141. المركز المالي
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
مع بداية كل سنة بتبتدي تحضر للسنة الجديدة سواء في شغلك أو في حياتك أو في مشاريعك أو أهدافك وفي المجال المالي بناخد بداية السنة فرصة أنك تشوف عملت إيه في السنة اللي فاتت وتوقعاتك إيه للسنة الجديدة وإزاي تكون صورة مالية عن نفسك تقدر من خلالها تاخد قراراتك استثمارية أفضل في المستقبل
بنتكلم في الحلقة على:
ازاي تعمل تقييم لأدائك -
ازاى تنظم مخك وتنظم ورقك قبل ما تاخد قرارات -
الخطوة الاولى اللي ممكن تعملها عشان تعرف ايه هو المركز المالي بتاعك -
المركز المالي هيساعدك تختار الحجم المناسب لاستثماراتك -
المركز المالي هيساعدك تعرف حجم الدين بالنسبة للأصول بتاعتك -
هل أهدافك واقعية؟ -
! ابعتولنا رأيكم في موضوع النهاردة وشاركونا بتعملوا إيه في بداية السنة الجديدة، وكل سنة وانتم طيبين
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلا بيكم في حلقة جديدة من بودكاست كلام ينور
بمناسبة السنة الجديدة عايز اخد فرصة مع الناس أنها تبص على السنة اللي فاتت أو السنين اللي قبليها حتى في تاريخك في الاستثمار والادخار والكلام ده كله، دايماً هو بيبقى فيه كده طاقة إيجابية مع بداية كل سنة تبتدي تحضر للسنة الجديدة سواء في شغلك أو في حياتك أو في مشاريعك أو أهدافك أو كلام ده كله وفي نفس الوقت في المجال المالي بناخدها كفرصة أن انت تقدر تشوف أنت عملت إيه تحط التوقع بتاعتك للسنة الجاية فبناخد الطاقة بتاعت السنة الجديدة و أمنياتك و إزاي ممكن نطبقها وإزاي ممكن تساعد نفسك ان انت تتكون صورة مالية عن نفسك احسن لما تكون صورة مالية عن نفسك احسن هتقدر تاخد قرارات الاستثمارية في المستقبل بشكل أفضل
فاول خطوة عايز اعملها بالنسبة لناس لسه ما عملتش الحاجة دي، أو اول مرة بتسمع عنها ازاي تعمل تقييم لأدائك، ازاي ممكن تجمع المعلومات فهبتدي معاكم بأول خطوة أن أول حاجه لازم اعملها احدد الحسابات اللي عندي سواء حسابات في بنوك أو حسابات في شركات سمسرة أو في صناديق استثمار أو في اي حاجه فأول خطوة هبتدي اعملها بشكل منظم ولازم الناس تبتدي تعملها اللي هي تبتدي تحفظ كشوف الحسابات بتاعتها في مكان معين
تنظيم مخك وتنظيم ورقك مهم قبل ما تاخد قرارات لانك انت بتبقى متخيل حاجات في دماغك لكن لما يتحطها على ورق ولما بتكتبها ولما بتشوفها بعينك ولما بتبتدي تحسب أرقامك ممكن تلاقي اللي انت متخيلة ده مش حاجة صحيحة
فاول حاجة عايزة اعملها اللي انا هروح اجيب كشف الحساب بتاعتي يعني أنا متخيل اني عندي مجلد كده على الكمبيوتر او كلاود او ايا كان التكنولوجيا اللي بتستخدمها في حفظ الملفات بتاعتك وهروح هكتب الحسابات بتاعتي
هعمل مجلد كده او هعمل ملفات مختلفة لكل حساب، الملف ده هبتدي اجمع فيه كشف الحساب بتاعي اللي جايلي من المكان الفلاني فعلى سبيل المثال انا عندي حسابين سمسرة واحد مثلاً للاسهم المحلية في الدولة اللي انا عايش فيها وحساب تاني للاسهم في الاسواق العالمية فهروح رايح على السمسار بتاعي اكيد عندي منفذ او أكيد عندي مدير حساب ممكن يبعتلي كشف الحساب ده واخدها بسهولة جداً وابتدي احتفظ بيها بتاريخ 31/12 عشان أخد اللقطة بتاعة نهاية السنة
فأنا جبت كشف الحساب ده واحتفظت بيها في الملف الأول بتاع حساب السمسرة بتاعي الدولي وحساب السمسرة المحلي، لقيت عندي حساب بنك هروك رايح واخد كشف الحساب بتاع البنك فيه فلوس مثلاً، عندي كشف حساب تاني لقرض سيارة او بيت او ايا كان انواع القروض هبتدي احفظها
لو عندي مثلاً حاجة تانية ممكن واحد يكون بيستثمر في الذهب معندوش كشف حساب ليه لأن مثلاً هو حاجة مادية أو مجموعة من الجرامات او الجنيهات او ايا كان السبايك اللي هو شاريها هيعمل اكسيل شيت او ورقة بتقول اني عندي في التاريخ الفلاني عدد معين من الوحدات وبحتفظ بالكلام ده جوه الفولدر بتاعي تحت حسابات الذهب، وهروح لصناديق الاستثمار وهلما جره يعني بعمل لكل حاجه كشف حساب، طيب لو عندي عقار ممكن برضه اعمل اكسيل شيت تاني للتقييم بتاع العقار في السنة الفلانية
فدي اول خطوه بعملها ان انا بجمع الميزانيات بتاعتي وبحتفظ بيهم وممكن نكرر الحاجه دي كل ربع سنة أو ممكن اكررها كل سنه على حسب ما انا بستريح هعمل التقييم بتاعي ازاي
ممكن كمان افصل النوعين الميزانيات دول اخليهم الأصول ومديونيات بمعنى ايه احنا قلنا في الانواع من الميزانيات أو كسوف الحساب هتبقى عبارة عن أصول زي البنك السمسرة صناديق الاستثمار وفي حاجات مديونيات زي القروض الشخصيه او قرض السكن او العربيه وهكذا وهبتدي احفظها بالطريقه دي
بمجرد ان انا خلاص بقى عندي الميزانيات دي موجودة في المكان ده هعمل اكسيل شيت تاني جديد خالص الاكسل شيت ده هتخيل كده ان انا بالعرض هحط فيه السنين 2024/2025/2026 وما بعد كده وبالطول هحط اسامي الحسابات بتاعتي ومكانها اسم البنك، لو في مثلا نمرة تليفون مدير الحساب بتاعي احط البيانات بتاعته وهكذا
وبعدين هبتدي احط قيمة نهايه إغلاق السنه في الحته دي تحت كل سنه هبتدي احط يعني حساب السمسرة نهاية الرصيد بتاعي 50 الف مثلا 10000
الذهب 6000 ايا كان بقى المجموع بتاعي الفكرة في تكوين المركز المالي بتاعك اني هبتدي حتى لو بمبالغ صغيره مش مشكلة يكون الثروة بتاعتك رقم كبير الفكره ان ابتديت هنا اجمع لاول مره واحسب صافي الدخل بتاعي بشكل عام دخلت فلوس طول السنه والفلوس دي اتقلبت لاخر السنة إلى مجموعة من الأصول ومجموعة من المديونيات اللي انا المفروض ادفعها وبعدين في النهايه هجمع طبعا الحاجات اللي هي اصول تعتبر هتبقى بالموجب والحاجات المديونيات تبقى بالسالب وبعدين هجمع فهبتدي اعرف الصافي القيمه بتاعي كله بشكل عام قد ايه
انا هنا لاول مره وانا قاعد مع نفسي انا عرفت انا عندي ايه طيب واحد يقول لي مثلا انا عندي عربيه ممكن القيمه السوقيه بتاعه العربيات او القيمه السوقيه للبيت اللي انت عايش فيه وتحطها في الاصول عندك ومقتنيات ساعه عندك بحاجه بتعملها في الاستثمار عندك شاري حاجه مثلا بتتاجر فيها ايا كان هتحط الرصيد بتاعها في نهايه هذه الفتره
كده انا شفت النهارده انا عندي قد ايه فلوس السنه الجايه او في اخر ربع الجاي او ايا كانت الفتره اللي انت هتتفق فيها مع نفسك ممكن واحد يقول لي انا هعمل الموضوع ده مرتين في السنه ممكن واحد يقول لي انا عامله اربعه ممكن واحد يعملها مره واحده في السنه انا فكرتي الوحيده ان انت تبقى بتعمله عشان تعرف مركز المالي بتاعك
طيب استفدت انا ايه بقى لما عملت الكلام ده وحطيته قدامي اول حاجه لما هنيجي السنه الجايه هنشوف تطور بتاع المركز المالي بتاعك في كل بند من البنود دي يعني انا فتحت حساب سمسرة عملت بقى في شراء وبيع او استثمار تبقى سلام في صندوق سلبي او ايا كان اللي انا عملته من خلال حساب السمسار ده انا هشوف التطور مع الوقت الحساب ده هل بيزيد ولا لا
اقدر اعرف ايه كمان.. اللي هقدر اعرف ايه الحاجات اللي انا ضخيت فيها فلوس وايه الحاجات اللي ما دخلتش فيها فلوس يعني مثلا حساب السمسرة بتاعي هو بيطلع لوحده انا مش حاطط فيه فلوس او مثلا اشتريت بيت جديد السنه دي فشفت ان انا ضخيت فلوس في البيت الجديد شفت ان انا زودت في سبايك الذهب فالتغير السنوي ده ممكن يكون جاي من حاجتين ان الاصل نفسه ارتفع او انا ضخيت فلوس في هذا الأصل فهبتدي اتبع الحاجتين دول مهم جدا جدا عشان ابتدي اخد قرار ان انا ابقى شايف المركز المالي بشكل عام يعني ايه يعني انا معايا 100 دولار انا موزع ال 100 دولار دول شكلهم عامل ازاى والله انا موزع في العقار 30 دولار وموزع في الذهب 50 دولار أيا كانت التوزيعة بتاعتك طب السنه الجاية انا عندي نظرة مستقبلية لفئة أصول معينة غالبا هتعمل بشكل احسن فانا هبتدي احط فيها السنه الجايه
الفكره في المركز المالي ان هو هيساعدك تختار الحجم المناسب لكل استثمار طول ما انت مش شايف مركزك المالي بشكل عام طول ما انت بتحاول تحط فلوس في اي فكره وخلاص واحد قال لك اعمل كده طب انت متعرفش انا ممكن احط قد ايه انا اصلا مش عارف معايا كام لا لما ابص على المركز المالي كله ممكن الاقي آن واحد مثلا بيعرض عليا فكره كويسه اشتري الصندوق استثمار في حاجه معينه واروح حاطط مثلا رقم صغير بس لو بصيت على مركز المالي بتاعي لقيت الرقم ده صغير قوي بالنسبه للمركز المالي بتاعي لا انا قراري هنا هيتغير لا هقول له انا مستعد احط اكتر شويه او العكس تماما واحد بيقول لي مثلا تعالى نفتح مشروع وانا عايز منك الفلوس الفلانيه لما اجيب بصيت على الفلوس دي لقيت انها كبيره على المركز المالي بتاعي انا فاهم ان الناس كلها ممكن تقول ما احنا بنحسب الحسابات دي في دماغنا وبنشوفها وبنفكر بيها بالطريقه دي او ممكن تكون بتعمل كده لكن انت مش حاطط مش حاطه على ورق كل انك بتحطه على ورق وبتحاسب نفسك كل اول سنه او كل اول ربع انا بحط فلوسي فين بانهي شكل هيفرق جدا جدا في اتخاذ القرار في حجم الاستثمار اللي انت هتحطه لان في ناس كتير جدا بتبقى طيب الفكره دي جميله جدا الفكره دي روعه احط فيها قد ايه احط فيها 100 الف دولار هحط فيها مليون دولار احط فيها 10000 دولار ولا احط فيها 1000 دولار ايا كان الرقم اللي انت تختاره ما انا مش هختاره بناء على الرقم كبير او صغير، الراجل اللي عنده صافي الدخل 10 مليون دولار ممكن يحط مليون دولار عادي لان ده 10% من دخله او 10% من المركز المالي بتاعه فهنا كبره الرقم او صغره لا يعنيني في شيء حجمه بالنسبه للمركز المالي بتاعك هو كل حاجه بالنسبالي
فهنحتفظ بكشف الحساب بتاع كل الحسابات اللي عندي وبعدين هقسمهم أصول ومديونيات واحطهم على اكسيل شيت وبعدين هحسب صافي الدخل بتاعي، الـ 3 خطوات دول مهمين جدا جدا جدا اني اعرف اخد قرار مظبوط قرار مريح ان انا لو جاتلي فكره جديده اقدر احط فيها قد ايه
ونفس الكلام لو لقيت فكره من الحاجات اللي انا حاطط فيها فلوس مش شغاله كويس الأداء بتاعها، العوائد بتاعتها انا كنت متوقع اعمل 10% ولكن عملت 2% وبقلها سنتين تلاتة بتسحب مني فلوس فلما قعدت بصيت على المركز المالي بتاعي لقيت ان الجدوى الاستثمارية بتاعه البند ده بالنسبه للمركز بتاعي ملهوش معنى فهبتدي اوقف استثمر فيه وابتدي ادور على فئات أصل بشكل تاني
نفس الكلام بالنسبه لو حد حاطط جزء من محفظته في كريبتو او حاطط استثمار مثلا مع واحد صاحبه في مشروع او شغلك الرئيسي أيا كانت البنود دي انت ممكن تحطها لو رجعنا لحلقه فئات الأصول ممكن نرجع نشوف ايه هي فئات الأصول وكل فئة أصول ممكن يبقى فيها الحسابات دي موجوده في المركز المالي بتاع
انا هنا مش بتكلم على الدخل بتاعك او انت حوشت قد ايه في السنه عشان ده موضوع تاني انا بكلمك على اللقطة السنوية أو كل ربع سنه زي ما كل الشركات بتعمل انت المفروض تبتدي تعمل كده لنفسك ان انت تبتدي تعمل مركز مالي لنفسك وتشوف انت موجود فين الحاجه التانيه اللى انا ممكن اشوفها ان انا وانا قاعد على صعيد الدخل والمصروف انا السنه اللي فاتت لو انا عندي دخل جاي من مرتب معين فانا هضربه في 12 واشوف اي علاوات اخدتها من الشركه اللي انا شغال فيها واشوف انا ضخيت قد ايه في المركز المالي بتاعي يعني انا مثلا قبضت السنه دي 100000 صرفت منهم 80% فال 20% اللي فاضله المفروض ان انا ندخلهم في الاستثمار طب انا ضخيتهم ازاي حطيتهم في أي فئة أصول طب الفئه دي طلعت ولا نزلت وهكذا فانت ممكن تعمل المرحلة التانيه من التقييم بتاع المركز المالي بتاعك ان انت تشوف انت دخلت قد السنه دي وبعدين راح فين في المركز المالي بتاعك وعرفت هو اتحط بشكل مضبوط ولا لا فكده انت هتلم الصورة بشكل كامل
حاجه كمان انا ممكن استفيدها من بصتي على المركز المالي احجام الدين بالنسبه للاصول بتاعتي يعني هل انا سالف كتير قوي زياده عن اللزوم ولا انا واحد عندي اصول بس ومعنديش اي ديون طبعا يفضل ان الناس تبقى عندها اصول ميبقاش عندها دين على قد ما تقدر اكيد ولكن ساعات بيبقى في حاجات زي الاستثمار العقاري الحاجات اللي بتجيب اصل اللي بتدخل فلوس ساعات ممكن يكون الدين كويس
طيب الدين ده قد ايه بالنسبة للأصول يعني انا مثلا لما حطيته شفت المركز المالي عندي 100000 اصول و 20 ألف ديون، الديون دي كلها مثلا جايه من اصل مش جايه من حاجة استهلاكية، طيب انا عندي 100 الف اصول و 100 الف ديون طب انا عندي 100 الف أصول و300 ألف ديون هنا هيبقى في مشكله فالميزة برده اللي بتستفادها لما بتقعد تبص على المركز المالي بتاعك ان انت بتعرف قد ايه الديون مقارنة بالأصول وتبتدي تاني تغير في اللي انت عاوز تعمله السنه الجايه
ان انا مثلا عايز احط قانون ان اقفل الدين اللي عليا السنه دي، أو لأ انا مش واخد ديون بشكل كفايه انا عايز اشتري اصل انا ممكن يبقى عندي سيوله كويسه تسمحلي ان انا مثلا اخد 20% او 30% او 50% من الأصول عندي اخدهم قرض في حاجه تانيه واستثمر الفكره الفلانيه فالمركز المالي هيديك النظرة على احجام الدين مقابل احجام الاصول بتاعتك
طيب بعد ما اعمل كل الحاجات الجميله دي لازم ابقى عندي هدف، ايه الهدف بتاعي الهدف بتاعي ان بعد القاعده دي مع نفسي أو مع مراتي او مع اصحابي او مع اي حد لو قاعد بتتكلم عن مستشاره المالي انت لما عملت المركز المالي عرفت كل الحاجات اللي احنا اتكلمنا عليها شفت صوره اوضح عن نفسك أنت هنا اكنك بتعمل تحليل او اشاعه او حاجه بس على المركز بتاعك لازم اطلع منه بكذا حاجه الحاجه
الاولانيه هل انا ماشي على المدى الطويل في السبيل بتاع تحقيق الاهداف الكبيره بتاعتي التقاعد أو سواء اوصل لحرية ماليه عن طريق ان انا اعمل محفظة من الأصول اللي بتتدخلي الرقم اللي انا عايزه ولا لا وده برده نرجع ونقول الحلقه بتاعه بداية الادخار الحلقه اعتقد رقم 13 اللي هي بتقيس انت المفروض يبقى عندك قد ايه في كل سنة من السنين بتاعتك بناء على سنك انت فتبقى عارف انت معاك قد ايه دخل، فنقدر هنا نشوف اول حاجه هل انا ماشي على المدى الطويل واصل للهدف اللي انا عاوزه ولا متأخر فاستعجل وازق شويه ولا لا
طيب وعلى المدى القصير هبتدي اعرف انا السنه الجايه عندي التزامات معينة مثلا هتجوز او هشتري عربية أو هسافر او عايز اغير شغلى أيا كان على المدى القصير اللي هو مثلا في 2024/2025 السنتين الجايين هل المركز المالي بتاعي يسمح لي ان انا اعمل حاجات اللي انا عايز اعملها ولا لا انا النهارده ممكن اكون محوش شويه عشان انا مثلا هتجوز فهل الاصول بتاعتي فيها سيولة معينه تخليني اعرف اتجوز ولا لا هل انا عليا ديون كتير مش هعرف اعمل حاجه السنه دي عشان الديون ضغطه عليا ولا لا فالميزه هنا ان انا كل سنه لازم اقعد مع نفسي اكتب الهدفين بتوعي المدى الطويل والمدى القصير، المدى الطويل اللي هي مثلا محفظة التقاعد مثلا والمدى قصير اللي هم سنتين الجايين هقعد اكتب الأهداف بتاعتي وممكن دي تبقى اهداف 24 واشوف المركز المالي بتاعي وضعه بقى عامل ازاي
الفكره دي برده ممكن تتكرر كل سنة أو كل ربع ان انا جيت بعد ربع او جيت بعد سنه قلت انا والله الأهداف بتاعتي اتغيرت انا النهارده خلاص مثلا معنديش التزامات وعايز استثمر جامد في فئة أصول معينة فهستثمر جامد
والله الأسهم بقلها سنتين بتنزل جامد النهارده بقى في فرصه في الأسهم من العالميه انا بقول اي كلام يعني بس بدي مثال، والله انا هحط كل فلوسي السنه الجايه في الاسهم والله الذهب استثمار مش عارف ايه فمش عارف اعمل ايه في الذهب والله في بيت هيظهر وانا محتاج اشتري السنه الجايه فانا هحطه في الأهداف قصيرة المدى
يبقى انا عملت هنا ايه جمعت المعلومات سيفتها طلعت صوره طلعت الأشعة حطيت اهدافي ابتديت اتابع اهدافي كل سنه انت هنا بتنظم نفسك وبتنظم تفكيرك ان انت يبقى عندك خطة قصيرة المدى وخطة طويلة المدى بتقيس انت وصلت للي انت عايزه ولا لا، بتقيس انت وصلت لأهدافك ولا لا وبعدين لما بتكتب الأهداف بتاعتك على ورقة برده الموضوع بيبقى لطيف ان انت بتشوف هل الاهداف دي واقعيه ولا هل الاهداف دي صعبه ولا لا
مش هتكلم النهارده قوي ازاي تقيس انت عملت ايه في الاستثمار هل الاستثمار كان ناجح ولا لا هل في حاجه احسن منها ولا لا مش هتكلم في الحته دي النهارده كل اللى انا عايز اتكلم عليه ان انت اصلا ازاي تشوف نفسك ازاي لو انت جيت قعدت معايا او قعدت مع اي حد مستشار مالي وعايز توريله المركز المالي بتاعك لازم الاول تعرف يعني مركز مالي يعني ايه صافي الدخل بتاعتك وبعدين الموضوع كمان ممكن يتطور ان انت تبدأ تتابع مصاريفك تتابع حاجات تانيه معقدة اكتر فئات أصول تتوقع العائد بتاعها السنوي وتبتدي تحط التوزيع بناءا عليه بس انا النهارده بتكلم بس على الخطوه الاولى اللي انت ممكن تعملها عشان تعرف ايه هو المركز المالي بتاعك
يا رب الحلقه دي تكون مفيدة كل سنه وانتم طيبين وان شاء الله اشوفكم الاسبوع الجاي
Translation of some words and terms:
Reflect يعكس
Energy طاقة
Accounts حسابات
Statement كشف الحساب
Portal منفذ
Physical مادية
Assets الأصول
Liabilities الالتزامات
Net Worth صافي القيمة
Retirement التقاعد
Allocation توزيع
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #المركز_المالي