186. الحلبي: أشهر هريسة في مصر! (قصة نجاح شركة عائلية) - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
في حلقة النهارده، بنتكلم عن واحد من أنجح الأمثلة للفاميلي بيزنس في مصر، هريسة الحلبي اللي امتدت جذورها من سوريا إلى إسكندرية وحافظت على مكانتها لأكثر من قرن. معانا النهارده أ/ يحيى الحلبي المدير التنفيذي للحلبي، اللي هيحكلنا على مدار 3 حلقات قصة نجاح شركة عائلية ممتدة، مراحل تطور المشروع، وأهم الدروس المستفادة من تحويل محل صغير في محطة الرمل إلى مؤسسة كبيرة
:عن الضيف
أ/ يحيى الحلبي هو المدير التنفيذي لحلويات الحلبي، يحي اشتغل محاضر ومعيد في الأكاديمية العربية للعلوم والتكنولوجيا والنقل البحري لمدة 11 سنة قبل انتقاله إلى العمل في مجال الحلويات وإدارة الأعمال
https://www.linkedin.com/in/yahia-el-halaby-24204b9a :تقدروا تتابعوا يحيى من هنا
:هريسة الحلبي
:في الجزء الأول
تأسيس هريسة الحلبي سنة 1909 محل صغير في محطة الرمل، اسكندرية
توسيع نطاق العمل ليشمل تصنيع الهريسة بالكامل
إضافة منتجات جديدة مثل المكسرات والقشطة
توسع الفروع داخل الإسكندرية وخارجها وصولاً للساحل ودمنهور
قرار بتحويل الشركة إلى شركة مساهمة لضمان استمرارية العمل
استثمار الجيل الرابع في بناء مصنع حديث مجهز بأحدث التقنيات
تحسين الجودة وزيادة الإنتاج مع الحفاظ على الطعم التقليدي للهريسة
صعوبات تغيير ثقافة العمل القديمة، خصوصًا مع الموظفين الجدد
التغلب على التحديات بفضل الالتزام والتعاون بين أفراد العائلة
التخطيط للتصدير واستهداف الأسواق العالمية
ده كان الجزء الأول من حكاية هريسة الحلبي، رحلة نجاح عائلية استمرت لأكتر من 100 سنة. استنونا الأسبوع الجاي في الجزء الثاني من القصة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلا بيكم في حلقة جديدة من بودكاست كلام ينور
النهارده هنتكلم على موضوع فاميلي بزنيس أو المشاريع التجارية اللي هي بتمتد عبر سنين طويلة في عيلة واحدة بتبقى هي اللي مؤسسة البزنس في ماركات كتيرة عالمية من الناس مثلا ممكن ما تعرفهاش مثلا زي الشوكولاتة مارس وكذا حاجة كده كانت ابتدت كفاميلي بيزنس وبعدين يتحولوا لشركات بيبقى فيهم نوع من أنواع الشغل المؤسسي بعد فترة وممكن بعد كده يدخلوا مستثمرين، إحنا النهارده هنتكلم مع حد ماشي في المرحلة دي اسم من الأسامي الكبيرة جدا في إسكندرية في سوق الحلويات احنا بنحبهم من إحنا صغيرين وهو فاميلي بزنيس بتاع العيلة أفراد العيلة هي اللي بتدير البزنس من ساعة ما أنشأ، معايا النهارده المدير التنفيذي للمشروع أو للحاجة اللي معانا النهارده هي حاجة حلوة احنا بنحبها زي ما قلنا أنا شخصيا بستهلكها من وأنا طفل معانا أستاذ يحيى الحلبي هو المدير التنفيذي لهريسة الحلبي عايز أرحب بيك الأول يا حلبي
يحيى: إزيك يا عمر، عمل إيه، إيه الأخبار
عمر: الحمد لله وشكرا جدا على وقتك اللي أنت معانا النهارده
يحيى: ده أنا شكرا ليك إن أنا معاك، ربنا يخليك
عمر: النهارده أنا عايز أتكلم معاك كده للناس اللي بتسمعنا عندهم فاميلي بزنس يعني مثلا أنت البزنس بتاعك موجود في مصر وهنلاقي إن فيه حاجات كتير جدا مشاريع بتبقى مع العيلة وبتتورث من جيل لجيل عايز أتكلم على التاريخ بتاعك، عملت إيه، بتعمل إيه النهاردة، انتو مين، رايحين فين في المستقبل حنحاول نغطي الحاجات دي النهارده في الحلقة بحيث اللي بيسمعنا وعنده نفس الحاجة وبيمر بنفس التجربة يبقى الموضوع بالنسبة له مفيد إن هو يشوف مثال بيتنفذ على الأرض يعني
فكلمنا الأول أنت مين، بتعمل إيه، إيه هي هريسة الحلبي، إيه الهريسة أصلا، ابتديت فين، كلمنا كده أنت مين؟
يحيى: طيب بص هنبدأ الأول هي البزنس بدء رسمياً في مصر Since منذ 1909 كان جد بابايا اللي هو الحاج حسن الحلبي، الحاج حسن الحلبي ده كان جاي من سوريا ممكن أبقى أبعتلك مثلا صورة الباسبور بتاعه حكومة خديوية جليلة ومكتوب إن هو حلواني فهو رسمياً كان 1909 لما أخد أول فرع في محطة الرمل يعني حتى الرخصة بتاعتنا هي 1 ميدان سعد زغلول محطة الرمل المحل الصغير وبدأ البزنس، بدء هريسة طبعا اللي أنا دماغي مش عارف أطلعها من جوه الهريسة لحد دلوقتي، الهريسة هي عبارة عن عجينة ليها علاقة بالسميط يعني مش بالدقيق بالسيمولينا يعني زي ما بيقولوا في حتت تانية هي إحنا بنعملها بطريقة مختلفة تماما عن أي حد في اسكندرية وعن أي حد في مصر وإحنا أول ناس دخلناها مصر وبعدين الراجل الطيب ده بدأ البزنس كان عنده المحل الواحد ده سلمه بعد كده لابنه اللي هو جدي اللي هو الحاج عبد السلام الحلبي الكبير، الحاج عبد السلام الحلبي الكبير فضل في نفس البزنس اللي أقدر يعمله إن هو مثلا أخد مكان يصنع فيه في الأول كان بيروح يصنع عند حد، جد والدي ده كان بيروح يصنع عند حد، جدي التطور اللي عمله إن هو قدر يعجن في حتة وبعد كده يسوي في حتة تانية والكلام ده برضو كان جنب محطة الرمل المرحلة التالتة بقى اللي هي كان فيها توسع شوية اللي هي مرحلة والدي وعمامي اللي هما بدأوا إن هما ياخدوا مكان فيه تصنيع كامل للهريسة كل ده أنا لسه ما دخلتش في أي نوع من أنواع الحلويات الشرقية التانية، أنا بتكلم في هريسة بس الكلام ده من 1909 لحد 2010 طبعا بقى والدي وعمامي قدروا يدخلوا اللي هو الحاج عبد السلام والدي اللي هو حاليا رئيس مجلس الإدارة وعمامي اللي هما في مجلس الإدارة يعني بتاع الشركة قدروا إن هما ياخدوا مكان يصنعوا فيه هريسة وبدأت بقى إضافات يلا بينا نحط مثلا على الهريسة شوية مكسرات طب خلينا نحط شوية قشطة يعني نكسر شوية السكر الزياد اللي في الهريسة بتاعتنا هنحط شوية قشطة
بدأ بدل ما فيه فرع بقى إتنين وتلاتة أنا بتكلم برضو التاريخ من 1909 لحد 2010 أو 2009 بقى بدأ يبقى عندنا مكان تصنيع مهندم عن ما كان في الأول بدأ يبقى عندنا فرعين تلاتة أنا بدأت أستلم البزنس أنا وولاد عمي في 2009 2010 من هنا بدأ يبقى فيه انتشار في الفروع جوا إسكندرية وبقى عندنا 8 فروع جوه اسكندرية، مكانين تانيين في الساحل ومكان في دمنهور وإحنا برضه لسه مركزين في الحتة بتاعتنا بس يعني قدرنا نعمل تشبع إن إحنا كان المكان مفيش حد بيئي عايز الحلبي غير إن هو يروح محطة الرمل ده نبذة سعرية يعني بس يعني ممكن نبقى نخش في تفاصيل
عمر: طيب للناس اللي مش من اسكندرية محطة الرمل دي هي تقريبا الوسط البلد بتاع اسكندرية صح يعني ده وسط البلد القديم بتاع اسكندرية
يحيى: بالظبط يعني هي كانت الفسحة بتاعة النية الزمان الناس يقول لك أنا رايح آكل مثلا فول وفلافل من عند محمد أحمد وهحلي بعد كده في الحلبي، يعني كلمة دي الزباين القديمة بتاعتنا وخاصة اللي في مصر او بره مصر هو إحنا كنا دايما بنجي لكوا في الستينات أو السبعينات ناكل كذا وبعد كده نجيلكم وكان بناخد الطبق بخمسة ساغ يعني الكلمة دي برضو كانت بتتعلق معايا
عمر: فأنت ابتديت في محطة الرمل وابتديت تتوسع زي ما قلت في في إسكندرية وفي الساحل وفي دمنهور
يحيى: مظبوط
عمر: طيب أنت بقى شخصيا يحيى إيه الخلفية بتاعتك، يعني إنت عملت إيه درست إيه
يحيى: أنا درست مالية واشتغلت بروكر في البورصة لمدة سنة ويعني الحمد لله إن أنا كان عندي الاقتناع إن أنا ما أقدرش أكمل في الشغل ده يعني أنا قعدت سنة في في شركة معروفة يعني في الصناعة دي لمدة سنة وبعد كده درست في الجامعة لمدة 11 سنة ودرست مالية درست تمويل، ويعني مريت بحاجات كتير يعني خلصت ماجستير ويعني كنت على وشك اني اخلص دكتوراه بس كان ساعتها أخدت قرار إن أنا لازم أتوجه للفاميلي بزنس خلاص
عمر: لأ يعني أنت عندك أكاديمي تمويل واستثمار وأفرغ بقى التام يعني أنت وأنت بتدرس كنت برضو بتشتغل في الحلبي
يحيى: أه جالي وقت كنت بشتغل في الحلبي وفي المكان اللي أنا بدرس فيه في الجامعة اللي أنا كنت بدرس فيها وخلصت الماجستير وخلاص كنت على وشك أخلص دكتورة بس حصل إن كان لازم أختار خلاص يعني يا إما أكمل في البزنس ويكبر وإني أحط كل مجهودي ومجهود الشباب ولاد عمي واخواتي في الموضوع ده و ونكبره واللي كان يستاهل انه يتاخد القرار ده أو إن أنا أفضل بقى رجل جامعي اللي هو حاجه كويسة برضه يعني مكانش اختيار سيئ بالعكس كان اختيار جميل يعني وكل حاجة ومريح بس أنا كنت شايف إن فيه فرصة في الفاميلي بزنيس ان هو يكبر عن الحجم اللي هو فيه
عمر: هو ده بالظبط اللي أنا كنت أسألك يعني هل التفرغ برضو، للناس اللي بتسمعنا هل التفرغ لمشروع عائلي بيوديه في حتة تانية يعني وقتك لما بتحطه بالكامل فرق مع الموضوع
يحيى: أه طبعا، المجهود اللي انت بتحطه هنا بتبدأ.. بص يا عمر هي إن أنت بتبدأ تغير الشركة من شركة أفراد لمؤسسة ودي كانت خطوة مهمة جدا ان إحنا قلبنا الشركة لشركة مساهمة وهنا دي كانت خطوة مهمة جدا بالنسبة للشركة بقيت بتعامل مع البزنس ده ككيان لوحده والمساهمين دول كيان يبقى اللي بيدير ده ملوش علاقة تماما بصاحب النصيب
عمر: مساهم يعني خلينا نبسط الموضوع، أنت عندك مساهمين اللي هما أفراد العيلة قلبتهم مساهمين
يحيى: أه خلاص هما بقوا مساهمين وفي منهم من يُدير وفي منهم من هو في مجلس الإدارة و وأقدرنا خطوة بخطوة إن إحنا هيبقى فيه مجلس تنفيذي بيتحاسب من مجلس الإدارة ده على النتائج بتاعة الشغل بتاعة السنة الكلام ده ما كانش موجود وده أنا كنت شايفه يعني أنا كنت قريت يعني شوية كده في الفاميلي بزنيس والكلام ده إن استمراريتها كهيكل أفرد مش هيكل مؤسسي يعني بيقطع تماما يمكن في تالت جيل يعني إن دايما أول جيل مفيهوش مشكلة تاني جيل ممكن ما يكونش فيه مشكلة تالت مشكلة بتظهر المشاكل على طول في الفاميلي بزنيس فكان لازم إن الشركة تتقلب لشركة مساهمة يبقى البزنس ده كيان مستمر يعني حتى التقييم بتاع البزنس نفسه اختلف بعد كده
عمر: أه تقييم البزنس يعني، سعر الشركة نفسها أو المصنع نفسه
يحيى: التقييم بتاع الاسم نفسه حط التقييم بتاع الأصول التقييم يعني إن أنت تعملها تسجيل انها من ضمن الشركات المساهمة بيديك ميزة في حاجات كتير جدا يعني لما بتيجي تتعامل حتى مع حد واحد بيصدر، جهات حكومية لما بتتعمل كشركة مساهمة أفضل بكتير
عمر: حلو قوي، وده محصلش غير لما أنت برضو تفرغت وبقى فيه النية من المجموعة بالكامل اللي أنتوا تبتدوا تغيروا الموضوع ده
يحيى: الجيل التالت سنة 2010 2011 هو اللي قرر إن هو يعمل كده
عمر: تمام
يحيى: إحنا كنا وقتها بنساعدهم في إدارة البزنس بس مش أكتر
عمر: فأنت الجيل الرابع، فالجيل التالت اللي هو والدك وعمامك اخدوا القرار إن هما غيروا للمؤسسة
يحيى: مظبوط غيروها من شركات أفراد لشركة مساهمة ومن هنا كان بصراحة بالنسبة لنا كلنا إحنا كجيل بقى رابع جديد طالع إن إحنا نكمل يعني كان بقى فيه كذا حد بدأ يتفرغ للموضوع مش أنا بس إن بقى البزنس يعني يستاهل وقت
عمر: تحط فيه وقت
يحيى: يلا بينا كلنا نتكاتف إن إحنا نكمل المسيرة دي
عمر: طيب أنا عارف عشان إحنا برضو نعرف إحنا قريبين بعض أنت عملت تغير كبير أو الجيل هنقول ممكن الجيل الرابع ساهم في الموضوع ده إن إنت عملت مثلا مصنع جديد مصنع أو طورت ده بقى حاجة مش 2010 ده مثلا نقول إيه 2020 2021 ابتديت في الموضوع
يحيى: اه
عمر: طيب كلمني بقى على إن أنت تحاول خلاص أنت حولت الشركة دلوقتي أنت عايز تحول طريقة الإنتاج
يحيى: بص اول حاجة يا عمر إحنا كنا بدأنا في حته نسيت أقولها إن إحنا من بداية من 2010 بدأنا ندخل منتجات جديدة مابقيناش هريسة بس فبقى عندنا مخبوزات بقى عندنا مثلا حلويات غربية بقينا نعمل كحك والحاجات دي كلها المهم من النقطة دي بدأ المكان يصغر علينا في الإنتاج في الأماكن اللي إحنا كنا واخدينها لان زمان كان نظام ورش وبصراحة هو كان فيه ميزة رهيبة عندنا في العيلة ويعني أنا مبسوط إن أنا حقول الكلام ده إن إحنا كعيلة يعني الجيل الرابع كله تقريبا دخل ابتدى إن هو يا ابني انت عايز تشتغل معايا اه تعالى أنضف الأرض تعالى أغسل الصواني وأنا ولد صغير عندي 10 11 سنه لا تعالي اغسل ونضف عشان تبدأ تعرف كل خطوة في الإنتاج عشان يوم من الأيام لما تطلع الهريسة دي يبقى أنت بتطلع حاجة ترضي ربنا وأنت راضي عنها 100% فده كان مخلينا نتعمق أكتر في موضوع الإنتاج يعني إحنا بنركز على الإنتاج قوي كعيلة يعني
عمر: مصنعين
يحيى: جدا يعني وحتى هذه اللحظة يعني عادي جدا يحصل حاجة عادي تعالى يحيى تعالى يا حمزة تعالى يا أحمد أي حد من العيلة تعالى يلا نحل مشكلة التصنيع اللي إحنا فيها دي بوجود مدير إنتاج وكل حاجة بس يمكن عشان المعرفة بتاعة التصنيع بتاع الحلويات موجودة فينا فمن هنا بدأنا نكبر منتجات، ومكان الإنتاج صغر علينا شوية فقدرنا الحمد لله جبنا أرض في منطقة صناعية في إسكندرية برضو بس بصراحة الموقع بتاعها كان كويس جدا للتوزيع كان أهم حاجة بالنسبة لنا ناخد موقع اقدر اطلع منه على القاهرة أقدر أطلع منه ع الساحل أقدر أطلع منه مثلا على الخط الزراعي أقدر أطلع منه إن هو قريب جدا من الميناء إن إحنا لو في يوم من الأيام اتجهنا وده من ضمن يعني الأفكار بتاعتنا إن إحنا نبدأ نصدر والكلام ده كله إن أنا يبقى عندي مكان قريب من المينا أقدر أبعت الهريسة بتاعتي أو البضاعة بتاعتي تتباع فكان اختيار اللوكيشن مهم جدا ومن هنا برضو ده يعتبر استلام الجيل الرابع بقى 100% زي ما إحنا بنقول الكلام ده في 2017 2018 لما بدأنا جبنا استشاري قوي جدا جدا جدا متخصص في بناء مستشفيات ومصانع ومخازن هو اللي كان هيبني يعني هو الاستشاري اللي رسم المشروع وجبنا مقاولين ليهم علاقة بصناعة الأغذية يعني الأغذية والتصنيع الغذائي والكلام ده كله فطلعنا مصنع يعني الحمد لله يعني بتفاصيل وإن إحنا قدرنا نفصل كل قسم عن التاني بدل ما كان كله شغال مع بعضه لأ كل قسم لوحدة أه مش قادرين نستغل إن حجم المساحة اللي إحنا واخدينها كبيرة جدا علينا حالياً لكن قادرين إن إحنا نطلع ثبات عن ما كان بنقدر نطلع منتج ثابت اللي أنا بنتجه النهاردة زي اللي أنا أنتجته من سنة زي اللي أنا هنتجه كمان سنة معنديش مشاكل كتير فيه فاهم قصدي
عمر: فاهم طب من ناحية الجودة أو من ناحية النمو يبقى إن أنت مثلا كان المصنع الأول بيطلع كيلو المصنع الجديد بيطلع 50 كيلو صح يعني هل أنت برضو كنت واعي للحتة دي
يحيى: أه أه كنا حاطين دي في الخطة بتاعتنا وكان لازم ساعتها عمر نبدأ ندخل أقسام جديدة ما كانتش موجودة يعني كان زمان أنا بشوف الجودة بتاعة الهريسة بإيدي وخلاص شكرا أنا فهمت لكن بدأنا يبقى في كذا نوع من أنواع
عمر: مراقبة الجودة
يحيى: لا غير مراقبة هي المراقبة يعني بص بص يا عمر هي المشكلة الرئيسية عندي ما كانتش إن أنا أعمل أقسام جديدة زي مراقبة الجودة و ضمان الجودة والكلام ده كله لكن كانت النقطة إن كان فيه حرب بقى جوه المصنع عندي إن كل الأقسام عايزة هي اللي تسيطر على المصنع إن هو إحنا كنا شغالين ورش فالورشة دي مثلا اللي بيديرها فلان الفلاني فهو يعني موته وسمه إن فلان هو اللي يدير البزنس عنه أو يديرالحتة دي عنه فكانت إن أنت تبني هيكل تنظيمي وإن إحنا نبدأ نعمل استشارات ودي نقطة مهمة جدا جدا جدا محدش في الفاميلي بزنيس يعني إن دي نقطة مهمه جداً بصراحة الناس بتسترخص يعني معنى إيه ما هي ماشية وإحنا هنعرف ندورها لأ ماشية وإحنا هنعرف ندورها دي لحد حتة معينة لو انت عايز تفضل عندها خلاص لكن لو أنت عايز تبدأ تتحرك فأنت محتاج تأخذ استشارة من حد عنده المعلومة دي ودي حاجة مبتحصلش كتير في مصر أو حتى في الدول العربية في الفاميلي بزنس هو طب ما أنا عارف أعمل الهريسة ما أنا عارف أعمل الحلويات الشرقية يبقى أنا مش محتاج أجيب استشاري يوجهني مثلا إزاي يبقى عندي نموذج مالي معين في تمويل محل مثلا الكلام ده مبقاش موجود يعني ما خلاص ما طب ما هو فلوسها موجودة يلا للمحل ده مثلا بقد كده بكام مليون يلا أنا الفلوس معايا حدفعها فطب لا أنت ممكن أنت كنت تحافظ على قيمة الفلوس اللي عندك وفي نفس الوقت تمول الأصل ده بطريقة تانية فكان لازم يبقى فيه نوع من أنواع الاستشارة تبدأ تستشير حد في التمويل حد في الإنتاج حد في شئون العاملين إحنا ما كانش عندنا شئون عاملين يا عمر وقدرنا برضو نعمل كويسة إن هيبقى فيه كان عادي جدا إن موظف يعدي ويروح لأي حد أنا عايز أتكلم في أي حاجة كده يا ابني أنت مش رايح صح لإن أنت تبني هيكل وظيفي وتعمل زي ما بيقولوا إيه حوكمة ويعني أنا كنت محظوظ بصراحة إن وأنا بقدم استقالة من الكلية كان رئيس القسم بتاعي كان عامل كتاب في حوكمة الشركات العائلية وفاهم وأنا ماشي يعني آخر يوم لي كده أنا خلاص بسيب الكلية باي باي يا جماعة ناديني وقالي تعالي خد الكتاب ده وفعلا يعني كان ليه يعني أثر كبير جدا عليا وفي البزنس نفسه
عمر: ده موضوع هائل لإن برضو ده يرجع اللي أنت بس مش غيرته ورقك أنت بتغير الثقافة العامة بتاع الشركة إن هي وجود موارد بشرية أو وجود مراقبة جودة أو وجود الأقسام المختلفة بتاعت يعني الجودة أو شئون العاملين الكلام ده كله أنت بتخلي الناس هنا ثقافتها تتغير
يحيى: مظبوط
عمر: وبتخلي ناس ما اشتغلتش في مؤسسات قبل كده لإن أنت الناس بتوعك أعتقد فيه ناس شغالة معاك بقالها سنين صح يعني هل فيه ناس شغ شغالة معاك مثلا من الجيل التالت أو الجيل التاني
يحيى: أه كتير من الجيل التالت أه موجود كتير جدا يعني وبقينا يعني فيه واحد لسه يعني كبر خلاص طلع 70 سنة شغال معايا 42 سنة يعني حتى وأنا معاك من كام يوم كلمني بيقول لي مبروك على الأيزو يعني فاهم هو من حبه بقى في الشركة فاهم هو شايف أي حاجة بتكبر وشايف
عمر: فأنت عشان تغير الناس اللي عندها 20 30 40 سنة خبرة شغالين معاك عشان تغير الثقافة بتاعتها في العمل برضو ده موضوع مهم
يحيى: طبعا بس أنا عايز أقولك حاجة التحدي يا عمر ما كانش في تغيير الناس القديمة ودي كانت حاجة غريبة جدا بالنسبة لي اللي كان بقاله معايا 5 6 سنين هو ده اللي تعب معايا أكتر ليه لأن تقريبا والله اللي كان عندهم وقتها 55 سنة و60 سنة خلاص فاضل له 5 6 سنين و 10سنين ويطلع معاش كان متمسك بالبزنس جدا ومؤمن إن اه دي خطوة صح، أنا كانت مشكلتي ودي أنا واجهتها أول مثلا ما بدأت أعمل إنتاج في المصنع الجديد اللي بقاله معايا 5 6 سنين اللي مثلا من 2015 2016 وتعود على طريقة معينة وفجأة في 2021 أنا بنتج من مصنع وباتشات معينة ويعني ومثلا تحاليل عامة للحاجة على طول ودخل في ودخل في ميكروبيولوجي كيميكال لاب والكلام ده كله هو مش متعود ع الكلام ده فالصغير هو اللي هرب مني ما استحملش إن هو كان عايز يرجع للعشوائية اللي كانت موجودة وهي مش عشوائية غلط برضو عشان يعني إيه ما يتفهمش كلامي غلط هو الوقت ده الحقبة دي كانت لازم تبقى كده فاهم قصدي لكن كان في خطوات تانية كانت لازم تتاخد يعني أنا عمري مالومت الجيل اللي فات على حاجة زي كده بالعكس أنا بقول أنا عايش في خيرهم لحد دلوقتي
عمر: لأ وأنا أنا كمستهلك يعني إحنا بناكل بناكل هريسة من واحنا صغيرين يعني من 20 سنة أكثر من 20 سنة احنا بناكلها، أكتر من 20 سنة أكيد طول عمرها بنفس الطعم طول عمرها بنفس الجودة ما حسيتش إن هي فيها تغير أنا هنا خلي بالك أنت ممكن بالطريقة القديمة أنت بتشتغل على كمية معينة لكن النهارده لما بتعمل مصنع أنت عايز تعمل ال20 و30 و40 ضعف مثلا الإنتاج
يحيى: مظبوط
عمر: فعشان أنت تكبر أنت محتاج بقى تنظم كل حاجة بطريقة معينة عشان لما العدد منك يزيد جامد الجودة ما تنزلش
يحيى: مظبوط وهو ده التحدي اللي أنا بقولك عليه إن الكبار في السن اللي كانوا شغالين مكنش عندهم اعتراض احنا معاكم إحنا شفنا بقي كلها إن في منهم شاف الجيل الثاني بس ما اشتغلش معاه اشتغل مع الجيل التالت شاف الجيل التاني وهو في نهايته فدول بالعكس هو بالنسبة لهم إن أنا بحقق حاجة يعني بالنسباله فاهم أنا كنت شغال في الحلبي ده دلوقتي الحلبي عنده أيزو مثلا
شكراً جداً على وقتكم معانا النهاردة ده كان الجزء الأول وإن شاء الله نشوفكم الأسبوع الجاي
Translation of some words and terms:
Family Business: شغل عائلي
Officially: رسميًا
Saturation: تشبع
Finance: تمويل وإدارة مالية
Well-known corporation: شركة معروفة
Industry: صناعة أو مجال
Proceed: يكمل أو يتابع
Potential: إمكانية أو فرصة
Step: خطوة
Entity: كيان
Shareholders: مساهمين
Stake: حصة أو نصيب
Results: نتائج
Valuation: تقييم
Assets: أصول
Edge: ميزة أو تفوق
Point: نقطة
Production oriented: مركز على الإنتاج
Location: موقع
Food industry: صناعة الأكل أو الأغذية
Scalability: قابلية التوسع
Quality Assurance: ضمان الجودة
Quality Control: مراقبة الجودة
Hierarchy: هيكل تنظيمي أو تدرج وظيفي
Critical: حرج أو مهم جدًا
Financial Model: نموذج مالي
HR: الموارد البشرية (Human Resources)
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي#الحلبي #شركة_عائلية #الجزء_الأول