182. إزاي نقيس المخاطرة في الاستثمار باستخدام مفهوم الـ Drawdown
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
Drawdown في الحلقة النهاردة بنناقش موضوع مهم جدًا وهو إزاي ممكن نقيّم المخاطرة في استثماراتنا، وخصوصًا من خلال مفهوم الـ
ناس كتير بتخاف تستثمر لإنهم مش فاهمين المخاطر اللي ممكن يواجهوها، الحلقة دي هتساعدك تفهم مفهوم المخاطرة بشكل أعمق
:أهم النقاط اللي اتكلمنا فيها
إيه هو مفهوم الـ Drawdown؟
أهمية معرفة الـ Drawdown لتقييم المخاطرة
الفرق بين المخاطرة في الأسهم وصناديق الإستثمار
أمثلة على هبوط الأسواق في أوقات الأزمات.
نصائح للمستثمرين الجدد بخصوص المخاطر والتقلبات
توزيع الاستثمارات في أنواع أصول مختلفة بيقلل من أثر الـ Drawdown على المحفظة ككل
ابعتلنا على صفحتنا على السوشيال ميديا لو حابب تفهم أكتر أو عندك أي أسئلة عن الحلقة و استنونا الاسبوع الجاي
اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلا بيكم في حلقة جديدة من بودكاست كلام ينور
النهارده هنتكلم في حاجة كده بنستخدمها لقياس المخاطرة ناس كتير عمرها ما بتستثمر لانها بتبقى خايفة من المخاطرة بتاعة الاستثمار أو هي مش فاهمة هي بتعمل إيه فبنحاول من خلال المفاهيم دي أو المصطلحات اللي ممكن نكون بنستخدمها إن إحنا نساعدك إن أنت تعرف إيه المخاطرة بتاعتك أو ممكن تبص له بطريقة تانية فأنت لو فهمت أنت إيه المخاطرة بتاعتك غالبا ممكن تقبل إن أنت تستثمر، ناس كتير عمرها ما حطت استثمارات أو عمرها مثلا ماشتغلت في حاجة زي الأسهم أو صناديق الاستثمار أو الحاجات دي لانها خايفة خايفة من المجهول زي ما بيقولوا فالنهاردة هتكلم على حاجة اسمها الدروداون الإنخفاض أو نسبة الانخفاض قد إيه السهم بيكون هبط من أعلى نقطة هو وصلها
يعني إيه الكلام ده؟ يعني في ميزان مثلا سهم مثلا متداول وأعلى سعر كان وصل له هو 100 دولار مثلا والسهم ده رجع لحد 80 دولار يبقى الدروداون هنا أو أكتر نسبة السهم نزل من أعلى نقطة وصل له هو 20% لأن نأخذ الـ 80 - الـ 100 اللي هي أعلى نقطة ده 20 دولار، فالـ 20 دولار ÷ 100= 20%
يبقى هنا أنا حددت أعلى أو خلينا نقولها بطريقة أسهل شوية أعلى نسبة خصم حصلت على أعلى سعر السهم ده نفذ عليه ممكن الدروداون ده يجي بعد يوم بعد أسبوع بعد سنة مش لازم بكره الصبح مش من أعلى نقطة وبينزل على طول الـ 80 ممكن ياخد وقت عقبال ما ينزل
الفكرة في الموضوع ده إيه الفكرة اللي أنا أبتدي أعرف نفسي هو السهم ده لما بيروح للخصم كده يعني تعالي نقول إن إحنا مثلا بنشتري لبس أو بنشتري عربية أو بنشتري أي سلعة إيه أكبر نسبة خصم بتحصل للسهم ده
أنا هنا مش عايز أدور على الأسهم اللي حصل فيها خصم واشتريها لا أنا مش ده اللي أنا بعمله خالص أنا بس عايز أعرف نفسي هو الطبيعي أو المسموح بيه أو لو أنا كنت طلعت أكتر واحد اشترى السهم بسعر غالي وحصل نسبة الخصم الجامدة دي أنا خسرت قد إيه
فأنا هنا بعرف نفسي المخاطرة اللي أنا حاطه أو أنا حطيت نفسي بشراء صندوق الاستثمار ده أو السهم ده أو الحاجة دي
هنلاقي طبعا إن الأسهم بديهي الانخفاض بتاعها بيبقى أعلى من صناديق الاستثمار يعني إيه أعلى يعني ممكن ألاقي سهم نزل من 100 لـ 50 عادي صندوق الاستثمار عشان ينزل من 100 لـ 50 أنت محتاج كل الأسهم اللي جوه تكون نزلت بنفس النسب اللي هي الـ 50% دي عشان نقدر نشوف الـ 50% فالميزة الأولانية في صندوق الاستثمار اللي هو بيعمل التوزيع ان انت عشان عندك أسهم كتير مش كلها بتعمل الدروداون بتاعها أو مش كلها بتعمل فترة الخصومات بتاعتها مرة واحدة في نفس الوقت غالبا الأسهم بتعمل الدروداونز بتاعتها في مراحل مختلفة لإنها ممكن تبقى متعلقة بخبر ليها علاقة بالشركة ممكن تبقى ليها علاقة بالقطاع Sector نفسه فيه مشكلة فالأسهم دي نزلت لكن نادرا لما بنلاقي كل الأسهم مع بعض بتنزل مرة واحدة فعشان كده دي فكرة صندوق الاستثمار إن الدروداون بتاعة الأسهم اللي جواه أو الخصومات اللي بتحصل من أعلى نقط وصلت لها بتتغير
طب أعلى نقطة دي مع الوقت بتتغير يعني مثلا السهم اللي هو وصل 100 ده عمل قلنا انخفاض 80 فده كده 20% انخفاض طيب بعد سنة السهم طلع من 80 لـ 150 وبعدين نزل من 150 لـ 120 فنزلهنا 30 دولار اللي هما برضو 20% ولكن نزلهم من نقطة أعلى يبقى مش معنى الدروداون إن هو هنا في المثال الأول 20% وفي المثال دلوقتي 20% بس ده نازل من 100 وده نازل من 150 مش معناه إن أنت ما كسبتش لا أنت كسبت بس هنا إحنا بنقيس التذبذب لتحت قد إيه أقصى حاجة ممكن تيجيلك من التذبذب بتاع الأسهم لتحت من أعلى نقطة وصل لها مع الوقت لو الأسواق دي بتطلع بشكل عام وده المفهوم المتعارف عليه هنلاقي الدروداون دي بتحصل من نقط أعلى كل مرة
أنا هنا عايز أعمل إيه عايز أفتح السهم وأبص مثلا على 10 سنين اللي فاتوا أو على 15 سنة اللي فاتوا وبص كام مرة حصل خصومات أو كام مرة حصل دروداون عشان أبتدي أأهل نفسي سيكولوجيا أنا هحط فلوسي خلينا مثلا نقول مثال في الأس أند بي 500 أو في صندوق استثمار بيتبع الأس اند بي 500 اللي هو أكبر 500 سهم في أمريكا طيب إيه اللي حصل في الفترة دي في الاس اند بي 500 هبتدي أقعد وأهل مخي وأهل نفسي إن أنا إيه معدل الخسارة لو أنا النهارده أول مرة بشتريه وبستثمر في حياتي ايه معدل يحصل لي
هنلاقي إن الخصومات الجامدة في حاجة زي الإس اند بي 500 دي مبتحصلش كتير يعني يمكن حصلت سنة 2000 إن الدروداون ده عدا الـ 50% ده في (الدوت كوم بابل) Dot-com bubble وفي 2008 في الأزمة المالية العالمية دول في مثلا على مدار خلينا نقول 80 سنة اللي فاتوا المرتين اللي حصل فيهم الدرودوان ده كان بشكل عنيف في الجيل بتاعنا يعني كان في 2008 وسنة 2000 يمكن في مرة قبليهم في السبعينات يعني قربنا من 50% دروداون يعني إيه حصل الدرودون 50% عشان الناس متتلخبطش حصل إن أنا من أعلى نقطة إن النقطة اللي وصلتلها سنة 2000 كانت عالية قوي ونزلت 50% فلو أنا كنت بالصدفة مشتري في اليوم ده أول يوم في حياتي بشتري فأنا خسرت 50% طبعا ده مثال مش بيحصل لأنك أنت مبتشتريش في يوم واحد ومبتشتريش دايما في أعلى نقطة والكلام ده كله يعني ده نادر الحدوث يعني بس ده اسوأ سيناريو
طيب الحاجات بقى المكررة أكتر الخصومات بتحصل بنسب قد إيه هنلاقي ان في الـ 80 سنة اللي فاتوا 25% بتحصل مقررة أكتر من 50% يعني أنت ممكن تلاقي خلال السنة أو السنتين أو التلاتة إن أنت ممكن يكون الحاجة نزلت بنسبة 25% حصلت كام مرة حصلت مرة في 2022 حصلت مرة سنة 2020 في الدرو داون أو النزول الجامد بتاع الكورونا يمكن السوق نزل تحت الـ 25% بشوية
حصل طبعا عشان الأزمة العالمية زي ما قلنا السنتين اللي فاتو دول هو أكتر نزل لحد الـ 50 حصل في التسعينات في أواخر الثمانينات حصل مرة في السبعينات أو مرتين حصل مرتين في الستينات حصل مرة في الخمسينات فكده معناها إن إحنا في ال80 سنة اللي فاتوا غالبا بيحصل مرتين كل 10 سنين اللي هو الدروداون الـ 25%
وهنا ممكن واحد يقول لي على فكرة ما ده معناها فرصة إن في نسبة خصم 25% على المؤشر ليه متشتريش طبعا دي من الحاجات اللي أنت تقدر تقيس بيها هو أنا في حدث Event بيتكرر كتير ولا لأ يبقى إحنا قلنا الـ 50% في الإس أند بي تكررت مرتين فقط في الـ 80 سنة اللي فاتوا وحدثين كبار أو خلينا نقول 3 مرات في السبعينات أو أوائل الثمانينات يمكن حصلت مرة ومرتين اللي هما قريبين والمرتين دول احتاجوا أزمة عالمية كبيرة قوي عشان يحصلوا يعني (دوت كوم بابل) بتاعت 2000 دي كانت أزمة كبيرة شركات الإنترنت لما حصل لها انهيار و2008 فأنت عشان تشوف الـ 50% دروداون ده أنت محتاج حاجات كتير قوي تبوظ طب الـ 25 زي ما قلنا هي ممكن تحصل مرتين تقريبا مرتين لثلاث مرات كل عشر سنين فدي حاجة مكررة طب الدروداونز الأصغر بتتراوح حوالين الـ 10% ودي بنشوفها بنسبة متكررة في فترات كتير يعني الـ 10% ما تعتبرش انخفاض جامد قوي يعني بالنسبة للإس اند بي
إحنا هنا بنتكلم على مؤشر فيه 500 سهم في سوق أمريكي فأنا النهاردة لو هقعد اتكلم مع حد هوريله الأرقام دي
الأرقام دي على فكرة أنت ممكن تعملها على أي منصة تحط كلمة دروداون هتلاقي الرسوم البيانية موجودة هتشوف تاريخيا الأرقام اللي أحنا بنتكلم عليها دي ممكن تعملها على (تريدنج فيو) ده منصة مجانية تقدر تاخد الدراسة دي وتحطها على أي أسهم أو على أي مؤشرات أو على أي صناديق استثمار أو أيا كان فهنا أنت بتعرف نفسك سيكولوجي أنا هنا عرفت أنا هعمل إيه أو عرفت أنا لو هأخسر
أنا هخسر قد إيه لو اشتريت في أعلى نقطة وبعت في أقل نقطة أنا هأخسر قد إيه طبعا مش ده اللي إحنا بنعمله أو مش ده اللي إحنا بننصح بيه بس دي حاجة سيكولوجية الحاجة الثانية اللي أنا إستفدتها إن أنا هنا عرفت إن الإس اند بي إيه نقط الشراء بتاعتي لو حصل دروداون جامد
الكلام ده مش هنطبقه ع الأسهم الفردية لإن الأسهم الفردية بيبقى عندها ممكن حاجات تانية ولكن أنت هنا بتشتري صندوق استثمار فعايز تشتريه في نقط كويسة فده ممكن يكون طريقة إن أنت 1. تعرف المخاطرة بتاعتك، 2. تعرف أنا ممكن أختار نقط أزود فيها فلوس يعني مثلا لو أنا بستثمر كل شهر 100 دولار وفجأة لقيت دروداون كبير فممكن أستغله وأحط 200 دولار أو 300 دولار كاستثمار هذه النقط لإن بعد شوية السوق ممكن يرجع
طيب يبقى أنا هنا فهمت إيه هو الدروداون لما أكون جوه الدروداون بقى مابتديش أعمل الغلطات اللي هي بنشوفها الناس الهواه بتعملها في معظم الأوقات وده بيبقى جاي من مع الأسف من الخوف اللي هو أنا كان عندي محفطة ومحافظة بتكبر وبحوش فيها سنين ودخلت في دروداون دخلت في تخفيض جامد طيب لو الحاجة دي متوقعة أو أنا مثلا الـ 25% دي بشوفها كل 3 سنين يبقى أنا ليه مخضوض المرة دي أه أنا خسرت 25% من رأس مالي في الفترة دي بس غالبا هرجع أعوضها بعد شوية يبقى أنا هنا عرفت معلومة جديدة إن اللي بيحصل ده حاجة طبيعية مش حاجة مثلا أول مرة تحصل لي والكلام ده أنت ممكن تكون أول مرة تحصل لك عشان أنت لسه داخل السوق جديد أو عمرك ما كنت في السوق قبل كده ولكن بالنسبة لتاريخ الأداة اللي أنت بتشتغل بيها دي حاجة موجودة ومكررة كتير
إزاي ممكن نعمل مسح زي ما قلنا على تريدنج فيو أنت ممكن تفتح المؤشر ده اسمه دروداون بير سنت Drawdown percent) أو على أي نظام أو سوفت وير أنتوا بتشتغل بيه وممكن تشوف الأسهم كلها مع بعض الصناديق الكلام ده كله الانخفاض بتاعك قد إيه
طيب توزيع الأصول برضو يمكن ده كلام بديهي العوائد بتبقى واطية في حاجات وعالية في حاجات والدرو داونز كمان بتبقى واطية في حاجات وعالية في حاجات يعني مثلا لو جبنا صندوق استثمار في الأسهم الانخفاض بتاعه غالبا هيبقى أعلى اللي هو ممكن يحصل له تخفيضات أعلى غير صندوق أدوات الدخل الثابت اللي هو المفروض بيبقى عنده عائد دوري من الحاجات اللي هو بيشتريها سواء صكوك أو سندات أو أيا كان فطبيعي إن الدروداون بتاعك اللي موجود في الأسهم هيبقى أعلى طب لو مثلا روحنا محفظة كريبتو أو صندوق بيشتغل في الكريبتو أو أي حاجة غالبا الدرو داونز بتاعتها أعلى البوم والباصت بتاعتها أعلى فابالتالي هيبقى أعلى
هنا الميزة بقى اللي أنا عملت إيه أنا عرفت برضو الدروداونز بتاعة مثلا صندوق الدخل الثابت بتتراوح مثلا من 2 لـ 3% في الأوقات العادية و10% لو في أزمة كبيرة 20% ولكن الأسهم مثلا قلنا 10 15 وبعدين 25 وبعدين 50 فهنا أنا فهمت إن فئة الأصل ده في أسوأ حالاته هيعمل كده وفي أسوأ حالاته هيعمل كده لما بحط بقى محفظة متنوعة من الإتنين اللي عملت 60/ 40 أنا هنا خلطت ودرودانز وغالبا الإتنين ما بيجوش في نفس الوقت أو المخاطرة أو الخبطة اللي بتيجي في المحفظة دي وفي المحفظة دي مش هييجوا مع بعض فبالتالي
الكومبو بتاع المحفظتين 60/40 لما أحطهم مع بعض الدروداونز بتاعتي ممكن تبقى ميكس ما بين الإثنين اللي هو واخدة شوية من الأسهم وواخدة شوية من السندات وممكن أصلا تبقى المجموع بتاعهم يبقى أقل لإن ممكن الأسهم بتكون بتنزل والسندات بتطلع فالدرو داون أصلا ما يحصلش
فدي فكرة إن أنت ممكن توزع في فئات الأصول المختلفة زي ما قلنا ممكن العقار يبقى الدرو داون بتاعه عالي ممكن الأسهم يبقى عالي ولكن السندات والكاش غالبا الدرو داون بتاعهم بيبقى واطي جدا
طيب في اختيار الاسهم لو أنت قررت في يوم من الأيام تشتري أسهم معينة أسهم مثلا مضاربة أو أسهم عايز تعمل فيها تداول يومي أو أيا كان الطريقة اللي أنت حتشتغل بيها الأسهم الفردية حتبتدي تعرف شخصيات الأسهم من الدروداونز بتاعتهم هل السهم ده يعتبر المستثمرين فيه ممكن ينزلوه جامد ممكن يطلعوه جامد وهنلاقي أسامي كبيرة زي ابل وأمازون وغوغل والحاجات دي في فترات معينة يمكن جوجل لأ بس أبل وأمازون
يعني في فترات معينة الدورداونز بتاعتهم كان 70% 80% فحتى الأسهم الكبيرة عشان هي اسهم فردية ممكن تنزل جامد
هنلاقي القطاعات ليها تأثير يعني هنلاقي مثلا قطاع مثلا زي الصحة زي التعليم الحاجات اللي هي دي تعتبر دفاعتي الانخفاضات بتاعتها أوطى بكتير من قطاع التكنولوجيا قطاع الطاقة قطاع التصنيع الكلام ده كله ليه لإن بيبقى فيه حاجات غير متوقعة في القطاعات دي مقابل حاجات متوقعة في قطاعات الثابتة يبقى كل ما القطاع بيبقى دفاعي كل ما يكون الدرودوانز بتاعتك أقل فهنا أنا فهمت التوزيع بس من ناحية ثانيه أو فهمت تنوع سواء بقى القطاعات أو الدول أو الأسهم أو أيا كان التناول اللي أنا بعمله في محفظتي بس عملته من ناحية الدرو داون أو فهمته على الأقل
إمتى بيحصل إن كل حاجة بتنزل مع بعضه لو دخلنا في حدث زي الأزمة العالمية بتاعت 2008
ده الوقت الوحيد اللي الأسهم غالبا كلها هتعمل انخفاض مع بعض لإن هنا بيبقى بشكل عام الناس بتتخارج من الأسهم كمكان بشكل عام هنا وقتها الدروداون هيبقى عالى و مرتبط وغالبا محفظتك كلها هتنزل ولكن تاني لو أنت عامل توزيع مظبوط بعد شوية المفروض هيحصل انتعاش وهيرجع المحفظة بتاعة الأسهم المتنوعة دي تطلع الحالة الوحيدة اللي بتعملنا شوية صداع في المخاطرة في الفترة دي إن أنا بقى بكون دخلت في فئات أصول أخرى يعني مثلا واحد عنده بيت في حتة معينة مش متأثرة بالأزمة العالمية أو واحد عنده مثلا دهب أو واحد عنده أدوات دخل ثابت فهي في الوقت دي هي حامته في هذا الحدث مفيش حاجة واحدة صح هو تحمل مخاطر واحد بيقول لأ أنا عندي وقت وعايز أقعد 20 سنة لسه بأستثمر فأنا معنديش مشكلة في الدرودانز أنا مستعد أخد مخاطرة أعلى فياخد الحاجات اللي ممكن تنزل 20 و 30% ماعنديش اي مشكلة لإن أنا واثق في المستقبل بتاعهم وفي واحد يقول لأ أنا قرب التقاعد أنا عايز حاجة مفيهاش درودونز واطية فعشان كده مهم جدا إن أنت تشوف لو بتشتري صندوق استثمار تشوف درودانز تاريخيا بتاعته من أعلى نقطة وصل لها نزل قد إيه وخد وقت قد إيه عشان يعوض ويرجع فوق الارقام دي لو أنت بتعمل محفظة متنوعة تبقى فاهم الأسهم أو القطاعات اللي أنت بتأخذها هل هي خطيرة ولا لأ كل ده أنت مش هتعرفه من أول يوم أو مش حتطبقه من أول يوم ولكن أنت بتفتحلك سكة إن أنت تفكر في تاريخيا لإن الموضوع بديهي جدا أنت لو بتشتري لبس هتشوف إمتى بينزل أحسن تخفيضات في الوقت ده عشان أعرف أشتريه مثلا بسعر أحسن لإن أنا كده كده هتوفر فلوس نفس الكلام في الحاجات دي لما تكون بتبص على قطاع معين أو حاجة معينة ولقيته نازل مثلا 20% أو 30% وهو مثلاً في العادي ما بيعملش كده ممكن تكون فرصة استثمارية كويسة وهكذا فدي زاية مختلفة عايز الناس برضو تبص عليها تاني هو موجود وسهل يتحسب أنت ممكن تحسبه بالورقة والقلم يعني هو أعلى نقطة إحنا نازلين من عندها قد إيه تاريخيا برضو نفس الكلام أقدر أطبقه فمهم قوي تبقى فاهم مش مهم إيه اللي بيحصل في السوق مش مهم إيه اللي نزله إيه اللي طلعه أنا هنا مش بتكلم على إيه الأسباب اللي نزلته وطلعته ولكن السلوك بتاعه إيه لو عرفت السلوك بتاعه أنا عرفت قدرة التحمل بتاعي هل أستحمل لو اشتريت شركة دي ونزلت عليا النسب دي ولا لأ طبعا إحنا تاني مش بنشتري في على نقطة دايما إحنا بنشتري في نقط مختلفة فأكيد مش تاخد ده ده أسوأ سيناريو أعلى أنخفاض زاوية مختلفة تقدر تبص عليها إن تتكون محفظتك خطوة أقرب إن أنت تفهم المخاطرة بتاعة الأسواق لو الموضوع صعب وعندك أي سؤال برضو ممكن تبعتلي أو لو شفت رسوم بيانية معينة ومحتاج تتكلم فيه دايما هاخد أسئلتكم مش عايزك تبني المحفظة بهدف ان أنا عايز أقلل الدروداونز مش ده الهدف من الحلقة الهدف من الحلقة تعرف إن ده مصطلح موجود وتقدر تبص عليه وتفهمه وبمجرد انك فهمته أنت نفسك هتستريح فلما هيحصل حاجات في السوق مش هتفاجئك فحتاخد قرار تاني أحسن وهكذا شكرا جدا على وقتكوا أشوفكم إن شاء الله الأسبوع الجاي
Translation of some words and terms:
Risk: المخاطرة
Identify: تحدد
Drawdown: الانخفاض في القيمة
Drawdown Percent: نسبة الانخفاض
On Sale: نازل في السعر
Obvious: واضح
Platform: المنصة
Charts: الرسومات البيانية
Trading View: نظرة على التداول
Within Expectations: ضمن المتوقع
Scanning: مسح أو فحص
Asset Allocation: توزيع الأصول
Returns: العوائد
Fixed Income: دخل ثابت
Day Trading: تداول يومي
Single Stock: سهم واحد
Defensive: استثماري دفاعي
Correlation: العلاقة بين الحاجات
Recovery: التعافي
Risk Tolerance: مدى تحمل المخاطرة
Behavior: السلوك
Maximum Drawdown: أقصى انخفاض
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #drawdown