30. من أنتم؟ (نحن نعلم عنك الكثير)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة عنوانها (من أنتم) من أنتم مستمعين كلام ينور
زي ماحنا متعودين كل 10 حلقات بنعمل حلقة بعنوان (ما يسأله المستمعون) بنرد فيها على اسئلتكم اللي بتبعتوهالنا على صفحة الانستجرام الخاصة بينا سواء في رسالة مباشرة أو بتكتبوهالنا في التعليقات ولكن حبينا في الحلقة 30 نعكس الموضوع شوية ونشوف إجابتكم أنتم على اسئلتنا
وللي مش متابعنا على الانستجرام احنا كل اسبوع تقريباً من وقت ما بدأنا البودكاست بنزل سؤال على شكل إقتراع أو تصويت بنسألكم اسئلة خاصة بالمجال المالي وإجابة السؤال ده بتكون بـ آه أو لأ في معظم الأوقات
تقدروا تتابعوا صفحتنا من هنا : kalamyenawar@Instagram
الاسئلة دي بتساعدنا نعرفكوا أكتر ، نعرف بتفكروا في إيه وحاسين بإيه وإيه المفاهيم الخاطئة أو المشاكل اللي بتواجهكوا في الحياة المالية وبناءاً على إجاباتكم وأختياراتكم بنقدر نختار الموضوعات اللي بنحس انها مهمه بالنسبة لأغلب الناس
من وقت ما بدأنا كلام ينورعملنا تقريباً 97 إقتراع ، في حلقة النهاردة بنحاول نشوف إجاباتكم على الاسئلة اللي سألناها كانت إيه بالنسب والأرقام
00:45 المقدمة
02:10 ليه بناقش الموضوع ده؟
02:59 هل بتشعر إن حياتك المالية بتأثر على صحتك النفسية؟
04:07 10 أخطاء شائعة في الاستثمار .. كام خطأ قولته لنفسك؟
08:24 هل سألت نفسك استثمر في إيه؟
08:50 هل الفلوس (غاية) أم (وسيلة)؟
09:25 تفتكر في كام % في أمريكا بيسددوا الفوايد على بطاقات الائتمان في الميعاد؟
09:54 بتضايق لما تقدم على قرض؟
11:40 بتاخد (مصروف) أو (مرتب)؟
12:04 هل ممكن ترشح كلام ينور لأصحابك؟
12:21 هل عندك خطة مالية؟
13:02 هل تعرف إيه أفضل استثمار مناسب ليك؟
13:27 هل تعاملت قبل كده مع شركة سمسرة؟
14:05 نفسك تكون .. (غني) ولا (ثري)؟
14:30 هل تعرف أنواع صناديق الاستثمار؟
15:07 هل حسبت مصاريف إقتناء حيوان أليف قبل ما تشتريه؟
15:46 تعرف إيه عن نشرة إكتتاب صناديق الاستثمار؟
16:27 هل فكرت في خطة للتقاعد؟
17:04 هل ممكن تستثمر في العقار؟
17:28 هل بتسمع كلام ينور .. (على الموقع) ولا (على منصات البودكاست)؟
18:23 تخيلك عن خطة التقاعد بتاعتك .. (فسح وسفر) ولا (قاعدة وفرجه على التلفزيون)؟
19:43 ازاي بتحاول تزود دخلك .. (شغل إضافي) ولا (زيادة في المرتب)؟
20:45 الخاتمة
تقدروا ديماً ترجعوا للحلقات اللي فاتت هتلاقوا إجابات الاسئلة اللي قولناها وأكتر كمان.. وياريت ديماً تشاركونا بإجاباتكم على الاسئلة اللي بنطرحها على صفحتنا على الانستجرام لأنها بتفيدك تعرف انت واقف فين ومحتاج تشتغل عليه أكتر وبتفيدنا احنا كمان في اختيار الموضوعات اللي بتهمكوا ، وكل فترة هنحاول نعمل حلقة نشوف فيها إجاباتكم ونقيس بيها التطورات اللي حققناها وهل أرقامنا بتتحسن ولا لأ ومحتاجين نشتغل على إيه أكتر
كلام ينور موجود على منصات كتيرة زي أبل جوجل سبوتيفاي بوديو أنغامي وأماكن تانية كتير.. وديماُ بنحاول نكون موجودين على أي منصات جديدة
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
المقدمة
اهلا بيكوا في حلقة جديدة من بودكاست كلام ينور حلقة النهاردة عنوانها من أنتم ، من أنتم مستمعين كلام ينور
احنا عندنا على صفحة الانستجرام بتاعتنا بنعمل تقريباً كل اسبوع إقتراع أو حاجه بتدي فيها رأيك أنت كمستمع وبنسأل سؤال
الإقتراع ده إجابتة بتبقى بـ آه أو لأ معظم الوقت الفكرة منها ان احنا بنحاول نعرف المستمعين بتوعنا بيفكروا في إيه ، حاسين بإيه ، إيه مشاكلهم في الحياة المالية ومن خلال الحاجات دي بنحاول نساعد في أختيار أنواع الحلقات أو الموضوعات اللي بنحس انه مهم بالنسبة للناس
فأنا كنت عاوز أخد الفرصة في الحلقة دي احنا في العادي بنجاوب على اسئلة المستمعين في الحلقات العاشرية يعني حلقة 10 ، 20 ، 30 ، النهاردة في الحلقة رقم 30 انا هغير الموضوع شوية وهتكلم من أنتم ، أنتو مين اللي بيسمعونا من خلال الأرقام من خلال النتايج اللي بتجيلنا
ياريت ديماً على قد ما تقدروا تجاوبوا على الاسئلة لأنها مش بتفيدك أنت بس بتفيد المجتمع كله اللي احنا بنحاول نبنيه أو المستمعين بتوع كلام ينور
02:10
ليه بناقش الموضوع ده؟
أنا هبتدي بالاسئلة احنا من ساعة ما ابتدينا يمكن لحد أول نوفمبير تقريبا عملنا 97 إقتراع ، الـ 97 دول أنا أخترت منهم أكتر حاجات كان فيها إجابات واضحة ، يعني أكتر من 75% من الناس قالت آه أو لأ على حاجات معينه
أنا ليه بناقش الموضوع ده علشان أنا عايزك تبقى فاهم إن المجتمع أو العموم من الناس حاسين بإيه ، هل انت زيهم ، هل انت سابق بخطوة ، محتاج تشتغل على الحتة دي ولا لأ وهكذا ومنها برده اني معاكو أعرف زي ما قولنا في الأول إيه المفروض نعمله
02:59
هل بتشعر إن حياتك المالية بتأثر على صحتك النفسية؟
احنا هنبدأ بأول سؤال بيقول بتحس إن حياتك المالية بتأثر على صحتك النفسية وإقتراع تاني كان بيقول صحتك النفسية والحالة المالية ، يعني السؤالين دول سألناهم هل أنت بتتأثر ولا لأ لقينا في السؤالين دول أن النسب تقريباً واحده 94% من الناس قالوا أيوة الحالة المالية والصحة النفسية الأتنين ليهم علاقة ببعض وده حاجه طبعاً طبيعية لأن احنا عارفين ان الفلوس أو القرارات المالية ديماً بتضغط علينا غصب عنا لازم نفكر قبل ما اشتري حاجه ، لازم ناخد قرار ، لازم نخطط للمستقبل ، لازم نعمل توازن ما بين الصرف بتاع النهاردة والصرف بتاع قدام
وده كان سؤال الصراحة بالنسبالي واضح جداً والإجابات بتاعتكوا بصراحة كانت 94% ودي كانت من أكتر الحاجات اللي الناس شاركت فيها اصلاً
04:07
أخطاء شائعة في الاستثمار .. كام خطأ قولته لنفسك؟
تاني حاجه 10 أخطاء شائعة في الاستثمار كام واحده قولتها لنفسك ودي نرجع بيها للحلقة رقم 5 اللي احنا كنا بنتكلم على إيه المفاهيم اللي بتمنعك إنك اصلاً تبتدي ودي من الحاجات المهمه جداً جداً وممكن النهاردة أتكلم عليهم تاني بسرعة اننا نفكر الناس بيها وبرده أنا متأكده ان في ناس جديدة لأول مرة بتسمعنا النهاردة برده ممكن يرجعوا ديماً للحلقات اللي فاتت
أول مفهوم غلط كان بيقول علشان استثمر لازم أكون غني ، و ده طبعاً غلط جداً ، زي ما اتكلمنا انت ممكن تبتدي صغير ، تبتدي بحاجات بسيطة ومع الوقت تبتدي تتعلم وتقدر في يوم من الأيام توصلك للحرية المالية انك بس تبتدي حتى لو بأرقام صغيرة والميزة النهاردة ان في كمية حاجات ممكن تاخد 50 دولار ، 20 دولار ، 100 دولار المدفوعات اللي انت بتعملها في الاستثمار بتاعك ممكن تبقى صغيرة فحاجه دي مبقتش حكر على الأغنية
تاني حاجه متابعة الاستثمار بتحتاج وقت طويل ، ودي برده اتغيرت مع الوقت والتكنولوجيا ومع إن كل حاجه بقت أونلاين في سماسرة وفي صناديق استثمار وفي كل حاجه موجوده أونلاين فأنت مش محتاج تتابع فأنت ممكن بس تبتدي تعمل نظام معين من الاستثمار وتبتدي فيه
تالت حاجه أنا صغير أوي أو كبير أوي إني ابدأ ودي حاجه خاطئة جداً لأننا قولنا ان اهم حاجه في الحاجات كلها بنكررها ديماً وبنكررها النهاردة تاني كل ما تبتدي بدري كل ما الموضوع بيبقى أسهل عليك بكتير ، طبعاً لو أنا كبرت في السن برده لقينا إن الناس ممكن يبقى عندها 50 سنة وعمره ما ابتدى يستثمر لقينا لأ انت لسه عندك وقت وممكن يبقى عندك من 15 لـ 20 سنة من الاستثمار فليه لأ انك تبتدي حتى لو عندك 50 سنة مفيش مشكلة في يوم من الأيام هتحتاج الفلوس دي فلازم تبتدي
المفهوم الخاطئ اللي بعده علشان استثمر لازم اكون خبير دي برده نرجع نقول لأ ، أنت النهاردة ممكن يبقى عندك صناديق استثمار ، عندك أفكار معينة ممكن تعملها من غير ما تكون خبير ، لأن في خبير يشتغل بالنيابة عنك
في مخاطرة كبيرة في الاستثمار ده خامس مفهوم خاطئ ، المخاطرة بالنسبالي إنك عمرك ما تبتدي بصراحة يعني هي دي على المدي الطويل مخاطرة أكبر بكتير بالنسبالي من إنك متستثمرش حاجه واضحة بالنسبالي واتكلمنا برده عنها
لازم أعمل فلوس بسرعه ده برده مفهوم خاطئ لازم أحط فلوس فتطلع 500 و 1000% علشان الناس كلها بتعمل كده ده برده حاجه خاطئة انت بتعمل الفلوس على المدى الطويل
الأعتماد على العوائد التاريخية في التوقعات المستقبلية يعني انا بشوف استثمار معين مثلاً البيتكوين (عملة رقمية) عمل 10000% فانا هعمل 10000% والصندوي الفلاني عمل 17ألف % فأنا هعمل في المستقبل كده ده برده حاجه خاطئة
لازم اشتري رخيص وأبيع غالي ده برده مفهوم خاطئ أنت لازم تقعد تشتري وتستثمر فقط مش لازم تقعد تشتري وتبيع اصلاً
المخاطرة العالية بتجيبلك عائد اعلى وده برده مفهوم خاطئ في حاجات بسيطة وواضحة زي بنك بيعمل فلوس كويسة ، شركة تكنولوجيا بتعلم فلوس كويسة بس ان انت تشتريها العائد بتاعها عالي مش لازم تاخد مخاطرة Risk كبيرة في حاجات كتيرة
هخسر السيولة بتاعتي بمجرد ما ابتدي ، ان احنا مثلاً لو ابتدينا نستثمر هنخسر السيولة بتاعتنا مش هقدر أبيع ومش هقدر أشتري بالعكس انت لما بتستثمر معظم الاستثمارات بتقدر تسيلها أو تفكها بسهولة جداً على عكس مثلاً شهادات التوفير اللي الناس متعودة عليها اللي هو بتستثمر 3 أو 4 سنين وبتخسر جزء من الفلوس لو كسرتها ، في أنواع آخرى من الاستثمار بالعكس تعتبر أعلى في السيولة
دي كده سريعاً الحلقة 5 احنا اتكلمنا في الحاجات دي وتقدروا تسمعوها تاني ولكن دي كانت حاجه مهمه جداً جداعلشان كده أنا اخدت شوية وقت في الحته دي
08:24
هل سألت نفسك استثمر في إيه؟
السؤال اللي بعده نرجع تاني للاسئلة بتاعتنا سألت نفسك استثمر في إيه ؟ 91% من الناس قالوا ديماً بيجيلي السؤال ده في دماغي انا مش عارف استثمر في إيه أنا عايز استثمر ومش عارف تقدر ترجع للحلقة رقم 10 احنا اتكلمنا فيها على إيه هي فئة الأصول وازاي ممكن تبتدي وإيه أنواعها وإيه اللي يليق بيك وإيه اللي لا يليق بيك
08:50
هل الفلوس (غاية) أم (وسيلة)؟
الإقتراع اللي بعده بيقول الفلوس هي غاية أم وسيلة؟ 90% قالوا وسيلة و10% قالوا غاية ، برده احنا عملنا حلقة رقم 3 عن الموضوع ده اعتقد إجابة الناس واضحة الناس يمكن بعد ما سمعت الحلقة غيرت فكرها انها وسيله للسعادة وسيلة للتقاعد لكن هي مش غاية هي مش لعبة بتحاول تجمع فلوس وخلاص هي وسيلة لإمتلاكك لوقتك
09:25
تفتكر في كام % في أمريكا بيسددوا الفوايد على بطاقات الائتمان في الميعاد؟
الإقتراع اللي بعده تفتكر في كام % في أمريكا بيسددوا الفوايد على بطاقات الائتمان في الميعاد؟ 89% قالوا انهم بيسددوا في الميعاد ودي كانت إجابة خاطئة لأن اللي احنا بنشوفه ان الناس أغلبيتها مبتسددش في الميعاد في برده حلقة عن قروض الائتمان تقدروا ترجعولها
09:54
بتضايق لما تقدم على قرض؟
بتضايق لما تقدم على قرض؟ 88% قالوا نعم بنضايق لما بنقدم على قرض 12% قالوا لأ ، الإجابة هنا بالنسبالي لو القرض ده قرض استثماري انت بتاخده عشان تستثمر في حاجه وانت فاهم بتستثمر في إيه وفاهم العائد على الاستثمار بتاعك وفاهم إيه اللي هيطعلك من الاستثمار ده في الأخر يعني انا بستلف بـ 2 أو 3% وعندي عائد على الاستثمار بتاعي 7 أو 8% فانا بالنسبالي القرض هنا مش المفروض يخليني مضايق لو انا شايف بوضوح لو أنا بستثمر في الشغل بتاعي عندي محل أو حاجه ببيعها ومحتاج قرض فوقتها المفروض وقتها مبقاش حاسس بنفس الأحساس الوحش وانا باخد القرض
ولكن إجابة الناس انا متفهم هنا ان 88% آه أنا مضايق لسبب انهم غالباً بياخدوا قروض استهلاكية ، ومشكلة القروض الاستهلاكية زي العربيات ، زي بطاقات الائتمان ، زي بتشتري لبس إن انت مبتعرفش تستعيد أو تبيع الحاجه دي فتسد القرض اللي عليك لأ أنت لازم تدفعه من جيبك وعشان كده ده بيضغط علينا في حياتنا
في برده حلقة عن القروض بالكامل قولت احنا ديماً نحاول لما ناخد قروض نتأكد احنا بناخده ليه وعارفين هندفعه ازاي ويكون في جزء من دخلي ميضغطش على الميزانية بتاعتي
برده من الحاجات اللي بحس انها بتضايق وخلتهم يجاوبوا كده انه الأقساط على القروض بتبقى جزء كبير من دخلهم وبتبقى أعلى من المفروض يتحط في الميزانية عشان كده أنت المفروض تعيد مراجعة ميزانيتك تبقى فاهم أنت المفروض تاخد قرض بقد إيه عشان ميضغطش عليك ودي حاجه هتحسن إحساسك وانت بتاخد القرض
11:40
بتاخد (مصروف) أو (مرتب)؟
سألنا الناس بتاخدوا مصروف أو مرتب؟ 88% قالوا بناخد مرتب والباقي بياخدوا مصروف وغالباً اللي يباخدوا مصروف لسه في الجامعة أو المدرسة وفي الحالتين بالنسبالي سواء صغير أو كبير لازم تبقى فاهم وتبتدي تسمع الحاجات دي وتبتدي تجهز نفسك لخطتك الاستثماريه
12:04
هل ممكن ترشح كلام ينور لأصحابك؟
السؤال اللي بعده كان من الحاجات اللي خلتني الحمدلله سعيد ترشح كلام ينور لأصحابك ولا لأ؟ 86% قالوا نعم ، ودي كانت حاجه لطيفة فشكراً لكل الناس اللي بيشرحوا البودكاست ده لناس تانية تسمعه
12:21
هل عندك خطة مالية؟
السؤال اللي بعده هل عندك خطة مالية ولا لأ؟
86% قالوا لأ ، وهدفنا في البودكاست ان الأرقام دي تنزل يعني هدفي ان بعد سنة مثلاً إن 50% يبقى عندهم و50% لأ وبعدين الرقم ينزل
يعني إيه خطة مالية؟ يعني أنا عندي ميزانية شهرية ، أنا عارف أنا بصرف في إيه ، مرتاح للي بصرفه حاطط كل بند من بنود الميزانية بتاعتي في المكان الصح وعندي خطة تقاعد مظبوطه وعندي استثمارات مع الوقت بتكبر عشان أعرف استقل بعد كده
13:02
هل تعرف إيه أفضل استثمار مناسب ليك؟
تعرف إيه أفضل استثمار ليك؟ ده السؤال اللي بعده 86% قالوا لأ ، برده أرجع لحلقة فئة الأصول وبرده مع الوقت برده لأن انا مش هعرف اجاوبك كل واحد عنده حاله معينه ، سن معين ، دخل معين ، ظروف معينة انت اللي بتكون أحسن استثمار ليك والهدف من البودكاست ده إن احنا نساعدك توصل للحاجه دي فالـ 86% دول برده لازم ينزلوا مع الوقت
13:27
هل تعاملت قبل كده مع شركة سمسرة؟
84% قالوا لأ ، وده رقم بالنسبالي عالي أنا متخيل طبعاً إن الناس مبتتعاملش لأنها مبتشتريش ومش بتستثمر أو أي حاجه فعمرها ما راحت الناحية دي ولكن دي برده من الأرقام اللي عايز أنزلها ، عايز الناس يبقى عندها معرفه بشركات السمسرة ، معرفه بصناديق الاستثمار ، معرفه بالأدوات المالية دي لأن انت ممكن النهاردة متستخدمهاش ، ممكن متبقاش مهمه ولكن زيها زي حساب البنك بتاعك لازم حاجه تبقى مفتوحة عندك لو حصل استثمار معين عايز تخشه السنة اللي جاية أو اللي وراها على الأٌقل عندك المكان والجاهزيه إنك تبتدي
14:05
نفسك تكون .. (غني) ولا (ثري)؟
السؤال اللي بعده بيقول نفسك تكون غني ولا ثري؟ 83% قالوا ثري ، والباقي قال غني وبرده احنا اتكلمنا في حلقة كاملة عن الفرق ما بين الغني والثري بالنسبة للتعريفات بتاعتنا واعتقد معظم الناس اللي جاوبت صح ممكن تكون سمعت الحلقة
14:30
تعرف أنواع صناديق الاستثمار؟
ده السؤال اللي بعده 83% قالوا لأ ، ودي رجوعاً برده لشركة السمسرة نفس الحاجه لازم تبقى فاهم يعني ايه صندوق استثمار لازم تبقى فاهم يعني إيه حساب سمسرة لازم تبقى فاهم البدايات بتاعتك تكون من فين
14:47
عملنا اسئلة مكررة تاني زي خدعوك فقالوا عن الاستثمار مرتين نفس الإجابات تقريبا 83% ، هل نفسك تستثمر فلوسك 82% تاني فالاسئلة دي مكرره كررناها تاني عشان نتأكد من النتايج والنتايج طلعت كلها قريبة جداً جداً من بعض
15:07
هل حسبت مصاريف إقتناء حيوان أليف قبل ما تشتريه؟
كنا عملنا الحلقة رقم 19 عن الحيوانات الأليفة وقد إيه هي بتأُثر على ميزانيتك وحاجات كتير ممكن ديماً ترجع لها ، لقينا ان 80% من الناس محسبتش المصاريف اصلاً قبل ما تشتري وقولنا إن ده قد إيه ممكن تأثر على طريقة استمتاعك بالحيوان الأليف لو أنت مش عارف مصروفة قد إيه ممكن يضغط عليك لو معملتش البحث بتاعك فلو حد عايز يقتني حيوان أليف أو حابب يعرف المصاريف بتاعته أو ازاي يفكر في الموضوع ممكن يرجع للحلقة دي
15:46
تعرف إيه نشرة الإكتتاب عن صناديق الاستثمار؟
79% من الناس قالوا لأ ، وده برده نقدر نربطه بالسؤال بتاع صناديق الاستثمارنشرة الإكتتاب بكل بساطة وانت بتطرح أي حاجه بتدعوا المساهمين انهم يستثمروا في الصندوق بتقولهم الصندوق ده اسمه ايه ، مين عامله ، بيعمل إيه ، مين شغال عليه والكلام ده كله فهذه هي نشرة الإكتتاب اللي حضرتك محتاج تقراها أو تسأل حد يكون قراها عشان تعرف الصندوق ده بيعمل ايه
16:23
تاني كررنا نفسك تكون غني ولا ثري؟ الإجابات برده في نفس المستوى
16:27
هل فكرت في خطة تقاعد؟
77% قالوا لأ و 23% قالوا آه ، النسب هنا احسن شوية من أنت عندك خطة مالية ولا لأ معناها إيه بقى ان الناس على الأقل فيهم شريحة فكرة انها هتتقاعد ، فكرة تروح البنك وتشتري حاجه معينة تحاول تعملها التقاعد بتاعها أو تعمل مشروع أو اي حاجه ولكن 77% معندهمش خطة مالية بالكامل والأرقام دي مزالت عاليه هدفنا في البودكاست اننا ننزل الأرقام دي
17:04
هل ممكن تستثمر في العقار؟
75% قالوا نعم 25% قالوا لأ ، برده الحلقة رقم 21 كنا بنتكلم عن الاستثمار العقاري من ناحية التأجير لو أنت حابب تستثمر في العقار من ناحية التأجير وتحسب العوائد على الايجار بتاعتك وتشوف هل هي مناسبة ولا لأ
17:28
هل بتسمع كلام ينور .. (على الموقع) ولا (على منصات البودكاست)؟
السؤال اللي بعده بتسمعوا فين كلام ينور بنسمعه على الموقع ولا على منصات البودكاست لقينا 75% بيسمعوا على منصات البودكاست ، أنا عن نفسي بسمع كل حاجاتي على منصات البودكاست لأنها اسهل واسرع ولكن الموقع بتاعنا تقدر تروحله لو عاوز تقرأ الحلقة أو عاوز تعرف ملخص اللي حصل في الحلقة لو عاوز تاخد ملاحظات معينة او تكتب أجزاء من الحلقة مش لازم حضرتك تكتبها ممكن تاخده نسخ ولصق من على الموقع وده اللي بنضيفه زيادة عندنا على الموقع
منصات البودكاست هي موجودة في كل حتة أبل ، جوجل ، سبوتيفاي ، بوديو كمان، أنغامي ، لبسن يعني في أماكن كتير تقدر تسمع البودكاست عليه ومع الوقت بنحاول ديماُ نكون موجودين على أي منصات جديدة
18:23
تخيلك عن خطة التقاعد بتاعتك .. (فسح وسفر) ولا (قاعدة وفرجه على التلفزيون)؟
تخيلك عن خطة التقاعد بتاعتك كنا حاطين صورتين كده واحد بيتفرج على التلفزيون وواحد قاعد على البحر 75% قالوا الراجل اللي قاعد على البحر و25% عاوزين يتفرجوا على التلفزيون
الهدف من السؤال كان انت عايز تسافر وتلف الدنيا وتتحرك ولا لأ أغلبية الناس عايزة كده ، أغلبية الناس عايزة في فترة التقاعد بتاعتها تتحرك متبقاش قاعدة في مكانها وده برده يخلينا نقول ان انت لازم يبقى عندك خطة مالية توصلك لسن التقاعد ويبقى عندك الدخل اللي تقدر تصرف منه وانت مستريح ، احنا بنشوفها في البلاد الغربية بنشوف في أمريكا لو حد سافر بتلاقي الناس كبار السن في الستينات والسبعينات والثمانينات بيسافروا ويعملوا واحنا مبنعملش اي حاجه وده لأن هما بيكونوا جهزوا مبلغ من المال معين مستثمرينه طول حياتهم من وهما صغيرين وقادرين ياخدوا الفلوس دي يطلعوا منها دخل يقدر يتحرك ويسافر ويعمل انا مش بقول انك لازم تسافر وتتفسح وتعمل انا مش بقول انك لازم تعمل كده انا كل اللي بقوله انك لازم يبقى عندك خطة مالية عشان في الوقت ده يبقى عندك دخل
19:43
ازاي بتحاول تزود دخلك .. (شغل إضافي) ولا (زيادة في المرتب)؟
أخر سؤال هغطيه النهاردة ازاي بتحاول تزود دخلك من شغل إضافي ولا زيادة في المرتب؟ 74% بيحاولوا يعملوا شغل إضافي جانبي و26% هما بس اللي بيحاولوا يطلبوا زيادة في المرتب انا ديماً بقول حاول ديماً تطلب زيادات في المرتب حاول تحسن شغلك الاساسي اللي بتقضي فيه 8 ساعات في اليوم مازال مهم ان انت تبقى متقنه مازال مهم تبقى احسن واحد فيه عشان لو عملت كده ممكن تزود دخلك ممكن تبين لمديرك انك محتاج تعمل دخل أكتر ممكن العائد على الطلب ده يكون أعلى بكتير انك تفتح شغل أو فكرة جديدة جانبية ، أنا بفضل أكتر انك تبتدي تزوق وتركز في شغلك زي ما تكون عامل حاجه جانبية
20:45
الخاتمة
ده بشكل عام الملخص بتاع الاسئلة اللي عملناها برده لو في حاجات معينه محتاجين اننا نسأل الناس عليها ممكن تبعتولنا سؤال نحطه كطرح عام للناس انا كل فترة حاول اعمل حلقة كده نحاول نشوف الارقام بتاعتنا بتتحسن ولا لأ كمجموعة أو مجتمع او كمستمعين لكلام ينور والناس الجديدة اللي بتسمعنا النهاردة أول مرة او عرفوا عننا جديد تقدر ترجع للحلقات كلها اللي فاتت هتلاقي فيها إجابات عن الاسئلة اللي قولناها وأكتر واشكركوا جدا جدا على وقتكوا كالعادة ان انتو قاعدين تسمعوني لحد هذه اللحظة واشوفكوا الاسبوع الجاي
Translation of some words and terms:
Poll إقتراع
Community مجتمع
Contribution مساهمة
Long Term المدى الطويل
Game لعبة
Risk مخاطرة
Credit Cards بطاقات ائتمان
Notes ملاحظات
Copy نسخ
Paste لصق
Business عمل
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاستبالعربي#منأنتم