84. !بدايات الكلام عن : الأكل والفلوس
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة مختلفة شوية.. وصلتنا رسالة من متابعة لينا حابه تسمع حلقة عن علاقة الأكل بالفلوس.. فـ حلقة النهاردة هي فاتحة كلام في علاقة الأكل والفلوس.. النهاردة الحلقة مش مالية أوي مش هنتكلم بالعوائد والأرقام ولكن برضه في عوائد كتير بتاخدها لما بتظبط نظام أكلك
عادات الأكل اللي اتعودت عليها وأنت صغير بتأثر على حياتك كلها
البدايل الصحية متوفرة في كل مكان!
المعلومات النهاردة كلها متوفرة على الإنترنت
هل الأكل فيه توحيد؟
ترتيب الأكل اللي بتاكله وسرعتك بتفرق!
أنظمة الصيام المتقطع..
النوم من 7 لـ 8 ساعات بيحسن وظايف الجسم
ليه لحد النهاردة مفيش نظام غذائي يناسب الناس كلها؟
لما بتاكل صح مودك وقوة إنتاجك وتركيزك بيختلف
أرتفاع مستويات السكر في الدم بيديك نوع من أنواع الأنبساط المؤقت
إيه الفرق ما بين الأكل الصحي والغير صحي "مالياً"؟
هل الموضوع تنفيذه سهل؟
نتمنى حلقة النهاردة تكون أضافة لكم أي معلومة جديدة ابعتولنا اسئلتكوا واستفساراتكوا وخاصة لو في دكاترة أو ناس متخصصه تيجي معانا بعد كده ونتكلم في الموضوع ده بعمق أكتر
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة حلقة غريبة شوية بالنسبالي وهي جايه من سؤال من حد من المتابعين بتوعنا على الانستجرام بعتلي بيقولي احنا عايزين نسمع حلقة عن علاقة الأكل بالفلوس يعني اللي هو زي الأكل الصحي والوجبات السريعة الغير صحية والحاجات دي كلها
عايز بس قبل ما ابتدي الحلقة اقول إني عمري ما درست طب ومليش علاقة بالطب ، ومش بتكلم هنا من الناحية العلمية على قد ما ببص للموضوع من ناحية فلسفية بشوف إيه المعطيات اللي قدامي أكني بدردش معاكو أو مع واحد صاحبي قاعدين كده بنتكلم في الموضوع
مش هتبقى زي معظم الحلقات اللي بنتكلم على العائد والحسابات بالأرقام والكلام ده كله وإلى حد بعيد هي جايه من تجربتي الشخصية فممكن الحاجات دي يبقى ليها معنى وممكن لأ ، ممكن حد طبياً يهاجم المعلومات اللي بقولها بس تاني أنا معنديش فكرة عن الموضوع ده علمياً أنا بتكلم فيه من وجهة نظري.. يعني نعتبرها دردشة كده
عايز أبتدي الموضوع من واحنا صغيرين ، أي حد من وهو صغير بيبقى ديماً في مرحلة معينة من النمو بتلعب رياضة مثلاً ، بتتحرك كتير ، عندك قابلية إنك تحرق السعرات اللي بتاكلها فمبيبقاش في نظام غذائي معين ، والكربوهيدرات بتبقى مسيطرة طبعاً على معظم الأكل اللي أنت بتاكله وهكذا
انت جسمك ومخك بيتعود على طريقة أكل معينة ، كميات معينة ، ممكن العادات الصحية دي وأنت صغير تأثر على حياتك كلها بمعنى إن لو أنا عندي أولاد وبأكلهم صحي هيبقى جزء من حياتهم ، في ناس تانية عمرها ما أكلت أكل صحي والعادات دي هتفضل متراكمه معاهم فناخد بالنا جداً انك زي ما بتعلم أولادك مبادئ معينة ، حاجات أخلاقية الكلام ده كله.. العادات بتاعة الأكل من أكتر الحاجات اللي بتقعد مع الواحد
فعلى سبيل المثال مثلاً في ناس معينة ممكن تعرف تاكل فاكهة في ناس مبتعرفش في ناس بتحب الخضار ناس مبتحبش مش معنى كده إنك تجبر أولادك ، ولكن احنا وصلنا لزمن أعتقد إن بقى في بدايل لكل حاجه
يعني لو عايز تاكل كربوهيدرات أو سكر في بدايل ، في بدايل أحسن من بدايل يعني ممكن السكر اللي مش مصنع تحاول تبدله بحاجات زي الفاكهة ولو أن برضه في ناس ضد الكميات الكبيرة من الفاكهة بس قصدي النهاردة علمياً بقى عندك أبحاث كتير وعندك حاجات أونلاين تقدر تبص فيها وتعرف إيه المساوئ والعيوب بتاعة كل حاجه وتعمل بحث
الموضوع ممكن يكون غلس شوية أو ممل ولكن المعلومات موجودة واحنا صغيرين الجيل بتاعنا مكنتش المعلومات دي موجودة على المستوى الموجود النهاردة تقدر تفتح الإنترنت كنت لازم تروح لدكتور أو تتكلم مع حد فاهم في الموضوع وتاخد رأيه وهكذا.. فديماً بقول إن المعلومات النهاردة حتى اللي بنقولها على البودكاست كلها هتلاقيها موجودة أونلاين تقدر تبحث تقدر تدور وتقدر تطلع اللي أنت عايزه
فأول حاجه هناخدها هي العادة .. طيب أنا متعود على إيه؟
كل واحد بيسمعني النهاردة هو متعود من وهو صغير بيعمل حاجات معينة هل أنت لحد النهاردة بتعمل نفس العادات؟ غالباً بنسبة كبيرة الحاجات دي موجودة عندك ، الحاجات اللي بتحبها ، الحاجات اللي بتفكرك بزمان بتروح تاكلها ، الأكله اللي البيت كان بيعملها بتحبها أوي وهكذا فناخد بالنا من الحتة دي
طيب إيه اللي بيتغير؟
إن احنا واحنا عندنا 10 سنين غير واحنا 20 و30 و40 قابلية جسمك انه ياخد نفس الحاجات دي بتتغير ودي حاجه انا شوفتها ومكنتش مصدقها يعني مثلاً تاكل أكله معينة عمرها ما كانت بتتعبك ولكن مع الوقت جسمك بقى بيتعب منها دي حاجه حقيقية ، ممكن تكون حاجات بسيطة زي البن أي حاجه مش بتكلم على منتج معين ممنوع مثلاً لأ .. ممكن عيش أبيض مثلاً لما غيرته لعيش نوع تاني جسمك أتبسط وهكذا
هل الحاجات دي كنا نعرفها واحنا صغيرين؟ لأ الحاجات دي بقت موجودة النهاردة
طب هل الأكل فيه توحيد؟
لأ دي بقى الحاجه اللي أنا متأكد منها بمعنى إن في حاجات هتتعبني أنا وممكن متتعبش أخويا اللي هو وراثياً من نفس الأم والأب مع إن احنا الأتنين ممكن يبقى عندنا تطابق في حاجات كتير ولكن جسمنا بيتفاعل بطريقة مختلفة
ودي حاجه شبه الفلوس جداً الحاجات اللي هتريحه غير الحاجات اللي هتريحني.. الاستثمارات اللي أنا هعملها في حياتي ممكن أنا استحمل مخاطرة معين هو ميقدرش يستحمله نفس الكلام في الأكل كل جسم بيختلف واحد عن التاني فأهم حاجه بالنسبالي هنا أعرف أنا مين ، زي ما في الفلوس بحاول أعرف أنا مين لازم في الأكل برضه أعرف أنا مين لازم أعرف إيه الحساسيات أو الحاجات اللي جسمك رافضها
طيب لازم أروح أعمل تحاليل والموضوع غالي؟
لأ مش بقول كده بس أنت ممكن تتابع نفسك بعد الأكل مثلاً أكلت حاجه معينة تقعد تكرر وتعمل تجارب مع نفسك لقيت إن الحاجه دي فعلاً بتسببلك تعب ، لقيت مثلاً اي حاجه فيها ثوم بتتعبتك ، ممكن تتبيله معينة أنت بتحبها جداً بس بعد شوية لقيت أنها بتتعبك
يبقى أول حاجه عايز أقولها ان انت صغير بتكبر بتتغير وجسمك في نفس الوقت بيتغير معاك دي رقم 1 ، رقم 2 أن كلنا مختلفين مينفعش انظمة غذائية جماعية من وجهة نظري .. طبعاً الأبحاث دي حاجه جميلة والأنظمة الغذائية اللي بتظهر كويسة أكيد ليها حاجات علمية ولكن أنت ممكن تكون داخل الموضوع ده مش صح ليك أو مش مساعد جسمك أو مش مريحك
حاجه تانية أبتديت برضه أفهمها إن مش بس نوع الأكل .. ترتيب الأكل اللي أنت بتاكله بيختلف ، يعني لو أكلت إيه قبل إيه ، لو أكلت السلطة قبل البروتين أو البروتين قبل السلطة ، أكلت الحلو أمتى أو لو مأكلتش حلو خالص.. والكلام ده كله بينعكس على جسمك.. السرعة نفسها بتاعة الأكل ، يعني أنا أكلت الحاجات دي على مدار مثلاً نص ساعة أو على ساعة بتفرق
حاجه كمان وهتلاقوها النهاردة مشهورة جداً وهي أنظمة الصيام المتقطع اللي هو بيبقى نفس الطريقة بتاعة رمضان ، نوع من أنواع الصيام المتقطع اللي انت بتاكل مثلاً 8 ساعات في اليوم وبتسيب بقية الـ 16 ساعة مبتاكلش فيهم ده نوع من أنواع الصيام المتقطع ، في نوع اللي هو يوم آه ويوم لأ .. هنلاقي أنواع كتير جداً
في أبحاث بتقول إن النظام ده بيحسن حاجات كتيرة في وظائف الجسم وفي حاجات تانية بتقول لأ عادي ، في ناس بتستخدمه عشان تخس ، ناس بتقول ده بيخسس وناس بتقول مبيخسسش يبقى هنا هرجع واقول كل واحد عنده طريقة معينة لازم انت تعرفها وانت هتعرفها بالأكتشاف انت مش هتكتشف جسمك غير لما تقعد تجرب مهما روحت لدكاترة ومهما قالولك ده أحسن ليك
أنا نزلت 40 كيلو في خمس دقايق ورجعتهم في يومين!! وكل القصص اللي احنا بنسمعها دي أعتقد انها بتبقى راجعة من أنك مش فاهم جسمك ، هل أنت جسمك بيحرق بسرعة ولا مبيحرقش بسرعة؟ الأكل الفلاني بيطلع وزنك بسرعة والأكل الفلاني بينزل وزنك بسرعة ، الله ده الكيتو جميل النهاردة أنا هعمل كل حاجه في حياتي كيتو .. ودي برضه مشكلة كبيرة جداً
الحاجه الكبيرة اللي أكتشفتها موضوع الأكل ده النوم ، زي ما كل الحاجات اللي أتكلمنا عليها بتفرق في استيعاب جسمك للأكل والكلام ده كله .. النوم لو أنت مش عامل عدد ساعات معينة المفروض مثلاً يقال يعني من 7 لـ 8 ساعات وكمان عاملهم بطريقة منظمة اللي هو أنا عندي وقت معين للنوم مش بقول طبعاً انك لازم تكون عايش بهذه الطريقة بس لو دخلت مثلاً في شهر جربت تنام في ميعاد وصحيت في ميعاد وجربت تاكل كويس هتلاقي رد فعل جسمك للأكل مختلف تماماً لأن غالباً يعني وانا مش دكتور لو في دكتور يبعتلي ويقولي بس غالباً لما بتنام أنت بتريح الجسم انه يقدر يعمل وظايفه بشكل أحسن أو أياً كان السبب الخفي ورا الموضوع ده النوم بيحسن وظايف جسمك.. فهنا هو مش أكل بس هو أكل مع نوم مع معرفة نفسك
المتغيرات في الأكل كتير جداً يعني هما ليه النهاردة مش لاقيين أنظمة غذائية تنفع الناس كلها ، أو ليه مثلاً مش لاقيين كبسولة كده يدوهالك وتبقى تمام لأن الموضوع فيه متغيرات كتير في النوم في الجينات بتاعتك في الجودة بتاعة الحاجه بتاعتك هل مثلاً في كيماويات في الحاجات اللي أنت بتاخدها دي ولا لأ ، الحاجات دي أورجانيك (عضوية) ولا لأ.. بحر كبير جداً
فأنا النهاردة مش هعرف أغطي كل الحاجات دي ومعنديش طبعاً العلم اللي أنا أغطي بيه ، بس أنا بفكر فيها أنه ده عائد على الاستثمار برضه ، جسمك ومجهودك وفكرك ده بيأثر عليك في شغلك ، بيأثر على أدائك ، ممكن لما تغير أنظمة أكلك المود بتاعك يختلف ، قوة الإنتاج بتاعك يختلف ، تركيزك في الشغل يختلف ووقتها هتقدر تعمل فلوس أعلى فده تلقائياً هيجبلك فلوس أكتر مع أنها حاجه ممكن متبقاش واخد بالك منها فالهدف من موضوع النهاردة أن أنت تبقى واخد بالك إن أكلك وشربك جزء من الحياة
طب أنا كنت أكتر واحد وأنا صغير أو لحد فترات قريبة أو يمكن لحد دلوقتي حتى بحب أبوظ نظام أكلي زي أي حد بيسمعنا بحب أكل الوجبات السريعة ، بحب أكل أكل سعراته عاليا لأنه بيعمل أرتفاع في مستوى السكر بتاعك بيديك نوع من أنواع الأنبساط وبيخلي جسمك مبسوط وهكذا
ولكن مع الوقت وكل ما الواحد بيكبر بيلاقي رد فعل جسمه بيتغير ، زمان كنت تقدر تستحمل النهاردة لأ أنت ممكن بعد الاكل ده تتعب وتبقى مضايق ويغير المود بتاعك ولما بيحصلك الأرتفاع الجامد في السكر في الدم بعد كده السكر ده بينزل فالنزول ده ممكن المود بتاعك يتغير أو ممكن متبقاش مبسوط وهكذا ، غير مشاكل في الأعضاء تانية كتير
ممكن كمان يأثر على جودة النوم ، زي ما النوم مهم ممكن لو أنا أكلت قبل النوم بطريقة مش صح ممكن يأثر على الجودة بتاعة النوم بتاعتي ويأثر على الجودة بتاعة اليوم بتاعي وهيبوظلي اليوم اللي بعده
طب إيه الفرق هنا ما بين الأكل الصحي والأكل الغير صحي مالياً لو احنا بنتكلم في الفكر المالي بقى؟
الأكل الغير صحي (الوجبات السريعة) هو السعادة في المدى القصير بكرا هصحى مبسوط أو هيقضي ليلة لذيذه لأنه أكل حاجه كويسة والكلام ده كله والأكل الصحي هو زي حساب التقاعد بالنسبالي أنت بتحوش في جسمك بتخلي أنتاجك أعلى بتخليك مطمن على مستقبلك أحسن بتخليك متشوفش أمراض في سن معين لأنها تراكمات صغيرة
بيقولوا آه ده جاله السكر عشان كبر في السن أو جاله الضغط عشان كبر أو جاله القلب مهو ده ممكن يجي في سن معين وممكن يجي في سن أكبر وممكن تزقه شوية لقدام ازاي بحاجات بسيطة صغيرة كتير ورا بعض
هل الموضوع تنفيذه سهل؟ الموضوع تنفيذه صعب وشبه مستحيل عند ناس معينه
نفس الكلام اتكلمناه فيه في حلقة التدخين حسبنا التكلفة بتاعته مالياً عشان أنا أقدر أحسب التكلفة الحقيقية بتاعة التدخين ولكن الأكل مالياً صعب احسبه لأن المتغيرات كتير فهنا أنا مش هتكلم بالأرقام أنا بتكلم في المفهوم
فأختيارك النهاردة أنك تاكل أكل سريع ومش صحي وحاجه هتبوظ جسمك انت أخترت حاجه قصيرة الأجل عن حاجه طويلة الأجل وزي ما بقول ديماً أنا مش عايزك لا ده ولا ده ، مش عايزك تبقى عايش لبكرا الصبح ومش عايز كل حاجه تبقى للانسان اللي هو بعد 50 أو 60 سنة لأن معظم الناس اللي بيسمعونا النهاردة صغيرين أنا عايز يبقى في توازن بين الأتنين عايزك تبقى فاهم انك ممكن يبقى عندك نظام كده ونظام كده وعايزك تدور وكل واحد يدور ويعمل البحث بتاعه إيه الصح بالنسبالك مش اصل هما قالوا دي جميلة لأ أنا عايزك تدور وتعرف إيه الأنظمة الغذائية المختلفة المناسبة ليك وتقعد تجرب فيهم وتشوف جسمك بيتفاعل ازاي وممكن تكتب ملاحظاتك لأن الواحد بينسى
في ناس بشوفهم بره بيقيسوا نسب السكر بتاعتهم مثلاً ياكل أكله معينه ويشوف أرتفاع نسبة السكر في الدم هل الأكله دي بترفعله السكر جامد ولا لأ ، ممكن حد الفاكهة مثلاً ترفعله السكر وواحد تاني بترفعها أقل فسرعة رفع السكر دي مرتبطة أعتقد بالجودة بتاعة وظائف الجسم ، دورة الطلوع جامد والنزول جامد بتفرق في صحة الإنسان نفسه كل ما منحنى السكر بتاعك يكون ثابت حوالين اليوم كل ما يكون أحسن
واحد تاني يقولي أنا نظام الصيام المتقطع ده نافع معايا جداً ومريح جسمي جداً وأنا فايق جداً والكلام ده كله وواحد لأ فبدعو الناس النهاردة من خلال الحلقة دي انها تفكر ازاي الأكل ممكن يكون بيأثر عليها أو مبيأثرش عليها مش هكتب روشته واقولك انا دكتور ودول أحسن حاجات أو علمياً دول أفضل حاجات لأن برضه مع الأسف احنا عندنا تحيزات اننا اروح أدور على البحث اللي موافق أفكاري أنا شايف النباتي ده أحسن حاجه فالدنيا فأنا هروح رايح مدور على كل نباتية فالحياة وأعلقها ، واحد تاني يقولك لأ أنا مقتنع جداً بالكيتو فهجيب كل الأبحاث اللي بتدعم الكيتو أنا مش فارقة معايا لأن مفيش حد هيكسب في الأخر أنت اللي هتكسب لو أكلت بالنظام الموافق جسمك
حاجه أخيره أنا ممكن أتابع الجودة دي ازاي أعتقد بيبقى حاجتين الأحساس الداخلي بيه أنت نفسك حاسس بإيه ، حاسس بتتحسن ، حاسس الأداء بتاعك ، المود ، التركيز الكلام ده كله ولا لأ والحاجه التانية ممكن تعمل حاجات تحاليل دورية على الوضع بتاعك وأعتقد برضه علمياً في مستويات معينة في كل التحاليل المفروض تبقى موجود فيها ، مش مستويات بس مطمئنة لأ ، المستويات كمان المتوقع تلاقيها في سنك فأنت لو عملت التحاليل دي بصفة دورية وفي حاجات بسيطة وتحاليل رخيصة بتعملها عشان تشوف وممكن وقتها تسأل الدكتور إيه أكتر حاجات انا عايز أظبطها عشان موضوع الصحة ده بشكل عام وتقدر تتابعها يبقى أنا هنا عملت إيه أنا جبت النتايج بتاعتي أو العائد بتاعي منين من خلال إحساسي بعد التغير ومن خلال الأرقام اللي انا بشوفها وبحللها
تاني النهاردة مش حلقة مالية أوي ولكن في عوائد كتيرة بتاخدها لما الموضوع ده بيظبط.. تاني هكرر للمرة الرابعة أو الخامسة انا مش دكتور ومعنديش أي فكرة في اللي أنا بتكلم فيه ده دي فقط وجهة نظر وأتمنى الموضوع برضه يكون وداكو في حتة جديدة وهستنى اسئلتكوا وخاصة لو في دكاترة أو في ناس تيجي معايا بعد كده نتكلم في الموضوع ده بعمق أعتقد دي بس فتحة كلام في موضوع الأكل
شكراً جداً جداً على وقتكوا وإن شاء الله أشوفكوا الأسبوع الجاي
Translation of some words and terms:
Junk Food الوجبات السريعة (الأكل غير الصحي)
Mainly رئيسي
Carbohydrates الكربوهيدرات
Level مستوى
Research بحث
Genetically وراثياً
Risk مخاطرة
Allergens حساسية
Reaction رد فعل
Common مشترك
Variables متغيرات
Spikes طفرات
Sugar Crash انخفاض السكر في الدم
Short Term المدى القصير
Cost تكلفة
Balance توازن
Notes ملاحظات
Cycle دورة
Healthiness الصحة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #بدايات_الكلام #الأكل #الفلوس