52. بعد سنة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة احنا بنحتفل معاكوا بسنة أولى كلام ينور
الحمدلله على مدار سنة كاملة قدرنا ننزل 52 حلقة بمعدل حلقة إسبوعياً
في حلقة النهاردة شمس بيحكلنا عن تجربته بعد السنة
إيه اللي أتعلمه خلال السنة دي وازاي التجربة دي كانت مفيدة بالنسباله وغيرت في طريقة تفكيره
إيه الحاجات اللي كانت غير متوقعه في تفاعلكم معانا وحصلت بفضل الله
احنا هدفنا الأساسي من البودكاست ده إننا نوصلك المعلومة بطريقة تقدر تاخدها وتترجمها في حاجه تأثر بيها على حياتك فمتحاولش تعرف المعرفه للمعرفه حاول تشوف المعرفة دي ازاي ممكن تطبقها على حياتك وشغلك وتستفيد منها
يارب السنة دي تكون فرقت معاكم ونالت رضاكم وقدرنا نبسطلكم الحياة المالية بشكل سهل ونكون إضافة خفيفة ولطيفة للروتين الإسبوعي بتاعكم وإن شاء الله السنة اللي جايه كمان نوفق للمزيد من الحلقات والمعلومات اللي تساعدكم وتنال رضاكم بإذن الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
النهاردة الحلقة رقم 52 ودي تعني إن احنا الحمدلله قفلنا سنة يمكن إسبوعياً الحمدلله بنزل حلقة كل إسبوع فقررت أقف مع نفسي وقفه كده بعد سنة وأحاول أمشي معاكوا كده في أنا أتعلمت إيه من التجربة دي وإيه المفيد فيها وازاي تقدر تاخد حاجات منها وتحاول تعملها في شغلك أو في فكرك الإستثماري بشكل عام
يارب بس متكونش ممله يعني نوعاً ما احنا بنحاول نحتفل مع بعض بالسنة دي وأعتقد الحمدلله في ناس بتبعتلي وشايفه من ردود الأفعال اللي بيجيلي على البودكاست ده قد إيه هي حاجات بسيطة ممكن تغير الفكر بتاعك
أنا بس مش عاوزك تكون بتسمع البودكاست من غير ما تنفذ أنا أهم حاجه عندي إن المعلومات اللي جايه دي تقدر تاخدها وتترجمها في حاجه تقدر تأثر بيها على حياتك أنا مش من النوع اللي بيحب يعرف المعرفه للمعرفه أنا بحب أشوف المعرفة دي وأشوفها ممكن ازاي تطبق على حياتي
يارب تكون السنة دي فرقت معاكوا ولو مفرقتش معاكوا إن شاء الله السنة اللي جايه دي تفرق معاكوا
اول حاجه هقولها يعني أنا أتمنى أكون عن أوائل الحلقات اللي أنا عملتها قبل كده أتمنى يكون الإتجاه بتاعي بيتحسن ، يعني أتمنى يكون طريقتي في الإلقاء أو في الأداء بتاع البودكاست تكون بتتحسن
أنا عن نفسي بقيت منظم أكتر ، بحاول أكتب الحلقة بطريقة أحسن شوية بحاول أمشي معاكوا واحدة واحدة لو حد بيسمعني إيه اللي ممكن يجي في دماغه ، إيه الحاجات الموجودة في الحياة قدامك مش بحاول أتكلم مثلاً على معلومة في كتاب لأ أنا بحاول أجيبها من تجربة حقيقية أنت ممكن تقع في مشكلة معينة أنت شايفها أنا أحاول أحلهالك وهكذا فأعتقد إن أنا عن الأول أو أنا حاسس إني ممكن أكون منظم نفسي أكتر شوية
الحاجه التانية إن أنا لما بتكلم في البودكاست ، البودكاست ده حاجه عامة أنا بحاول عن نفسي الآراء دي بنفذها يعني مش بحاول أقولك حاجه معينه وأنا مش عايز أنفذها ، أو مش عاوز أطرح فكرة معينة متكونش أنا مقتنع بيها
وإقتناعي ده زي ما بقول ده إقتناع النهاردة يمكن يظهر معلومات في المستقبل تقول إن اللي أنا بعمله النهاردة علمياً مش صح أو في مدرسة معينة في الإستثمار غيرت حاجه في وجهة نظري وقتها هقدر أغير وجهة نظري لأن أنا مؤمن إن الإستثمار عموماً هو حاجه متغيرة مع الوقت عمرك ما هتكون بتستثمر في الخمسينات زي التسعينات زي ما بتستثمر النهاردة
لأن مثلاً في قطاع بالكامل زي القطاع التكنولوجي مكنش موجود في الخمسينات لما القطاع ده جه غير شكل أداء السوق وغيرت حاجات معينه في مفهوم المستثمرين وطبعاً البحث بيتحسن والأدوات اللي احنا بنستخدمها كمستثمرين بتتحسن فاللي بقوله النهاردة هو أفضل ما توصلت إليه النهاردة بمجهودي وممكن يكون غلط يعني أنا مش بقول إنه أحسن حاجه في العالم أنا هدفي إني أفتحلك الطريق إن أنت ازاي ممكن تفكر في مشكلة وتحاول تحلها ده هدفي
الحاجه التالتة إن أنا طبعاً استفدت جداً من تجربة دي إني أتعرفت على ناس كتير من حتت كتير مش من مصر بس ، أنا من لهجتي أكيد باين إني مصري أنا متعرفتش على ناس بس من مصر أنا أتعرفت على ناس من مختلف جنسيات العالم ، جالي أصدقاء بيبعتولي مباشرة على الصفحة بتاعتي على الإنستجرام فأنا استفدت جداً الحمدلله إن الشبكة بتاعتي كبرت من خلال التعارف الللي حاصل ما بيني وبين الناس عن طريق البودكاست ده
الحاجه كمان اللي أتعلمتها السنادي إني بقيت بركز أكتر في الموضوع يعني ممكن أتعمق في الموضوع أكتر لو هتكلم على نقطة معينة مثلاً وأنا بعملها بحث بفهمها بشكل أعمق من ما كنت قبل البودكاست يعني أعتقد إنه حسن فهمي التفصيلي للحاجه عشان الحاجه تبقى دايماً في دماغي لو اتسألت في حاجه معينه ممكن أدور أحسن فده حسن طريقة البحث بتاعي
الحاجه اللي أتعلمتها كمان أتعلمت أعمل بودكاست يعني أنا قبل سنة مكنتش أعرف أعمل بودكاست ، أتمنى انه يكون بودكاست ناجح يعني بس قصدي التجربة نفسها علمتني ازاي أعمل محتوى صوتي والتجربة دي طبعاً تجربة لذيذة جداً وأي حد عنده القدرة إنه يعمل بودكاست أو يعمل أي محتوى الميزة فيه إنه بيطلع الطاقة بتاعتك في حته أنت ممكن متكنش عارف إنها عندك مع التجربة ، وأنا أنصح أي حد عنده فكرة يجربها وحتى يجربها في الأول مع الناس القريبين منه مش لازم ينزل على العلن من أول يوم ، يجرب يعمل البحث بتاعه ، يعني الموضوع بتاعه ، عايز يعمل إيه ، يحاول يحل مشكلة عنده اصلاً فتجربة البودكاست بالنسبالي تجربة جميلة إني أتعلمت المهارة دي السنادي
أتعلمت حاجه كمان إننا ديماً بشتغل في المجال المالي فديماً بتعامل مع مؤسسات مالية وحاجات كده تجربة البودكاست علمتني أتعامل مع فريق تاني حتى لو هو فريق صغير بتاع البودكاست ، ازاي نطلع الحلقة بالشكل ده ، وازاي نطلع النص اللي مكتوب على الموقع ، أو ازاي نعمل تعديلات على ملف الصوت ، أو المحتوى اللي بينزل على السوشيال ميديا ، يعني إيه سوشيال ميديا اصلاً يعني إيه إنستجرام ، يعني إيه فيسبوك ، يعني إيه تويتر الحاجات اللي احنا عندنا صفحات عليها التجربة دي علمتني حاجات كتيرة جداً في السوشيال ميديا أنا مكنتش أعرفها فأنا أدين للتجربة دي بالفضل إن هي علمتني ازاي ممكن أعمل صفحة على الإنستجرام والحاجات كلها اللي وراها يعني
برده من التجربة دي أتعلمت إن احنا غالباً في مشروع بحثي مفتوح بمعنى إن أنا مببقاش عارف بالظبط الـ 10 حلقات الجايين هعمل فيهم إيه يعني أنا عندي عناوين مثلاً عايز اتكلم عليها ولكن بيحصل مثلاً حاجه معينه ، بيجيلي سؤال معين بيفتح فكرة في دماغي اللي هو أقول دلوقتي لأ ممكن أوقف الحلقات المكتوبة وجاهزة أسجلها وأعمل حاجه تانية عشان مثلاً في سؤال مهم الناس بتسأل عليه ، أو حاجه ظهرت في الحياة المالية محتاجين نسلط عليها الضوء أكتر فهو مشروع من الأفكار والناس هي اللي بتشكل الاتجاه اللي أنت عايز تروح فيه ودي حاجه أنا برده مكنتش متوقعها من أول يوم فبرده دي حاجه بسطاني جداً من خلال التجربة دي
برده البودكاست ده عرفني أكتر ازاي كل واحد عنده وضع مالي خاص ومشكلة مالية خاصة بتاعته هو مش بتاعة العالم أنا كنت بادي البودكاست ده فاهم المفهوم ده بس لما دخلت أكتر ازاي حسيت قد إيه الموضوع ده مهم إن كل واحد مينفعش في المجال المالي بالذات إني أديت نصيحة في علبة أو أقول حاجه بشكل عام المبادئ بشكل عام آه مهم تفهمها ولكن حالتك المادية وسنك وتفاصيل كتير جداً في سؤالك تفرق إجابتك من واحد للتاني ، يعني ممكن 2 يكونوا بيسألوني نفس السؤال ولكن في واحد مثلاً عنده مخاطرة معينة في شغله وواحد عنده شغل مثلاً ثابت ، واحد مثلاً رائد أعمال وواحد لأ الإجابة بتاعتهم بتبقى مختلفة شوية على حسب وضعه المالي فأنا ديماً بشجع الناس لو عندك سؤال وأنا مش مجاوب عليه بالظبط أو مش حاسس إن روحت للحته بتاعتك ديماً أبعتلي على الصفحة بتاعتنا مفيش مشكلة أرد عليك ده عادي جداً ومتتكسفش الموضوع بيبقى فيه شوية إحراج إنك تبعت سؤال أو قلقان لأ عادي جداً الأسئلة دي أنا برد عليها أنا بنفسي مفيش مشكلة إنك تسأل أي حاجه لأن في الأخر تاني كل واحد وضعه مختلف عن التاني
وزي ما كل واحد اسئلته اللي في دماغه تعتبر خاصة بيه هو برده أكتشفت إن مفيش هدف واحد عند الجميع ودي يمكن مكنتش شايفها أوي قبل ما أبتدي إن مش كل الناس عايزة تبقى أغنى حاجه في العالم أو واحد مثلاً عايز ياخد مخاطرة كبيرة أوي لأ أهدافك مختلفة فشخصيتك بتعكس أهدافك وطريقة تفكيرك جايه من حاجات كتيرة جداً ممكن نتكلم عليها في حلقات انت فكرك مكون ازاي ولكن الأهداف من الناحية المالية مختلفة تماماً كل واحد عن التاني تماماً فبرده دي حاجه بسطتني إننا شوفتها في الناس وطبعاً لما بنعمل مثلاً سؤال معين والناس ترد بأختلافات معينه بطريقة معينه دي برده حاجه لذيذة جداً
اللي فاجئني برده في البودكاست ده ومكنتش عامل حسابه إن الحمدلله نسبة المتابعين بتاعتي تقريباً 50 - 50 ما بين رجال والنساء ودي حاجه بسطاني جداً لأن احنا ديماً في المجال المالي بنشوف النسب دي عاليه جداً ناحية الرجالة ودي حاجه ديماً بتضايقني إن الأهتمام بالفلوس ديماُ عن طريق الرجالة ولكن أنا اتبسط إن النسبة 50 – 50 ودي بتعكس أصلاً عدد السكان بتاعنا تقريبا يعني 50 – 50 إن الأهتمام جاي من الناحيتين والأهتمام اللي بشوفه من السيدات كمان وكمية الاسئلة اللي بتجيلي مديني حافز إن الحاجه دي صحية إن المجتمع اللي بيسمعك مش مقفول على نوع معين من الناس لأ ده بالعكس البودكاست موجود بشكل عام لأي نوع من أنواع الناس
برده من الحاجات اللي فاجئتني الأعمال اللي بتسمع العشرينات كتيرة جداً يعني أنا مكنتش متخيل إنه هيقولك مثلاً ده بادري في حياتي ده لسه بقى قدام وأنا مبعملش فلوس ولسه ببتدي حياتي والدنيا صعبه لأ بالعكس لقيت إن الأهتمام في العشرينات فوق مانا أتوقع بكتير والناس بالفعل بتبعتلي تقولي أنا غيرت وعملت وابتديت أعمل كذا وقفلت الدين اللي عليا وأبتديت احوش والكلام ده كله النتيجة مش فارقة معايا النهاردة خالص يعني هتقولي الكلام ده هقولك اوكيه دي حاجه جميلة إنك ابتديت وكده لكن المشوار طويل رحلة الإستثمار عموماً هي مش في يوم وليلة النتيجة دي مشجعة جداً ولكن نفسي بقى بعد 5 أو 10 سنين حتى لو أنا مش بعمل البودكاست ده بس ألاقي الناس اللي ابتدت النهاردة والبودكاست ده غير من تفكيرها تفضل مكمله في رحلة الإستثمار بتاعها هو ده الهدف الحقيقي اللي أنا نفسي أشوفه في المستمعين بتوع البودكاست
برده أخيراً البودكاست ده أداني أمل إن في ناس تتقاعد وتوصل للحرية المالية لو ركزوا وأخدوا الطريق الصح من الحاجات اللي بشوفها في نماذج على الطريق الصح من طريقة كلامهم ، من طريقة تفكيرهم أتمنى ميكونش بيبعتولي الرسايل دي عشان بس يكونوا بيجاوبوا الإجابات الصح وخلاص بس لما بشوف ساعات رسايل بتفرحني جداً إن الناس عندها أمل توصل للحرية المالية وعندها أمل إنها تتقاعد بشكل كويس وعندها القدرة إنها متبقاش معتمدة على دخل معين أو شغلانه معينة ولو في يوم من الأيام جالهم فكرة وعايزين يستقلوا بذاتهم يقدروا يعملوها
أنا مش عايز أطول عليكوا في الحلقة دي لأن الحلقة دي بتكلم فيها على تجربتي وأنا مبحبش أطول أوي يعني فشكراً جداً جداً واشوفكوا بإذن الله الأسبوع اللي جاي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #الأسهم #السندات