124. تحليل المحفظة الاستثمارية
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
أوقات كتير بناخد قرارات استثمارية ونشتري حاجات بشكل عشوائي بدون دراسة وتحليل ومتابعة للبيانات ولكن عدم تنظيم المعلومات دي ممكن يأثر على قراراتنا في المستقبل وممكن يخلينا منبقاش فاهمين احنا بنعمل إيه
في حلقة النهاردة بنتكلم على خطوات من خلالها تقدر تعمل مراجعة وتحليل لشكل محفظتك الاستثمارية.. ازاي تحللها عليها؟ ليه ضروري تحللها؟ والتحليل ده هيساعدك ازاي في المستقبل؟
(01:29) تجميع وتخزين البيانات -
(02:55) تحديد الأهداف الاستثمارية -
(03:50) توزيع فئات الأصول -
(05:26) الاحتفاظ بالتواريخ -
(06:24) أقعد مرة ولا مرتين في السنة؟ -
(06:42) هل استثماراتي متوزعة بشكل مريح؟ -
(08:00) تحليل تكلفة امتلاك الأصول -
(09:00) إعادة توزيع المحفظة -
(10:10) هستفيد ايه من تحليل محفظتي الاستثمارية؟ -
(10:20) الخبرة التعليمية -
(11:06) الثقة في النفس -
(12:05) راحة البال -
(12:42) تحليل التكلفة بشكل أذكى -
(12:55) تحقيق الأهداف -
ابتدي ابني تحليلك بالطريقة اللي بتريحك عشان تبتدي تتابع محفظتك، خد وقتك واتعلم، الاستثمار على المدى الطويل هو المهم هو المفيد هو اللي هيحقق لك أهدافك الاستثمارية
اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكو في حلقة جديدة من بودكاست كلام ينور
النهارده عايزه اتكلم على موضوع ازاي ممكن تقعد مع نفسك كده وتعرف انت عملت ايه في المحفظه بتاعتك لان احنا ممكن نكون بناخد قرار استثمارية، اشتريت حاجات معينه ولكن عدم تنظيم المعلومات دي ممكن يأثر على قراراتنا في المستقبل وممكن يخليك متبقاش فاهم انت بتعمل ايه
من خلال الحلقه دي انا بعمل مراجعة كده لمحفظتي.. ازاي ممكن ابص عليها؟ ليه ابص عليها؟ ازاي ده هيساعدني في المستقبل لتحقيق الخطة بتاعتي؟
(01:29)
اولا دي حاجه من الحاجات اللي انا مش عايز الناس تعملها بشكل زياده عن اللزوم وفي نفس الوقت مش عايزهم ما يعملهاش خالص فدي حاجه انا شخصياً ممكن اعملها مره او مرتين بكتير في السنه لان برده كترها مش حاجه كويسه ان انت ممكن تقعد تغير قراراتك والكلام ده كله
فاول حاجه لازم اعملها لازم يبقى عندي كشف حساب او حاجه بتبين الرصيد بتاعي الموجود في استثمار معين ممكن يكون مثلا لو حاجه في الاستثمار العقاري انا دفعت قد ايه لحد دلوقتي في البيت الفلاني أو في الارض الفلانية او الفكره الفلانيه
فاول خطوة لازم ابتدي اجمع البيانات بتاعتي أو أجمع مكان الحاجات دي موجوده فين، فمثلاً لو عندي في البنك كشف الحساب البنكي، لو عندي في شركة سمسرة يبقى هو كشف حساب شركة السمسرة، لو عندي في صندوق استثمار اجيب الوثائق اللي انا اشتريتها وهكذا وهكذا
البيانات دي ممكن أجمعها وأخزنها واحطها على الكمبيوتر بتاعي أو على كلاود أو أياً كانت الطريقة اللي بتحفظ بيها المستندات بتاعتك في مكان ما بحيث تقدر ترجع لها في يوماً ما لو عايز ترجع للأرقام القديمة فتنظيم الموضوع ده بالنسبالي من الحاجات اللذيذة وبتخليك برضه متحمس وتشوف التطور بتاع حسابك
فأول حاجه التخزين بتاع المعلومات
(02:55)
تاني حاجه لازم يبقى عندي شيت اكسل حط فيه الأهداف بتاعتي، انا ليه بحوش؟ انا بحوش عشان التقاعد، بحوش قد ايه من المرتبي؟ بحط الأهداف بتاعتي وبحاول اسجل الاهداف بتاعتى فى المكان اللي انا هتابع فيه مكان محفظتي برضه عشان أقدر أشوف هل الأهداف بتاعتي على المدى القصير او على المدى الطويل بتتحقق من خلال الخطة الاستثمارية دي ولا لأ
ممكن مثلاً واحد عنده التزام في فترة جاية بعد سنة أو سنتين عايز يشتري حاجات قصيرة المدى أو عايز يشتري حاجات تديله عوائد على المدى القصير فبيحط الهدف بتاع المدى القصير ده، هيتجوز مثلاً فمحتاج مبلغ معين، هدرس، هسافر أياً كان الهدف القصير المدى هحطه وأحط الأهداف برضه طويلة المدى
يبقى أنا أول نقطتين عايز أتكلم فيهم أنا بجمع معلوماتي وبعرف انا عايز إيه من الأهداف
(03:50)
تالت نقطة واللي هي النقطه المهمه جدا بالنسبة لي توزيع فئات الأصول بتاعتي هي بمنتهى البساطه انا جمعت البيانات في الحته دي قلت انا عندي في حساب الاولاني في البنك 20 وعندي في شركة السمسرة 50 وعندي الصندوق استثمار 30 وده كل اللي أملكه من الفلوس فهحطهم بشكل منظم وبعدين هبص على النسب المئوية
النسب المئوية بالنسبة لي أهم من انت حاطط قد ايه فى الحاجات لسبب انت النهارده ممكن يكون دخلك صغير، ممكن تبقى في بداية طريقه للتحويش ولكن لو اخدنا نفس المثال ده وانت معاك مليون أو 10 مليون انا عايزك لما تختار فئة الأصول تختار بالنسب متختاريش اصل ده كتير أوي هنا، انا حاطت فلوس كتير في العقار، او حاطت فلوس كتير أوي في الأسهم لأ انا عايزك تتكلم بالنسب
فأنت لما بتعود نفسك تحط الحاجة بتاعتك وتخزينها وتشوف نسبها بالنسبة لصافي القيمة بتاعتي ده هيخليك تاخد قرارات أكبر في المستقبل، انت مثلا شايف عوائد معينة في فئة أصول معينة، شايف انك مفروض تتحرك من أدوات الدخل الثابت للأسهم مثلاً فهحول نسبة إدخاري في محفظتي 20% هنا لـ 50% هنا
لما هبص بالنسب هبعد تماماً عن القيمة المالية للاستثمار فلازم احط على إكسيل شيت أو ورقة أو أياً كان الطريقة النهاردة أنا حاطت الدولارات بتاعتي أو الجنيهات أو الريالات بتاعتي بالطريقة دي نسبهم من الـ 100% قد كده ده بالنسبالي حاجه مهمه جداً
(05:26)
الحاجة التانية انا النهاردة قعدت في سبتمبر 2023 لازم ابتدي اكتب في العنوان سبتمبر 2023 لما هقعد المره الجايه مثلاً في مارس 2024 هبتدي أعمل المحفظة بتاعتى شكلها عامل ازاي في مارس 24 ليه هنا هبتدي احط التواريخ عشا ابتدي اتابع أنا أول مره عملت إيه، تاني مره عملت إيه، تالت مره عملت إيه، وهكذا وابص على النسب هل النسب بتتغير ولا لأ، هل الاستثمارات بتاعتي بتزيد في الاتجاه اللي أنا عايزه، انا عايز أزود في محفظة الأسهم مثلاً أو عايز أقلل في محفظة الأسهم الهدف بتاعي بيقول كده هل انا قاعد عمال أزود في دي ولا لأ
بعد ما أجمع المعلومات هحطها على ورقة او اكسيل، العمود نفسه هيبقى التاريخ، وفئات الأصول هتبقى موجودة على الصفوف اللي تحت وبعدين هحط السنة المالية اللي أنا بحط فيها
(06:24)
هل بقى هختار اقعد مرة في السنة أو مرتين في السنة؟ ده يرجع لكل واحد عايز يعمل إيه بس أنا مفضلش أكتر من كده، بمجرد انك قعدت وحطيت النسب بتاعتك واخترت استثماراتك وابتديت تضخ فيها فلوس تيجي بعد 6 شهور تشوف انت حققت اللي انت عايز تعمله ولا لأ
(06:42)
النقطة الرابعة اللي أنا ممكن استفادها من الموضوع ده أو اللي مفروض اعملها من التحليل بتاعي بعد ما جمعت وحطيت أهدافي وبعد ما عملت توزيع لفئات الأصول بتاعتي عايز اعرف هل انا موزع استثماراتي بشكل مريح ولا لأ
ممكن واحد يقول انا لما حطيت الحاجات على إكسيل انا لقيت عندي 20 حاجه وده زيادة عن اللزوم أنا محتاج بس 5 فئات أصول فهبتدي أقلل، واحد تاني يقول لأ ده انا حاطت كل حياتي في البيت اللي أنا عايش فيه معنديش اي حاجه تانيه محتاج أبتدي اوزع
فتنويع الاستثمارات بتاعتك هيبتدي يظهرلك من خلال الشيت ده أو من خلال الورقة أو القاعدة مع النفس دي ان انت تشوف انت وزعت ازاي، في الحالتين انت ممكن تكتشف ان عندك حاجات كتير زيادة عن اللزوم ملهاش معنى، حاجات 1% وحاجات 5% حاجات قليلة جداً مهم طلعت مش هتعملك اي حاجه
عندي كريبتو 1%، والـ 1% لو طلعت 100% فهو مش هيغير من حياتي فأنا محتاج يا إما ابيعه خالص يا إما أزوده أو فئة الأصول دي أصلاً ملهاش لازمه أو ليها لازمه فأنت لما تقعد هتبتدي توصل مع نفسك هل التوزيع اللي انا عامله مخليني حاطط حاجات كتير في حته واحده ولا بالعكس انا حاطط حاجات كتير ملهاش لازمة
(08:00)
الحاجه اللي بعد كده هعرفها تحليل التكلفة بتاعتي، أنا النهاردة عندي 6 فئات أصول بدفع عليها تكاليف كذا كذا كذا، يعني صندوق الاستثمار ده بيحاسبني بالطريقة الفلانية والبيت ده بدفع فيه عموله قد كده وباخد إيجار هنا فبدفع عليه صيانات فابتديت اعمل تحليل للتكلفة بتاعتي لامتلاك هذا الأصل
لما هبص بشكل عام على المحفظة هعرف سنوياً المحفظة دي بتكلفني كام سنوياً عشان تبقى في الشكل ده واحد هيعمل كده ويقول إيه ده انا مش شاري صندوق استثمار بدفع عليه 1% أو 2% في السنة ده غالي جداً أنا ممكن أروح أخد مثلاً صندوق استثمار متداول بيحقق لي نفس النتيجة بس التكلفة بتاعته واطي فالقاعده دي برضه هتخليك تعرف قد ايه انت بتدفع مصاريف على كل فئة أصول عشان تفهم الحسابات دي جاية منين
(09:00)
الحاجه الأخيرة، في طبعاً حاجات كتير ممكن نستفيدها من القاعدة دي بس أنا بحاول ألخص على قد ما أقدر النقاط الرئيسية الحاجه اللي بعد كده الواضحة والبديهية إننا في كل قاعدة هبتدي أعمل إعادة توزيع النسب بتاعتي لأسباب معينة، ممكن يكون ظهر خبر اقتصادي معين في دولة معينة انا مستثمر فيها هتخليني أوقف استثمارات هنا وابتدي ضخ استثمارات في حتت تانية من المحفظة وهكذا
الدهب النهاردة مثلاً هيحفظ قيمة الفلوس بتاعتي فابتدي ازود قيمة الذهب، أو مثلاً داخل على فترة الفوايد فيها هتعلى جامد فأبتدي أوقف شراء الأصول اللي بتجيب دخل ثابت واستنى مثلاً سنة أو سنتين وأبتدي أعيد تاني استثمارات في الفئة دي وهكذا فيمكن القاعدة دي مش من أول مره أول مره انت بس بتحط حاجتك وتبتدي تشوف وتعمل تحليل تاني مره هبتدي اشوف هل انا محتاجه اغير ولا لأ ودي حاجه بنسميها إعادة توزيع المحفظة
(10:10)
كده احنا عرفنا بشكل سريع إيه اللي مفروض اعمله عشان أتابع، طب إيه الحاجات اللي أنا هستفيدها لما ابص كده بشكل عام، عملت القاعدة دي مرة واتنين وتلاتة
(10:20)
أول حاجه مهمه جدا بالنسبالي التعليم، انت هتتعلم ازاي تفكر في محفظتك بطريقة مختلفة، هيبقى عندك الخبرة التعليمية للموضوع، فالأول هبتدي اتعلم عن نفسى كتير، هبتدي أعرف أنا بحب إيه، أنا خايف من المخاطرة، شايف المخاطرة دي واطية ولازم أعليه أياً كان اللى انت هتتعلمه بس انت هتعرف من القاعده دي حاجات كتير جداً ولما تبتدي تكررها ويبتدي يحصل قدامك تحرك لفئات الأصول دي سواء بالصعود أو النزول انت هتبتدي تتعلم هل الخطوات اللي أنا عملتها دي كانت صح أو غلط فأول حاجة هستفيدها اننا هتعلم جداً في الاستثمار
(11:06)
بعد ما اتعلمت أو ابتديت اتعلم هيبدأ يحصلي حالة من الثقة في النفس، أننا بقى عندي طريقة سنوية أو نص سنوية بقعد مع نفسي فيها أتكلم، ممكن اسأل صحابي، أو اسأل خبراء واشوف إيه ممكن يحصل، الكلام ده انت ممكن تكون شايف ان لازم يبقى عندك محافظ كبيرة عشان تعملها ولكن لأ بالعكس أنا شايف إن اي حد بأي محفظة حتى لو بمبالغ صغيرة ولكن مع الوقت لو انت ماشي في الطريق الصح المحافظ دي هتكبر فلازم ابتدي اتعلم في الفلوس القليلة الأول، بعد شوية هيبتدي يجيلك ثقة، واثق في اللي أنا بعمله، أنا فاهم في اللي انا بعمله، مش فاهم بمعنى اني عارف اللي هيحصل في المستقبل ولكن على الأقل أنا عندي طريقة معينة بعرف اقيم نفسي فيها فالثقة مهمة جداً، والثقة بتيجي من الخبرة والتعليم مع الوقت مش حاجة هتقدر تاخدها النهاردة مهما سمعت لازم تبتدي تمشي في الموضوع عشان تعرف تحققه
(12:05)
النقطة اللي بعد كده.. راحة البال أنا مش قلقان، اخدت قرارات ومتحمل نتيجتها فأنا عندي شوية انا عارف ان فئة الأصول دي ممكن تطلع 50% ممكن تنزل 50% أياً كان وانا قاعد بفكر في شكل محفظتي فبقى عندي توقعات محسوبة شوية، مش لازم تحصل بنسبة 100% ولكن على الأقل أنا عرفت أيه أسوأ سيناريو فلو المحفظة نزلت فئة الأصل دي نزلت او طلعت فأنا نوعاً ما عارف إيه اللي ممكن يحصل فهبتدي بالى يهدا شوية واستريح اني عملت الموضوع ده
(12:42)
رابع نقطة هنا تحليل التكلفة اللي اتكلمنا عليها قبل كده اننا ممكن ابتدي اغير طريقة محفظتي عشان في حاجات غالية وحاجات رخيصه فده بيخليني برضه اعمل الموضوع بشكل أذكى
(12:55)
آخر حاجه الأهداف بتاعتي، هبتدي اشوف الأهداف بتاعتي دي مع الوقت بتتحقق لما هتقول انا عندي حاجه الفلانية وبعمل عندها كذا ومحتاج الفلوس في الوقت الفلاني، لما بتبتدي تعمل تحليل ده انت بتشوف الأهداف بتاعتك بتتحقق وده طبيعي بينعكس إيجابياً على شخصيتك وحياتك لأنك النهاردة جتلك فكرة كتبتها حللتها تابعتها وشوفتها بتتحقق لما بتمشي في المراحل دي كلها هتلاقي إن الأهداف دي بتساعد تحط أهداف جديدة فعلى المدى الطويل الموضوع بينعكس عليك بطريقة إيجابية
دي كده مبدأياً ازاي تبتدي تتابع محفظتك وتبص عليها، انا شوفت ناس كتيره كرييتف ساعات بيبعتولي على الصفحة بتاعتى اكسيل ازاي بيتابع الميزانية بتاعته أو بيحلل مصاريفه واستثماراته وكده، انت كمان ممكن تبتدي تبني الشغل بتاعك بطريقتك اللي بتريحك عشان تبتدي تتابعها
تاني انا مش عايز الموضوع يتعمل كل شوية مش عايز يبقى عندك هوس وبتبص على الموضوع كل اسبوع او كل شهر لأ أنا عايزك تاخد وقتك وتعمله وعايزك تتعلم، الاستثمار على المدى الطويل هو المهم هو المفيد هو اللي هيحقق لك أهدافك فالناس لازم يبقى عنده عقلية الاستثمار على المدى الطويل
شكراً جداً جداً على وقتكم النهاردة وإن شاء الله اشوفكم الاسبوع الجاي
Translation of some words and terms:
Review مراجعة
Account Statement كشف الحساب
Statements البيانات
Documents المستندات
Goals الأهداف
Retirement التقاعد
Asset Allocation توزيع الأصول
Net Worth صافي القيمة
Diversification Analysis تحليل التنويع
Overly Concentrated مركزة بشكل مفرط
Cost Analysis تحليل التكلفة
Rebalancing إعادة التوازن
Learning Experience خبرة التعلم
Confidence الثقة
Peace Of Mind راحة البال
Worst-Case Scenario أسوأ سيناريو
Obsession هوس
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي#تحليل_المحفظة_الاستثمارية