123. معدل العائد الداخلي على الاستثمار (IRR)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
Internal rate of return بنتكلم النهاردة على معدل العائد الداخلي على الاستثمار
مفهوم اقتصادي سهل ومهم جداً عبارة عن معادلة أو حسبة معينة انت بتحط مدخلاتك على ملف إكسيل وبيطلعلك نتيجة، في الحلقة بنتكلم على ازاي تحسب العائد ده وبيجى منين، وايه سببه وليه الناس بتستخدمه
(02:50) معدل العائد الداخلي ده هيفيدني بإيه؟
(06:03) ازاي تحسب العائد ده على الإكسيل؟
(07:01) ازاي تحسب العائد الداخلي على الشهادات الاستثمارية و الودائع؟
(09:15) ازاي تحسب العائد الداخلي على العقارات؟
(12:03)هل الأرقام دي ممكن تبقى غلط؟
(12:52) عشان أوحد المقارنة هعمل إيه؟
(13:48) ازاي اقدر اتوقع القيمة الإيجارية؟
(14:13) معدل العائد الداخلي من الحاجات اللي بتطبق جداً في العقارات
(15:23) استخدام تاني لمعدل العائد الداخلي
(18:17) عشان أقارن بين الأفكار المختلفة لازم استخدم معدل العائد الداخلي
مفهوم بسيط، من خلاله هتقدر تقارن نفس فئة الأصل مع بعض وهتقدر تقارن فئات أصول مختلفة ببعض، ومن خلال معدل العائد الداخلي على الاستثمار هتقدر تقبل أو ترفض الأفكار الاستثمارية المختلفة
اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكوا في حلقة جديدة من بودكاست كلام ينور
الاول قبل ما ابتدي عايز اشكر كل الناس اللى بيسمعونا احنا بيجيلنا منكم ردود أفعال، والحلقات افكارها بتجيلي من الحاجات اللي الناس بتسأل عنها او لو قعدت اتكلمت مثلا مع حد من اصحابي سألني في حاجه معينه فدايما بشجع الناس انها تبعتلنا على الصفحه بتاعتنا سواء على فيسبوك او على انستجرام او على تويتر
كمان عايز اقول للناس ان احنا بنحاول دايما نطور في الموقع بتاعنا، نزلنا العدد الثاني من المجله بتاعتنا في مساهمات دايما من المستمعين فلو حابب تشارك معانا تكتب مقاله تقولنا على فكره انا دايما بشجع الناس أنها تتواصل معايا فتاني انا احب اشكر كل الناس اللي بتسمعنا
(01:36)
حلقه النهارده انا عايزه اتكلم على مفهوم مهم حاجه اسمها IRR
IRR= Internal rate of return
ده الاسم الانجليزي بتاعه وهو عبارة عن معادلة أو حسبة معينة زي الآلة الحاسبة انت بتحط مدخلات وبيطلعلك نتيجة
معدل العائد الداخلي ده مفهوم اقتصادي سهل جداً مش عايز أدخل الناس في ازاي بيتحسب والمعادلة اللي وراه بس أنا هعلمك ازاي تحطه على إكسيل وتحسب العائد ده بيجى منين، وايه سببه وليه الناس بتستخدمه
(02:15)
الفكرة ان الافكار كتير وانا النهاردة لما بخش في مشروع أو فكرة هو عبارة عن اني بدي للناس فلوس وبيرجعلي عوائد، العوائد دي ممكن مواعيدها تبقى مختلفة ممكن حد يديني فلوس كل سنة، ممكن واحد يديني فلوس كل 3 سنين، ممكن واحد يديني في الأول كتير، في الأخر كتير فعشان نوحد التدفقات النقدية المعادلة دي بتساعدني اننا اترجم الكلام ده كله لعوائد، العائد الداخلي للاستثمار ده الترجمة العربية بتاعته
(02:50)
طب العائد ده هيفيدني بإيه؟ انا كواحد عرفت معلومة ان في حاجه اسمها معدل العائد الداخلي هستفيد منها ازاي؟
هستفيد منها بمنتهى البساطة اننا لو عندي كذا مشروع، او كذا فكرة وبحاول أختار ما بينهم ممكن العائد لما تترجم التدفقات النقدية دي لصيغة واحدة زي ما بيقولك
Apple to Apple
التدفقات النقدية مختلفة في المشروعين، ادتني شوية أرقام وقولتلي هديك كذا وكذا من المشروع ده وهديك كذا وكذا من المشروع ده بس أنا مش عارف اوحد الموضوع فالميزة في المعادلة دي انها بتوحد
(03:30)
طب تعالوا مثلاً ناخد مثال رقمي بسيط وبعدين نبتدي نكبر الموضوع شوية
انا قولتلك هاتلي 100$ هتخش معايا في مشروع وانا هرجعلك الـ 100$ دول 110 على مدار مثلاً 4 سنين ففي المثال الأول: أول سنة هديك 10، تاني سنة هديك 20، تالت سنة هديك 30، رابع سنة هديك 50.. أنت هنا رجعتلي الـ 110 بس رجعتهملي على 4 سنين
أنا اديتك 100 الأول استثمرتهم رجعتلي 10، وبعدين رجعتلي 20، وبعدين رجعتلي 30 وبعدين رجعتلي 50 فهنا المجموع 110
هنلاقي لما بعمل المعادلة وهتكلم ازاي بنحسبها، العائد السنوي على الاستثمار من التدفق النقدي ده هو 3.15% المعادلة هنا حسبتلي إيه؟
رجعتلي التدفقات النقدية دي للنهاردة وقالتلي الفلوس اللي انت هتحطها النهاردة اللي هي الـ 100 لو رجعتلك بالشكل ده فأنت كأنك عملت ما يوازي 3% سنوياً
طيب لو رجعتلي الـ 110 دول بطريقة مختلفة، عكسنا بقى أنا اديتك 100 أول سنة كمستثمر أنت رجعتهملي بالعكس بقى 50، 30، 20، 10 رجعتهملي بشكل معكوس
هنلاقي العائد على الاستثمار هنا أرتفع من 3.15% في المثال الأول لـ 5.19% في المثال التاني.. ليه؟ لأن حضرتك رجعتلي في أول سنة 50 وبعدين 30، 20، 10 في المثال الأول انت رجعتهملي 10، 20، 30، 50 فعكسة التدفق النقدي دي خلت العائد الداخلي أداني فرصة أعيد استثمار الـ 50 والـ 30 والـ 20 أبدر من الـ 10 اللي أنا أخدها في المثال الأول فمع إن هنا مجموع التدفقات النقدية هي هي في الحالتين انا رجعلي 110 بس في المثال التاني رجعلي الأول فلوسي
فأنا لو مستثمر بفكر في فكرتين أنهي هيبقى بالنسبالي احسن.. في الحالتين هيرجعلك 110 في الـ 4 سنين فمش فارقة يعني.. لأ بتفرق لما نستخدم معدل العائد الداخلي ونحطه على إكسيل ونشوف المثالين دول هنلاقي إن المثال التاني أحسنلك كمستثمر، العائد بتاعك أعلى فأنا لو هختار هختار المثال التاني
(06:03)
طب انا ازاي بحسبها على الإكسيل، انت بمنتهى البساطة بتحط التدفقات النقدية اللي خارجه من جيبك بالسالب فهنحط -100 في خانة معينة، والخانة اللي جنبها على اليمين هنحط 10 بعدين 20 بعدين 30 بعدين 50 في خانات كده جنب بعض وبرضه انا هحط إكسيل فايل يوريكوا ازاي الحاجات دي بتتحسب
دي السنة الأولى، السنة التانية، السنة التالتة، السنة الرابعة فلوسي رجعت المعادلة بتاعة معدل العائد الداخلي بمنتهى البساطة هي موجودة جوه الإكسيل يعني أنت مش محتاج تكتب حاجه او تقسم او تعمل اي حاجه لأ انت كل اللي بتقولهوله إيه
=IRR(تختار الرينج بتاع الخلايا اللي انت حطيت فيها الأرقام بتاعتك من الشمال لليمين )
IRR الإكسيل بيحسبلك أوتوماتيك العائد السنوي على الاستثمار اللي هو
(07:01)
طيب ده مثال بسيط جداً، يعني معنى كده مثلاً لو أخدنا مثال أصعب شوية أو أكبر شوية زي الشهادات البنكية انت روحت أتفقت مع البنك هتديله 100 وهو هيديك فوايد وفي آخر المدة هيديك تمن الشهادة بتاعتك
عشان تحسب العائد الداخلي بتاعك اللي هو غالباً هيطلع نسبة الفوايد بس أنا بديك مثال ازاي ممكن تستخدمه هتحط في أول السنة بالسالب الفلوس اللي خارجه من جيبك، أي فلوس بتخرج من جيبك كمستثمر بتحطها بالسالب، وأي فلوس جيالك بتحطها بالموجب
فأنت هتحط أول السنة -100 وبعدين هيجيلك نقول 10% في السنة هتحط 10% 10% 10% وفي الأخر السنة هيجيلك فلوسك
لما هتحط المثال الرقمي ده هنلاقي العائد على الاستثمار بتاعك هو هو نسبة الشهادة اللى انت المفروض متفق فيها مع البنك اللي هو -100 أول سنة حطيتها وبعدين جالك 10*10*10 وآخر السنة جالك 110 اللي هي الـ 10 فايدة بتاعة السنة دي وجالك الـ 100 أصل مبلغك الأولاني
حتى السندات انا ممكن اعملها عائد، ممكن اعمل على الودائع، شهادات الاستثمار اللي هي على 3 أو 5 سنين وهكذا هنلاقي العائد هنا بقى 10% في المثال ده
(08:18)
طيب انا النهاردة عايز اقارن بحاجة اصعب شويه تعالوا نشوف مثال تاني مثلا زي العقارات، أنا قدامي شقة جيالي بمنتهى البساطة واحد بيقولي أول سنة هتدفع مقدم كذا تاني سنة هتدفع كذا، تالت سنة، رابع سنة، خامس سنة وهكذا
وأنا عايز أعرف العائد على الاستثمار بتاعي من استثماري في الشقة دي فهعمل إيه؟ هحط التدفقات النقدية بتاعتي وبعدين أحط سعر بيعها في آخر المدة أنا متوقع مثلاً ابيعها ازاي
لما هعمل كده أنا هشوف أنا محتاج الشقة تطلع قد إيه عشان العائد على الاستثمار بتاعي يبقى نسبته كذا في المية في السنة فوقتها اقدر اقارن أشتري شهادة استثمار احسن ولا اشتري شقة، دي طريقة تانية اننا ممكن هنا ابتدي اروح على فئات اصول مختلفة واقارنهم ببعض، الشهادات قالي هديك 10% او الوديعة هتديني 10% والشقة هتديني كذا
(09:15)
طب لو صعبت الموضوع شوية وقولت أنا هعملها على العقارات وهدخل هنا حاجات تانية مختلفة أنا هشتري شقة مثلاً 10 سنين في الشقة فأول 4 سنين الراجل لسه بيبنيلي الشقة فبدفع من جيبي فقط، خامس سنة جتلي الشقة الشقة هنعتبر انها متشطبة مش محتاج أعمل اي تشطيب
هدفع القسط و هيجيلي إيجار فالقيمة الإيجارية هعمل توقع إن في السنة الرابعة هيجيلي إيجار كذا طيب جالي الإيجار يبقى أنا هنا هعمل التدفقات النقدية حصل فيها إيه هنا في السنة الخامسة هلاقي إننا عليا أقساط مثلاً بدفع 100 ألف في السنة ولكن مثلاً أجرتها بـ 50 ألف يبقى التدفق النقدي من أول السنة الخامسة لحد السنة العاشرة بقى 50 ألف فقط بقى خارج من جيبي 50 ألف فقط ليه لأننا هأجرها بـ 50 وهدفع قسط 100
(10:08)
طيب هتقولي انا ممكن أصعب شوية، ممكن في السنة السادسة أزود الإيجار شوية يبقى 55 ألف، في السنة السابعة هزود الإيجار شوية 60 وبعدين 65 وبعدين 70 وبعدين 75 في آخر سنة طيب هعمل إيه وأنا أقساطي ثابتة، الشكل العام هيبقى عامل ازاي؟
هيبقى شكلة اول 4 سنين أنا بدفع الاقساط 100، خامس سنة أبتديت أأجرها التدفق النقدي بتاعي كام؟ بدفع 100 من جيبي وشيلت منهم 50 إيجار فالتدفق النقدي -50
طيب السنة السادسة هدفع قسطي 100 ولكن عندي تدفق نقدي داخلي 55 لأني عرفت أرفع الإيجار، الإيجار مثلاً فيه زيادة 10% سنوياً، فالتدفق النقدي اللي المفروض أحطه في الخانة -45 السنة اللي وراها بقى -40، -35، وبعدين في الأخر اخدت الشقة
فالطريقة دي ممكن تخليني اعرف العوائد بتاعتي شكلها عامل ازاي لو استثمرت في الفرصة دي
(11:08)
طيب ممكن أصعب الموضوع كمان؟ لو انا عندي مثلاً صيانات هحط بند صيانات، هحط بند مصاريف إدارية للمكان اللي انا عايش فيه، ممكن كمان ازود لو انا عايز هي مش متشطبة هشطبها في السنة الخامسة
انت هتعمل مجموع التدفقات النقدية بالكامل وهيطلعلك رقم في الاخر ده اللي هتدفعه في السنة الخامسة بالكامل، يبقى أنا هشطب في السنة الخامسة، هدفع مصاريف إدارية، هدفع القرض بتاعي وهيجيلي إيجار مجموع الكلام ده كله كام؟ مثلاً 70 يبقى هحط -70 دي فلوس خارجه من جيبي ولكن الفلوس لما تخش هحطها بالموجب
(11:48)
طيب أنا كده عرفت والله الشقة دي لو اشتريتها وتوقعات الإيجار بتاعي في السنة الخامسة كام وبعتها في السنة العاشرة بكام يبقى انا النهاردة العائد على الاستثمار بتاعي كذا
(12:03)
طيب هتقولي ما أنا ممكن الأرقام دي كلها تبقى غلط، آه ده حاسبة زي ما أنت بتجمع وبتحسب على آلة حاسبة انت لو حطيت أرقام غلط أو توقعات خاطئة كل الحسابات اللي بتطلعلك غلط فالناس بتعمل إيه ممكن تقول أنا هعمل سيناريوهين أو 3 سيناريوهات سعر البيع مثلاً بعد 10 سنين مش عارفه أوي بس انا متوقع مثلاً ان سعر البيت بتاعي النهاردة كان كذا، او في المنطقة دي كذا، بعد 10 سنين أو بعد 7 سنين لو زاد بنسبة معينة ففي السنة العاشرة دي غالباً سعر البيع هيبقى كذا وهتحطه في الاخر، بس ممكن تقول لو السوق بقى اقوى بكتير لأ ممكن تطلع أكتر
فتبتدي تعمل سيناريوهات لنفس الشقة في الحالة الكويسة أوي غالباً العائد بتاعي هيبقى كده، أو في الحالة العادية لو الدنيا محصلش فيها أي حاجه العائد بتاعي هيبقى كده
(12:52)
طيب انا ممكن اخد الموضوع أكتر شوية كمان، انا ممكن أقارن شقتين ببعض
واحد قالي والله يا عمر أنا جالي فكرة مش عارف اشترى الشقة دي ولا الشقة دي، شقة مثلاً في منطقة معينة حجمها كبير، وشقة في منطقة مثلاً تانية صغيرة بس في حتة متميزة اشتري مين فيهم؟
عشان أوحد المقارنة هعمل إيه؟ هقارن الأتنين ببعض بالـ IRR لأن ممكن واحدة مثلاً تكون استلام فوري وهدفع فيها كاش اعلى، واحدة تانية لأ على 4 سنين وهدفع فيها تدفقات نقدية أقل ولكن هستلمها بعد 4 سنين
ممكن تكون دي أحسن أو دي أحسن ازاي هعرف الموضوع ده لما أعمل مقارنة ما بين الأتنين، طيب عشان أعمل المقارنة بين الأتنين لو الموضوع معقد أوي زي ما قولنا أنا مخلي مش هيعرف يحسب أو دي إحساسي بيها أظرف أنا مش هعرف لازم أوحد الموضوع
(13:48)
القيمة الإيجارية ازاي أقدر أتوقعها، اقدر اتوقعها من أن الشقة دي في المنطقة الفلانية البدايل بتاعه الناس كذا الحاله بتاعه البيت كذا سعر الإيجار في المنطقة بالمتر مثلا نفس الشقه بتاعتي شقه 100 متر مثلا في المنطقه دي سعرها كذا لو زادت 10% لمدة 3 / 4 سنين عقبال ما استلمها تبقى كذا وابتدي احط القيمة الايجارية في السنه الرابعه او الخامسه
(14:13)
معدل العائد الداخلي من الحاجات اللي بتطبق جداً في العقارات، يعني يقول لك العائد السنوي على الاستثمار بتاعها كذا، ازاي تبقى عن طريق الحسابات اختلفت العملة معدله العقد الداخلي بيشتغل يعني هتعرف تعمله على الدولار على الاسترليني على الجنيه تعرف تعملها ريال أيا كان التدفقات النقدية ملهاش دعوه بالعملة بس هنا انت ممكن تقول لا في سوق عقارات مثلا بيطلع في السنة 10 / 15% وفي سوق ثاني بيطلع 1% او 2% فده هيفرق معاك في المعطيات وانت بتحط التدفقات النقدية
(14:47)
انا مش عايز احسسك ان الكلام صعب بالعكس هو الكلام سهل جدا يعني القصه بتاعه المعدل العائد الداخلي بشكل عام لطيفه، سهله تقدر تحدد وقتك انت شايف 10 سنين قدام بتحاول تتوقع التدفق النقدي بتاعك بطريقه بسيطه بمعادلة صغيره جدا مفيش فيها اي تعقيد
لو انت حتى بتسمع الكلام ده لأول مره مش عايزه احسسك ان دي حاجه صعبه او هتتلخبطوا تاني احنا هنحط ملف الاكسيل على الحلقه عشان الناس تقدر تشوف الكلام ده لو حابب تبص عليه
(15:23)
تعالى نشوف برضه استخدام تاني لمعدل العائد الداخلي ده او نسبة العائد على الاستثمار بتاعي هو في الاخر عائد على الاستثمار انا النهارده في كل دولة بيبقى في حاجه اسمها نسبة الخلو من المخاطر يعني كمثال النهارده لو رحت اشتريت اذون خزانه في الحكومة الأمريكية العشر سنين مثلا ب 4.25% يعني وقت تسجيل الحلقه دي تقريبا عند 4.25% يعني انا لو رحت الحكومه واديتها فلوس هات الدنيا 4.25% من غير ما اخد اي مخاطره لان الحكومه ضامنه انها ترجع لي فلوسي بالعملة المحلية بتاعتها وفي أمريكا العملة المحلية الدولار
طيب لو انا هعمل بقى معدل العائد الداخلي على فكره معينه واحد بيقول عمر تعالى نعمل مشروع معين أو تعالى في حاجه مثلا عايزين نعملها هقبل وهرفض ازاي؟
يعني تعالوا ناخذ كده أول حاجه السندات، الحاجه البسيطه السهله اللي مفيهاش اي حاجه انا لو رحت شركه طلعت سند الحكومه بتقول لي انا هديك 4.25% في سند او في شركه بتقول لي هديك 5% او 5.5%او 6% معناها ان انا هنا هطلع فوق العائد الحكومي بالإيجاب وقتها الفكره بتاعه السندات هنا هتبقى مجزية ان انا اخد شويه مخاطره ودي حاجه اسمها علاوة مخاطرة، يعني أنا كمستثمر محتاج اخد زيادة فوق العائد اللي مفهوش اي مخاطره اللي هو 4.25% في الحالة بتاعتنا اللي جايه من الحكومة الأمريكية في شركة بتقولي هديك 5% أو 5.5 أو 6
يبقى في السندات لازم اعرف ايه علاوة المخاطرة بتاعي، يعني انا مش هقبل بفكرة في السندات غير لو هي فوق الحكومة مثلاً بـ 2% على الأقل، هحاول أدور على سندات بتدي 2% فوق المخاطرة بتاعة الحكومة، يعني في الحالة بتاعتنا النهاردة هحاول ادور على شركات بتدي 6.25%
(17:17)
طيب لو روحنا مثلاً للعقار لأ أنا هحتاج علاوة اكتر دي لان العقارات مفيهاش سيولة زي السندات هاخد وقت أكبر عشان ابيع البيت كمثال يعني السند انا ممكن اكلم البنك بتاعي او السمسار بتاعي واقوله من فضل بيع السند أو الصك بتاعي أو الصكوك أو أياً كان سهل جدا ان انا ابيعها ولكن العقار انا ممكن اتحبس جواه هضطر مثلا اقول لا انا عايز اعمل عائد على الاستثمار أعلى من العائد الخالي من المخاطر بتاع الدوله اللي انا عايش فيها اللي هو 4.25% عايز مثلاً من 4 لـ 8 % زيادة على حسب البيت ده فين يبقى انا هاخد 4.25 واحط عليها 4 بحد أدني يبقى أنا عايز أعمل 8.25% لو انا دخلت العقار
انا بديكوا بس أمثلة أو نطاق كل واحد ممكن يقبل بالنطاق اللي هو عايزه بس بقول مثلاً أنا ممكن أكون عايز 4% فوق معدل خلو المخاطرة بتاعي عشان زي ما قولنا السيولة بتاعة الموضوع
(18:17)
طب لما انا هحسب معدل العائد الداخلي بتاع الشقه، السمسار جايبلي شقه في امريكا او بيت في امريكا والايجارات بتاعه بكذا وانا بعد 10 سنين هبيعه بكذا والكلام ده كله لو لقيت ان العائد بتاعي تحت الـ 8.25% في الحاله اللي احنا واقفين عليها النهارده بالمعطيات الموجودة النهارده هيبقى هنا ده استثمار اه هو مربح بس لو هو تحت 8% لو اداني 6% يبقى هو العائد بتاعه مش عالي كفايه ان انا اخد المخاطرة من وجهه نظري
(18:17)
طيب لو روحنا لفئات أصول أعلى شوية زي مثلا الأسهم لا الاسهم انا عايز علاوة المخاطرة بتاعتي تبقى اعلى من كده كمان انا عايز ابتدى مثلا من 5% فوق المعدل الخالي من المخاطرة
انا بكلمك على المستثمرين ازاي بيفكروا طب لو قلت لك مشروع خاص اعلى كمان انا عايز على الأقل من 7 ل 10% فوق عشان اقبل اشترك او اشاركك في مشروع أنا عايز 7.25% فلو انا قاعد مع واحد صاحبي على قهوه وقال تعالى نعمل مشروع مع بعض وبعدين حسبنا تدفقات النقدية بتاعتي انت هتديني كذا في السنة وهتديني كذا في السنة وفلوسي هترجع لي في السنه الفلانيه
هو الراجل بيعمل دراسة جدوى وبيديك ارقام وبيقولك على فكره يا عمر انت هتعمل كذا وكذا، فلو لقيت في الوضع الحالي بتاع النهارده الارقام دي ممكن تتغير مع الوقت لأن الفوائد ممكن تطلع او تنزل بس لو قاعدين النهارده والراجل ده مش بيديني مثلا 11 / 11.5% يبقى انا الاستثمار ده يعتبر مخاطرة
جت منين ال 11 جبت ال 4.25 وحطيت عليها 7% اللي هي الحد الادنى اللي انا هقبله كمستثمر فوق معدل الخروج من المخاطرة بتاعي عشان احسب التدفقات دي هحسبها بالمعدل العائد الداخلي هاخد من صاحب الارقام واحطها واحسبها النهارده العوائد بتاعتي دي قد ايه
فزي ما انتم شايفين نفس الكلام بيتعمل على الشركات الناشئة، والشركات الناشئة بتبقى عايزة عائد أعلى من كده كمان ممكن الناس بتطلب حاجات اعلى من كده لأن المخاطرة بتعلى فكل ما انا بعلي المخاطرة كل ما بطلب عوائد أعلى بس الطريقة اللي أنا بفكر فيها عبارة عن هتقدر تديني كام والمشاريع دي قد ايه خطرة فبطلب قد إيه فوق العائد اللي هاخده من الدولة بس عشان أطلب أنا لازم احسب واستخدم معدل العائد الداخلي
دي بمنتهى البساطة فكرتها وتطبيقها على فئات الأصول المختلفة لو واحد قاعد معاك في فكرة وقالك يا عمر انا عايز استثمر في الحاجه دي هو ده الشكل العام اللي أنا المفروض أقبله وبرضه هنحط الكلام ده في الشو نوتس عشان الناس برضه متبقاش متلخبطة
مفهوم بسيط من وجهة نظر تدفقات نقدية سهلة اوي انت بتعمل جدول اعملها على ورقة أكتبهم كل سنة هيديك كام، البيت ده هيطلع كام، السند ده هيعمل إيه وحط المعادلة هتعرف العائد على الاستثمار بتاعك تقدر تقارن نفس فئة الأصول مع بعض تقدر تقارن فئات مختلفة ببعض برضه لأن هي بتوحد التفكير ومتنساش تطلب علاوة المخاطرة بتاعتك على كل فئة أصول على حسب قد إيه هي خطرة وزودها ودي طريقة تقبل بيها الأفكار والمشاريع أو ترفضها
يارب بس اكون سهلت عليكوا انا عارف الموضوع ساعات بيبقى معقد شوية ولكن أتمنى أكون وصلتلكم الفكرة بتاعة معدل العائد الداخلي على الاستثمار ودايماً زي ما بقولكم هتلاقوا فيديوهات وناس بتتكلم على الموضوع لو عملت بحث بالكلمة هيطلعلك حاجات كتيرة جداً بتشرحلك المفهوم انا بس عايز اسلط الضوء على المفهوم لو انا مشرحتوش بطريقة سهلة او لخبطتك او اي حاجه حاول تتفرج على فيديوهات على يوتيوب هدفي تفهم المفهوم وقتها هكون انا عملت دور كويس اني احاول اشرحه وشكراً جداً جداً إنكم وصلتم معانا لاخر الحلقة وان شاء الله اشوفكم الاسبوع الجاي
Translation of some words and terms:
Concept مفهوم
IRR = internal rate of return معدل العائد الداخلي
Formula معادلة
Calculator آلة حاسبة
cash flows تدفقات نقدية
Premium غالي
risk free rate نسبة الخلو من المخاطر
Bonds سندات
risk premium علاوة المخاطرة
Range نطاق
Asset Classes فئات أصول
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي #معدل_العائد_الداخلي