83. الخصومات وألوان الجمعة المختلفة : الحقيقة المُرة (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
في الفترة الأخيرة بدأ يظهر في المنطقة العربية موسم تسوق الجمعة البيضاء ، كل سنة بداية من شهر نوفمبر وحتى نهاية السنة بيحصل عروض وخصومات كبيرة على سلع كتيرة مبتحصلش تقريباً طول السنة سواء في المحلات أو في مواقع التسوق الإلكترونية
وبما اننا في موسم التسوق ده فحبينا نقولكم شوية معلومات ليها علاقة بأساليب الدعاية والحيل التسويقية اللي بتأثر علينا سيكولوجياً وبتخلينا نستهلك أكتر من أحتياجاتنا
00:44 المقدمة -
01:03 أساليب الدعاية -
01:25 الحيل التسويقية -
01:57 أسلوب : 0.99 -
02:27 أسلوب : المتاهة -
03:30 أسلوب : عرض سعر القسط -
04:29 أسلوب : 100% أورجانيك -
05:39 تأثير المزيكا على المتسوق -
06:13 سيكولوجية التسعير -
09:42 أسلوب : الفرصة الأخيرة -
11:05 النصيحة المتبعة في محلات السوبر ماركت -
12:09 اشتري واحدة وأحصل على التانية مجاناً -
14:00 اللعب على سيكولوجية المتعامل -
15:00 أوكازيونات البلاك فرايداي -
15:56 لأنك عميلنا المميز -
16:58 التقبل المجتمعي للمنتج (الريفيوز) -
18:20 المنافسة السعرية -
19:55 الخاتمة -
هدفنا من الحلقة دي نقولك خد بالك لو الحاجات دي بتحصلك يبقى دي علامة إنك ممكن تشتري حاجه انت مش محتاجها.. فديماً حاول تشتري الحاجه انت محتاجها بغض النظر عن العروض والخصومات ومع الوقت أسلوبك الإستهلاكي هيتغير ودي خطوة أولية إنك تاخد الفلوس دي بدل ما تشتري بيها سلعة إستهلاكية تحطها في حساب التوفير بتاعك ومع الوقت توصل للحرية المالية
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
اهلاً بيكوا في حلقة جديدة من بودكاست كلام ينور بما اننا في موسم كده يعتبر موسم تسوق (شوبينج) عن طريق حاجه زي عيد الشكر الأمريكي أتشهرت في الفترة الأخيرة إن الفترة دي بيحصل فيها خصومات كبيرة على سلع معينة مبتحصلش طول السنة
01:03
أتحولت في المناطق العربية بتاعتنا بيسموها الجمعة البيضاء أو الصفراء أيا كان اللون اللي حضرتك بتشوفه في الدعايا اللي بتحصل في المنطقة ، ولكن هما ديماً بيشجعوا في الفترة دي على التسوق وبرده موسم نهاية العام الكريسماس وأعياد الميلاد اللي حوالين الفترة دي فبتعتبر موسم تسوق
01:25
أنا النهاردة بحاول أتكلم على حاجات معينة الناس بتعملها في أساليب الدعاية ، الطريقة دي بتخليك تحاول تستهلك أكتر مع أنك ممكن متكونش محتاج الحاجه أصلاً ولكن في حيل فرق التسويق بتعملها بحيث تحاول تخلي حضرتك تصرف أكتر ، طبعاً أنا مش ضد أي حاجه أنا بس بقول ان أنت تاخد بالك لو الحاجات دي بتحصلك يبقى دي علامة من العلامات إن انت ممكن تشتري حاجه انت مش محتاجها
01:57
أول حاجه مشهورة أوي في الموضوع ده الناس كلها اللي بتسمعنا غالباً هتكون عرفاها اللي هو بيحاول يغيرلك سعر الحاجه بدل ما هي 10 يخليها 9.99 أو 9.98 اللي هو الكسر لحاجه بسيطة تحت السعر الكامل بحيث إن حضرتك سيكولوجيا بتحس الحاجه دي أرخص
في الحلقة دي بنتكلم على أمثله زي النوع ده بس بأساليب أخرى كتير ممكن متبقاش معروفه بنساعدك ديماً إن أنت تعرّف الحاجه دي
02:27
أول أسلوب هتكلم عليه هو أسلوب المتاهة اللي بنشوفه في محلات مشهورة زي إيكيا اللي هو حضرتك بتكون داخل تجيب لمبة مثلاً أو ترابيزة صغيرة أو أي حاجه ، أنت داخل إيكيا تجيب أي حاجه صغيرة .. طريقة بنا المحل بتخليك تمشي في حاجه زي متاهة
المتاهة دي بتبقى مقصودة وعشان يخرجك من أخر المتاهة دي بيخليك تعدي على صفوف حاجات كتير في النص بتخليك ديماً تتشد تشتري حاجه من الحاجات اللي بتشوفها في الطريق وبرده بتدي فرصة أكتر للعارضين أن أنت تشوف أكبر كمية من الحاجات
برده بنلاقيها لو حضرتك روحت مدينة ملاهي أنت بتروح تلعب اللعبة وفي آخر اللعبة بيخرجك على محل معين بيمشيك بنفس طريقة المتاهة فدي من أول الحاجات اللي الناس بتشوفها بتخليك تعمل شوبينج
03:30
تاني حاجه هتكلم عليها برده إن أنت ممكن وأنت بتشوف الحاجه المعروضه حاجه مثلاً بـ 1000 جنية أو 1000 درهم ، العارضين ساعات مبيعرضوش الحاجه دي بسعرها اللي هو 1000 لأ يقولك سعرها 10 أو 20 أو 50 وده بيبقى سعر القسط بتاعها لو اخدتها على 50 شهر أو 30 شهر أو 20 شهر أيا كان مدة الحاجه
فلما حضرتك بتشوف السعر 10 أو 50 لحاجه سعرها 1000 حضرتك بتحس إيه ده دي سعرها رخيص وده نوع من التحيز بيظهر في دماغك إن أنت بتحس انك بتاخد الحاجه بسعر كويس جداً ولكن أنت مبتحسبش إن ده هيضرب في 50 مره فهيبقى مثلاً 1000 مبتبقاش مركز فبيديك إحساس خاطئ إن الحاجه دي رخيصة ولكن حضرتك بتشتريها في الأخر بسعرها الكامل
04:29
أسلوب تاني برده في الدعاية إنك بتحاول تبين للمستهلك بتاعك إن الحاجه دي مكلفة جداً في تصنيعها بمعنى إننا بنلاقي إن الحاجه دي مثلاً 100% أورجانيك (طبيعية) ، أو معموله في درجة حرارة تحت الـ 500 ، أو مصنعة في ظروف خاصة .. أسلوب الدعاية ده أقوي بكتير من إن طعمها لذيذ أو دي هتعمل إيه .. يبقى ده بيدي إحساس خاطئ للناس إن الحاجه دي مكلفة فأنا محتاج اشتريها عشان هي مكلفة أو معموله بجودة عالية
ولكن في طبيعة الأمر مش عاوزك تنسى حاجه إن طريقة الشغل عموماً هو عبارة عن تصنيع حاجه معينة بتكلفة معينة وبتحط عليها النفقات العامة وبعدين بتحط عليها هامش الربحية ففي جميع الحالات أنت بتدفع تمن السلعة اللي أنت بتاخدها ، مش معنى إنها معموله بطريقة غالية إن حضرتك النهاردة بتشتريها بالرخيص لأ هي بتبقى طريقة عشان يخليك تقتنع وتصرف الفلوس
05:39
المزيكا برده اللي بتلاقيها شغاله في المحل ساعات بتشجعك على الشرا ، يعني لما محل بيبقى ساكت خالص مفهوش اي نوع من انواع المزيكا ومحل تاني مقارن فيه مزيكا هادية مهدئة للأعصاب دي بتخلي حالتك النفسية تستريح أكتر إن أنت تقضي وقت في المحل أكتر ولما تقضي في المحل وقت أكتر الطبيعي فرص شراك للحاجات نسبها بتعلى فده برده اسلوب الناس بتركز فيه في الدعاية
06:13
واحده برده من الحاجات اللي بشوفها كتير جداً وكنت حاسس إنها بتحصل ولما ابتديت أعمل بحث وأدور في الموضوع لقيتها موجوده انت مثلاً في مطعم الناس بيحطولك في المنيو صنف غالي جداً الصنف الغالي ده الهدف منه مش إنك تشتريه الهدف إن حضرتك لما تشوفه وتقارن بقية المنيو بيه تحس إن الحاجه دي رخيصة
فهو مش بيحطلك الحاجه الغالية دي عشان تشتريها لأ هو بس بيديك إحساس إن أنت لو أشتريت الحاجات الأرخص أنت كده واخد قيمة أو بتشتري الحاجه المخفضة عن الحاجه الغالية مع إنهم الأتنين ممكن يبقوا نفس المنتج إفتراضاً يعني ساندوتش برجر معين على المنيو غالي جداً والبرجر التاني هو هو معمول من نفس المكونات بإختلاف حاجات بسيطة فيه
هو بيديك إحساس لأ خد الرخيص ده كده كده إنت هتاكل برجر في الأخر فدي طريقة أنا بشوفها كتير جداً بصراحة وكنت حاسس بيها اللي هو مين يعني اللي هيشتري الحاجه دي اللي على المنيو الغالية بس طلع من الأبحاث اللي معمولة إنه بيساعدك تاخد قرار على الحاجه الأرخص
07:28
والحاجه العكسية كمان موجودة اللي هو لو قولنا مثلاً حضرتِك روحتي السينما وعايزة تشتري فشار فتلاقي مثلاً الفشار الصغير بـ 5 والوسط بـ 10 والكبير بـ 11 ، طيب هما ليه حاطين الوسط هنا مين هيجي يشتري الوسط بـ 10 والكبير بـ 11 هو هنا حاطط لحضرتك الـ 10 دي بس عشان يخليكي تشتري الـ 11
ساعات في طريقة التسعير هو بيبقى عايز يزقك للحاجات العالية فبيحطلك حاجات في النص تخليك لما تقعد تقارن تخليك تروح للحاجه الأعلى مع إنك ممكن متكونش محتاج الحجم الكبير ممكن انت اصلاً رايح تشتري الصغير
طب ليه أنا بقول كده لأن انت النهاردة مره مش هتفرق ، 10 مرات مش هتفرق بس 100 مره لو ده إسلوبك للإستهلاك مع الوقت هتلاقي كمية الحاجات اللي أنت كان ممكن توفرها كنت ممكن تحوشها من إنك بس تغير نمطك الإستهلاكي ، المبالغ دي مع الوقت بتبقى حاجه كبيرة جداً .. فأنا باخد بالي ديماً وأنا رايح هل أنا بجد عايز الحجم الوسط أو الكبير ولا أنا مستعد أخد الحجم الصغير وده هيكفيني كإستهلاك
08:42
برده رجوعاً للمثال بتاع 3.99 أو 2.98 أو 2.97 لما عملوا الأبحاث لقوا إن الأرقام اللي بينتهي بيها السعر لما بتكون أرقام فردية المبيعات بتحصل أكتر عن لما بتكون زوجية يعني في المثال بتاع الـ 3 ده 2.99 و 2.98 و 2.97 هنلاقي إن 2.99 و 2.97 مبيعاتهم أعلى من 2.98 لسبب ما احنا اختيارنا بيكون على الأرقام الفردية أعلى في الشرا والإستهلاك عن الأرقام الزوجية ده طبعاً كله جاي من الأبحاث ملهوش علاقة برأيي أو اللي أنا بشوفه في الحياة.. في أبحاث معمولة عن الموضوع ده إن وكالات التسويق لما بيجوا يسعروا بيستخدموا الحاجات دي وهما بيسعروا
09:42
"إلحق قبل العرض ما ينتهي" ديماً بيحسسك بتوتر بطريقة معينة كده في التسويق اللي هو بنلاقي العبارات دي "الفرصة الأخيرة" أو "كمية محدودة" أو "المخزون أخر قطعة" ولما تخش على أمازون أو لما تخش على مواقع التسوق الإلكتروني بنلاقيها أوضح كمان اللي هي قطعتين أو 5 قطع فاضلين الموضوع ده بيحط عليا ضغط نفسي من إن أنا خايف الفرصة تروح عليا
دي برده طريقة ممكن تكون في النظام اللي معمول اللي هو مثلاً كل 100 قطعة لما نوصل لأخر 5 حطلي 5 قطع ولما يخلصوا ننزل 100 جداد بعديها بيوم أو يومين وبعدين نعمل نفس الطريقة تاني .. فخلي بالك ساعات الحاجات دي مبتبقاش حقيقية ساعات بتبقى معمولة بس عشان تزقك انك تشتري
10:38
نفس الكلام في شركات الطيران يمكن في شركات الطيران الموضوع بيبقى حقيقي أكتر لأنهم بيبقى عندهم كراسي على فئات معينة يعني لما حضرتك بتشتري تذكرة الطيارة بيبقى هو مقسمها على 10 مستويات مثلاً كل ما بيخلص مستوى بيروح للتاني ففي شركات الطيران ممكن الموضوع يكون مختلف شوية ممكن يبقى حقيقي ولكن أنا بتكلم أكتر على السلع الإستهلاكية
11:05
طريقة برده أكتشفت انها حاجه موجودة وبكتشفها معاكوا برده إن محلات السوبر ماركت الكبيرة ، وأنا عمري ما فهمت الموضوع ده هناك يعني لو مثلاً عايز أخش اشتري ماية أو اشتري المنتجات الأساسية لبن بيض ماية أي نوع من أنواع الحاجات دي ساعات بلاقيها في أخر المحل ومببقاش فاهم يعني ما دي أكتر الحاجات اللي بتتسحب هي ليه مش محطوطه فالأول
أتضح برده عن طريق الأبحاث ومن الحاجات اللي الناس بتنصح بيها السوبر ماركت انها تعملها انهم يحطوا الحاجات الأساسية في الأخر عشان حضرتك لو عايز تجيب الحاجات الأساسية دي أنت بنسبة كبيرة كل اللي خارج المحل عنده حاجات أساسية في عربية التسوق بتاعته فلازم يعدي على حاجات تانية كتير ملهاش لازمه في الطريق ، يعني أنا داخل أجيب زجاجتين ماية بطلع جايب 15 حاجه تانيه جنبهم ليه لأن هو عداك على كل الحاجات اللي في النص اللي أنت مش محتاجها اللي ممكن فجأة تفتكر إنك محتاجها فتشتريها
12:09
مؤخراً شوفنا برده كمية ناس بتعمل "اشتري واحدة وخد القطعة التانية ببلاش" يعني يمكن وأنا أصغر شوية مكنتش بشوف العروض دي ، غالباً أنت مبتبقاش بتشتري القطعة الأولانية على سعر مخفض يعني ده بيبقى السعر الكامل اللي هو نفسه يبيع بيه ولكن هو في حساباته كمحل أو متجر هو عامل في حسابه إن حتى لو حضرتك أخدت واحده تانية فهو هامش الربحية بتاعه عالي جداً انه يغطي سعر الأتنين فمتفتكرش إنك لما تشتري واحده وتاخد واحده ببلاش أنت كده بتخسره أو ان دي صفقة رهيبة هما في أول السنة لما بيقعدوا يعملوا خطة السنة كلها هنبيع بقد إيه بيبقى عنده نسبة معينة هيبيعها على السعر الكامل ، نسبة معينة هيبيعها على السعر المخفض شوية ، ونسبة تانية عايز يبيعها واحده وعليها واحده هو بالنسباله في الأخر عايز مجموع السنة كلها بتاعته تبقى عند رقم معين
يعني مثلاً أنا ببيع حاجه بـ 100 فأنا عامل حسابي ان مثلاً 20% هيتباع على 100 ، 50% منها هيتباع على 75 ، و30% هيتباع واحده عليها واحده على 50 فأنا أخر السنة كلها متوسط بتاع بيعي ما بين 70 لـ 75
أنا من اول يوم أنا عارف المعلومة دي كصاحب محل يعني أنا مش بعمل أي نوع من أنواع الترويج اللي حضرتك متخيلها ده أسلوب دعائي فقط يشجعك لكن هو من أول سنة عاوز يبعها بـ 70 إفتراضاً هي مكلفاه 30 وعليها شوية مصاريف نقل وتخزين والكلام ده كله توصلها لـ 50 فهو هامش الربح بتاعه من 70 لـ 50 ده فقط إسلوب دعائي
14:00
في الحاجات بقى اللي هي أسعارها كبيرة زي سعر عربية أو مركب أو سعر تليفون غالي أو أي حاجه .. بيقلبلك في طريقة الدعاية بتاعتة لسعرها اليومي يعني دي هتكلفك 5 جنية في اليوم ، دي هتكلفك 3 دولار في الإسبوع بيكسرلك سعرها لحاجه صغيرة ، او مثلاً يقولك دي هتكلفك قد كوباية قهوة يومياً أو قد زجاجتين ماية في اليوم ممكن طرق كتير جداً نشوفها ولكن هو هدفه في الأخر انه يلعب على سيكولوجية المتعامل يقوله الحاجه الغالية أوي دي لو قسمناها لأيام صغيرة هتبقى ولا حاجه فده برده أسلوب مغري إنك تفكر إن الحاجه دي رخيصة
الهدف من كل الحاجات اللي بتحصل في الحلقة النهاردة اللي احنا بنتكلم فيها دي إن البياع يحسسك إن هي مش غالية ده الهدف الأساسي في الموضوع
15:00
في طريقة تانية برده مشهورة بتتعمل اللي هو انهاردة مثلاً البلاك فرايداي ينزلوا مثلاً 5 قطع من حاجه معينة على خصم 30% فالحاجه تمنها النهاردة 70 باع الـ 5 قطع دول يقولك التخفيض ده خلص معلش بقى خسارة فاتك طب احنا هنعمل تخفيض تاني على نفس الحاجه دي ولكن بـ 20% وخلي بالك بعد يومين تلاتة التخفيض ده هيروح.. فالناس تروح جارية بسرعة شاريه الـ 20% دي عشان أنا خايف الموضوع يخلص
فالتدرج في الأوكازيون يعني بنلاقي الناس بتعمل كده وهو بيبقى قايلك ومعلنلك اللي هو خسارة أنت فاتك الرقم الكبير فالنهاردة بقى إلحق فتلاقي الناس بتجري من الخوف
15:56
"التميز" حضرتك متميز فالخصم ده معمول ليك فقط ، أنت مثلاً عضو في برنامج نقط بتاع سلسلة محلات معينة فيبعتلك يقولك عشان حضرتك العميل المميز بتاعنا فأنت عندك خصم 30% النهاردة فقط علشان أنت من عملائنا المميزين فانت ساعات بتفكر ده هما بيكافئوني أن أنا متميز ولكن هو في الاخر عايزك تروح تصرف
وده برده نوع من انواع الدعاية يقولك دي حاجه لزباينا المفضلين أو لو حضرتك روحت المحل ومش معاك الكارت ده للأسف مش هنقدر نديك الخصم ده برده من الأساليب الدعائية الذكية جداً جداً اللي بيحسسك أنك مستريح وأنت بتصرف الفلوس هو من الاخرعاوزك تبقى مستريح وأنت بتصرف الفلوس مش حاسس بأي ذنب أو تأنيب ضمير
16:58
العالم الجديد من الريفيوز (المراجعات) إن حضرتك بتتفرج على فيديوهات أو بتسمع إعلانات في الراديو أو بتخش على جوجل تسمع ريفيوز ، الريفيوز دي من الاخر هو تقبل مجتمعي للمنتج.. الله المنتج ده جميل .. بس ده مش معناه إنه لما يجيلك أنت هيعجبك فلو حضرتك بتشتري حاجه بناءاً على الريفيوز بس وأنت مش محتاجها خلي بالك أنت ممكن تكون ماشي ورا القطيع او ماشي ورا الإحساس العام .. فلان الفلاني أشتري .. الناس دي كلها عندها نفس الحاجه يبقى أنا محتاجها يبقى أنا أروح اصرف
وده برده أسلوب تاني من الدعاية "التأكيد المجتمعي" بتاع الموضوع مش ديماً ده بالنسبالي حاجه تخليني أشتري المنتج ، مش ديماً ده الحاجه الأساسية اللي بتزقني أرورح اشتري المنتج
17:57
أخر حاجه هتكلم عليها النهاردة لأن احنا ممكن نقعد نتكلم في 500 نوع تاني من الدعاية بس بدافع الوقت وبدافع إن حضرتَك هيوصلك الفكرة أو حضرتِك هتوصلك الفكرة من الحلقة دي أنا مش هكمل في حاجات أكتر من كده ممكن في حلقات تانية نبقى نتكلم في انواع أخرى من الموضوع
18:20
أخر نوع هتكلم عليه النهارده هو بحث أتعمل سنة 2004 على محلين في الشارع محل بيبيع سيديهات ومحل بيبع تيشيرتات المحلين دول قصاد بعض ، محل التيشرتات كل شوية بيغير سعره من 10 لـ 80 ، محل السيديهات واقف قدامه مش بيغير الأسعار الناس بتيجي تعدي تبص على المحلات.. لقوا إن الأسعار لما بتبقى 80 في محل التيشيرتات محل السيديهات بيبع كميات أكبر من السيديهات عن ما محل التيشيرتات يبقى حاطط سعره 10
يروح منزل سعر لـ 10 تلاقي المبيعات قلت في محل السيديهات ، محل التيشيرتات يروح معلي لـ 80 محل السيديهات يبيع أكتر ينزل السعر تاني لـ 10 محل السيديهات يبيع أقل.. إيه اللي بيحصل هنا؟ حضرتك لما تعدي تشوف المحلات وتلاقي إن محل التيشيرتات غالي بـ 80 لما تيجي تبص على السيديهات تحس ان القيمة الشرائية بتاعتها مقابل المحلات اللي جنبها ان كده في قيمة فيجيلك احساس انك عايز تصرف أكتر في الحتة دي
فساعات الأجواء اللي حواليك بتأثر جداً جداً في سعر مبيعاتك عشان كده الناس ساعات بتروح تفتح جنب بعض بيبعوا نفس الحاجه لأن هو بيبقى ساعات بيحاول يعمل منافسة سعرية عن المحلات اللي جانبه إنك لما تلاقي الحاجه دي في شارع غالي وتلاقي محل رخيص هو بيبقى عنده فرصة أعلى أنه يبيع
19:55
أنا عايز أقولكم اننا بس مستغلين الفترة دي في موسم الأعياد اننا نقولكم شوية معلومات ليها علاقة بالشرا والتسوق عشان نحاول نقلل الشراء الإندفاعي اللي احنا اتكلمنا عليه في حلقات قبل كده إنك لما تبقى رايح محل حاول تشتري اللي انت عايزة مع الوقت الأسلوب الإستهلاكي بتاعك هيتغير مش طالب منك تغير أسلوبك الإستهلاكي في يوم وليلة الموضوع هياخد وقت بس على الأقل أنا بعرفك العلامات اللي ممكن تقع فيها فيعملك إستهلاك أعلى من العادي عشان الناس كلها لما بنتكلم معاها ونسمع رأيها يقولك أنا معنديش مكان في ميزانيتي أحوش أنا معنديش مكان في ميزانيتي استثمر ولكن لو أخدت بالك من المصروفات الزيادة دي خطوة أولية إن أنت تبتدي تاخد الفلوس اللي أنت وفرتها النهاردة بدل ما تجيب السلعة الإستهلاكية دي وتحطها في حساب التوفير بتاعك أو في حساب الاستثمار بتاعك ومع الوقت توصل للحرية المالية
شكراً جداً جداً على وقتكوا النهاردة وأفكاركوا ديماً مهمه بالنسبالنا أبعتولنا وأشوفكوا إن شاء الله الاسبوع اللي جاي
Translation of some words and terms:
Shopping تسوق
Thanksgiving عيد الشكر
Tricks حيل
Marketing Team فرق التسويق
Structure بنية
Store متجر
Organic عضوي
Marketing Message رسالة تسويقية
Cost تكلفة
Overheads النفقات العامة
Margin هامش
Background Music خلفيه موسيقية
Research بحث
Item عنصر
Value قيمة
Medium وسط
Large كبير
Marketing Agencies وكالات التسويق
A sense of urgency شعور بالإلحاح
limited stock كمية محدودة
Background خلفية
System نظام
Tiers مستويات
Advice نصيحة
Buy one get one free اشتري واحدة واحصل على واحدة مجانا
Full Price السعر الكامل
Deal صفقة
Plan خطة
Total إجمالي
Promotions ترويج
Exclusivity التميز
Sale تخفيض السعر
Discount خصم
Reviews المراجعات
Impulsive Spending الشراء الإندفاعي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #خصومات #تسوق #الحقيقة_المُرة #إعادة