54. مقتطفات مالية - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
زي ما الناس متابعة معانا احنا بقالنا سنة بنقدم البودكاست .. فحبينا نعمل وقفه كده ونرجع نبص على المحتوى كله ونفتكر المواضيع اللي أتكلمنا عليها من أول ما بدأنا ونعمل زي ملخص سريع كده لأهم النقاط اللي أتكلمنا عليها في الحلقات السابقة
وكمان في ناس كتير جديدة بدأت تسمعنا (وفقاً للأرقام الخاصة بالبودكاست في الفترة الأخيرة) فحبينا برده نعرّف الناس الجديدة على المحتوى بتاعنا عن طريق إننا هنقدم حلقتين بعنوان مقتطفات مالية هنلخص فيهم الحلقات كلها اللي قدمناها وهنبدأ النهاردة بالجزء الأول واللي هيكون ملخص للحلقات من 1 لـ 20
: مقتطفات الجزء الأول
02:12 ليه تسمع كلام ينور
03:05 علاقة الحياة المالية بالصحة النفسية
04:50 الفلوس وسيلة أم غاية؟
06:50 سعادتك في الامتلاك المادي ولا اكتساب الخبرات؟
07:47 ١٠ أخطاء شائعة تمنعك من الاستثمار
08:48 ما وراء شرا العربية
09:20 التقاعد
10:45 هل للوقت تأثير على الفلوس؟
11:37 يوفوريا
13:21 ما وراء طلب القرض
14:05 هل أنت غني أم ثري
15:34 بدايات الإدخار – الجزء الأول
17:03 بدايات الإدخار – الجزء الثاني
17:33 التحيز
17:58 رحلة داخل شركات السمسرة
18:32 أمناء الحفظ
يارب تستمتعوا بالحلقتين دول.. احنا حبينا نسهل على الناس الجديدة إنها تعرف المواضيع اللي أتكلمنا عليها فترجع تسمع الحلقات القديمة لو حبت المواضيع دي وللناس اللي بتسمعنا من الأول هي حاجه مفيدة برده إننا نرجع نفتكر المواضيع دي تاني مع بعض
استنوا الجزء التاني الإسبوع الجاي إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
زي ما الناس متابعة معانا احنا كده بقالنا تقريباً سنة في البودكاست وأنا حسيت من خلال الأرقام اللي بنشوفها في البودكاست إن في ناس كتير جداً جت في الفترة الأخيرة خاصة الشهرين تلاتة اللي فاتوا فأنا حبيت أعمل وقفه مع نفسي وأراجع المحتوى كله اللي احنا عملناه قبل كده ونبتدي نعرف الناس الجديدة على المحتوى عن طريق إننا هنعمل حلقتين ورا بعض دي أول حلقة منهم النهاردة
الحلقة دي بتجيب مقتطفات من الحلقات الأولانية والنهاردة هنتكلم من الحلقة 1 للحلقة 20 وهناخد كده الهايلاتيس بتاعة كل حلقة أو لو في تلخيص معين أو في فكرة معينة كنا بنحاول نقدمها في الحلقات تبقى مفيدة بحيث الناس الجديدة ترجع تسمع الحلقات لو هي حابه المواضيع دي
وبالنسبة للناس القديمة اللي بتسمع معانا من الأول ومتبعانا على طول برده هي حاجه مفيدة بالنسبالي يعني أنا بعد ما عملنا الحلقة دي لما سمعتها حسيت في حاجات كتير أنا نفسي عامل الحلقات دي بس مش فاكرها فبرجع أفتكر المواضيع دي تاني بلاقي نقط مهمه برجع أشتغل واذكّر نفسي بيها برده فبتبقى مفيده فيارب تستمتعوا معانا بالحلقتين دول
02:12
من الحلقة (1) : ليه تسمع كلام ينور
الصحة المالية عموماً هو جزء كبير جداً من الصحة النفسية بتاعتك ، يعني لو أنت سعيد في حياتك المالية بتساعدك على تحقيق السعادة في جوانب كتير جداً من حياتك لأن العلاقة بين الفلوس ومختلف جوانب الحياة علاقة ديماً كبيرة جداً ، يعني هتلاقي ديماً العلاقة دي في شغلك في تعاملك مع الأخرين في التخطيط للمستقبل الكلام ده كله ، فالسعادة المالية أعتقد هي جزء لا يتجزأ من سعادتك النفسية بشكل عام ودي حاجه أنا بحب أذكرها ديماً إن مش معنى أن انت بتتكلم في الفلوس انك مادي أو جشع ، كل اللي انت بتعمله انك بتحاول تنظم حياتك المالية فلازم تديها وقت في التفكير قبل التنفيذ مش لازم أخد مرتبي واصرفه كله مره واحده فلازم نفكر ونجهز نفسنا قبل ما نبتدي
03:05
مالحلقة (2) : علاقة الحياة المالية بالصحة النفسية
ازاي عدم تنظيم حياتك المالية ممكن يأثر على صحتك النفسية ، هنلاقي موضوع الصحة النفسية ده موجود بشكل كبير في السنين الأخيرة ، الناس بتتكلم عليه في مختلف المجالات ، النهاردة انا عاوز أتكلم عليه من الناحية المالية ، عايز اشوف شوية علامات اتكلم عليها ، لو العلامة دي بتحصلك يبقى أنت في تأثير جاي من الفلوس بيأثر بشكل سلبي على صحتك النفسية كذا علامة ممكن نشوفها لو بتحصلك ازاي ممكن تعرفها ، وازاي ممكن تفكر فيها ، وازاي ممكن نحاول مع بعض تخرج منها
03:42
لو أنا بيظهرلي حاجات كتيرة جداً في نص الشهر أنا مش متوقعها هتسبب لي التعاسة دي وممكن بالعكس كمان دي ممكن توصلني علشان أتجنب الشعور الوحش ده وأدي نفسي شعور بالسعادة اللحظي إن أنا ممكن أنزل أشتري وأصرف فلوس مكنتش عاوز أصرفها ، أنا شوفت ناس ممكن تنزل تجيب حاجة مش محتجاها زي ساعة ، جزمة ، لبس أي حاجة علشان بس يتجنب الشعور الوحش اللي حصله خلال الشهر
الحاجة دي بتنسميها الشراء الإندفاعي أنت بعد ما خلصت الـ 45 دقيقة بتاعتك في المشوار ده أنت وصلت مضايق ، فأنت هتنزل تعمل أي حاجة بقى عشان تحسسك بالسعادة.. الحل إيه؟ إن أنت لازم تعرّف نفسك إن في حاجة اسمها شراء إندفاعي وإن الحاجة دي بتحصلنا كلنا وبعد ما تعرفها تحاول واحده واحده تعرف مخك إن لما يجيلك الأحساس ده متنجرفش ورا مشاعرك ، حتى لو كانت مشاعرك قوية في اللحظة دي ، وواحدة واحدة تبتدي تتجنبها ، متحاولش تغير بسرعة براحة هتاخد وقت
04:50
من الحلقة (3) : الفلوس وسيلة أم غاية؟
الفلوس أو الماديات برده دي حاجات موروثة في المجتمع ، أفكار موجودة إن الفلوس ديماً أو المادة مربوطة ديماً بالجشع ، بحب الحياة ، المادية ، بالمضاربة ، بالمقامرة ، باليانصيب ، دي حاجات كلها مربوطة يعني لما تسمع كلمة فلوس تحس ديماً انها مربوطة بحاجات كلها وحشه أو حاجات كلها غلط ، عصابات ، أغنية بيعملوا ايه في الفقرا كل الحاجات دي..
طيب النهاردة أي حاجه في الدنيا انت ممكن تستخدمها بكل الطرق ، يعني ممكن تستخدم سلاح معين في الدفاع عن نفسك أو في الهجوم على الاخرين وطريقتك هنا هي اللي بتحدد أنت بتستخدم الحاجه دي ازاي..
نفس الكلام أعتقد الفلوس الدوافع وراها انك تعمل محفظة استثمارية كويسة أو انك تحوش ثروة معين ، فانا قصدي انك تفكر انك تكون محفظة كويسة لنفسك لعيلتك لولادك دي مش حاجه وحشه ، الناس ديماً لما تفكر عن الفلوس الفلوس هي وسيلة من الوسائل اللي احنا بنسهل بيها حياتنا زي الإنترنت ، زي العربية ، زي أي حاجه فإنك تبتدي تعمل خطة استثمارية تقدر تستخدمها على مدار الـ 10 ، 20 سنة دي حاجه مهمة جداً جداً جداً لازم تبقى من أولوياتك في حياتك ، لازم تبقى حاجه انت مقتنع انك لازم تعملها ، لازم تاخد خطوات بسيطة منها ، خطوات بسيطة تجاه الهدف ده ومتبعدش نفسك بسبب ان أنا ملهاش لازم أعملها ، أو انت مش هتاخد معاك فلوس بعد عمر طويل معاك..
لأ انت جزء من حياتك انك تأمن عائلتك ، تأمن مجتمعك والحاجه الوحيدة اللي انت تقدر تعملها انك تبتدي تفكر في الفلوس بطريقة مختلفة تبتدي تفكر ان دي حاجه هتتبني على مدار 20 / 30 سنة الفلوس دي هي وسيلة ولكن هي مش غاية
06:50
من الحلقة (4) : سعادتك في الامتلاك المادي ولا اكتساب الخبرات؟
إن الحاجات دي تقدر تقارنها بيفسر كتير جداً إنهم ديماً مش مرضين بالنسبالك لأن بعد ما تشتري آيفون 10 هتبقى عاوز تشتري 11 ، 12 ، 14 ، 16 ... زي مانت عايز بقى ، نفس الكلام على أي حاجه مادية أنت ممكن تشتريها ديماً هينزل منها حاجه جديدة ، عندك تليفزيون بعد شوية هيبقى قديم محتاج تشتري واحد جديد وهكذا.. لما الحاجه تبقى سهلة في المقارنة ده بيخلقلك مشكلة تانية بتشوف اللي حواليك عملوا ايه ، إن في حاجه اسمها الضغط المجتمعي وده بيسبب تعاسه كبيرة جداً للناس ديماً فأنا ديماً بحاول أقارن نفسي وحبي للحاجه اللي اشتريتها دي هل هي أحسن حاجه مش بس بالنسبة للتكنولوجيا لأ ده بالنسبة لجاري عنده تليفزيون أحسن مني أو تليفونه أفضل مني.. وده بيساعد على عدم قناعتك بإن ده محققلك السعادة
07:47
من الحلقة (5) : ١٠ أخطاء شائعة تمنعك من الاستثمار
دول أكبر 5 مفاهيم أنا بحس أن هما بيمنعوك اصلاً تبتدي : أنا مقدرش عشان أنا مش غني ، هتستهلك وقت كبير جداً مني ، انا صغير / كبير السن الصح اللي ابدأ فيه ، لازم أبقى خبير ، هي خطر جداً إني ابتدي .. طيب الـ 5 حاجات التانين اللي هو لازم نفكر فيهم لو أبتديت هما الإستثمار حاجه طويلة المدى ومينفعش تفكر فيها على اساس قصيرة المدى أو حاجه سريعة بتحصل ، أنك عمرك ما هتستثمر على الأعتماد على العوائد التاريخية في توقع او ضمان العوائد المستقبلي شوف انت عايز ايه واشتريه ، هشتري واطي وابيع عالي ده مفهوم خاطئ ، انك لازم تاخد مخاطرة عالية عشان تحقق عائد عالي ، انك هتخسر السيولة بتاعتك لو بديت تستثمر .. دول الـ 10 حاجات 5 قبل ما تبدأ و 5 بعد ما تبدا أعتقد لازم نبقى عارفينهم وفاهمينهم وعارفين حلول لكل منهم
08:48
من الحلقة (6) : ما وراء شرا العربية
العربية دي سلعة إستهلاكية مش إستثمار ، تاني حاجه حسابك في البنك هو الخسران في المدى الطويل ، محدش مهتم أنت راكب إيه وبكام كل دي حاجات في دماغك وكده كده اللي انت راكبة بعد شوية هيبقى قديم ، تكلفة الفرصة البديلة كبيرة جداً لأنك ممكن تعمل حاجات تانية بالفلوس دي لو أنت مش واخد بالك أنا بحاول أخليك تاخد بالك إن الفلوس دي ليها قيمة في المستقبل أعلى بكتير جداً لو أنت وظفتها بطريقة صح عن إنك تستخدمها في طريقة إستهلاكية
09:20
من الحلقة (7) : التقاعد
الملخص بتاع الحلقة دي إني عاوز أعرفك إن في مشكلة اسمها التقاعد
عايز اشوف المناطق العربية شكلها عامل ازاي وعايز أقنعك إن بعد 30/40 سنة الشكل العام هيتغير في الدول دي ، يعني اللي أحنا شايفينة النهاردة في المجتمع كأجيال هيتغير لأن التركيبة السكانية كلها هتتغير ولو التركيبة السكانية هتتغير معناها مشكلة التقاعد هتبقى أكبر بكتير لأن الناس أكتر بكتير أنا محتاج أوفر موارد أكتر بكتير للناس فلو أنت بادي بدري لوحدك ومركز إنت عارف بتعمل إيه أنت ممكن يبقى عندك مميزات عن الإنسان المتوسط في المجتمع
بصينا برده على الدول المتقدمة عملت ايه والحلول اللي كانت هناك عشان برده نفكر مع بعض ازاي نعمل حلول فأنت قولتلي في 4 حاجات الدول دي بتعملها لو انت عندك في المجتمع بتاعك تأمين عام ممكن تشترك فيها لو عندك حاجه خاصة ممكن تشترك فيها برده لو فكرت في التأمين الصحي تشوف أنظمة معينة تغطيك تمام برده فاحنا بنشوف الدول المتقدمة عملت إيه وبنشوف عندنا إيه في دولنا العربية ونشوف برده لو في حياتنا اللي جاية الـ 5 / 10 سنين اللي جاية لقينا تطورات من الحكومة في الإتجاه ده أبقى فاهم إن الحكومة بتعمل كده عشان تأثر عليا فأنا ابقى واخد بالي ومتابع الأخبار في الأتجاه ده
برده عرفنا في الحلقة دي إيه بيحصل في التقاعد عشان ميبقاش في حاجه مفاجئة ليك ، إيه غالباً اللي بيحصل والضغط المالي بيجي منين وهكذا
10:45
من الحلقة (8) : هل للوقت تأثير على الفلوس؟
ليه الـ 100$ اليوم قيمتها أكبرمن الـ 100$ بعد سنتين ، يعني اذا أنا بعطيك خيار من اتنين بعطيك 100$ اليوم أو بعطيك 100$ بعد سنتين! المنطق إنه تنقي الـ 100$ اليوم لأن الـ 100$ بعد سنتين هتكون قيمتها أقل ، وكيف بتحدد قيمة الـ 100$؟ بالقدرة الشرائية للـ 100$ بمعنى ان لو عطيتك اليوم 100$ ممكن تشتري بيها طاولة بعد سنتين يمكن مقتدرش تشتري نفس الطاولة لان سعرها هيكون 105 دولار بسبب التضخم كل شي سعره بيغلى لذلك الـ 100$ قيمتها هتكون أقل بعد سنتين وهو ده معنى مفهوم القيمة الوقتية للمال .. كل ما يمضى الوقت كل ما العملة هينزل قيمتها .. لأنها مبتقدرش تحفظ قيمتها عبر التاريخ بسبب التضخم
11:37
من الحلقة (9) : يوفوريا
ليه يوفوريا ويعني ايه يوفوريا في الأول بالعربي؟
بص يوفوريا بالعربي معناها النشوة او السعادة الزائدة يعني حاجه فيها حماس زيادة. فاليوفوريا ديما مصطلح بنستخدمه لما السوق او المستثمرين يكونوا في مرحلة النشوة او الحماسة الزائدة اللي بتخليهم يبقوا متحمسين زيادة فيشتروا الأسهم بشكل عنيف جدا فتلاقي الاسعار بتطلع بشكل مبالغ فيه ، تفاؤل زيادة عن اللزوم ، هي دي المرحلة اللي بنسميها اليوفوريا او الحماسة الزائدة.
طيب انت قولت ان دي مرحلة السوق بيوصلها ممكن تكلمني على المراحل المختلفة اللي السوق بيمر فيها؟
بص هو السوق ممكن تقسمه لـ5 أو 6 مراحل وخلينا متفقين ان اللي بيقرر حالة السوق او وضع السوق طلوع السوق او نزول السوق او حماسة السوق اوالسوق دمه تقيل كل الالقاب اللي ممكن توصف بيها حركة الاسعار في السوق هي فالاخر قرارات المستثمرين احنا بنشتري ولا بنبيع دي الحاجه الوحيدة او الاساسية اللي بتحدد اتجاه السوق ، فلو الناس بتشتري السوق بيطلع لو الناس بتبيع السوق بينزل دي القاعدة العامة المعروفة في الحياة كلها عموما يعني ولو الناس بتشتري أوي السوق هيطلع اوي ولو الناس بتبيع اوي السوق هينزل اوي ف في الاخر في مراحل بتعدي بعواطف المستثمرين بتخليهم ياخدوا قراراتهم الاستثماريه بناءا على العواطف دي فبيحدد مراحل السوق
13:21
من الحلقة (11) : ما وراء طلب القرض
وانا رايح البنك أخد قرض انا باخد قرض ليه هل هو حاجه انا فعلا محتاجها ولا لأ ، نوع الفايدة اللي البنك بيحاول يبعهولي والفايدة الحقيقية اللي بدفعها من جيبي لازم ابقى فاهم المعلومة دي كويس جدا لانها بتفرق في القرار بتاعي لازم كمان ابقى فاهم قد ايه من الميزانية بتاعتي هتتوجه للقرض ده وهل هي هتضغط عليا في بند الميزانية ولا لأ ، يعني انا محتاج حاجه معنية والحاجه المعينة دي مفروض تمثل 10% من ميزانيتي ولكن مع القرض ومع المدفوعات دي بقت 20% فأخد بالي أنها كده ممكن تضغط على الميزانية بتاعتي وفالنهاية انا ديما بحاول اوصل للحاجات اللي ماتضغطش على الميزانية ، انا هدفي ان الميزانية بتاعتي تبقى متوازنة ومظبوطة عشان متأثرش بشكل سلبي على حالتي النفسية
14:05
من الحلقة (12) : هل أنت غني أم ثري
لو انت لسه بتبتدي حياتك او لو انت بتعتبر نفسك عندك دخل كويس جدا ، بتعتبر نفسك غني ، بس انت عايز تتحول من الغنى للثراء هنعمل إيه
اول حاجه لازم ابتدي احوش جزء من دخلي الجزء ده ممكن يبقى 10 /15 /20 /30% من دخلي حسب مقدرتك مينفعش تعيش بنسبه عاليه في الصرف بالنسبة للدخل
تاني حاجه لازم تدفع كل الديون اللي عليك بالذات اللي بتدفع عليها فوائد ، مش لازم تقترض لو انت مش محتاج لأن بردة انا ممكن أكون غني وبقترض علشان أسافر واتفسح وأبين واعمل صور يعني ممكن أعمل حاجات كتير جدا ملهاش معنى بس عشان ابين اننا مبسوط ، فأبعد عن القروض أو الأستدانه او انك تعمل حاجات زي دي لأنها فالاخر سلع استهلاكية
الحاجة اللي بعديها انك تبتدي تستثمر على طول يعني ايا كان نوع الأستثمار اللي انت هتعمله مع الوقت ابتدي ، ابتدي بحاجات بسيطة ابتدي في الودايع ، ابتدي بشهادات الأستثمار ابتدي في الحاجات اللي انت تفهمها مش لازم تصعب الدنيا على نفسك
الحاجه اللي ممكن نعملها برده انك تحاول تبعد عن اي مصروف ملوش معنى ، يعني انت صحيت من النوم حاسس انك عاوز تصرف النهاردة مش لازم ممكن تروح تشتري بيها حاجه استثمارية أحسن - الحاجه الاخيره ان انت لازم يبقى عندك أهداف واضحة على المدى الطويل ، يعني مينفعش أبقى بعمل كل الحاجات دي بدون أي هدف المهم يكون عندك هدف لو معندكيش هدف وبتحاول تعمل حاجات تحولك من حالة لحالة يبقى انت بتعمل حاجه غلط
15:34
من الحلقة (13) : بدايات الإدخار – الجزء الأول
انا عاوز أبقى الشخص اللي بيحوش ، عايز احط فلوس على جنب ، وعايز أبقى عامل حساب المستقبل معنديش مفاجات تحطني في موقف ان انا مبقاش عارف أتصرف ، ديما يبقى عندي فلوس محطوطه على جنب.. أعمل ايه؟؟
The Earlier The Better اول حاجه
يعني اشطر واحد بالنسبالي اللي مع أول مرتب في حياته هو ابتدى يحوش ودي الإجابة الأساسية اللي أي حد هيقولهالك ، طيب لو انت عندك 30 ، 40 ، 50 هل معاناها متحوش؟ لأ أكيد تحوش بس المشكلة إن كل ما بتتأخر كل ما الصعوبة بتاعة إنك تحقق الهدف بتاع التقاعد بيصعب
16:16
الحاجه الغلطة اللي الناس بتعملها ديما موضوع الإدخار بتاعك ده بيجي فين في مصاريفك الشهرية ، يعني أغلبية الناس اللي بتعمله ان هي بتصرف كل مصاريفها ولو أتبقى حاجه تروح للإدخار.. الموضوع ده غلط جدا ، أو ده أغلط حاجه الناس بتعملها .. الإدخار هو بند مصروفات زيه زي اي بند بتعمله ، يعني زي ما أنت بتاكل وبتشرب وبتعتبره حاجات أساسيه المفروض الإدخار يجي مع الحاجات الأساسية التكلفة الثابتة هي الحاجات اللي هتخليني أعيش كهربا / ماية / إيجار.. أيا كان ، الإدخار المفروض يكون في الجزء ده من الميزانية بتاعك ، يعني أنا عندي تكلفة ثابتة وتكلفة متغيرة في حياتي.. التكلفة المتغيرة هي بقى اللي بتتحرك ، اللي هو هخرج قد إيه الشهر ده ، وهسافر.. كل الكلام ده متغير كل شهر مش حاجه ثابته
17:03
من الحلقة (14) : بدايات الإدخار – الجزء الثاني
وانت بتحوش لقيت ربنا كرمك وعرفت تبتدي توزع استثمراتك بطريقة معينة.. هل تبطل تحويش؟ لأ ، أسبق يعني طول مانت ماشي في مستوى معين من الادخار عمرك ما تقلله يعني لو دي حاجه خارجه منك من غير ما تضغط على حياتك ومن غير ما تغير نمط حياتك او أيا كان متقللش الادخار لأن ممكن يجيلك لحظة في حياتك تخلف تبقى محتاج فلوس تدخل جامعة أيا كان معدلات الادخار بتاعتك هتقل جامد
17:33
من الحلقة (15) : التحيز
ابتدي متقلقش متخافش أنت بتاخد مخاطر في الحياة أكبر بكتير من أنك تستثمر بس أنت مش واخد بالك ، والقرارات العقلانية هي الصح يعني لو قالك إن محفظة متنوعة بتعمل عوائد بطريقة معينة أو عوائد على مدار ال 10 / 20 / 30 سنة متخافش أبتدي والخطوات الصغيرة البسيطة اللي فالأول مهمة جدا
17:58
من الحلقة (17) : رحلة داخل شركات السمسرة
أنا النهاردة ممكن أروح البورصة نفسها واشتري مباشرة ولا أنا لازم يبقى 100% من الوقت عندي حساب في شركة سمسرة؟
شركة السمسرة هي بوابتك على البورصة انت النهاردة علشان تقدر تتعامل مع اي بورصة ، البورصة بيبقى ليها أعضاء اللي هم شركات السمسرة مبتقدرش انت تروح البورصة زي الزمن القديم الناس تروح البورصة وتكلم بعض وتبيع لبعض الأسهم وكده ، في الزمن الحديث البورصة فيها اعضاء اللي هم شركات الوساطة وشركات الوساطة هي اللي انت بتفتح فيها حساب ، وشركات الوساطة هي اللي بتمثلك في البورصة عشان تبيع وتشتري أسهم بالنيابة عنك.
18:32
من الحلقة (18) : أمناء الحفظ
ومن الحاجات اللي لازم يبقى عندك فيها حساب أو عقد معين هو شركات أمناء الحفظ ، وأنت خبرتك طويلة في المجال ده فأنا قولت تيجي معانا النهاردة بحيث الناس اللي بتسمعنا تعرف ايه هو أمين الحفظ
بص أمين الحفظ ده بالظبط زي أكنك أخدت صندوق في خزنة بنك وبيبقى معمول عن طريق حساب وبيتحط فيه محفظة الأسهم بتاعتك بحيث ان ميبقاش في أي مخاطرة ان حد يبعلك الأسهم وياخد الفلوس وهو اللي بيتعامل المعاملات المالية بتاعة الأسهم
19:08
من الحلقة (19) : ما وراء إقتناء حيوان أليف
الشراء الإندفاعي ده بيأثر عليا مادياً وبيحطني في مشاكل ولكن لما بعمل شراء إندفاعي لاقتناء حيوان أليف في البيت ده هنا مش بيأثر عليا أنا بس ده بيأثر على كائن حي له إحساس وله حياة تانية ممكن بالسالب ليه؟ لأن الشراء الإندفاعي من الحاجات برده اللي بتميزه إن أنت بعد ما بتقتني الحاجة خلاص متعتك منها بتروح فمبتفكرش فيها تاني وده بنشوفه بيحصل كتير جداً في اقتناء الحيوانات الأليفة
19:38
من الحلقة (21) : الاستثمار العقاري.. هل يستحق؟ (شراء للتأجير)
طيب احنا دخلنا ببساطة دورنا على حاجة اسمها (حاسبة العقارات الإيجارية (الحاسبة دي في الأول هي آلة حاسبة محتاج أدخلها معطيات معينة وبعدين هتطلعلي نتايج فأنا همشي معاك واحدة واحدة في المدخلات اللي أنت هتدخلها الأول وبعدين نحاول نحلل مع بعض النتايج
https://www.calculator.net/rental-property-calculator.html : حاسبة العقارات الإيجارية
شكراً جداً على وقتكم معانا النهاردة ويارب يكون الفورمات ده عجبكوا من الحلقات وأشوفكوا إن شاء الله الاسبوع الجاي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #مقتطفات_مالية #الجزء_الأول