88. ما وراء سعر الصرف
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
سعر الصرف واحد من المواضيع اللي الناس ديماً بتسأل عنها .. ليه في تغيير في سعر العملة ، ليه الدول بتلجأ لأنظمة صرف معينه؟ ليه في عملات قويه وعملات ضعيفه؟
النهاردة بنتكلم على أهم 10 عوامل بتؤثر في سعر الصرف من الناحية الإقتصادية
01:15 أنواع الأنظمة الحكومية للصرف
03:07 قوة الأقتصاد بشكل عام
03:39 التضخم
05:25 الإستقرار السياسي
06:17 الديون الحكومية
08:57 الميزان التجاري
10:11 ميزان المدفوعات
11:06 التوقعات المستقبلية للنمو الإقتصادي
13:00 تقبل العملة
14:11 القيود المالية
15:21 المزاج العام للسوق
16:25 الحروب والأزمات الأقتصادية
كمستثمر لازم تكون عارف إيه مخاطرة سعر الصرف في الدولة اللي أنت بتستثمر فيها لأن ده اللي بيفرق على المدى الطويل في إنتاجية الدولة وفي الإقتصاد بشكل عام
ابعتلولنا على صفحتنا لو شايفين إن في حاجات تانية بتؤثر على سعر الصرف مقولنهاش في الحلقة واستنونا الاسبوع الجاي
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:46
اهلاً بيكوا في حلقة جديدة من بودكاست كلام ينور
النهاردة هنتكلم على موضوع سعر الصرف أو سعر تغيير عملة دولة معينة او دول معينة ، هنتكلم عن المبادئ الأساسية اللي بتأثر في سعر الصرف .. ناس كتير بتسأل على الموضوع ده أنا النهاردة هحاول أتكلم عليها من الناحية الإقتصادية يعني إيه اللي بيحصل بيخلي في تغيير في أسعار الصرف ، ليه دول بتلجأ لأنظمة صرف معينة وهكذا
01:15
الأول عايز أبتدي بأنواع سعر الصرف أو أنواع الأنظمة اللي الحكومات بتتخذها وبعدين هبتدي أخش على العوامل اللي بتأثر سواء بتخلي العملات سعرها بيبقى أقوى أو أضعف وإيه اللي بيخلي الحاجات دي تحصل يعني
01:31
فأول حاجه عايز أقولها إن في إقتصادات معينة بتربط عملتها بحاجه زي الدولار ، هنلاقي مثلاً دول الخليج مجلس التعاون ، الريال السعودي أو الدرهم الإماراتي أو الريال القطري العملات دي مربوطه بسعر الدولار
وهنا السعر مبيبقاش مرن يعني هو سعر ثابت على مدار الزمن بقالهم سنين طويلة سعر الصرف بالنسباله ثابت قصاد الدولار وده يرجع إن الإقتصادات دي بتبقى مربوطه بسعر البترول والبترول عالمياً بيسعر بالدولار والدول دي تعتبر من الدول المصدره لسلعة زي دي فهو معندوش مشكلة انه يربط سعره ديماً بسعر الدولار
في إقتصادات تانية بتعمل أنظمة التعويم أو الأنظمة اللي بتتحرك بناءًا على العرض والطلب وهنتكلم على طول إيه هي الحاجات اللي بتأثر في العرض وإيه الحاجات اللي بتأثر في الطلب ، الأسعار بتطلع وبتنزل بناءًا على العرض والطلب ودي بتبقى دول غالباً معندهاش العامل اللي قولناه في دول مجلس التعاون انها مثلاً مصدره للبترول أو عندها سلعة بتسعر عالمياً بالدولار
02:44
وفي حاجه اللي هي نظام الوسط اللي هو شبه عائم ، هو بيتحرك ولكن كل شوية بيحصل تعويم أو بيحصل قوة في سعر العملة ولكن البنوك المركزية هنا بتبقى هي المتحكمه في السعر
03:00
هنتكلم دلوقتي على العوامل اللي بتأثر في سعر الصرف وبتخليه يا إما سعر قوي ، ثابت ، ضعيف
03:07
أول عامل هو الإقتصاد بشكل عام ، قوة الأقتصاد بشكل عام ودي حاجه بديهية جداً يعني لو جبنا مثلاً 5 دول ، دول إقتصاداتها قوية ودول إقتصاداتها ضعيفة
بنلاقي إن العملات فيها ثبات في الدول اللي إقتصاداتها قوية أو أسعار عملتها بتقوى ودي حاجه بديهية ، هنقسم بعد كده يعني إيه دولة قوية ويعني إيه دولة ضعيفة
فأول نوع هو القوة بتاعة الإقتصاد ودي حاجه بديهية جداً
03:39
تاني حاجه التضخم ، زي ما قولنا قبل كده في الحلقة بتاعة التضخم إن كل دولة بتبقى عايزة يبقى في تضخم ولكن تضخم محدود يعني نقول مثلاً 2 أو 3% في السنة 5% بالكتير أوي في الدول الناشئة ولكن اللي بيحصل إن ساعات التضخم ده بيهرب من السياسة النقدية بتاعة الدولة ، بيبقى في عوامل خارجية بتضغط ، أزمات ، مشاكل بتحصل ، عدم وجود كفاءة في الإدارة بتاعة الإقتصاد فبيحصل عملية التضخم
التضخم هنا معناه إن السلعة بتغلى بسرعة جداً فبالطبيعي إن العملة وقتها بتفقد القوة الشرائية بتاعتها قصاد الدول الأخرى وهنا أنا بتكلم على سعر الصرف مش قدام عملة واحدة زي الدولار مثلاً لأ أنا بتكلم على سعر الصرف قدام العملات بالكامل ، أنا بتكلم هنا انك ممكن تخسر القوة الشرائية بتاعتك قصاد الدولار واليورو والإسترليني والين وكل العملات الأخرى في الحالة دي
لما التضخم بتاعك بيخرج بره المستويات الطبيعية ده بيبقى أول وأخطر ومن أهم العوامل اللي الدول لازم تاخد بالها منها .. أنها تسيطر على التضخم
وهنا بيحاولوا يسيطروا على التضخم بأدوات مختلفة ، السياسات النقدية بتاعتهم بتتغير بيرفع الفوايد عشان يمتص السيولة الزيادة اللي جوه الإقتصاد أو أياً كان الأدوات اللي بيعملها سواء بيفرض ضرايب جديدة أو بيعمل سياسات حكومية عشان تشجع قطاعات معينة انها تهدي التضخم ، تدي مثلاً تسهيلات للإستيراد أو أياً كان السياسات اللي الحكومات بتعملها
فتاني حاجه هنا التضخم وده من أهم الحاجات فأنت لو عايز تاخد بالك وتشوف عملتك فيها مشكلة ولا لأ لازم ارقام التضخم تبقى متسيطر عليها من جهة الحكومة
05:25
تالت نقطة بتأثر في سعر الصرف إستقرار الدولة من الناحية السياسية يعني الإدارة بتاعة الدولة نفسها بتكون مشجعه للأجانب ، بتستقبل فلوس أجنبيه أو تدخل فلوس بسهولة البلد
الإستقرار السياسي للدولة من أهم الحاجات اللي بتخلي العملات يحصل فيها أرتفاع لأن ده بيخلق طلب على العملة بتاعة الدولة دي من الخارج إن الناس لما بتشوف سياسات الدولة ناجحة ، الدولة بتنمو في حاجات معينة علامات معينة بتقول إن النظام الحاكم ده مفيد للدولة اللي هي فيها فده بيخلق طلب على العملة وده تالت نوع من العوامل وهو الإستقرار السياسي
06:17
رابع حاجه هو الديون الحكومية أو الدين العام ، كل دولة بيبقى عندها ديون دي حاجه طبيعية بنلاقي دول كبيرة جداً ومتقدمة عندها ديون كبيرة جداً وخاصة مثلاً أمريكا بنلاقي عندها أحجام ديون كبيرة جداً ، فالدين مفهوش مشكلة ولكن الدين ده بيبقى مربوط بإنتاجية الدولة ، تقدر تدفع الدين اللي عليك ولا لأ ، أنت منتج ولا لأ وهكذا
كل الدول اللي عندها ديون عالية أوي زيادة عن اللزوم بتخرج بره المستوى المقبول به من قبل المستثمرين بيضغط على العملة بتاعتها .. بمعنى إيه؟
تخيل أنت شخص ومستلف كتير جداً هنقول مثلاً انت بتعمل في السنة 120 ألف جنيه أو دولار وأنت واخد قرض عليك بـ 400 هنا أنت واخد 3 أضعاف الإنتاج السنوي بتاعك كشخص لو أبتديت تتعسر وأبتديت متعرفش تدفع إيه اللي بيحصل؟ بيبتدي يتعرف عنك في البنوك أو في الناس اللي بتسلفك انه خلي بالك الراجل ده عليه دين كبير بالنسبة للإنتاجية بتاعته أو عليه ديون كبيرة
فطبيعي وبديهي لما تكون دولة هي بتتعامل نفس معاملة الشخص والراجل اللي بيسلفه أو عايز يديله فلوس بعد كده بيبقى عنده مشكلة معاه لأنه مش قادر يدفع أو شايف الرقم الكبير ده مش قادر يدفعه
07:40
برضه الأسباب بتاعة السلف يعني أنا النهاردة بستلف ليه؟ ده جزء كبير جداً من الموافقة غير الحجم بتاعه كمان أن أنت راجل بتعرف تاخد فلوس تستلفها وبتعرف تستثمرها وتطلع عليها عائد
نفس الكلام على الدول فبنلاقي الدول اللي عندها ديون كبير فوق المستوى المسموح بيه عالمياً بنلاقي إن العملات بتاعتها بتضعف وبتضعف بشكل كبير ولكن الراجل اللي معندوش دين أو معندوش مشكلة في الدين سواء داخلي أو خارجي بنلاقي إن العملات بتاعته تعتبر أقوى وسعر الصرف بتاعه بيبقى ثابت وفي طلب على العملة بتاعته أعلى من الراجل اللي عنده دين كبير
08:20
أنا برضه عايز أقول إن الحاجات دي بديهيه جداً يعني هي حاجات مش صعبة أو مش صعبة انها تتفهم ، هي حاجات بديهيه جداً زي ما بتطبق على الفرد في المجتمع العادي في الميزانية بتاعتك في البيت هي هي اللي بتطبق على الحكومة الموضوع مفهوش أسرار أو حاجات مثلاً غريبة بتخلي أسعار الصرف تطلع وتنزل هي حاجات بديهيه
وانت كراجل مسؤول في الحكومة بيبقى عندك ملفات معينه حد مثلاً يبقى مسؤول عن ملف التضخم ، واحد مسؤول عن أسعار الفايدة وهكذا والمجاميع دي بتشتغل انها تعمل السياسة النقدية بتاعة الدولة اللي احنا بنتكلم عليها
08:57
خامس حاجه هنتكلم عليها الميزان التجاري بتاع كل دولة ، والميزان التجاري بتاع كل دولة هو الصافي ما بين الصادرات والواردات ، أنا كدولة لو بصدر أكتر من ما بستورد يعتبر عندي فائض في الميزان التجاري بمعنى اني بصنع حاجات وببعتها بره فباخد مثلاً 100 وبستورد حاجات بـ 80 وطبعاً مع آخر 20 / 30 سنة الإقتصادات فتحت مع بعض بقى في تصدير وإستيراد فبتنتج الحاجه اللي هي متخصصه فيها وبتستورد الحاجه اللي مش عندها
فبنلاقي دول عندها ميزة إقتصادية في إنتاج سلعة معينة فبتركز فيها فبتعمل تصدير وبالعكس بتستورد الحاجات اللي مش عندها فطبعاً من الحاجات اللي بتفرق في كل دولة سعر الصرف بتاعها انها بتعرف تدخل صافي دخل عملة أجنبية فأنا بصدر بـ 100 وبستورد بـ 80 فعندي 20 داخلين كل سنة بيخشوا في الإقتصاد بيروحوا في حتت تانية أقدر أعمل بيهم حاجات آخرى
زي التاجر لما حد بيتاجر ممكن برضه يبقى في حد مسؤول عن الملف التنموي بتاع الصادرات والواردات وده اسمه الميزان التجاري ودي برضه تعتبر من البديهيات اللي أنت لازم تصدر أكتر ما بتستورد
10:11
سادس حاجه هو ميزان المدفوعات وده بيبين صافي دخول البلد ، والدخول دي ممكن من الأستثمارات الأجنبية المباشرة في أصول داخلية جوه الدولة وممكن يكون مصادر أخرى مثلاً زي تحويلات من ناس مقيمين خارج الدولة
والصافي ده بنطرح منه اللي خارج من نفس الدولة اللي هو مثلاً في أجانب بيبيعوا أصول أو مشاريع أو حاجات ، الصافي ده لما بيبقى إيجابي بيعمل جزء كبير من قوة العملة أو بيساعد على قوة العملة والعكس صحيح لما يكون اللي خارج من الدولة أكتر هنا الطلب بيكون أقل من العرض العملة نفسها بتضعف
11:06
سابع نقطة ودي من النقط المهمه جداً جداً في رأيي توقعات النمو الأقتصادي المستقبلي أو الشكل العام للإقتصاد ، توقعات المستثمرين للمستقبل الإقتصادي بتاع الدولة دي لو المستثمرين شايفين إن الدولة دي هيبقى فيها تنمية معينة بأرقام معينة هيبقوا عايزين أو عندهم الفكر انهم يستثمروا في هذه الدولة لأن هنا في فرصة للنمو لو دخلت فلوسي في الدولة دي هتعملي عائد عالي
وفي الأسواق الناشئة زي مجتمعات كتير جداً من الأسواق العربية الحاجز ده بيبقى أعلى شوية كمان لأن أنا لو رايح لدولة متقدمة العائد اللي هطلبه على الاستثمار ده هيبقى أوطى من الأسواق الناشئة ، فالأسواق الناشئة المخاطرة فيها أعلى لأن في حاجات كتير جداً بتحصل متغيره بسرعة في القوانين والكلام ده كله فالمخاطرة بتعتبر أعلى
فلو انا مستثمر وقاعد ببص من بره وشايف عندي 20 / 30 دولة ناشئة عايز استثمر فيهم ولقيت دولة فيها توقعاتي أو المحللين شايفين إنها فيها نمو كبير فده يعتبر من الحاجات اللي بتأثر على الطلب بتاع العملة بتاعتي فكل ما يكون عندي توقعات إقتصادية كويسة أو أنا مستثمرين عندهم شهية للاستثمار في الدولة دي بنلاقي ده تلقائياً بيأثر على سعر الصرف لأن الناس هتبقى عايزة تحط فلوس في هذه الدولة
وأنا بشوفها حاجات مهمه جداً زي الاستثمار في الأسهم برضه لما انت بتبقى شايف شركة أدائها كويس والمستقبل بتاعها كمان كويس انا هنا كمان ممكن أقول انا عايز احط فيها فلوس اكتر أو استثمر فيها أكتر فبنفس الفكرة المستثمر اللي قاعد بره بيبقى عايز يستثمر في هذه الدولة ودي من الحاجات اللي بتأثر على سعر الصرف
13:00
تامن نقطة حتة أنا أقدر أغير عملتي بسهولة ولا لأ؟ هل العملة دي مقبولة الدفع في دول كتير ولا لأ؟
يعني لو مسكنا مثلاً حاجه زي الدولار هنلاقي إن الدولار أكتر عملة الناس بتقبل تاخدها في أي تجارة سواء جوه أمريكا نفسها أو عالمياً وبعدين هننزل مثلاً على العملات زي اليورو والاسترليني والين والفرنك السويسري بيجوا مثلاً في المرتبة التانية وبعدين نخش على عملات الدول الناشئة
فكل ما العملة بتصعد هذا السلم من التقبل كل ما بنلاقي إن العملة دي مستقرة ، مش معناها انها عملة قوية يعني في فترات كتيرة اوي بنلاقي إن الدولار ضعيف قصاد العملات الأخرى وفي فترات العكس ولكن أنا بتكلم على المدى الطويل
التقبل بتاع العملة ده من اسباب الثبات بتاعها ، فكل ما العملة بتاعتك بقت مستقرة كل ما تكون مقبولة في كل حتة والعكس صحيح ، وبنلاقي مثلاً برضه نرجع تاني لدول مجلس التعاون انها مربوطة بالدولار فديماً في حد بيقبلها منك كمثال يعني
14:11
تاسع نقطة هنا وهي عكس النقطة اللي قبليها وهي حاجه اسمها القيود المالية ، القيود المالية دي ممكن دولة تصحى الصبح كده تقولك أنا مش هقدر أحولك عملتك للعملات الاخرى وللأسف لما ده بيحصل بيدي رسالة سلبية للمستثمرين الخارجيين أو اي حد عايز يتعامل على هذه العملة ان انت النهاردة عندك مخاطرة فإنك تدخل العملة هذه الدولة ومتعرفش تاخدها تاني
فالقيود المالية دي بنشوفها في دول اللي هو مثلاً متقدرش تسحب فلوسك بالعملة الأخرى أو عندك حد معين فاليوم تقدر تاخده وهكذا ومع الأسف ده بيبقى نتيجة لظروف إقتصادية في الدولة مش كويسة وبعدين بينعكس ويدي إشارة وحشه للمستثمر الخارجي وبالعكس هو ممكن يزود المشكلة لأنك هنا بتأثر على الطلب بتاع العملة بتاعتك في المستقبل فالقيود المالية هي عدم حرية حركة رأس المال بتاعك ودي من الحاجات اللي بتأثر جداً على سعر الصرف بتاعك ولما بيبقى في قيود مالية العملة بتضعف أو بتضغط عليها أكتر
15:21
آخر عامل هتكلم عليه النهاردة هو مزاج السوق بشكل عام ، مزاج المستثمر غير التوقعات المستقبلية اللي احنا أتكلمنا عليها قبل كده لأ في مود بشكل عام ، في دولة معينة بتبقى سخنة أو فيها فلوس بتضخ فترة معينة فالمزاج العام إيجابي ، المحللين الماليين عالمياً لما بتقرأ تقارير على هذه الدولة بيبقى إيجابي ، في فترات تانية الدول بيبقى فيها التقارير كلها سلبية او المناخ الأقتصادي العام بتاع الدولة دي سلبي فبالتالي بيأثر على الطلب وبيأثر على سعر العملة وسعر الصرف وبيضعف العملة بشكل عام
مع الأسف الأقتصاد هو مكون من بشر والبشر ديماً عندهم مزاج بيسخنوا على حاجه معينة أو بيبقوا مبسوطين وفي نفس الوقت بنلاقي بالعكس إن في دولة في فترة معينة المزاج العام مش كويس عليها ودي حاجه معروفه التمويل السلوكي ديماً إن في توجَّه في فترات معينة بتحصل هذه الدورات
16:25
احنا أتكملنا هنا على حاجات بديهيه جداً طبعاً في حاجات زي الحروب بتفرق لو دولة فيها حرب بتفرق في سعر الصرف جداً عليها ، أزمات اقتصادية الكلام ده كله بس أنا حبيت أعرّف عوامل كده نقدر نقيسها وتقدر تفتح الميزانية بتاعة البلد زي ما بتفتح ميزانية بتاعة شركة تقدر تشوف ميزان المدفوعات بتاعها على مدار التاريخ ، تقدر تشوف التضخم ، تقدر تشوف سعر العملة قدام التضخم
تقدر تحط الحاجات دي على إكسيل وتعرف بمنتهى البساطة انا لو عندي قائمة مرجعية ما بين 10 أقتصادات معينة فانا بعمل صح على دي صح على دي وسريعاً هعرف سعر الصرف بتاعها المفروض يبقى قوي أو ضعيف
في تقنيات معينة الناس بتستخدمها انها تعرف السعر العادي لسعر الصرف وده مش موضوع الحلقة النهاردة ولكن أنا بس بتكلم على العوامل لو بختار ما بين دول ناشئة وعايز استثمر فيها أنا كمستثمر اجنبي أو واحد قاعد بره هبص على إيه
يعني لو قولتلك تعالى استثمر في 5 دول أفريقيا معرفش عنهم أي حاجه أياً كان اسامي الدول دي هاخد العوامل دي وأبص على الحاجات دي واشوف من ناحية الخطورة إيه الدولة اللي فيها مخاطرة في سعر الصرف وإيه الدولة اللي مفهاش
سعر الصرف هو من المخاطرات الموجودة كتير لازم أنا كمستثمر أكون عارف ما هي مخاطرة سعر الصرف في الدولة وانا بستثمر عشان كده الحكومات ديماً بتعمل سياسات انها تشجع إن سعر الصرف بتاعها يبقى ثابت عشان تجذب المستثمر الأجنبي انه يخش هذه الدولة وده بيفرق على المدى الطويل في الإنتاجية بتاعة الإقتصاد والإقتصاد بشكل عام
17:58
أنا عارف إن الحاجات دي ممكن تكون بديهيه لبعض الناس بس أنا حبيت تاني أحددهم وأوضحهم بطريقة مبسطة على قد ما أقدر لو عندك أو شايف حاجات تانية ممكن تبقى بتأثر في سعر الصرف ممكن برضه نتكلم فيها من خلال الصفحة بتاعتنا دي كانت بداية كده عن الموضوع وإن شاء الله نكمله في حلقات تانية قدام وشكراً جداً جداً على وقتكوا واشوفكوا إن شاء الله الأسبوع الجاي
Translation of some words and terms:
Factors عوامل
Flexible مرن
Floating تعويم
Based On بناءًا على
Semi Floating شبه عائم
Stability ثبات
Inflation التضخم
Efficiency كفاءة
Ranges النطاقات
Political Stability الإستقرار السياسي
Price Appreciation ارتفاع الأسعار
Government Debt الديون الحكومية
Developed المتقدمة
Levels مستويات
The Trade Balance الميزان التجاري
Balance of Payments ميزان المدفوعات
Concept مفهوم
Attract تجذب
Foreign Direct Investment الاستثمار الأجنبي المباشر
Inflows تدفقات
Quarter ربع سنة
Positive إيجابي
Versus مقابل
Expectations توقعات
Future Economic Growth النمو الأقتصادي المستقبلي
Condition حالة
Emerging Markets الأسواق الناشئه
Hurdle الحاجز
Demand الطلب
Economic Outlook التوقعات الاقتصادية
Accepted مقبول
Capital Controls قيود رأس المال
Limit حد
Negative سلبية
Market Sentiment مزاج السوق
Behavioral Finance التمويل السلوكي
Trends توجَّه
Cycles دورات
Checklist قائمة مرجعية
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #سعر_الصرف