139. خطة تنفيذ الميزانية (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
اتكلمنا في الحلقة 37 على إيه هي الميزانية وليه الميزانية مهمه وفي الحلقة 38 اتكلمنا على تقسيمة الميزانية كبنود، في حلقة النهاردة بنتكلم عن ازاي أقدر أنفذ الميزانية بتاعتي دي على أرض الواقع. حلقة النهاردة هي تطبيق عملي على تنفيذ الميزانية
حمل ملف الإكسل الموجود تحت الحلقة وهنمشي مع بعض بالخطوات
01:47 ليه بتواجه صعوبات وقت تنفيذ الميزانية؟ -
02:19 الخطة التنفيذية.. ازاي تنفذ الميزانية؟ -
04:05 التحويلات البنكية -
05:35 المصروفات المتوقعة -
06:08 البنود الأساسية -
07:52 بند المواصلات -
08:38 بند التأمين -
09:04 بند طلبات البيت (الأكل، الشرب، ...) -
09:43 بند الأولاد (مصاريف مدارس، رياضة،...) -
10:41 بند الكماليات (لبس، سفر، فُسح،...) -
11:32 الاستثمار للتقاعد / للطوارئ -
13:59 ازاي تنفيذ وتحليل الميزانية هيساعدك على المدى الطويل؟ -
16:00 مفيش طريقة سحرية.. أوصل بالطريقة اللي تريحك -
التعامل مع الفلوس طول الوقت ممكن يسبب إجهاد ذهني ونفسي، هدفنا من الحلقة هو إزاي تنفذ ميزانيتك بطريقة سهلة ولذيذة وتقلل التفكير في الفلوس على قد ما تقدر. لو شايف أنك بتنفذ ميزانيتك بطريقة أسهل من اللي أتكلمنا عليها في الحلقة وبتحقق نتايج أفضل شاركنا على صفحتنا على السوشيال ميديا وممكن نتكلم فيها بشكل أكبر مع الناس
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
اهلاً بيكوا في حلقة جديدة من بودكاست كلام ينور حلقة النهاردة من الحلقات اللي بعتبرها من التجارب العملية بتاعتي يعني حاجه أنا يمكن بقالي كتير بعملها توصلتلها بمجهوداتي الشخصية طبعاً من قرايات أو بشوف ناس تانية بتعملها ازاي بس ده نظام أنا بحاول أوصله وبحاول ألتزم بيه عشان يسهل عليا درايتي المالية شكلها عامل ازاي شهرياً بتعامل مع الفلوس ازاي وهي التطبيق العملي التنفيذي للميزانية
احنا اتكلمنا قبل كده في حلقة عن إيه هي الميزانية ، مهمه ليه وعملنا حلقة تانية بعديها هي إيه بقى الميزانية بظبط كتقسيمة فالنهاردة بتكلم على زي ما بيقولوا اللائحة التنفيذية بتاعتها ، ازاي أقدر أنفذها وازاي الموضوع يكون لذيذ ميضايقنيش وميخلينيش أفكر في الفلوس على قد ما أقدر لأني عايز أكمل بقية الشهر مفكرش اصلاً في الفلوس فهنمشي مع بعض في الحلقة في الخطوات
01:47
هل عمرك حسيت إنك بتعمل ميزانية كويسة ولما بتيجي تنفذها بتواجه صعوبات؟ يعني أنت عارف مثلاً الحساب بتاع البيت محتاج تصرف قد إيه في الشهر ، ومثلاً كهربا وماية كل البنود بتاعة الميزانية اللي احنا اتكلمنا فيها قبل كده.. هل بتحسوا إن التنفيذ صعب؟
ممكن يكون صعب لسبب إنك معندكش خطة تنفيذية لهذه الميزانية يبقى تعالوا نقسم الموضوع اتنين
02:19
أول حاجه أنا بكتب الميزانية على الورق ، بتوقعها أول السنة بنعمل تقديرات ولكن لما بيجي التنفيذ في الحياة بنلاقي صعوبات عشان أقلل من الصعوبات دي عليا لازم أنظم نفسي ولازم يبقى عندي حاجه تانية اسمها الخطة التنفيذية.. ازاي هنفذ الميزانية بتاعتي دي على أرض الواقع ودي بتبدأ من أول يوم بتستلم فيه مرتبك أو الدخل بتاعك اللي هو غالباً لو أنت موظف بيبقى في آخر 5 أو 7 كل شهر على حسب كل شركة بيبقى ليها نظام بس هنقول اننا هنقبض مثلاً يوم 25 في الشهر هنشوف بقى دلوقتي المفروض أعمل إيه يوم 25 أو يوم 26 الصبح وده اللي هيسهل عليك تماماً تنفيذ الميزانية وده اللي هيخليك طول الشهر متفكرش اصلاً في الفلوس ومتتعاملش مع فلوس
03:13
هدفي من الحلقة دي إن أنت ديماً تحاول تقلل التعامل بتاع بتاعك مع الفلوس بمعني اننا هقعد مره أو اتنين في الشهر هخلص فيهم كل المجهود الذهني والنفسي بحيث إنه ميعملش معايا عبء طول الشهر إن انا محتاج لسه أخش على حسابات أو أحول فلوس أو أعمل أي حاجه لأ أنا بقعد ساعة أو ساعتين كل شهر بخلص فيها كل أحتياجاتي التنظيمية للميزانية بتاعتي
03:41
أنا كده دخلت الحساب البنكي بتاعي ده رقم حسابي اللي في البنك بخش أونلاين يوم 25 أو 26 بيجيلي التحويل سواء بشوفه برسالة أو أياً كانت الطريقة اللي بتعرف بيها إن الفلوس وصلتلك بتروح داخل عامل تسجيل دخول على حساب البنكي بتاعك شايف الفلوس وصلتلك
04:05
أول خطوة بعملها اننا ببقى مجهز عندي 5 أو 6 تحويلات أول ما بشوف المرتب بتاعي بخش أعملهم التحويلات دي بتبقى عبارة عن إيه، لو أنا عندي كمثال مثلاً حساب عامله للطوارئ بتاعتي وبشيل كل شهر مثلاً 100 جنية أو 150 جنية لحد ما أوصل للرقم المطلوب يبقى أول تحويل هعمله لصندوق الطوارئ بتاعي
تاني تحويل هعمله مثلاً لشركة الكهربا أو الماية أنا عندي في بند في الميزانية بتاعتي أنا بدفع رقم مش ثابت بس حوالين رقم معين الفواتير بتلاقيها يمكن في الصيف بتعلى شوية وفي الشتا بتنزل بس أنا عارف الرقم بتاعي قد إيه فبعمل التحويل بتاع الفواتير بتاعتي
بشوف إيه تاني حاجات اساسية اللي أنا بعملها في حياتي زي الأكل والشرب برده بشيل الرقم اللي هيكفيني شهرياً في حساب معين هقول ده حساب الأكل والشرب
ممكن أعمل تحويل لحساب الاستثمار أو حساب التقاعد أو التحويش بتاعي اللي أنا هطلعه ، أنا هقطتع مثلاً 20% من دخلي وهحطهم في حساب التوفير أو التقاعد بتاعي
يبقى أنا عملت إيه هنا أنا أخدت مرتبي وقسمته وأديت لكل الفلوس بتاعتي الأدوار بتاعتها والأدوار هنا ممكن تكون في شكل حسابات تانية ممكن ده يكون حساب افتراضي أو حساب الأهداف لأن بنشوف بعض البنوك بتقولك لو أنت عايز مثلاً هدف معين حول الرقم ده هناك
05:35
طيب إيه الحاجات التانية اللي أنا مهم أتوقعها لو عندي مصروف أنا بحوشله طول السنة وأنا عارف إنه هيجيلي مثلاً في شهر 7 ممكن نقول مثلاً حساب مدارس الولاد ، الولاد مثلاً هندفع لهم شهر 7 أو 8 أياً كان فأنا من شهر 1 و2 و3 محتاج أشيل رقم شهرياً أعمل حساب للمدارس يبقى أنا همسك ميزانيتي همشي بند بند وهجزأ أنا هودي رقم الحساب ده بتاعها فين أو المكان اللي أنا هحوش فيه الهدف ده
06:08
يبقى تعالوا معانا كده في الحلقة رقم 38 احنا كنا أتكلمنا على الميزانية وكنا حطينا على الموقع بتاع الحلقة دي الميزانية لو أنت عاوز تحمل ملف الإكسيل هتلاقيه موجود هناك وممكن تحمله من خلال الرابط اللي هنحطهلكوا برده في الشو نوتس
طيب الميزانية دي أنا هزود عليها إيه النهاردة.. هزود عليها مكان كل بند من البنود دي بمعنى إننا مثلاً أول حاجه في الميزانية بتاعتي هي الدخل اللي بيجيلي ، أنا عرفت ان الدخل اللي بيجيلي ده مثلاً على حساب البنك الفلاني من الشركة الفلانية اللي أنا بشتغل عنده
بعد كده لما أروح عند المصاريف أول حاجه اللي احنا ديماً بنقول عليها اللي هي الحاجات الأساسية اللي مقدرش أعيش من غيرها.. أنا النهاردة بدفع إيجار ، أو بدفع قسط بيت.. طيب أنا بدفعه شهرياً ولا كل 3 شهور ، لو أنا بدفعه كل 3 شهور يبقى في جزء من مرتبي اللي نزل النهاردة هيروح في حساب اللي هيدفع الإيجار أو هيدفع قسط البيت
طيب لو هياخده شهرياً فهو خده خلاص ، ولو هياخده كل 3 شهور يبقى أنا محتاج احوله في حساب عشان لما يجي عليا 3 شهور أو 6 شهور يبقى معايا الفلوس يبقى دي أول مكان أنا محتاجه
طيب لو عندي زي ما قولنا فاتورة الكهربا والماية أتكلمنا عليها دي برده هيبقى ليها حساب ممكن تبقى عن طريق شبكة دفع معينة فمصر مثلاً في حاجه اسمها فوري أياً كانت الطريقة اللي بدفعها بيها هشوفلها حاجه وهكتب جنبها على الميزانية بتاعتي أنا بدفعها من خلال إيه. فاتورة التليفون نفس الكلام ممكن يكونوا مع بعض في بند المصاريف كل ده بيدفع شهرياً فهطيرة كله من مرتبي على طول ، ممكن يكون من البنك نفسه كمان اللي أنا باخد فيه مرتبي
07:52
بعد كده عندي المواصلات بتاعتي ممكن المواصلات هنا زي ما أتكلمنا عندنا 7 بنود في المصاريف بتاعة العربية فانا حسبت الـ 7 بنود دي لقيت اني بدفع في الشهر مثلاً 500 أو 1000 مثلاً أنا بقول أي رقم ده مثلاً البنزين ولكن في 1000 أو 1500 تانين المفروض أشيلهم على جانب كل شهر بس عشان لا قدر الله لو حصلي حاجه عشان الصيانات عشان التجديد الكلام اللي احنا اتكلمنا عليه في الحلقة بتاعة العربية يبقى أنا محتاج أشيل الفلوس دي على جانب محتاج أشيلها من مرتبي اللي بينزل كل شهر عشان ميجليش يوم من الأيام افاجئ إن أنا عليا المصاريف الكبيرة دي وهما مش موجودين يبقى ده برده حاجه تانية تخليني أشيل فلوس المواصلات على جانب
08:38
بعد كده احنا اتكلمنا برده على التأمين لو أنت عاوز تعمل تأمين ممكن التأمين ده يبقى على الحياة ، على الامراض الحرجة ، ممكن يكون لو مشيت من وظيفتك أو خسرت شغلك في أنواع تأمين كتير فالتأمين برده أنا هعرف أدفعها منين وازاي وأشوفلها حساب وأبتدي أحوش فيه
09:04
بعد كده هيجي البند الرئيسي الكبير اللي فيه تفاصيل كتير أوي صغيرة وهي الأكل والشرب أو الشوبينج اللي بنعمله كل شهر أو حساب البيت ، ففي حالة لو أنت لوحدك هتعمل حساب تقولي ده اللي أنا هصرف بيه شهرياً على الشوبينج سواء أكل ، شرب ، سوبر ماركت أياً كان فهحطه في الحساب ده ، طيب لو أحنا 2 عايشين مع بعض او 2 متجوزين ممكن نعمل حساب مشترك ما بينا احنا الاتنين نحط فيه فلوس الأكل مع بعض وهسميها هنا فلوس البيت للأكل والشرب وأروح حاطتهم فأنا أقدر اعمل شوبينج براحتي
09:43
البند اللي بعد كده ، وأنا بقرا برده من الميزانية أنا ماشي معاكوا خطوة بخطوة .. الحاجات اللي ليها علاقة بالأولاد زي المدارس ، الرياضة ، التعليم أياً كان بنود ممكن اسميها الاولاد لو في أولاد أقدر احوش لهم قد إيه في الشهر أنا محتاج مثلاً 20% من ميزانيتي بس هوديها هناك فلازم اشيله كل شهر عشان ميجليش مشاكل في الشهور اللي انا محتاج مثلاً ادفع فيها قسط رياضة أو قسط مدرسة أو الكلام ده كله ودي المشكلة اللي بلاقيها ديماً ان الناس بتقعد تقول أه انا ميزانيتي الشهرية كذا بس لما اجي اطبقها مبعرفش زي ما قولنا في الأول ليه لأن بيجيلي شهور عندي فلوس كتير اوي لازم أدفعها وفي شهور الدنيا بتبقى واطية جداً فمباخدش بالي وابتدي أصرف اكتر فالميزانية بتاعتي بتبوظ لكن لو حضرتك شيلت كل شهر البنود دي من مرتباتنا هنلاقي إن في الأخر اللي احنا المفروض نصرفه هو الرقم اللي أنا مفروض متوقعه
10:41
هنروح بعد كده على الكماليات اللي هي 30% ، زي ما قولنا احنا 50 – 30 – 20
ممكن الكماليات دي تتغير كل شهر يعني في شهر عايز اسافر ، شهر عايز أشتري لبس ، شهر عايز أخرج فممكن أحط حساب واحد بالكامل للكماليات وأقول لنفسي الحاجات دي أنا هصرف بيها على الجيم على السفر ، رايح عيد ميلاد جايب هدية لواحد صاحبي ، هنتعشى عشوه حلوة أياً كان بقى الكماليات اللي انا عايز أعملها ومع الوقت ممكن تلاقي أنك عندك فائض في الكماليات كمان اللي هو أنا قولت عايز أصرف 30% من دخلي على الكماليات وبعدين الحساب قاعد عمال يزيد فأنا ممكن أوجهه بعد كده لحاجه تانية ولكن أنا كده فصلتهم في دماغي وفصلتهم في حساباتي البنكية
11:32
هنيجي عند آخر حاجه اللي هي الاستثمار للتقاعد زي ما قولنا أنت ممكن تعمل حساب للطوارئ ممكن تعمل حساب للتقاعد ممكن دي متبقاش حسابات بنوك ممكن تبقى حسابات استثمارية في شركة معينة بس أنت فصلت
فتاني عايزك ترجع للميزانية بتاعتك تعمل خانة جديدة وتكتب مكان وجود الحساب ده ، لما تكتب الكلام ده أنت نفسك في دماغك هتوجه دماغك أننا عارف فلوسي رايحة في الحتة الفلانية معنى كده إن أنت بعد ما يجيلك مرتبك لازم 100% من مرتبك يروح في حتت ، يعني المفروض حسابك البنكي ميبقاش فيه أي حاجه بعد التوزيعة دي مش معنى كده أنك صرفت الفلوس كلها لأ أنت وجهتهم بحيث كل واحد هيروح يعمل شغلانته في آخر الشهر
12:26
يبقى أنا هدفي إيه هدفي أنك تقعد قاعدة أول الشهر وقاعدة تانية مثلاً خلال نص الشهر أو قريب من آخر الشهر حتى ان أنت تبص على الحسابات بتاعتك وتشوف إيه اللي حصل خاصة الحسابات اللي هي فيها معاملات صغيرة زي مثلاً الشوبينج بتاع البيت ، كل ما تخلي المعاملات بتاعتك إلكترونية كل ما أنت هتقدر تخش تراجع الفواتير بتاعتك والميزانيات
يعني أسهل جداً انك تعرف أنت صرف إيه أمتي والساعة كام لما تحطهم على كشف حساب من البنك وهنا مش لازم يبقى بكريدت كارد أنت ممكن تكون عامل ديبيت كارد (بطاقة خصم فوري) تقدر تخش تصرف بيه مصاريف البيت منه فهنيجي في القاعدة التانية بتاعة الشهر ابص المعاملات كلها صحيحة ، سليمة مفيش فيها مشكلة وبرده هتعملك حاجه مهمه جداً هتعملك وعي انك لما تقعد تبص على الأرقام هتفهم أنك بجد صرفت على الحاجات دي وهتيجي الشهر اللي وراه تقول لنفسك هو أنا فعلاً كنت محتاج الحاجات دي ولا لأ ولكن مع الأسف مشكلة التعاملات المالية اللي بالكاش أنك مبتقدرش تشوفها وتحللها فالقاعدة التانية بالنسبالي هي أكتر تحليل
يبقى القاعدة الأولانية أنت بتوجه فلوسك بتتحط في الحسابات دي بتوزعها بتسهل على نفسك بقية الشهر ، القاعدة التانية هي تحليل للنتيجة بتاعة التحويلات دي أنا عملت بيها إيه
13:59
تعالوا نمشي مع بعض في سيناريو إني جيت أول السنة شهر يناير حطيت ميزانيتي السنوية وألتزمت وبعدين قعدت 12 مره في السنة وزعت فلوسي ، حولتها وفي نفس الوقت عملت 12 مره من المراجعة أنا راجل ملتزم عملت كل المطلوب مني هيساعدني ازاي ده على المدى الطويل أني لما أجي أقعد السنة اللي وراها السنة رقم 2 توقعاتي في الميزانية هتبقى أحسن ، السنة رقم 3 توقعاتي هتتحسن بشكل عام
الفكرة في الموضوع ده أني هفهم نفسي أكتر القعدتين اللي أنا هعملهم في الشهر دول هيفهموني أكتر أنا بعمل إيه ولو قعدت أكتر من قعدتين 3 و4 و 5 و6 أنا من وجهة نظري بتعمل حاجه غلط كل ما نقلل الوقت كل ما نقلل التعامل مع الفلوس كل ما أكون نجحت في تحقيق الهدف بتاعي.. ليه؟ لأني مش عايز أعملك إجهاد ذهني مش عايز الفلوس تبقى هي محور حياتك مش عايزك تبقى ديماً بتفكر أنا نفسي أعمل كده وأنا صرفت هنا بالمللي قد إيه انا مش فارق معايا أوي أن الحسابات تبقى مظبوطة بالمللي أو الميزانية بتاعتك تبقى ماشية بالحرف الواحد لأ أنا عايز أستمتع برده بحياتي أنا مش عايز أبقى موجه جزء كبير من مجهودي الذهني بتاعي إني مركز في الفلوس عشان كده أنا بحدد الموضوع في قعدتين فقط في الشهر ، ومع الوقت أو مرة ممكن تبقى ساعة في كل قاعدة وبعد كده ممكن تبقى 10 ، 20 دقيقة في كل قاعدة لما تبقى محترف
بس بجد اللي هيساعدني على المدي الطويل إن السنة اللي وراها واللي وراها واللي وراها هبتدي أعمل توقعات لميزانيتي أحسن بكتير وأبقى مسيطر على ميزانيتي مستريح.. ليه؟ لأن أنا برده بيجيلي رسايل كتير بتقولي أنا بعمل كل الكلام اللي أنت بتقوله أو كتبته وعملت الميزانية بس الميزانية ضاربة أو بايظة .. ليه ، لأن أنت مش عارف تنفذ فالحلقة دي تاني هي دي الخطة التنفيذية بتاعة الميزانية
16:00
الحلقة دي مهمه؟ آه مهمه ممكن تكون بتعملها بطريقة تانية معنديش مشكلة انك تعملها بطريقة تانية ، يعني مش عايز برده الناس تقتنع أن هي دي الطريقة الوحيدة السحرية اللي هتحللك مشاكلك في حياتك أو مشاكل الميزانية لأ دي طريقة أنا بعملها أو شوفت ناس بيعملوها ونجحت معايا ممكن طريقتك تكون مختلفة شوية المهم في الأخر اللي احنا عايزين نعمله ان احنا ننجح في عمل الميزانية ، تنظيم الميزانية ، ومراجعتها ومع الوقت في تحسينها لتحقيق الأهداف بتاعتي يعني مش عايز الناس برده يجلها هاجس ان دي لازم الطريقة الوحيده اللي نعرف نعملها لأ أنا مش عايز كده خالص أنا عايزك توصل بطريقتك
فلو حضرتك وصلت بطريقة أحسن مني ، أو شايف أنك ماشي بطريقة اسهل من كده وبتحقق نتايج أفضل ياريت تشاركونا وتبعتولنا رسايل وممكن نتكلم فيها ونناقشها بشكل أكبر مع الناس وشكراً جداً على وقتكوا إنكو وصلتوا معايا للحته دي وهستناكوا إن شاء الله الاسبوع الجاي
Translation of some words and terms:
Estimates تقديرات
Log in تسجيل الدخول
Investment استثمار
Retirement تقاعد
Virtual افتراضي
Goals أهداف
Needs احتياجات
Rent إيجار
Mortgage رهن عقاري
payment network شبكة الدفع
Transportation المواصلات
critical illness الامراض الحرجة
Emergency طوارئ
Once الكماليات
Debit Card بطاقة خصم مباشر
Analyses تحليلات
Limit حد
Obsess هاجس
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #تنفيذ_الميزانية#إعادة