89. الجزء الاول - FMCG رحلة داخل قطاع الـ
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة رحلة جديدة مع ضيف جديد وصديق عزيز في كلام ينور أدهم السيد ، أدهم من الناس المعروفه في وسط السلع الاستهلاكية سريعة النمو ومفيش أحسن منه FMCGs يساعدنا نعرف أكتر عن عالم مهم زي الـ
Mondelēz International أدهم السيد هو مدير المبيعات في شركة
GUC - حاصل على بكالوريوس إدارة الأعمال
خبرة 16 سنة في مجال التسويق والمبيعات والتسويق التجاري وإدارة العلامات التجارية وتخطيط الأعمال في مصر ودول مجلس التعاون لدول الخليج العربية وشمال إفريقيا
Adham Elsayed @LinkedIn : تقدروا تتابعوا أدهم من هنا
02:23 عرفنا بنفسك الأول عشان الناس تعرفك أكتر -
04:15 هل في صعوبات في قطاع الـ (إف إم سي جي) بتشوفها مكرره في جميع الشركات؟ -
06:08 ازاي بتختاروا المنتج وإيه الدراسات الأولية أو الأرقام اللي بتبصوا عليها عشان تحقق الربحية؟ -
10:36 ازاي بتقيس التريند؟ ومين اللي بيديك البيانات؟ -
12:50 كلمني على فترة الكورونا عملت إيه في قطاع الـ (إف إم سي جي)؟ -
17:20 لو حد بيسمعنا في الجامعة أو عايز يخش المجال ده تنصحه بإيه؟ -
20:44 تفتكر الصناعة دي شكلها هيكون عامل ازاي بعد 5 أو 10 سنين ؟ -
24:40 ازاي التكنولوجيا بتساعدك في قرار التصنيع نفسه؟ -
الاسبوع الجاي هنكمل كلامنا مع أدهم في الجزء التاني .. انتظرونا
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور ، النهاردة أنا معايا صديق من أصدقاء الطفولة أدهم السيد ، أدهم هو مدير عام مبيعات في شركة من الشركات متعددة FMCG = Fast-Moving Consumer Goods الجنسيات اللي بتشتغل في السلع الاستهلاكية سريعة النمو
ودي حاجه أنا لسه عارفها النهاردة أنا عارف المصطلح ده من زمان ، أدهم هيكلمنا بقى إيه هو عالم الـ (إف إم سي جي) يعني أنا أعرفه من زمان بس عمرنا ما أتكلمنا فنياً أوي في شغله فالنهاردة فرصه مع الناس نسمع إيه هو المجال ده ، الناس اللي عايزة تبتدي في المجال ده أو بتفكر تخش المجال ده أعتقد مفيش أحسن من أدهم يساعدنا في المعرفه
01:36
عمر: فأول حاجه برحب بيك يا أدهم وشكراً جداً على وقتك النهاردة
أدهم: مرسي يا عمر ومبسوط اني معاك في كلام ينور انت عارف انا من مشجعي عمر ومن مشجعي البرنامج من زمان فمبسوط أوي انك جبتني معاك النهاردة
عمر: ربنا يخليك يا أدهم والله أنا سعيد جداً ، احنا اشتغلنا مع بعض كده في فترات متقطعة زمان في حاجات مختلفة بس طبعاً انا روحت المجال بتاعي اللي هو المجال المالي وانت في المجال بتاعك من الناس اللي ديماً معروفه في الوسط بتاع (إف إم سي جي) فأنا حبيت يعني انقل التجربة بتاعتك دي للناس اللي بيسمعونا خاصة ان كل حاجه مرتبطة بالمجال المالي سواء شغل أو انت راجل مدير بتفكر ازاي في الأرقام بتفكر ازاي في شركتك
02:23
الأول عايزك تعرفني بنفسك الأول عشان الناس تعرفك أكتر
أدهم: أنا أدهم السيد زي حالاتك من إسكندرية ، أنا دخلت الـ (إف إم سي جي) ازاي؟ أنا كنت شاب عايش في إسكندرية وفي إسكندرية انت عارف يعني إن الأختيارات ديماً كانت محدودة ، بس من واحنا في المدرسة أنا كان عندي شوية شغف إني اقرأ في البيزنيس بداية من مادة الإقتصاد اللي اخدناها في الثانوية العامة وبعدين بدأت اجيب شوية كتب في التسويق وفي المبيعات اقرأ وكنت محدد من وانا في ثانوية عامة اني مش هخش علمي رياضة مش هخش علمي علوم مشيت ورا واحد صاحبي اسمه عمر ودخلت علمي متأدب فمبقاش عندي أختيار غير كلية التجارة بس أنا كنت حابب أقفل كل الأختيارات لأني كنت حابب اخش تجارة
وكواحد عايش في إسكندرية عايز تشتغل في البيزنس وفالتسويق شركة الـ إف إم سي جي المحترمة الوحيدة اللي كانت عندنا في إسكندرية هي يونيليفر ، أبتديت حياتي في شركة يونيليفر واشتغلت في شركات كتير منهم يونيليفر ، المراعي ، أمريكانا ، أنا دلوقتي بشتغل في شركة اسمها موندليز اللي هي بتعمل شيكولاتة كادبري ، بسكويت أوريو ، لبان كلورتس ، عصير تانج
ربنا كرمني وكنت محظوظ برضه اني اشتغلت مبيعات واشتغل تسويق واشتغلت حاجه بيسموها دلوقتي التسويق التجاري اللي هو تخطيط تجاري أكتر ، أشتغلت تصدير ، أشتغلت في مصر أشتغلت في دول الخليج كلها تقريباً ، في بلاد الشام ، في العراق فعندي خبرات الحمدلله كويسه
اشتغلت في شركات محلية لسه بتبتدي ، واشتغلت في شركات إقليمية زي المراعي وأمريكانا ، أشتغلت في شركات متعددة الجنسيات زي يونيليفر وموندليز فشوفت كل المقاسات وكل الألوان وكل الأشكال وكل الفئات المختلفة ، حاجات بتتشرب وحاجات بتتاكل وحاجات بنستخدمها في النظافة الشخصية وحاجات بنغسل بيها هدومنا وبنغسل بيها الأطباق فالحمدلله يعني 16 ، 17 سنة اللي فاتوا كان ربنا كرمني بخبرات كويسه من خلال المدارس المختلفة بتاعة الـ (إف إم سي جي)
04:15
عمر: طيب بما إنك شوفت الحاجات دي ، هل في حاجه مشتركة ، تحديات أو صعوبات معينة في العالم بتاع الـ (إف إم سي جي) من وجهة نظرك بتشوفها مكرره في جميع أنواع الشركات؟
أدهم: طبعاً أول حاجه مكرره هي إزاي تدير أرباحك وخسايرك لأن في الأخر الـ (إف إم سي جي) هي لعبة توازن ما بين انت عايز تبيع كمية قد إيه ، هتكلفهم قد إيه عشان تنتجهم ، هتسعرهم بقد إيه ولو سعرت كتير الكمية هتقل ، ولو سعرت قليل الكمية هتزيد بس الربحية هتقل فزي ما بنقول هي لعبة توازن ما بين تكلفة اللي بتنتجه ، سعر اللي بتنتجه والكمية المترتب عليها التكلفة والسعر عشان توصل لأحسن إنتاجية من خطوط إنتاجك وعربيات توزيعك وحملات تسويقك
والـ (إف إم سي جي) بعض النظر انت بتبيع شامبو ولا زيت وسمنة القصة هنا فين أعلى سعر بأقل تكلفة يحققلي أعلى كمية ده موضوع ، الموضوع التاني الحاجه الثابتة الوحيدة اللي شوفتها إن الدنيا بتتغير ، ذوق الناس بيتغير ، الإتجاهات بتتغير ، التضخم والإنكماش الاقتصادي اللي احنا عايشين فيه يمكن من 2011 لحد النهاردة بيتغير ، النهاردة حد كان ممكن يكون بيجيب حاجه معينة بيضطر يجيب حاجه أرخص او أصغر أو مبيجبهاش خالص بيعتبر إن الفئة دي هو هيبطل يشتريها لأنه بيقنن مشترياته وبيدير النفقات بتاعته
انت هتعمل إيه كـ (إف إم سي جي) في ظل المتغيرات دي كلها ، في ظل انك محتاج توازن القيمة مع السعر مع التكلفة عشان تحقق ربحية مش بس النهاردة السنين الجاية كمان
دي حاجه مشتركة ما بين أي (إف إم سي جي) في مصر في السعودية في الخليج بتبيع مستحضرات التجميل أو بتبيع زيت وسمنة ، شركة محلية أو متعددة الجنسيات هو ده قلب الموضوع
06:08
عمر: طب تعالى ناخد خطوة لورا ، أنت النهاردة هتجيب منتج جديد أو سلعة جديدة ، الطريقة اللي بتشتغلوا بيها أنا مستعد أجيب أي منتج المستهلك بيستهلكه ، ازاي اصلاً بتختاروا المنتج وإيه الدراسات الأولية اللي بتبصوا عليها أو الأرقام اللي انتو بتدوروا عليها عشان تحقق الربحية بتاعتك؟ يعني انا ممكن أقولك في 50 ألف فكرة جميلة أنت ممكن تجيبها كشركة أنت ازاي بتختار؟
أدهم: أنا بس هعلق على جملة صغيرة أنت قولتها يا عمر إن (إف إم سي جي) مستعدين نجيب أي منتج لو المستهلك عايزه ، الجملة دي في جزء منها صح وفي جزء منها غير دقيق الجزء الغير دقيق إن الشركة لازم يكون عندها صلب للعمل يعني لما تيجي تبص على المراعي وخصوصاً في السعودية اساس شغل المراعي في مزرعة بيشتغلوا في اللحوم ، في الألبان ، في الزبادي ، في الخضراوات ، في الفاكهة أي حاجه بتطلع من المزرعة فـ لو المستهلك عايز صابونة جديدة فهما مش مهتمين بده ومش هيعملوا صابون ، جهينة نفس الكلام
يونيليفر مثلاً شركة بتتكلم عن العناية الشخصية فأي حاجه تتعلق بالعناية الشخصية حتى احنا شوفنا مؤخراً كان عندهم شاي باعوه وتخلصوا منه لأنهم عاوزين يفضلوا في صلب العمل بتاعهم اللي هو أي حاجه بنشوفها جوه الحمام وده قانون حاكم عشان الشركات متتوسعش في كل حته يمين وشمال الهوية بتاعتها
خطوات إطلاق أي منتج جديد أول فكرة هي اننا بنشوف تريند معين ، يا إما تريند جديد يا إما بنشوف تريند كان موجود وأتغير.. هديك مثال كان في تريند إن الناس بتستخدم الصابونة العادية التريند أبتدى يتغير وابتدينا نشوف الناس بتتطور وبتتجه للصابون الجل السائل
شوفنا نفس الكلام في المنظفات بتاعة الهدوم برسيل أو أريال زمان كان بودرة النهاردة بقى في جل فإما في إتجاه بيتغير وبيتطور بسبب التكنولوجيا أو بسبب العولمة أو بسبب أي حاجه ، يا إما في إتجاه جديد بيظهر زي الإتجاه الصحي ، الإتجاه الأخضر ، الاتجاه الخالي من الجلوتين ، إتجاه التحكم في الجزء ، الاتجاه العضوي دي إتجاهات جديدة مكنتش موجودة من 15 أو 20 سنة فاتوا
لما بنحدد الإتجاة الخطوة اللي وراها إننا بنعمل تحجيم للإتجاه ده ، احنا النهاردة شوفنا إن في أتجاه للأكل الصحي ، الناس عايزة تاكل أكل صحي طيب هل الإتجاه ده قوي؟ هل في مساحة كبيرة من الناس بتعمل كده ولا فئة معينة؟ هل هو حاجه مستمرة ؟ هو محل شاورما الناس هتاكل منه شوية وبعدين تسيبه ولا ده حاجه مكملة وواقع جديد
فأولاً حجم الإتجاه ، استمرارية الإتجاه ده وتالت حاجه إقتصاديات الإتجاه ده ، هو أنا لو استجبت للإتجاه ده هكسب ولا هاخسر؟ لأنه ممكن يوديك في حته تعمل ربحية أقل فأنت هتبقى عايز تواجه التريند وتوقفه ، وممكن توديك في حته توديك لربحية أعلى فأنت عايز تروج للإتجاه وتركب عليه بالبلدي
فبعد ما شوفت الإتجاه سواء جديد أو متغير وبعد ما عملتله تحجيم وطلع ضخم والأستمرارية ومربح ببتدي أشتغل على التفكير طيب أنا هنزل بمنتج شكلة إيه؟ حجمه إيه؟ سعره إيه؟ اسمه إيه؟
بعدين نبتدي مرحلة الإمكانية ، هل أنا عندي القدرة لإنتاجه ولا محتاجه co-wired أشارك في إنتاجة؟ يعني هل اقدر أنتجه في مصانعي وأقدر أوزعه في عربياتي ولا لأ محتاج أجيب خطوط أو عربيات أكتر أو عربيات بنوعية مختلفة وده تكلفة ووقت
بناءاً على الحجم والأستمرارية بتاعة الفكرة بنقول آه احنا هناخد الوقت ده وهندفع الفلوس أو لأ فدي مرحلة الإمكانية أو القدرة
بعدين بنخش في مرحلة التنفيذ خلاص بقى منتج نهائي أدي المنتج ، أدي الخط ، أدي التكلفة ، أدي الحمله ، أدي طريقة التوزيع ، وبعدين بنخش بقى فالإطلاق ، وبعدين بنخش في تقييم ما بعد الإطلاق بعد ما عملنا إطلاق النتيجة كانت إيه؟ هل محتاجين نعدل حاجه؟ ولا هنكمل على كده
عادة المراحل دي لو ده حاجه صغيرة يعني أنت عندك عصير بطعم الفراولة وهتنزل واحد بطعم الكوكتيل بتاخد من 3 لـ 6 شهور ، إنما لو هتنزل عصير بدون سكر أو هتنزل عصير بيخسس حاجه جديدة يعني ده غالباً ممكن ياخد 9 شهور لسنة ونص حسب ضخامة التجديد ده
10:36
عمر: لأنك ممكن ميبقاش عندك المعرفة انك تعمله ، طيب أنت قولت كلمة مهمه أوي الإتجاهات ، مين بقى اللي بيقيس الإتجاهات ، مين اللي بيديك البيانات ؟ يعني أنا مثلاً في المجال المالي بيبقى في بورصات بيبقى في هيئات ، بنوك بتطلع أرقام الكلام ده كله أنت النهاردة عشان تقيس الإتجاه ده أعتقد الموضوع أصعب لأنك محتاج حد يلملك البيانات ، ازاي بتقيس الإتجاهات؟
أدهم: بص زمان ولما بقول زمان في العصر اللي احنا فيه ده فده من 5 سنين ، من أكتر من 5 سنين كان الموضوع صعب وكنا بنقعد بقى نشتري تقارير ونخش على مواقع في مصادر يعني في حاجه اسمها واضع الإتجاه ده مصدر بيطلع تقارير على الإتجاهات المختلفة في العالم مهم جداً لأي حد بيشتغل فـ (إف إم سي جي)
في إن انت تبتدي تبص على الدول اللي مسابقاك فاحنا بنقول مثلاً مصر تركيا مسبقاها في إتجاهات فبنبص على تركيا ، تركيا ممكن ألمانيا تبقى مسبقاها ، وألمانيا ممكن أمريكا تكون مسبقاها
فبنبتدي نقعد نبص على بعض ونشوف إيه اللي نجح وإيه اللي فشل لكن مؤخراً وبعد عصر السوشيال ميديا والذكاء الإصطناعي بقت البيانات موجودة ، انت تقدر بمنتهى البساطة تعرف الناس بتدور على إيه ، بتبص على وصفات شكلها إيه ، إيه المقالات اللي بيقروها ، إيه التطبيقات اللي بينزلوها اللي عنده (أي وتش) هل هو مهتم بالأغاني ولا مهتم يشوف كام كالوري في اليوم وعدد الناس دي قد إيه والناس دي قد إيه وسنهم قد إيه وأماكنهم فين فبقى عندنا في الواقع احنا بقينا بنشتكي من كتر البيانات وبقينا النهاردة داخلين في العالم بتاع ازاي ناخد بيانات أقل بس هادفه أكتر
لكن عن تجربة شخصية وخصوصاً في عالمنا العربي الإتجاه بتشوفه في الشارع وفي السوبرماركت وفي الحياة كل يوم ، انت لو دخلت سوبرماركت في دبي او في مصر من 10 سنين كنت بتلاقي الأطعمة الصحية قطاع كده صغير مستخبي في المحل ، النهاردة بقى قسم كبير وبقى في محلات وماركات مبينيه على ده
الشركات المتعددة الجنسيات عندها إمكانية الوصول لبيانات أكتر وأسرع من الشركات المحلية لكن حتى الفروقات دي ابتدت تختفي
12:50
عمر: تمام ، طيب في حاجه مثلاً جت غيرت الواقع اللي احنا عايشين فيه زي جائحة الكورونا اولاً ازاي اثرت على القطاع بشكل عام وهل حصل تغيرات كبيرة في الصناعة بسبب الكورونا سواء من التخطيط بتاعكوا للمنتجات أو اختيارات الناس ، هل أذواق الناس اتغيرت؟ كلمني كده على الفترة بتاعة حدث كبير زي الكورونا عمل إيه فالـ (إف إم سي جي)؟
أدهم: بص الكورونا كانت مفيدة لبعض الـ (إف إم سي جي) وكانت مضره فأنت النهاردة لو بتبيع حاجات الناس بتستخدمها في البيت زيت ، سمن ، سكر ، مكرونات ، أرز فأنت أستفدت لأنك بتبيع كميات أكبر ، الناس النهاردة لو كانت بتاكل وجبة في البيت ووجبتين بره البيت بقوا بياكلوا الـ 3 وجبات في البيت فاستهلاك الغذائي زاد ، لكن لو انت النهاردة لبان ماركة زي الجم لبان هو محدش بيطلب لبان وهو قاعد في البيت في غالب 90% من اللي بيستهلكوا لبان بيشتروه في الشارع الصبح وهما رايحين الشغل ، بيشتروه مع السجاير بس محدش بيستهلك لبان جوه البيت لو أنت أيس كريم في الغالب الناس بتشتريه بره البيت ففي حاجات استفادت وفي حاجات أضرت
الناس اللي أضروا كان عندهم آلية للتأقلم يعني ابتدوا بقى يلعبوا يعملواعبوات لاستهلاك المنازل يعني على سبيل المثال انا الشركة اللي بشتغل فيها عندنا تشوكليت عندنا علامة تجارية اسمها كادبري لما حصلت الجائحة ابتدينا نعمل حملات كبيرة اوي على وصفات تقدر ست البيت أو أياً كان اللي بيطبخ في البيت يستخدم فيها الكادبري تشوكليت فاحنا كنا مدركين ان الناس مش هتروح تشتريها من الكشك ، الناس لازم في المقام الأول عندها انها عايزة تجيب كادبري فهتخش على التجارة الإلكترونية وده اللي حصل وقت الكورونا تطلب كادبري عشان تعمل بانكيك بكادبري تشوكليت فابتدينا نعمل وصفات في هذا المجال
لكن حتى لما الجائحة شبه خلصت والحياة أبتدت ترجع للطبيعي في شوية عادات فضلت مع الناس ، والعادات دي في منها أفاد الـ (إف إم سي جي) زي ما بقولك الاستهلاك المنزلي ، يعني أنا واحد من الناس حتى كبني آدم كمستهلك عايش في مصر بعد الكورونا خروجاتي قلت خلاص استحليت قعدة البيت بقى عندي قعدتي والناس بتجيلي
ففي شوية عادات زادت أو أفادت الـ (إف إم سي جي) وعادات ضرتها لكن عموماً أكتر 3 حاجات اتجاهات سريعة حتى مبقيناش نسميها اتجاه عادة لما كنا بنقول إتجاه يعني حاجه هتاخد من 5 لـ 10 سنين لحد ما نشوفلها تأثير ، في العالم اللي احنا فيه النهاردة ممكن حاجه تظهر النهاردة تشوفلها تأثير أخر السنة
ففي 3 عوامل كبار مأثرين على الـ (إف إم سي جي) أول واحد فيهم هو الصحة وأهمية السعرات الحرارية وطريقة التحكم في أحجام الوجبات يعني من 8 سنين كنا بنقول الكلام ده هيجلنا مصر في 2030 لأ ده بقى موجود النهاردة وبقى مهم
الحاجه التانية الناس اللي سنهم تحت الـ 20 سنة ابتدوا يبقوا هما الغالبية العظمى من المستهلكين في العالم دول أذواقهم ومتطلباتهم مختلفة خالص عن اللي في الـ 30 و40 و50 من عمره ، التغليف اللي بيتجاوبوا معاه مختلف تماماً
هديك مثال لو جبت حد عنده 40 سنة وقولتله التغليف بتاع الشوكولاته دي معمول 100% من مواد معاد تدويرها مش هيفرق معاه بأي حاجه ومش مستعد يدفع جنيه زيادة أو درهم زيادة عشان ياخد العبوة دي ، لكن اللي عنده 18 سنة في غالب مستعد يدفع 15% لـ 20% أكتر عشان ياخد عبوة ممكن إعادة تدويرها وبتحمي الكوكب بتاعنا والوعي بتاع الشباب ده عمال يزيد خصوصاً في عالمنا العربي
طبعاً تالت إتجاه وتاني هو مبقاش إتجاه هو السوشيال ميديا يعني من 5 أو 6 سنين لو كان عندي 10 مليون جنيه كنت هصرف 9 مليون على إعلانات في التلفزيون ومليون أوزعهم على تيك توك ، إنستجرام ، فيسبوك ، يوتيوب النهاردة حرفياً هو العكس لو عندي 10 مليون أنا هصرف مليون على التلفزيون وممكن مصرفهمش خالص والـ 9 كلهم على السوشيال ميديا
17:05
عمر: دي برضه من الحاجات اللي الجائحة سرعتها يعني الناس بقت زي ما انت بتقول زي ما هي قعدت في البيت هي قعدت أونلاين أكتر عدد الساعات اللي بيستهلكوا فيها السوشيال ميديا طبعاً زادت
أدهم: بالظبط
17:20
عمر: طيب بشكل عام لو أنت بتنصح واحد النهاردة لسه جاي المجال وعايز يخش تنصحة بإيه؟ يعني شايف ازاي الناس ممكن تجهز لو حد بيسمعنا من الجامعة أو عايز يغير كارير أو عايز يخش المجال إيه النصيحة الكبيرة اللي بتقولها لحد صغير أو بتقولها لنفسك زمان؟
أدهم: النصيحة الأولانية لأن ناس كتيرة بتبقى عايزة تخش الـ (إف إم سي جي) سواء عايز يبقى مهندس في مصنع أو عايز يشتغل في التسويق أو عايز يشتغل في المبيعات ، بس الناس ساعات بيبقى عندها توقعات إن الـ (إف إم سي جي) هنقعد نبدع فيه ونطلع أفكار لمنتجات ونصنعها وننزلها السوق ونعملها إعلان ، الموضوع شغل زي أي شغل
عشان تنجح في الـ (إف إم سي جي) لازم يكون عندك الاستعداد انك تشتغل زي ما بنقول من البداية للنهاية في كل حاجه ، لازم تفهم تصنيع ، لازم تفهم مخازن ، لازم تفهم حسابات ومالية ، لازم تفهم مبيعات ، لازم تفهم تسويق بغض النظر انت هتشتغل في إيه فيهم مبقناش في الوقت بتاع اننا بشتغل في المصنع ومليش دعوة بالتسويق أو بشتغل في التسويق ومليش دعوة بالمبيعات ، عشان تكبر في الـ (إف إم سي جي) لازم يبقى عقلك مفتوح انك تتحرك ما بين الوظائف المختلفة
الحاجه التانية في في الـ (إف إم سي جي) لو فيها جزء إبداع وشغل مرح واحلام وتمنيات فهو 20% من الموضوع 80% من الموضوع انت فاتح قايمة أرباح وخسائر وبتبص على سعرك وبتبص على تكلفتك وبتبص على مرتباتك وبتبص على تفاصيلك
النصيحة اللي كنت هقولها لنفسي زمان الفهم المالي هو سر النجاح بغض النظر انت بتشتغل إيه جوه الـ (إف إم سي جي) يعني لو انت مدير مصنع لازم تفهم في المالية ، لو انت بتاع تسويق لازم تفهم في المالية لأن بتاع المالية هيجي يكلمك في العائد على الاستثمار وتوزيع الميزانية بتاعتك بالشهر مينفعش تصرف فلوسك كلها في شهر واحد ، لازم تسوق للمنتج اللي بيكسب أكتر من المنتج اللي بيخسر ولو انت بتاع مبيعات نفس الكلام فأنا لو في عنصر مهم إني أضمنلك فيه إنك إن شاء الله تنجح في الـ (إف إم سي جي) إنك تبقى قادر يعني إيه علامة تجارية وتسويق ومبيعات كل ده حلو لكن إنك تربط كل ده بلغة الأرقام هو حقيقي المفتاح بتاع انك تكبر في الـ (إف إم سي جي)
بلاقي ناس تقولي أصل أنا ماليش في الأرقام أنا عايز أشتغل في التسويق هو التسويق أرقام ، انا ماليش في الأرقام عايز أشتغل في المبيعات ، المبيعات أرقام مفيش حاجه مبقتش أرقام
19:52
عمر: وخلي بالك ما البودكاست ده هو انا عايز الناس تفكر بالأرقام يعني قصدي هو هدف الموضوع يعني انا ديماً كنت بقول لو انت مالياً كويس في البيت أنت ممكن بعد كده تنقله في شغلك والعكس لو انت كويس مالياً في الشغل ليه متنقلوش في البيت لميزانيتك الشخصية ، يعني من كلامك كده انت راجل بتدير سواء في المصنع أو بتعمل استراتيجية للشركة فأنت بتبص على ميزانيات فالميزانيات دي حاجه موجودة عندك فالبيت وعندك في الشغل
في كلمة عجبتني فيها اوي دلوقتي كلمة انا ماليش في الأرقام ، الناس أعتقد بتحط في مخها مفهوم اللي هو مش حابب الموضوع فبيقولك من بابه كده أنا مش عايزه يعني رسالة جميلة جداً للي بيبتدي يعني أنا عن نفسي مشجع جداً للي أنت بتقوله ومقتنع بيه جداً
20:44
طيب زي ما بصينا على زمان ، تفتكر بعد 5 أو 10 سنين إيه الحاجه اللي أنت متخيل انها هتعمل تأثير كبير وازاي الصناعة دي هتطور؟ يعني بالمتاح معانا النهاردة طبعاً مش لازم تبقى صح بس من توقعك للصناعة يعني هيبقى شكلها عامل ازاي؟
أدهم: بص طبعاً اللي شوفناه في الذكاء الإصطناعي خصوصاً اخر سنتين تلاته فوق الخيال فأعتقد التكنولوجيا والذكاء الإصطناعي مع الميتافيرس (العالم الإفتراضي) والحاجات اللي عمالين نسمع عنها دي مع الإتجاهات اللي ليها علاقة بإن الناس بقت بتحب تقبل إيه ومتقبلش إيه فيما يتعلق بالصحة وبالمكونات دي جاية منين والتغليف ده جاي منين الـ 3 حاجات دول هيغيروا شكل الصناعة يعني كنت ديماً بقول للفريق عندي انا متأكد 100% ان بعد 10 سنين أي (إف إم سي جي) موجودة في مصر أو العالم ممكن تدار بـ 50 أو 60 % أقل من عدد الناس اللي فيها النهاردة الذكاء الإصطناعي هيساعدك في ده
هديك مثال في عالم المبيعات بنقول كل 6 مناديب ليهم مشرف ، بس لو المشرف ده حطتله تطبيق ذكاء اصطناعي على موبايله تقوله المفروض يعمل إيه كل يوم الـ 6 ممكن يبقوا 10
هديك مثال تاني احنا عندنا جزء مهم أوي في شغلنا اسمه صورة النجاح يعني شكلنا جوه المحلات إيه فأنت المفروض لما تخش كارفور تشوف كادبري بصورة معينة تشوف أوريو بصورة معينة تشوف صنسيلك بصورة معينة مش فوضى كده ، كنا عشان نطمن شكلنا إيه في المحلات بنعين بني أدمين معاهم ورقه وقلم بيعدوا على المحلات في أوقات سرية محدش يعرفها ويدوا نتايج كده والورق ده يتقلب أكسيل شيت ويرجعلنا العملية دي كان فيها عدد بشر لا تتخيله وبتاخد عدد وقت لا تتخيله النهاردة بقى عندنا الإمكانية إن المندوب بتاعنا بيصور المحل عن طريق حاجه اسمها التعرف على الصورة الصورة دي بتروح للذكاء الإصطناعي بيتعرف على منتجاتنا ومنتجات المنافسين ويبتدي يقولنا احنا شكلنا إيه ومحتاجين نتحسن في إيه ولو في منتج ناقص على الرف يقولنا ونطلع طلب ليه اوتوماتيك
دي تكنولوجية موجودة النهاردة في مصر ومطبقة عن طريق 3 أو 4 شركات ومنتشرة جداً في العالم ، التكنولوجيا دي لوحدها هتستبدل 60 / 70 بني أدم في مصر على الأقل طب لو الـ 60 / 70 بني أدم دول احنا كشركة مش قادرين نعمل نمو للأسف هيقعدوا في البيت فمن غير نمو مش هتقدر ، التكنولوجيا حقيقي هتاخد أماكنا بنواجه ده ازاي بالنمو ، النمو هو اللي هيخلي في مكان للتكنولوجية معانا
عمر: فاهم قصدك ، وتقدر توظف الـ 60 / 70 فرد اللي انت كنت هتستخدمهم في الحاجه بضيع وقت وبضيع مصادر تقدر في وظيفة تانية مفيد بشكل أخر
أدهم: بالظبط ، لكن التكنولوجيا يا عمر تقدر تديك بيانات لكن متقدرش تديك فن ، وأنا بشوف ان حركة التوازن انك تعرف تدير العلامة التجارية والتسويق والمبيعات مع الأرباح والخسائر ، أنك تربط المالية مع التسويق مع المبيعات مع الإنتاج مفيش ذكاء اصطناعي هيعمل ده فن ، فن حقيقي
عمر: لأنك بتاخد توقعات على التغيرات في الإتجاهات في المستقبل البيانات النهاردة ممكن متبقاش شيفاها لكن انت خبرتك بالمجال أو بالمكان أو بالدولة بتأثر في الحاجه دي وطبعاً هو الذكاء الإصطناعي مهو في الأخر من صنع الإنسان يعني هي حاجه برضه انت اللي عاملها
أدهم: بالظبط
24:40
عمر: طيب ، هروح لحته تانية كده انت أتكلمت على التكنولوجي بشكل عام وده كان من الاسئلة اللي انا هسألهالك .. هل برضه التكنولوجيا بتفرق في الإ ، الإنتاج بقى انا عايز أنتج قد إيه؟ انت بتستخدم البيانات في ازاي تقيس الإنتاج بتاعك ، أو بتساعدك على إتخاذ القرار لأن انا أعتقد انت بتقول السوق الفلاني عايز يستهلك 100 وحدة ممكن لسبب من الاسباب يستهلك 120 أو يستهلك 80 فأنت في الحالة 80 انت عندك مشكلة وفي الحالة الـ 120 أعتقد برضه عندك مشكلة .. مظبوط؟
أدهم: صحيح
عمر: التكنولوجيا بقى ازاي بتساعدك في القرار بتاع التصنيع نفسه؟
أدهم: برضه حسب لو انت بتتكلم على سوق موجود فيه غير لو سوق انا هخشه لأول مره لو سوق أنا موجود فيه التكنولوجيا بتساعد انها بتعمل حاجه اسمها المرجعية أو قياس
هديك مثال انا النهاردة عندي بسكوت فئة سعر 5 جنيه ببيع منه 15 ألف طن وبستهدف بيه الشباب أو الأطفال لو أنا هنزل منتج شبيه من فئته السعرية أو شبيه في طبيعته أو شبيه من حيث إن اللي هيستهلكه شبه نفس اللي بيستهلك نفس البسكوت أبو 5 جنيه التكنولوجيا بتساعدنا نعمل مرجعية وشوية احتمالات بيبقى في أبحاث بتتعمل بتستخدم التكنولوجيا بتقولك ان المنتج ده بالمواصفات دي للفئة دي من الناس بالسعر ده لو ده 15 ألف طن ده هيبقى 12 ألف طن فطبعاً انت لما بتجيب خط او لما بتعمل اي فكرة جديدة بتبقى عارف ان ممكن افتراضاتك في 20% فوق و20% تحت أكتر من كده بيبقى في خساير ، يا إما خساير فقدان فرصة بيع يا إما خساير تكلفة غير مستغلة
لو سوق جديد بنخشه لأول مره في أساليب كتير جداً في جزء منها بيستخدم التكنولوجيا وجزء لأ ممكن تستخدم التكنولوجيا انك تعمل معيار أو تعمل مرجع على منتج منافس موجود وتعين شركة أبحاث تستخدم التكنولوجيا دي عشان تعمل التدريب ده وفي أنك تعمل وده يمكن اللي بيحصل في أغلب الأوقات انك بتعمل حاجه اسمها إطلاق تجريبي هتقول طيب انا في مصر وعايز اخش سوق الإمارات انا مش هصنع في سوق الإمارات أنا هستورد من مصر حتى لو ده هيكلفني زيادة ويخليني أكسب أقل هفضل أعمل كده لمدة سنة أو اتنين أو تلاته لحد ما أفهم السوق وأعرف الحد الأدني من البيع اللي انا ببيعه في أي يوم وبناءاً على الحد الأدني ده أشوف هل الحد الأدني ده بيبرر اني احط استثمار وأعمل مصنع ولا لأ
طب الحلول إيه؟ ممكن أصنع لدى الغير ، ممكن أروح لمصنع بسكوت موجود في الإمارات وأقوله انا هصنع عندك البسكوت بتاعي وممكن أفضل أستورد من بره ففي تقنيات كتيره جزء منها بستخدم التكنولوجيا وجزء لأ حسب بقى حجم البلد ، حجم الفرصة ، حجم الشركة بتفرق كتير وفي الـ (إف إم سي جي) يا عمر هتسمع كلمة حسب دي كتير أوي لأنك في الأخر بتتعامل مع بشر انت المستهلك بتاعك بني أدم وحسب المنتج وطبيعته بيبقى ديماً في أختيارات وأفتراضات كتيره عشان كده بقولك التكنولوجيا هتغير طريقة شغلنا لكن مش هتستبدل الفطرة السليمة للبني أدم
وبكدا نكون وصلنا لنهاية الجزء الأول من حلقتنا مع أدهم ، من الحلقات المهمه جداً بالنسبالي بصراحة واتبسطت بيها جداً الاسبوع الجاي هنكمل معاه في اسئلة أعتقد مفيدة جداً إن شاء الله اشوفكوا الاسبوع الجاي
Translation of some words and terms:
Sales Director مدير مبيعات
FMCG = Fast-Moving Consumer Goods السلع الاستهلاكية سريعة النمو
Technically من الناحية الفنية
Fans مشجع
Options اختيارات
Passion شغف
Marketing تسويق
Sales مبيعات
Determined محدد
Trade Marketing التسويق التجاري
Commercial Planning التخطيط التجاري
Exposure تعرض
Local محلي
Regional إقليمي
Multinational متعدد الجنسيات
Categories فئات
Across عبر
Common مشترك
Challenge تحدي
Balancing Act قانون الموازنة
Optimization تحسين
Taste ذوق
Trends إتجاهات
Inflation and Deflation التضخم والإنكماش
Manage Expenses إدارى النفقات
Cosmetics مستحضرات التجميل
Product منتج
Core Business صلب العمل
Personal Careعناية شخصية
Guiding Principle المبدأ التوجيهي
Lose خسارة
Identity هوية
Upgrade تطوير
Liquid Gel Soap صابون جل سائل
Due بسبب
Globalization العولمة
Health Trend الإتجاه الصحي
Green Trend الإتجاه الأخضر
Gluten Free Trend الإتجاه الخالي من الجلوتين
Portion Control Trend إتجاه طريقة التحكم في أحجام الوجبات
Organic Trend الاتجاه الطبيعي
Identify تحديد
Sizing تحجيم
Scale قياس
Sustainable مستدام
Economics إقتصاديات
Profitability الربحية
Promote ترويج
Profitable مربح
Ideation التفكير
Capability القدرة
Feasibility قابلية التنفيذ
Final Business Plan خطة العمل النهائية
Campaign حمله
Post Launch Evaluation تقييم ما بعد الإطلاق
Launching إطلاق
Process عملية
Probably على الأرجح
Magnitude ضخامة
Innovationابتكار / تجديد
Dataبيانات
Reports تقارير
Resources مصادر
Trend Setter واضع الاتجاه
Recently مؤخراً
Artificial Intelligence الذكاء الاصطناعي
Recipes وصفات
Applications تطبيقات
Actually في الواقع
Meaningful ذو هدف
Conscious Foods الأطعمة الواعية
Sector قطاع
Section قسم
Brands ماركة / علامة تجارية
Proposition الاقتراح
Access وصول
Pandemic جائحة
Shifts تغير
Industry صناعة
Food Consumption استهلاك الغذاء
Coping Mechanism آلية التأقلم
Packs for Home Consumptions عبوات لاستهلاك المنازل
Top of Mind في المقام الأول
E-Commerce التجارة الإلكترونية
Normal طبيعي
Habits عادات
Impact تأثير
Factors عوامل
Health صحة
Calorie Intake السعرات الحرارية
Packaging تغليف
Recycled Materials مواد معاد تدويرها
Planet كوكب
Literally حرفياً
Whether سواء
Creative مبدع
End-To-End من البداية للنهاية
Open Mind عقل متفتح
Function وظيفة
Playful مرح
Financial Acumen الفهم المالي
Budget ميزانية
By Month بالشهر
Concept مفهوم
Message رسالة
Given إعطاء
Metaverse العالم الافتراضي
Ingredients مكونات
Team فريق
Picture Of Success صورة للنجاح
Score نتيجة
Image Recognition التعرف على الصور
Order طلب
Replace استبدال
At Least على الأقل
Profit and Loss الربح والخسارة
Reference مرجع
Benchmarking معيار
Probability احتمالاً
Researches أبحاث
Assumptions إفتراضات
Exercise تدريب
Pilot Launch إطلاق تجريبي
Base Line حد أدني
Justify يبرر
Common Sense الفطرة السليمة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #السلع_الاستهلاكية_سريعة_النمو