29. الاكتتابات العامه IPO
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بنتكلم الإسبوع ده عن الإكتتابات العامة ، نظراً لأن المنطقة العربية بتشهد الفترة دي مجموعة كبيرة من الإكتتابات والطروحات الجديدة
بينضملنا النهاردة ضيف جديد الأستاذ حازم عبد المحسن
ACT Financial حازم هو مدير إدارة الاستثمار في شركة
ACT والمشرف على عمليات الاستثمار في الأسهم الخاصة والعامة ومدير شبكة المستثمرين العالميين التابعة لشركة
: حازم عنده خبرة طويلة في المجال المالي وتقدروا تتعرفوا على حازم أكتر من خلال اللينك
: بنتناقش في حلقة النهاردة عن
يعني إيه طرح عام؟ وانا كصاحب شركة ازاي بستفيد منه؟ -
المميزات اللي الناس بتدورعليها انها تكون موجوده في البورصات -
هل ممكن الجأ للبورصة عشان أزود رأس مال شركتي؟ -
هل في قوانين معينة بتنظم عملية الإكتتاب وهل القوانين دي بتختلف من سوق لسوق أو من دولة لآخرى؟ -
هل أي حد عنده شركة يقدر يطرح في البورصة؟ -
مين المسؤول عن الطرح العام؟ -
هل الشركاء المؤسسين بيقدروا يبيعوا حصصهم في البورصة من أول يوم؟ -
إيه المفروض يتوفر عندي عشان أقدر أدخل الطرح ده؟ -
دور بنك الاستثمار؟ -
إيه اللي بيحصل للأفراد لو الطرح أتغطى أكتر من مرة؟ -
ما هي العلاقة اللي بتحدد نسبة التخصيص في الطرح؟ -
هل من حقي أتداول في الأسهم عادي؟ -
إيه اللي بيخلي الطرح العام يجذب مستثمر جديد؟ -
هل أنا كمساهم أقدر أشتغل في الطروحات بس؟ -
لو معنديش أي خبرة في البورصة هل لازم أول ما أسمع إن في إكتتاب عام أروح اشتري؟ -
هل الإكتتابات مضمونة انها بتطلع على طول؟ -
إيه اللي مفروض أعرفه قبل ما أشترك في الإكتتاب؟ -
هل مدير الاستثمار بتاعي بيعملي الدراسة على الطروحات العامة المتاحه؟ -
الاستثمار في البورصة من الأفراد للطروحات أو للأسهم المدرجة هو شيء عليه أقبال كبير جداً ، الناس بقت بتبدأ مشاريع ناشئة بكميات كبيرة جداً عمرنا ما كنا في المستوى ده من المشاريع والافكار الناشئة اللي هي ممكن في يوم من الايام توصل انها تبقى موجودة في البورصة فلازم تبدأ تبذل مجهود أكتر عشان تفهم التفاصيل دي بتمشي ازاي عشان الدنيا كلها بقت سابقة في الموضوع ده وانك تبقى فاهم بورصة أو فاهم استثمار ده جزء من انك تبقى فاهم الدنيا ماشية ازاي ولازم ديماً تدور على طرق مبتكره تستثمر بيها الفائض من دخلك بحيث تحقق عوائد احسن
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكوا في حلقة جديدة من بودكاست كلام ينور
ACT Financial النهاردة معايا الأستاذ حازم عبد المحسن مدير إدارة الاستثمار في شركة
حازم من مسؤلياته في الشركة ان هو بيشرف على عمليات الاستثمار في الأسهم الخاصة والعامة
ACT وهو بيدير شبكة المستثمرين العالمين التابعة لشركة
حازم عنده خبرة طويلة في المجال المالي تقدروا تعرفوا عن حازم أكتر من خلال اللينك اللي هنسيبه في الشو نوتس
عمر: حازم أزيك؟
حازم: عمر أزيك اخبارك إيه؟
عمر: الحمدلله ، أنا مبسوط جداً إن انت معايا النهاردة
حازم: أنا مبسوط أكتر بكتير
عمر: النهاردة احنا هنتكلم على موضوع الاكتتابات وده لأن المنطقة العربية كلها بتشهد مجموعة كبيرة من الاكتتابات هتلاقي في السعودية الأيام اللي فاتت في حاجات كتير نزلت في البورصة ، وفي مصر
حازم: والإمارات فيها ، وكل الأسواق دلوقتي فيها ضجه قوية على الطروحات الجديدة أو الأوليه في السوق ، مظبوط
عمر: لو واحد النهاردة معندوش أي فكرة يعني إيه طرح عام تقدر تقوله إيه؟
حازم: الطرح العام هي عملية انك بتاخد شركة خاصة مملوكه لمجموعة أفراد او لمجموعة مؤسسات تاخدها للتداول العام في البورصة ، العملية دي بتتعمل عن طريق إنك بتدرج جزء من أسهم الشركة دي لكذا سبب
أهم سببين السبب الأولاني أنك تزود رأس مال الشركة دي عن طريق انك تطرح مجموعة أسهم الشركة في السوق وتبتدي تعمل زيادة لرأس المال للشركة
أو الجهة المالكة للشركة دي بتبقى عاوزة تتخارج بحصة من ملكيتها في الشركة دي لمجموعة أفراد مش لشخص بعينه والتداول فيها بيبقى تداول علني على المشاع لمجموعة مستثمرين أو لسوق معين فبالتالي بتاخد الشركة دي للتداول عام
فمن أهم الأسباب اللي بتتعملها بتبقى زيادة رأس مال أو تخارج جزئي من مؤسسة معينة أو من جهة معينة في ملكيتها في جهة خاصة ممكن المؤسسة دي تكون حكومية أو خاصة ممكن تبقى شركة مملوكة لعائلة أو مملوكة لمجموعة أفراد كله في الأخر بيتم التعامل عليه بنفس الطريقة إلى أن يوصل يكون مدرج في بورصة من البورصات الموجودة في العالم كله ويتم التداول ما بين كل المتعاملين في السوق اذا كانت مؤسسات أو افراد أجانب أو مصريين أو عرب أيا كان
عمر: تعالى نقول كده أنا كشركة بستفيد إيه؟ أنا عندي مصنع ملابس ، شركة زيت أيا كانت الحاجه ببساطة كده انا كصاحب الشركة بتسفيد إيه لما أنزل في الطرح العام ده؟
حازم: لو أنت بتدورعلى رأس مال تزود بيه حجم تعاملات الشركة دي أوالنشاط اللي بتقوم بيه الشركة دي في ناس كتير مبتبقاش مرتاحه انها تدخل شريك لو هي مثلاً شركة قديمة موجودة أو شركة عائلية مبتبقاش مفضله أوي انها تدعو شريك معين بعينه هو اللي يتم من خلاله زيادة رأس المال أو ضخ رأس المال داخل الشركة فبالتالي الموضوع بيبقى مريح أكتر بالنسبالها انها تبقى مفتته ملكيتها لمجموعة مستثمرين مدرجه في البورصة
والميزات الأهم من كده كمان هو إن بيبقى في آليه واضحة للتخارج بين المستثمرين الموجودين في الشركة دي فيما بعد يبقى ليها آليه واضح وصريح احنا بنبيع في البورصة والسهم ده له سعر معين تداول عليه بينزل وبيطلع وبالتالي بقدر أحدد القيمة السوقية بتاعة الشركة دي من خلال السهم الموجود على شاشة البورصة ولو حبيت في أي وقت من الأوقات أتخارج جزئياً أو كلياً بيبقى في طريقة واضحة غير الشركات الخاصة المملوكة ملكية خاصة
خلاص الموضوع بيبقى بمنتهى البساطة هي شركة مدرجة في البورصة عندي أسهم أيا كان حجم الأسهم دي بتخضع لضوابط معينة من الجهات الرقابية الموجودة في كل سوق من الأسواق وبيتم بآلية تعامل البيع عليها بطريقة واضحة وصريحة محفوظة في كل الأسواق من غير ما نقع في مشكلة ان الشركة دي تسوى إيه أو اني أدور على مشتري للشركة دي يشتري حصتي.. فبيبقى في آليه واضحه
وزيادة على كده بيبقى عندك طريقة تستدعي بيها رأس مال للشركة دي متكرر آليه بسيط بدل ما كل مره تبقى مضطر انك تدور على شخص بعينة يدخل يزود رأس المال للشركة دي أو شريك يدخل ياخد منك حصة لأ الموضوع بيبقى سهل من كده بكتير فدي من أهم المميزات اللي الناس بتدورعليها انها تكون موجوده في البورصات
عمر: يعني مثلاً أنا و 10 أصحابي عندنا شركة واحنا رأس مالنا 100 ألف وعاوزين نلم 100 ألف جديدة واحنا الـ 10 مفلسين معناش فلوس هل أنا ممكن أروح البورصة عشان كده؟
حازم: بتروح جزء من حل المشكلة بتاعة إنك تكون مدرج في البورصة هو اللي انت قولته بالظبط إن انت بتطرح زيادة رأس المال اللي انت عايز تعملها من 100 ألف لـ 200 ألف دي للإكتتاب العام
عمر: لناس معرفهمش خالص بره الـ 10 اللي أنا فيهم
حازم: بالظبط كده ولا انت تعرف أساميهم ولا هتبقى متحكم في مين هيكون موجود فيهم بعد كده لأن بيحصل تداول على السهم بعد الإكتتاب فانت مش بتكون مسيطر على الملكية بتاعة النسبة اللي انت طرحتها دي بعد كده ، لكن بعد كده الموضوع بيبقى أسهل بكتير
في أن انت 1 من الـ 10 اللي انت بتتكلم عليهم دول قرر ينزل بنسبتة من 10 لـ 5 فأنتو مش هتدخلوا في المجادلات بتاعة الشركة دي تسوى 100 ألف ولا 200 ولا 500 ولا مليون هي ليها سعر
سعر السهم موجود على الشاشة وليها آلية ان الواحد من العشرة ده يقدر يبيع الـ 5% دول في السوق لأيا كان مين العميل اللي ممكن يشتري منه بس طبعاً في ضوابط للقصص دي كلها
في ضوابط بتحكم حجم الشركة اللي بتنزل السوق شكلها عامل ازاي ، ميزانيتها شكلها عامل ازاي
طب الناس المؤسسين دول هل من حقهم يبيعوا في أي وقت من الأوقات ، لازم عملية افصاح معينة تحصل يعني في حاجات كتير بتحكم
عمر: في قوانين معينة بتنظم العملية دي ، والقوانين دي بتختلف من سوق لسوق لآخر؟ يعني من دولة لدولة؟
حازم: يعني في المنطقة العربية معظمها شبيه مش هقولك انه 100% مماثل بس بتختلف شوية من بلد لبلد حتى في البلاد العربية وعالمياً طبعاً في قواعد او خطوط حمراء مختلفة يعني في حاجات تبقى أعنف شوية في التعامل ، تعاملات أعضاء مجلس الإدارة ، تعاملات مع الشركة المؤسسين ، الكلام ده كله طبعا
عمر: أي حد من اللي بيسمعنا مثلاً لو عنده شركة ، والشركة دي كبرت في يوم من الأيام يقدر يطرح شركته في البورصة صح؟
حازم: بالظبط ، بطريقة معينة بتعين حد يكون مسؤول عن الطرح العام ده
بنك الاستثمار بيساعدك أنك تقيم الشركة دي ويقولك بالظبط أنت محتاج تبيع منها قد إيه ، وهل هي هتكون مجرد بتزود رأس المال ، ولا بعض من الشركاء المؤسسين يتخارجوا بجزء يعني في حاجات كتير بيساعدك فيها بنك الاستثمار في عملية الطرح
عمر: أنت قولت فالأول أنا يا بزود رأس مالي اللي هو بضخ فلوس جديدة جوه الشركة عشان انا مثلا مش عارف أكبر أو مش عارف أجيب فلوس أننا مثلاً استلف من البنك ، بس انت قولت برده حاجه تانية لو حد من الشركاء المؤسسين عاوزين يبيعوا هل ده معناه لو احنا الـ 10 دول في 3 عايزين يبيعوا هل ممكن يبيعوا في البورصة حصصهم من أول يوم؟
حازم: لأ ، الشركاء المؤسسين بيبقى ليهم حظر بالقانون ، حظر بيع لمدة معينة بنسبة معينة يقدروا يبيعوا جزء من اسهمهم في يوم الطرح أو في عملية الطرح الأولي نفسها بالظبط في أول يوم وبعد كده بيبقى ليهم حظر انهم يتعاملوا على السهم ده وبعد كده بيقدروا يتعاملوا طبيعي مفيش مشكلة بالافصاحات
عمر: يعني برده ده اسلوب تخارج علشان كده بنلاقي كل الشركات الناشئة او زي (أوبر) الحاجات الكبيرة دي بيعملوا برده طروحات حتى لو مبقالهمش كتير.. صح كده؟
حازم: كل الشركات ، وخلي بالك في الأسواق المتقدمة أكتر يعني مثلاً في بلاد زي بلادنا أو في بلد زي مصر بيبقى واحدة من القوانين الأساسية انك تدرج شركة في البورصة أو تاخدها للإكتتاب العام هو إن الشركة تكون محققة مكاسب معينة على ميزانيات لعدد سنين معين ده مثلاً مش الوضع في أمريكا
يعني في أمريكا شركة (أوبر) لما اتخدت للإكتتاب هي شركة خسرانة من بدايتها لحد النهاردة وبالرغم من كده نزلت للإكتتاب واشتغلت وفي ناس عملت منها فلوس ، يعني القوانين مختلفة شوية بس في النهاية فكرة الإكتتاب هي نضوج معين في عمر الشركات بيفرق في شكلها في حوكمتها وفي المجال اللي هي بتتعامل عليه
عمر: أنا اعتقد ان الشركات المدرجة في البورصة ممكن علاقتها مع البنوك تبقى أفضل ، ممكن يعرف ياخد تسهيلات أحسن لأن هي مبتبقاش مملوكه لمجموعه مغلقه من الناس صح كده؟
حازم: ومع المستثمرين خلي بالك لأن برده العلاقة مع المستثمرين الأجانب مثلاً في بلد زي مصر بتخلي أداء الشركة دي حتى من ناحية الافصاح عن نتائج الأعمال أو قرارات مجلس الإدارة أو قرارات الجمعية العمومية لما بيكون في مستثمرين بجودة كويسة ، مستثمرين جوه الشركة أو ملاك الشركة أداء الشركة نفسه بيتحسن
عمر: طيب احنا غطناها من ناحية الشركة هتستفيد إيه ، خلينا نلخص اللي انت قولته في كم نقطة مثلاً إن الشركة بتستفيد انها بتجيب قاعدة مستثمرين جديدة ، بتساعد على إن الشركاء الأساسيين يتخارجوا مع الوقت ، بتحسن علاقتك مع المساهمين بتوعك ، ومع البنوك ، ومع الناس كلها الموجوده ، وبتحدد سعر شركتك محدش بيتخانق على تقييم الشركة بتاعي بقى بكام السوق وقتها هو اللي بيحدد ، أعتقد دي الفوايد اللي أنا فهمتها منك.. تمام
طيب من ناحية الراجل بقى اللي بيسمعنا أو البنت اللي بتسمعنا أو اي حد بيسمعنا ، لو انا النهاردة عايز استثمر في الطروحات دي لأن مثلا أنا من خلال الفترة اللي اشتغلت فيها في المجال ده انا شوفت عدد كبير من الطروحات ومع كل طرح كبير بيجيب شريحة جديدة من المساهمين وانا متأكد ان الناس اللي بيسمعونا سمعوا من قريب عن طروحات كبيرة زي في طرح في مصر وهكذا أنا بقى كمستثمر ازاي اخش طرح ، يعني إيه المفروض يبقى عندي عشان أعرف أخش الطرح ده؟
حازم: بص مدير الطرح او بنك الاستثمار اللي جبنا سيرته في أول الكلام كل مهامه انه بيحدد نسب أنواع المستثمرين اللي بتشارك في الطرح ده فمثلاً طرح أي شركة نازلة في السوق بنسبة مئوية معينة من رأس مالها هو بيجي يقول طيب يا جماعة احنا النهاردة مخصصين من الطرح ده نسبة مثلاً 80% منه للمؤسسات طرح خاص و20% من الطرح ده طرح للإكتتاب العام إيه الفرق ما بينهم؟
الطرح الخاص ده بيستقطب فئة معينة من المستثمرين والمؤسسات المعتادة والمعروفة بالتداول في الأسواق دي هي شركة شغلتها انها تستثمر في البورصة اذا كانت إدارة محافظ أو صندوق استثمار أو شركة استثمار أو أيا كان نوعه هو ده بيسمى مؤسسة مالية نشاطها الأساسي انها تستثمر في الأوراق المالية أو في البورصات المالية
عمر: ده 80% من الطرح مثلاً؟
حازم: مثلاً لو هو قرر انه يبقى 80% ، أو هي جرت العادة إن النسبة الأكبر من الطروحات بتبقى مخصصة للإكتتاب الخاص ، والنسبة الأصغر منه بتبقى مخصصة للإكتتاب العام
لو اللي بيسمعنا أو بيسأل عن الموضوع ده هو من الأفراد اللي عاوز يشارك في الطرح العام فهو الموضوع بسيط جداً هو كل الفكرة انه بيفتح حساب في شركة سمسرة زي أكنه هيشتري أي سهم مدرج أو شغال بالفعل في السوق وبيطلب انه يشارك في الطرح الخاص ده بأي قيمة معينة أيا كان القيمة اللي هو حابب يكون حاطتها
مثلاً هو عاوز يشتري بـ 100 ألف جنية أو يشارك بـ 100 ألف جنية في الطرح الفلاني بيكلم السمسار بتاعة أو شركة السمسرة بتاعتة وبيحط طلب اكنه بيشتري أي سهم تاني موجود في السوق بس الآليه عن شركة السمسرة تبتقى مختلفة شوية مبتبقاش سهم متداول لسه ، شاشة مختلفة أو طريقة طلب مختلفة شوية ، بيحط الطلب ده وعند يوم البيع اللي بيتم فيه الطرح الأولي بتتخصص له نسبة من اللي هو طالبه ده لو الطرح ده متغطي أكتر من مره فبياخد جزء من اللي هو طالبه والأسهم بتبقى موجودة في أمين الحفظ بتاعه بطريقة طبيعية جداً أكنه أشترى أي سهم موجود في السوق
عمر: طيب أنت قولت كلمة مهمة كده لو أتغطى كذا مرة ، يعني في المثال بتاعنا احنا قولنا الشركة بـ 100 ألف واحنا عايزين نلم 100 ألف تانية فدينا 80 للمؤسسات و20 للأفراد إيه البيحصل بقى للأفراد لو أتغطى أكتر من مرة؟
حازم: طيب من دور بنك الاستثمار انه يروج للطرح ده ، يعني إيه يروج للطرح ده يعني يقابل أو يتعامل مع العملاء الموجوده بصه على السوق في مصر أو بصه على السوق اللي نازل فيه الطرح ده ويبتدي يوعيهم بفكرة إن في طرح جديد أو شركة جديدة نازلة في السوق يقولهم الشركة دي تقيمها الشكل الفلاني ، نشاطها بالشكل الفلاني ، بتعمل كذا وهي شركة كويسة من الزوايا الفلانية ، ونسبة النمو المتوقع ليها في الـ 5 سنين الجايين يبقى شكلها كده فأنا بنصحك أنك تشارك في الطرح ده
ففي الحالة بتاعة الطرح ده الـ 20 ألف الموجودين في الطرح العام متغطي كذا مره يعني عدد الناس اللي عايزة تشارك في الطرح أكبر من النسبة المطروحه في الطرح العام يعني احنا لو طارحين 20 ألف جنية في المثال اللي بنتكلم عليه للطرح العام ويجيلك ناس بـ 100 ألف جنية عايزة تشتري كده 5 مرات أعلى فبالتالي لو أنت طالب أيا كان الرقم اللي انت طالبه هيجيلك بس 20% من الرقم اللي انت طالبه
عمر: يعني أنا كلمت سمسار قولتله انا عايز بألف جنية هيرجع يقولي أنت بعد التخصيص أنت اخدت 200 ، يعني معنى كده إنه مش زي الأسهم العادية ، أنا في الأسهم العادية انا ممكن أخش اشتري الأسهم اللي أنا عايزها لأن السوق فيه سيوله معينة ممكن اشتري لكن في الإكتتابات بيبقى في تخصيص على حسب حجم الطلب الموجود
حازم: العلاقة ما بين الكمية المعروضة من الأسهم و كمية الطلب اللي جاية عليه ، العلاقة دي هي اللي بتحدد نسبة التخصيص
عمر: طيب أنا كمستثمر روحت حطيت فلوس في شركة السمسرة بتاعتي وكلمت السمسار بتاعي أداني الأسهم ، إيه اللي بيحصل بقى بعد كده هل بتبتدي تتداول عادي زيها زي الأسهم التانية بعد كده؟
حازم: غالباً أو العرف إنه من بعد التاريخ اللي جتلك فيه الأسهم ده بيومين بيبتدي أول تداول للسهم ده في السوق في البورصة العادية الناس كلها بتبقى شايفاه تداول عام وحر تماماً مفيهوش مشكلة وبيبقى ليك الحق أنك تبيع الكمية اللي انت اخدتها في التخصيص في الطرح ده أو تشتري زيادة عليها لو أنت حابب وبيبقى سهم زيه زي أي سهم تاني من حقك انك تتعامل عليه زي ما بتتعامل على اي سهم موجود وشغال في السوق
عمر: يعني نقدر نقول ان دي طريقة بداية اي سهم في الحياة صح؟
حازم: بالظبط ، كل سهم نزل في السوق حصل فيه اللقطة دي في مرحله الأولى من عمره
عمر: طيب في أجيال معينة ، شرايح كده من المساهمين بيجوا وقت الإكتتابات فقط.. يعني احنا شوفناها عبر الـ 10 ، 15 سنة اللي فاتوا الناس معندهاش أي استثمارات في البورصة بتيجي فجأة ، إيه اللي بيخلي الطرح العام يجذب مستثمر جديد؟
حازم: أولاً هو الطرح العام مصحوب بضجة تسويقية لانه بيسوق له ، يعني مبدأيا وانت بتطرح شركة جديدة بيبقى أصحاب الشركة اللي هم الملاك الموجودين وبنك الاستثمار المسؤول عن الطرح ده بيبقى جزء من الخطة التسويقية بتاعة الطرح الأولي انه يعلن عن الطرح ده وبالتالي الموضوع بياخد ضجة أكبر شوية ، بالإضافة إنه مش ديماً الجذب ده لفئات معينة هو في مؤسسات معينة مخصصة محافظ معينة أو صناديق معينة دورها أنها صناديق بتستثمر في الطروحات الأولية فقط
عمر: أنا كمساهم أقدر يبقى عندي استراتيجية معينة إننا بشتغل بس طروحات صح؟ يعني مثلاً السوق الفلاني بيطرح سهم جديد النهاردة أنا هخش وابيعه كمان أسبوع كمان شهر كمان سنة
حازم: وعادة ده بيبقى صندوق أو مؤسسة بتشتغل على منطقة معينة من العالم يعني مبتبقاش بلد لأن مفيش بلد في الدنيا حجم الإكتتاب اللي فيها يسمح إنك يكون عندك صندوق مخصص للإكتتابات بس غالباً بتبقى صندوق أو مؤسسة مركزة على منطقة مثلاً شمال إفريقيا والشرق الأوسط أو شمال إفريقيا والخليج هو مركز في المنطقة دي لأنه شايف إن اي طرح في المنقطة دي هو فرصة استثمارية كويسة فهو بيشارك بالصندوق ده أو بيشارك في المؤسسة دي
عمر: أنا كواحد معنديش أي نوع من أنواع الخبرة في البورصة هل أنا لازم أول لما أسمع إن في إكتتاب عام أروح أجري واشترية؟ يعني هل هما مضمونين انهم يطلعوا على طول؟
حازم: لأ هو مش مضمون إنه يطلع على طول لأنه زي ما في أمثلة أو أغلبية الأمثلة في بلد زي مصر مثلاً الإحساس تجاه الطروحات الأولية إيجابي الناس كلها بيبقى عندها احساس ان الطرح الأولاني ده هينزل هيكسب بس ده مش بالضرورة يكون في 100% من الحالات لان في حالات تانية طروحات أولية نزلت ومكسبتش فلأ مش المفروض انك تطلع تجري تشترك في الإكتتاب
المفروض تبص على نشرة الطرح شكلها عامل ازاي ، تسأل حد لو كان ليك علاقة قريبه بشركة سمسرة فتبدأ تتكلم معاه وتفهم الشركة دي بتقيمها ازاي ، الشركة دي بتشتغل في أي مجال ، معدلات النمو بتاعتها شكلها إيه طب تاريخياً هي كانت بتكبر أو بتنمو بمعدلات شكلها عامل ازاي الإدارة بتاعة الشركة دي هل هي فعلاً إدارة جاده ومركزه ولا هما ناس مش مركزين يعني في شوية اسئلة لازم تدور الأول على إجاباتها بالظبط قبل ما تجري تشترك بس يعني الإحساس العام تجاه الطروحات الأولية إنها فرصة استثمار بنسبة كبيرة بتكسب الناس
عمر: طيب لو انا مش عاوز أعمل كل الحاجات دي وانا مستثمر مثلاً داخل صندوق استثمار ، يعني أنا روحت لصندوق استثمار حطيت فلوسي والصندوق ده بيستثمر في مصر ، هل الصندوق ده بيعملي الدراسة على الطرح العام ده؟ ولو شاف انه طرح كويس هل هو بيخش؟ يعني هل الحته دي بتتغطى من مدير الاستثمار بتاعي؟
حازم: أه طبعاً ، بص هو مدير الاستثمار كبني آدم شغلته انه يحقق نسبة ربحية أعلى من الموجودة في السوق ، فهو دوره أو شغلته إنه يدرس كل الفرص المتاحة ليه في السوق اذا كانت شركات طرح أولى أو شركات مدرجة في البورصة بالفعل وبتتداول هو شغلته انه يبقى مركز 120% انه يحقق أعلى نسبة ربح لأن ده دوره وده اللي بيحدد قيمة الصندوق اللي هو بيدوره وده اللي بيحدد شطارته هو كمدير استثمار هو طبعاً بيتغطى كطرح أولي
عمر: كـ سهم جديد نازل زيه زي اي سهم نازل وبيقارنها ما بين الأسهم المطروحه في السوق؟
حازم: بالظبط وهو بيبقى عنده الفريق بتاعه الناس اللي بتشتغل على تحليل نشرة الطرح ده والشركة دي ويشوف التقييم بتاعها هل هو تقييم عادل ولا لأ ، هل السعر فيه مغالاه ولا لأ ، وهو اللي بياخد القرار بناءاً على كل المعطيات اللي بتجيله منه ومن الفريق اللي بيشتغل معاه
عمر: يعني النهاردة أنا لو سمعت عن الطرح العام وسمعت مثلاً صاحبي أو حد أعرفه داخل الطرح العام وانا مش فاهم حاجه عشان ده مثال انا بشوفه على طول في شركة في البورصة المفروض اخش واحط فلوس وانا مش فاهم حاجه ، يعني أنا النهارده برده من الحاجات اللي فهمتها منك اني لو هخش لازم أحاول اعرف أو أدور ورا القصة أو اسئل اسئلة او اتكلم مع حد
حازم: لو الشخص ده هيسأل حد من أصحابه فخليه على الأقل يفهم الإجابات اللي هتجيله عشان ميبقاش كل مره مضطر يمشي ورا قرار حد تاني مقرره ، يعني أنا معنديش مشكلة إن انت في المره الأولانيه لغاية المره التالته ، الخامسه تمشي ورا حد انت شايف انه فاهم في الموضوع وواثق فيه كفاية إنك تمشي وراه في القرار بس اسئل عشان تفهم عشان في المره السادسه يبقى قرارك أنت مش قرار حد تاني فبالتالي يبقى انت أكتسبت خبره مش بس لو الطروحات اللي أنت دخلتها حققت عائد كويس مش بس كسبت فلوس لأ أنت كسبت فهم وخبرة فالموضوع ده اتعلمت تقيمها ازاي بعد كده على الأقل بالمعلومات المبدئية جداً
عمر: ولو مش عاوز بتروح لمدير استثمار
حازم: لو مش عاوز ديماً عندك حل مدير الاستثمار هو راجل فاهم اكتر ، أو دي شغلته هو بيستثمر بالنيابة عنك بأحسن حاجه هو شايفها
عمر: طيب أعتقد كده أنا على قد ما أقدر فهمت الناحيتين منك بطريقة مختلفة يعني انا كان عندي نظرة معينة على الطروحات العامة بس أنا النهاردة عرفت منك حاجات جديدة
حازم: يارب اكون عرفت أفيدك
عمر: يارب برده الناس اللي بتسمعنا تكون قدرت تاخد معلومات جديدة.. تحب نقفل الحلقة النهاردة ازاي ، نختمها ازاي؟
حازم: بص أنا ديماً شايف إن الاستثمار في البورصة من الأفراد للطرحات الأوليه أو للأسهم المدرجة أنا شايف انه في الدنيا كلها هو شيء فيه أقبال كبير جداً أكتر بكتير من المنطقة بتاعتنا فأنا شايف الناس المفروض تبقى مركزة أكتر شوية فإنها تبص على طرق تستثمر بيها فائض دخولها أو ثرواتها بطريقة تكون مبتكرة أكتر شوية أو تفكر بشوية مجهود أكبر فإنها تحقق عوائد احسن من اللي بتعملها
أنا شايف انك تبقى فاهم بورصة أو فاهم استثمار ده جزء من انك تبقى فاهم الدنيا ماشية ازاي عموماً فأنا بدعو الناس كلها انها تبتدي تبذل شوية مجهود أكتر فانها تفهم التفاصيل أو تفهم المواضيع دي بتمشي ازاي عشان الدنيا كلها سابقة في الموضوع ده أوي والناس اللي بتشتغل في الموضوع ده في الدنيا أكتر بكتير من اللي بيشتغل عندنا في المنطقة
وانا شايف انك بتعمل دور كبير في الموضوع ده فإن شاء الله تبقى فرصة كبيرة لناس كتيرة تفهم
عمر: ربنا يخليك يا حازم ، وبرده من الناحية التانية انت لو صاحب شركة أو لو عندك مشروع وبتفكر في يوم من الأيام تكبر وتنزل بورصة أعتقد برده الناحية دي لأن النهاردة في اتجاه واحد الناس النهاردة بتبتدأ مشاريع ناشئة بكميات كبيرة جداً يعني اعتقد تاريخياً عمرنا ما كنا في المستوى ده من المشاريع والافكار الناشة اللي هي ممكن في يوم من الايام توصل انها تبقى موجودة في البورصة
حازم: وخلي بالك برده يا عمر ان دلوقتي في ناس كتير في العالم كله بتيجي المنطقة عندنا يعني موجودة في الإمارات وبقت موجودة في مصر والسعودية ان بقى في الفكرة بتاعة ان انت تخلق كيان محتضن يكون جواه مجموعة من الشركات الناشئة وتبقى مدرجة في السوق
يعني العالم كله بيتكلم على فكرة ان يبقى عندك شركة مدرجة في السوق تملك تحتها مجموعة أفكار لشركات ناشئة فالتوجه ده موجود في الدنيا كلها وابتدى يبقى موجود عندنا في المنطقة فطبعاً ده حل من الحلول اللي هتكون موجودة بقوة
عمر: يعني اعتقد في 2021-2022 انك تبقى رائد أعمال ومتبقاش فاهم ازاي شركتك ممكن تكبر وازاي ممكن تخش بورصة في يوم من الأيام ولو ده مش هدف تمويلي ليك فأعتقد أنت كرائد أعمال محتاج تعمل مجهود في الحته دي برده
حازم: محتاج تعمل مجهود بالظبط وتفهم أكتر إيه حلولك أو أختياراتك اللي أنت ممكن تكون بتفكر فيها وانت ماشي عشان العالم كله بقى بيفكر بنفس الطريقة فمينفعش اننا منبقاش شايفين الحته دي
عمر: شكراً جداً جداً على وقتك معانا النهاردة يا حازم
حازم: شكراً ليك يا عمر وكانت فرصة جميلة ومتشكر جدا
عمر: شكراً على وقتك واشوفكم الإسبوع اللي جاي في حلقة جديدة من كلام ينور
Translation of some words and terms:
IPO - Initial Public Offering الاكتتابات العامة الأولية
Hype الضجيج
Public offering إكتتاب عام
Process معالجة
Capital رأس المال
Family Business شركة عائلية
On-Going مستمرة
In Control تحت السيطرة
Copy مماثل / نسخة
Rules قواعد
Red lines خطوط حمراء
Investment Bank بنك الاستثمار
Lock up غلق / جظر
VC - Venture Capitalist المشروع الرأسمالي
Startups الشركات الناشئة
Developed متطور
Maturity نضج
Exposure تعرض
Disclosure الإفصاح
Private placement الاكتتاب الخاص
Subscribe الإشتراك
Order طلب
Shot لقطة
Accompanied مصحوبة
Marketing Hype الضجيج التسويقي
Marketing Plan خطة التسويق
Attraction جذب
Dedicated Funds صناديق مخصصة
IPO fund صندوق الاكتتاب
Usually عادة
Positive إيجابي
Ranking تصنيف
Team فريق
Incubator حاضنة
Option خيار
Go Forward المضي قدما
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي#الاكتتابات_العامة