82. المحفظة الكلاسيكية (60-40)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
في حلقة النهاردة بنتكلم على المحفظة الكلاسيكية أو محفظة 60/40 ، محفظة استثمارية متفق عليها تاريخياً من خبراء المجال المالي وبينصحوا بيها في الاستثمار عموماً.. شكل المحفظة عامل ازاي؟ بتعمل إيه؟ إيه هدفها؟ وليه الخبراء بينصحوا بيها؟ وحاجات تانية كتير في حلقة النهاردة
01:05 يعني إيه محفظة (60/40)؟ -
02:20 شكل المحفظة (60/40) عامل ازاي؟ -
03:36 ليه أخد أسهم وسندات - حاجتين عكس بعض - في محفظة واحدة؟ -
04:42 هل ممكن يحصل إن الأسهم والسندات يطلعوا أو ينزلوا سوا؟ -
05:54 العوائد التاريخية للمحفظة (60/40) شكلها عامل ازاي؟ -
06:11 هل الـ 7% عائد هتحفظلي القيمة الشرائية بتاعتي؟ -
06:48 هل الـ 7% دي كافية كعائد؟ -
07:55 لو واحد أبتدى محفظة وفي أول سنة أو سنتين عمل 14% مثلاً هل ده معناه إنه هيفضل طول الوقت يعمل الـ 14%؟ -
09:50 ازاي ممكن ننفذ المحفظة دي؟ -
11:02 لو العوائد نزلت عليا هل ده معناه إن الاستراتيجية بتاعتي غلط؟ -
12:58 هل في الـ 100 سنة اللي فاتوا المحفظة دي كانت إيجابية؟ -
13:14 ليه شكل المحفظة وحش السنادي (2022)؟ -
14:00 واحد بيبتدي استثمارة في (2022) ولا واحد بيبتدي في (2018-2019)؟ -
15:45 هل ممكن بدل ما أحط أسهم وسندات بس أنا ممكن أروح أشتري دهب كمان؟ -
16:51 بما إن العوائد على الأسهم عالية، ليه مأشتريش 100% أسهم؟ -
المحفظة الكلاسيكية 60/40 من كلاسيكيات الأستثمار وحسابات التقاعد.. مش بنقول إن دي أفضل طريقة للاستثمار ولكن هي طريقة أجمع عليها خبراء المجال المالي.. تقدروا تعملوا البحث بتاعكم وتشوفوا الأرقام المختلفة وتقدروا كمان تبعتولنا لو عندكم أي سؤال
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة أنا هتكلم على محفظة كلاسيكية المستشارين الماليين تاريخياً بينصحوا بيها في المجال الاستثماري عموماً وخاصة بتكلم على الأسواق زي السوق الأمريكي اللي هو فيه تاريخ طويل من الاستثمار
01:05
المحفظة دي اسمها "محفظة متوازنة" أو محفظة (60/40) يعني إيه (60/40) .. 60% من المحفظة دي محفظة أسهم متنوعة متمثله بقى في صندوق استثمار بيستثمر في الأسهم أو بيستثمر في صندوق مؤشرات على شكل صندوق استثماري ممكن تاخده من البنوك العادية اللي هي بتبيعهالك أو عن طريق صندوق استثمار متداول فدي المحفظة الـ 60% منها شكلها عامل كده
الـ 40% الباقية بتبقى محفظة من أدوات الدخل الثابت اللي هي المحفظة اللي بتشتري سندات وبرضه السندات دي بتبقى متنوعة لأنك كمستثمر صغير مبتقدرش تروح تشتري سندات بشكل مباشر عشان بيبقى فيها حد أدني كبير فصنديق الاستثمار اتعملت عشان تحل المشكلة دي وحاجه برضه احنا أتكلمنا فيها قبل كده في صناديق استثمار موجودة لأدوات الدخل الثابت أو المقابل ليها اللي هي الصناديق المتداولة
ففي الحلقة دي احنا عايزين نشوف المحفظة الكلاسيكية دي عملت إيه؟ بتعمل إيه؟ هدفها إيه؟ ليه الناس بينصحوا بيها؟ ليه مشتريش بكل فلوسي أسهم؟ أو ليه مشتريش بكل فلوسي سندات؟ وهكذا.. ده اللي أنا هحاول أغطيه في حلقة النهاردة
02:20
محفظة الـ 60/40 دي استخدمت أكتر حاجه في حسابات التقاعد بتاعة الناس بره يعني بتروح للمستشار المالي يقولك طيب احنا عايزين نعمل محفظة.. طيب شكلها عامل ازاي؟ بيقولك الـ (60/40) دي محفظة الكلاسيكية أتفق عليها الناس
طبعاً كل حاجه ليها مميزات وليها عيوب ولكن المحفظة دي على المدى الطويل من خلال الأبحاث والأرقام ، يعني أرقام كتيره شوفناها قبل كده المحفظة دي بتهدف على المدى الطويل انك بعد 3 سنين أو 5 سنين عمرك ما بتبقى خسران فيها
وده لأسباب أقتصادية لأن الأسهم والسندات تاريخياً يعني في الـ 100 سنة اللي فاتوا بيتحركوا عكس بعض ، في سنين بيحصل أنهم بيطلعوا مع بعض وبينزلوا مع بعض ولكن أغلبية الوقت لما بتلاقي صعود جامد في الأسهم ممكن تلاقي هبوط في السندات والعكس ، لما بنلاقي الأسهم مبتطلعش وتلاقي السندات بتطلع جامد
03:20
فأول هدف من المحفظة دي 2 يديك أصلين والأصلين دول على المدى الطويل بيطلعوا ولكن في خلال السنين ممكن داخل سنة أو سنتين أو تلات سنين بنلاقي إن في حاجه بتطلع وحاجه ممكن متطلعش
03:36
فهتقولي ليه أنا أخد حاجتين عكس بعض في محفظة واحدة! الهدف هنا هو توزيع المخاطرة ، إن أنت النهاردة الحاجات اللي بتطلع الأسهم دي مثلاً دورة معينة في الأقتصاد فيه توسع ، الشركات بتكبر ، أرباحها بتزيد ، في حركة جامدة في الأقتصاد بتاعك ، الأقتصاد سخن فالأسهم بتاعتك بتطلع
في نفس الوقت ممكن تكلفة الأقتراض ثابتة أو بتنزل أو بتطلع أياً كان الحالة ، بس كده أنت في نمو في النظام جامد ، فالنمو في النظام الناس عايزة تستثمر الناس مش عايزة سندات الناس عايزة أسهم
وفي حاجه في دورة تانية بتبقى عكسها تماماً اللي هي النهاردة في أقتصاد مفهوش شغل كويس السندات هنا وقتها أنت ممكن تشتريها أحسن وأفضلك لو هي كانت قليلة لأنك هتعمل عليها الأرباح ولكن هي مضمونة في الظروف الأقتصادية الحالية
04:32
فهما حطوا الأتنين مع بعض عشان يظبطوا بعض ، هنا التنويع مش بس فـ أسامي الأسهك الموجودة أو في أسامي السندات لأ ده في فئات الأصول
04:42
طيب هل في لحظات بيحصل إن الأتنين بيطلعوا أو الأتنين بينزلوا؟ آه ده بيحصل
فممكن تكون ظروف استثنائية سنة سنتين خمسة حتى ولكن على المدى الطويل احنا هنا بنتكلم على محفظة تقاعد ، تقاعد يعني 20 سنة ، 30 سنة ، 35 سنة أياً كان المدة الطويلة فمحتاج العائد على المدة الطويلة يبقى إيجابي مش فارقة معايا أوي إيه اللي بيحصل في النص
05:10
الحاجه التانية كمان إن عشان أعمل محفظة تقاعد بتاعتي دي أنا بشتريها عبر الوقت يعني أنا مش هشتريها أول يوم وخلاص كده خلصت! لأ أنا بحط حاجه سنوية او ربع سنوية أو شهرية أو أياً كان الطريقة اللي أنت بتدفع بيها الأستثمار بتاعك فأنت ممكن برضه تستغل فرصة ان حاجه نزلت عن التانية تقدر تشتريها او تعلي النسبة بتاعتك فيها في فرص النزول دي
فالنهاردة أنا زي ما بقول احنا تاريخياً من النقطة 1 للنقطة 30 سنة المحفظة دي بتطلع ولكن زي ما قولنا في النص ممكن يحصل فيها ذبذبة جامدة أو ممكن حاجه تحصل في واحد من الأتنين ، ممكن الأتنين ينزلوا مع بعض وممكن الأتنين يطلعوا مع بعض
05:54
طب العوائد التاريخية شكلها عامل ازاي للمحفظة (60/40)؟
هنلاقي إن في الـ 100 سنة اللي فاتت حوالين الـ 7% ، احنا هنا بنتكلم على الـ 7% على الدولار بنتكلم على الأسواق الأمريكية مثلاً
06:11
طيب هل الـ 7% حفظتلي القيمة الشرائية بتاعتي؟
هنلاقي على المدى الطويل لو معدل التضخم في أمريكا بالدولار لأن معظم الدول بتتأثر بمعدل التضخم في الأمريكي لأن النهاردة أنت معاك دولار ده عمله لحد دلوقتي الناس متفقه عليها انها تقدر تشتري بيها سلع مثلاً ، تشتري بيها خدمات ، تشتري بيها طاقة زي البترول والحاجات دي كلها فالناس حافظة قيمة الدولار أو الدولار له قيمة مش زي العملات المحلية اللي بيحصل فيها تضخم وبرضه اتكلمنا في الكلام ده في حلقات قبل كده
06:48
طيب هل الـ 7% دي كافية؟
هنلاقي إن عشان أقارن العائد بتاعي لازم أقارنة بالتضخم على نفس العملة دي ، هنلاقي إن التضخم الأمريكي مثلاً نسبته 3% على المدى الطويل
طبعاً زي الأيام دي بيحصل طفرات جامده يعني النهاردة التضخم في أمريكا تقريباً أعلى حاجه في الـ 40 سنة اللي فاتوا ولكن دي بتبقى حاجه مؤقتة ممكن تقعد سنة أتنين تلاتة وبعدين بترجع تاني تحاول تقرب من الـ 3% إلا إذا اللي حصل تاريخياً هيتغير في المستقبل ودي حاجه بتبقى صعبة شوية
ولكن هنفترض عندك تضخم 3% وعندك عائد 7% فأنت كده حفظت قيمة الفلوس بتاعتك ، أنت هنا مش بس عملت عائد إيجابي اللي هو الفرق الـ 4% الفرق بين الـ 7 والـ 3 ولكن أنت حفظت قيمة الدولار بتاعك لو أنت عايش في دولة معدلات التضخم فيها أعلى من كده فأنت الدولار بنسبة كبيرة برضه هيحميك من العملة بتاعتك كقوة شرائية
أنا ديماً بفكر إن القوة الشرائية أنت لما تبص على فلوس لازم تفكرة في القوة الشرائية بتاعتك هل هي بتقل ولا مبتقلش وده فيه عوامل كتير جداً.. فده الهدف من المحفظة اننا نعمل 7%
07:55
طيب لو واحد أتبدى محفظة وفجأة في أول سنة أو سنتين عمل 13 أو 14 أو 15 % لأن مثلاً السنتين اللي فاتوا 2021 – 2022 لو بصينا على العوائد بتاعتها هنلاقيها قرب الـ 14% في السنة هل ده معناه إني هفضل طول حياتي أعمل الـ 14% في السنة؟ غالباً لأ.. يبقى التوقعات بتاعتك لازم الأول تبقى فاهم وأنت بتشتري استثمار أنا متوقع العائد بتاعي قد إيه
08:24
هنلاقي في المحفظة دي هي 7% لو أنا شوفت العوائد عالية أوي كده معناها إن احتمال يجيلي في المستقبل سنة سنتين تلاتة عوائد أقل شوية تنزلي متوسط السنين لـ 7% تاني دي نقطة مهمه جداً لأن الناس لما بتخش تستثمر بتبقى فاكرة لو دخل وعمل مثلاً فلوس كتير جداً في أول سنة أو سنتين إن ده اللي هيفضل يحصل والعكس تماماً لو واحد دخل وخسر أول سنة أو سنتين نسب كبيرة 10 أو 15 % بنلاقي إن الناس بتتوقع برضه وتشاؤم بيجي عليها وبتقول ده هيحصل على طول وأنا كده هخسر فلوسي ولازم أبطل استثمر وهكذا
آه بيحصل ظروف وبيحصل دورات أقتصادية بتخلي الأسواق تطلع وتنزل والكلام ده كله ولكن على المدى الطويل أنا متوقع من المحفظة دي 7% يمكن أكون محظوظ وتطلع لـ 8 و 8.5 ولو أنا مش محظوظ أوي ممكن تنول لـ 6 و 6.5 ولكن احنا بنتكلم حوالين رقم 7% لو قعدت نقول 20 سنة وأكتر
فده عشان أنا بخطط للتقاعد ، أنا عملت صندوق الطوارئ وعملت ادخار في حاجات تاني أنا كنت بشتري بيت والكلام اللي احنا اتكلمنا عليه قبل كده كذا مره ولكن دي محفظة التقاعد بتاعتي يبقى دي أول حاجه مطلوبة من المحفظة ازاي هتوصلني للـ 7
09:50
طيب ازاي ممكن ننفذها؟
زي ما قولنا قبل كده احنا ممكن ننفذها عن طريق صناديق الاستثمار الموجوده في البنوك فمثلاً هروح لبنك معين بيطرح أسهم محفظة متنوعة من الأسهم الأمريكية مثلاً ومحفظة تانية من السندات واشتري الصندوقين دول وأحطهم جنب بعض وكل شهر احط 60 سنت مثلاً في الأسهم و40 سنت في السندات
(VOO) ولو أنا عايز أشتريهم على البورصة من خلال السمسار ممكن أروح أخد في شركات مثلاً زي (إس أند بي 500) فيه ( اس بي واي) وزي (فانجارد) فيه
أياً كان اسم الصندوق المتداول اللي أنت هتختاره هما كلهم غالباً بيتتبعوا نفس المؤشر
وبالنسبة لصناديق السندات في برضه حاجات كتيره جداً في مثلاً على سبيل المثال (تي إل تي) ده بيشتري سندات الحكومة الأمريكية فوق الـ 20 سنة وتقدر تحطهم جنب بعض وتتفرج عليهم ومتنساش إنك لما تحط فلوسك كل شوية اتأكد إن النسبة ديماً 60/40
.. طيب ده طريقة تنفيذه ، حطيتهم وابتديت انفذ ، ابتديت أتابع
11:02
هرجع أكررها تاني لو نزلت عليا وأبتديت أشوف حسابي خسران هل ده معناه إن الاستراتيجية بتاعتي غلط؟
لأ هو غالباً المرحلة الأقتصادية اللي أنت فيها دي مأثره عليك بالسالب ولكن ممكن على المدى الطويل ده يكون في مصلحتك انك قاعد عمال تشتري بأسعار أرخص كل ما بتخش لحد ما الدنيا تلف وتعدل تاني والدنيا تتحسن وتطلع.. ده بشكل عام
11:29
طب هل الأزمات الأقتصادية دي حصلت قبل كده؟
يعني مثلاً حصل أزمة السنادي 2022 الأسهم والسندات نازلين واعتقد السنادي من أوحش السنين تاريخياً للمحفظة دي ، وأنا تعمدت برضه أننا أتكلم عليها في نص المشكلة عشان نبقى شايفينها برضه من هذا المنظور..
هل ده حصل قبل كده؟ آه حصل قبل كده ، هنلاقي ان العوائد السالبة دي حصلت يعني المحفظة دي ممكن تكون نازله السنادي حاجه وعشرين % ولكن حصلت 5 أو 6 مرات تاريخياً يعني على سبيل المثال في الـ 100 سنة اللي فاتوا اسوأ عوائد حصلت من المحفظة دي كانت في 1931 تقريباً المحفظة كانت نازلة 31% ، 1737 كانت نازلة 22% ، السنادي 2022 حوالين حاجه وعشرين % ، 2008 المحفظة دي نزلت 17% ، 1974 نزلت 15% ، 1930 نزلت 14% دول اسوأ سنين حصل فيهم المحفظة المتنوعة دي
12:33
طيب هتقولي ما الأرقام ممكن تبقى كتير في الخسارة..
آه ده حقيقي دي أرقام تعتبر خسارات جامدة ولكن الاستثمار طبيعي فيه خسارات ولكن هنا بنتكلم على الخسارات دي سنوية يعني في السنة دي بس في اللقطة دي بس ، وفي اللقطة دي كمان أنت قدرت تشتري الحاجات دي بتخفيض بنسب كويسة جداً
12:58
طب في الـ 100 سنة اللي فاتوا دول معظم الوقت كانت المحفظة إيجابية ولا لأ؟
آه طبعاً أنا بقولك احنا طالعين في الـ 100 سنة 7% سنوياً فلازم عشان أعرف أطلع العوائد تكون إيجابية في السنين التانية
13:14
أنا بس بحاول تاني أتكلم من ناحية المخاطرة هي ليه شكلها وحش السنادي والسنادي بالذات الأسباب اللي ورا كده إن من السنين القليلة في الـ 100 سنة اللي فاتوا إن الأتنين ينزلوا مع بعض الأسهم والسندات وده بسبب اننا قعدنا 10 سنين الفوايد تقريباً قرب الصفر عالمياً فالسنادي أول سنة يرفعوا الفايدة ورفعوها بسرعة جداً فالأسهم اتأثرت لأن التوقعات بتاعة الارباح بتاعتها هتبتدي تقل عشان ممكن يحصل ركود وحاجات كده وفي نفس الوقت السندات نزلت جامد عشان البنوك المركزية أبتدت ترفع أسعار الفايدة فالعوائد أبتدت تقل في السندات فده بشكل عام إيه السبب اللي خلى السنادي 22
14:00
طيب لو واحد بيبتدي مثلاً استثمارة في 2022 ولا واحد بيبتدي استثمارة في 2018 – 2019؟
الراجل اللي ابتدى في 2018 – 2019 ممكن يكون شاف سنين كويسة إن الأسعار بتاعة المحفظة دي كانت بتطلع كويس في السنين اللي فاتوا ولكن العوائد المستقبلية بتاعتها وقتها كانت أوطى ليه؟ لأننا ضربنا المثال بتاع اللي هو أنا كنت بشوف عوائد 14 وحاجات عالية في السنين اللي فاتوا فمعنى كده إن مستقبليلاً 2022 – 2023 – 2024 – 2025 ممكن العوائد تقل شوية من نقطة دخولي الأولانية
نفس المثال لو واحد بيبتدي النهاردة 2022 هي المحفظة بالفعل نزلت وعملت عوائد أوحش من المتوقع ليها على المدى الطويل يبقى معنى كده إن دي ممكن تكون فرصة لدخول الناس وبدايات محافظ جديدة
أنا بتكلم ليه الكلام ده عشان متخيل إن معظم الناس اللي بيسمعونا هما لسه بيبتدوا الأستثمار ولما حد بيشوف خساير كبيرة في فئات أصول معينة بيخاف انه يستثمر فلو انت خطتك طويلة مش هترجع تقول بعد 3 أو 5 سنين إيه اللي أنا عملته ده ، لو أنت بتعمل حاجه للتقاعد أعتقد المحفظة دي ممكن تكون مناسبة انك تبتديها بالذات في الأسواق لما بتبقى نزول
وطبعاً النهاردة لما حصل المخاطرة بتاعة إن فئات الأصول الأتنين ينزلوا مع بعض فرصة حدوثها في المستقبل آه ممكن تحصل ولكن فرصة حدوثها بتقل لأن هي حصلت السنادي ففرص تكرارها أو إنه يحصل تاني الترابط بينهم يفك كده أو يبقى إيجابي بدل ما يبقى سلبي فرص بسيطة
15:45
في ناس تانية بتقول ممكن أحيد شوية عن الـ 60/40 بدل ما أحط أسهم بس أو سندات بس أنا ممكن أروح أشتري مثلاً 5% أو 10% دهب..
معنديش مشكلة يعني هنا الفكرة بتاعت المحفظة المتنوعة أنا بس عايز أطرحها في الحلقة دي يعني عايز أقولك بدل ما تروح تشتري أسهم بس أو سندات بس أو شهادات ادخار أو حاجات كده يبقى عندك نوع معين من التنوع فأياً كانت الدولة اللي أنت فيها التنوع ده زي ما قولنا بيفيدك في ظروف اقتصادية معينة
ممكن مثلاً متخسرش في الأسهم خالص ولكن ممكن نقعد 5 سنين مثلاً في سوق معين الأسهم مبتطلعش بتحصل شوفناها كتير جداً قبل كده ولكن السندات وقتها هتفضل تعملي العوائد بتاعتي على جانب فهنا شالتني فتاني الفكرة بتاعة التنوع هنا مهمه كأصل وليس أسم السهم اللي حضرتك شاريه صندوق الاستثمار نفسه هنا لا يعنيني هو اللي عاملي التنوع من المخاطرة
16:51
العوائد على الأسهم طبيعياً بتبقى على المدى البعيد أعلى فواحد يجي يقولي طب مانا أشتري 100% أسهم! أوكية مفيش مشكلة بس هل هتقدر تتحمل الذبذبه بتاعتها أو التذبذب إن الأسهم ممكن تطلع وتنزل أكتر كمان من السندات فلو انت تقدر تستحمل المحفظة دي وعندك وقت مفيش مشكلة ، الناس الأصغر ديماً بيتجهوا ناحية الأسهم والناس الأكبر بيتجهوا للسندات لأنهم عايزين الدخل الثابت ففي ناس بتقول لأ انا عايز أروح أكتر ناحية الأسهم
17:28
حاجه أخيرة أنا كنت ديماً بفكر فيها خلال الـ 5 – 7 سنين اللي فاتوا إن العوائد بتاعة السندات كانت واطية جداً بمعنى إيه إن الفوايد حتى الأمريكية كانت حوالين الـ 1% أو الـ 0.5% أو الـ 2% الفوايد كانت واطية جداً أنا كان عندي ديماً قلق على الـ 40% السندات ، أنا نفسي مبحبش الاستثمار في السندات في الفترات اللي فاتت ولكن النهاردة مع صعود الفايدة هنلاقي إن الفوايد أبتدت تطلع لـ 4 و 5 و 6 و 7% كمان في بعض الدول أنا تاني بتكلم على الدولار
لما السندات أبتدت تدي العوائد دي أبتدت المحفظة 60/40 ترجع تاني بالنسبالي وممكن برضه بالنسبة لبعض الخبراء وتقدروا تعملوا جوجل وتقروا مقالات وآراء لناس تانية مختلفة غيري يعني
بس من نص السنادي أبتديت أحس إن المحفظة المتنوعة دي أو الكلاسيكية دي أبتدي يظهر فيها عوائد مستقبلية إيجابية تاني يعني أنا كنت قلقان منها على المدى القصير الـ 5 - 6 سنين ممكن نقول 2020 – 2021 كنت خايف إن العوائد المستقبلية بتاعتها تبقى واطية عشان السندات واطية جداً ولكن النهاردة أعتقد بعد النزول اللي حصل في 2022 ده يفتح للناس فرصة انها تبتدي تبني محافظ 60/40
تاني أنا مش بقول إن دي أحسن حاجه دي طريقة الناس والخبراء بيتكلموا عليها تقدر تبص عليها وتقدر تشوف الأرقام المختلفة وتقدر تبعتلنا برضه لو عندك أي سؤال أنا حاولت أغطي موضوع الـ 60/40 بطريقة سريعة لأنها من كلاسيكيات الأستثمار وحسابات التقاعد
شكراً جداً جداً على وقتكوا وإن شاء الله أشوفكوا الأسبوع الجاي
Translation of some words and terms:
Financial Advisers المستشارين الماليين
Historically تاريخياً
Balanced portfolio محفظة متوازنة
Index Fund صندوق مؤشر
ETF صندوق استثمار متداول
Fixed Income الدخل الثابت
Direct مباشرة
Growth نمو
Cycle دورة
Minimums الحد الأدنى
Spikes طفرات
Inflationالتضخم
Emergency Fund صندوق الطوارئ
Bonds السندات
Track يتتبعوا
Long Term مدى طويل
Discount تخفيض
Positive إيجابية
Risk مخاطرة
Retirement تقاعد
Asset classes فئات الأصول
Correlation ترابط
Around حول
Concern قلق
Interest فوائد
Articles مقالات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست_بالعربي #المحفظة_الكلاسيكية