55. مقتطفات مالية - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة الحلقة التانية والأخيرة من مقتطفات مالية واللي بنلخص فيها الجزء الثاني من الحلقات اللي قدمناها في البودكاست من أول ما بدأنا .. الحلقة اللي فاتت لخصنا أول 20 حلقة تقريباً
يارب ملخص الحلقات يكون فكرة مفيدة ليكوا ونكون سهلنا على الناس الجديدة تاخد فكرة سريعة عن المواضيع اللي أتكلمنا فيها في البودكاست
Transcript لو بتسمع الحلقة من خلال موقعنا هتلاقي في الجزء الخاص بـ
روابط لكل الحلقات اللي غطناها في الحلقة تقدروا ترجعوا تسمعوها كاملة
: مقتطفات الجزء الثاني
01:06 ما وراء كروت الإئتمان
01:32 خطوات إلى الاستقلال المالي
02:45 خُلاصة الحسابات البنكية
03:00 ازاي تستفيد من صناديق الإستثمار؟
03:32 حكايتي مع المجال المالي
04:36 أعجوبة العالم الثامنة (الفوائد المركبة)
06:29 الإكتتابات العامه IPO
07:54 ما وراء أختيار البنك
08:46 الخصومات وألوان الجمعة المختلفة (الحقيقة المُرة)
09:33 التكلفة الحقيقية للتدخين
10:12 ازاي تبدأ شركتك الناشئة
11:26 ميزانيتك: إزاي وليه؟
12:41 ميزانيتك: الخطوات والتفاصيل
13:23 الزكاة (101)
14:36 أزاي تقيم أدائك في البورصة
15:02 من هو المستثمر الأفضل .. الرجل أم المرأة؟
15:59 العائد على المجهود
16:50 ما وراء صناديق الاستثمار المتداولة ETF
17:44 الأسهم - السندات
وبكده نكون خلصنا إحتفالات بسنة أولى كلام ينور.. شكراً جداً على وقتكوا وتفاعلكوا معانا خلال السنة اللي فاتت كلها واحنا ديماً منتظرين تشاركونا آرائكم ومقترحاتكم واسئلتكوا والمواضيع اللي حابين نتكلم فيها في الحلقات الجديدة إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
اهلاً بيكوا في حلقة جديدة من بودكاست كلام ينور
النهاردة الحلقة التانية من الملخص السنوي بتاعنا اللي بنقول فيه احنا عملنا إيه السنة اللي فاتت وجايبين أجزاء من حلقات السنة اللي فاتت
Transcript لو حد بيسمع من الموقع بتاعنا هتلاقوا في
بتاع الحلقة روابط لكل الحلقات المتغطية في الحلقة وهسيبكوا تستمتعوا بالحلقة النهاردة
01:06
الحلقة (22) : ما وراء كروت الائتمان
ايه الفرق ما بين البطاقة الائتمانية والقرض العادي اللي بتاخده من البنك؟
القرض العادي اللي بتاخده من البنك هو قرض بمدة معينة متفقين مع بعض أنا والبنك إن احنا مثلا هناخد قرض على 3 سنين ، 5 سنين ، 10 سنين أيا كان مدته والقرض ده بدفعله مدفوعات شهريه ثابته متفق فيها مع البنك من أول يوم ولكن الفيزا هو خط ائتمان مفتوح تقدر تستخدمه بناءاً على احتياجاتك الشخصية يبقى ده أول فرق مهم ما بين القرض العادي واللي بتاخده من البنك والبطاقة الائتمانية
01:32
الحلقة (23) : خطوات إلى الاستقلال المالي
: دلوقتي هتجيب ورقة وقلم وأقعد جاوب السبع دول .. اسئلة دول الاسئلة هما
هبتدي أعمل ضريبة على نفسي ، ضريبة على الدخل وضريبة على أي علاوة إضافية
لما هشتري حاجه كبيرة هدفع ضريبة عليها قد إيه؟ 10 ، 20 ، 30% على حسب مانت عاوز
هبدل الشراء الإندفاعي بتاعي بحاجه ليها علاقة بالادخار
الاهداف الادخارية بتاعتي هكتبهم
صندوق الطوارئ بتاعي حجمه قد إيه؟ هحوش 3 شهور ولا 6 شهور أيا كان
عندي ديون ولا لأ؟ وهدفعها في فترة قد إيه؟
ازاي هتخلي العادة دي عادة جميلة
طيب لما كتبت السبع حاجات دي على الورقة لازم تقنع نفسك اصلاً أنك تقدر تعملهم ، يعني إيه تقنع نفسك إنك تقدر تعملهم يعني متكتبش حاجات ملهاش علاقة بالحياة.. يعني أنا هحوش 50% من دخلي وأنا مقدرش لأني عايش بـ 90% من دخلي مينفعش يبقى أنت لازم تبقى مقتنع وتقنع نفسك إن الحاجه دي ينفع تطبيقها ليه هنكتبها على ورقة أو هتبص عليها علشان احنا ممكن نقعد نتكلم وتقعد تسمع وتشوف بس لما تيجي تطبق تلاقي الحاجه دي متعرفش تطبقها فلازم تبقى واقعي في كتابة الحاجات دي عشان كده احنا عايزين نكتبها على ورقة ونشوف هل هي واقعية ولا لأ
02:45
الحلقة (24) : خُلاصة الحسابات البنكية
حسابات البنوك هي حاجه مهمه إن انت تنظم بيها فلوسك ، هي ميزتها انها هتنظم تفكيرك كمان لأن انت هيبقى عندك أهداف مختلفة ومحتاج أنواع من الحسابات المختلفة لتنفيذ أوتحقيق الأهداف دي
03:00
الحلقة (26) : ازاي تستفيد من صناديق الإستثمار؟
ناس كتير جداً بتسألني احنا نفسنا نستثمر في البورصة ولكن أنا مش عارف ابتدي ازاي ، ممكن يكون السؤال ده جه على دماغك مش عارف ابتدي ازاي.. اروح فين ، أفتح إيه ، إيه الخطوات ، ايه الأسهم أصلاً.. الموضوع معقد جداً هنلاقي إن صناديق الاستثمار هي الأداة أو الحاجة المعمولة للناس اللي معندهاش وقت تتابع استثماراتها أو تختار أسهم معينه ، هو عبارة عن توكيل لإتخاذ القرار بالنيابة عني كمستثمر لحد بيشتغل في المجال
03:32
الحلقة (27) : حكايتي مع المجال المالي
قصتي قصة عادية مكرره خمسميت ألف مره مفهاش حاجه مميزة أوي يعني ولكن أنا في نقط معينة وأنا ببص من 15 سنة وانا واقف دلوقتي بعد الخبرة والشغل أنا عايز أعرف أنا استفدت إيه من التجارب دي
أول حاجه الشغف مهم جداً يعني لما أنت يبقى عندك شغف لحاجه ، عندك حاجه بتحبها ، عندك حاجه أنت عايز تنجح فيها الموضوع بيفرق تماماً وانا فاهم إن مش كل الناس عندها القدرة أنها تشتغل في الحاجه اللي عندها شغف فيها ولكن انت ممكن تكون بتشتغل شغلانة عادية جداً بس أنت عندك شغف جانبي في حاجه تانية ممكن تبتدي تقرا فيها تبتدي تعلم نفسك فيها ممكن تبتدي حاجه على جنب صغيرة ممكن مع الوقت تكبر انت متعرفش إيه اللي ممكن ينجح في الحياة
التجربة دي اثبتتلي ان انا وانا صغير لو كنت قولت إني هطلع واشتغل اللي انا بشتغله النهاردة مستحيل ولكن ان انت ابتديت تمشي ورا الشغف ده ممكن الموضوع يقلب معاك بشغلانة أو منتج تبيعه أو اي حاجه الكلام ده عموماً في العموم ملوش علاقة بالمجال المالي بالذات يعني
04:36
الحلقة (28) : أعجوبة العالم الثامنة (الفوائد المركبة)
اي حد بيقرا كتب او مدونات في التمويل الشخصي ديماً الكلمة دي بتتكرر كتير ، يعني إيه الفوايد المركبة
أنا اول حاجه بتخطر على البالي لما اسمع كلمة الفوايد المركبة ، انك بتستثمر وبيطلعلك فايدة سنوية أو شهرية أيا كان ، تاني حاجه بتخطر على بالي لما أسمع كلمة فوايد مركبة أول شي بفكر فيه انه قد إيه بحتاج وقت عشان أضاعف فلوسي لو بستثمر بمعدل فايدة معين ودي هنتكلم عنها يعني ايه وازاي الواحد يحسبها
تاني حاجه بفكر فيها هو ان الفايدة المركبة بالنسبة ليا هي ازاي بتزود فلوسك بطريقة تصاعدية لأنه في معدلين للفايدة في معدل فايدة مركبة وفي معدل الفايدة البسيطة
معدل الفايدة البسيطة هو اذا أنا بستثمر النهاردة بـ 100 دولار بفايدة 5% كل سنة راح يطلعلي 5 دولار كل سنة حتى لو حاططها على 20 سنة لأن الفايدة بتطلعلي على اصل المبلغ الاساسي بتاعي اللي هو الـ 100 دولار
الفايدة المركبة بتختلف عن الفايدة البسيطة لان الفايدة المركبة بتطلعلي كل سنة على الأصل اللي حاطه + الفايدة اللي أخدتها على السنة اللي قبلها يعني اذا انا حطيت 100 دولار أول سنة بيطلعلي عليها 5% مثلاً السنة الجاية بيكون معايا 105 دولار ، تاني سنة بيطلعلي 5% على 105 مش بس عالـ 100 الأساسية
فكل سنة الفايدة اللي بتطلعلي بتزيد عن السنة اللي قبلها لأنه انا باخد الفايدة على المبلغ الأساسي + الفايدة اللي طلعتها السنة الماضية
وعشان كده الفايدة المركبة هي متصاعدة لأن اول سنة الفايدة 5 تاني سنة الفايدة 5.5 مثلاً تالت سنة الفايدة هي 6 واذا بتحط قد إيه معك فلوس كل سنة وبترسمهم على رسم بياني مش بيطلعلك خط مستقيم بيطلع تصاعدي
06:29
IPO الحلقة (29) : الإكتتابات العامه
لو واحد النهاردة معندوش أي فكرة يعني إيه طرح عام تقدر تقوله إيه؟
الطرح العام هي عملية انك بتاخد شركة خاصة مملوكه لمجموعة أفراد او لمجموعة مؤسسات تاخدها للتداول العام في البورصة ، العملية دي بتتعمل عن طريق إنك بتدرج جزء من أسهم الشركة دي لكذا سبب أهم سببين السبب الأولاني أنك تزود رأس مال الشركة دي عن طريق انك تطرح مجموعة أسهم من الشركة في السوق وتبتدي تعمل زيادة لرأس المال للشركة أو الجهة المالكة للشركة دي بتبقى عاوزة تتخارج بحصة من ملكيتها في الشركة دي لمجموعة أفراد مش لشخص بعينه والتداول فيها بيبقى تداول علني على المشاع لمجموعة مستثمرين أو لسوق معين فبالتالي بتاخد الشركة دي للتداول عام
فمن أهم الأسباب اللي بتتعملها بتبقى زيادة رأس مال أو تخارج جزئي من مؤسسة معينة أو من جهة معينة في ملكيتها في جهة خاصة ممكن المؤسسة دي تكون حكومية أو خاصة ممكن تبقى شركة مملوكة لعائلة أو مملوكة لمجموعة أفراد كله في الأخر بيتم التعامل عليه بنفس الطريقة إلى أن يوصل يكون مدرج في بورصة من البورصات الموجودة في العالم كله ويتم التداول ما بين كل المتعاملين في السوق اذا كانت مؤسسات أو افراد أجانب أو مصريين أو عرب أيا كان
07:54
الحلقة (31) : ما وراء أختيار البنك
النهاردة انا هتكلم على موضوع مختلف ازاي هختار البنك بقى نفسه ، يعني انت النهاردة في اول حياتك بتبتدي تسمع البودكاست ده انت طالب في الجامعة ولسه هتبتدي تتعامل مع الفلوس دي حلقة مهمه بالنسبالك ، انت بتتعامل مع البنوك بشكل يومي زي أي حد فينا في نص حياتك المهنية برده لازم تفهم ليه مختار البنك ده ، وليه بتتعامل مع البنك ده بالذات ، وايه المميزات لو انت هتنقل لبنك تاني
أنا بس بفكر معاكوا وانا بعمل قائمة بالحاجات اللي انا عايزها في البنك ازاي أفكر فيها ، وطبعاً طبعاً زي كل مره كل واحد هيبقى عنده احتياجات مختلفة عن الأخر ، يعني مفيش واحد هيختار البنك زي التاني وده لأسباب كتير واضحه بالنسبالي واللي هنتناقش فيها في الحلقة دي النهاردة.. أنا عن نفسي أختياري للبنك بتاعي هيكون مختلف عن اللي بيسمعني لأن احتياجاتي واللي أنا عايزة منه مختلف تماماً
08:46
الحلقة (32) : الخصومات وألوان الجمعة المختلفة (الحقيقة المُرة)
الفترة دي بيحصل فيها خصومات كبيرة على سلع معينة مبتحصلش طول السنة ، أتحولت في المناطق العربية بتاعتنا بيسموها الجمعة البيضاء أو الصفراء أيا كان اللون اللي حضرتك بتشوفه في الدعايا اللي بتحصل في المنطقة ، ولكن هما ديماً بيشجعوا في الفترة دي على التسوق
أنا النهاردة بحاول أتكلم على حاجات معينة الناس بتعملها في أساليب الدعاية ، الطريقة دي بتخليك تحاول تستهلك أكتر مع أنك ممكن متكونش محتاج الحاجه أصلاً ولكن في حيل فرق التسويق بتعملها بحيث تحاول تخلي حضرتك تصرف أكتر ، طبعاً أنا مش ضد أي حاجه أنا بس بقول ان أنت تاخد بالك لو الحاجات دي بتحصلك يبقى دي علامة من العلامات إن انت ممكن تشتري حاجه انت مش محتاجها
09:33
الحلقة (33) : التكلفة الحقيقية للتدخين
أنا برده مش عاوز أقول النهاردة الناس كلها لازم تبطل تدخين أو الناس كلها لازم تدخن مش ده هدفي من الحلقة دي ، أنا هدفي من الحلقة دي أن حضرتك لو مدخن تبقى عارف إيه اللي أنت بتديه قصاد التدخين ده .. إيه تكلفة الفرصة البديلة بتاعتي لو أنا بطلت تدخين إيه أفيد استثمار أعمله بالفلوس أو الأموال اللي أنا وفرتها من التدخين ..
أنا لا أدعو إن حضرتك تبطل أو متبطلش أنا كل اللي بقوله لو بطلت إيه الفرص اللي قدامك ولو أخدت قرار إنك هتكمل تبقى مدخن أنت واخد القرار ده عن وعي إيه اللي بتسيبه على الترابيزة في الناحية التانية
10:12
الحلقة (36) : ازاي تبدأ شركتك الناشئة
أنا النهاردة ببتدي فكرة وعايزك كمستثمر تبص عليا هعمل إيه أول خطوة؟
أول حاجه كشخص مستثمر وجهة نظرة للشركة ممكن تكون غير الشخص اللي عمل الشركة فمن ضمن أول الدروس اللي أتعلمتها في بداية المجال ده ان مجرد الشخص عنده فكرة هيعمل مشروع هيبقى ريادي زي ما بيقولوا عليه ده هيخليه بدل ما هو موظف شغال في شركة حد تاني بياخد مهيه أصبح هو فاتح العمل بتاعه سواء محل أو برمجة أو بودكاست أو مشروع أيا كان.. التفرقة الاساسية بين واحد مستثمر وواحد عامل شركته إيه أنت ممكن اوي تعمل شركة (أي فكرة مش لازم شركة بالمعنى يعني) في النهاية هتجيبلك أقصى مهيه كان ممكن تاخدها في مجال عملك ويبقى المشروع بتاعك وساعات العمل مريحه بالنسبالك ده مايعنيش بالضرورة ان الشخص عايز يدخل معاك مستثمر لأن لو وصلت للمرحلة دي هيعرف يجيب عائد على الاستثمار بتاعه فده اللي ممكن تقول عليه نمط حياة مشروع ظريف جداً انك تبتديه بس مش بالضرورة هتقنع مستثمر انه يدخل معاك لأن المستثمر عنده توقعات معينه للعائد اللي هيجيله على الفلوس اللي هيستثمرها معاك
11:26
الحلقة (37) : ميزانيتك: إزاي وليه؟
أول حاجه عايز أتكلم فيها في الحلقة دي احنا ليه بنعمل ميزانية فكر معايا كده أنا ليه بحط ميزانية وهرجع ديماً بمثال رياضي أنا لو بلعب ماتش ومحتاج أنفذ حاجه في الماتش ده إيه اللي أنا بعمله؟ أنا بفكر إني بضع خطة في الأول بيبقى عندي مدخلات بدخلها والنظام بتاعي بيطلعلي مخرجات يعني مثلاً هقول أنا بلعب ماتش كورة في 11 لاعب مين الـ 11 لاعب اللي هيلعبوا اساميهم إيه هحطهم في التشكيل ، هحط الخطط اللي هلعب بيها وبعدين هيطلعلي بعد الماتش نتيجة المباراة .. أنا هنا لازم أفرق ما بين حاجتين في فرق كبير جداً ما بين الخطة وما بين النتيجة بتاعة الخطة في حلقة النهاردة عايز أتكلم أكتر عن الخطة ازاي نعمل الإستراتيجية بتاعتي ، زي ما بتقعد تذاكر أنت ممكن تقعد طول السنة بتذاكر وأنت في الجامعة أو المدرسة وبعدين الإمتحان هو النتيجة بتاعة المذاكرة دي نفس الكلام بالنسبة للميزانية بتحط توقعات معينة وبعدين بتقارنها بالحقيقة اللي هتحصل في الحياة وده معنى الميزانية بشكل بسيط عبارة عن توقعات للصرف بتاعي أو تحديد الفلوس بتاعتي هتروح فين ، بوظف كل دولار داخلي إنه يعمل شغلانه معينه
12:41
الحلقة (38) : ميزانيتك: الخطوات والتفاصيل
حلقة النهاردة هي تكمله للحلقة اللي فاتت اللي اتكلمنا فيها على الميزانيات ، الخطوط العريضة اللي أتكلمنا عليها في الميزانية بتاعة (50 - 30 - 20) اللي هي 50% بتروح على المصاريف الأساسية 30% بتروح على الكماليات أو الحاجات اللي أنت عايزها و20% على الأقل بتروح للاستثمار ودفع الديون بس برده لازم أقول تاني إن كل واحد في مرحلة معينة من حياته أشكال الدخل بتختلف المصروف بتاعك هيبقى شكله مختلف احنا مش بنبني ميزانيات أكتر من سنة بنمشي سنة بسنتها لأن بيبقى عندنا نظرة على السنة بالكامل إيه اللي ممكن يحصل فيها ومتوقع قد إيه في كل بند من البنود اللي احنا هنتكلم عليها
13:23
الحلقة (42) : الزكاة (101)
الفرق ما بين الزكاة والصدقات؟ يعني الناس ديماً تقولك أنا بعمل خير كتير ، شوفت حد فالشارع أديتله حاجه ، هل دي بتختلف عن الزكاة الأساسية؟
أكيد طبعاً ، الزكاة هي الفرض زي ما بتروح تصلي الخمس صلوات بتاعتك هو ده الفرض ولو أنت صليت النوافل بعد كده السنه أو اي حاجه دي تعتبر الخيرات الزيادة فلما أنت بتدفع الزكاة غير لما بتطلع صدقه في أي وقت بس هو الفرق ما بينهم أن لو في نيتك إن ده يعتبر من الزكاة بتاعتك اللي هتطلع ممكن تعملها كده يعني انت ممكن تطلع الزكاة قبل اليوم اللي أنت بتطلع فيه الزكاة أو لو كنت حاسبها من السنة اللي فاتت وتقول لنفسك أن انا عندي شهر او شهرين أو 3 شهور عشان أدفع الزكاة بتاعتي بالكامل فممكن يعني لو لقيت حد في الشارع وطلعت عليه ده يعتبر من الزكاة بتاعك
بس المفهوم نفسه لازم يكون محسوب صح؟ زي الضرايب كده ، بتروح تطلع ورقة وتقدمها لمصلحة الضرايب ، فأنت بتعمل نفس الحاجه مع ربنا اللي هو بتطلع ورقة وبتقدمها إن دي الحسابات بتاعتك
14:36
الحلقة (43) : أزاي تقيم أدائك في البورصة
هل عمرك فكرت ازاي الأسواق أدائها بيتقاس؟ يعني سوق أسهم في بلد معينه ازاي بنقسيه؟ أو بنقول هو طالع بشكل كويس أو نازل كتير.. ازاي يعني؟ يعني هل في طريقة معينة الناس أتفقت عليها أنها تقيس الأداء ده وده اللي أنا هحاول أغطيه النهاردة إن شاء الله في الحلقة
15:02
الحلقة (45) : من هو المستثمر الأفضل .. الرجل أم المرأة؟
عشان تبقى مستثمر كويس لازم تبقى فاهم نفسك ، الوعي.. إني اعرف نفسي أعرف نقط ضعفي ، أعرف نقط القوة بتاعتي وهو ده هدف الحلقة إن أنا اسلط الضوء على الحتة دي عشان لو أنا راجل أخد المميزات بتاعتي وأحاول أبعد عن العيوب بتاعتي وأشوف عند المرأه كانت بتعمل إيه كويس أحاول أزوده عندي الموضوع زي ما قولت في أول الحلقة هو مش ماتش هنشوف مين كسبان على قد ما هو أنا عايز أبقى في أعلى ناحية سواء رجال أو سيدات عايز أبقى من أكتر الناس اللي بتحقق عوائد فأنا النهاردة معاكوا أتعلمت إن الثقة المفرطة بتاعتي لازم تقل ، لازم متحركش بشكل كبير وسريع مغيرش قراراتي أتعلم من السيدات ازاي يبقى عندك صبر ، ازاي يبقى عندك تركيز على أهداف طويلة المدى ، ازاي يبقى عندك أهداف إستثمارية متحاولش تبعد عنها
15:59
الحلقة (47) : العائد على المجهود
لو نزلنا بقى على مستوى الفرد واللي احنا ديماً بنتكلم عليه الميزانية أو الصرف بتاعك اللي كان على تمويل الأفراد نفسه هنلاقي إن أنت لو معملتش مجهود النهاردة إن يبقى عندك ميزانية ، إنك تبقى عارف ازاي تصرف فلوسك ، ازاي تحوش ، ازاي تتقاعد والكلام ده كله هنلاقي إن ده هيخليك وأنت عندك 45 / 50 / 60 سنة بتعمل مجهود أكبر إنك بتحاول تلحق اللي فاتك يعني لو واحد ابتدا في الـ 25 غير واحد ابتدا في الـ 35 غير واحد ابتدا في الـ 45 اللي في الـ 45 هيعمل مجهود أعلى وهيحاول يحوش كمية من الفلوس أكبر ونسب أكبر من دخله عشان يلحق الراجل اللي ابتدا في الـ 25 فأنت لو ابتديت بدري وعرفت الميزانية بتاعتك أنت نفسك على المدى الطويل هتحط مجهود أقل في الإستثمار وفي محفظة التقاعد بتاعك
16:50
ETF الحلقة (49) : ما وراء صناديق الاستثمار المتداولة
هنبص على صندوق المؤشرات هو جاي من اسمه هو مكان تداول الصندوق ده بيبقى على البورصة يعني الهيئة اللي بتصدر الصندوق ده بتروح للسوق الفلاني اللي في البلد الفلانية بتقول احنا عايزين ندرج الصندوق ده ومن هنا جه اسمه ومن هنا عرفت مكان أنا ممكن أشتريه منين هشتريه من على البورصة ، طب علشان برده زي ما اتكلمنا قبل كده ازاي لما اعوز أشتري حاجه من على البورصة ازاي ممكن اشتريها؟ لازم يكون عندي حساب شركة سمسرة وحساب شركة السمسرة ده بيبقى الوسيط بتاعي ما بيني وبين السوق أنا بحول فلوسي لشركة السمسرة وشركة السمسرة دي بحط أمر الشراء أو البيع بتاعي من عندها وهي بتخش تشتري الحاجه دي
17:44
الحلقة (51) : الأسهم - السندات
يعني إيه أسهم ويعني إيه سندات لأن أنت ممكن تكون حابب تستثمر في الحاجات دي وأنت مش فاهم النظرية الأساسية هي ليه أتعملت ، ليه موجودة ، ليه كمستثمرين بنحاول نبص على الحاجات دي.. وازاي مع الوقت بتحقق العوائد فعايز أبتدي في الأول يعني إيه اصلاً سهم ويعني إيه سند
أول حاجه لازم أفهمها إن الحاجتين دول من ادوات التمويل بمعنى إيه إننا مثلاً عندي شركة ، عندي فكرة معينة ، عايز أعمل منتج كرائد أعمال أنا محتاج أمول المشاريع بتاعتي فالطريقتين المتعارف عليهم الأساسيين إما هبيع حصة من شركتي وهدخل مساهم معايا يتحمل جزء من المخاطرة بتاعة نجاح المشروع وأديله جزء من الأرباح بتاعتي ولو الشركة كبرت هو يستفيد معايا فيها ودي هنسميها الأسهم
والسندات وهي النوع الأخر من التمويل اللي بيساعدني أعمل المشروع بتاعي ، السندات دي عبارة عن قرض ولكن هنا أنا مش بروح أخد قرض من البنك أنا بروح لشوية مساهمين أو مستثمرين في الحالة دي بقولهم يا مستثمرين أنا عندي الفكرة الفلانية عايز أخد قرض منكوا بضمان المشروع بتاعي أو بضمان شوية أَصول عندي أو أياً كانت الضمانات اللي أنا هديهالهم وكل اللي أنتو هتاخدوه مني هتاخدوا فايدة ثابتة او متغيرة على حسب الأتفاق يعني في مدة معينة من الزمن
يبقى هنا السند هو مدة محدده أنا بعد 10 سنين أو 5 سنين على سبيل المثال هرد الفلوس للمستثمرين بكامل وفي الفترة دي هدفعلهم الفايدة بتاعتي اللي متفقين عليها من أول يوم فالسند هنا واضح هو عبارة عن قرض الشركات بتاخده ولكن الأسهم هي حصة أنا ببيعها من رأس المال في الشركة بتاعتي
19:33
شكراً جداً على وقتكوا معانا النهاردة ويارب تكون الحلقة عجبتكوا هستنى استفسارتكوا واسئلتكوا على صفحتنا على السوشيال ميديا واشوفكوا الاسبوع الجاي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #مقتطفات_مالية #الجزء_الثاني