51. السندات VS الأسهم
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة هي مقارنة بسيطة بين الأسهم والسندات كأدوات للتمويل الأساسية والمتداولة بشكل كبير جداً في الوسط المالي.. يعني إيه سهم ، يعني إيه سند ، إيه المميزات او الفروق بينهم وازاي بتحقق العوائد منهم
: في هذه الحلقة
00:44 المقدمة
01:28 أدوات التمويل
03:14 هل المستثمر في الأسهم يعتبر شريك في الشركة؟
03:38 المستثمر في الأسهم بيعمل فلوسه ازاي؟
04:43 مين ليه الحق في إصدار الأسهم والسندات؟
06:00 المميزات أو الفروق بين الأسهم والسندات
07:05 كصاحب شركة بتستفيد إيه من إصدار الأسهم؟
07:50 المراحل اللي بتمر فيها الشركات لإصدار الأسهم في البورصة؟
11:16 مرحلة طرح السندات في الشركات؟
13:05 هل المخاطرة أعلى في الأسهم ولا السندات؟
14:09 ليه السندات الحكومية تعتبر خالية من المخاطرة؟
14:56 أمتى محفظة السندات بتعمل أداء أفضل من محفظة الأسهم؟
15:36 أداء الأسهم والسندات في السوق الأمريكي على مدار 100 سنة
17:48 إيه الهدف من الإستثمار؟
18:28 الخاتمة
كمستثمر أنت مش مطلوب منك تكون فاهم كل التفاصيل دي ولكن هدفنا هو إنك لما تشتري صندوق إستثمار تبقى عارف أنت بتشتري إيه ولكن أنت كل اللي محتاج تعمله هو إنك تحوش وتضخ فلوس وتستثمر
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
اهلاً بيكوا في حلقة جديدة من بودكاست كلام ينور
في حلقة النهاردة عايز أرجع كده لمفاهيم أساسية بسيطة يمكن متغطتش في الحلقات اللي قبل كده وده عشان عايز الناس تفهم معايا الفكرة ورا الأسهم والسندات.. يعني مقارنة بسيطة كده يعني إيه أسهم ويعني إيه سندات لأن أنت ممكن تكون حابب تستثمر في الحاجات دي وأنت مش فاهم النظرية الأساسية هي ليه أتعملت ، ليه موجودة ، ليه كمستثمرين بنحاول نبص على الحاجات دي.. وازاي مع الوقت بتحقق العوائد فعايز أبتدي في الأول يعني إيه اصلاً سهم ويعني إيه سند..
01:28
أول حاجه لازم أفهمها إن الحاجتين دول من ادوات التمويل بمعنى إيه إننا مثلاً عندي شركة ، عندي فكرة معينة ، عايز أعمل منتج عايز أعمل تليفون ، عايز أعمل عربية ، عايز أعمل موقع أياً كان الفكرة اللي بفكر فيها كرائد أعمال أنا محتاج أمول المشاريع بتاعتي فالطريقتين المتعارف عليهم الأساسيين إما هبيع حصة من شركتي وهدخل مساهم معايا يتحمل جزء من المخاطرة بتاعة نجاح المشروع وأديله جزء من الأرباح بتاعتي ولو الشركة كبرت هو يستفيد معايا فيها ودي هنسميها الأسهم
والسندات وهي النوع الأخر من التمويل اللي بيساعدني أعمل المشروع بتاعي ، والسندات دي عبارة عن قرض ولكن هنا أنا مش بروح أخد قرض من البنك مثلاً ، بقدم إستثارة وأقوله أنا عايز قرض عشان أفتح مشروع .. لأ أنا بروح لشوية مساهمين أو مستثمرين في الحالة دي بقولهم يا مستثمرين أنا عندي الفكرة الفلانية عايز أخد قرض منكوا بضمان المشروع بتاعي أو بضمان شوية أَصول عندي أو أياً كانت الضمانات اللي أنا هديهالهم وكل اللي أنتو هتاخدوه مني هتاخدوا فايدة ثابتة او متغيرة على حسب الأتفاق يعني في مدة معينة من الزمن
يبقى هنا السند هو مدة محدده أنا بعد 10 سنين أو 5 سنين على سبيل المثال هرد الفلوس للمستثمرين بكامل وفي الفترة دي هدفعلهم الفايدة بتاعتي اللي متفقين عليها من أول يوم فالسند هنا واضح هو عبارة عن قرض الشركات بتاخده ولكن الأسهم هي حصة أنا ببيعها من رأس المال في الشركة بتاعتي فده أول فرق ما بين السند والأسهم
03:14
طيب مين اللي يعتبر شريك في الشركة؟ الأسهم ، الأسهم بيعتبر واحد شريك الراجل ده عنده حصة في الشركة ولكن المستثمر في السندات هو عبارة عن دائن للشركة هو بيديهم فلوس وهما بيبقوا عليهم فلوس للمستثمر ده فالتملك في الشركة بيحصل بس عن طريق الأسهم من عن طريق السندات
03:38
يبقى أنا عرفت هنا المستثمر في السندات بيعمل فلوسه ازاي بيعملها من الفوايد اللي المصدر بتاع السند بتاعه بيدفعهاله ولكن الراجل بتاع الأسهم بقى بيعمل فلوسه ازاي؟ بيعملها من الحصة بتاعته في الشركة يعني مثلاً أنا عمر أمتلك على سبيل المثال حصة في شركة X عندي 20% منها ، أشتريت أسهم في أول يوم في إنشاء الشركة عندي 20% جت الشركة أخر السنة عملت 100 ألف دولار مثلاً عمر حصته في الأرباح هي 20 ألف دولار لأن حصته 20% وفي شركات ساعات بتوزع الفلوس دي كـ كوبون توزيع سنوي للمستثمر ، وفي شركات أخرى بتعيد تاني استثمار الـ 20 ألف دولار الأرباح دي في الشركة عشان السنة اللي وراها تقدر تعمل فلوس أكتر وأكتر وأكتر وبعدين في يوم من الأيام هقدر أبيع حصتي اللي دخلت بيها أول يوم على سعر أعلى من اللي دخلت بيه أول يوم.. يبقى دي الطريقة اللي الراجل بتاع الأسهم بيعمل منها فلوس
04:43
طيب تعالوا نشوف مين بيصدر الأسهم ومين بيصدر السندات ، يعني مين عنده الحق إنه يصدر الأسهم هنلاقي إن الشركات فقط هي اللي بتصدر الأسهم يعني أنا كونت شركة فبقسم الشركة دي لـ 100 سهم وأقدرأوزع الأسهم دي على المستثمرين
طيب السندات هنلاقي إن ممكن مؤسسات حكومية تصدر السندات ، ممكن الحكومة نفسها تصدر السندات ممكن تلاقي شركات خاصة بتصدر السندات ، ممكن تلاقي شركات عامة بتصدر السندات يعني اللي بيصدر السند نفسه ممكن نلاقي الحكومة نفسها بتقول للشعب أو للمجتمع الدولي يا مجتمع يا دولي أنا عندي سند معين أنا عايز أستلف مليار دولار مثلاً وهديكوا سندات ، لكن الشركات برده عندها الطريقة إنها تعمل نفس الحاجه ولكن في الأسهم الحكومات مبتبعش أسهم في البلد نفسها مينفعش أو مشوفناش لسه بلد بتبيع أسهم على نفسها مفيش حاجه اسمها كده لأن الأسهم لازم تبقى مرتبطة بكيان قانوني اسمه شركة والشركة دي بتعمل أرباح وعندها أصول وهكذا فده أول فرق الأسهم بتصدر من الشركات فقط والسندات بتصدر من المجموعة اللي احنا أتكلمنا عليها
06:00
إيه تاني بيميز أو بيفرق بين الأسهم والسندات هنلاقي إن أنت كحامل أسهم أنت ليك الحق تحضر الجمعية العمومية بتاعة الشركة ، أنت راجل مساهم عندك حصة حتى لو كانت صغيرة كل سنة الشركة بتعمل مثلاً 4 جمعيات ، كل 3 شهور بتعمل جمعية أو كل سنة أياً كان على حسب القانون المنظم أنت كراجل بتحمل أسهم ممكن تروح تقعد في الإجتماع تعرف هما بيعملوا إيه وتقدر تقول رأيك لو في طريقة إنك تقول بيها رأيك ، تقدر تعمل تصويت على قرارت معينة زي مثلاً هيغيروا مجلس الإدارة أو هيرشحوا مجلس إدارة جديد أو أياً كان القرار اللي هما بيصوتوا عليه في إجتماع الجمعية العمومية أنت تقدر تعمل كده ولكن في السندات أنت متقدرش تعمل كده في السندات أنت راجل مديهم قرض بس تقدر تاخد فلوسك عن طريق إنك تبيع وتشتري السند ده ولكن ليس لك حق في إدارة الشركة أو التصويت على القرارات الرئيسية يبقى ده برده فرق مهم لازم نعرفه ما بين الأسهم والسندات
07:05
أنت بقى كصاحب شركة لو بصنلها بقى من منظور صاحب الشركة أنت بتستفيد إيه كواحد بتصدر الأسهم أنت عندك فكرة معينة وخايف من المخاطرة بتاعها أو معندكش التمويل اللازم في أول يوم وخايف مثلاً الفكرة متنجحش فأنت بتوزع المخاطرة بتاعتك بدل ما أنت تاخدها 100% من فلوسك أنت بتقول أنا مثلاً مستعد أضحي بـ 30% في مقابل إن في مساهم هيجي معايا المساهم ده هيتحمل جزء من الخسارة لو القصة منجحتش هو برده هيخسر معايا ولو الدنيا كسبت والمشروع نجح أنا مبسوط إني يبقى عندي 70% من لازم 100% لأن الـ 70% دول في الأخر هيعملولي ثروة أو الدخل اللي محتاجه لو الفكرة دي نجحت فهي نوع من أنواع توزيع المخاطرة
07:50
طيب بنشوف شركات بتبتدي ازاي؟ معظم الشركات الكبيرة اللي بنسمع عنها زي مثلاً فيسبوك أو آبل أياً كان الشركات اللي وصلت للفترة دي أول حاجه بتحصل إن الفكرة بتتولد صغيرة بيبقى المجموعة اللي بتستثمر في الفكرة دي مجموعة مقربه من صاحب الفكرة أو من رائد الأعمال وبيحصل هنا تقسيم للأسهم في شكل شركة خاصة للإكتتاب العام أو متقدرش أنت تشتريها كمستثمر موجود في البورصة دي بتبقى فكرة ما بين صحاب ، اللي بيلم الفلوس في الأول غالباً بيبقى صحاب أو عائلة يعني المجموعة القريبة أو الدايرة اللي حواليك المغلقة الصغيرة
Angel Investors بعد شوية الفكرة دي نجحت أو بدأت تعمل جذب للناس بنلاقي إنهم بيطلعوا بره لحاجه مثلاً اسمها (مستثمر ملاك)
بنسمع عنهم النهاردة كتير في الوسط المالي اللي هما جماعة من المساهمين بيحبوا ياخدوا مخاطرة في الأفكار بدري أوي ، سمع مثلاً إن في تطبيق بيتعمل في الحته الفلانية أو خدمة معين مصنع صغير بيعمل حاجه مميزة أياً كانت الفكرة دول بيتجمعوا ويقولوا خلاص احنا شوفنا أنت فيك أمل كرائد أعمال فهنبتدي نخش معاك وبنصدرلهم أسهم جديدة بيخشوا في الشكل ده
Venture Capital لو روحنا بقى للمرحلة اللي بعدها والفكرة كبرت أكتر في حاجه اسمها (رأس المال المُخاطر)
صناديق أو فلوس بتبقى موجهة للشركات الناشئة دي بتبقى إستثمارات جايه من دول معينه ممكن متبقاش من الدولة الأساسية اللي أنت عايش فيها بتدور برده على الأفكار دي ودي بتبقى مرحلة متقدمة شوية بعد المستثمر اللي بيجي بدري الأفراد ممكن تلاقي جه يقول أنا عاوز أخد حصة عندك هنا معظمهم بياخدوا أسهم مش سندات مش بيحبوا يسلفوا الشركات الصغيرة لأن في المرحلة دي أنت بتبقى عايز حصة عشان الشركة والفكرة كبرت جامد أوي أنت تستفيد منها كصندوق إستثمار فدي مرحلة تانية مهمه
10:00
المرحلة اللي بعديها إن الشركة ممكن تطرح في إكتتاب عام في البورصة ودي بنشوفها زي فيسبوك أو جوجل أو آبل في لحظة معينة الشركة بقت بحجم معين تقدر تدخل فيها مستثمرين من الخارج هنا أتحول الشركة الأسهم دي من أسهم خاصة في ناس معينه عددهم قليل انها تطرح على بورصة ما في مكان ما في العالم أنت حضرتك تقدر من بيتكوا تفتح حساب وتشتري في الأسهم دي
الأسهم هنا بيتغير حالها تماماً انها بتبقى على البورصة بيبقى عندها نوع جديد من الإفصاح يعني لازم الشركة تطلع نتايج الأعمال بتاعتها على الملأ لازم الأرقام تبقى شايفها ، مبيعاتهم ، مجلس الإدارة بيتشكل بطريقة معينة ، بتتبع قانون الدولة المنظمة لأنها النهاردة بتبقى زي المال العام أي حد يقدر يخش يشتري فبيبقى ديماً في حقوق تحمي المال العام وتحمي الأقلية الموجودة ولكن بشكل عام الفكرة لوحدك أو مع 3 / 4 صحابك طبعاً شكل الأسهم بيتغير بس من الأول للأخر هي أسهم ، الأسهم هنا بس بيختلف مرحلة من شركة لسه مولودة وبعدين شركة ناشئة وبعدين شركة دخلت البورصة بشكل عام فبشكل عام هي كبيرة
11:16
لو بصينا على السندات هنلاقي الموضوع مختلف شوية هنلاقي إن الشركات عبال ما توصل لمرحلة تقدر تاخد سند معين لازم تكون وصلت للمرحلة النهائية الكبيرة يعني نادراً لما نلاقي شركة صغيرة بتطرح سند لأن الخطورة بتبقى لسه عاليه لأن الشركة ممكن تفلس أو الفكرة كلها تبوظ فالقرض كله يروح فبنلاقي في المراحل الأولانية في حياة الشركات بنلاقي إن معظم الشركات بتاخد قروض من البنوك أو بتاخد قروض من الأفراد القريبين ولكن هو صعب أوي يطرح سند متداول في السوق العام لأن السند هنا مرحلة بتيجي في الأخر بتيجي لما الشركة تبقى كبيرة زي ما قولنا لأن مينفعش مستثمرين صغيرين يشتغلوا في السندات لازم يكون بنوك مرخصة كبيرة فالموضوع معقد شوية مش زي الأسهم ولكن الشركات الكبيرة لازم ديماً يبقى عندها تمويل جاي من نوعين مع بعض يعني مش هنلاقي شركة كبيرة عندها أسهم بس أو سندات بس كراجل صاحب الشركة لأ بيبقى عندك ميكس ما بين الأتنين لأن ده ليه فوايد وده ليه فوايد
برده الفوايد بتاعة السند أنت تقدر كشركة تزود حجم الإقتراض بتاعك وتقلله على حسب شغلك وعلى حسب الوضع اللي أنت فيه ولكن الأسهم أنت لما بتبيعها خلاص أنت بتبقى بعت الحصة بتاعتك دي لفترة طويلة وخلاص دخل معاك مساهم جديد فدي الأداتين الرئيسيتين الموجودة عليها أسواق المال هنلاقي معظم الحاجات المتداولة هي عبارة عن أسهم أو سندات طبعاً في حاجات تانية بتتداول بس دول أغلبية التداول بيحصل على الحاجتين الأساسيتين
13:05
بالنسبة بقى للمخاطرة هل الأسهم مخاطرة أعلى ولا السندات مخاطرة أعلى؟
طبعاً الأسهم فيها مخاطرة أعلى شوية لأنك بتبقى شريك في المكسب او الخسارة بمعنى إن الفكرة لو نجحت الأسهم ممكن تطلع جامد جداً ولكن لو الفكرة فشلت أو الاداء المالي بتاع الشركة مش مظبوط والفكرة منجحتش أنت راجل شريك زيك زي صاحب الشركة فبتتحمل الخسارة معاه
لكن السندات المخاطرة بتاعتها أعلى لأن انا عارف إن مثلاً هصدر القرض برقم معين وعندي ضمان بتاع القرض هو حاجه معينه وأصول الشركة شايفها والتدفقات النقدية بتاعة الشركة أنا شايفها وكل شهر أو كل 3 شهور أو كل سنة على حسب السند بتاعك بيدفع كل قد إيه كل 3 شهور أنت بيجيلك دخل ثابت من السند عشان كده هي تسمى أدوات الدخل الثابت
14:09
طيب إيه اللي مخلي برده مخاطرة السند بتاعها أقل لأن في حكومات بتصدرها والحكومات هنا تعتبر خالية من المخاطرة لأن ده يسمى فلوس الحكومة فالحكومة عندها القدرة على الإقتراض في أي وقت فعندها القدرة إنها تدفع للناس بتوع السندات في أي وقت فلوسهم لو حصل أي مشكلة بتقدر تظبط الوضع بتاعها إن هي تعرف تدفع للسندات القديمة وتصدر سندات جديدة وهكذا فالمخاطرة في السندات أقل وبالتالي على المدى الطويل لو بصينا على أداء الأسهم والسندات ، محفظة مجمعة من الأسهم ومحفظة مجمعة من السندات هنلاقي أن محفظة الأسهم على المدار الطويل بتعمل أداء أفضل بكتير من محفظة السندات
14:56
طب أمتى محفظة السندات بتعمل أداء احسن في الأزمات مثلاً زي الأزمة العالمية أو في تباطؤ في وقت معين بنلاقي ممكن فترة سنتين تلاتة أربعة السندات هنا بتبقى إستثمار أفضل في الفترة دي لأنها بتحميك القيمة بتاعة السندات مبتنزلش زي الأسهم أو مثلاً شوفنا في الوقت بتاع الكورونا مثلاً هنلاقي الأسهم نزلت جامد جداً ، السندات كان في سندات دفاعية وفي حاجات منزلتش الفترة دي ولكن محفظة الأسهم ديماً بتتأثر أسرع بكتير ولكن زي ما بنقول محفظة الأسهم على المدى الطويل أداءها بيبقى أفضل من محفظة السندات
15:36
مثال مثلاً على السوق الأمريكي لأن احنا عندنا معلومات طويلة يعني السوق بقاله أكتر من 100 سنة والسوق متداول والمعلومات متوفرة بسهولة كل الكلام ده طبعاً بالدولار لو أخدنا مثلاً محفظة متنوعة من الأسهم
هنلاقي إن على مدار الـ 100 سنة اللي فاتوا أداء الأسهم حوالين الـ 9% سنوياً ، أداء السندات على حسب نوع السندات يعني بس المتوسط من 4.5 لـ 5% هنلاقي التضخم في أمريكا في نفس الـ 100 سنة دول حوالي 3%
فهنلاقي السندات بتعملك فوق التضخم 1.5% تقريباً بتحافظ على قيمة الفلوس بتاعتك وبتعمل أداء 1.5% فوق مستوى التضخم وهنلاقي الأسهم بتعمل حوالي 6.5% فوق معدل التضخم فهي بتحمي فلوسك وبتديك 6.5%
Big Caps هنا أنا بتكلم على محفظة من الأسهم الأمريكية
أو مؤشر معين بيستخدمه في أمريكا لآكبر الشركات الموجودة في أمريكا
Great Depression هنلاقي مثلاً كان في فترة بتاعة النزول القوي اللي كان موجود في العشرينات 1928 أو 1929 اللي هي الكساد الكبير
هنلاقي محفظة الأسهم عملت أوحش من محفظة السندات
هنلاقي في 2008 ، نفس الكلام في 1987 كان في برده أزمة حصلت في الأسواق ففي السنة دي برده الأسهم عملت أوحش ، هنلاقي في كل الأزمات زي ما قولنا على مدار سنة سنتين تلاتة ممكن محفظة الأسهم تبقى أوحش ولكن على المدى الطويل زي مانتو شايفين الأرقام ناحية الأسهم أكتر
وأنا بالنسبالي زي كل مرة بحاول أقول إن الأهم بالنسبالي الأداء على المدى الطويل لو أنا بستثمر ودخلت في نص أزمة أو حصل أزمة وأنا لسه بستثمر وببني محفظتي بالعكس أنا عايز تكون مستويات الدخول بتاعتي في الأسهم مثلاً أوطى فكل ما بحط فلوس والدنيا بتنزل كل ما يكون أحسن لأن ده هينعكس على الأداء بتاعي على المدى الطويل
17:48
احنا هنا ديماً بحاول أفكر الناس إني مش بتكلم على حاجه ليها علاقة بسنة أو سنتين أو 5 سنين أنا بكلمك على إستثمار في قطاع معين أو فكرة معينة 10 / 15 / 20 سنة كمان دي الطريقة اللي بتخليك تحمي فلوسك احنا هنا بنتكلم على حاجات متقاسه بالدولار متقاسه فوق معدل التضخم ديماً أي حاجه هتكلم فيها هحاول أذكر معدل التضخم في الفترة اللي احنا بنتكلم فيها عشان الهدف من الإستثمار في الأول وفي الأخر انه يحميلك القيمة الشرائية بتاعة العملة بتاعتك ويديك عائد إضافي زيادة فوق مستوى التضخم
18:28
أنا سريعاً أتكلمت على الموضوع بتاع الأسهم والسندات كفكرة ، كأنت صاحب عمل عايز تصدر أسهم في يوم من الأيام ، عايز تشارك صحابك يعني دي نظرة سريعة على الموضوع أنت كمستثمر بتحاول تفهم إيه الأسهم وإيه السندات وبعد كده في الأخر أنت ممكن تروح تشتري محفظة متنوعة زي ما أتكلمنا في حلقة صناديق المؤشرات ممكن تشتري محفظة متنوعة من الأسهم أو محفظة متنوعة من السندات ومش لازم تكون بتفهم في التفاصيل بتاعة اختيار أحسن شركات او ده مش شغلتك أنت مش مطلوب منك تعمل كده أنا بشرحلك المفهوم نفسه بتاع الأسهم والسندات عشان لما تشتري صندوق إستثمار تبقى عارف أنت بتشتري إيه ، صندوق الإستثمار ده هو اللي هيعملك الحاجات اللي احنا بنتكلم فيها وهو ده اللي هيجمعلك الأسهم اللي المفروض تقيس أداء السوق أو تعمل فيها أداء قريب جداً من السوق وأنت كل اللي محتاج تعمله تحوش وتضخ فلوس وتستثمر وتخلي النظام ده موجود عندك
شكراً جداً على وقتكوا وأشوفكوا الاسبوع الجاي
Translation of some words and terms:
Concept مفهوم
Product منتج
Website موقع الكتروني
Risk مخاطرة
Business مشروع تجاري
Application form استمارة التقديم
Interest فائدة
Day one اليوم الأول
Dividends أرباح
Valuation تقييم
Voting التصويت
Attraction جاذبية
Application تطبيق
Service خدمة
Level مستوى
Default تخلف بالدفع
Cash Flow نقد متدفق
Risk Free خالي من المخاطر
Long Term طويل الأجل
Performance أداء
Slowing Down تباطؤ
Data البيانات
on Average في المتوسط
Discipline نظام
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #الأسهم #السندات