99. الجزء الثاني - VC رحلة داخل شركات الـ
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنكمل كلامنا عن قطاع تمويل الأفكار الناشئة وشركات رأس المال المخاطر في الجزء التاني من لقائنا مع ماري تيريز
episode-98 لو مسمعتش الجزء الاول وبتسمعنا النهاردة لأول مره مهم ترجع تسمع الجزء الاول لأن الحلقتين بيكملوا بعض، تقدر تسمع الجزء الأول من هنا
ماري تيريز
حاصلة على درجة البكالوريوس في الاقتصاد من جامعة القاهرة في عام 2003 ودرجة الماجستير في الاقتصاد المالي من جامعة وارويك بإنجلترا في عام 2007، بدأت حياتها المهنية في مجال الخدمات المصرفية التجارية
Flat6Labs في نوفمبر 2017 انضمت لـ
كشريك إداري لصندوق القاهرة وحالياً ماري بتقدم استشارات استثمارية للشركات الناشئة والصناديق سواء الموجودة في مصر أو اللي داخلة مصر وعايزة تعرف أكتر عن السوق المصري
Marie-Therese @LinkedIn : تقدروا تتواصلوا مع ماري من هنا
01:12 ازاي بتفكري كمديرة صندوق؟
06:42 أول صندوق اشتغلتي فيه كنتي بتركزي على الشركات في أي مرحلة؟
07:23 إيه أكبر مشاكلك كمديرة صندوق؟
10:52 بعيدا عن العلم و الارقام هل بيبقى عندك شعور أن الفكرة دي مش هتنجح؟
13:55 هل شوفتي النموذج اللي بيروح يخبط على كل الأبواب وبيترفض وبعدين ينجح؟
16:16 النجاح، هو إيه من وجهة نظرك الشخصية كمديرة صندوق؟
17:50 هل المجال ده هو اللى انتى حابه تكملي فيه باقي حياتك؟
19:03 كلميني على مين المستثمر اللي بيستثمر في الصندوق؟
23:30 هل المستثمر الملاك ممكن يبقى عضو في مجلس الإدارة؟
24:27 هل استثمر في شركات معينة ولا اشتري صندوق عنده مجموعة من الأفكار؟
حلقتين من أهم الحلقات اللي هتبقى موجودة في كلام ينور؛ لأنه قطاع مهم ومش سهل ومحتاج بحث كتير، فـ نتمنى أن الحلقتين دول يكونوا مرجع لأي حد حابب يفهم أكتر عن القطاع ده
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهارده معانا الجزء التاني من حلقة مع ماري بنتكلم فيها عن القطاع بتاع الشركات الناشئة ، لو مسمعتش الجزء الاول وبتسمعنا النهارده لاول مره اتمنى ترجع تسمع الجزء اللي فات الاول لان الحلقتين متصلتين ببعض ، السياق بتاعهم يعني بيكمل بعض ولو انت سمعت الحلقه اللي فاتت يارب تكون عجبتكم واسيبكم مع الجزء التاني
01:12
عمر: انتي بقى كمديرة صندوق .. تعالي بقى .. ازاي بتختاري الـ 70 انا عارف ان ده سؤال واسع قوي بس كل المدير الصندوق وليه شخصيته وليه المعايير بتاعته ، هل في 20 / 50 / 100 شك بتدوري عليهم عشان تقولي هي دي الفكرة اللي انا عايزاها؟ هل بتبقى أكتر على الفريق .. ازاي بتفكري كمديرة صندوق؟
ماري: ده سؤال كويس أوي؛ لأنه الطريقة اللي أنا ببص بيها على الشركات اختلفت مع الوقت حقيقة طبعا في حاجات اساسيه بس في حاجات اختلفت مع الوقت
بس هو في الأساس الهدف من الصندوق ايه ان انا باخد فلوس من المستثمرين بستثمر الفلوس والهدف ان انا ارجع الفلوس دي بعائد متفق عليه فانا لازم استثمر في الشركات بهدف انها تنجح
طبعا التفويض بتاع مسرعات الأعمال انهم يستثمروا في عدد كبير من الشركات والمفروض ان جزء صغير من الشركات دي هو اللي هينجح قوي وهيحقق العوائد اللي احنا عايزينها
عمر: طب هل النسب دي بتبقى انتي عارفاها أو بتبقي متوقعاها؟ يعني مثلا كل 100 شركه من كذا هينجحوا
ماري: يعني لو عملت 10% يبقى انت عملت شغل كويس قوي
عمر: يعني من كل 100 فكرة عايزة 10 بس ينجحوا
ماري: بظبط، فأهم حاجه بالنسبالي أنا هو الفريق والفريق من كذا جهة.. من ناحية أنا هعرف اشتغل مع الناس دي ولا لأ؟ الناس دي قابلة للتدريب ولا لأ؟ يعني هل هيستمعوا للنصيحة ويطوروا ويحسنوا ولا لأ! اشتغلت مع ناس كتيرة صعبة في الحتة دي بس في الأخر بعد ما بنينا بينا ثقة بقى الموضوع أسهل كتير فهما في الأول بيبقوا متخوفين شوية وأنا أتفهم ده جداً بس مع الوقت لما بيبقى في ثقة ماري واحدة من شركائنا، بيشوفوا إن ماري معاهم ديماً في صفهم فخلاص مفيش بقى مشكلة
هل هما فريق بيكمل بعض ولا لأ؟ ففي حد شاطر في التكنولوجيا، حد شاطر في المبيعات، حد شاطر في الإستراتيجي لأن دي مهمه اوي والحاجه التالتة لازم يكون في حد هو الخبير في المجال أو في الحته دي، هو اللي هيجيب الخبرة في الجزء ده بالذات
عمر: والخبير ده واحد، شخص واحد
ماري: شخص واحد كافي
عمر: فريق كامل من الشخصيات اللي بتكمل بعضها اللي معندهاش تداخل في الصفات الشخصية ولكن في واحد منهم هو اللي عنده المعرفة
ماري: لازم لأن هو ده اللي بيبقى عنده العلاقات بتاعته في المجال ده وفاهم المجال ده وفاهم النقص ، فاهم إيه الصعب وإيه السهل يعني بتفرق أوي وخلي بالك احنا مش بنتكلم على فريق كبير يعني انا عايزة 2 أو 3 مش لازم يبقى فريق كبير في الأول طبعاً طبيعي يعني بس ده بالنسبالي ده رقم 1
رقم 2 اللي هي النقطة اللي احنا اتكلمنا فيها هل الموضوع ده بيحل مشكلة لعدد قد إيه من الناس؟ لـ 10 لـ 20 لـ 1000 لمليون لمليار! ده على طول بينعكس على البزنس ده ممكن يوصل لفين ، فأنا كمستثمر عايز أعمل 10 مرات فلوسي أكيد ، طبعاً ده رقم كبير أوي فكل ما كان البزنس ده هيكبر وبيخاطب عدد كبير من الناس كل ما كانت الاحتمالية احسن دي حاجة اساسية
فحجم السوق والفريق مش عايز أقول قطاعات لأن طالما الموضوع بيحل مشكلة كبيرة هيبقى قطاع كويس بس في نقطة تالتة اتعلمتها مع الوقت إيه الصناعات اللي القطاع بعديا عايز يستثمر فيها ياما استثمرت في حاجات كنت متحمسلها جداً وفريق هايل وفكرة هايلة بس للأسف القطاع اللي بعدي مش عايز يستثمر فيها فدي كانت بتبقى يعني حسرة أنه فريق هايل وعاملين فكرة هايلة بس لسبب أو لأخر مش جاذبة للقطاعات اللي بعدي فدي نقطة بقيت أركز عليها
عمر: أتغيرتي فيها يعني انتي ابتديتي مكنش عندك المعلومة دي ، متشجعة للفكرة
ماري: مش مركزة عليها أوي
عمر: تحيز من القطاعات
ماري: أياً كان بقى في أجندات بقى
عمر: آه احنا مش هنستثمر في الناس اللي بتعمل كده ، وهنستثمر في الناس اللي بتعمل كده
ماري: آه بقى في حاجات كتير فبدأت اخد بالي مش عشان حاجه لأنه برضه إحباط رهيب لرواد الأعمال اللي عملوا حاجه كويسة ومش عارفين يلموا فلوس ، إحباط ليا كمستثمرة اني استثمر معاهم وقت ومجهود وفلوس
عمر: ونجحت؟
ماري: ناجحة بس مش عارفة تكبر ، فـ مهم أوي ودي حاجه نفسي كل رواد الأعمال يفكروا فيها يعني أنا لما أجي ابتدي فكرة هعمل عليها بحث عالمي لأن كتير من الحاجات اللى احنا بنشوفها هي حاجات اتعملت بره واحنا بنخليها محلية في بلدنا .. حلو ، الشركات اللي بره دي نجحت؟ طب لمت فلوس؟ طب في ناس استثمرت فيها؟ في اهتمام بيها ولا لأ؟ فـ دي برضه نقطة مهمة اننا أبحثها
عمر: في شريط متصور بره ، الفيلم حصل قبل كده وشوفت مشاكلة فخد شوية وقت واتفرج على الفيلم هناك
ماري: بالظبط، عشان كده بقولك البحث مهم أوي أوي فدي نقطة تالتة مهمه أوي اتعلمتها مع الوقت بس آه عشان أجاوب على سؤالك برضه احنا ممكن نبص على 1000 شركة عشان نطلع منهم 10 فـ الفلترة جامدة
عمر: 1000 واحد جه قالك انا عايزك تخشي معايا اخدتي 10 ومن الـ 10 دي في واحد هينجح
ماري: بالظبط
عمر: بنتكلم على واحد في الألف ، بس الواحد في الألف ده هياخد كل حاجه
ماري: بالظبط
06:42
عمر: انتي اشتغلتي في صندوقين ، قولتيلي الصندوق التاني كان بيستثمر متأخر شوية ، الصندوق الأولاني كنتي بتركزي على الشركات في أنهي مرحلة؟
ماري: يعني نقدر نقول Pre-Seed لـ Seed
عمر: من فكرة لواحد جالك عنده صافي القيمة الحالية
ماري: وإيرادات مبكرة يعني وصلنا مع تطور النظام البيئي يعني احنا لما بدأنا بدري كان لسه في افكار وبعد كده لقينا لأ اللي بيقدموا ناس النسبة الأكبر عندها بالفعل منتج في السوق ، بدأوا بالفعل
عمر: وباعوا مره ومرتين ، تلاتة ، خمسة أي كان
ماري: بالظبط ، باع لشركة باع لعدد من الأفراد حسب هي من شركة لشركة أو من شركة لمستهلك
07:23
عمر: احنا قولنا رائد الأعمال مشاكلة إيه والكلام ده كله ، انتى بقى كمديرة صندوق إيه أكبر مشاكلك؟
ماري: أكبر مشاكلي انه الفريق اللي انا استثمرت فيه ميكملش يحصل مشاكل ، حد يجيله شركة بمرتب كبير أوي فيضطر يسيب الموضوع يستسلم بدري ، ان يبقى في نوع من الإصرار على حاجة مش نافعة ومش شغالة يعني الفكرة حلوة وكل حاجه بس احنا بننصح بإتجاه معين أو السوق بيوجهك لاتجاه معين وهما رافضين يسمعوا دي برضه جزء من صفات رائد الأعمال وانا متفهماها أو تفهمتها مع الوقت هو بيبقى في نوع من الإصرار وهو ده اللي هما محتاجينه عشان يكملوا أنا مش ضد الفكرة بس ساعات بيبقى من الذكاء انك متصرش على حاجه واضح انها مش نافعة
عمر: آه متعاندش
ماري: متعاندش بظبط ، دي أكتر حاجه بتبوظ مشاريع كتير أوي فده أكبر تخوف عندي ، واكبر تخوف تاني أنه زي ما قولتلك ان رواد الأعمال اللي أنا استثمرت فيهم دول يحصل فيهم لخبطة ، حد يمشي ، أو يحصل خناقات بنشوفها كتير للأسف بس لكن المخاطرة ان كل اللي العوامل صح موجودة والمشروع برضه مينجحش دي مخاطرة انا موافقة أخده عادي ماهو اسمه رأس المال المخاطر فهو كده كده فيه مخاطرة ودي احنا قابلينها مفيش مشكلة بس اهم حاجه اني احس ان الفريق عمل أقصي مجهود وعملوا كل اللي عليهم
زي ما بقولك المشكلة التالتة كانت انهم هما بيبقوا متخوفين اوي مننا في الأول حاسين اننا بننصب عليهم بكل صراحة بقولهالك ، حاسين اننا هنسرق فكرتهم ، حاسين اننا بنضحك عليهم في النسبة اللي بناخدها أو هكذا.. شوية شوية مع الوقت بنشرحلهم يا جماعة احنا داخلين نشاركوا لو أنا نصبت على شركة واحدة محدش هيقدم تاني عندي
عمر: وسمعتك
ماري: بالظبط، مش ده اللي أنا بحاول أعمله ابداً وبصراحة أكبر نجاحات اتحققت بالنسبالي في الفترة دي ان ناس تبقى مش مقتنعة نهائياً بدور الشركة ولا دورنا معاهم كمستثمر ولا كمسرعة أو كده وبعد ما أقنعتهم انهم يدخلوا بيبقوا احسن حاجه عملناها ان احنا دخلنا واخدنا الاستثمار ده وخدنا شبكة المعاملات دي وخدنا الدعم ده وقدرنا الحمدلله نجبلهم المستثمر اللي بعده واللي بعده واللي بعده وهما دلوقتي هما اللي بيتكلموا على لساننا بيقولوا يا جماعة الناس دي بتعمل حاجة كويسة يا جماعة أدخلوا ياما بعتولنا رواد أعمال أصحابهم انهم يقدموا ويدخلوا
10:09
عمر: السؤال ده ملهوش علاقة انه إجابته آه أو لأ بس لو أنتي بتستثمري في الـ 70 شركة دول في المراحل الأولى بتبقى عارفة أو عندك أحساس مين هينجح ومين مش هينجح؟
ماري: آه
عمر: يعني الاجابه الاسهل أنه لا انا معنديش اي فكره ، اللي هو بنرش ونشوف ايه اللى هيجى ، زي أكنك بترمي شبكة
Spray and Pray ماري: ما هو المبيعات زي ما بيقولوا
بس بيبقى ساعات مش ان انا ببقى عارفه انها تفشل بنسبة 100% بس ببقى عارفه انه انا واخده هنا مخاطره عاليه قوي اما لانه قطاع صعب او لان الفريق صعب بيبقى فيه محفزات كده بقى الواحد مع الوقت بيشوفها شويه
10:52
عمر: هل في اللي هو الحاسه السابعه ، اللي هو انا مش مطمنلك ، هل بتحسي بعيدا عن العلم بقى وبعيدا عن النماذج و الارقام والكلام ده كله هل أنتي ساعات بيبقى عندك احساس ان ده مش هينفع؟
ماري: بص دايما في تحيز شخصي ده شيء طبيعي في البشر عشان كده ديماً اللي بياخد القرارات بتبقى لجنة مش شخص ، أنا كمدير صندوق بخش للـ لجنة باقتراحات طبعاً لو أنا مدير صندوق شاطرة هاخد موافقة على القرارات اللي أنا داخلة بيها بس مش شرط وده الهدف من اللجنة
عمر: يمنعوا التحيزات اللي فيكي انتي كمدير صندوق
ماري: بالظبط ، و يبصوا على الحاجة من وجهة نظر تانية ممكن أكون أنا مش شيفاها عشان كده أنا كنت ديماً قبل ما أدخل اللجنة دي باخد رأيي الفرق كله منهم ناس صغيرين برضه ببقى عاوزة أخد وجهة نظر الشابة الفرش دي ، ممكن أخد رأي ناس أصدقائي من بره المجال خالص بس هما في مجالات تانية ممكن يبقى ليهم نظرة فمش عيب ابداً ان الواحد ياخد وجهات نظر تانية وعشان كده في الاخر برضه بقولك ان القرار قرار لجنة مش قرار شخص ، لأن اي شخص فينا عنده تحيزات
عمر: حلو برضه يعني لطيف هيكل اتخاذ القرار ده عشان يغير القوة المحركة اننا مش لوحدي ومش مسؤول 100% كمدير صندوق
ماري: طبعاً ، وحتى في المجال اللي احنا اشتغلنا فيه مع بعض كان نفس الفكرة اللجنة هي اللي بتاخد القرار لازم لازم عشان تجمع خبرات برضه ناس كتيرة واللجنة مش بس بتبقى ناس من جوه الشركة على فكرة احنا كان عندنا في اللجنة ناس خارجين تماماً بيسموهم أعضاء لجنة خارجيين عشان معندهمش أي تحيزات بقى بيبصوا على الموضوع تماماً من وجهة نظرهم بالتحيزات بتاعتهم الشخصية برضه للصناعة وكده بس لا هما شافوا الفريق ولا قابلوه في بعض الأحيان طبعاً ساعات بنخليهم يقابلوا الفريق لأن برضه جزء من القرار هو الأشخاص هما اقتنعوا بإن الناس دي تقدر
تنفذ الفكرة دي ولا لأ خلي بالك سهل أوي ان الواحد يطلع بفكرة حلوة الصعوبة كلها في التنفيذ
عمر: التنفيذ ما هو الزمن ده زمن تنفيذ ، يعني زمان الناس في التمانينات والسبعينات كانوا بيحاربوا بعض عشان المعلومة عشان هو اصلاً مكنش في معلومة هنجيبها منين! دلوقتي المعلومة موجودة أونلاين وذكاء اصطناعي يكتبهالك ويعمل كل حاجه والدنيا تمام فـ مفيش مشكلة في المعلومة المشكلة في ازاي تنفذ
ماري: دي بقى بالظبط ترجع لنفس المخاطرة اللي رائد الأعمال بيحس بيها اللي هو انا هسرق الفكرة ، ما أنا ممكن أسرق الفكرة بس معنديش حد ينفذها مين هينفذها
عمر: الفكرة موجودة و معتقدش ان في حد بيعمل أفكار جديدة اصلاً هي بتبقى بشكل أو بأخر تطور لحاجة بالفعل موجودة
ماري: يعني نسبة قليلة اوي الناس اللي بتعمل فكرة جديدة محصلتش ودي اللي بنقولهم لازم تسجلوا براءة اختراع بس في طبعاً بس النسبة الأكبر ناس بتجيب أفكار موجودة بره وبينفذوها محلياً ، كام حد دخل عمل نفس الفكرة بس في ناس نجحت وناس لأ لأن السر كله في التنفيذ
13:55
عمر: بيجيلك بقى ناس اترفضت من كل الناس ودقوا على كل الأبواب واترفضوا وحاولوا ينفذوها بطريقة تانية بعيد عن الكلام ده كله وينجحوا جداً جداً ، هل شوفتي نماذج اترفضت كتير وراحت نجحت! عارفه القصص المشهورة بتاعة فيلم بيروح يخبط على كل الأبواب والأبواب كلها ترفضه كان في فيلم كده بتاع ويل سميث اعتقد
Pursuit of Happiness ماري: آه
عمر: آه مثلاً يعني هل الراجل ده قابلتيه؟
ماري: آه قابلته ، قابلته وناس بتترفض لأسباب مختلفة بس هو الذكاء ان انت تشتغل على أسباب الرفض وتتحسن فكل ما هتروح تصحح وهو ده اللي عمله ويل سميث في الفيلم كان بيظبط الأسلوب بتاعه كل مره ، يعني بياخد رد الفعل وهو كان عنده سوء حظ كمان بس يعني مش مشكلة بس هو بيطور من نفسه ومن الفكرة ومن طريقة عرض الفكرة في ناس كتيرة اوي انها مش بتعرف تعرض الفكرة صح
عمر: الحاجة جوه دماغه كويسة جداً بس لما بيطلعها
ماري: فـ آه شوفت نماذج كتير وكل الناس مؤمنين بالفكرة ممكن بس مش عايزين يحطوا معاهم فلوس
عمر: يعني معنى كده إن الرفض ملهوش علاقة، يعني أنا لو روحت الحضانة أو روحت لمستثمر ملاك أو أي حاجه وقالي لأ ده مش معناها ان انا
ماري: بس تاني لو كل الناس قالتلك لأ يبقى في حاجه غلط
عمر: أنا قصدي ان مش معناها انك تبطل أو توقف تطور
ماري: لأ بس خد أسباب الرفض ، يعني انا ديماً بقول لأي رائد أعمال أتقاله لأ اسأل الشخص اللي قالك لأ لأ ليه ، أرجوك من فضلك ساعدني وقولي انت رافض ليه ، متاخدش الـ لأ وتمشي في ناس بتضايق أوي وبتاخد الـ لأ وتمشي لأ أفهم الـ لأ دي ليه واشتغل عليها ، لو الناس كلها قالتلك نفس الـ لأ يبقى في حاجه غلط
يعني أنا الشخص اللي كلمني على موضوع الشركة بتاعت الكلاب هو مش قابل اننا بقوله ان السوق ده صغير بس هو غالباً كذا حد هيقوله نفس الموضوع لأن السوق صغير فعلاً
عمر: آه دي حقيقة
ماري: ده مش تحيز ، او سبب رفض مش من لا شيء
عمر: انت عندك دولة فيها 100 مليون اللي هيستخدموا الخدمة دي مثلاً 10000 / 15000 من السوق كله
16:16
طيب النجاح ، هو إيه؟ إن الشركة تعمل فلوس؟ إن الشركة تعمل تخارج؟ يعني هل الموضوع مادي بس؟ من خبرتك يعني كمديرة صندوق هل احنا كلنا قايمين على النظام الرأسمالي رائد الأعمال لازم يعمل فلوس والمستثمر لازم يعمل فلوس؟ إيه النجاح ، ومش لازم يبقى حاجه كليشيه ، يعني النجاح بجد شيفاه إيه من وجهة نظرك الشخصية مش عايز من وجهة نظر المجال؟
ماري: من وجهة نظري الشخصية ان المشروع الناجح هو اللي بيحل مشكلة حقيقية وبالتالي ليه تأثير اجتماعي إيجابي ، في رد فعل مجتمعي أو في فايدة مجتمعية ده من وجهة نظري
معظم الشركات اللي اشتغلت عليها وناجحة جداً حتى هذا اليوم هي شركات بتحل مشكلة حقيقية وبالتالي ليها فوائد وجوانب مميزة إيجابية إجتماعية
في ناس بتعمل فلوس طبعاً من شركات مش بتضيف أي فايدة اتكلمنا عن واحدة قبل الحلقة هي شركة ناجحة وبتعمل فلوس ، عماله بتلم جولات وتقييمات عالية وبتنجح تمام بس اللي عايزة اقولهولك إن الجانب الإيجابي في الكلام ده ان كمية الصناديق العالمية اللي عايزة تستثمر في شركات ومشاريع ليها جوانب مجتمعية مش أي استثمار وخلاص فأنا مبسوطة إن ده نوع الفلوس اللي بتستثمر دلوقتي في الصناديق وبالتالي الصناديق بتستثمرها في المشاريع
17:50
عمر: آخر سؤال كمديرة صندوق ، أنا اسف طولت عليكي في هذه الفقرة .. السؤال ده يمكن شوية شخصي ممكن تجاوبي عليه وممكن متجاوبيش .. هل هو ده اللى انتى عايزة تعمليه باقية حياتك؟ هل انتي عايزة تكملي في المجال ده؟ وممكن على فكرة الإجابة تتغير بعد بكرة الصبح يعني لا تلزمك بأي حاجه بس كمجال انتي بتحبيه يعني تقدري تقولي هو ده اللي أنا عايزة أكمل فيه؟
ماري: آه 1000% ، انا شخصية عاطفية جداً ومش هشتغل حاجه الا لو فعلاً بتبسطني والشغلانة دي من أول يوم اشتغلتها فيها حسيت ان الواحد بيعمل حاجة مفيدة وده بيخلي الواحد يحس انه مش بس بيشتغل عشان أخلي الناس الغنية غنية أكتر أنا بساعد شباب بيعملوا مشروع مفيد للمجتمع ، بيخلق فرص عمل ، بيضيف فايدة للمجتمع فتحس ان الشغلانة ليها معنى فأنا حبيت الشغلانة دي جداً وبالتالي عايزة إن شاء الله أكمل فيها يعني
19:03
عمر: تمام، هروح لآخر فقرة النهاردة - المستثمر
ماري: اللي بيستثمر بقى في الصندوق
عمر: آه سموه مستثمر ملاك بقى واحد أو مجموعة .. يعني خلينا نقول مين المستثمرين؟ مستثمر لوحده ، مستثمرين مع بعض ، ناس حطوا فلوس في صندوق .. يعني كلميني على مين المستثمرين؟
ماري: لو اتكلمنا على الأسواق العالمية عشان هما سابقنا بكتير أوي في مجال رأس المال المخاطر ، الجزء الأكبر حكومات لأن زي ما قولنا ده رأس مال مخاطر فاللي يقدروا ياخدوا المخاطرة الأكبر هي الحكومات وعشان الموضوع ده هدفه تنموي انا عايز احط فلوس في رواد الأعمال عشان دول هيعملولي ابتكار ، هيخلقوا فرص عمل ، هيعملوا شركات في المجتمع وهكذا فديماً المستثمر الأكبر عالمياً كانت الحكومات ، لما الحكومة بتدخل بتقل ، القطاع الخاص بيتشجع فبيدخل معاها
الحاجه اللي أنا نفسي نعملها في مصر لسه معملتهاش انه بيبقى فى بقى فوايد كتير للشركات او للافراد اللي بيستثمروا في المجال ده فبياخدوا مثلاً خصومات على الضرايب بتاعتهم بيستفيدوا من أنهم استثمروا عشان يشجعوا المؤسسات والأشخاص انهم يستثمروا
عمر: يعني عمر تعالى مثلاً استثمر في مشروع تحلية المياه مثلاً وخد خصم في ضرايبك فبتقللي كده المخاطرة على نفسي أنا كمحفظتي أنا
ماري: بالظبط، نفس الشيء حصل في مصر كان في صناديق دخلت من الحكومة + القطاع الخاص بصراحة يعني شركة زي "فلات 6 لابز" كانت رائدة في المجال ده مع انها شركة قطاع خاص وبدأت بأموال المستثمرين نفسهم أصحاب الشركة وبعدين لما أثبتت ان ده مجال مهم بدأت تجتذب رؤوس أموال من بره ومن جوه يعني في مؤسسات حكومية في مصر دخلت في مؤسسات من بره دخلت في مستثمرين أشخاص بشركاتهم دخلوا كل اللي بيسموهم وكالات التنمية العالمية زي البنك الدولي اللي هي بيسموها القطاع الاستثماري الخاص للحكومات دي بتستثمر دلوقتي في صناديق سيادية بتاعة أوروبا ، بتاعة أمريكا ، بتاعة الخليج كله بقى بيستثمر مع الصناديق وكلها بيبقى عندها جزء تنموي هي طبعاً بتبقى عاوزة عوائد على الاستثمار وكل حاجة بس الهدف الأساسي تنموي
عمر: تمام، المستثمر ده على الشكل المؤسسي عاوزك برضه تكلميني عن المستثمر الملاك اللي هو الفردي .. مين المستثمر الفردي ده؟
ماري: بص الفرد ده لو اتكلمنا على بره يعني في الأنظمة اللي سبقانه بكتير قوي المستثمر الملاك ده بدأ ان هو اصلا رائد أعمال عمل شركة ناجحة وباعها ومن العائد اللي هو عمله الكبير ده بدأ يستثمر تاني في الشركات وعلشان كده هو اسمه نظام بيئي معناه انه حاجه بتغذي نفسها
انما في مصر عشان احنا مكنش عندنا الفكرة دي مكنش لسه عندنا شركات نجحت واتباعت ورواد الأعمال عملوا فلوس بدأت بأشخاص في مجالات تقليدية مش شرط انها فيها تكنولوجيا بس متحمسين جدا لقطاع التكنولوجيا وشايفين فيه فرصه كويسه وتحمسوا لمجموعه شباب فبيبداوا يستثمروا معاهم ، تطور الموضوع انه بقى في مجموعة من الناس دي بقى لموا بعض وقالوا نعملها غير متناسقة شويه
عمر: عملوا زي نادي كده او عارفه المجموعة الفكرية اللي بتقرأ قصائد مش عارفه ايه بس عملوها نفس الكلام على استثمارات
ماري: بالظبط ، والاهم من انه ملاك ان هو بيبقى هو بيبقى مُرشِد ، هو بيساعد رائد الأعمال في الرحلة بتاعته وبيديله من خبرته ومن وقته ، كل الرشدين اللي كانوا بيشتغلوا معانا دايما بيشتغلوا من غير اي مقابل هو عاوز يدي ، يرجع المجتمع ، عايز يساعد وبيلاقي الموضوع حتى زي ما انا زي ما انا حسيت ان في فايده من اللي انا بعمله فهو بيبقى مبسوط ان هو بيدي من وقته وخبرته لمجموعة العمل دول عشان يساعدهم في المشروع بتاعهم
في منهم بيقعد يشتغل معاهم سنه وبعد سنه يستثمر يعني هو ارتاح للفريق والفريق ارتاح مع ارتاح له وشاف ان فعلا الدنيا ماشيه والمشروع ناجح هيستثمر معاهم
23:30
عمر: هل برضه الناس دي بتخش في مجالس الإدارات بتاعة الشركات؟ ولا مجلس الإدارة بتبقى مرحلة متأخرة؟
ماري: يعني حسب القانون في مصر مش بيلزم أوي بوجود مجلس إدارة رسمي وكده لو هي شركة مسؤولية محدودة مبيبقاش ليها مجلس إدارة بس تاني هي بترجع لشروط التعاقد يعني
عمر: وانتو بتتعاقدوا معاهم
ماري: بالظبط ، بس هو الأهم من أنه عضو مجلس إدارة انه يبقى متاح وبيدي من وقته وخبرته لرواد الأعمال لأن هو ده اللي هما محتاجينه الموضوع بقى انه يبقى بشكل رسمي بيبقى في شركة مساهمة مثلاً وليها مجلس إدارة وكده ده بقى بالاتفاق ، بس في رأيي انا لازم يفضل القرار النهائي للمؤسسين
عمر: المؤسس هو اللي بيبقى عارف
ماري: أو مجموعة المؤسسين يعني بيبقوا 2 أو 3 هما دول اللي بيبقى في أيدهم القرار
24:27
عمر: في يوم من الأيام ممكن تبقى انتي مستثمر ملاك يعني انتي شخصياً تحبي تستثمر بشكل مباشر في الشركات ولا بتفكري في الصندوق اشتري مجموعة من الشركات مجمعة في حاجة واحدة أحسن .. يعني كلمينا عن الحتة دي لو انا مستثمر وعندي إمكانية اني اروح استثمر في الشركتين تلاتة دول ولا أروح اشتري في صندوق عنده مجموعة من الأفكار؟
ماري: هي بتفرق حسب حاجتين حسب انت حابب تحط استثمار قد إيه لأن جزء كبير من الصناديق هيبقى بيتطلب انك تحط رقم كبير شوية فده هيبقى اصعب شوية بس انت لو شخص تقدر تدي من وقتك أو تخصص جزء من وقتك انك تبحث وتدرس الشركات وتتكلم مع رواد الأعمال فتقدر تعملها لوحدك تقدر تعمل لنفسك محفظة انت لازم تستثمر في عدد من الشركات مش في شركة واحدة أو اتنين لو انت عايز تقلل المخاطرة بتاعتك
لو انت مش هتقدر تحط فلوس في صندوق كبير ومش هتقدر تعملها لوحدك يبقى لازم تروح لمجموعة من اللي اتكلمنا عليهم مجموعة الملاك اللي هي النوادي يعني لو اعتبرناها نادي لأن دول هيبقى عندهم حد بيقوم بالنيابة عنك بالفلترة وتوضيب العملية
عمر: وهو ده مدير الصندوق بقى في الموضوع وهما كلهم اللجنة
ماري: بالظبط، وانت في الآخر القرار برضه في أيدك هتستثمر في إيه أو على الأقل انت بتثق في المجموعة اللي بتاخد القرار بالنيابة عنك فأنت كده حطيت الفلوس اللي عايز تحطها ووزعت المخاطرة بتاعتك على عدد من الشركات إلا إذا أنت قادر تخصص الوقت والمجهود انك تعمل القصة دي لوحدك
26:17
عمر: أنا لو قعدت 10 ساعات أنا ممكن أقعد اسألك اسئلة ، بجد والله اصل هو موضوع لطيف وزي ما قولتلك قبل ما نسجل الميزة انك بتلمسي حياة الناس ، الميزة انك بتشوفي تجارب وبتعيشي معاهم احنا في الأسهم المدرجة الموضوع غلس جداً يعني مش لذيذ الشركات وصلت لمراحل معينة متقدمة ، بنك مثلاً أو شركة استثمارية اياً كان بقى فدي فيها آلاف من الموظفين مفيش الروح بتاعة تحقيق الحلم بتاع رائد الأعمال فده هيخليني أقعد اسألك 500 سؤال والوقت محدود ، أعتقد احنا غطينا حاجات كتير يعني وعلى فكرة ماري ماخدتش الأسئلة قبل الحلقة متعرفش انا هسألها في إيه كل الحاجات دي مسجلة مرة واحدة مفيش تجهيز وانا بحب الطريقة دي أكتر.. في اسئلة مسألتهالكيش كنتي متوقعة اننا ممكن أسألهاك ، أو في سؤال حلو كنت ممكن اسئلة ونسيته عشان أنا اصلاً معرفش انا محاور كويس ولا لأ
ماري: محاور هايل ، بص أعتقد السؤال اللي مسألتهوش هو لو أنا رائد أعمال وبفكر في فكرة إيه المجالات
عمر: السخنة ، حلو جداً
ماري: أنا مبحبش أجري ورا التريند ، الناس كلها بتستثمر في التكنولوجيا المالية يبقى أنا هستثمر في التكنولوجيا المالية لأ أنا بحب اشوف أكبر مشكلة فين وعايزة أحلها وهل ده الفريق اللي هيعرف يحلها ولا لأ يعني برضه رجوعاً لحتة التنفيذ بس يعني بلدنا فيها قطاعات كتيرة أوي فيها مشاكل وعاوزة حلول مبتكرة ، انا بشوف مثلاً قطاع الرعاية الصحية محتاج شغل كتير اوي
الجزء بتاع اي حاجة متعلقة بالتوزيع اللوجستي ده قطاع كبير جداً في شغل كتير اوي واحنا ماشاء الله بلد كبيرة فيها ناس كتيرة أوي طول النهار في حركة بضاعة فأنا شخصياً بحب القطاع ده
والتعليم التكنولوجي حاجه برضه اتحركت جامد اوي وقت الكورونا لما ولادنا كلهم قعدوا في البيت والناس بقت عايزة تتعلم أونلاين ففي شغل كتير برضه في المجال ده بس أهم حاجة انك تلاقي فكرة انت متحمسلها وشايف فيها احتمال كبير
عمر: مش قادر اشكرك ، بجد والله العظيم مش عارف أقولك قد ايه أنا مبسوط ، قد إيه أنا اتعلمت منك النهاردة ويارب كل الناس اللي بتسمعنا تتعلم المعلومة دي لأن محستش انها سهلة تتفهم يعني الناس بتستخدم الكلام بس لازم الواحد يقعد يعمل بحث كويس عشان يفهم الكلام ده كله فأعتقد ان الحلقة دي هتبقى مرجع لأي حد عايز يفهم المجال ده اتمنى يعني .. ميرسي جداً جداً على وقتك يا ماري والله مش عارف أقولك إيه وانك كمان جيتي هنا شرفتيني ومرسي جداً جداً
ماري: ميرسي جداً يا عمر ، اتبسطت جداً ، وهكون مبسوطة أكتر لو كان في أسئلة أكتر ونعمل حلقة تانية لو الناس مهتمه بالموضوع ده
عمر: أكيد أكيد هتيجي معانا تاني ، وبرضه لو عايزة ممكن نسيب في الشو نوتس بتاعة الحلقة الناس ممكن توصلك فين على لينكدإن أو حاجة
ماري: أكيد
عمر: وبجد شكراً جداً وهتبقى معانا تاني بإذن الله
ماري: إن شاء الله ، ميرسي يا عمر جداً
Translation of some words and terms:
Fund Manager مدير الصندوق
criteria معايير
Team فريق
Basic اساسيه
Model نموذج
Mandate تفويض
coachable قابل للتدريب
One of our partners واحدة من شركائنا
Technology التكنولوجيا
Sales المبيعات
domain expertise خبرة المجال
Overlap التداخل
Knowhow المعرفة
Shortfalls النقص
Ideally مثالي
Reflect يعكس
Potential الإمكانية
Market size حجم السوق
Sectors قطاعات
Heartbreaking حسرة
Bias تحيز
Frustration إحباط
Global Search بحث عالمي
Localized محلي
Net Present Value صافي القيمة الحالية
early revenue الإيرادات المبكرة
B2C= Business to Consumer من شركة إلى مستهلك
B2B = Business to Business من شركة إلى شركة
Give Up يستسلم
Entrepreneur رائد الأعمال
Right Off إيقاف على الفور
Triggers محفزات
Animal instinct غريزة الحيوان
Involve اشراك
Dynamics القوى المحركة
The Committee اللجنة
External خارجي
Industry الصناعة
Pursuit of Happiness السعي وراء السعادة
Patch تصحيح
Approach نهج
Positive social impact التأثير الاجتماعي الإيجابي
Roundsجولات
evaluation تقييمات
Passionate عاطفي
development Agencies وكالات التنمية
Ecosystem نظام بيئي
Traditional تقليدية
Inconsistent غير متناسقه
Mentor مُرشِد
Board مجلس الإدارة
Formalized رسمي
Logistic distribution التوزيع اللوجستي
Education Technology التعليم التكنولوجي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #رأس_المال_المخاطر #الجزء_الثاني