتدي أديك عليها 10% مش على الـ 100 أصل المبلغ يبقى هنا بيحصل شوية صعوبة في الحساب بس أنها بتعيد استثمار الفلوس بشكل تاني
04:12
طب لو طبقنا نفس المثل على صناديق الاستثمار ، نفس المثل اللي أتكلمنا عليه في الحالة الأولانية أنا اديت 100 دولار للبنك في الحالة دي هروح لصندوق الاستثمار أياً كان أنت بتشريه منين بديله 100 دولار ، صندوق الاستثمار بيصدرلي وثيقة بتقولي أنت اشتريت في الصندوق الفلاني بـ 100 دولار دي أول حاجه طبعاً بتحصل
طيب بعد ما بياخد الـ 100 دولار هل هو بيوعدني زي البنك يديني 10%؟ غالباً لأ هيقولك أنا عايز أعمل في السنة 5% ، 7% ،12% ، 15% ، 25% أياً كان اللي صندوق الاستثمار بيوعدك بيه ، وهو مش بيوعدك هو بيقولك في السنين اللي فاتت الصندوق عمل كده فاحنا بنستثمر اننا نحاول نعمل كذا % في السنة وممكن يقولك احنا في السنين الكويسة عملنا 20 أو 30% وفي السنين الوحشة -5% أو -10% أياً كان ولكن هنا اللي بيفرق صندوق الاستثمار عن البنك إنه مبيديش نسبة ربح ثابتة بيديك توقع هو عايز يعمل إيه
فالطريقة اللي احنا بنتكلم بيها دي ممكن تخليك تتوقع العوائد اللي جايه من صندوق الاستثمار ده يعني مش هينفع تقول مثلاً أنا هعمل 50% في السنة أو 80% في السنة ملهاش معنى لأن تاريخياً فئة الأصول اللي حضرتك داخل فيها بتقول إن أرباحك أو العوائد بتاعتك المفروض تبقى في الحتت دي ولو محصلتش يبقى في حاجه غلط حصلت في طريقة التشغيل مثلاً يعني فدي أول حاجه بتفرق صندوق الاستثمار عن البنك التوقع في العوائد بيبقى مختلف وطريقته
06:00
طيب جيت آخر السنة لقيت صندوق الاستثمار اللي أنا دخلت فيه عمل 15% أول إحساس ليا لو أنا مش مجمع اللي بيحصل في الدنيا إيه ده الـ 15% دي أحسن من الـ 10% بتاعة البنك آه فعلاً أنت عملت 5% زيادة عن العائد الأساسي في المثال الأول اللي أتكلمنا فيه ولكن أنا هنا محتاج أبتدي أفكر بطريقة تانية
06:28
الفرق هنا إيه إن في حالة البنك البنك خد مخاطرة معينة أداني 10% بس عندي ضمان إنه بيستثمر في أدوات أو فئات أصول مبتخسرش يعني أذون خزانة حكومية ، بيسلف عملا بمستوى مخاطرة معين ، البنك بيضمنلي رأس مالي ولكن في صندوق الاستثمار هو بياخد نوع مختلف من المخاطرة ، هل فعلاً الـ 5% دي كانت فعلاً نسبة كويسة فوق العائد اللي هو بدون مخاطرة! يبقى أنا هنا لازم أعمل حاجه جديدة لازم أضيف حاجه جوه الصورة بتاعتي عشان أعرف أقيس أداء الراجل ده أو صندوق الاستثمار ده هل هو فعلاً بيضيف قيمة للمخاطره اللي أنا باخدها هل هو بيضيفلي عمل أحسن من السوق اللي انا شغال فيه ولا لأ فمعنى كده إني لازم ابتدي أفهم يعني إيه عوائد السوق أو ما هو أداء المؤشرات أو ما هو أداء السوق اللي أنا حطيت فيه فلوسي.. لأن ممكن تقول إن الـ 15% بعد ما أشوف الصورة بالكامل أقول إن الـ 15% دي كانت نتيجة وحشة جداً لأن مثلاً السوق اللي أنا فيه عمل 27% في السنة دي فلو عمل 27% وأنا عامل 15% يبقى صندوق الاستثمار اللي أنا اديتله فلوسي محققليش المطلوب بالعكس ده خسرني تقريباً 12% من العوائد اللي حصلت جوه السوق وأنا شاري المؤشر بتاع السوق أو شاري مجموعة من الأسهم بتمثل السوق الفلاني.. يبقى أنا هنا لازم أبتدي أتابع الأسواق وأشوف الأسواق بتعمل إيه ، أو اسأل الراجل بتاعي أو صندوق الاستثمار بتاعي ما هو المؤشر المتبع اللي أنا أقدر أقيس أدائك عليه.. فأنا هنا أتعرفت على حاجه جديدة اسمها مؤشر السوق اللي أنا حاطط فيه الفلوس بتاعتي
08:30
هديك برده مثال كده سريع تقدر تفهم بيه يعني إيه المؤشر بتاع السوق لو أنا جيت قولت لحضرتك أنا سافرت 100 كيلو في 20 ساعة هتقولي إيه؟ هتقولي انت كده مسافر بسرعة ولا براحة؟ أنا هنا مديتلكش سرعتي أنا اديتك المسافة والوقت أنت تلقائياً حسب إن أنت لما تسافر 100 كيلو في 20 ساعة يبقى أنت سرعتك كذا والسرعة دي بطيئة أو سرعة سريعة مع إني مقولتلكش سرعتي بالكيلومتر كانت كام فهنا نفس الفكرة لو أنا قولتلك أنا سافرت 100 كيلو في نص ساعة معنى كده إن الـ 100 كيلو سرعتي فيهم كانت سريعة جداً نفس الكلام أنا محتاج أعرف إيه هو السوق
09:18
فهما أخترعوا حاجه اسمها المؤشرات ، المجتمع الأقتصادي والمجتمع المالي عمل مؤشر والمؤشر ده بيقيس سرعة العوائد بتاعتي في الحالة دي هو عداد السرعة بتاع العربية بتاعتي أو عداد السرعة بتاع الطيارة بتاعتي أو أياً كان المركبة المتحركة اللي أنا راكبها ، الحاجه دي بتقيس إيه؟ بتقيس الأداء بتاع السوق
09:42
ما هو المؤشر ده؟ أول حاجه لازم نتفق كلنا على جهة مصدرة للمؤشر بمعنى اننا عينا السيد فلان الفلاني لحساب المؤشر.. مين بقى الجهات دي؟ دي شركات من الناس اللي بتسمع اساميها لو أنت في المجال المالي ممكن تسمع عن شركة (إس & بي) اللي عاملة مؤشر إس & بي 500 في أمريكا (مؤشر ستاندرد آند بورز) ، ممكن تسمع عن مؤشر )إم إس سي آي) ، ممكن تسمع عن (مؤشر فوتسي) ففي شركات كتير أو جهات مرخصة أنها تعمل مؤشرات
مين تاني ممكن يعمل مؤشرات؟ أسواق المال نفسها يعني مثلاً السوق السعودي فيه مؤشر اسمه تداول ، تداول دي الجهة اللي عاملة السوق ، في مصر مثلاً البورصة المصرية عاملة حاجه أسمها (إيجي أكس 30)
يبقى أول حاجه في المؤشر هو مين المصدر بتاعها خلاص أنا عرفت مين أصدره والشركة دي بتديني المصداقية في الحساب يعني مثلاً مش عمر قالنا إن السوق طالع 50% السنادي وعمر ده ملهوش أي مصداقية لأ دي شركة بيدفع عليها فلوس وعندها موظفين كل شغلتهم يطلعوا المؤشر بتاعك يبقى دي مين بيصدره
11:09
تاني حاجه ما هو المؤشر نفسه أو هو بيقيس إيه؟
اسم المؤشر ممكن يكون (إيجي أكس 30) مثلاً ده بيقيس 30 شركة ، أكبر 30 شركة في السوق المصري ، ممكن مثلاً يكون زي (تداول) الاسمين اللي أتكلمنا عليهم ، (تداول) ده بيقيس كل الشركات الموجودة في السوق السعودي بيقيس الأداء بتاعهم بنلاقي برده مؤشرات عالمية بتقيس كل الأسواق العالمية بتعمل حسابات معينه عشان تقيس الأداء بتاع الأسواق العالمية ممكن يبقى قطاع معين قطاع البنوك في بلد معينة يبقى ده مؤشر قطاع البنوك فمن اسم المؤشر أنت هتعرف هو بيقيس إيه
11:50
تالت حاجه في نوع المؤشر أكتر طريقتين مشهورين أوي حاجه اسمها
Equal Weighted Index و Market Cap Weighted Index
أو إن النسب الشركات بتبقى ثابتة أو إن النسب على اساس حجم الشركة مقارنة ببعض بمعنى إيه أني قولتلك عايز اقيس أداء السوق الفلاني وهما 20 سهم فأنا هدي نسبة 5% يعني هقطع المؤشر بتاعي لـ 20 حته متساوية كل حته فيهم 5% وهحط الشركات أول السنة فيهم بنسب 5% وأجي أخر السنة اشوف شركة رقم 1 طلعت 10% شركة رقم 2 طلعت 7% شركة رقم 3 نزلت 17% وهكذا ولكن وزن الشركة جوه الإحصائية جوه المؤشر هي نسبة Equal weighted ثابتة وده نوع من أنواع المؤشرات اسمه
Market Cap Weighted Index طيب
بدي نفس الـ 20 شركة دي بحطهم في مؤشر برده بس بيبقى مؤشر قيمة السوقية اسمه بالعربي هو بيتحسب على القيمة السوقية بتاعة كل شركة ولكن هنقول شركة رقم 1 اللي هي كبيرة أوي دي عدد أسهمها الموجود في السوق مضروب في السعر بتاعها يعني لو حضرتك حبيت تشتري الشركة كلها هتشتريها مثلاً بمليار وكل الشركات التانية الموجودة من الشركة رقم 2 للشركة رقم 20 لو حبيت تشتريهم كلهم هتشتريهم مثلاً بـ 4 مليار يبقى الشركة رقم 1 هي 1 على الـ 5 ملياراللي هو مجموع كل القيمة السوقية بتاعة الـ 20 شركة فهنسبلها 20% هي نسبتها في أول السنة 20% ونروح على شركة رقم 2 نشوف القيمة السوقية بتاعتها قد إيه نقسمه تاني على الـ 5 مليار اللي هو قيمة السوق كله بتاعنا ونديها النسبة بتاعتها وشركة 3 و 4 و 5 و 6 وهكذا وبعدين بيطلعلنا المؤشر وبيحسبه أنت مش محتاج تعرف أي حاجه من اللي أنا بقولها خالص في طريقة حساب المؤشر بس أنا برده بحب أدي الخلفية بتاعة الراجل اللي بيطلع المؤشر بتاعي بيطلعهولك ازاي لو عايز تعرف الشركات متساوية ولا بالقيمة السوقية ده بس سريعاً كنت عايز أشرحلك هو بيتحسب ازاي
14:25
طيب الحاجه الرابعة بقى إن الشركة بتقولك أنت قولتلي في أول السنة هما كلهم قد بعض في المثال بتاع المؤشر اللي النسب بتاعة الشركات كلها قد بعض لو جينا بعد 6 شهور في شركات طلعت جامد وشركات نزلت جامد في حاجه اسمها إعادة توازن المؤشر وده بيبقى مكتوب طبعاً في القوانين بتاعة المؤشر اللي حضرتك بتابعه بيقولك أنا كل 6 شهور كده هروح مرجع كل الشركات تاني للـ 5% بتاعتي أنا عندي 20 شركة فهرجع الناس كلها للـ 5% بتاعتي ليه بيرجعهم؟ عشان لو شركة طلعت جامد أوي متبعدش عن الوزن النسبي بتاعها اللي هو 5% أو لو شركة نزلت جامد أوي يشتريها تاني ويطلعها للـ 5% ، هل حضرتك بتحتاج تعرف المعلومات دي؟ لأ ولكن أنا بقول المعلومات دي تاني للي عايز يبقى فاهم يعني إيه إعادة توازن المؤشر وإيه الوتيرة بتاعته ممكن واحد يقولك بعملها كل 3 شهور أو كل 6 شهور أو كل سنة على حسب قوانين بتاعة المؤشر
15:38
Capped طيب في مؤشرات تانية بيعملوا فيها حاجه اسمها مؤشر
بمعني أكبر شركة في المؤشر بتبقى مثلاً 20% أو 30% أو 40% لو الحسبة بتاعته الإحصائية اللي احنا اتكلمنا عليها طلعت الشركة النسب بتاعتها في المؤشر 50% هو تلقائياً بينزلها لـ 20% ليه؟ عشان ميخليش شركة تسيطر على أداء بلد واحدة مثلاً في بلاد صغيرة معندهمش أسهم كتيرة لكن عندهم شركة هي أحسن حاجه في الدنيا وهي اللي بتطلع فالقيمة السوقية بتاعها بتطلع فبتبقى محتاجه مثلاً 50% من المؤشر ولكن هو بيمنعها من الحدوث فبيرجع ينزلها تاني
16:20
طيب في مثلاً حاجه تانية في المؤشرات بنشوفها انه بيحط نوع معين من الأستثمار زي مثلاً أنه استثمار بيوافي الشروط بتاعة الشريعة الإسلامية طب ده بيعمل إيه بيروح للسوق الفلاني ويشوف بلد معينة ويقول أنا هعمل مؤشر في الدولة الفلانية ولكن هاخد بس الأسهم اللي بينطبق عليها الشريعة أو اللي هي ينفع نستثمر فيها لو تابع للإستثمار وفقاً للشريعة يبقى هنا المؤشر ممكن ألعب وأغير أو أضيف حاجه زي الشريعة مثلاً ، ممكن أقول (إي أس جي) الشركات اللي مش بتضر البيئة ممكن أقول أنا هقيس أداء الشركات في البلد الفلانية اللي هي مش بتضرش البيئة بمعني إيه مبتضرش البيئة يعني مثلاً هيشيل الأسهم اللي بتعمل تلوث في المجتمع أو حاجات بتستخدم طاقة تقيلة زي الأسمنت مثلاً أو الفحم أياً كان بقى نوع المؤشر قصدي إن ممكن المؤشر اللي بتتبعه كمدير استثمار ممكن يبقى عليه نكهة معينة لو صندوقك بيهدف لنفس الأهداف
17:38
يبقى أنا كده عملت حسبتي وفهمت أنت راجل رحت حطيت فلوسك في صندوق استثمار عرفت المؤشر اللي بتتابعه بتبص على المؤشر ده ازاي متكون وبعدين كل اللي أنت المفروض أنت معندكش وقت تتابع استثماراتك فانت عشان كده حاطط مدير استثمار نيجي أخر السنة أنا قعدت شوفت الأرباح بتاعتي 15% وشوفت السوق بتاعي اللي أنا مستثمر فيه اللي الراجل أول يوم قالي أنا بحاول استثمر في السوق الفلاني لقيته طالع كذا والسوق كذا يعني زي ما قولنا في المثال بتاعنا أنا طالع 15% والسوق نفسه بعد ما شوفت المؤشر اللي متابع فيه وفهمت الدنيا لقيته طالع 27% أنا هنا وقتها أقدر أشوف إيه اللي حصل وأقدر أكلم صندوق الاستثمار بتاعي أو مدير الاستثمار بتاعي وأقوله هو إيه اللي حصل خلاك متطلعش الـ 27% أو حتى قرب الـ 27% ليه عملنا 15% هنا أنا بقى عندي طريقة لمحاسبة صندوق الاستثمار اللي أنا حاطت فيه فلوسي
18:42
طيب تعالوا ناخد مثال تاني كده أنا عندي سوق فيه 100 شركة وللتسهيل المؤشر ده الأوزان بتاعتة متساوية يعني إيه متساوية يعني طبيعي لو قولتلك كده إن كل شركة بتاخد 1% أنا عندي 100% والوزن متساوي وعندي 100 شركة يبقى أنا عندي 1% لكل شركة وقولتلك أخر السنة إن المؤشر ده طالع 10% هل معناه إن كل شركة داخل المؤشر ده طلعت 10% برده؟ أنا برده عايزك تفكر معانا هل معنى كده إن الـ 100 شركة بالتساوي طلعوا كلهم بالظبط 10%؟ طبعاً لأ المجموع بتاعهم بتاع الأداء هو فعلاً 10% بس ممكن تلاقي شركة طالعه جوه المؤشر ده السنادي 50% وشركة نازلة 50% شركة طالعة 10 وشركة نازلة 1 واحدة تانية نازله 1 وواحده تانية مطلعتش اصلاً ومتحركتش حاجات كتيرة جداً ولكن مجموع الاداء بتاعهم يساوي 10% ودي برده حاجه مهمه من اللي بتخليك تفهم إن المؤشر نفسه هو فيه الطبيعة بتاعته وهو فيه التنوع في الاستثمار فهنلاقي إن العوائد بتاعته سنة عن سنة مش متذبذبة كتير أوي لو قارنتها بعوائد شركة بعينها ممكن نلاقي شركة بتطلع سنين جامد أوي وسنين بتنزل جامد أوي فعشان كده المؤشر ده بيعمل حاجه في العوائد أنه بيهدي العوائد شوية أو بيهدي التذبذب بتاع العوائد بتاع الاستثمار أو السوق نفسه إني أقدر اقيسه
20:20
طب أنا محتاج أعرف كل الحاجات دي ليه؟ يعني ليه محتاج أعرف المؤشر وأفهم يعني إيه والكلام ده كله طبعاً السبب البديهي اللي احنا أتكلمنا عليه كذا مرة النهاردة ان انا اقيس العوائد بتاعة مدير الاستثمار بتاعي ، يعني لو حد بديله فلوس أقدر أحاسبه ازاي اقوله أنت راجل شاطر أو أنت راجل مش شاطر إني أعرف السوق اللي هو بيتداول فيه هل هو عارف يعملي فلوس على الأقل زيه أو احسن منه ده أول سبب
20:50
طيب الحاجه التانية لو أنا شخصياً اللي بدور فلوسي ، لو أنا لوحدي عندي محفظة أسهم وبضارب في البورصة وبصحي الساعة 6 الصبح وبجري على الأسهم وأحلل وأعمل.. أقيس أدائي أنا بقى بعد مخلصت السنة اشوف أنا عملت بعد كل المجهود والأتعاب اللي دفعتها والوقت الل ضيعته هل أنا عملت أحسن من السوق ولا لأ ، لو بعد مثلاً 3 ، 4 ، 5 ، 10 سنين لقيت نفسي مبعملش أداء زي السوق حتى يبقى أنا عندي مشكلة يبقى هي أداة قياسية لأدائي أنا كشخص
21:28
طيب إيه تاني ممكن نشوفه نستخدم مثلاً من فوايد المؤشرات لو أنا جيت مثلاً شوفت نزله معينه في السوق في فترة معينة هل النزلة دي كبيرة ولا مش كبيرة؟ هل النزلة دي تعتبر فرصة شرا ولا لأ؟ مانا محتاج أقيس السوق نفسه اللي أنا بشتري فيه عشان أعرف يعني قولتلي السوق الفولاني نازل 20% بس هو بينزل كل سنة شوفتها مثلاً في الـ 5 سنين اللي فاتوا يبقى دي مش نازلة كبيرة بالنسبة للسوق ده ولكن سوق نوع تاني مبينزلش النزلات الكبيرة دي وفجأة حصل عليه خصم دي تعتبر فرصة شرائية كويسة مثلاً ، صندوق السندات مثلاً مبينزلش بالطريقة بتاعة صندوق الاسهم لو لقيت في سنين معينة صندوق السندات بينزل بشكل جامد كده دي ممكن تعتبر فرصة شرا يبقى هي بتحددلي الفرص بتاعة الشرا لو حصل وشوفت نزلات معينة
22:28
إيه تاني ممكن نستخدم المؤشرات فيها اننا بنستهدف حاجه معينة يعني أنا عايز فكرة معينة استثمر فيها المؤشر ده هيقولي في السوق الفلاني لو حضرتك حابب تشتري أسهم في التكنولوجيا متوافق مع الشريعة الإسلامية هتلاقي مؤشر بيقولي مين الأسهم دي
لو عايز أستثمر في القطاع العقاري في دولة معينة هروح أخد القطاع العقاري فالمؤشرات دي برده بتوجهني إني استثمر في حاجه معينة لو أنا عايز استثمر فيها ، أشوف الصناديق اللي بتتبع المؤشرات دي وأقدر أحط فلوسي فيها
23:13
لو أنا برده بدور على صندوق استثمار وصندوق الاستثمار ده لسه طارح نفسه النهاردة أول يوم يشتغل وأنا لسه معرفش الراجل ده هيعمل إيه أو الصندوق ده هيعمل إيه لأنه معندوش تاريخ قبل كده في الاستثمار ولكن أنا مقتنع بالشركة أو هما عندهم صناديق أخرى كانت بتعمل كويس وأنا مقتنع إني هستثمر مع الراجل ده فهو هيقولي المؤشر بتاعي اللي أنا بتبعه هو كذا فوقتها أقدر أروح اشوف المؤشر ده تاريخياً عمل إيه ، القطاع بتاعه عامل ازاي ، الأداء ، العوائد الكلام ده كله ففهم المؤشرات ده بيخليني أفهم صندوق الاستثمار ده صندوق استثمار حديث معندوش تاريخ معندوش حاجه بيتبعها لسه أو أداء أقدر ابص عليه وأقارنة ، أقدر استخدم المؤشر اللي هو هيحطه كمعيار هيقيس نفسه عليها وأقدر أرجع أشوف المؤشر ده كان بيعمل إيه في السنين اللي قبليها فده برده فايدة من الفوايد إني أبقى فاهم يعني إيه مؤشرات السوق فمن الأخر للتسهيل برده هو ده الحاجه اللي هتخليني بشكل شوية أتوقع أداء صندوق الاستثمار إني أبقى فاهم هو هيقيس إيه أو إيه اللي أنا ممكن أعمله
24:31
في فوايد كتير جداً أنا ممكن أقعد أرتبها على المؤشرات وهي بتديني إيه كمستثمر لما ابص عليها بس أنا مش عايز أعقد الموضوع وأخلي الموضوع بالنسبالكم صعب ، الحاجات اللي فاتت دي هي كافية جداً جداً انها تخليك تبتدي رحلتك في الاستثمار أنت مش محتاج تعرف بيتحسب ازاي زي ما قولنا في ناس شغلتها تعمل كده هما تفضلوا شاكرين طلعوا المؤشرات دي في العلن أنت تقدر تستخدمها وتشوفها على جوجل على اي من المواقع الموجودة على البورصات نفسها الهيئات حطاها ، أنت مش محتاج تحسب الحسبة مش محتاج حتى تقرا الورقة اللي بتطلع الحسبة دي ازاي أنت بس محتاج تقيس نفسك على الحاجات دي ودي خطوة مهمه جداً جداً في الاستثمار إنك ديماً يبقى عندك قياسات معينة بتعملها عشان تعرف أنت ماشي في الطريق الصح أو الغلط فمتحسش ان انت وصلت معايا للحته دي ومحستش انك فهمت كل حاجه في موضوع المؤشرات مش فارقة معايا تعرف ازاي بتحسبها خالص فارقه معايا انك يبقى عندك مقياس لما تقعد مع الراجل بتاع الاستثمار بتاعك تقدر تقوله ليه كده وليه مش كده ولو عايز تنقل من قطاع لقطاع تبقى عارف انت هتنقل على انهي قطاع وهو أدائه التاريخي كان شكله عامل ازاي وهكذا
25:55
أتمنى إن الحلقة دي برده تكون بتساعدك تبتدي طريقك في الاستثمار جهز أسئلتك زي ما بقول ديماً لو هتروح البنك تفتح حساب ، لو هتروح شركة استثمار تفتح حساب أنا بحاول أخليك عندك أسئلة تقدر تسألها تساعدك انك تاخد القرار الصح في طريق الاستثمار.. شكراً جداً جداً على وقتكم لو وصلتوا معايا لدلوقتي وكالعادة الحاجه اللي بقولها على طول أبعتولنا اسئلتكوا او الحاجات اللي أنتو مش فاهمينها أو الموضوعات الجديدة اللي عايزين نتكلم فيها وأشوفكوا إن شاء الله الأسبوع الجاي
Translation of some words and terms:
Index مؤشر
Guests ضيوف
Notification تنبيه
Live Sessions جلسات مباشرة
Straight forward بشكل مستقيم
Calculation حساب
Range نطاق
Asset Class فئة الأصول
Risk مخاطرة
Guarantee ضمان
Risk Profile مستوى المخاطره
Market Returns عوائد السوق
Automatically تلقائياً
Equal Weighted Index مؤشر متساوى الأوزان
Market Cap Weighted Index مؤشرالقيمة السوقية
Based قائم على
Relative نسبي
Rebalancing إعادة التوازن
Frequency تكرار
Flavor نكهة
Shariah compliant متوافق مع أحكام الشريعة الإسلامية
Energy طاقة
Sale تخفيض السعر
Target استهداف
Benchmark المعيار
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #مؤشرات_أسواق_المال #إعادة