31. ما وراء اختيار البنك
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
اتكلمنا في الحلقة 24 - خُلاصة الحسابات البنكية - عن الأدوات الادخارية اللي البنك بيقدمهالك ، موضوعنا النهاردة هو ازاي تختار البنك المناسب ليك سواء كنت طالب في الجامعة لسه هتبدأ تتعامل مع الفلوس أو بدأت حياتك المهنية وبتتعامل مع البنوك بشكل يومي
ولأن كل واحد عنده احتياجات مختلفة عن الاخر فلازم تكون فاهم إيه أحتياجاتك والبنك ده هيقدملك خدمات إيه وإيه مميزاته وإيه عيوبه؟ لو حابب تفتح حساب في بنك تاني هتختار البنك بناءاً على أي اساس؟
في حلقة النهاردة بنتكلم على 5 نقاط رئيسية تقدر من خلالها تقيم أي بنك وتقارن بين البنوك وتعرف أي بنك مناسب ليك
00:45 المقدمة -
02:00 هل البنك ده سهل في الاستخدام؟ هل فروعه كتير وقريب من بيتي أو قريب من المكان اللي بشتغل فيه؟ -
02:49 هل خدمة العملاء بتاعته على المستوى المطلوب؟ -
03:10 هل عندهم خدمة عبر الهاتف كويسة؟ -
03:27 هل في ماكينات صراف آلي متوفرة في أماكن كتير؟ وهل بدفع عليه فلوس لو هو بره الشبكة بتاعه؟ -
03:53 هل البنك بيقدم خدمات صرّاف آلي ذكية؟ -
04:38 كمدخر بستخدم البنك للاستثمار إيه اللي أنا محتاجه من البنك؟ -
06:03 هل البنك بيدي صناديق استثمار ممكن استثمر فيها؟ -
06:05 هل البنك بيمكني من الاستثمار في أذونات الخزانة؟ -
06:51 هل البنك عنده شركة سمسرة تابعة ليه؟ وهل أقدر اشتري أسهم من خلال الحساب المباشر بتاع البنك؟ -
08:11 لو أنا عايز أشتري بيت أو عربية ، أو عايز أعمل مشروع ، هل البنك بيقدملي أفضل خطط تمويلية في السوق؟ -
08:57 هل البنك بيقدملي أحسن فوايد بالنسبة للسوق؟ -
09:24 هل البنك بيديني حرية قفل التمويل في أي وقت؟ -
10:00 قد إيه سهل أني أجيب قرض؟ -
10:51 خدمات الإنترنت البنكية .. مميزاتها وازاي استفيد منها؟ -
12:23 ليه خدمة الدفع المتكرر مهمه؟ -
14:07 ليه استخدم خدمة الدفع المتكرر؟ ليه معملش العمليات دي بنفسي؟ -
16:59 هل ممكن أتواصل مع البنك كتابياً عن طريق الإنترنت؟ -
17:49 هل البنك بيقدم برنامج مكافآت زي الاسترداد النقدي والعروض؟ -
18:49 هل ممكن أفتح حسابات مشتركة؟ -
19:09 هل ممكن يكون عندي كذا كارت ائتماني على نفس الحساب؟ -
19:33 هل ممكن يكون عندي كذا حساب في كذا بلد؟ -
20:41 هل ممكن يبقى عندي كذا حساب في كذا بنك؟ -
21:34 الخاتمة -
ده ملخص لأهم النقاط اللي لازم تفكر فيها وأنت بتختار أي بنك مناسب ليك .. ولو شايف إن في حاجات تانية مهمه متقالتش في الحلقة أو شايف أن في اي حاجات مش مظبوطة 100% أو لو ابتديت تطبق الكلام ده ياريت ديماً تبعتولنا على صفحة الانستجرام تشاركونا ارآئكم وتجاربكم
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
اهلاً بيكوا في حلقة جديدة من بودكاست كلام ينور ، احنا كنا اتكلمنا قبل كده عن البنوك وأنواع الأدوات الادخارية اللي احنا ممكن نستخدمها شهادات الاستثمار ، الودايع ، حسابات التوفير الحاجات دي كلها في حلقة قديمة ممكن ترجعوا ديماً تسمعوها
النهاردة انا هتكلم على موضوع مختلف ازاي هختار البنك بقى نفسه ، يعني انت النهاردة في اول حياتك بتبتدي تسمع البودكاست ده انت طالب في الجامعة ولسه هتبتدي تتعامل مع الفلوس دي حلقة مهمه بالنسبالك ، انت بتتعامل مع البنوك بشكل يومي زي أي حد فينا في نص حياتك المهنية برده لازم تفهم ليه مختار البنك ده ، وليه بتتعامل مع البنك ده بالذات ، وايه المميزات لو انت هتنقل لبنك تاني
أنا بس بفكر معاكوا وانا بعمل قائمة بالحاجات اللي انا عايزها في البنك ازاي أفكر فيها ، وطبعاً طبعاً زي كل مره كل واحد هيبقى عنده احتياجات مختلفة عن الأخر ، يعني مفيش واحد هيختار البنك زي التاني وده لأسباب كتير واضحه بالنسبالي واللي هنتناقش فيها في الحلقة دي النهاردة.. أنا عن نفسي أختياري للبنك بتاعي هيكون مختلف عن اللي بيسمعني لأن احتياجاتي واللي أنا عايزة منه مختلف تماماً
02:00
هنبتدي أول حاجه هنشوفها في البنوك وهي سهولة الاستخدام ، يعني أنا أول بند هدور فيه هل البنك ده سهل في الاستخدام وهحط شوية حاجات كده في سهولة الاستخدام زي مثلاً
البنك ده عنده فروع كتير ولا لأ لو انا مثلا محتاج أعمل حاجه من خلال الفروع يبقى أنا ههتم جداً بالبند ده ، في بنك قريب مني ولا لأ ، في فرع قريب من بيتي أو قريب من المكان اللي بشتغل فيه ولا لأ وده بالنسبالي حاجه كبيرة ليه؟ لأن أنا مش عايز البنك يبقى عنده فروع كتير في حتت زحمة ، صعب الوقوف فيها ، صعب الوصول ليها والكلام ده كله.. يبقى هنا عدد الفروع ، كمية الفروع ، وتاني حاجه ان في واحد يبقى جانب سكني عشان لما يبقى جنب سكني احتمالية اني اروحله هتبقى أعلى
02:49
تالت حاجه في سهولة الاستخدام هتكلم عن خدمة العملاء ، هل خدمة العملاء بتاعته على المستوى المطلوب؟ هل انا مبسوط بيهم؟ هل بيقدموا الحاجه اللي أنا عايزها؟ ولا هل هما صعب الوصول ليهم؟ عشان أروح البنك هاخد وقت طويل عشان اقابل حد من خدمة العملا.. البند ده بالنسبالي من أهم الحاجات
03:10
رابع حاجه اللي هنتكلم عليها ، هل عندهم خدمة عبر الهاتف كويسة ولا لأ؟ هل لما بتكلم في التليفون بعرف أوصل للحاجه؟ وقت وصولي للراجل اللي هيرد عليا قد ايه؟ هقعد كتير على التليفون؟ هينجز المعاملة ولا لأ؟
03:27
أخر نقطة في سهولة الاستخدام هي ماكينات الصراف الآلي ، هل في ماكينات صراف آلي متوفرة في حتت كتير؟ هل هدفع عليه فلوس لو هو بره الشبكة بتاعه ولا لأ؟ سهولة استخدام ماكينات الصراف الآلي دي بتفرق بالنسبالي كتير جداً إن يبقى عندي ماكينة صراف آلي بتاعة البنك بتاعي قريب مني برده زي الفرع بالظبط
03:53
وكمان هل البنك بيقدم خدمات صرّاف آلي ذكية؟ بمعنى إني ممكن مثلاً أروح أطبع منها حساب ، ممكن أودع شيك ، ممكن اعمل حاجات أكتر بكتير من أني بس أودع فلوس فهل البنك بتاعي بيقدم الخدمة دي ولا لأ دي نقطة كمان أنا بحبها وبشوفها مهمه في التسهيل على حياتك
04:14
يبقى النقط دي كلها نقط عامة في سهولة الاستخدام وده أول موضوع بتكلم عليه النهاردة "سهولة الاستخدام" سهولة التعامل مع البنك ، هل البنك سهل ولا صعب لأن حضرتك ممكن تقولي البنك ده جميل جداً بس كل الحاجات دي صعبه في التعامل معاه ، وطبعاً الحاجات دي المفروض ان البنوك كده كده بتشتغل عليها وبتحاول تنميها علشان تجذب العملا
04:38
تاني حاجه هتكلم عليها بقى لو حضرتك من الناس اللي بتحوش المدخرين ، يعني أنت مش بتستثمر خارج البنك إيه اللي انت عايزه من البنك؟ محتاج أول حاجه عايز البنك ده يكون بيدي فوايد تنافسية بالنسبة للناس التانية اللي في السوق ، يعني انت النهاردة بتربط شهادات استثمار أو بتربط ودائع يبقى أنت كمدخر من أهم الحاجات اللي أنت عايزها عايز البنك ده يديك فوايد أعلى من السوق طب أقدر اعرف ازاي هتلاقي مواقع بتقارن البنوك ببعض ، ممكن ترفع سماعة التليفون وتكلم كل البنوك وتعرف بيدوا كام على الفوايد بتاعتهم وهكذا
يبقى أول حاجه كمدخر لازم أبقى فاهمها هي الفوايد ، لأن خلي بالك لو البنك اللي جنب بيتك بيدي 10% وبنك تاني بعديها بشارعين بيدي 12% الـ 2% الفرق دول على مدار سنين كتيرة ممكن تفرق بأرقام كبيرة يبقى دي أول حاجه
05:36
تاني حاجه هل سهل اني انفذ العملية دي؟ يعني هل أنا محتاج كل مرة أنزل اخد بطاقتي وباسبوري وورقي وأروح البنك أعمل شهادة؟ ولا أنا ممكن مثلاً أعملها عبر التليفون أو عبر ماكينة الصراف الآلي أو ممكن أعملها أونلاين.. يبقى أنا كمدخر أنا برده عايز الادخار بتاعي يكون سهل تنفذيه لأنه هيسهلي حياتي كل ما يجيلي فلوس ممكن أربطها
06:03
طب أنا كمدخر عايز إيه تاني من البنك.. هل البنك بيدي صناديق استثمار ممكن استثمر فيها؟ ودي النقطة التالتة اللي انا بتكلم فيها كمدخر
06:05
هل بيديني إمكانية الوصول لأفكار تانية زي الاستثمار في أذون الخزانة في بلد زي مصر مثلاً؟ واللي مش فاهم يعني إيه أذون الخزانة هي السندات الحكومية اللي الحكومة بتطرحها للناس انها ممكن تشتريها دي ممكن معلومة تكون موجودة في البنك بتاعك وانت متعرفش
طب أذون الخزانة دي أحسن من الشهادات في إيه؟ احسن من الشهادات في إنها ممكن تدي عائد أعلى شوية وممكن تكسرها من غير ما تدفع فوايد بس أعتقد بيبقى فيها حد أدنى لازم يتحط في كل أذن فهل البنك بتاعك بيديك الحتة دي ولا لأ
06:51
طب أنا لو مدخر إيه كمان عاوزه ، هل البنك ده بيديني استثمار في الأسهم ولا لأ؟ هل البنك ده عنده شركة سمسرة تابعة ليه يقدر يفتحلي حساب ويربطلي الحساب بتاعي بحساب السمسرة وأقدر اشتري أسهم في شركة السمسرة من خلال الحساب المباشر بتاع البنك ولا لأ؟ لأن دي حاجه برده هتسهل عليا كمدخر
07:12
يبقى النقط بتاعة المدخر تاني فوايدي عامله ازاي في السوق ، هل سهل أنفذها ولا لأ ، بتديني صناديق استثمار ولا لأ ، بتديني أذون خزانة ولا لأ ، بتديني أسهم ولا لأ
07:24
أنا ليه بفكر معاك كمدخر كده عشان حضرتك لو روحت البنك بتسأل الراجل وأنت قاعد معاه حضرتك بتعملوا الحاجات دي ولا لأ ، لأن لو وقتها عرفت أنا كمدخر أه ده بنك ادخاري كويس بالنسبالي أقدر أحط فيه فلوس أنا شخصياً النقطة بتاعة المدخر أنا مش بتستخدم البنوك إني أعمل الاستثمارات دي لأن انا بشتغل الشغلانة دي أو مركز فيها فأنا بستخدم أدوات أخرى أو بفتح حسابات مختلفة في أماكن مختلفة عشان أعمل نفس الحاجات دي لأن بالنسبالي البنك ممكن ميكونش بيقدملي الحاجه اللي انا عايز أعملها في الأخر ومش عيباً في البنك بس أنا مش بعمل الحاجات دي ، بس بالنسبه لحضرتك اللي بتشتغل خارج المجال اللي عايز تستثمر وعايز تدخر البنوك من أفضل الحتت اللي ممكن تحط فيها ادخاراتك طبعاً
08:11
طيب أنا واحد مش مدخر أنا واحد بستخدم البنوك للتمويل بمعنى إيه؟ إني بستخدم البنك إنه يمولي حاجات انا عايز اعملها في حياتي زي مثلاً أشتري بيت ، عربية ، أرض ، أعمل مشروع ، أيا كان يبقى أنا هنا ببص على البنك من ناحية أني واحد عايز تمويل عايز أشوف إيه اللي بيقدمه البنك ده إيه النقط اللي هبص عليها
08:38
هل البنك بيقدملي أفضل حاجات موجودة في السوق من ناحية الأفكار التمويلية؟ يعني مثلاً ده بيمول أفكار زي شركات متوسطة ومتناهية الصغر ، ده بيمول عربيات ، ده مشهور في التمويل الفلاني.. يبقى أنا عايز أعرف كل بنك هو قوته في أي نوع من أنواع التمويل
08:57
طيب لما عرفت القوة بتاعة التمويل دي ، هل المصروفات بتاعتة بالنسبة للسوق كويسة ولا لأ هرجع هنا اعمل نفس اللي عملته في الاستثمار في العوائد اللي بدور عليها هنا بقى أنا بدفع للبنك فعايز أقل فوايد ممكن تتدفع ، أنا هقارن البنوك اللي ببص عليها ببعض تاني من خلال المواقع أو من خلال أي مصدر وأشوف هل هو بيقدملي أحسن فوايد ولا لأ
09:24
النقطة اللي بعديها هل لو أنا عايز أقفل التمويل ده هل الموضوع سهل ولا لأ؟ في بنوك ممكن تقولك لأ والله انا هديك احسن فوايد في العالم بس أنا مش هخليك تقفل القرض ده ابداً لازم تقعد 5 سنين أو 3 سنين ده بالنسبالي ساعات بيبقى لأ أنا عايز يبقى عندي الحرية إني في أي لحظة أقفل التمويل جالي علاوة ، جالي فلوس جانبية ، بعت أصل عملت أي حاجه عايز أعرف ازاي أقفله ، فمش ديماً بس تدور على مين هيدفعك أقل فوايد أو هيديك أعلى عائد ديماً بص على الحرية أو السيولة بتاعتك أنك متخسرهاش فديماً خلي بالك من حتة اني ممكن أقفل القرض بتاعي ولا لأ
10:00
النقطة اللي بعديها وهقولها كل مره قد إيه سهل أني أجيب قرض؟ ليه لأن البنك ممكن يبعلي كل حاجه جميلة والدنيا رخيصة والكلام ده كله لكن انا بتعذب عشان أمضي الورق عاوز 17 موظف يمضوه ، العلمية بتاخد سنتين يعني ممكن الموضوع يبقى صعب ، يبقى الكلام على الورق غير الحقيقة يبقى سهولة التنفيذ
ومتنسوش ديماً المصروفات اللي بتبقى خفيه جوه القرض لازم تبقى فاهم القرض مش عبارة عن فايدة بس ، ممكن يبقى في مصروف لفتح القرض ، مصروف لقفل القرض ، مصروف التأخير ... فأنت خلي بالك أنك تبقى فاهم أنت بتعمل إيه في التمويل
10:40
يبقى احنا أول حاجه أتكلمنا عن سهولة استخدام البنك ، الحاجه التانية أنت مدخر ولا لأ ، تالت حاجه بستخدمه في التمويل
10:51
النقطة الرابعة هتكلم عن الخدمات المصرفية عبر الإنترنت ، والخدمات المصرفية عبر الإنترنت أنا كعمر بقيمة انه حاجه كبيرة لأن أنا بحب أني مكلمش حد استخدم الإنترنت ، أستخدم البرنامج نفسه ، أحول الفلوس ، أشوف الأرصدة بتاعتي مش محتاج أكلم الموظف عشان الوقت
11:13
طيب أقدر أقارن أنظمة ببعض يعني البنك أ والبنك ب قد إيه السهولة بتاعة الخدمات المصرفية عبر الإنترنت بتاعته ، ازاي ممكن استخدمه؟ واجهة المستخدم بتاعه مريح في الشغل بالنسبالي ولا لأ؟ هل هحتاج أقضي شوية وقت أفهم الخدمات بتاعته واشوف كل البيانات اللي بيطلعهالي لأني ممكن ألاقي حاجه مهمه جداً زي كشف حساب بيتابع المصاريف الفلانية في الحاجه الفلانية يعني بلاقي حاجات ساعات مفيدة جداً في كشف حساب البنك بتاعي محتاج أبص عليها ، هل هقدر أعمل تحويلات داخلية ما بين نفس البنك وسرعتها وهقدر أحول لنفس البلد بسرعة برده ولا لأ ، طب هقدر أحول خارج حدود الدولة اللي أنا فيها ولا لأ ودي حاجه برده بالنسبالي مهمه لو عايز تبعت فلوس لدولة تانية التحويلات العالمية برده من الحاجات اللي أنا بشوفها مهمه تكون موجوده
12:11
برده من خلال الأنترنت هل هقدر أحول العملات من دولار لدرهم لمصري لسعودي لأيا كانت العملة اللي احنا بنتكلم عليها في الشرق الأوسط البنك بيديني الحاجات دي ولا لأ
12:23
حاجه برده بحبها جداً وبستخدمها هي خدمة الدفع المتكرر أو المصروفات المتكررة بمعني إيه؟ انا عندي مصروف شهري في حساب معين ببعته كل شهر حاجه ثابته ، عملت الميزانية بتاعتي ولقيت إني مفروض أبعت 300 درهم اشتراك النادي أو 300 جنية في حته معينه كل مره في ميعاد ثابت بروح داخل على خدمة الإنترنت البنكية وأقوله كل شهر حول 300 من الحساب ده للحساب ده وادوس أوكيه وأقوله مثلاً خلي خطة الدفع دي لمدة 10 شهور قدام
الميزة هنا إيه بقى بالنسبالي إن الميزانية بتاعتي ممكن أقسمها أجزاء كتير جداً واستخدم خدمة الدفع المتكرر دي وأحط معظم الميزانية بتاعتي هناك بمعنى ان مرتبي بينزل أخر الشهر هقول عندي اشتراك ، عندي قسط كذا ، وكل الحاجات دي أقدر احطها كمصروفات مكررة لما مرتبي ينزل مثلاً يوم 25 يوم 1 الحاجات دي كلها تتنفذ على طول الميزة هنا إيه برده أني مضيعش وقتي أخر الشهر لمدة 10 شهور عملت 10 تحويلات حتى لو كانوا تحويلات بسيطة ، حتى لو كنت بتحول لحسابك الادخاري في مكان تاني
اي فكرة انت عاوز تعملها وتفضل ملتزم بيها كل شهر أنا بنصح باستخدام الحته دي في خدمة الإنترنت البنكية ، أنا بالنسبالي البنك مهم إن البنك بتاعي خدمة الإنترنت بتاعتة تكون بتسمح طبعاً مش كل البنوك بتعمل كده ولكن أنا أفضل انها تكون موجودة
14:07
النقطة اللي بعديها أني بحب لو هنزل كشف الحساب بتاعي بحاول أشوف حته تنزلي كشوف الحسابات بتاعتي واحطها في حته معينه عشان أخش أراجعها يبقى كل حاجه مرتبه وكل العمليات بتاعتي تبقى منظمة أقدر اشوفها بسهولة
طب أنت هتقولي هو أنا يعني شركة كبيرة او عندي مثلاً عمليات كتير أنا كل اللي بتحرك فيه مبالغ صغيرة!! صح ولكن أنت متعرف قدام الدنيا ممكن يحصل فيها إيه ممكن العمليات بتاعتك تزيد ، ممكن ترتبط تتجوز لو أنت في بداية حياتك مصروفاتك هتبقى كتير جداً صعب تتابعها ، صعب تبص عليها فلو أنت منظم نفسك من الأول وشايف أنت بتعمل إيه فاهم ميزانيتك وعامل التحويلات بتاعتك تمام أنت هتستريح تماماً لما الحجم أو الكمية بتاعك تزيد فأنت لو بدري معنديش مشكلة وممكن تبدأ بحساب ادخار انت النهاردة مرتبك بينزل في الحساب الأول اسمه حساب 1 ده حساب المرتب ، حساب 2 ده حساب التحويش أنا ممكن أعلم البنك بتاعي حولي 100 جنية أو 100 دولار كل شهر من الحساب 1 للحساب 2 أنا كده باعدهم عن إيدي مصرفتهمش وقسمت في دماغي الـ 100 اللي بتروح للحساب ده هتفضل موجودة هناك
طب ليه بقى مقولش لنفسي أنا هخش اعملها بنفسي كل شهر بإذن الله؟ لأنك بعد شوية مش هتعملها ، لكن لو حاطط القانون بتاعك ده أنت بتهيء نفسك أن انت هتودي الفلوس هناك
طيب عايز أودي مصروف مثلاً بصرف على البيت الأكل والشرب والسوبرماركت والحاجات دي أودي فلوس شهرياً 300 / 500 / 1000 أيا كان الرقم في الحساب التاني فهقول للبنك من حساب مرتبي وديلي مصروف البيت ده في الحته الفلانية
16:07
هل الموضوع صعب؟ الموضوع سهل جداً والله مبياخد 5 دقايق وهو ده خدمة الانترنت البنكية انت عندك ولا لأ ، تخش أونلاين تفتح حساباتك تنظم الدنيا ، تربط على الميزانية بتاعتك الحساب ده ليه علاقه بالحساب ده ، تحول الفلوس ، فلوسك موجودة تقدر تسهل حياتك بعد كده يبقى هنا ده تشغيل آلي أنت بتحاول تخلي كل حاجه منظمة
16:33
بنتكلم بعد كده على البيانات انك ممكن تقدر تسحب كل البيانات دي تنزلها وتحتفظ بيها وتقدر تبص عليها ، واللي عايز يروح للمستوى اللي بعده من الحنتفه او اني عاوز أبص على كل حاجه بقى بالظبط في أنظمة أنت ممكن ترفع الملف ليها وتشوف حصلك إيه في الشهر والكلام ده كله بس هنتكلم في حلقة تانية عن الموضوع ده بالكامل
16:59
أخر حاجه هشوفها في خدمة الإنترنت ودي ممكن تكون استخدامي أنا الشخصي هل أنا ممكن أتواصل مع البنك كتابياً عن طريق الإنترنت ولا لأ؟ هل أنا ممكن أبعد عن أني أرفع سماعة التليفون وأكلم بني آدم وأقوله والله أنا حسابي فيه كذا كذا ، هل أنا ممكن أبعتله على الإنترنت أسرع أسهل يرد عليا وقت ما يرد ، أرد عليه وقت ما أرد أسهل بكتير من التليفون المحادثة على الإنترنت بالنسبالي مهمه
طبعاً هتفهموا من الحلقة دي إن بالنسبالي خدمات الإنترنت البنكية ده جزء كبير من البنك ، أنا عمر شخصياً وانا بقيم البنك هو خدمات الإنترنت للبنك فلو حضرتك مبتستخدمش الأونلاين كتير ممكن تحاول تبدأ تستخدمه لو خدمات الإنترنت في البنك بتاعك ضعيفه فأظن ممكن تبص على بنوك تانية دي وجهة نظري في ازاي بنظم حياتي
17:49
هنروح للنقطة اللي بعديها وهي إيه اللي البنك بيقدمهولي جانبياً خدمات لذيذة ممكن تساعدني وتخليني أتبسط من البنك اللي أنا فيه ، في حاجات بتظهر دلوقتي كتير زي أنه مثلاً يديك شبكة من المحلات اللي بتديك عروض ، نظام الاسترداد النقدي ، أو أدفع مثلاً فاتورة الكهربا بالبطاقة الائتمانية بتاعة البنك وهنديك كذا فدور على الحاجات اللي أنت بتستخدمها في الميزانية بتاعتك كتير مثلاً انا بستخدم شركة الكهربا الفلانية والشركة دي موجودة على الكارت ده وليها ميزة معينة هيديني استرداد نقدي 2% أو 5% فالبنك ده عاجبني عشان عندي صرف كتير في البند ده ، ومش بقولك أنك تروح تدور على عروض اللي هي اشتري نضارات أو ساعات لأ انا بقولك على حاجات موجودة عندك بالفعل في ميزانيتك بتصرفها كل شهر فالأفضل أنك تصرفها عن طريق برنامج المكافآت
18:49
الحاجه التانية اللي بشوفها لذيذة في البنوك برده أنك ممكن تفتح حسابات مشتركة ما بينك وبين مراتك ما بينك وبين ولادك لما يعدوا سن معين أو ما بينك وبين شريكك ايا كان فالحسابات المشتركة دي بالنسبالي برده ميزة لذيذة
19:09
هل ممكن يبقى عندي كذا كارت ائتماني على نفس الحساب؟
آه في بنوك بتطلعلك على نفس الائتماني يعني أنا مثلاً عندي ائتمان 10000 أنا ممكن أطلع كارت ليا وكارت لمراتي وكارت لإبني أو أخويا او أي حاجه والائتمان كله على الـ 10000 فأنت ممكن تستخدم نفس الحساب بس بكذا كارت دي برده من المزايا اللي بشوفها في البنوك
19:33
هل ممكن يكون عندي كذا حساب في كذا بلد؟
آه في شبكة معينة من البنوك بتديك حساب في مصر وحساب في الإمارات وحساب في السعودية مع نفس البنك و كلهم من نفس خدمات الإنترنت البنكية بس ده مستوى تاني لو أنت بتتحول فلوس بين البلاد دي بسهولة
19:52
من الحاجات برده اللي بشوفها مهمه ازاي افتح حساب بسهولة تاني هرجع للسهولة أنا مش عايز أعذب حياتي ، بدور على الراجل وبيدور عليا والكلام ده كله السهولة بتاعة فتح الحساب أنا بقدر الموضوع ده وبقدر الورقيات القليلة السريعة وأعتقد كل البنوك هتاخد تغير جذري في الموضوع ده في المستقبل في وجود الإنترنت فتح الحسابات في البنوك هيكون سريع جداً وبنشوفه في الشركات دلوقتي أنهم بيعملوا بوابات من خلال الإنترنت أحسن وبتسرع العملية دي فأعتقد الحاجات دي هتتحسن مع الوقت كمان
20:28
طيب احنا اتكلمنا على 5 حاجات رئيسية تاني عشان المعلومات متخشش في بعض سهولة الفتح – لو انا مدخر – لو أنا بدور على تمويل – خدمات الإنترنت البنكية – مزايا أخرى
20:41
سؤالي اللي هقفل بيه الحلقة دي هل أنا ينفع يبقى عندي كذا حساب في كذا بنك؟
في حالات معينة بنصح بالموضوع ده لو أنا مثلاً عايز قرض والقرض بتاعي كبير وفي وقت البنك الرئيسي بتاعي مش بيقدملي والأسعار بتاعته وحشه هروح أفتح مع البنك التاني بس لهذا السبب ولكن مش بستخدمه لحاجات تانية فآه ممكن تفتح بس أنا مش بنصح أنك تكون فاتح في اتنين وتلاته او اربع بنوك ، خلي واحد ديماً هو اللي فيه السهولة ، السرعة ، الخدمة العالية الجودة ، ممكن متبقاش مدخر فيه لأنه غالباً هيكون بيدي فوايد واطية لأنه بيديك خدمة أعلى وفي بنوك تانية اللي بتدي فوايد أعلى ممكن خدمة العملا بتاعتها تكون مش على قد المستوى فأنت بتاخد من الناحيتين أحسن ما فيهم
21:34
ده كده ملخص ازاي بفكر في البنوك لو عندك اي حاجه تانية أنت شايف اننا مقولنهاش في الحلقة دي أو شايف أن في اي حاجه غلط أو ابتديت تعمل من الحلقة دي ياريت ديماً تبعتولنا على الصفحة بتاعتنا واشوفكوا الاسبوع الجاي في كلام ينور
Translation of some words and terms:
Career مهنةCustomer Services خدمة العملاءOperator المشغل أو العاملATM ماكينة الصراف الآليNetwork شبكةSavers المدخرينWebsites مواقعAccess إمكانية الوصولMinimum حد أدنىDirectly مباشرةFees مصاريفLoan قرضBonus علاوة / إضافيThe Process العمليةOnline Banking الخدمات المصرفية عبر الإنترنتSystems أنظمةInterface واجهه المستخدمStatements البياناتGlobal Transfers التحويلات العالميةCurrencies العملاتRecurring Payment الدفع المتكررSchedule جدولAutomation تشغيل آليVolume كمية / حجمData بياناتLevel مستوىBreakdown انهيار / تعطيلChat محادثة عبر الإنترنتOffers عروضCashback System نظام الاسترداد النقديRewards Program برنامج المكافآتJoint Accounts حسابات مشتركةOnline Portals بوابات الإنترنت
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #ما_وراء_اختيار_البنك