185. الدليل الشامل لاختيار السمسار المناسب
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
اتكلمنا قبل كده عن شركات السمسرة وعملنا حلقة قريب عن المحافظ الافتراضية وازاي تعمل محاكاة لسوق الأسهم عشان تجرب وتتعلم أساسيات التداول، ولكن بعد مرحلة المحاكاة بتلاقي إنك محتاج تختار سمسار يناسب احتياجاتك وطريقة استثمارك
حلقة النهاردة هي دي دليل شامل لاختيار السمسار المناسب ليك، بنتكلم عن أهم 10 نقاط لازم تراعيها في اختيار السمسار المناسب ليك بداية من أهدافك الاستثمارية، للتكاليف، وكمان الأدوات و الخدمات اللي بيقدمها السمسار
بنفكرك بمبادرة (كلم عمر) تقدر دلوقتي تحجز مكالمة مجانية مع عمر
www.kalamyenawar.com/callomar املأ نموذج الحجز واكتب الهدف من المكالمة من الرابط ده
:في هذه الحلقة
[02:11] أهمية المحاكاة في فهم الاستثمار
[02:55] ازاى تحدد هدفك الاستثماري وتختار السمسار بناءً عليه
[03:43] أنواع للسماسرة
[06:56] الرسوم والعمولات
[08:33] الحد الأدنى لفتح الحساب
[09:00] الأدوات والمزايا اللي بيقدمها السمسار
[09:46] الأبحاث والتحليلات
[10:31] خدمة العملاء
[11:08] قوانين الأمان وترخيص السمسار
[13:04] المصادر التعليمية
[14:00] الخدمات الإضافية
لو عندك أي أسئلة أو استفسار أو حابب تشاركنا تجربتك مع شركات السمسرة ابعتلنا على صفحتنا على السوشيال ميديا و استنونا الأسبوع الجاي
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلا بيكم في حلقة جديدة من بودكاست كلام ينور
كنا من اسبوعين كده نزلنا حلقة لو حد عايز يتكلم معايا، وبصراحة يعني حابب أشارك الفيدباك بتاع الموضوع معاكم يعني الناس كانت بتحجز مكالمات والإقبال الحمد لله كان لطيف المستمعين معظمهم بيسمعونا من فترة طويلة عجبتني جدا طريقة الأسئلة يعني الناس بتبقى جاية كاتبة الأسئلة بتاعتها قبل المكالمة عشان بس نحاول نجهز ونستغل الوقت بشكل أحسن يعني
فاجئتني جودة الأسئلة بصراحة، سعيد جدا حاجة تفرحني إن مستوى الناس اللى بيسمعونا مع الوقت اتحسن وأعلى من اللي أنا كنت متوقعة بصراحة فدي أول حاجة
المكالمة لسه ما زالت مفتوحة لو حد حابب يكلم يقدر يخش على الويب سايت و احنا هنسيب برضو لينك في الشو نوتس بتاعة حلقة النهارده إزاي ممكن تكلمنا زي ما قلنا إحنا ممكن نسبها مفتوحة فترة وبعدين يعني على حسب الوضع ماشي إزاي يعني هنفتحه ونقفلها كل شوية
برضو كان في حلقة جالي عليها فيدباك لطيف حلقة محاكاة سوق الأسهم، ناس كتير بتبعت لي على الحلقة دي إن هما أول مرة مثلا يجربوا فسعيد إن هي عملت رد فعل وسعيد إن الناس ابتدت تستثمر لو هي قلقانه أو مش عارفة تعمل ايه والكلام ده كله
(02:11)
حلقة النهارده هتبقى تكملة ليها شوية أو يعني المفروض لو أنا بعمل محاكاة للأسهم معناه أن انا غالبا عمري ما اشتريت أسهم قبل كده أو بحاول أمرن نفسي فيمكن على مدار حلقات كتير قبل كده اتكلمنا على موضوع السمسرة إزاي تختار أنا بس عايز اجمع النهاردة الخطوة بقى اللي انت هتعملها المفروض يعني بعد ما تعمل محاكاة لفترة معينة تحس إن أنت عرفت أنت بتعمل إيه أو جربت طريقة الاستثمار دي اللي هي جديدة عليك ازاي تحط اوردر ازاى تشوف في السوق الأسعار إزاي بتتحرك خلال اليوم بيتنفذ ولا لأ الكلام ده كله زي ما قلنا إن الناس مسمعتش الحلقة دي ممكن ترجع الحلقة بتاعت المحاكاة بتاعت سوق الأسهم
(02:55)
النهارده بقى خلاص أنا بحاول أعمل إيه من الحلقة دي بحاول أقول لك لما تدور على سمسار إن ده سؤال دايما موجود أو بيجيلي عبر السنين كمان أفتح مع مين، مين أحسن سمسار الكلام ده كله دائما أنا بقول مفيش نصيحة واحدة ممكن واحد يبقى عنده استخدام معين يعني مثلا ليه الناس بتبنك مع بنوك مختلفة مثلا فيه واحد مثلا بيستخدم الأونلاين بانكنج أكتر فبيحب البنك ده عشان الأونلاين بتاعه، فيه واحد بيعمل تحويلات كتير فمش عايز مثلا مصاريف تحويل كبيرة فأنا بتكلم هنا عن البنوك العادية يعني مش السماسرة
منتج وكل بنك بيقدم حاجة معينة واحد خد قرض بسعر كويس ففتح مع البنك ده أيا كانت أسبابك نفس الكلام ده هنطبقه على السماسرة أو الوسيط المالي بتاعك اللي هو بينفذلك الأسهم وينفذلك طريقة الاستثمار بتاعتك
(03:43)
طيب حنبتدي كدا نقول مثلا 9 10 نقط هنتكلم عليهم أول نقطة منهم إني لازم أفهم الإستراتيجي بتاعتي أنا عايز إيه، أنا عايز أعمل إيه من خلال السمسار ده يعني إيه الهدف اللي أنا عايز أحققه هل أنا هنا هتداول يومي هل أنا مستثمر طويل المدى؟ هل أنا هتداول في حاجة معقدة زي الأوبشن والفيوتشر؟ هل أنا عايز صناديق المتداولة؟ هل أنا عايز كريبتو؟ هل أنا عايز فوركس؟ أيا كان فئة الأصول اللي انت هتشتغله من السمسار ده يبقى أنا قبل ما أروح للسمسار وقبل ما أدور لازم أحدد الأهداف بتاعتي يعني أنا المحفظة دي غالبا محفظة استثمار طويل الأجل مع إن أنا عايز أشتري صناديق متداولة مع إن أنا مثلا عايز أشتري أسهم كمثال يعني فأنا كتبت الحاجات اللي أنا عايزها يبقى أول حاجة أحدد أهدافي اللي أنا هأعملها
(04:35)
بعد ما حددت أهدافي هقيم الخبرة بتاعتي يعني فيه منصات أو فيه سماسرة معمولين للناس اللي لسه بتبتدى وفيه حاجات تانية للمتقدمين فأنا عارف نفسي أنا بسمع نفسي أهو أول مرة بشوف نفسي إن أنا هشتغل الكلام ده فأنا لسه مبتدأ فخلاص كتبت إن أنا مثلا عايز أستثمر على المدى البعيد، عايز أستثمر في الأسهم، في صناديق المتداولة وأنا مبتدئ حاجات بسيطة جدا
(05:05)
لما أنا حددت كده هنقل على الخطوة التانية هشوف بقى انواع السماسرة الموجودة، في سماسره بتديك خدمة كاملة، بيديك أبحاث بيديك تحليلات، بيديك نصايح لنفسك بيعمل تداول بطريقة متقدمة، حاجات كتير جدا على المنصة دي وأنا من الهدف اللي هو النقطة اللي قبليها اللي هي أنا حددت إن أنا مثلا مستثمر محترف فأنا عايز الراجل ده واحد تاني لأ فيه حاجة اسمها سماسرة أونلاين أو سمسار بعمولة مخفضة الناس اللي هي مش هتشتغل كتير، الناس اللي هي عايزة تدفع عمولة قليلة الكلام ده كله فده نوع تاني من السمسرة
يبقى أنا لو أنا بدور أنا بعد ما حددت أهدافي هدور على أنواع السماسرة هلاقي نوعين واحد أونلاين بينفذ وخلاص مبكلمش حد ما كل أونلاين مش عايز أتعامل مع حد، واحد تاني لا عايز خدمة كاملة عايز موظف حسابات، عايز أبحاث، عايز تحليلات، يديني توصيات الكلام ده كله
طبعا في الحالة الاولانية السمسار اللي بيديك خدمات متكاملة ده بيبقى غالي تكلفة التنفيذ بتاعه بيبقى غالي السمسار بعمولة منخفضة التكلفة بتاعه واطي والويب سايت بيبقى شكله لطيف سهل ومعاه شوية مثلا حاجات إمكانيات كدا للمبتدئين إن هي يعني تتعلم منها
فأنا هنا حددت هدفي الأول عرفت أنا مين وعرفت أنا عايز إيه وبعدين دورت السماسرة قسمتهم نوعين وعرفت أنا المفروض عايز منهم أنهي واحد
أنا ممكن على فكرة أكون مستثمر محترف بس أنا هعمل محفظة لخطة للتقاعد المستقبلي بتاعي ومش عايز أعمل فيها أي حاجة فهشتري من سمسار منخفض العمولة فخلاص يعني قصدي إنت تاني هتشوف أنت عايز إيه، واحد تاني عايز يتداول يومياً فعايز واحد محترف قوي يشتغل معاه ويساعده والكلام ده كله خلاص يبقى كده أول نقطتين إحنا عدينا بيهم أنا والسمسارة بتاعتي الموجودة في السوق
(06:56)
تالت نقطة لازم أبص عليها اللي هي نظام الرسوم والعمولات، الرسوم والعمولات هنا مش بس العمولة اللي أنا بدفعها يعني أنا طبعا لازم أعرف العمولة اللي أنا هدفعها لكل عملية تداول عدد مرات التداول لو التداول عليت ساعات العمولة تقل كل الكلام ده لازم أفهمه أو أبص عليه بص مش لازم يعني أفهمه قوي بس لازم أبص عليه بصة في سماسرة بتقول لك لأ نفذ بدولار أي تنفيذه بدولار واحد أيا كان حجمها فيه واحد يقول لك كذا نقطة في الألف أنا عرفت نظام الرسوم والعمولات بس المهم بقى كمان إن أنا لازم على حاجة اسمها الرسوم المخفية أو اللي هي ممكن ما تبقاش أنت واخد بالك منها اللي هو رسوم الحساب غير النشط لو أنا معملتش أي تنفيذات هل هيحط عليها عملات ولا لأ، عمولات سحب هل فيه رسوم السحب، فيه حاجة اسمها رسوم إدارة الحساب ساعات اللي هي مصاريف السنوية بتاعة الحساب هل ده موجود ولا لأ، فيه سماسرة تانين بيعمل اعادة شحن للبيانات اللي هو لو جاب لك أسعار حيدفعك فلوس لو اداك أداة رسم بياني هيدفعك فلوس يعني كل حاجة هتدفعك فلوس فده لما هبص على نظام الرسوم والعمولات لازم أبص على الرسوم بشكل كامل مش بس العملات مش بس إن أنا عرفت إن هو هينفذ بكذا فخلاص لأ لازم أبص على كله فتاني الراجل اللي هو بيشتغل مع الديسكاونت بروكر هنلاقي في السوق فيه أمثلة اللي هو لأ أدفع مثلا دولار في التنفيذه وخلاص وفيه حاجات كمان شفناها يمكن في الأسواق المتقدمة كمان أكتر إن هي 0 عمولة أصلا طب بيعمل فلوس منين بيعمل فلوس من حاجات تانية ممكن يكون بيعمل اشتراكات ممكن بيعمل مصاريف في الحساب الكلام ده كله فتاني لازم نبص على الاخر يعني عشان ما نزودش في النقطة دي إن أنا لما هقارن سمسار سمسار لازم أقارن كل الرسوم والعمولات ببعض ما قارنش فقط التنفيذ
(08:33)
رابع نقطة الحد الأدني بتاع الحساب لازم أبقى عارف السمسار ده في الحد الأدني بتاعه قد إيه فيه واحد ممكن يقول لي مفيش حد أدني وفيه واحد ممكن يقول لي لأ أنت لازم تحط مثلا 1000 دولار 5000 دولار 10,000 دولار 100,000 دولار أياً كان فلازم أبقى عارف الحد الأدني بتاع كل سمسار
(08:49)
يبقى إحنا هنا تكلمنا على إيه اتكلمنا على أول حاجة الأهداف بتاعتي، تاني حاجة أنواع السماسرة، تالت حاجة الرسوم والمعاملات ورابع حاجة الحد الأدنى للحساب
(09:00)
خامس حاجة الأدوات بقى أنت راجل لسه بتتعلم في بداية طريقك فأي أداة بالنسبة لك مثلا مهمه فأنت هتبص على الأداة دي إن هي جزء من قرارك فيه ناس بتديك أدوات الرسم البياني المتطورة عشان فيه ناس بتعمل تحليلات وتوصيات فيه ناس بتعمل ان أنت ممكن تتداول من على الموبايل أنا مستريح إن أنا أتداول على الموبايل تجربة المستخدم سهلة ولا صعبه سهل الاستخدام ولا لأ الحاجات دي كلها فالمنصة نفسها أنا بقى هعرف أتعامل جواها ولا لأ سهله ولا لأ بيقدم لي الحاجات ولا لأ ودي تاني لازم يبقى متوائم Align مع الهدف بتاعتي يعني المتداول اليومي محتاج حاجات فيها رسوم بياني عالية محتاج إن هو يحط أوردرات بطريقة مختلفة ممكن يحط مثلا أمر وقف الخسارة ممكن يعمل أيا كان الحاجة اللي هيعملها فلازم أتأكد ان المنصة بتقدم لي الحاجات دي
(09:46)
سادس نقطة الأبحاث فيه ناس بتحب الابحاث جدا بتحب قبل ما تشتري الأسهم إن هي تقرأ ايه السهم ده بيعمل إيه أرباحه شكلها عامل إزاي الميزانيات شكلها إيه الكلام ده كله من غير ما نخش في التفاصيل في سماسرة بتقدم الحتة دي في سماسرة بتعمل ربط مع طرف تالت إن هي تقدم الحتة دي وفيه ناس بتعملها من جوه الشركة نفسها إن هي تطلع لك الأرقام دي والتوصيات بتاعتك والكلام ده كله فهل أنت عايزها ولا أنت مش عايزها مش لازم يبقى عندك في السمسرة كل الحاجات دي على فكرة يعني تاني لو واحد بيشتغل على المدى الطويل وهشتري صندوق متداول مثلاً اس اند بي ودهب وهيقعد يشتري فيهم كل شهر وخلاص لمدى الحياة فهو مش فارق معايا يقرأ أبحاث مش لازم اللي أنت تلاقي في سمسارك النقط دي إحنا بس بنقول أو بنوضح للناس اللي بتفكر تفكر إزاي
(10:31)
سابع نقطة خدمة العملاء في ناس لو حصلها مشكلة إزاي مثلا يتصلح الحساب فيه مشكلة أكلم مين على التليفون ولا على الشات، إيميل مش عارف إيه كل الحاجات دي فإزاي خدمة العملاء لأن مثلا سمعنا مثلا على سمسارة اونلاين كتير خدمة العملاء بتاعهم وحش فلو حصل لك مشكلة بتاخد أيام عقبال ما تتعالج المشكلة جالك كوبون مش عارف تحصله فمش عارف تعمل إيه فخدمة العملاء بشكل عام ودي أشوفها منين غالبا هأشوفها من التقييمات أو أون لاين أعمل بحث حأعرف خبرات الناس التانية
(11:08)
تامن نقطة قوانين الأمان طبعا دي نقطة مهمة جدا ودي بالنسبة لي من أعلى النقط أهمية هل السمسار ده مرخص ولا لأ لازم يبقى سمسار مرخص من الدولة اللي هو بيشتغل فيها في أمريكا مثلاً (إس إي سي: هيئة الأوراق المالية والبورصة) وفي مصر أعتقد (إس سي إيه: هيئة الأوراق المالية والسلع) في الإمارات فيه مثلا (دي إف إس إي : سلطة دبي للخدمات المالية) أو يعني فيه جهات رقابية، السعودية فيه مثلا البنك المركزي اللي هو (ساما: البنك المركزي السعودي) تقريبا بيرخص الحاجات دي أيا بقى الجهات الترخيص اللي أنت بتبص عليها لازم البنك يبقى مرخص أو لازم سمسار يبقى مرخص مينفعش يبقى منصة اونلاين أنت متعرفش مصدره الكلام ده كله فمهم جداً إنه يبقى مرخص
طب حأجيب الحاجات دي منين أنا ممكن أروح على الموقع بتاع البورصة بيبقى فيه دايما يعني مثلا على سبيل المثال البورصة المصرية بيبقى فيه مثلا على الويب سايت بتاع البورصة المصرية فيه ليستة بتاعت كل السمسارة المقيدين ترتيبهم من حيث كمية التداول والكلام ده كله فأنت تقدر تشوف هل هو مرخص ولا لأ دي 1
2 الحاجة اللي هي بتسهل عليا بقى وتسهل حياتي أكتر كمان لو السمسار ده هو أصلا عنده أسهم بتاعته شخصيا على البورصة ليه ده مهم بالنسبة لي أو ليه ده بيعالج معظم الحاجات لإن هو لو مقيد ع البورصة فهو عنده شفافة أعلى في تقديم التقارير أنا أقدر أشوف النتائج بتاعته لو لا قدر الله حصل مشكلة وفي أخبار وحشة ع السمسار بتلاقي الأسهم بيتحرك فوجود الأسهم مقيد دي حاجة بتريحني آمان برضو لازم أعرف الحسابات دي متأمنة من مين يعني لو لا قدر الله الشركة دي وقعت هل الحسابات دي متأمنة ولا لأ إيه المبلغ اللي متأمن عليه يعني مثلا في أمريكا أعتقد لحد 250,000 دولار بتبقى متأمن عليها لو أكتر من كده بيبقى فيه حاجة تانية، في مصر مثلا أعتقد الحساب كلها بتبقى بتعملنا بنس 100% حتى حسابات البنوك يعني كل دولة وليها الاتجاه بتاعها فدي في حتة الأمان والقوانين (13:04)
بعد كده النقطة اللي وراها المصادر التعليمية هل لو أنا مستثمر مبتدئ هل أنا محتاج تعليم فهل المنصة دي بتقدم لي أي نوع من أنواع التعليم ولا لأ أنا عايز أعمل مثلا تداول هل هو بيديني فيديو إن إزاي تحط طلب التداول بتاعتك ولا لأ وبعدين لو عايز أحلل الأسهم إيه النسب المعينة المفروض الناس أبص عليها الرسوم البيانية إزاي أستخدمه بنلاقي في سماسرة بيعملوا كده فالمصادر التعليمية مهمة في ناس ثانيه بتعملوا ويبينار ندوات أونلاين هو الشركة دي بتعمل مثلا كل أسبوع على كل إثنين زي كده فيديو تفاعلي أنت ممكن تخش أون لاين تشوف الراجل اللي بيتكلم معاك اللي هو شغال في الشركة، في ناس بتعمل بودكاست، في ناس بتعمل قناة يوتيوب أيا كان بقى الطريقة اللي أنت بتاخد بيها إي المعلومات أو التعليم إن هو كده إن هو برضه بيمسك إيدك إن هو يبتدي ياخدك من مستوى بدائي إن أنت تعلم على الوقت
(14:00)
آخر نقطة وممكن أقيم بيها السمسار مثلا ممكن لو في حاجات لذيذة هو بيديها على جنب مهمة بالنسبة لي زي إيه مثلا فيه حاجة اسمها مستشار مالي آلي اللي هو إيه؟ هو بيقولك من الآخر أنت عايز تعمل محفظة مثلا تقاعد حط مثلا 60-40 في الحاجات دي وحطلي بس الفلوس وانا هنفذها لك فدي حاجة اسمها مستشار آلي ممكن تعمل بحث وتشوف يعني إيه، ناس سماسرة بيعملوا ده كجزء من خدماتهم
حاجة تانية المحفظة الأفتراضية افي ناس بيدوك محفظة افتراضية فأنت ممكن تفتح مع السمسار ده مش محفظة حقيقية الأول أنت ممكن تفتح محفظة افتراضية فبدل ما بتعملها على (إنفستوبيديا) زي ما إحنا تكلمنا في الحلقة قبل كده أنت ممكن تعملها على المنصة دي عشان تبتدي تجرب المنصة دي وتشوف هو حلو ولا، فدي برضه خدمة لذيذة ممكن آخد بيها قرار إن أنا أفتح مع السمسار ده
(15:00)
حاجة كمان أنا شخصيا بحبها اللي هو الاستثمارات الدورية أو المتكررة يعني مثلاً أنا قلتله عايز أشتري (مؤشر إس اند بي 500) الصندوق اسمه كذا فالسمسار ده بيديني اختار إنه هو مثلا كل أسبوع يحط لي 100 دولار في (إس اند بي 500) أو كل شهر يحط لي 100 دولار أو كل تلات شهور يحط لي 100 دولار فأنا هديله الأوردر ده تخش كده تعمل حاجة اسمها استثمار متكرر تحط الرقم وتحط كل يوم في الأسبوع إمتى ومن هنا لحد كام يوم أو من هنا لحد مثلا الـ 6 شهور الجايين أعملي الإستراتيجية دي هو أوتوماتيكلي بيفتح ويشتري من غير ما أنت تفتح الأكاونت يعني هو هيفضل يشتري طول ما أنت حطيت رصيد في الحساب بتاعك الميزة في الخدمة دي بالنسبة لي إيه وخاصة أنا يعني أنا بحب الميزة دي جدا إن هي بتمنع العاطفة أو أنا خلاص خدت قرار إن أنا عايز أشتري مثال عايز أشتري مثلا صندوق استثمار في الذهب لمدة 6 شهور الجايين أحط فيهم 100 دولار في الشهر فأنا فيه 600 دولار هأحطهم في الصندوق بتاع الدهب ده خلاص أنا منعت العاطفة فاللي حصل
عملي متوسط يعني أنا اشتريته على كدا مرة وخدت أسعار مختلفة وما اخدتش قرار كل مرة ما فتحتش ما عملتش الكلام ده كله فلطيف إن أنت تبني مراكز بالطريقة دي كل اللي عليك إن أنت تغذي الحساب بس بفلوس وهو يشتري لك فالميزة دي بتساعدك إن أنت تاني توجه الاستثمار بتاعك بالطريقة اللي أنت عايزها
(16:25)
في حاجات تانيه يعني يمكن إحنا ذكرنا 10 نقط ، أنا بالنسبة لي أعلن نقطتين بحبهم الأمان إن السمسار نفسه يبقى مرخص وموجود على البورصة كمان يعني غير إن هو مرخص إن هو يبقى موجود على شركة سمسرة مقيدة في البورصة وفي أمثلة كتير عالمية بحب التكرار زي ما قلنا اللي أنت تستثمر أجزاء كل شوية وبالنسبة لي التكنولوجيا أو واجهة المستخدم مش أهم حاجة أنا بدي بس رأيي الشخصي يعني يعني ممكن يكون مش أحسن شكل بس هو بينفذ اللي أنا عايزه فدي مش مهم قوي بالنسبة لي المهم كمان نظام الرسوم والمعاملات بالنسبة لي إن أنا ما أدفعش عملات كبيرة ما يبقاش فيه رسوم مخفية ما بيبقاش فيه ما بيبقاش فيه مصاريف عدم النشاط الكلام ده كله خليني مستريح معنديش مشكلة الكلام ده كله إن أنا مش ملزم إن أنا أدفع له حاجة عشان الحساب يفضل مفتوح فدي بالنسبة لي حاجة لطيفة وبرضو عمولة التنفيذ ما تبقاش عالية خاصة لو المبالغ بتاعتي صغيرة يعني أنا النهارده مثلا لو أنا بدفع دولار ع التنفيذة فأنا بقى بدفع استثماري 100 دولار فا بدفع دولار ده 1% فده رقم مش قليل كسعر تنفيذه لكن عملت على 1000 دولار ودفعت دولار فده تعتبر عمولة قليلة فعشان المبالغ الصغيرة فيه مثلا السمسارية يقول لك حد أدني 5 دولار، 10 دولار هتدفع 10 دولار علي ال100 دولار ده 10% ده رقم كبير جدا أنت أصلا ممكن متحققش العوائد دي لفترات طويلة فهتجه للراجل أبو الدولار اه نسبة 1% ما زالت عالية ولكن هي أحسن بكتير جدا من الـ 10 فنأخذ بالنا من الرسوم، نأخذ بالنا هو سمسار مرخص ومقيد ولا لا هنأخذ بالنا من المميزات اللي أنا محتاجها تخدم أهداف الاستثمارية بتاعتي بشكل عام
(18:06)
برضو لو بعد الحلقة دي أنت لسه مش عارف تختار السمسار بتاعك وحابب تسأل ممكن تبعت لنا هل السمسار ده مثلا بيعمل كذا ولا لأ أنا جربته وحش حلو برضو فيدباك عن السماسرة بتاعتكوا ومين أحسن سمسار أنتم بتستخدموه ممكن تشاركوا بالكلام ده كله معانا
أتمنى بس الحلقة دي تكون مفيده للناس يعني جمعتها كدا من ردود افعال الناس شايفة إيه أو بتسأل إيه بعد ما ما تجربوا موضوع محاكاة الأسهم زي ما قلنا في الأول والسؤال الدائم أفتح في شركة سمسرة إيه أو أنفذ إزاي مش هنسى برضو أقول إن فيه بنوك معينة بتديك مع حساب البنك حساب شركة سمسرة فممكن برضو ده يكون أوبشن بالنسبة لك مريح إن أنت بتحاول فلوسك من البنك دايركت لحساب شركة سمسرة وبعدين بتشتري على طول يعني بنك إكس أهو عنده بنك عادي اللي هو بتاخد عليه مرتبك وبتعمل كل حاجة عليه في نفس الوقت تقدر تحفظ فيه أسهمك وتشتريه من عنه الأسهم بتاعتك فبرضه ده أوبشن لطيف وبالنسبة لي ده أوبشن آمن لإن البنوك دي بتبقى أمان أعلى كمان من شركات السمسرة فانا مش ضد الموضوع ده ولكن بنلاقي المميزات في البنوك بتبقى دايما أقل شوية ولو إن أنا شفت الأيام اللي فاتت يعني الدنيا اتغيرت شوية و وشفنا البنوك ابتدت تتحرك في الحتة دي كويس و ابتدوا يعملوا منصات شكلها ألطف، فتاني مش لازم يكون سمسارك أحسن سمسار من أول يوم مع الوقت ممكن سهلة جدا تغير فابتدي ومع الوقت طور نفسك وشكرا جدا على وقتكوا وشوفوا إن شاء الله الأسبوع الجاي
Translation of some words and terms:
Impact: تأثير
Understand: يفهم
Loan: قرض
Day trading: التداول اليومي
Asset class: فئة الأصول
Evaluate: يقيم أو يقدر
Platforms: منصات
Beginners: المبتدئين
Advanced: المتقدمين
Full service: خدمة متكاملة
Research: بحث
Advice: نصيحة
Discount Broker: سمسار بعمولة مخفضة
Resources: موارد
Fee structure and commissions: نظام الرسوم والعمولات
Per trade: لكل عملية تداول
Hidden fees: رسوم مخفية
Inactivate fees: رسوم عدم النشاط
Withdrawal fees: رسوم السحب
Maintenance fees: رسوم الصيانة
Charting tool: أداة رسم بياني
Minimum: الحد الأدنى
Tools: أدوات
Advanced charting: الرسم البياني المتقدم
User experience: تجربة المستخدم
User friendly: سهل الاستخدام
Stop losses: إيقاف الخسائر
Customer service: خدمة العملاء
Issue: مشكلة
Security regulation: قوانين الأمان
Reporting: إعداد التقارير
Security and regulation: الأمان والقوانين
Educational resources: مصادر تعليمية
Webinars: ندوات أونلاين
Interactive: تفاعلي
Robo-advisory: مستشار مالي آلي
Paper trading: تداول تجريبي
Recurring investments: استثمارات دورية
Emotionally: عاطفيًا
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي#الدليل_الشامل #السمسار_المناسب