78. العقارات كاش ولا تقسيط
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بنتكلم النهاردة عن قطاع العقارات ، ولأن شرا عقار من القرارات المهمه والكبيرة وفي ظل وجود مشاريع عقارية كتيره جداً ابتدت تظهر في السوق بتطرح خطط دفع طويلة بتوصل لـ 15 سنة.. ازاي نقدر نقارن بين وحدتين عقاريتين أو أكتر بخطط دفع مختلفة؟
01:27 طريقة جديدة للمقارنة بين وحدتين عقاريتين
01:45 هل اشتري العقار كاش ولا تقسيط؟
02:40 القيمة الحالية للتدفقات النقدية
05:57 ليه نحسب "السنة صفر"؟
07:29 هل الوحدة متشطبة ولا لأ؟
08:27 معادلة القيمة الحالية
09:06 يعني إيه تكلفة الفرصة البديلة؟
10:22 هل معادلة القيمة الحالية بتطبق على السنة صفر؟
12:55 الفايدة والعائد الخالي من المخاطرة
15:34 ليه اشتري بخطة تقسيط لو ممكن أشتريها كاش؟
16:49 معلومات استخدام الإكسيل شيت
18:12 قوة مفهوم القيمة الحالية في إتخاذ القرارات في المستقبل
احنا النهاردة بنقارن بين الوحدات مالياً فقط ، اما المقارنة من حيث جودة الوحدة والمشروع والموقع وحاجات تانية كتير ممكن نتكلم عليها في حلقة تانية إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
اهلاً بيكوا في حلقة جديدة من بودكاست كلام ينور
حلقة النهاردة عن قطا العقارات عموماً بالذات الناس اللي عايزة تشتري بيوت أو أول مره تاخد القرار ده ازاي تقدر تقارن ما بين كذا مشروع ، النهاردة احنا عارفين إن في مشاريع كتيره جداً بتطرح خطط للدفع طويلة ابتدت تظهر في السوق وبنشوف حاجات لحد 15 سنة فإزاي مثلاً تقدر تقارن خطة دفع 8 سنين و 15 سنة ، يعني أنا لو جيت قولتلك في بيت قدامك ممكن تاخده قسط على 8 سنين أو على 15 سنة هل الحاجه اللي هتفرق ما بينهم بالنسبالي هو السعر ولا لأ؟
01:27
في الحلقة دي أنا عايز أوريك طريقة جديدة تقدر تقارن بيها البيوت عشان نقارن في الأخر الحاجات كلها بنفس المنطلق يعني بنوحد طريقة المقارنة مش بس في السعر ، ومش بس في سهولة الدفع لأ أنا عايز أعلمك طريقة دفع جديدة النهاردة
01:45
برضه الحاجه اللي احنا هنستخدمها النهاردة هتخلينا نفكر هل ندفع العقار ده كاش ولا ناخد خطة الدفع اصلاً؟ يعني لو الشركة المطورة بتقولي خد الحاجه دي بـ 1000 أو أدفعها 1500 على كذا سنة ، هل الـ 1000 دي اصلاً سعر كويس إني أخده ولا لأ ، هل هما مش هقول بيضحكوا عليا بس بيحاولوا يدوني تخفيض أقل من المطلوب؟ ولا أعلى من المطلوب؟ في حالات كده وفي حالات كده فأنا عايزك من الحلقة دي تعرف ازاي تاخد القرار ده
02:20
قرار شرا العقار قرار مهم وقرار كبير ولو بصينا للقرار ده من منظور اخر ممكن يسهل عليك حاجه مثلاً تكون فاكر إنك مش قادر تشتريها ويطلع لما تحط الأرقام على إكسيل شيت أو تبص على الحاجه بشكل مختلف يمكن تطلع تقدر قادر على شرا الحاجه دي
02:40
هنمشي مع بعض كده والمبدأ بتاع النهاردة القيمة الحالية للتدفقات النقدية ، يعني أي تدفقات نقدية في المستقبل أنا ملزم إني أدفعها لازم أجبها لسعر النهاردة
يعني إيه الكلام ده؟
احنا كنا أتكلمنا في حلقة قبل كده إننا بناخد مثلاً استثمار النهاردة وبنحاول نعرف قيمته في المستقبل قد إيه لو عملنا عوائد بشكل معين
يعني أنا حطيت 100 ألف النهاردة في استثمار معين وقعد يكبر بـ 7% فبعد 30 سنة سعره هيبقى قد إيه ده احنا أتكلمنا عليه كتير قبل كده في حلقات مختلفة ليها علاقة بالاستثمار والعقار قبل كده اتكلمنا على المفهوم ده اللي هو القيمة المستقبلية للفلوس
03:26
أنا هنا هعكس الموضوع أنا عايز أجيب القيمة اليومية للفلوس ، النهاردة لو أنت أدتني تدفقات في المستقبل على مدار 10 أو 15 سنة عايز ارجعها النهاردة هي تسوى كام بالجنية أو بالدولار أو بالريال النهاردة ، فهنرجع كل التدفقات دي من المستقبل السنة الأولى هنرجعها للنهاردة ، السنة التانية هنرجعها للنهاردة ، والتالتة للنهاردة وهكذا لحد السنة العاشرة مثلاً لو الحاجه دي بتدفعها على 10 سنين هنرجعها للنهاردة يسوى قد إيه بالدولار أو الجنية المبلغ اللي أنا هدفعه في السنة العاشرة دي النهاردة وهنجمعهم بمنتهى البساطة وهنلاقي القيمة الحالية بتاعة الفلوس
04:09
عشان نسهل على الناس الموضوع هنزل في الحلقة دي إكسيل شيت تقدر تتابع معايا الخطوات اللي هنتكلم فيها دلوقتي ولو برضه مش عايز تبص على الإكسيل شيت احنا هنحاول نمشي معاك ونخليك تتخيل هو إيه الإكسيل شيت ده وفيه إيه هنمشي مع بعض واحده واحده في النقط لمقارنة مثلاً وحدتين ببعض بطرق مختلفة
04:38
أول حاجه متعارف عليها انك لما بتكلم شركة عقارات في مشروع معين بيوريك الوحدة جميلة ، روعة ، الموقع كل ده مش مشكلتي النهاردة انت اخترت وحدتك وبعتلك الراجل خطة الدفع بتاعتك أو طريقة الأقساط بتاعتك شكلها عامل ازاي
في المنطقة العربية الموضوع ده موجود في كل حته لأن في مجتمعات عمرانية أو في أماكن جديدة بتتبني كل شوية ففي مطورين كتير محتاجين يبنوى حاجات والمستهلك في الأخر بيتمول عن طريق الشركات العقارية دي
فالمثال الموجود أعتقد كل الناس هتبقى فاهمة أنا بتكلم في إيه يعني مش هتبقى حاجه غريبة فالراجل بيبعتلك يقولك سعر الوحدة كذا متفق عليه ، والمقدم بتاعك نقول مثلاً 10 أو 12% متفق عليه مفيش مشكلة وبيقولك نوع الوحدة هل هي متشطبة أو مش متشطبة
المعلومات دي هنحطها أول حاجه في الإكسيل شيت بتاعنا فهو على سبيل المثال قالي الوحدة بتاعتك بـ 2 مليون أياً كانت العملة اللي هنتكلم عليها ، وهنحط مقدم 15% وهنقول أنها وحدة متشطبة هيسلمهالي أقدر أعيش فيها على طول عشان بس المثال الأول ده عايز أسهل الموضوع شوية
05:57
بعد كده هنزل هلاقي عدد السنين هو هيديني جدول بيقولي السنة الأولى أنت هتدفع كذا ، والسنة التانية كذا ، والتالتة والرابعة لحد السنة العاشرة في المثال بتاعنا هنا هنتكلم على 10 سنين السنة صفر بالنسبالي هي سنة 2022 لأننا باخد القرار بتاعي النهاردة فدي تعتبر بالنسبالي السنة صفر وبعدين السنة 1 ، 2 ، 3 .... لحد 10
وهقولك السنة صفر دي احنا ليه حسبنها سنة صفر.. عشان احنا هنحط فيها المقدم فهنعتبر في السنة الأولانية اللي خارج مني بس المقدم
06:29
طيب هنيجي على السنة الجاية 2023 في شركات بتقولك انت ممكن تدفع شهري ، ممكن تدفع ربع سنوي ، نص سنوي ، سنوي أياً كان انا مش فارق معايا هنا مش عايز أخش في تفاصيل أصعب من كده فهجمع السنة كلها وهقول الراجل بيقولي مثلاً أدفع 150 ألف جنيه في السنة
في سنة 2023 برضه لو أنت ماشي معايا في الإكسيل هتلاقي السنة رقم 1 اللي هي 2023 مفيش بقى مقدم لأن المقدم كان السنة اللي فاتت ، تحتيها في الأقساط السنوية اللي عليا اللي هي الـ 150 ألف جنيه
07:02
وبعدين هحط سنة 2024 و2025 وبعدين وانا بحط 2026 لقيت في الجدول دفعة إستلام مثلاً فالراجل عايزني أدفع 150 ألف اللي أنا بدفعهم سنوياً عادي بس عايزني أدفع 10% دفعة إستلام ففي السنة الرابعة هنا حطيت 200 ألف زيادة أكنهم دفعة الاستلام فاللي أنا هدفعه في السنة دي بقى 350 ألف
طيب السنة الخامسة ، السادسة ، السابعة لحد السنة العاشرة حطيت
07:29
بعد كده هل الوحدة دي متشطبة ولا لأ؟ ده السؤال اللي وراه اللي أنا هسأله لنفسي هنا في المثال الأول اللي بنتكلم عليه احنا بنقول انها متشطبة فالتكلفة للتشطيب أو إنها تبقى وحدة جاهزة للسكن هو صفر في كل السنين مش هدفع حاجه في السنين المستقبلية
لأن في المثال التاني أنا عايز أزود خطوة هنا إني هعمل تكلفة الانتهاء أو التشطيب
07:54
وبعدين هلاقي صف تاني تحتيه بيقول المدفوعات السنوية بالكامل ، فهنلاقي في 2022 دفعت المقدم بس اللي هو 300 ألف اللي هو 15%
بعد كده السنة الأولى دفعت 150 ، التانية 150 ، التالتة 150 ، في السنة الرابعة 350 عشان دفعة الإستلام وبعدين 150 لحد السنة العاشرة
لحد هنا الموضوع سهل ومفهوش أي مشكلة كمفهوم كلنا عارفين الموضوع ده ممكن نجيب الكلام من شركات العقار نحطه على إكسيل ونبص على التدفقات النقدية بتاعتي قدام
08:27
اللي هزودة بقى في الحلقة دي وهو ده النقطة اللي بتخليني أقلب المدفوعات دي للنهاردة هو القيمة الحالية ودي معادلة بسيطة أنا كاتبها جوه الإكسيل لو حابب تبص عليها هي بسيطة جداً بتجيب التدفقات النقدية اللي هي مجموع المبالغ المدفوعة اللي احنا قولنا هندفعه كل سنة وهنرجعه لقيمة النهاردة
يعني إيه قيمة النهاردة؟ يعني الـ 150 ألف اللي انا هدفعهم في السنة العاشرة قيمتهم النهاردة كام ، لو حد عرض عليا عرض قالي أنا ممكن أتنازل عن الـ 150 في السنة العاشرة النهاردة أديهملك كام؟ ده سؤال مهم جداً
09:06
طيب عشان أنا أعرف القصة دي أقدر أحسبها ازاي محتاج أحط حاجه اسمها الفايدة المتعارف عليها أو تكلفة الفرصة البديلة بتاعتي يعني إيه تكلفة الفرصة البديلة؟ يعني لو أنا مستثمرتش في العقار ده أنا كنت ممكن أروح أستثمر في أذون خزانة أو أحطهم في الدولة اللي أنا فيها بعيداً بقى عن هل أنا هعملها بطريقة إسلامية أو بطريقة غير إسلامية دي ترجع لكل واحد ولكن لازم استخدم هنا الفرصة البديلة بتاعتي جايه ازاي
الفرصة البديلة هنا هو نسبة الخلو من المخاطر بتاعة كل دولة وده بيتحدد عن طريق الفوايد زي ما أتكلمنا قبل كده في كذا حلقة
09:50
لو أخدنا مثلاً على سبيل المثال بلد زي مصر هنقول مثلاً إن الفايدة بتترواح مثلاً من 10% لـ 14% على حسب الزمن اللي احنا فيه هاخد أي رقم مثلاً 13% فهنحط في الإكسيل شيت بتاعنا في خانة المقدم لو أنت ماشي معايا كلمة فايدة 13% نسبة الخلو من المخاطر هنا هو ده البديل بتاعي زي ما قولنا ده الفرصة البديلة
10:22
نيجي على المقدم اللي هي السنة صفر هل أنا هرجع الفلوس من زمن قدام للنهاردة ولا دول هيدفعوا كده كده النهاردة؟ هيدفعوا النهاردة فهنلاقي لما نحط المعادلة على الـ 300 ألف اللي هما المقدم بتاع السنة الأولى هنلاقي القيمة الوقتية النهاردة هما الـ 300 ألف لأننا بدفعهم النهاردة فمفيش مشكلة
طيب لو روحنا للسنة رقم 1 اللي هي أول سنة في المدفوعات بعد المقدم الراجل طلب مني 150 ألف هرجع الـ 150 ألف للنهاردة هنلاقيهم على الحسبة اللي احنا بنتكلم فيها تقريباً 132.700 وشوية ، يعني القيمة اليومية بتاعة 132.700 لو أنا حطتهم في البنك بالفايدة اللي أنا حطتها في الإكسيل دي هيبقوا آخر السنة 150
طب السنة 2 الـ 150 بتاعتنا هتبقى 117 وشوية ، طب السنة 3 هنلاقيها قرب الـ 104
طيب السنة الرابعة اللي أنا عندي فيها 150 و200 دفعة إستلام يبقى هدفع 350 ألف قيمتهم النهاردة 215 ... لحد ما نوصل للسنة العاشرة
السنة العاشرة هنلاقي الرقم 150 ألف النهاردة قيمتهم السوقية أو لو حد هيشتريهم مني على فايدة 13% 44 ألف وشوية
11:37
يعني النهاردة تلت الرقم ده هو بعد 10 سنين ليه؟ لأن أنا هنا لو أخد الـ 45 ألف واستثمرتهم وعدت أستثمارهم كذا مره لحد ما أوصل للـ 10 سنين هيوصولني للـ 150 ألف
11:53
كده انا جبت القيمة المستقبلية اللي هي المدفوعات اللي أنا جبتها جبتلها القيمة الحالية بتاعتها النهاردة الـ 300 ألف أو الـ 150 ألف أو أياً كان الرقم هرجعه لسعر اليوم
قدامك كده على الإكسيل شيت هتلاقي الـ 10 سنين كلهم جنب بعض لو جمعتهم بمنتهى البساطة كده هنلاقي إننا جبت القيمة الحالية للوحدة بتاعتي
12:15
يعني الوحدة بتاعتي النهاردة أنا كنت متخيل انها بـ 2 مليون جنيه على سبيل المثال ومستخدم أنا الفوايد بتاعة مصر هنلاقي إن القيمة الحالية بتاعتهم النهاردة1.236 وشوية
12:28
يعني لو شركة العقارات أول حاجه لو عرضت عليا رقم أننا ادفع كاش في نفس الوحدة دي بنفس خطة الدفع وقالتلي تعالى خدها كاش النهاردة بـ مليون و500 بدل 2 مليون يبقى هما مديني فايدة أقل أو مش مديني التخفيض اللي مفروض أخده
لو واحد قالك خدها بـ مليون و200 يبقى غالباً هتعمل الفرق الصغير ما بين الرقمين ده ، طب لو بمليون جنيه يبقى أكيد أخدها لأنها أرخص من القيمة الحالية بتاعتي
12:55
تقدر تلعب في الفايدة أو في العائد الخالي من المخاطرة اللي احنا بنتكلم عليه تعليه أو توطيه تعرف كده الفايدة بتاعك قد إيه المطلوبة اللي أنت المفروض تاخدها في التخفيض بتاعة اللي الشركة محسباك قد إيه في السنة قيمة الفلوس بتاعتك
13:13
تعالى بقى ناخد مثال تاني بنفس تقريباً الأقساط السنوية ولكن طريقة الدفع مختلفة يعني المثال الأول اللي أتكلمنا فيه دلوقتي هي شقة على 10 سنين بدفعلها تقريباً 150 ألف جنيه في السنة بمقدم 15%
هاجي للمثال التاني الشقة هنا بمليون ونص يعني هي أرخص بنص مليون وهدفع مقدم 15% فالـ 15% هنا ثابتين ولكن في قيمتهم هيبقوا أقل هدفع 225 ألف وبعدين هدفع الأقساط السنوية اللي احنا أتفقنا عليها 150 ألف جنيه في السنة
13:47
لقيت بعد كده عندي قسط أستلام برضه في السنة الرابعة ، احنا ديماً بنقول السنة الرابعة دي المتفق عليها إن الناس بتستلم فيها هلاقي عندي قسط استلام أعلى شوية 225 بدل 150 سنوية ووقتها أنا محتاج أشطب الشقة وأحط فيها نص مليون جنية تشطيب
14:05
يبقى سعر الشقة كان مليون ونص وهحط نص مليون تشطيب في السنة الرابعة فالإجمالي في الأخر اللي خارج من جيبي 2 مليون برضه ولكن زي ما قولنا هي الأقساط واحده ولكن الأولانية على 10 سنين والتانية على 8 سنين ومش متشطبة فأنا محتاج أشطبها في السنة الرابعة
14:25
لما حطيت الأرقام بتاعتك بنفس الطريقة ومشيت معايا في الإكسيل نفس الكلام كله بالظبط هنلاقي إن الشقة رقم 1 أرخص .. ليه؟ لأن احنا جبنا برضه القيمة الحالية بتاعة المدفوعات دي كلها مع إن الشقة الأولانية مقدمها اعلى ، أقساطها تقريباً واحدة مع الشقة التانية ولكن التشطيب هنا لما قسطة على 10 سنين ريحني شوية دي أول حاجه كتدفق نقدي
والحاجه التانية إن الشقة رقم 2 احتاجت رقم كبير في السنة الرابعة
هنلاقي الشقة الأولى مليون و236 ده الرقم اللي قولنا عليه في الأول ، والشقة التانية قرب مليون و300 يبقى الشقة دي فعلياً أغلى بـ 70 ألف جنيه في القيمة الحالية بتاعتها النهاردة عن الشقة الأولانية مع إنهم هما الأتنين لو حد عرضهم عليك ممكن تقوله لأ أنا هاخد الشقة اللي بمليون ونص عشان أرخص أنا هقدر أدفعها ولكن هنلاقي إن مش ده ديماً اللي بيحصل انت ممكن تلاقي شقة شكلها أغلى ولكن الشروط بتاعتها وطريقة الدفع بتاعتها لما ترجعهم للنهاردة القيمة بتاعتك هتلاقيها أرخص
15:34
واحد يقولي أنا ليه بعمل الكلام ده كله أنا ليه أخد خطة تقسيط مانا ممكن أخدها كاش؟ معنديش مشكلة خد الحاجه كاش أولاً طبعاً لازم يبقى معاك الفلوس تاني حاجه الشركة تديك عرض أقل من القيمة الحالية بتاعها النهاردة لأن أنت مش هتعمل أي حاجه هتروح تحط الفلوس الكاش بتاعتك في البنك مفيش مشكلة وتاخد الفوايد بتاعته تدفع الأقساط بتاعتك لأنها هتغطي
طب أمتى معملش كده؟ أمتى مروحش احط فلوسي في البنك؟ لو الشركة مدياني عرض أقل زي ما قولنا المثال بتاع لو الشركة بتقولي خدها بمليون وهي بمليون و200 لأ اخدها من الشركة على طول بمليون أحسن ومش لازم استثمر فلوسي خلاص لأن العائد بتاعي هنا يعتبر أعلى
16:15
طب واحد قالي أنا عايز أشطب الشقة دي السنة الخامسة مثلاً فهيعمل إيه؟
هياخد الـ 500 ألف دول هنقلهم للسنة الخامسة أو السنة السادسة أو ممكن يقولي أنا هدفع شوية في السنة الرابعة وشوية في السنة الخامسة أنا مش مستعجل فهتقسم الرقم ده
تقدر أنت تلعب في الإكسيل شيت وتحط اللي أنت عايزة تزود / تقلل عدد السنين دي أمثله بس عشان أفهمك المفهوم بتاع العقارات ازاي بتشتريه ، ازاي تقدر تقارن الموضوع مهم وفي نفس الوقت بسيط
16:49
عايز أقول برضه معلومات كده بشكل عام في الاستخدام بتاع الإكسيل شيت ..
أي حاجه باللون الأصفر دي أنت ممكن تغيرها ممكن تزود الأرقام زي سعر الوحدة وكل الأقساط بتاعتك
أي حاجه باللون الأزرق زي المقدم مثلاً ده محسوب نسبة من سعر الوحدة فأنت لما تحط النسبة وتحط سعر الوحدة هيطلعلك سعر المقدم على طول فده انت مش محتاج تحطه
الحاجات التانية كلها اللي مش عليها أي ألوان معناها أنها بتتحسب تلقائي يعني في معادلة بتحسبها
وبعدين آخر حاجه باللون الرمادي القيمة الحالية أو الإجابة اللي احنا بندور عليها في الحلقة دي
فده توضيح للألوان بتاعة الإكسيل شيت ، برضه من الحاجات اللي احنا انت ممكن تحط تكلفة الأنتهاء أو التشطيب تغيره في عدد السنين برضه خانات صفرا فأنت تقدر تحطها في الأول في الأخر على حسب اللي أنت عايزه مفيش مشكلة خالص
نفس الكلام تقدر تمد السنين يعني ممكن تعمل إضافة أعمدة زيادة وتحط السنة الـ 11 و12 لحد الـ 15 لحد السنة الـ 100 لو حابب مفيش مشكلة
بعدين بتجر المعادلة عشان تحسب معاك القيمة المستقبلية بتاعتك
اتأكد برضه لو هتغير الحاجات دي اتأكد إنك بتغير الخلايا المظبوطه والصح وإن شاء الله الموضوع هيبقى سهل
18:12
ديماً بقول لو حد عنده مثال معين معقد شوية أو مش عارف تحسبه ديماً تقدر تبعتلنا على الصفحة بتاعتنا تقدر تبعتلي ديماً على الإنستجرام أو على فيسبوك ممكن احاول أساعدك بس أعتقد الموضوع بسيط ، تقدر تشوف برضه على يوتيوب وعلى أماكن كتير جداً ازاي تحسب القيمة الحالية لو مثلاً حاسس إنك مش فاهم الموضوع أوي أنا بس بحاول أفتحلك الباب إنك تفهم يعني إيه القيمة الحالية لأن قوتها كويسة جداً في إتخاذ القرارات في المستقبل عموماً خد أي حاجه قدام هتتعرض عليك وحطها في الإكسيل شيت ده ، أي فكرة حتى لو مشروع أنت بترجع الفلوس للنهاردة
نقدر نطبق الكلام ده على كل الوحدات ، وحدات التجارية اللي هي لو بتشتري محل ، لو بتشتري مكتب ، لو بتشتري شقة هي تدفقات نقدية أنت هتدفعها رجعه للنهاردة قارن ما بين 10 وحدات لو حابب ، قارن ما بين 50 وحده لو عايز طبعاً منصحش بكده عشان متدوخش يعني وأختياراتك تبقى صعبة بس ده من الناحية المالية ازاي تقدر تقارن وحدات
بالنسبة للجودة بتاعة الوحدة ، المشروع ، المكان ، بتبص على إيه ، المستقبل بتاع المنطقة دي حاجات تانية كتير جداً ممكن نتكلم عليها في حلقة تانية بس أنا النهاردة كنت عايز أتكلم معاكوا على بس مالياً ازاي أبص على وحدتين أو أكتر
شكراً جداً على وقتكوا يارب الموضوع يكون أتسهل عليكوا متصعبش انا شايفه سهل إن شاء الله تكونوا حاسين بنفس الحاجه.. شكراً جداً
Translation of some words and terms:
Payment Plansخطط الدفع
Developer المطورة
Discount تخفيض
Afford قادر على شراء شيء
Present Valueالقيمة الحالية
Cash Flows التدفقات النقدية
Future Value القيمة المستقبلية
Location الموقع
Down Payment المقدم
Annual Payments المدفوعات (الأقساط) السنوية
Cost to Finish تكلفة الانتهاء
Row صف
Concept مفهوم
Formula معادلة
Total Paid مجموع المبالغ المدفوعة
Interest الفائدة
Risk Free Rate عائد خالي من المخاطرة
Terms شروط
Unit الوحدة
Automatic تلقائي
Columns أعمدة
Cells الخلايا
Commercial التجارية
Quality جودة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #القيمة_الحالية