184. خُلاصة الحسابات البنكية (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
بعد ما اتكلمنا عن الخطوات الأولية للاستقلال المالي ، حلقة النهاردة بنتكلم فيها على ازاي نبدأ ننفذ الخطوات دي
هدف حلقتنا هو إنك تبدأ تتعرف على الأدوات المالية اللي هتساعدك تنظم حياتك المالية ، وتنظم أفكارك ، وتحط أهداف مختلفة سواء أهداف قصيرة الأجل أوطويلة الأجل وأول وأهم الأدوات دي هي الحسابات البنكية
بنتكلم في حلقة النهاردة عن الحسابات البنكية.. أنواعها ، والفرق بينها ، وازاي أقدر استفيد من الحسابات دي في تحقيق أهدافي الاستثمارية
: في هذه الحلقة
00:46 المقدمة
01:02 الحسابات البنكية.. أهميتها وانواعها
01:05 الفرق بين البنوك العادية والإسلامية
03:58 أول نوع : الحساب الجاري
06:20 استخدام الحساب الجاري؟
07:11 تاني نوع : حساب التوفير
09:01 صندوق الطوارئ
09:30هل هدفع غرامة لو سحبت فلوسي من حساب التوفير؟
10:10 تالت نوع : الودائع البنكية
12:06 3 اختيارات بيقدمهالك البنك بعد استحقاق الوديعة
14:11هل بيطلعلي بطاقة خصم على الوديعة؟
14:30هل الودائع موجودة في الخدمات المصرفية عبر الإنترنت؟
15:22 ليه استخدم الوديعة؟
16:50 رابع نوع : شهادة الاستثمار أو شهادة الادخار
20:12 استخدم شهادة الاستثمار متى؟
21:36 4 حاجات للمقارنة بين الوديعة وشهادة الاستثمار والحساب الجاري وحساب التوفير
24:35 الخاتمة
متنسوش تبعتولنا مقترحاتكم لتطوير المحتوى وآرائكم في الحلقات اللي فاتت وحابين تسمعوا إيه في الحلقات اللي جاية إن شاء الله
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:46
المقدمة
اهلاً بيكوا في حلقة جديدة من بودكاست كلام ينور.. حلقة النهاردة أنا عايز أتكلم فيها على أنواع الحسابات الموجودة في البنوك ، الحسابات اللي حضرتك هتشوفها في اي بنك يعني مش هيفرق كتير يعني المسميات ممكن تكون مختلفة في كل بنك لكن الأهداف بتبقى هي هي تقريباً
بعد ما اتكلمنا الحلقة اللي فاتت عن الحرية المالية والخطوات الأولية ، طيب أنا عايز انفذ بقى الكلام ده انفذه باستخدام إيه؟ يعني مفروض أنا اعمل إيه؟ أفتح إيه في الأول كخطوات أولية عشان أعرف انفذ الخطة المالية بتاعتي
01:02
فالنهاردة أنا هبتدي بحسابات البنوك ، حسابات البنوك هي حاجه مهمه إن انت تنظم بيها فلوسك ، هي ميزتها انها هتنظم تفكيرك كمان لأن انت هيبقى عندك أهداف مختلفة ومحتاج أنواع من الحسابات المختلفة لتنفيذ أوتحقيق الأهداف دي
01:05
برده قبل ما ابتدي الحاجات اللي هتكلم عليها النهاردة هي موجودة في البنوك العادية أو البنوك الإسلامية والفرق ديماً ما بين البنوك العادية والإسلامية إن العقود اللي بتخش فيها مع البنك هي بتبقى لغوياً مختلفة بمعنى إيه إن مثلاً في الأقتصاد الإسلامي انت المفروض متاخدش فايدة فالبنوك الإسلامية بتعمل إيه؟ بيتعمل عقد ما بينك وبينه في حاجه مثلاً زي المرابحه إن حضرتك مثلاً بتخش مع البنك بتديله فلوسك والبنك بيروح يسلفها بالنيابة عنك والأرباح اللي بتيجي من عملية التسليف دي بترجعلك تاني في شكل أرباح فهنا بيحولك العقد أو التعاقد ما بين انها تبقى فايدة ثابتة أنا عارفها لحاجه ممكن تكون متغيرة في البنوك الإسلامية ودي أهم وأكبر فرق ان العقود نفسها واللغويات ما بين البنوك بتختلف تماماً
03:04
الحاجه التانية برده إن الغرامات في حاجات في الشريعة وحاجات ليها علاقات بالفلوس مش صح في الإقتصاد الإسلامي زي مثلاً لو اتأخرت يبقى أنا بحط عليك فوايد تأخير وبعدين بحط فايدة على الفايدة وحاجات كده أنا بس مش عايز أتطرق في حلقة النهاردة ، في حلقة قدام على البنوك الإسلامية بالكامل ولكن النهاردة بس عايز أفهمك أن حضرتك لو عايز تطبق اللي احنا هنتكلم عليه النهاردة في البنوك الإسلامية هو موجود ولو عايز تطبقه في البنوك العادية هو برده موجود علشان كده أنا أبتديت اتكلم على الفروق البسيطة بين نوعين البنوك دول فهنبتدي كده مع بعض نشوف إيه انواع الحسابات وازاي ممكن تستخدمهم خلال الحلقة دي
03:58
أول نوع من الحسابات دي هو الحساب الجاري
هو حساب بدون فوايد ، أنت مبينزلكش عليه اي فوايد بس من المميزات بتاعة الحساب الجاري إن انت تقدر تاخد عليه دفتر شيكات ، دفتر الشيكات ده هو تعهد من حضرتَك أو حضرتِك إن انتي تدفعي مبلغ معين لحد فبتكتبيله شيك ولكن ديماً نخلي بالنا إن الشيكات دي ممكن تستخدم قانونياً ضدك ممكن حد يرفع عليك قضية لو الشيك ده بدون رصيد فخلي بالك وانت بتكتب الشيك إن ديماً تتأكد إن عندك رصيد في الحساب اللي بتكتب عليه الشيك ، والشيك ده هو حاجه ورقية بيبقى مكتوب عليه نفس الرقم الجاري اللي البنك بيطلعلك عليه الدفتر ده
طيب تكلفة الحساب ده في بعض البنوك بتحط رسم بسيط شهري أو بتقولك حط الحد الأدني للرصيد بتاعك مينزلش مثلاً عن 2000 جنية / درهم / ريال أيا كانت العملة اللي حضرتك فاتح بيها الحساب لو حضرتك فضلت حاطط كل شهر الحد الأدني ده مبيبقاش عليك أي رسم من الرسوم الصغيرة دي
برده البنوك بتطلع على الحسابات دي كارت الخصم ممكن تستخدمها في الشرا من المحلات ودي بتبقى في معظم الأحيان بدون تكلفة مبيبقاش عليك أي رسوم ، وممكن تستخدم بطاقة الخصم بتاعتك دي انك تقدر تسحب منه من ماكينة صرف آلي ودي بتبقى مكن موجود كل الناس بتشوفها في الشوارع ، في المولات ، في المحلات ماكينة تقدر تخرجلك فلوس ودي بتخضم مباشرة من حسابك الجاري
05:56
برده بنقدر نشوف الحساب الجاري ده من خلال الخدمات المصرفية عبر الإنترنت ، إن البنك بيدي لحضرتك اسم المستخدم وكلمة المرور تقدر تخش بيها على الحساب ده وتشوف المعاملات بتاعتك ، تقدر تشوف تاريخاً انت صرفت إيه ، سحبت فين.. كل حاجه بتبقى موجوده قدامك على الخدمات المصرفية
06:20
طيب ممكن استخدم الحساب الجاري ده اعمل بيه إيه؟
أولاً ممكن تستخدمه في الإنفاق الشهري بتاعك ، يعني النهاردة مثلاً عندك ميزانية لشرا من السوبرماركت أو الحاجات اللي هي زي الحاجات اليومية ممكن تستخدم الحساب ده تحط فيه الفلوس اللي خارجه من ميزانيتك في البنود دي وتستخدم الحساب الجاري ان انت تحط المبلغ ده كل شهر فيه وتستخدمه شهرياً لأنك مبتاخدش عليه أي فوايد ، برده ممكن تستلم مرتبك لو عندك مرتب ثابت تقدر تستخدم الحساب الجاري ده إن انت تاخد فيه مرتبك وبعد كده تبتدي من خلال الحساب الجاري ده توزع فلوسك على الحسابات الأخرى
07:11
تاني نوع من الحسابات هو حساب التوفير
حساب التوفير ده بيبقى زي الحساب الجاري كده شبهه شوية ولكن الفرق الوحيد إنه بينزلك فوايد على الرصيد بتاعك ، معظم البنوك بتعمل على الرصيد اليومي يعني بيقولك انت النهاردة سبتلي 10000 في الحساب هنحسب الفايدة السنوية بتاعتنا مثلاً نقول 5% على حساب التوفير ويحسبلك في اليوم الرقم اللي المفروض ينزلك في الحساب وممكن يكون بيدفعهالك اخر الشهر بيشوفلك كده الرصيد اليومي بتاعك ويجمعلك أخر الشهر حضرتك مفروض تستلم كذا فايدة يروح منزلهالك أخر الشهر
07:58
الفايدة هنا بتعتبر فايدة بتتحسب باليوم وبرده اتأكد من الشروط والاحكام بتاعة كل البنك لأن في بنوك ساعات بتقولك لو اتحركت كتير على الحساب ده لو عملت مثلاً اكتر من معاملة او معاملتين في الشهر سحب مثلاً بيوقفلك خالص الفوايد اللي انت ممكن تستلمها فديماً حاول تراجع الشروط والاحكام بتاعة البنك بتاعك
08:25
بيديك بقى الحساب ده ممكن نقول مثلاً في بلد زي مصر مثلاً بيديك 5% ، الـ 5% دي زي ما قولنا بتنزل أخر الشهر. برده البنك ممكن يطلعلك بطاقة خصم أو يربطهولك على بطاقة خصم تانية فيه الحساب الجاري ، يعني ممكن يكون عندك كارت واحد مربوط عليه الحساب الجاري وحساب التوفير فحضرتك وانت واقف عند ماكينة الصرف الآلي أسحبلي من الحساب الجاري اللي رقمه كذا ، أو اسحبلي من حساب التوفير اللي هو رقمه كذا
09:01
ممكن برده تستخدم الحساب ده في صندوق الطوارئ زي ما اتكلمنا في الحلقة اللي فاتت إن انت ممكن تبقى عايز تشيل على جنب حاجه لصندوق الطوارئ ملمسهاش ، يبقى أنا ليه هستخدم حساب التوفير لأنه أولاً بينزلي فايدة يومية على الرصيد المتبقى فيه ، وأقدر ملمسهوش وفي نفس الوقت بينزلي عليه فوايد يومية
09:30
الحساب ده فيه سيوله يعني تقدر تسحب لو حصلك أي حاجه طارئة هتروح على طول تسحب منه الفلوس.. فهو فيه سيوله تقدر تسحب منه على طول ، ومفيش كمان اي نوع من أنواع الغرامات مثلاً ، يعني لو حضرتك سحبت هتدفع غرامه؟ لأ مفيش الكلام ده انت بس بتخسر الفايدة اللي المفروض كانت تنزلك في الفترة دي ، فأنا الحساب ده بنصح لو هتعمل اي نوع من أنواع صناديق الطوارئ اللي هي قولنا بتتراوح من 3 لـ 6 شهور من دخلك وعايز تحطها في حته أنا بنصح انك ممكن تحطها في حساب توفير
10:10
تالت نوع من الحسابات هي الودائع
هتلاقي كلمة وديعة الناس بتستخدم بشكل مستمر.. إيه معنى الوديعة؟ الوديعة انت بتروح البنك تقوله انا مش حساب توفير أنا مستعد أربط بقى شوية معاك ، يعني أنا عندي رؤية معينة اني مش محتاج الفلوس دي لفترة معينة فأنا هتفق معاك كبنك يا بنك خد الفلوس دي للفترة دي
طيب الوديعة دي ممكن فتراتها تبقى من إسبوع لـ 12 شهر يعني ممكن تروح تقول للبنك أنا مش عايز فلوسي لمدة إسبوع أنا متأكد اني الاسبوع الجاي مش عايز فلوسي فأربطلي وديعة إسبوع أو متأكد إني مش عايزها لمدة شهر ، أربطلي شهر أو 6 أو 9 أو سنة يعني ممكن أقوله عدد معين من الشهور كمان ، يعني في العادي بشوف ودايع لحد سنة
في الوضع الطبيعي لو انت ملمستش الوديعة دي ، يعني قولت للبنك أنا عايز 3 اسابيع وديعة هيروح منزلك أخر الـ3 اسابيع الفايدة اللي انتو اتفقتوا عليها ، 6 شهور هيقوم منزلك الفايدة في أخر الـ6 شهور ، في الوضع الطبيعي كل ما المدة تزيد في الوديعة كل ما الفايدة اللي حضرتك هتاخدها هتزيد بمعني إيه؟ ان الوديعة الـ6 شهور هتدفعلك غالباً فايدة أكتر من الوديعة الشهر ليه لأنك أديت البنك الحق إنه ياخد فلوسك الفترة الطويلة دي.. واحنا قولنا حساب التوفير مثلاً بيدفعلك كل شهر ، لكن الوديعة بيدفعلك في الوقت اللي انتو اتفقتوا عليه
12:06
طيب بعد ما بيحصل إن انت مثلاً سبت الفلوس 3 شهور ، أنا ربطت وديعة 3 شهور قولت للبنك عندي 10000 خدهم 3 شهور ، بعد الـ3 شهور إفتراضاً يعني نزلك 200 فايدة (بقول اي رقم كده) ، طيب وانت بتعمل الوديعة البنك بيسألك بعد ما الوديعة يحصلها إستحقاق تحب نربط أصل المبلغ تاني ، ولا تحب ومنربطوش ، ولا تحب نربطة هو وفايدته؟
: يعني أنا عندي 3 أختيارات هقول للبنك أعملها في الوديعة هقوله يا بنك
أربطلي أصل المبلغ تاني اللي هو 10000 وسيبلي الفايدة تنزل في حساب التوفير -
نزلي الفلوس والفايدة بتاعتها أنا مش عايز أعمل أي حاجه تاني -
اربطلي أصل المبلغ تاني وفايدته مع بعض -
الناس اللي هي عايزة ديماً بعد ما ينزلها الفايدة تعيد استثمارها تاني هتختار رقم 3 اللي هو إيه اربطلي أصل المبلغ بفايدته 3 شهور تاني لأن البنك هيقعد يكرر نفس المدة اللي أنتو اتفقتوا عليها ، طيب وقتها البنك هيربطهالك بأنهي فايدة؟ الفايدة اللي السوق فيها لأن الفوايد ديماً متغيرة ، الفوايد مش ثابتة يعني حضرتك ممكن تعمل فوايد في أول السنة تيجي بعد 3 شهور تلاقي الفوايد عليت أو نزلت ساعات بتبقى في مصلحتك وساعات بتبقى ضدك ، ففي أي وقت تقدر تكلم البنك تقوله يا بنك لو أنت عامل الربط انه يعيد استثمارة تاني تقوله لأ يا بنك متربطليش تاني أنا كفاية كده عليا
14:11
هل بيطلعلي بطاقة خصم على الوديعة؟
لأ مبيطلعلكش كارت خصم على الوديعة ، كروت الخصم بتطلعلك على الحسابات اللي اتكلمنا عليها في الأول زي الحساب الجاري وحساب التوفير، لكن الودايع دي بتبقى حاجه مقفوله عندك مش هتقدر تلمسها يبقى أنا مبيطلعليش هنا كارت خصم
14:30
هل بشوفها في الخدمات المصرفية عبر الإنترنت؟
آه بتشوفها ، بتشوفها ازاي؟ بتلاقي إن من حساباتك مثلاً عندك حساب 1. جاري حساب 2. توفير 3. الوديعة بتاعتك
14:49
طيب هل ممكن يبقى عندي ودايع كتير؟
آه ممكن يبقى عندك ودايع كتير مفيش مشكلة ، يعني البنك مش بيقولك مثلاً المفروض تعمل وديعة واحده بس لأ هو ممكن يقولك الوديعة الواحدة مثلاً الحد الأدني بتاعها 5000 وحضرتك عايز تربط 20000 ممكن تحط 4 ودايع عادي براحتك مفيش مشكلة ، طيب ليه ممكن تحط 4 ودايع؟ لأن حضرتك ممكن تبقى عايز واحده مربوطة لـ3 شهور وواحدة مربوطة لـ 6 شهور وواحدة لسنة مثلاً فعشان كده البنك بيديك الحرية في الكمية اللي انت تعملها للودايع
15:22
طيب انا هستخدم الوديعة دي ليه؟
أنا هستخدمها لو أنا عندي دفعات معينة في المستقبل انا عارف ان هي هتستحق في الفترة الفلانية وانا معايا فلوسها النهاردة وعايز استغل إني اخد فايدة في فترة معينة لحد ما المصروف ده ميظهرلي ، يعني زي مثلاً رسوم الدراسة أنا النهاردة معايا فلوس بتاعة ولادي ولادي داخلين مدرسة في شهر 9 وانا في شهر 3 جالي فلوس عايز اشيلها على جنب لشهر 9 فقوم رايح البنك أقوله يا بنك انا الفلوس دي عايز أربطها بإستحقاق شهر 9 أنا موافق إني اسيبها فبتسبهاله وتروح شهر 9 واخد فلوسك ودافع بيها المصروف بتاعك ، طيب استفادت أنا إيه في الفترة دي؟ استفدت اني قعدت 6 شهور أخد فايدة على الرقم ده فهو بيساعدني برده في تقليل التكلفة بتاعتي
16:22
برده أي حاجه من عناصر المصروفات الكبيرة لو أنا عندي ليها ميعاد أنا ممكن أربط الفلوس دي ، عندي قسط عقاري اشتريت بيت وعندي مصروف سنوي لازم ادفعه ، وديعة صيانة ، قسط استلام أيا كانت المسميات بقى حاجه واضحة وواضح ليها ميعاد وأنا معايا فلوسها يبقى ده استخدام الودايع
16:50
بعد كده النوع الرابع من الحسابات اللي هي موجودة في معظم البنوك أو كل البنوك حاجه اسمها شهادة الاستثمار أو شهادة الادخار
ودي بنسمع عنها كتير برده ، إيه الفرق ما بين شهادة الاستثمار او الادخار دي والوديعة؟ هنلاقي ان الأجل بتاعها هو أطول من الوديعة يعني قولنا ان الوديعة بتبتدي من اسبوع لحد سنة ، هنلاقي إن شهادات الاستثمار أو الادخار دي بتبتدي من سنة وما فوق يعني أنا ممكن أربط فلوسي سنة / 3 / 5 أيا كان اللي البنك بيدهولي
طيب هنا البنك برده انا اتفقت معاه اني مش محتاج الفلوس دي الفترات دي فالبنك بيكافئني وبيديني فايدة أعلى من الوديعة ، يبقى أول فرق بين شهادة الاستثمار والوديعة ان انا باخد فوايد أعلى من الودايع لسببين السبب الأول إني هربط فلوسي معاه لفترة أطول ، السبب التاني هنا اختلاف الفايدة احنا قولنا في الوديعة هيديك الفايدة في أخر المدة في شهادة الاستثمار بيديك حسب الاتفاق ممكن تكون كل 3 شهور ، كل 6 شهور ، كل سنة ، كل ما بتزود المدة اللي هو بيدفعلك فيها الفوايد كل ما بيعليلك الفوايد بتاعتك
18:30
فهنقول مثال أنا ممكن أربط شهادة 3 سنين بتدفعلي شهري ، وشهادة 3 سنين بتدفعلي كل 6 شهور غالباً الشهادة اللي بتدفع كل 6 شهور هيديك عائد عليها أعلى يبقى هما دول الحاجتين اللي بيفرقوا في سعر شهادة الاستثمار أو الادخار عن الوديعة
18:54
طيب سعر الفايدة هي أعلى ، وطريقة دفع الفوايد مختلفة ، كل شهر ، ربع سنة ، نص سنة أو كل سنة مثلاً طيب الفرق كمان في شهادة الاستثمار غالباً ان انت في معظم البنوك بيبقى عندك 6 شهور في عمر الشهادة الاولانين مبتقدرش تسحب فلوسك وده فرق كبير ما بين الوديعة وشهادة الادخار لأن الوديعة أنت ممكن تكسرها في اي وقت وهتخسر بس الفوايد بتاعة الفترة اللي انت المفروض قاعد فيها ولكن شهادة الادخار أول 6 شهور البنك لا يسمح لك انك تسحب الفلوس ، طيب بعد الـ6 شهور دول ايه اللي بيحصل؟ بعد الـ6 شهور البنك بيتفق معاك لو حضرتك كسرت الشهادة بتاعتك أنا هاخد غرامة ان انت ملتزمتش بالسنتين تلاته اللي انت اتفقت معايا عليهم فكل بنك لازم ترجع تراجع الشروط والاحكام على كسر شهادة الاستثمار بتاعتك
20:12
استخدم شهادة الاستثمار دي فين؟
هنا الأهداف اختلفت تماماً عن اللي قبل كده ، يبقى اللي في الأول حساب خالص كنت بعمل بيه الحاجات اليومية بتاعة البيت ، تاني حساب اللي هو التوفير كنت بعمل بيه حاجه زي صندوق الطوارئ ، تالت حاجه لو أنا عندي حاجه انا عارف وقت اني هدفعها فيها فبحطها في وديعة ، شهادة الاستثمار دي بقى علشان هي سنة ، اتنين ، تلاتة دي تختلف تماماً هدفها هنا هدفها بالنسبالي هيبقى لو أنا بحوش للتقاعد أو لو بحوش لهدف طويل الأجل لازم استخدم شهادة الادخار هنا ، لأن انا مش فارقة معايا النهاردة أكسرها يعني لازم تبقى فاهم أو مقتنع انك متحاولش تكسر شهادة الاستثمار بتاعتك ، بشوف غلط كبير جداً من الناس يقولك مثلاً اروح أربط شهادة بكذا وهسيبها 3 سنين وبعد سنة أو سنتين مثلاً يحصله حاجه طارئة فيضطر يكسر الشهادة دي يبقى هو هدفه من الأساس كان غلط وهو بيعمل الشهادة دي ، يبقى أنا لما اجي أقسم فلوسي لازم ابقى شايف الجزء اللي أنا مش هستخدمه خالص على مدار الشهر أو السنة اللي أنا فيها دي فهو ده بالنسبالي يروح في شهادة الاستثمار
21:36
أنا كمان بقى محتاج أتكلم على 4 حاجات لو انا بقارن ما بين الوديعة وشهادة الاستثمار وحساب الجاري والتوفير
أول سؤال تسأله لنفسك إيه اللي انت عايز تحققه ، يعني عايز تحقق إيه من الحسابات؟ أكتب أو اعرف إيه اللي انت محتاج تحققه ، وحدد هدفك فهتعرف بسهوله جداً تختار ما بين الـ4 حسابات دول أو ايه الفلوس اللي المفروض تروح في الحسابات دي
تاني حاجه لما حضرتك تيجي تعمل وديعة أو تعمل شهادة استثمار في جميع الحالات أنت ليك الحق إنك تعمل حاجات بأرقام أصغر يعني أنا النهاردة عندي 100 ألف جنية / دولار / درهم عايز أربط بيهم شهادة حضرتك مش لازم تربط الـ100 مره واحده في شهادة واحده ، حضرتك ممكن تعمل 5 شهادات بـ 20 ألف ، أو 5 ودايع بـ 20 ألف ليه؟ عشان لو لا قدر الله في أي وقت انت حبيت تكسر انت ممكن تكسر 20 بس منهم أو تسترد 20 بس أو تسترد 40 مثلاً 20 ومضاعفاتها مش محتاج في الحاله الاولانية لو حضرتك روحت ربط الـ 100 ألف مرة واحدة هتخسر أو هتدفع غرامة على الـ 100 ألف بالكامل يبقى أنت مش محتاج تربطها مرة واحدة أنت ممكن تكسرها لكذا شهادة
تالت حاجه بنصح بيها برده ان انت مش بس تقارن أسعار الفايدة بين البنوك يعني بنك أ بيديني فايدة كذا ، بنك ب بيديني فايدة كذا مش هو ده اللي انا مفروض بس أقارنه أنا مفروض برده أقارن القيم الأستردادية بتاعة الشهادات في بنك ممكن يغريك انه يديك عائد عالي يقولك انا هديك 15% أو 12% والسوق يكون بيدي 10% بس في مقابل ده ممكن لما حضرتك هتسترد البنك أ ده يكون عليه غرامات كبيرة ، فديماً لما حضرتك تقارن ما بين أسعار الودايع وشهادات الاستثمار حضرتك قارن بين الحاجتين واختار المزيج الكويس من الفايدة والمصاريف أوالكسر الأفضل بالنسبالك
رابع حاجه والأخيرة اللي هقوله برده ان حضرتك لو مهتم تفهم الفرق ما بين الخدمات المصرفية والإسلامية والخدمات المصرفية التقليدية ، فلو حضرتك هتميل أكتر للحسابات الإسلامية يبقى حضرتك أعرف معنى الحسابات الإسلامية هي إيه؟ مين بيقدمها؟ مين موجود في السوق؟ وقارن ما بينهم عشان تعرف إيه الأفضل بالنسبالك
24:35
الخاتمة
وفي النهاية أحب أشكر كل الناس اللي وصلوا معانا لحد هنا برده عايز أعيد تكرار هدف الحلقة النهاردة إن انت يبقى عندك الأدوات اللي تبتدي بيها طريقك في الحياة المالية حتى لو هي حاجات بسيطة بس هي بتنظملك حياتك ، بتنظملك أفكارك ، بتحاول تحط أهداف قصيرة الأجل وطويلة الأجل وإيه الطرق اللي انت ممكن تستخدمها لتحقيق الهدف ده
هنستنى ديماً مقترحاتكم لتطوير المحتوى وأي آراء عن الحلقات اللي فاتت وموضوعات جديدة عايزين تسمعوها في البودكاست ده شكراً جداً جداً على وقتكم النهاردة في حلقة كلام ينور وأشوفكم في الحلقة الجاية إن شاء الله
Translation of some words and terms:
Current Account حساب جاري
Minimum الحد الأدني
Debit Card كارت الخصم
ATM ماكينة صرف آلي
Direct مباشرة
Online Banking الخدمات البنكية عبر الإنترنت
Username اسم المتسخدم
Password كلمة المرور
Overnight بين عشية وضحاها (باليوم)
Emergency Fund صندوق الطوارئ
Term Deposits / Time Deposits الودائع
Visibility رؤية
Maturity تاريخ إستحقاق الدين
Compounding يضاعف
Big Ticket Items المصروفات الكبيرة
Penalty غرامة
Retirement التقاعد
Long Term Goal هدف طويل الأجل
Combination مزيج
Feedback ردود أفعال
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #الحسابات البنكية #الحساب_الجاري #حساب_التوفير #الودائع #شهادات_الاستثمار #إعادة