79. من أنتم؟ (2) نحن نعلم عنك الكثير
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
من وقت ما بدأنا كلام ينور وكل فترة كده بنحب نعمل زي "استطلاع" بسيط كده على صفحتنا على إنستجرام عشان نشوف بشكل عام إيه التأثير اللي احنا بنعمله والتطورات اللي بتحصل معاكم ، ونسمع آرائكم في المحتوى وازاي ممكن نطوره في المستقبل
والاستطلاع ده بيكون عن طريق شوية أسئلة بنزلها في "ستوريز" الإنستجرام وانتم شاكرين بتشاركونا ردودكم وتجاربكم ، هدفنا من الحلقة دي إنك لما تسمع تجارب الناس التانية تتشجع وتبدأ تاخد خطوات إيجابية
01:32 بتسمع كلام ينور من أمتى (من أول ما بدأ - من 6 شهور - لسه بادئ)؟ -
03:25 إيه أكتر المواضيع اللي أستفدت منها (ما يخص الاستثمار بشكل عام - التقاعد - حلقات ما يسأله المستمعون - حلقات ما وراء) ؟ -
04:25 إيه الحاجه اللي غيرتها في حياتك المالية بسبب كلام ينور؟ -
11:04 نفذت حاجه من دول بسببنا (صندوق تقاعد أو إدخار - ميزانية شهرية - محفظة متنوعة - بدأت أفهم أكتر عن الأمور المالية بشكل عام) ؟ -
12:15 إيه اللي ممكن نطوره في المحتوى والحلقات؟ -
وزي ما بنقول ديماً أبعتولنا اسئلتكم واستفساراتكم أوالمواضيع اللي بتهمكوا وحابين اننا نتكلم فيها في الحلقات الجاية بإذن الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلاً بيكوا في حلقة جديدة من بودكاست كلام ينور زي ما أتعودنا ديماً الحلقة اللي بنسمع فيها آرائكم سواء بتبعتولنا أسئلة أو بنستضيف ناس من اللي بيسمعونا ، النهاردة قررت أعمل حاجه زي استطلاع بسيط كده على إنستجرام حطينا كذا "ستوري" نشوف رد الفعل ، التأثير اللي احنا بنعمله ، برضه هشارك معاكوا تجارب ناس تانية بتسمعنا والهدف منها إنك لما تسمع تجارب الناس ده ممكن يوجه فكرك لحته معينة وتشوف المجموعة بتفكر ازاي أو إيه المشاكل اللي عندنا ، إيه المميزات فاحنا عملنا الاسبوع اللي فات على الانستجرام حطينا كذا "ستوري"
01:32
أول سؤال بيقول : بتسمع كلام ينور من أمتى؟ عشان برضه نشوف هل الناس الموجودة في مجتمع كلام ينور هل هما من الناس القدام أكتر ولا الجداد
: الإجابات كانت
من أول ما بدأ -
من حوالي 6 شهور -
لسه بادئ -
لقينا إن 55% من الناس اللي بيسمعونا أو الناس النشيطة على السوشيال ميديا لسه بادئين ، 33% أبتدوا من 6 شهور ، 12% من أول ما بدأ
وده أعتقد طبيعي لأن برضه من أو لما أبتدينا الصفحة كانت صغيرة ، والناس مكنتش لسه تعرف حاجه عنا كتير ، فالنتيجة هنا أعتقد طبيعية جداً وده كان أول سؤال
وبما إن في كتير لسه بيسمعونا في المراحل الأولى والناس برضه اللي حابه تستهلك المحتوى بشكل مختلف حابب بس أفكر الناس إننا على الموقع بتاعنا هنلاقي الحلقات مكتوبة بالكامل يعني هتلاقي كل اللي احنا بنقوله هنا مكتوب تقدر تقراه ، تقدر تاخد منه ملاحظات ، زي ملخصات بتعملها أو حاجه ممكن تعمل الموضوع ده من خلال الموقع ، برضه كل المصطلحات الإنجليزي أو المصطلحات الصعبة اللي بتتقال وممكن متبقاش فاهمها بنلاقي ليها ترجمة بالعربي هناك
وحاجه كمان الحلوة اللي انا شخصياً بحبها احنا عملنا حساب على تويتر ، الحساب ده بينزل تقريباً كل يوم تويت مختلفة كده من الحلقات بتاعتنا بتتكلم على حاجه معينة فدي تعتبر برضه للناس اللي حابه تذكر نفسها بحلقات قديمة أو تفتكر معلومة مثلاً بدل ما ترجع تسمع بالكامل فتقدر تتابعنا على تويتر
فبرضه بشجع الناس انها تبص على الصفحتين دول يمكن يساعدوها بطريقة أفضل في إستهلاك المحتوى
03:25
السؤال التاني اللي سألناه بيقول: إيه أكتر المواضيع اللي أستفدت منها؟
: الإجابات كانت
ما يخص الاستثمار بشكل عام -
التقاعد -
حلقات ما يسأله المستمعون -
حلقات ما وراء -
لقينا إن الإجابة الأكتر 64% استفادت من حلقات الاستثمار بشكل عام ، 18% استفادت من موضوع التقاعد ، 7% ما يسأله المستمعون ، وحلقات الـ ما وراء 11%
والإجابة هنا عجباني برضه لأن الهدف من المحتوى إني عايز أفتح دماغ الناس في حتة معينة مش عايز اخليه متخصص في الاستثمار أو متخصص في البورصة أو متخصص في حته معينة في الأقتصاد لأن الأقتصاد بحر كبير جداً
هدفي من المحتوى اللي احنا بنعمله إننا نتكلم في الاستثمار بشكل عام فالإجابة دي برضه من الحاجات اللي عجبتني حسيت الحمدلله إن الرسالة اللي بحاول أقدمها من خلال المحتوى ده وصلت للناس
04:25
السؤال اللي بعده بيقول : إيه الحاجه اللي أنت بسبب كلام ينور غيرتها في حياتك طبعاً اللي ليها علاقة بالفلوس؟
الإجابات طبعاً مختلفة كتير – مش هقول أسامي الناس اللي بتقول الإجابات – ولكن الفكرة منها زي ما قولنا في الأول أنك تشوف الناس التانية بتعمل إيه ، غيروا إيه فده ممكن برضه يشجعك تاخد خطوات إنك تغير فيها
: الإجابات بتقول مثلاً
في واحد بيقول الميزانية
بنت قالت خطة التقاعد
واحد قال مش عارف لسه عايز أغير حوار الإدخار ده بس بعوز أحياناً محتوى فيديو عشان أعرف أندمج مع المحتوى أكتر : أنا مقدر جداً الموضوع ده ومع الأسف زي ما أتكلمنا كذا مره قبل كده أنا بحب المحتوى الصوتي بحس التركيز فيه أعلى ، طبعاً في ناس بيستهلكوا الفيديو ، وفي ناس بيستهلكوا القراية كمان أحسن ، الهدف من البودكاست ده أنه يفتحلك الباب وبعدين أنت ممكن تستهلك محتوى الفيديو أو الكتاب أو أي حاجه ويمكن في يوم من الأيام نطور المحتوى بتاعنا برضه
واحد تاني بيقول خلصت من فيزا المشتريات ومش هعملها تاني ابداً
حد قال بطلت أبص على الحالة المالية بتاعتي شهرياً وببص عليها سنوياً : دي إجابة عجباني جداً ودي ديماً اللي أنا بنصح بيها إننا ديماً نحاول نبص على الدخل بتاعنا السنوي ، والمصروف بتاعنا السنوي لأن أنت لما بتكبر وبيبقى عندك مسؤوليات أكبر زي الأولاد وزي تمارين وحاجات مختلفة بتبتدي تصرف عليها مكنتش عاملها حساب صعب جداً تبص على الميزانية بتاعتك شهرياً لأن بنلاقي الأقساط بتيجي في وقت معين من السنة أنت ممكن متكونش واخد بالك إنك معكش فيه فلوس ، أو في وقت تاني أنت معاك فلوس بس مش لازم تصرفها عشان هتستنى الوقت ده فبيحصل ديماً مشاكل في الميزانية ، لما بنكبر المجال وبنطلع بره الشهر اللي احنا قاعدين فيه وبنطلع بره الرابطة من الشهر للشهر بنلاقي إن حياتك بتختلف تماماً لأنك بتبقى عارف إن الفلوس دي آه معاك النهاردة في حسابك في البنك بس عليا القسط الفلاني فأنا شايلها على جانب الإجابة دي من أحسن الإجابات اللي عجبتني يعني
حد تاني قال صندوق الطوارئ والتقاعد وموضوع الكريديت كارد استفاد من الحتة دي
واحد قال بشيل مبلغ الإدخار قبل توزيع المصاريف : ودي برضه إجابة جميلة جداً
حد قال حلقاتك برجالاتك الحلقة بتاعة الأطفال وعامل وش بيضحك يعني كانت عجباه أعتقد
حد تاني قال عادات الشرا : هو غير عادات الشرا بتاعته ممكن يكون مثلاً بيسأل نفسه كذا مره قبل ما يشتري
حد قال تاني فكرت ازاي انها تعلم بنتها وقت دخول الجامعة : وده برضه بيحطني في حتة جميلة اللي أنا بحبها ديماً اننا نبص على حاجات قدام على المدى البعيد مش القريب
في برضه مستمعه لينا قالت طريقة صرف الفلوس ، وبدأت استثمر في نفسي وأطورمنها : طبعاً أتكلمنا كذا مره على موضوع تطوير النفس إنه بيرجع على الإنسان على المدى الطويل أي حاجه بتحطها في نفسك هي برضه ليها عائد حتى لو مش شايفه النهاردة
واحد قال الفوائد المركبة ، متابعة المصاريف ، معرفة التكلفة الحقيقية للسلع
واحد تاني قال فكرتي عن التقاعد : هو غير فكرته عن التقاعد
واحد قال إلتزامي في الإدخار ، ونظرته للكريديت كارد من الحاجات اللي أتغير
واحد قال صندوق الطوارئ والتقاعد والاستثمار وأكدت فكرتي عن شرا العربية وأقتناء حيوان أليف وأتعلمت كتير عن الاستثمار
حد قال عادات الادخار واستخدام بطاقة الائتمان وتفكيري ناحية شرا الحاجات اللي أنا عايزها
في حد بيقول الصرف على الحاجات اللي ملهاش لازمه وادخر أكتر : واضح إن العادات الإستهلاكية اللي عند الناس ابتدوا ياخدوا بالهم منها
حد بيقول الشراء الإندفاعي
حد بقول أبتديت أدخر 20% كل شهر واستثمرهم وعملت صندوق طوارئ
حد قال طريقة الإنفاق الشهرية
واحدة مشترتش عربية : أنا آسف إني مخلتش حضرتك تشتري العربية ، ومش عارف دي حاجه حلوة ولا حاجه وحشة يمكن تبقى حاجه كويسة ليكي بس القرار الاستثماري الصح هو ديماً مزج ما بين السعادة والقيمة يعني مينفعش أعمل كل حاجه عشان بس أبقى سعيد فأنا مستهلك صريح أو إننا أقعد أدخر بس واضايف نفسي فيارب القرار ده يكون في الحتة دي
واحد بيقول التأكيد على إني ماشي في الطريق الصح على الرغم إن ناس كتير قالولي العكس : يعني يمكن في ناس حواليه بيشوفوا ان اللي هو بيعمله ده غلط بس هو مبسوط انه سمع شوية كلام بتأكد وجهة نظره
مستمعه لينا قالت أن أول ما المرتب ينزل أشيل منه جزء مش لو أتبقى في آخره ابقى احوشه : دي حاجه جميلة إن الادخار يجي في الأول من في الاخر دي حاجه كررناها كتير جداً
طريقة التعامل مع المدخرات
بدأت أشيل على جانب مبلغ كل شهر
واحد تاني بيقول ابتديت أتابع المصاريف بتاعتي بطريقة أحسن
في رأي تاني بيقول من قبل ما ابدأ : يعني واضح أنه لسه تلميذ أو في الجامعة ، لما سمعت حاجات بسيطة جداً فتحت عيني على حاجات كنت لازم أعمل حسابها في المستقبل : فنشكرك أنك اخدت بالك من الحتة دي
طريقة تفكيري عن الاستثمار ، كل ما ابدأ اسرع كل ما هيبقى أحسن على المدى البعيد : برضه دي حاجه احنا قولناها كذا مره
حد بيقول طريقة إدارة الفلوس أو الدخل
واحد تاني بيقول فكرت في صندوق الطوارئ والتقاعد بشكل جاد هبتدي أبنيهم طبعاً ، نظرتي للادخار والاستثمار أتغيرت تماماً شكراً
عندي رسايل تانية بس مش عايز أطول عليكوا بشكل عام كنت حابب أوريكوا الناس التانية اللي بتسمعنا إيه الحتت اللي لمساها وإيه الحتت اللي بتحاول تغيرها ونفذت فيها أنا مش بس بحب أنك تبقى عارف المعلومة أنا عايزك تنفذ المعلومة عايز على قد ما نقدر البودكاست أو الوقت اللي أنت بتحطه في المحتوى بتاعنا يترجم لأفعال وبحاول هنا تاني أوريكوا الناس التانية بتعمل إيه
11:04
السؤال اللي بعده بيقول : نفذت حاجات من دول بسببنا؟
: الإجابات
بدأت صندوق إدخار أو تقاعد -
بدأت ميزانية شهرية -
بدأت محفظة متنوعة -
بدأت أفهم أكتر عن الأمور المالية بشكل عام -
هنلاقي إن 12% بدأت صندوق ادخار أو تقاعد ودي حاجه جميلة ، 22% بدأوا ميزانيات شهرية ، 6% بدأوا محافظ متنوعة ، وبعدين آخر حاجه 60% بدأوا يفهموا في الأمور المالية بشكل عام
طبيعي إن الناس متبقاش بدأت محافظ متنوعة لأن الموضوع مش سهل وبياخد وقت وأنا مش مستعجل إن الناس تبقى عندها محافظ وبتستثمر وكده ومش ده هدفي اصلاً أنا هدفي أفهمك بشكل عام فالإجابة 60% بشكل عام أنا عايز أفتحلك الجوانب دي ومع الوقت إن شاء الله هنلاقي إن النسب بتاعة صندوق الادخار والتقاعد والميزانية الشهرية هتعلى مع الوقت أنا متأكد من الموضوع ده
فهنقول 40% من الناس نفذت حاجات و60% لسه بيتعلموا وبيسمعوا والنسب دي بالنسبالي الحمدلله مرضيه جداً بشكل عام
12:15
اخر سؤال معانا النهاردة : إيه اللي ممكن نطوره في المحتوى والحلقات؟
برضه أنا بحب ديماً اسمع النقد أو المشاكل ، الناس اللي بتسمعنا عايزين إيه أو حاسين بإيه ففكرت اسأل السؤال ده
أول إجابة بتقول الدخول في تفاصيل المنتجات الاستثمارية وطرق التعامل بيها وخصوصاً في مصر : هرجع تاني وأقول إن الحتة دي مش هدفي من المحتوى في المرحلة الأولانية أنا ممكن أركز وممكن أتكلم على الحاجات دي ولكن في ناس معندهاش اهتمام أوي إنها تبقى بتستثمر من اليوم الأول فيمكن مع الوقت ومع تطور المحتوى بتاعنا يمكن أبتدي أتكلم بشكل أدق وأعمق ولكن الجمع العام اللي بيسمعنا مش مهتم بتفاصيل أكتر ومش معنى كده إني بقول أن رأي حضرتك غلط بالعكس أنا شايفه مهم جداً وأعتقد إنه هيجي في المستقبل بس هي مسألة وقت
حد تاني بيقول ممكن تشرح كتاب عن المال وذكر كتابين بس من منظور مالي أكتر : فعلاً أنا فكرت كذا مره هل نعمل مراجعة للكتب ونجيب ناس تتكلم على كتب مثلاً معانا دي برضه من الأفكار اللي ديماً موجودة عندي في دماغي منفذتهاش لحد دلوقتي لأني يمكن أنا بحاول برضه المحتوى يكون مجاني وبرضه معرف الحقوق بتاع مراجعة الكتب والكلام ده كله مذاكرتش الحتة دي لسه بس دي حاجه من الحاجات اللي ديماً بفكر فيها
حد بيقول يكون في تفاصيل أكتر يعني الموضوع اللي بتناقشوه تتكلموا عنه بتفاصيل لأني لما بسمع الموضوع بشكل عام وأروح أبحث عشان ابدأ : يعني هو أكتر عايز تفاصيل عايز يخش في الحاجه أكتر ودي نفس ملاحظة التعليق الأول
لو ينفع البودكاست يبقى فيه محتوى مرئي مثلاً يبقى حاجه حلوة جداً : زي ما قولنا قبل كده أنه يمكن بالنسباله المرئي احسن أو استهلاكه للفيديو
في حد تاني بيقول نقلل الكلام عن البورصة والاستثمارات البنكية : وده رأي عكس الرأي الأولاني اللي بيقول خش في التفاصيل أكتر فديماً لما حد بيكون صانع محتوى هيلاقي ديماً ردود الأفعال الناحيتين موجودين فاحنا بنحاول ديماً نوازن الموضوع على قد ما نقدر
حد بيقول ازاي ممكن أحافظ على مبلغ صغير واستثمره بره فكرة الشهادات والواديع البنكية : احنا أدينا كذا مره حاجات انا عارف إن الموضوع مش سهل إنك تلاقي بديل للحاجات دي ولكن ديماً بقول لو المبالغ صغيرة والأرقام صغيرة الاستثمار نفسه بالنسبالي مش الأهم الادخار هو اللي بيبقى أكتر أهمية ، هرجع وأقول الناس اللي في أول حياتها تحاول تدخر أكتر والاستثمار هيجي مع الوقت واحنا أدينا أمثلة كتير لحاجات صغيرة
في حد بيقول الأمثلة المبسطة لأن مش كل اللي بيسمع عنده خلفية مالية ، محتاجين أمثلة أكتر وحالات حقيقية : حاضر ممكن أحاول أزود قصص أو حاجات أنا شوفتها على أرض الواقع
في حد تاني بيقول حلقات تفيد حالة الطوارئ لو حد دخل في طوارئ : ممكن نعمل حلقة قريب عن مثلاً صندوق الطوارئ لوحده مفيش مشكلة
دراسة أكتر عن طرق الاستثمار المختلفة خصوصاً المناسبة للمبالغ القليلة
في حد بيسألني ممكن نتكلم أكتر عن السياسات المالية والنقدية وازاي استفاد في فهم المؤشرات بتاعتها : احنا ابتدينا السلسلة دي يمكن قريب أتكلمنا على التضخم وأتكلمنا على مؤشر التضخم وازاي تقراه وكل شوية هحاول أعمل حاجه ليها علاقة بالمؤشرات الاقتصادية عشان برضه نبتدي نفهم بشكل عام الدول ماشية ازاي وايه الحاجات اللي ممكن تأثر علينا كأفراد أنا استخدمت التضخم لأننا بنشوفه ديماً في بيوتنا بس إن شاء الله نزود في الحتة دي
حد بيقولي استضافة ناس استفادت من بودكاست كلام ينور : ممكن استضيفك أنت شخصياً يعني ممكن أبعتلك بعد الحلقة دي تيجي معايا إن شاء الله واحنا عملنا كذا حلقة استضافنا ناس من المستمعين وكل شوية هنكرر الموضوع ده بإذن الله
في حد بيقولي مش محتاج : شكراً جداً ، مش محتاج إني أطور يعني كله زي الفل ، شكراً
حد بيقول اقتراحات وأمثلة على أرض الواقع في مصر
حد بيقول الاستثمار خصوصاً في المشروعات وفكرة الشركات
خطوات فعلية في الواقع أو إرشادات لبدء استثمار صغير في البورصة
أأمن أستثمار وشرح كافي للأسهم في البورصة : مع الأسف مفيش أأمن استثمار هو ديماً لما أبص على الاستثمار ببص عليه زي ما اتكلمنا كذا مره على مدار 10 / 15 / 20 سنة لو أنت شاري حاجه على المدى الطويل فرصها في الطلوع أعلى الاحتمالات في صالحك إنها تطلع غالباً ده بالنسبالي أأمن استثمار ويمكن أأمن استثمار ده في النص يمر بفترات نزول 10 / 20 / 30 % يمكن تخسر جزء من فلوسك وانت ممكن تعتبره مش آمن لكن أنا بالنسبالي هو آمن لأنه على المدى الطويل غالباً هيعوض وهيوصل للي احنا عايزينه
حد بيقولي كمل
حد بيقولي تقولوا كام حلقة على الوضع في مصر : طبعاً معظم المستمعين اللي بيسمعونا من مصر بسبب اللهجة هو موجود في مصر أكتر ، أنا مبحبش أضرب أمثلة على أرض الواقع لأن تاني أنا مش مع المدى القريب أنا كررت الموضوع ده كذا مره أنا من أول ما أبتديت حياتي شوفت أزمات اقتصادية مختلفة وعمرها ما بتنتهي وهنفضل قاعدين في الأزمات الاقتصادية وهنفضل قاعدين في حرب تأثر علينا أو مشكلة غذاء في حته معينة أو استيراد كل الحاجات اللي بنشوفها دي ، الخطوط العريضة بالنسبالي مبتتغيرش عبر الزمن اللي هو بتحوش وبتستثمر وبتعيد الموضوع تاني في أي وضع اقتصادي ، ممكن في فترات معينة تفضل فئة أصول عن الأخرى ، حجمك وأنت أكبر غير حجمك وأنت بتبتدي دي حاجات كلها صغيرة ممكن تتحرك حواليها ولكن المفهوم واحد لو أنت معندكش فائض في ميزانيتك في الوقت الكويس أو في وقت الأزمة في الحالتين أنت مش هتعرف توصل للي أنت عايز توصله
حد تاني بيقول يبقى في حلقات دسمه فنياً وفيها معلومات أكتر وأعمق في المجالات : في نوعين هنا من الناس نوع عايزنا نبقى أخف شوية ونوع عايزنا أقوى شوية فهنحاول برضه ننوع المحتوى على قد ما نقدر زي ما قولنا
وده كان بشكل عام برضه في ردود تانية بس مش عايز أطول عليكوا ، وأنت برضه لو عندك حاجات معينة عايز تسمعها أو تسمعيها أبعتولنا كل شوية هنعمل "ستوريز" وهنستضيف ناس معانا في الحلقات.. المحتوى ده بيتشكل من ردود أفعال الناس فتقدر تبعتلي زي ما بنقول ديماً ونقدر نتواصل في اسئلة معينة سواء شخصية أو عامة وكالعادة أشكركوا جداً جداً جداً على وقتكوا النهاردة معانا وأشوفكوا إن شاء الله الاسبوع الجاي
Translation of some words and terms:
Survey الدراسة الاستقصائية
Group المجموعة
Community مجتمع
Active نشيطة
Specialized متخصص
Scope المجال
Zoom out تصغير
Long Term المدى البعيد
Short Termالمدى القريب
Compound Interest الفائدة المركبة
Expense Tracking متابعة المصاريف
Knowing the cost behind the different products معرفة التكلفة الحقيقية وراء السلع
Mix مزج
Value القيمة
Impulsive Spending الشراء الإندفاعي
Interest اهتمام
Review مراجعة
Comment التعليق
Balance نعادل / نوازن
Alternative بديل
Financial Background خلفية مالية
True Cases حالات حقيقية
Probabilities الاحتمالات
Publicly علانية
Notes ملحوظات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #من_أنتم