98. الجزء الأول - VC رحلة داخل شركات الـ
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بما اننا في شهر مارس شهر المرأة وامبارح كان يوم المرأة العالمي حبينا النهاردة نحتفل بالمناسبة دي مع ضيفتنا اللي منورانا النهاردة ماري تيريز ضيفة جديدة وصديقة عزيزة في كلام ينور
ماري تيريز
حاصلة على درجة البكالوريوس في الاقتصاد من جامعة القاهرة في عام 2003 ودرجة الماجستير في الاقتصاد المالي من جامعة وارويك بإنجلترا في عام 2007، بدأت حياتها المهنية في مجال الخدمات المصرفية التجارية
Flat6Labs في نوفمبر 2017 انضمت لـ
كشريك إداري لصندوق القاهرة وحالياً ماري بتقدم استشارات استثمارية للشركات الناشئة والصناديق سواء الموجودة في مصر أو اللي داخلة مصر وعايزة تعرف أكتر عن السوق المصريMarie-Therese @LinkedIn : تقدروا تتواصلوا مع ماري من هنا
حلقة النهاردة من أهم الحلقات اللي هتبقى موجودة في كلام ينور؛ لأنها بتسلط الضوء على قطاع كبير ومهم هو قطاع تمويل الأفكار الناشئة وشركات رأس المال المخاطر
03:30 في عالم رأس المال المخاطر يعني إيه حاضنة الأعمال و مسرعة الأعمال؟ -
06:30 كلمينا على مراحل التمويل؟ -
10:48 كرائد أعمال ازاي أوصل للناس انها اصلاً تاخدني في حاضنة الأعمال؟ -
12:19 في حاضنة الأعمال، هو عايز مني إيه؟ أو عايزني اروحله بإيه؟ -
18:10 إيه الجوانب السلبية اللي ممكن تحصلي كرائد أعمال وأنا رايح للحاضنة أو مسرعة الأعمال؟ -
21:44 كلميني عن شبكة العلاقات وأهميتها لرائد الأعمال؟ -
23:20 لو هتقولي لرائد أعمال أوعى توري مسرعة الأعمال الصفة دي ودي ودي ، هتقوليله ايه؟ -
25:04 كرائد أعمال ممكن افقد قد إيه من دخلي؟ -
27:56 مين ماري تيريز وعملت إيه؟ -
..استنونا الإسبوع الجاي في الجزء التاني من رحلتنا مع ماري
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
بما اننا في شهر مارس و امبارح كان اليوم العالمي للمرأة ، حبينا كده نسلط الضوء على نموذج مشرف ، مصري ماري تيريز من الناس اللي انا اعرفها من زمان واشتغلت معاها فترة احنا هنسيب طبعاً كل التفاصيل بتاعتها في الشو نوتس لو حابين تتواصلوا معاها
Flat6labs ماري كانت مديرة صندوق لـ
دي من آخر الحاجات اللي كانت بتعملها ، ماري كانت بتعمل استثمارات في الشركات الناشئة
النهاردة حلقة مهمه جداً ومميزة بالنسبالي لأن أنا عن نفسي عايز أفهم المجال ده من ناحية الراجل اللي بيدير الصندوق بيعمل إيه ، رواد الأعمال مطلوب منهم يعملوا إيه عشان ياخدوا التمويل ، وأنا كمستثمر لو عايز استثمر في الشركات اللي تعتبر فيها مخاطرة عالية ازاي بيفكروا وازاي بيبصوا على الناس دي انت محتاج تجهز إيه لو رايح لهم كل الحاجات دي وحاجات تانية كتير هنغطيها في الحلقة دي فيارب الحلقة تعجبكم زي ما هي عجباني وعاجبني جداً إن ماري معانا واسيبكوا تسمعوا الحلقة
عمر: الاول عايز ارحب بيك يا ماري وميرسي جدا جدا على وقتك ، حلقة من الحلقات المهمه جدا اللي انا مبسوط لان انا عايز اتعلم منك عن العالم ده والمجال ده فميرسي جدا جدا ، عايز ارحب بيكي
ماري: ميرسي يا عمر جداً أنا اللي ليا الشرف ومبسوطة اوي من الشغل اللي أنت عاملة وسعيدة جداً اننا جتلنا الفرصة نعملها لايف مش إفتراضي ، أنا مبسوطة يا جماعة إننا قاعدة مع عمر احنا زملا من زمان اوي فميرسي جداً ان انت خلتني معاك النهاردة
عمر: وكمان أنا مبسوط إن إحنا يعني زي ما بتقولي احنا نعرف بعض من زمان ، كنا بنشتغل في نفس الحته ونفس المجال وانتي اخذتي القفزة بقى للناحية التانية بتاعة رأس المال المخاطر وانا عارف أنتي قد إيه كنتى شاطرة في الأسهم العامة أو في المجال ده فانا قولت مش هتعلم من حد الموضوع ده أحسن منك فميرسي
ماري: كلام كبير أوي يعني بس أشكرك
عمر: لأ ميرسي جداً جداً جداً ، انا عارف ان الموضوع ده من اهم المواضيع في العالم المالي في الأيام دي ؛ لأن طرق التمويل اتغيرت عن زمان ، يعني واحنا صغيرين كان ممكن الحكومات هي اللي بتمول المشاريع أو المؤسسات الكبيرة ، بعد كده رجال الأعمال ابتدوا يظهروا ، التطور بتاع نظام الرأسمالي عموماً وبعد كده بقى في ناس شغلتها النهاردة تمول الأفكار بتاعة الناس صح كده؟ يعني أعتقد ده التطور بتاع العالم بتاع رأس المال المخاطر أو الأستثمارات الخاصة عموماً
03:30
أول حاجه عايز اسألك عليها في حاجات أنا بسمع أساميها كتير يعني إيه حاضنة الأعمال؟ ويعني إيه مسرعة الأعمال في عالم رأس المال المخاطر ولو في أنواع تانية من الشغل ده نبتدي بالحتة دي
ماري: أكيد ، طيب مبدأياً الفرق ما بين حاضنة الأعمال ومسرعة الأعمال هما للأسف الاسمين بيستخدموا بشكل متبادل ، ناس كتير مش بتبقى واخدة بالها إيه الفرق
فـ الحاضنة من اسمها بترمز إلى حاجة لسه في بدايتها ، فالحضانات دي موجودة عشان تساعد الأفكار فعادة رائد الأعمال بيقدم لما بيكون لسه عنده مجرد فكرة وعايز حد يمسك أيده ويقوله تعالى كده نشوف الفكرة دي ازاي ممكن نحولها لمشروع ، وهل هي اصلاً تتحول ولا لأ ، هل الفكرة دي ليها سوق ولو ليها سوق هل الفكرة دى بتحل مشكلة ، أو المنتج ده بيحل مشكلة؟ طب بيحل مشكلة لعدد قد إيه من الناس وبالتالي هي الموضوع ممكن ينتشر ويكبر ، هل السوق اللي انت متواجد فيه هو سوق مناسب للفكرة دي ولا لأ ، طب تعالى نبص بقى انت لو عملت شركة من النواحي القانونية ممكن تأسسها ازاي؟ وإيه أحسن هيكل؟ فبيمسكوا ايدك كده في الأول ويشوفوا انت ازاي ممكن تحول الفكرة دي لشركة
مسرعة الأعمال من أسمها ، فأنا عشان اسرع الأعمال يبقى معناه إن أنا عندي حاجة ، فبيبتدوا معاك أكتر من مرحلة "الحد الأدنى من المنتج القابل للتطبيق" يعني بدأ يبقى في منتج أتشكل بشكل بسيط وبنكتشف برضه مع بعض عايزين ناخده بقى للسوق فده طبعاً بيحتاج استثمار صغير في الأول اللي هو بنسميه والتسميات بتختلف هنا ما بين ما قبل البذور والبذور بس هو هنا الاستثمار الأولاني خالص اللي انت بتاخده عشان تقدر تحول المنتج ده من الحد الادني من المنتج قابل للتطبيق لمنتج فعلي تنزل بيه السوق فدي مسرعات الأعمال
مسرعات الأعمال عالمياً كلها بتستثمر مش بس بيكون برنامج بتدخل فيه لمدة 3 او 4 شهور ، لأ لازم يكون في استثمار عشان تقدر تسرع الفكرة وتوصلها للسوق فبالتالي هو اسمه مسرع أعمال بس هو في حد ذاته في جواه صندوق استثمار عشان هو ده اللي بيستثمر فيه كل شركة بتخش البرنامج
بعد كده بقى اللي السوق بيسميه صندوق رأس المال المخاطر مع إن اللي فات في مسرعة الأعمال برضه صندوق رأس المال المخاطر بس بنسميهم بقى مرحلة مبكرة لأن انت بعد ما الفكرة تبلورت لمنتج والمنتج ده تطور ونزل السوق بنسميها مرحلة الإيرادات المبكرة ، بدأت تعمل فلوس من المنتج بس تعتبر برضه مرحلة مبكرة فدول بيسموهم صندوق رأس المال المخاطر في المراحل المبكرة
عمر: فنقول إن أول مرحلة هي حاضنة الأعمال وبعدها مسرعة الأعمال وبعدين صندوق رأس المال المخاطر ، دول الـ 3 ممولين لأفكار المشاريع
ماري: بالظبط
06:30
عمر: طيب حتة حلوة أوي برضه عايز اسألك عليها خلينا نقول إيه مراحل اللي بيسموا زي
Pre-Seed, Seed, Series A,B,C,D
بنشوف كده أخبار ديماً زي مش عارف مين لم المرحلة ب ، لم مرحلة د .. تعالي نتكلم كده على المراحل دي الأول وبعدين نربط الحاجات مع بعض
ماري: تمام ، هي المسميات دي بترمز للمرحلة اللي المشروع فيها يعني
بيبقى فى مرحلة اللي هو نقدر نقول عليها الفكرة بس فكرة مدروسة كويس أوي أنا عارف بالظبط انا عايز اعمل ايه Pre-Seed
درست السوق كويس قوي عامل استطلاع في السوق كده عشان اشوف الناس قابله المنتج ده ولا لأ ، مستعده تدفع فيه ولا لأ وهكذا محتاج بس شوية استثمار عشان اوصل لان انا اخلص المنتج اوصل ان يبقى عندي الحد الأدنى من المنتج القابل للتطبيق
وده ممكن يدخل فيه مسرعة الأعمال أو المستثمرين الملايكة اللي هم بيبقوا أشخاص ناجحين في عملهم ، رواد أعمال عملوا تخارج ومعاهم استثمارات عاوزين يعيدوا استثمارها تاني في شركات ناشئة او عائلات واصدقاء دول الناس اللي بنلجا لهم في الاول عشان يأمنوا معانا بفكرتنا ويساندونا ويساعدونا
انت معاك الحد الأدنى من المنتج القابل للتطبيق Seed
فأنت واصل لمنتج مبدأي وعايز بقى تلم فلوس عشان تبدأ تنزل بيه السوق وبرضه ده بيحتاج ان انت تصرف على التكنولوجيا ، ,تصرف على فريق ، والمرحلة دي برضه لها ناسها سواء في مجموعات مستثمرين الملايكة بيبقوا مجموعة بقى مش واحد ، عندنا في مصر كايرو انجلز ودلوقتي اسمهم بقى اكاسيا ، وفي أليكس انجلز ففي مجموعات مستثمرين دخلوا مع بعض وبرضه في صندوق رأس المال المخاطر في المراحل المبكرة ومسرعة الأعمال بيستثمروا في المرحلة دي
Pre series A بعد كده بيبتدي يخش في مرحلة الـ
اللي هو بداية القياس ، يعني أنا بدأت بقى أطور الموضوع وأبتدي أكبر بقى في السوق
عمر: بقى عندي فكرة ، ببيعها ، ودخلت منها شوية فلوس والكلام ده كله
ماري: بالظبط ، وبرضه على فكرة ممكن يدخل فيها كل دول ، يعني هو في الأخر المستثمر الملاك أو مجموعة المستثمرين الملايكة ممكن تعجبه فكرة تكون في مرحلة Pre series A الـ
فهو مستعد يحط رصيد كبير 100 ألف دولار أو أياً كان ويدخل مع المسرعة مع صندوق رأس المال المخاطر في المراحل المبكرة مفيش حاجه تمنع طالما التفويض بتاع رأس المال المخاطر يسمح بمرحلة مبكرة هو يقدر يعمل اي حاجه في المرحلة دي
خلاص بقى دي شركة إلى حد كبير وصلت لإستقرار معين في المنتج و عايزة تكبر أكتر في السوق بتاعها أو تروح لسوق تاني Series A
ساعات بتعتبر مرحلة ما قبل الاكتتاب العام ، أو مرحلة ما قبل الأسهم الخاصة اللي هو الشركة دي قربت تعمل تخارج Series B
طبعاً في شركات بتلم لغاية C و D و E دي كلها مراحل استثمارية يعني ، يعني ممكن تفضل مكملة حسب نوع البيزنس ، البيزنس ده بيحتاج بطبيعته يحرق فلوس كتير على ما يوصل لربحية ، لو بيزنس من النوع اللي هو مركز بشكل كامل على التكنولوجيا ده بيقدر يوصل لربحية أسرع فممكن يحافظ على نفسه فخلاص بيوصل لمرحلة A أو B ممكن يتباع خلاص
عمر: يبقى انتي ممكن تبقى عند المرحلة B يا إما حد هيشتريكي بالكامل يا إما هينزل البورصة يا إما أنا مثلاً أكون في مجال محتاج كذا جولة تانية عشان أوصل للمراحل دي
ماري: وممكن تفضل مكمل إن أنت شركة بتحقق ربحية
عمر: خلاص بتاعتك وانا عندي حصة فيها ومبسوط و بتدخلي فلوس
ماري: بس غالباً يعني لو هو صندوق رأس مال استثماري التفويض بتاعه ان هو يخرج لأن الطريقة اللي الصناديق دي بتشتغل بيها هو لازم يرجع الفلوس للمستثمرين وفوقها العائد فهو لازم في مرحلة ما يبقى عايز يخرج ، فـ ساعتها بقى بيدور أنه يبيع لصندوق الأسهم الخاصة اللي هو بقى الصندوق الأكبر اللي بيستثمر في الشركات الأكثر نضوجاً
عمر: وبعديها بقى الصندوق الأكبر كمان اللي هي صندوق الأسهم العامة ، اللي هي بقى الناس اللي وصلت انها تحط أسهمها على البورصة
ماري: بالظبط
عمر: هايل .. طيب احنا كده تقريباً غطينا النظام البيئي كله من ناحية المستثمر مين هو ، أنواع الشركات ومراحل لم الفلوس
10:48
أنا دلوقتي هروح معاكي يعني انا لما فكرت وحتى لما دردشنا قبل الحلقة أنا عايز ابص على الموضوع من 3 زوايا ؛ لأن اللي بيسمع غالباً واحد من الـ 3 دول لو هو مهتم في المجال ده .. أول واحد الراجل رائد الأعمال ، أنا عايز أسأل اسئلة ليكى بالنيابة عن رائد الأعمال
أول حاجه ازاي اصلاً أطبق ، يعني إزاي أوصل للناس انها اصلاً تاخدني في الحاضنة بتاعت الفكرة .. ازاي اعملها؟
ماري: الموضوع بيطلب شوية بحث ، والمعلومات متاحة يعني أنا أعتقد لو حد كتب ريادة أعمال ، حضانات في مصر هيطلعله قائمة بكل الجهات اللي بتعمل البرامج دي فالموضوع محتاج شوية بحث أو تسأل حد عادي ، تسأل رائد أعمال انت تعرفه بدأ مشروع أو عمل حاجه فالبحث هيوصلك على طول للمعلومة وكل الجهات دي بيبقى عندهم تقديم من خلال الإنترنت فبتخش على الموقع بتاعهم بتلاقي "قدم هنا" لو في جولة جاية أو برنامج جاي وبتقدم عادي وتبدأ تمشي معاهم في العملية
عمر: فالموضوع المفروض سهل لأنهم اصلاً بيبقى عندهم حافز انهم يخلوا الناس تيجي تقدم لهم أفكار ، يبقى أول واحد بيسمعنا النهاردة رائد الأعمال وبعدين هروح لشخصيتين تانين هنغطيهم بعد كده .. بس رائد الأعمال عرف ازاي هيقدم دي أول حاجه
12:19
الحاضنة دي بقى لما يقابلني أنا قدمت وشافني ، عايز مني إيه؟ يعني عايزني اروحله بإيه؟
ماري: بداية لو هو حاضنة مطالبة بتبقى بسيطة ، يستحسن يبقى فريق هو عايز يشوف شخص او اتنين يفضل عن واحد يعني و فكرة تبدو أنها مدروسة
يعني أنا للأسف كان بيجيلي ناس ساعات وفي مرحلة حتى مسرعة الأعمال مش الحاضنة معملش أي بحث بأي شكل من الأشكال عن الفكرة بتاعته ، طب دي هتنجح ولا لأ ، طب في ناس تانية عملت الفكرة دي فأنا بدعو بس رواد الأعمال يدرسوا شوية الموضوع ، ياخدوا رأي ناس عندهم خبرة بحيث انه لما يروح يتكلم عن الفكرة هي مجرد فكرة صحيح فهو من الأخر عنده مجموعة شرائح - سلايد - على الباوربوينت أو حاجه مش حاجه معقده عشان يتميز عن غيره انه بذل مجهود شوية في البحث للفكرة
لو انا بقدم على مسرعة أعمال لأ لازم يبقى عندى بقى فريق إلى حد ما مكتمل ، مسرعة الأعمال محتاجه حاجات أكتر شوية ، محتاج أشوف ان الموضوع أدرس بكل جوانبه ، أنا عارف مين السوق المستهدف بتاعي ، أنا هقدم الخدمة أو المنتج ده لمين ، عارف هسعرها ازاي ومش معنى كده ان اللي انت هتقدمه مسلم بيه ما احنا هنشتغل مع بعض عليه بس انت عملت الشغل ده
وفي أوقات كتير فى مسرعة الأعمال بيكون رائد الأعمال أو مجموعة رواد الأعمال بالفعل لموا جزء صغير من الفلوس من العائلة والأصدقاء أو مستثمرين ملايكة وعملوا شوية شغل ووصلوا للحد الأدنى من المنتج قابل للتطبيق ، ففي منتج فعلي ، وفي ناس بتبقى في مرحلة الإيرادات المبكرة يعني هو كمان بدأ يبيع ومش معنى كده برضه ان ده مسلم بيه ، ممكن نغير طريقة البيع ، ممكن نغير التسعير يعنى هنشتغل بقى معاك كناس متخصصة بتعمل ده طول الوقت ، هنشتغل معاه عليه بس دي البداية
لو أنا بقى رايح لصندوق رأس المال المخاطر بيستثمر مبالغ أكبر لأ هو عايز بقى يشوف أنا عملت إيه ، يعني بعد ما نزلت السوق وبعت تعالى بقى وريني ان المنتج ده ناجح بدايات النجاح واضحة وهكذا بقى فـ المتطلبات بتفضل تزيد كل ما كانت في استثمار قيمته أعلى
عمر: طيب تعرفي تدينا كده اسم أو اسمين ، فكرة أو فكرتين أنتي شوفتيهم دخلوا الحاضنة اللي هما اول حاجه خالص كانت أفكارهم إيه؟ انا برضه عايز أقرب للناس احنا بنتكلم عن ايه
ماري: هقولك الموضوع بيبتدي ازاي يا عمر ، بيبتدي ان الناس بتشوف إن في مشكلة معينة أو في عائق معين في الحياة اليومية وبيحاولوا يشتغلوا عليه فشوفنا مثلاً أفكار كتيرة جداً جاية من الصعيد بيعاني من نقص في حاجات معينة ، قطاعات معينة والناس بتبتكر أفكار تحل المشاكل دي ، دي أحلى حاجات أنا بحب اشوفها
هو الهدف من التطوير ده أو الأبتكار عمتاً انك تحسن حياة المجتمعات ده الهدف الأساسي وعشان كده رجوعاً للنقطة اللي انت طرحتها في الأول أن الاستثمار كان بدأ بحكومات وبعد كده بالمؤسسات الخاصة هو على فكرة في رأس المال المخاطر نفس الشيء عشان هو رأس مال مخاطر هو بياخد مخاطرة فعادة الحكومات هي اللي بتبدأ تحط وبعدين القطاع الخاص بيطمن أن الحكومة موجودة فبيتبع فهو ده الهدف ، الهدف اننا بحسن حياة المجتمعات ، بحل مشاكل من حوالينا
بشوف كمان ناس كتيرة بتيجي بيكونوا بيشتغلوا في مجال معين وبيشوفوا فيه عائق أو مشكلة معينة في المجال ده وبيطوروا بقى حاجه تحل المشكلة دي ودول بيبقوا من أنجح رواد الأعمال لأنهم عندهم خبرة هايلة في المجال بتاعهم وعارفين بالظبط المشكلة فين ولما بيروحوا بعد كده يطوروا المنتج أو الخدمة دي ويروحوا يبيعوها للناس اللي كانوا بيشتغلوا معاهم هما بيتكلموا نفس لغتهم فالفكرة اللي انا بطلع بيها لازم تكون بتحل مشكلة لناس كتير
عمر: طيب تقدري تقوليلنا مثلاً فكرتين انتي شوفتيهم حتى في جملة يعني عايز واحد بيعمل كذا ، بيحل كذا
ماري: ماشي كان في شركة قريبة أوي لقلبي بتحل مشكلة الناس اللي عندها أمراض مزمنة ومحتاجه كل شهر تلاقي أدوية معينة ، هتفضل تاخدها كل شهر لبقية حياتها ومحتاجه حد يفكرها بالدوا ويبعتلها الدوا هما طوروا حاجه تحل المشكلة دي بناءًا على تجربة شخصية لواحدة من المؤسسين مثلاً
في رائد أعمال تاني كان بيشتغل في مجال التجزئة والتوزيع في شركة كبيرة اوي وكان شايف ان في مشكلة معينة بتعاني منها الشركات دي مثلاً في انها تلاقي عربيات نقل في وقت الذروات غير ان هي بتمتلك عربيات نقل بس بتضطر تأجر عربيات نقل برضه هو جه بحل حوالين المشكلة دي
عمر: فهي حاجات بسيطة يعني هي أفكار بسيطة جداً ، انا بس بحاول ان انت مش لازم تكون بتصنع صاروخ عشان تاخد تمويل ، صح يعني الموضوع مش كده؟
ماري: خالص ، وكل التركة ان انت تبقى بتحل مشكلة لعدد كبير أوي من الناس يعني هديلك برضه مثال ، مره حد كلمني على فكرة تطبيق الناس تقدر تحجز من عليها مواعيد مع الطبيب البيطري فأنا مشكلتي قلتله الموضوع ده هو بيحل مشكلة آه بس هي مشكلة مش كبيرة أوي والعدد صغير أوي من الناس ، قلتله معظم الناس اللي عندها كلاب أو قطط أو أياً كانوا بيربوا إيه في البيت غالباً عندهم بالفعل الدكتور البيطري بتاعهم بيبعتوله على واتساب ويحددوا معاه الميعاد.. فـ المشكلة ، فين المشكلة! ولو في فهي مش مشكلة أوي
عمر: ف حتة الرفاهية بتاعة المجتمع مش في الحاجات الأساسية
ماري: بالظبط ، ومش لعدد كبير من الناس برضه يعني نسبة الناس اللي بتربي حيوانات أليفة في البيت مش كبيرة اوي وتاني لأن دي نوع من الرفاهية فهو بالفعل واصل للطبيب البيطري فدي مش مشكلة أوي بالنسباله
18:10
عمر: تمام ، طيب أنا برضه بسأل من وجهة نظر رائد الأعمال ورايح للحاضنة أو مسرعة الأعمال أو أياً كان إيه الجانب السلبي أو المخاطرة بتاعتي ، يعني إيه الحاجة الوحشة اللي ممكن تحصلي معاهم؟
ماري: كرائد أعمال مش مفروض يبقى في أي جوانب سلبية .. مش مفروض ، لو مسرعة الأعمال أو الحاضنة شغاله صح المفروض انهم ناس عندهم خبرة يعرفوا يدولك النصيحة المظبوطة ويوجهوك للطريق الصح وعمر ما يكون ابداَ دورهم انهم يتدخلوا في طريقة إدارتك للشركة احنا في الاخر حتى لو أنا مسرعة وبستثمر معاك وباخد نسبة من الأسهم في شركتك أنا في الآخر أقلية ، أنا مساهم أنا في الآخر دوري اديلك نصيحة بس وأقولك ده الطريق الصح وانا مصلحتي من مصلحتك أنا بالفعل مستثمره معاك فأنا بقولك الحاجه اللى هتنفع شركتك وبالتالي هتنفعني أنا كمستثمر في الشركة فـ مش المفروض ان يكون في جانب سلبي
عمر: آه يعني مثلاً أنا بقول اي كلام مش بقولك حاجات علمية ، بس هل ممكن يسرقوا فكرتي؟ يعني عايز أفهم منك الناحية التانية ، هل ممكن ياخدوا حصة كبيرة أوي زيادة عن اللزوم مني؟ هل ممكن يضحكوا عليا؟ أنا مش فاهم وهما كبار ، يعني أنا بتكلم برضه بمنتهى البساطة يعني
ماري: لو احنا واجهنا كل التخوفات دي تخوفات شرعية .. انت بتيجي حد بيقولك أحياناً أنا هديلك رأس مال كله بتاع الشركة وأنا هاخد نسبة صغيرة فبيبقى في تخوف بس اللي أنا عايزة أقوله إن الفكرة هو عمره ما هيسرق فكرتك وينفذها لأن ده مش شغله هو معندوش وقت ولا قدرة انه ياخد افكار ويطورها
عمر: ولا عنده بني آدمين تشتغل في الفكرة دي
ماري: بالظبط ، نهائي وإلا كان هو ده بقى شغله بس هي التفويض بتاع الناس دي انها تدعم وتستثمر ، مش تنفيذ أفكار فهو مش هيسرق ولو يا جماعة هو سرق محدش هيجيله تاني الراجل ده بيسرق أفكار ، أو بينقل معلومات عن شركة لشركة تانية منافسة عمر ما ده المفروض يحصل ده يبقى ممارسة سيئة بكل بساطة فـ دي النقطة الاولانية لأ هو عمره ما هيسرق شركتك
هل ممكن ياخد منك نسبة كبيرة؟ ممكن ، انت لازم برضه تكون شاطر ، مش مفروض برضه ياخد نسبة كبيرة بس هو ممكن يكون شايف إن في مستوى من المخاطرة عالي فهو الفكرة من انه ياخد نسبة كبيرة أنه شوية يسوق الموضوع عشان يساعدك فدي فى الاخر بقى مفاوضات وبتوصل لمدى راحتك مع المؤسسة دي أو المستثمر ده وممكن تحصل مع مستثمر ملاك حتى على فكرة
عمر: ممكن تحصل في أي حاجه ، أنا برضه بتكلم كرائد أعمال انا عايز أضمن حقي أولاً وعايز يبقى عندي مجال كبير مش عايز أروح أبيع شركتي في أول يوم نصها مثلاً فبقى عندي نص الشركة
ماري: هي تاني بتختلف من شخص لشخص ، في شخص بيكون طور الفكرة وعمل منتج بس هو اتعرض عليه فرصه انه يدخل معاه مستثمر كبير وهو شايف انه هيساعده ويفتحله ابواب مقابل انه ياخد أكتر من نص الشركة هو موافق
هو في الاخر الاستثمار ده زي الجواز ، أو زي الشراكة لازم تكون مرتاح تماماً مع الشريك بتاعك وكل حاجة متحدده في العقود وكل حاجه واضحة وصريحة عشان كده حتى العقود بيبقى مكتوب فيها حاجه اسمها "التارك" يعني لو حد مشي الدنيا بتتحرك ازاي بس لكن هي في الأخر إيه اللي رائد الأعمال حاسس انه مرتاح ليه ويسأل وياخد رأي ناس ويستشير رواد أعمال سابقينه شوية ولموا فلوس أكتر وعدوا في المراحل دي بس
21:44
عمر: ده هيجيبني بقى لسؤال لشبكة الاتصال ، من كل كلامك اسأل ، روح ، شوف الناس اللي قبلك في المجال ده كلميني عن شبكة العلاقات وأهميتها لرائد الأعمال؟
ماري: لأ مهم بشكل غير عادي ، ودلوقتي الحمد لله بقى عندنا في مصر كميه فعاليات تقنية بتحصل يعني زمان مكنش في غير "رايز أب" دلوقتي بقى في "رايز أب" وفي "تاكني" بيتعمل في إسكندرية وبيتعمل في القاهره ، ده غير مثلا اللي هو العروض اللي بتعملها شركات كتيره جدا بيخرجوه فيها الدفعات اللي كانت عندهم فـ برضه شوية بحث بسيط هتعرف توصل للفعاليات التواصل ودي كلها على فكرة بتبقى فعاليات مجانية إلى حد ما تقدر تروح وتحضر أو بتذاكر مبسطة للشركات الناشئة فمهم أوي انك تبقى تدخل جوه النظام البيئي وتبني شبكة تواصل من جوه سواء مع رواد أعمال تانين سابقينك هتتعلم منهم كتير جداً سواء مع مستثمرين سواء مع ناس ذو خبرة في مجالاتهم فـ التواصل مهم مهم احنا لما كنا بنعمل أي دورة جديدة كان لازم نجيب رواد الأعمال اللي اتخرجوا يتكلموا مع رواد الأعمال الجداد عشان ياخدوا من خبرتهم ويتعرفوا عليهم ويكلموهم بنجيبهم كمرشدين ليهم فـ التواصل مهم جداً جداً
عشان كده أنا بنصح أي رائد أعمال ديماً لسه بيبتدي ومن بره المجال ده خالص يدخل حاضنة أو مسرعة لأنها هتديله شبكة التواصل دي على طبق من فضة ، هيبقى في فعاليات تواصل وفعاليات تصحيح وهيتعلم ازاي يصحح البيزنس بتاعه صح فبتفيد إفادة غير عادية مقابل انه يبقى لوحده خالص في حاجه جديدة تماماً وبيضبش مش عارف يكلم مين ولا يوصل ازاي ولا يعمل إيه
23:20
عمر: لو هتقولي لرائد الأعمال أوعى تعمل الحاجتين تلاته دول هتقوليله إيه؟ أوعى توري الناس الصفة دي ، دي ، دي مش معناها انه انت تخبيها أنا بتكلم على الغلطة والغلطة دي بتبقى حاجه مش مقصودة ، يعني رايح مثلاً مش نايم بدري يعني فاهمه قصدي ، مش مذاكر عارفه رايح الامتحان مش مذاكر دي غلطة ، مسرعة الأعمال المفروض مروحلوش وأنا إيه؟
ماري: مترحلوش وانت مؤسس منفرد لأن ده بيزود المخاطرة اوي ، فحاول ديماً تلاقي شريك انت مرتاح في الشغل معاه وتبدأوا مع بعض المشروع
عمر: ودي حاجة بسيطة وسهلة
ماري: مش سهلة أوي يا عمر
عمر: قصدي سهلة ان احنا نعرّفها
ماري: آه سهل اننا نعرفها ، متروحش لوحدك دي أول حاجه ، تاني حاجه هي للأسف صعبة شوية بس المستثمر عايز يشوف ان انت مخصص نفسك بالكامل للفكرة دي فطبعاً دي بتبقى صعبة شوية لبعض الناس لأنه بالفعل بيبقى عنده شغلانه وبياخد منها مرتب أنا بقوله سيب الشغلانة عشان تعمل ده فبيبقى صعب بس تاني الناس فمسرعة الأعمال بيبقوا متفهمين ان انت بمجرد انك دخلت وبقى معاك استثمار يقدر يعيشك .. بس هو عايز يشوف انك ملتزم ده أكبر مخاطرة المستثمر بياخدها على فكرة لانه في الاخر احنا بنستثمر في الأشخاص دي انهم ينفذوا الفكرة دي، انا مش بستثمر في الفكرة لوحدها لأن الفكرة لوحدها من غير مجموعة العمل ملهاش لازمة ، فأنا بستثمر في الأشخاص دي انا عايز الاشخاص دي بعينها تنفذ الفكرة دي اللي عجبتني فأكبر مخاطرة بياخدها المستثمر معاك غير طبعا المخاطر الطبيعية بتاعة السوق والمنتج أن الأشخاص دى متكونش متلزمة
25:04
عمر: حلو اوي معلومتين واضحين وظراف وفي الصميم ، آخر سؤال هسألهولك من ناحية رائد الأعمال - أنا آسف لكل رواد الأعمال اللي انا مسألتش الأسئلة الصح اللي نسيتها بس هما دول الأسئلة بتاعتي - لو أنا كنت باخد مرتب ودلوقتي هبقى رائد أعمال الشركة الجديدة دي غالباً هتدفعلى مرتب برضه صح؟ يعني انا بحس انه لازم تاخد مرتب ، بقطع من نفسي تقريباً قد إيه؟ يعني أنا كنت باخد 10000 جنيه أو دولار أو أياً كان الرقم في شغلانة ، مستحيل طبعاً الشركة الجديدة دي تديني نفس مرتبي لازم أقطع شوية عشان يبقى عندي مساهمة بالجهد في الشركة ، بتشوفي الناس بتقطع من دخلها قد إيه؟
ماري: ممكن يوصل لزيرو
عمر: بيفقد كل دخله
ماري: للأسف ، عشان كده لازم يبقى يا إما في شوية مدخرات ، يا إما في جولة صغيرة أتلمت من العائلة والأصدقاء لأن في الأغلب هو مبياخدش أي فلوس لغاية لما الشركة تأمن أول جولة من الاستثمارات ، بعد كده خلينا نقول هو مثلاً حاطت لنفسه نفس الـ 10000 هياخد نصها ويسيب النص التاني جوه الشركة وهكذا
عمر: ويبتدي يقرب من مرتبة مع الوقت ، طيب خلينا نقول في أول فترة مش هياخد أي مرتب ، لو نجحت فكرته وعرف يلم فلوس في مرحلة ما قبل التمويل بيوصل لـ إيه مثلاً 50% من مرتبة؟ من خبرتك يعني ، انا بتكلم عشان الواحد يتخيل
ماري: لأ ممكن أقل في البداية
عمر: 30% من مرتبة؟
ماري: آه
عمر: ومع الوقت بتقعدي تقربي ، كل ما الشركة بتنجح في تحقيق الأهداف
ماري: طبعاً ، لأ ده هيعدي بكتير ، يعني لو هو ناجح
عمر: عشان الاحباط بس
ماري: لأ في تعويض ، بس هو بيبقى حابب ده من كتر ما هو حابب ان الموضوع يقوم ويشتغل كل ما بيجي فلوس بيدوا الأولوية للشغل في الشركة عن أنهم ياخدوا مرتب ، طبعاً بيبقى في مشكلة فرق الفجوة دي بس هو بيبقى مبسوط ان الدنيا بتنجح بيبقى شايف إن المستقبل مشرق كل ما الدنيا بتتحرك فلأ بيعوضوا أضعاف المرتب إن شاء الله يعني
عمر: تمام ، أنا ليه بسألك الأسئلة دي عشان بحط التوقعات اللي هو رائد الأعمال اللي هو فجأة هيسيب كل حاجه وهيروح للزيرو ولازم تعيش في طريقة تفكير دي
ماري: أو لازم تبقى عارف انك محتاج تلم فلوس قبل ما تعمل أي حاجة وقبل ما تسيب شغلك ، عشان كده بقولك بيجلنا كتير رواد أعمال بيقولك أنا لسه بشتغل في الشركة بس لما ألم جولة استثمار هسيبها وهتفرغ واحنا بنتفهم لأن هو محتاج يصرف على عيلته محتاج يصرف على بيته وعنده مصاريف
27:56
عمر: طيب ، هنحول بقى للعكس تماماً ، هنروح لماري مدير الصندوق وعلى فكرة أنا تعمدت الناس بتخش ديماً الحلقات عرفنا على الضيف والكلام ده كله ، أنا دلوقتي عايز اتعرف عليكي كمديرة صندوق .. مين ماري عملت إيه
!ماري: من الأول خالص
..عمر: من الأول خالص
ماري: ماشي ، أنا درست اقتصاد في كلية الاقتصاد والعلوم السياسية جامعة القاهرة وبدأت الكارير بتاعي في بنك اشتغلت في بنك فترة 4 سنين خلال الـ 4 سنين اخدت منحة دراسية كاملة اننا ادرس في إنجلترا فروحت عملت الماجستير بتاعي عملتها في المالية ولما رجعت بقى كنت حابة انقل ناحية الاستثمار فهنا بدأت اشتغل في إدارة الأصول وتعرفنا على بعض في الفترة دي واشتغلنا مع بعض وعملنا شغل كويس أوي شغلانة أنا حبيتها جداً لأنها شغلانه ديناميكية جداً ومحتاج انك تبقى عارف كل حاجه بتحصل في العالم كله عشان تعرف تعمل قرار استثماري صحيح لأن كله مأثر على أسواق الأسهم المدرجة
اشتغلت الشغلانة دي ما بين مصر والكويت وبعدين لما رجعت مصر فالواقع ناس كتير متعرفش اننا اخدت فترة من الاستثمارات والأرقام والفلوس سنتين عملت فيها "كروس فيت" درس وبقيت مدربة كروس فيت معتمدة وقعدت سنتين مستنيه الخطوة اللي بعدها اللي هتبقى محمسه بالنسبالي
Flat6Labs وبعد كده دخلت بقى في الجزء بتاع الرأس المال المخاطر في 2017 اشتغلت في شركة
كنت بدير صندوق التمويل الأولي بتاعهم وفي الفترة دي قعدت 4 سنين استثمرت في 70 شركة وعملت تخارج في شركة اسمها هارمونيكا ودلوقتي اسمهم هوايا يعني كانوا 4 سنين من أحلى 4 سنين في الكارير بتاعي لأنه اتعرفت على رواد أعمال هايلين بحبهم جداً وعلى أتصال بيهم تقريباً كلهم لغاية دلوقتي أو معظمهم يعني طبعاً العدد كان كبير اوي
Series A and B Fund والسنة اللي فاتت انتقلت لصندوق تاني بيستثمر في المراحل الأخيرة
قعدت فيه سنة برضه أتعرفت على رواد أعمال جمال جداً وعاملين مشاريع هايلة في مصر وفي المنطقة العربية وحالياً بقدم استشارات استثمارية للشركات الناشئة وللصناديق سواء الموجودة في مصر أو اللي داخلة مصر وعايزة تعرف أكتر عن السوق المصري
عمر: هايل ، رحلة ممتعة بجد والله ، أنا فخور باللي انتي عملتيه مش سهل ان الواحد يعمل كده وزي ما انتي قولتي احنا نعرف بعض من زمان فانا اتبسطت من التحويل بتاعك من الحتة بتاعة الأسهم المدرجة الممله اللي أنا بعملها مثلاً وروحتي في حتة ممتعة زي رأس المال المخاطر اللي بتلمسي فيها حياة الناس وبتشوفي قصص.. قولتي رقم 70 فأنتي عملتي 70 فكرة ، دخلتي استثمرتي في 70 فكرة ، 70 حياة بأسرهم بالكلام ده كله فحاجه لطيفة جداً بصراحة
وبكده نكون وصلنا لنهاية الجزء الأول هنكمل إن شاء الله الاسبوع الجاي الجزء التاني مع ماري، تاني انا بحب أكرر الحلقة دي من أهم الحلقات اللي هتبقى موجودة في كلام ينور من وجهة نظري لأنها بتفتح وبتسلط الضوء على قطاع كبير من الشركات الناشئة ، الصغيرة لو عندك فكرة ، لو حابب تعمل حاجه ازاي تطور نفسك وازاي تجهز فكرتك وتروح للمستثمرين الصح ، اتمنى تكون الحلقة عجبتكم واشوفكم ان شاء الله الاسبوع الجاي
Translation of some words and terms:
Virtual إفتراضي
field مجال
venture capital رأس المال المخاطر
Public equities الأسهم العامة
Topic موضوع
Private Investments الاستثمارات الخاصة
Business Incubator حاضنة الأعمال
Business Accelerator مسرعة الأعمال
Interchangeably بشكل متبادل
Product منتج
Structure هيكل
minimum viable product الحد الأدنى من المنتج القابل للتطبيق
Pre-seed ما قبل التمويل
Seed التمويل
Actual Product المنتج الفعلي
Fund صندوق
venture capital Fund صندوق رأس المال المخاطر
Early Stage المرحلة المبكرة
early revenue stage مرحلة الإيرادات المبكرة
early stage venture capital Fund صندوق رأس المال الاستثماري في المراحل المبكرة
Pre-Seed Funding تمويل ما قبل التأسيس
Seed Funding تمويل التأسيس
Survey استطلاع
Angel Investors المستثمرين الملايكة
Entrepreneur رائد أعمال
Startups شركات ناشئة
Angel investors Groups مجموعات المستثمرين الملائكة
Scaling القياس
venture capital mandate تفويض رأس المال الاستثماري
Stability استقرار
Pre - IPO ما قبل الاكتتاب العام
pre private equity ما قبل الأسهم الخاصة
Profitability الربحية
focused completely on tech تركز بشكل كامل على التكنولوجيا
Sustain يحافظ
strategic investment الاستثمار الاستراتيجي
Acquire حيازة
Round جولة
private equity fund صندوق الأسهم الخاصة
More mature أكثر نضجا
Public Equity Fund صندوق الأسهم العامة
Exchange البورصة
Ecosystem نظام بيئي
Angles زوايا
Interested مهتم
Apply تقديم
List قائمة
Entities جهات
application Process online تقديم من خلال الإنترنت
apply here قدم هنا
Incentive حافز
Slides الشرائح
Traction شعبية
Innovate أبتكار
innovation الابتكار
Private Institutions المؤسسات الخاصة
Founders المؤسسين
Peaks الذروات
Came up with solution جاء مع الحل
Pets حيوانات أليفة
Downside الجانب السلبي
Minority اقليه
Shareholder مساهم
Valid شرعية
Capacity قدرة
Support تدعم
Invest تستثمر
Execute تنفيذ
Bad practice ممارسة سيئة
Negotiations مفاوضات
Partnership الشراكة
Leaver تارك
Networking شبكة الاتصال
tech events فعاليات تقنية
networking events فعاليات التواصل
Cycle دوره
Mentors مرشدين
patches events فعاليات تصحيح
Solo Founder مؤسس منفرد
Fully Dedicated مخصص بالكامل
Once بمجرد
Commitment التزام
To the point في الصميم
sweat equity مساهمة بالجهد
Down to zero وصولا إلى الصفر
Secure تأمن
Priority أولوية
Gap فجوة
set expectations بحط التوقعات
Mindset طريقه تفكير
Switch هنحول
Fund Manager مدير الصندوق
Banking الخدمات المصرفية
Master ماجستير
Finance الماليه
Dynamic متحرك
Listed equity الأسهم المدرجة
certified crossfit coach مدربة كروس فيت معتمدة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #رأس_المال_المخاطر #الجزء_الأول