81. ما وراء السندات
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
.. السندات هي اداة من الأداوات الاستثمارية اللي يمكن أغلب الناس معندهاش خلفية ازاي ممكن تستثمر فيها، ولكن هي أداة بتأثر في حياتنا لأسباب مختلفة
.. إيه هي السندات؟ وأنواعها؟ وازاي تفهمها؟ وإيه هو منحنى السند؟ وحاجات تانية كتير بنتكلم عليها في حلقة النهاردة
01:22 ما هي السندات؟ -
02:43 مدة استحقاق السند -
04:03 هل هو سند حكومي ولا شركات؟ -
05:08 الفرق بين أذون الخزانة وسندات الخزانة؟ -
06:00 هل السند متوافق مع مبادئ الشريعة الإسلامية؟ -
07:16 ما هو التصنيف الائتماني؟ -
08:40 تقييم السندات -
12:13 ازاي سعر الفايدة بيتحدد؟ -
13:13 مين بيستلف أرخص الحكومة ولا الشركة؟ -
14:30 إيه أأمن سندات ممكن تاخدها؟ -
14:53 ليه مروحش أستلف من البنك على طول؟ -
17:13 سعر الفايدة العالمي -
19:06 التضخم -
20:23 أمتى منحنى الفايدة بيتغير؟ -
22:06 هل ممكن منحنى الفايدة يقلب؟ -
22:44 ازاي البنوك بتعمل فلوسها؟ -
25:07 لو أنا مستثمر ومش عارف اشتري سندات، أعمل إيه؟ -
.. حلقة النهاردة ممكن تكون تقيلة ومعقدة شوية بس احنا ديماً بنحاول نبسط المعلومة على قد ما نقدر، أبعتولنا لو عندكم اسئلة أو حابين تعرفوا أكتر عن الموضوع ده
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة أنا هتكلم على موضوع يمكن مبيأثرش في الناس بشكل مباشر كأداة استثمارية الناس يمكن ميكونش عندها خلفية ازاي تستثمر فيها أو ما سمعتش عنها قبل كده بالتفاصيل اللي احنا هنحاول نتكلم بيها النهاردة عليها ، ولكن هو بيأثر في حياتنا كلنا لأسباب مختلفة
هو نوع من أنواع التمويل بيأثر في سعر الأقتراض أو السعر اللي الناس بتستلف بيه وبالتالي بيأثر عليك وبيأثر على الدخل اللي بيخشلك لو أنت عامل نوع معين من الاستثمارات
01:22
النهاردة أنا هتكلم على السندات وده نوع من أنواع التمويل زي ما قولنا احنا ممكن لو بنفتح مشروع أو عندنا فكرة التمويل بيبقى ديماً عن طريقتين ، عن طريقة إني أطرح حصة في الشركة بتاعتي وده بيبقى في شكل أسهم ، النوع التاني إني بطرح سندات والسندات دي بتبقى عبارة عن نوع معين من القروض ولكن القرض ده مش من البنك ، مش بروح استلف من البنك لأ أنا بطرح سند والسند ده بيتداول في سوق ثانوي زي البورصة كده بيداول الدين بتاع شركة معينة أو دولة معينة أو حاجه معينة
الفكرة إن أسعار الأقتراض دي بتأثر زي ما قولنا على مستوى الدخل بتاع المستثمر نفسه اللي هيستثمر في السند نفسه أو في الأداة المالية دي ، فهو العائد بتاعة بيتغير بتغير أسعار الفايدة ، في نفس الوقت لو حضرتك مودع في البنوك ، والبنوك بتروح تستثمر في الأدوات دي فلما الفوايد بتعلى أو بتنزل بتفرق عليك
02:24
فأنا النهاردة هحاول أغطي بشكل عام إيه هي السندات زي ما قولنا هي أداة تمويلية ، وأنواعها وازاي تبص عليها وازاي تفهمها وإيه المنحنى بتاع السند نفسه أو الدولة نفسها أو الشركة نفسها عبر الوقت وحاجات تانية كتير هنحاول نغطيها
02:43
أول حاجه لازم أفهمها في السند ده هو المدة بتاعة السند ، أنا النهاردة لو بطرح سند أنا لازم أدفع للمساهم وأرجعله الفلوس في زمن معين فأول حاجه هنتكلم عليها هي المدة بتاعة السند
أنا ممكن أروح أطرح سندات ، هطرح مثلاً 100 مليون دولار وترجيع الفلوس للمساهمين بعد سنة أو ممكن بعد سنتين أو ممكن بعد 5 أو 10 أياً كان مدة السند يبقى لازم أول حاجه أعرف أمتى الوقت أو المدة اللي الشركة نفسها اللي مستلفة مني بترجع فلوسها
طيب هي بتستلف 100 مليون دولار يبقى أنا متوقع وقت أنتهاء المدة بتاعة السند ده في المثال ده مثلاً 10 سنين الشركة هترجع الـ 100 مليون دولار بعد 10 سنين
العائد بيجي من السندات من حاجه اسمها كوبونات ، بتخش تقرأ كده في نشرة الأكتتاب بتاعة السند اننا موافقين اننا ندفع مثلاً 5% في السنة بس أنا هديك العائد بتاعك يا إما ربع سنوي أو نص سنوي أو سنوي حسب كل نوع من أنواع السندات بيدفع ازاي.. يبقى أنا هنا أول حاجه هفرق بين السندات وبعض بمدة الاستحقاق بتاعتها
04:03
تاني حاجه في التفرقة ما بين أنواع السندات ، هل هو سند حكومي ولا سند شركات؟
هنلاقي إن الحكومات بتطرح دين سواء بالعملة المحلية بتاعتها أو بعملة زي الدولار أو اليورو أو أياً كانت العملة اللي هما أتفقوا مع المساهمين أنهم يطرحوها
طيب الحكومات بتعمل إيه بتروح للبنوك الاستثمارية تقولها يا بنوك أنا عندي مليار دولار أو جنيه عايزة أطرحه أياً كانت العملة اللي احنا بنتكلم فيها ، وبتبعت للمساهمين تقول يا جماعة الدولة الفلانية منزله سند لمدة 5 سنين ، 10 سنين أياً كان بمليار دولار والفايدة أو العائد بتاعة نقول مثلاً 5% والمساهمين دول بيروحوا
طيب النوع التاني هو عبارة عن السند بتاع الشركات ، نفس الكلام شركات مشهورة آبل ، مايكروسوفت ، تسلا أياً كان اسم الشركة عندها القدرة انها تروح لنفس البنوك الاستثمارية دي وتقولها انا عايزة أطرح سند بنفس التفاصيل اللي اتكلمنا عليها
يبقى تاني نوع من أنواع التفرقة هل هو سند حكومي ولا هل هو سند شركات
05:08
طيب لو هو سند حكومي – نرجع تاني للنقطة الأولانية اللي هي عدد السنين المطروحة – لو مدة الاستحقاق بتاعة تحت سنة بنسميه أذون خزانة وهنلاقي الاسم ده أتكرر في حلقات قبل كده ، يبقى لو الحكومة طرحت سند أقل من سنة بيبقى اسمه أذون الخزانة ، ولو المدة بتاعة أطول من سنة بيبقى سندات الخزانة
كده انا جمعت بين الأتنين في الحالة الحكومية بنلاقي إن واحد اسمه أذون الخزانة والتاني اسمه سندات الخزانة بس هما الاتنين سندات للحكومات واحد تحت السنة والتانين أكتر من سنة اللي هو تستحق تاخد فلوسك اللي أنت سلفتها بعد قد إيه
06:00
الحاجه بعد كده اللي هنتكلم عليها لتفرقة السندات دي هل هو سند متوافق مع مبادئ الشريعة الإسلامية ، وزي ما احنا قولنا عشان نطرح حاجه متوافقة مع الشريعة الإسلامية بيبقى في زي هيئة أو مجلس إدارة بتاع السند ده ، ناس بتبص بتشوف اللغة اللي مكتوب بيها الطرح ده شكله عامل ازاي ، الفلوس دي هتستخدم في إيه ، انشطة الشركة.. حاجات كتير بيتابعوها عشان يعرفوا هل هو متوافق مع الشريعة الإسلامية ولا لأ
لو طلع متوافق مع الشريعة الإسلامية بيسموه حاجه اسمها "الصكوك" هنلاقي الكلمة دي ممكن الناس تكون سمعتها في حتت معينة ، الصكوك دي هي نفس السند ولكن متوافق مع الشريعة الإسلامية وبيكون جاذب لنوع معين من المستثمرين ، ولو مش متوافق بيبقى السندات التقليدية العادية وبيبقى جاذب لنوع آخر من المستثمرين
يبقى دي تالت تفرقة بنتكلم عليها النهاردة ما بين أنواع السندات نفسها ، عشان لو جالك سند معين مثلاً تبتدي تشوف وتعرف هو عبارة عن إيه
07:16
الحاجه الرابعة اللي بتفرق السندات عن بعض حاجه اسمها التصنيف الائتماني ، إيه هو التصنيف الائتماني بقى؟
هو عبارة عن في شركات معينة مرخصة دولياً زي مثلاً إس أند بي ، موديز ، فوتسي برضه أعتقد احنا اتكلمنا عليهم وذكرناهم في الحلقة بتاعة القطاعات ، المؤسسات دي أو الجهات دي بتقيم المخاطرة بتاعة كل سند
يعني إيه مخاطرة هنا؟ يعني قدرة اللي بيستلف يقدر يرجع فلوسه ولا لأ .. زي كده ما حضرتك بتروح البنك وتحاول تاخد قرض فـ قسم الائتمان يعملك تقييم ائتماني بيشوف والله الراجل ده بيدفع في وقته ، لأ بيتأخر ، التصنيف الائتماني بتاعة عالي او واطي ، وبنلاقي في دولة زي مصر حاجه اسمها "أي سكور" هي بتقيم التقيم الائتماني بتاعك
في حالة السندات عشان الموضوع يتسهل ، والموضوع عالمي وفيه مساهمين ومستثمرين كتير بنلاقي إن الـ 3 / 4 شركات دول بينزلوا تقييم ، يعني أنت حتى وأنت بتبص على الطرح بتاعك بتلاقي الطرح مكتوب هل هي مقيمة من أنهي مؤسسة ، وأتقيمت أمتى؟ والتقييم بتاعها عامل ازاي .. التقييم بتاعها خلينا نفكر فيه كمثلاً 10 من 10 وحاجه مثلاً 1 من 10 ، 10 من 10 أحسن حاجه
08:40
كل شركة تقييم بيبقى عندها الطريقة اللي بتقيم بيها ، بيشوف مثلاً والله هما عندهم على الميزانية العمومية بتاعة الشركة دي تقدر تدفع ولا لأ ، القروض بتاعتها كبيرة ولا لأ ، تاريخياً بيدفعوا في المواعيد ولا لأ .. نفس اللي بيعمله ليك في البنك بس هو بيعمله على شركة أو على الدولة
يبقى هنا حتى الدول السندات بتاعتها مقييمة يعني هنلاقي إن من أعلى الدول في التقييمات مثلاً دول مجلس التعاون الخليجي ، هنلاقي أمريكا ، هنلاقي الدول اللي هي الرئيسية ، برضه في دول كتير في أوروبا التقييم بتاعها قرب الـ 10 من 10
(AAA) وفي حالة السندات مثلاً تقييم زي تقييم الـ إس أند بي هنلاقي إن أعلى درجات الائتمان ، أعلى تقييم ممكن أي شركة تاخده هو
في بعد كده حاجه اسمها التقييم الممتازة وهو تقييم عالي جداً ولكنه مش أعلى حاجه اللي هو مثلاً نقول من 7 لـ 9 من 10 أو من 8 لـ 9 من 10
(AA+ / AA / AA-) هنلاقي التقييم ده
كده السندات كلها المصدرة بالتقييمات دي تعتبر من السندات القوية
(A+ / A / A-) ننزل بعد كده في حاجه اسمه الدرجة المتوسطة العلوية
كده خلصنا التقييمات العالية
(BBB+ / BBB / BBB-) بعد كده بنخش على التقييم اللي بعده اللي هو الدرجة المتوسطة السفلية
وهنا انت بتلاقي أنك نزلت في جودة التقييم بتاعة السند أو المستثمر هنا هيطلب أكيد عائد أعلى عن الحاجات اللي فوق لأن الحاجات اللي فوق العالية زي تربيل إيه ده راجل مضمون يدفع فهنبتدي ننزل في المقياس هنلاقي العوائد بتبتدي تعلى
ده كده درجات الاستثمار معناها إنك ضامن بنسبة كبيرة جداً انك تاخد فلوسك والناس دي عندها رصيد ائتماني عالي وأنا لو بسلفهم المفروض مبقاش قلقان أوي
(BB+ / BB / BB-) هنخش على الدرجات الغير استثمارية التقييمات اللي تحت هنلاقي
(B+ / B / B-) والاسوأ من كده
C وبعد كده نخش على حرف الـ
(CCC+ / CCC / CCC- / CC+ / CC) اوحش حاجه في المقياس بتاعي
يبقى كده زي الجامعة أو زي أي تقييم أنت بتاخد نتايج ، المؤسسات الائتمانية دي بتصنفك وهنا انا كنت بتكلم على الإس إند بي في فيتش في موديز زي ما قولنا وفي فوتسي ده بشكل عام بس الحروف بتبقى كلها قرب بعض
كل واحد بيبقى عنده طريقة التقييم بتاعتة بس بتفرق في حرف أو حرفين حاجه كده يعني
ولكن أنت هتفهم بكل بساطة أكيد حرف (الإيه) هي أعلى التقييمات وبعدين (البي) وأوحش حاجه (السي) ولكن جوه كل حرف في كذا حاجه زي ما سمعتوا معانا من شوية
11:53
هنا أنا لما هاجي ابص على العوائد بتاعة السيهات أكيد طبيعي هتبقى أعلى من البيهات والإيهات لأن أنا كمساهم أو كمستثمر باخد مخاطرة عالية إن الراجل أصلاً ميردليش فلوسي فدي حاجه بتميز أو بتفرق السندات بشكل عام
12:13
يبقى أول حاجه أتكلمنا عليها احنا ليه بنعمل سندات ولحد دلوقتي غطينا 4 أنواع من الحاجات كل ده انا بجهزك لـ لما أنا باجي أقترض ازاي بقى سعر الفايدة بيتحدد؟
طب تعالوا كده نفكر مع بعض إيه اللي ممكن يعلي الفايدة أو يقلل الفايدة في الأربع حاجات اللي احنا أتكلمنا عليهم لو أنا رايح للسوق كشركة أو كحكومة بقترض
12:39
أول حاجه اتكلمنا عليها في الأربع حاجات هي المدة بتاعة القرض ، الطبيعي لو أنا طلبت منك قرض كمساهم كمان وهرجعهولك بعد سنة غالباً هدفع فايدة أقل من إننا أدفعلك بعد 5 أو 10 سنين أو بعد 20 أو 30 سنة يبقى المفروض العلاقة هنا بين سعر الفايدة كل ما الاستحقاق بتاع القرض نفسه أو السند في الحالة دي الوقت قليل كل ما سعر الفايدة اللي أنا هديهولك كمستثمر واطي
13:13
طيب لو أنا حكومة أو أنا شركة تفتكروا مين هيستلف أرخص؟
في معظم الأحيان أو في كل الأحيان غالباً في حالات قليلة أوي في معظم الأحيان الحكومات بتستلف أرخص من الشركات ، يعني الحكومة الأمريكية لما تطرح سند هتدي للمساهمين بتاعتهم مثلاً 4% والشركات تبتدي تدي من 5% لـ 6 أو 7 أو 8%
فلو السند هنا حكومي المخاطرة بتاعتة تعتبر أقل لأن المساهمين بيحسبوا إن الحكومة دي مضمون يرجعلهم فلوسهم منهم
13:52
بعد كده النوع التالت اللي احنا اتكلمنا عليه وهي إسلامية ولا مش إسلامية ، دي بتختلف يعني ممكن ده يكون مش حاجه اوي تحدد سعر الفايدة يعني ممكن في بنك إسلامي يطرح أغلى شوية من البنك الغير إسلامي والعكس فهي حاجه مش واضحة أوي
14:11
النقطة الرابعة التصنيف الائتماني بتاعها ودي واضحة جداً كل ما يكون التصنيف الائتماني بتاعها عالي المساهمين موافقين ياخدوا فوايد أقل عن الشركات اللي فيها مشاكل أو بتستلف عشان مثلاً عندها مشكلة فالتصنيف الائتماني بتاعها بيبقى واطي
14:30
يبقى أنا النهاردة لو قولتلك إيه أأمن حاجه انت ممكن تاخدها هنقول حاجات أياً كانت المدة بتاعتها بعد سنة بعد 5 أو 10 ولكن حاجه حكومية التقييم الاستثماري بتاعها عالي فكده أنا من ناحية الأمان هيبقى من أعلى الأمان ومن ناحية العائد غالباً ده أقل عائد للمستثمرين
14:53
ليه هنا برضه فكرة التمويل ده يختلف عن البنك ، ممكن تقولي ليه وجع الدماغ ده كله طب أنا ليه بعمل الحاجات دي وليه التعقيد والكلام ده وليه مروحش أستلف من البنك على طول؟
لأن لقوا إنك لما بتروح تستلف من المساهمين ، المساهمين هنا ممكن يقبلوا عوائد أقل شوية من اللي البنك كان هيسلفهم بيها ، يعني أنا شركة في القطاع التكنولوجي في أمريكا آبل مثلاً ، آبل بتستلف من البنك على طول مثلاً بـ 2% هو لو طرح سندات وقال للمساهمين طب أنا عايز استلف بـ 1.75% - أنا بضرب هنا أي أرقام - المساهمين ممكن يوافقوا الـ 25 نقطة الفرق ما بين الفايدتين دول هو أحسن للشركة أنه يعرف يستلف أقل
في حاجه تانية مهمه جداً لما أنا باخد قرض من البنك معظم القروض بكون بدفع كل شهر أو كل 3 شهور أياً كان الأتفاق مع البنك بدفع الفايدة وجزء من راس المال ، في السندات بنلاقي الموضوع مختلف الناس بتدفع في الفترة بتاعة السند نفسه الفوايد فقط وفي الاخر بترجع الفلوس بالكامل
15:57
طب هتقولي مين ممكن يكون مفيد ليه حاجه زي كده؟
أنا مثلاً بعمل تطوير معين بعمل مشروع وبستلف ومش عاوز أطلع تدفقات نقدية كشركتي أدفعه للبنك عايز أخد الفلوس دي كلها استثمرها في مشروع وأنا عارف إن المشروع ده هيتباع مثلاً بعد 10 سنين هيبقى معايا فلوسه بعد الـ 10 سنين دي تغطي المشروع فهقدر ارجعهم بالكامل ، هنا برضه التدفق النقدي بتاع السند بالنسبة لمعظم الشركات يعتبر أحسن
ولكن هنا بيخلي الشركات تعمل حاجه مكنتش بتعملها مع البنوك ، أنت كنت في البنوك بتروح تاخد القرض من مسؤول الائتمان بتاعك بتكلم البنك تقوله انا عايز قرض ، بتقدمله ورقك وبتاخد القرض بتاعك
لما أنا بعمل سند هنا في أختلاف أنا لازم ابتدي أعمل شوية إفصاح زيادة عن اللزوم شوية عن اللي أنا كنت بعمله في الأول
16:44
إيه هو الإفصاح إني بطلع الميزانية بتاعتي بوريها للمساهمين بقول أنا هستلف الفلوس دي ليه ، بخليهم يشاركوا في الفكرة بتاعة السند نفسه هو مطروح ليه
لو أنا شاركت المساهمين في فكرة السند ده فأنا لازم اطلعلهم معلومات وبعد سنة ، سنتين ، تلاتة لازم أطلعلهم ميزانيات فيبتدوا يشوفوا ميزانيتي أكترفده بيبقى عبء على الشركة أكتر انها تستلف من خلال السند ولكن في نفس الوقت هو ممكن يكون أرخص والتدفق النقدي بتاعه بيعتبر أحسن
17:13
سعر الفايدة العالمي بقى بيتحرك خاصة مثلاً الأيام اللي فاتت هنلاقي أسعار الفوايد في العالم بتطلع جامد ، خلينا نتكلم مثلاً على السوق الأمريكي هما بيستلفوا كل يوم تقريباً ، يعني كل دول العالم تقريباً بتستلف كل يوم ، كل يوم بيحصل تسعير جديد لأسعار الفوايد ، الحكومات بتنزل تطرح السوق اللي احنا اتكلمنا عليه المفتوح للمساهمين وتقول يا جماعة أنا عايز أطرح طب السند ده سعره كام؟ سعره كذا
لما بيحصل إن يبقى في طلب عالي على السندات أسعار الفايدة بتقل ولكن لما بيحصل طلب قليل المساهمين مش عايزين يشتركوا أو بيقولوا لأ احنا معندناش فلوس أو مش عاوزين نحط أو مش عجبانا الفايدة دي فبتبتدي الحكومات تعلي سعر الفايدة عشان تغريهم انهم يخشوا فأنا بطرح سلعة النهاردة ومش لاقي حد يشتريها بالسعر ده ، بطرح بـ 10% ومش لاقي حد يشتري فبقول إيه ممكن تاخدوا 11 ، طب 12 ، 13 أياً كان
وبيتعمل بنظام زي مزاد ، المساهمين النهاردة موافقين يدفعوا كام في سعر الفايدة فبنلاقي إنك عبر الزمن أسعار الفايدة بتتغير وده جاي من العرض والطلب على السندات ، طبعاً الحكومات عندها سياسات انها بترفع وبتنزل والكلام ده كله بس هي بترفع وتنزل من خلال الآلية اللي احنا بنتكلم عليها
في أوقات سعر الفوايد بتبقى واطية جداً زي ما شوفنا بعد الأزمة بتاعة 2008 لحد يمكن من سنة كانت الفوايد قرب الصفر في أمريكا واحنا دلوقتي حالاً في دورة جديدة يمكن بقالها سنة من صعود لسعر الفوايد
في فترة الصعود بتاع سعر الفوايد ده المساهم الجديد اللي هيجي النهاردة هو بياخد فايدة أعلى من اللي كان بياخد نفس السند نفس المخاطرة نفس الحكومة نفس كل حاجه ولكن هو بياخد فوايد أعلى بسبب أن اسعار الفايدة زادت
19:06
الحاجة التانية المهمه اللي بتأًثر في توقعات المساهمين وبتخلي أسعار الفايدة تطلع أو تنزل أو الكلام ده كله التضخم اللي احنا أتكلمنا عليه قبل كده كذا مره ، فتوقعات التضخم بتاعة المستثمر ديماً بتأثر في توقعاته في سعر الفايدة اللي هياخدها من السند اللي هيشتريه يعني النهاردة أنا مساهم وشايف في تضخم في أمريكا في الـ 5 سنين الجايين بنسبة 5% مثلاً ، أنا دي توقعاتي يبقى أنا لما هروح مستحيل اشتري من الحكومة الأمريكية حاجه أقل من 5% فلازم الحكومة الأمريكية تغريني وتحاول تطلع سعر الفايدة فوق أسعار التضخم
عشان كده برضه دي حاجه من الحاجات اللي المساهمين بيبصوا عليها ديماً فلو توقعات التضخم في بلد معينة بتعلى حتى التوقعات مش لازم تكون حاجه لسه هتحصل أو حصلت السنة اللي فاتت مثلاً لأ ده السنتين تلاتة الجايين أو الـ 5 أو 10 سنين هنلاقي أنهم بيطلبوا عوائد أعلى كمساهم فمش هيقبل بالأسعار الواطية فتبتدي أسعار الفايدة تطلع ودي حاجه مهمه لازم ناخد بالنا منها إن التضخم بيأثر في سعر الفايدة بطريقة غير مباشرة عن طريق الفوايد اللي بتيجي على السندات من الشركات أو الحكومات ولكن أكتر طبعاً الحكومات
20:23
فالطبيعي إننا مثلاً زي ما قولنا كذا مره النهاردة إن السنة المفروض أستلف هنقول مثلاً 5% ، الـ 5 سنين 7% ، الـ 10 سنين 10% مثلاً دي حكومة بتستلف بالأسعار دي
أمتى بقى المنحنى ده يتغير؟ المنحنى ده اللي هو 1 ، 5 ، 10
تخيل كده هنرسم خط بين سنة و 10 سنين ونحط أسعار الفايدة بتاعة السندات كلها المصدرة على الخط ده فالطبيعي إن أول الخط هتبقى نقطة تحت وأخر الخط هتبقى نقطة فوق على أسعار فايدة أعلى
20:58
طيب أمتى يحصل إن المنحنى ده يبقى فلات (مسطح) أو يتقلب حتى؟
يعني إيه يبقى فلات؟ يعني الحكومة بتستلف في السنة بـ 10% وفي الـ 10 سنين بـ 10% كده الخط بتاعي ثابت هو بيستلف في المدى القصير وفي المدى الطويل مثلاً 10 سنين بنفس سعر الفايدة ده ممكن يحصل؟ آه ممكن يحصل ، بيحصل أمتى بقى؟
لما تكون توقعات التضخم في الدول دي على المدى القصير عالية جداً فالمساهمين اللي بيحطوا فلوسهم في أول المنحنى اللي هو المدة القصيرة مش قابلين أصلاً بالاسعار الواطية خالص دي خلاص الـ 5 والـ 6 والـ 7 خلاص مش عايز الحاجات دي ، أنا عايز أطلع
21:38
وفي حاجه اسمها منحنى العائد أو منحنى الفوائد حاجه مشهورة جداً أي حد أقتصادي عارفها تقدر تفتح تبص عليها هتلاقي هو عبارة عن البلد دي أو الشركة دي أو أي حد بيستلف عبر الزمن قدام بكام في المية وبيرسموا منحنى كده ويشوفوا المنحنى ده شكلة عامل ازاي ، في الظروف الطبيعية زي ما قولنا والحاجات المنطقية اللي مفيش اي حاجه المدى القصير بستلف أرخص من المدى الطويل
22:06
طب هل ممكن يقلب؟
آه ممكن يقلب ، هل السنة ممكن تبقى عالية أكتر من 10 سنين آه ممكن تحصل أمتى بقى؟ لما تبقى أزمة هنا بقى مش بس توقعات بيبقى في أزمة في السيولة بتاعة الدولة دي أو بتاعة الشركة دي انه مش قادر فبيدفع فوايد عالية جداً بس عشان يغطي عجز عنده في الفترة القصيرة
أنا بس بحاول أديك معلومة سريعة كده عن منحنى أسعار الفايدة عالمياً لأن تاني احنا بنقول إن ده بيأثر عليك بشكل أو بأخر بس ده اللي بيحصل في الخلفية أنت مبتشوفوش
22:44
طيب نتكلم بقى على الناس اللي بتسمعنا أنا واحد بروح أحط فلوسي في البنك ، البنك بيعمل إيه؟ غالباً البنك بياخد منك فلوس بتاعتك وبيروح يشتري السندات دي عنده هو وبيعمل الفرق ما بينه كأرباح بمعنى إيه إننا أديتله فلوس وحطتها في وديعة أو حساب جاري أو حطتها في حساب توفير هو بيديك فايدة معينة مثلاً هنقول مثلاً 5% البنك بيروح رايح يشتري في الدولة اللي هو فيها سند بـ 8% بـ 9% بـ 10% الفرق ما بينهم ده نوع من أنواع أرباح اللي البنوك بيعملوها فدي أول حاجه البنك بيعمل منها فلوس
طيب لو أسعار الفايدة في الدولة اللي هو فيها عليت بقى بدل ما بياخد 8 بياخد 12 و 15 هيغريك انت كمساهم أو كواحد مودع في البنك هيقولك لأ أنا عليت الفايدة من 5 لـ 8 وبيقولك إنه مازال هيعمل فلوس من الفرق
عشان ديماً بيجيلي سؤال هي البنوك بتعمل فلوس ازاي أو ازاي بيكسبوا والكلام ده كله ، هو غير انه بيسلف ناس تانية غيرك في البنك هو برضه بيروح يشتري الأذون والسندات دي وبيحطها عنده .. ليه؟ لأنه بيحاول برضه يوزع المخاطر مش عايز يسلف كل الفلوس اللي هو أخدها منك يسلفها لناس زيك عندها مخاطرة عالية مثلاً أو أفراد أو كده فبيحاول يوزع انه ياخد شوية سندات للحكومات أو للشركات أو أياً كان طريقة الإدارة بتاعة المخاطر بتاعته فده أول حاجه أسعار الفايدة بتأثر عليا مباشرة
24:14
الحاجه التانية اللي بتفرق القوة بتاعة العملة بتاعة الدولة نفسها لما الدولة بيبقى عندها ائتمان عالي ، درجة ائتمانية عالية اللي هو في التصنيف الائتماني اللي هما التلاتة اللي اتكلمنا عليهم
AAA - BBB - CCC
الدول اللي عندها تصنيف ائتماني عالي جداً بتبقى مركز استثماري سهل لاني هبعت فلوسي وهعرف اخدها أو الحكومة دي مفهاش مشكلة وهكذا ، فبتفرق تاني التصنيف الائتماني على السيولة بتاعة الدولة والفلوس اللي دخلالها من بره والتجارة وحاجات كتيرة جداً فبالتالي طبيعي بيفرق في قوة العملة المحلية بتاعة الدولة دي ، يعني كل ما بنلاقي الدول التقييم بتاعها عالي غالباً الأقتصاد بتاعها مستقر أو بنلاقي العملة المحلية بتاعتها فيها شوية استقرار
25:07
طيب الحاجه الأخيرة بقى انا لو مستثمر ومش عارف اشتري السندات دي احنا قولنا قبل كده كذا مره انك ممكن تشتري أذون خزانة من البنوك وحاجات من هذا الشكل مباشرة.. طب لو أنا مش عايز؟
في صناديق استثمار بتبقى شغالة بس في السندات أو في الدخل الثابت حضرتك لو حابب تستثمر في هذا النوع من الصناديق النهاردة انت تقدر تسألهم هل الصناديق دي بتشتري حاجات قصيرة؟ بتشتري أذون خزانة ولا سندات؟ طويلة ولا قصيرة؟ حكوميات ولا شركات؟ التصنيف الائتماني بتاعك عامل ازاي؟
لما نبص على الصندوق كله هل هو صندوق استثماري عالي ولا واطي؟ هل هو بيشتغل في منطقة جغرافية معينة في العالم ولا في دولة بعينها؟ وهكذا
فأنا النهاردة ممكن استخدم صناديق الاستثمار كطريقة اننا استثمر في السندات بهذا الشكل أو زي ما بنقول على طول في صناديق المؤشرات المتداول على البورصات ، الصناديق دي برضه بيبقى عندها نشرة بتقول أنا هشتري أفتراضاً مثلاً هشتري الحاجات الأعلى مخاطرة
(BB) او (BBB) اللي هي مثلاً
أياً كان دي حاجات تصنيفها الائتماني مش عالي في الدول الفلانية والمدة بتاعتها متوقع اننا نشتري حاجات مثلاً 5 ، 7 سنين فهنلاقي أنواع الصناديق المتداولة لا نهاية ليها عندنا مئات الصناديق اللي ممكن تشوفها على البورصات المختلفة وهي هتقولك هي بتستثمر في إيه
دي برضه كانت حلقة انا عاملها كده عشان الناس اللي عايزة تسمع عن أدوات الدخل الثابت ده كده مدخل بسيط أنا عارف إن الموضوع معقد شوية وممكن يكون فيه معلومات كتير ولكن أنا عايزك تبقى عارف لو أنت بتشتري صندوق معين إيه الاسئلة اللي انت ممكن تسألها ، إيه المخاطر اللي انت بتاخدها ، هل بتاخد شركات ، لأن برضه ممكن نلاقي صناديق بتتعمل بس للحكومات
يعني في صندوق من أكبر الصناديق المتداولة في أمريكا اللي هو تي إل تي ده عبارة عن سندات اسهم حكومية أمريكية فوق الـ 20 سنة فمثلاً ده نوع من أنواع الصناديق في زيه بس اللي هو المتوسط وفي زيه بس القصير
زي أي حاجه تانية في مخاطرات بتحصل جوه الصناديق دي ، الصناديق دي أسعارها بتطلع وبتنزل بس أنا كل اللي بحاول أوريهولك إيه هي الحاجات دي يمكن أنت برضه تسمع الكلام ده وتاخده تشوف بيه حاجه أنت مكنتش شوفتها قبل كده فتستفيد وانت بتاخد قرار استثماري بتاعك
يارب الحلقة دي متكونش تقيلة أو معقدة ومفهاش مفاهيم أنا حاولت برضه أكسرها على قد ما أقدر لو حابين تعرفوا أكتر عن الموضوع ده وعندك أي اسئلة خاصة بالحالة بتاعتك ديماً أبعتولنا على الصفحة بتاعتنا وبإذن الله اشوفكوا الاسبوع الجاي شكراً جداً
Translation of some words and terms:
Directly مباشرة
Level مستوى
Curve منحنى
Maturity Date مدة الاستحقاق
Example مثال
Prospectus نشرة
Treasury bills أذون خزانة
Treasury Bond سندات الخزينة
Shariah Compliant متوافق مع الشريعة الإسلامية
Board مجلس
Conventional Bonds السندات التقليدية
Credit Department قسم الائتمان
Balance Sheet الميزانية العمومية
Investment Grade Prime الدرجات الاستثمارية الممتازة
high- grade bond سندات ممتازة
Upper Medium Grade الدرجة المتوسطة العلوية
Lower Medium Grade الدرجة المتوسطة السفلية
Scale مقياس
Investment Grades الدرجة الاستثمارية
A non-investment grade السندات غير المستثمرة (السندات غير مرغوب فيها)
Risk Free خالية من المخاطرة
Development تطوير
Cash flow تدفقات نقدية
Credit Officer مسؤول الائتمان
Auction مزاد
Cycle دورة
Flat Curve منحنى مسطح
Yield curve منحنى العائد
Stability استقرار
Fixed Income دخل ثابت
ETFs صناديق المؤشرات المتداولة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #ما_وراء_السندات