181. إعادة توازن المحفظة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهارده بنتكلم عن أداة مهمة لكل مستثمر، وهي "إعادة توازن المحفظة" الهدف من إعادة توازن المحفظة هو الحفاظ على المخاطر وضمان إن المحفظة بتاعتك متماشية مع أهدافك الاستثمارية اللي انت حاطتها لنفسك من أول يوم
في هذه الحلقة:
مفهوم "إعادة توازن المحفظة" والهدف منه
أهمية التوازن بين الأصول المختلفة
إزاي الأوزان في المحافظ المتنوعة بيتغير مع الوقت
إدارة المخاطر عن طريق إعادة التوازن
إمتى إعادة التوازن بيكون مفيدة؟
إعادة التوازن الديناميكي بناءً على ظروف السوق
مثال رقمي لتوضيح الفائدة من إعادة التوازن على المدى الطويل
إزاي تستخدم إعادة التوازن عشان توصل لأفضل عائد على المدى الطويل
سواء كنت مبتدئ أو محترف الحلقة دي هتساعدك تدير استثماراتك بشكل أفضل، متنسوش تحملوا الإكسيل شيت من على الموقع واستنونا الاسبوع الجاي إن شاء الله
اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلا بيكم في حلقة جديدة من بودكاست كلام ينور، النهاردة أنا هتكلم على موضوع اسمه أو إعادة توازن المحفظة، الموضوع ده لطيف، خلال الحلقة دي هدي مثال يحاول على الأقل يوضح للناس بشكل رقمي تقدر تتخيله، أنا عارف إن برضو الناس ممكن تكون تسمع الكلام ده لأول مرة، أو هو مش موجود بشكل كبير، أو ممكن حد محترف هو اللي في المجال بس هو يكون عارف المصطلحات دي، بس هدفي النهاردة إن إنت تبقى عارف إن أنت لو ابتديت تستثمر إيه الأدوات الصغيرة اللي أنت ممكن تستخدمها، أو متستخدمهاش، يعني ممكن تكتشف إن موضوع إعادة التوازن ده ملوش معنى بالنسبالك، أو أنت مش محتاجه، فتسليط الضوء على الموضوع نفسه بالنسبالي مهم إن أنت تبقى فاهم يعني إيه إعادة المحفظة، إيه أنواعه هو إيه؟ وزي ما قلنا كده هندي مثال رقمي يحاول يبسطلك المفهوم ده بشكل عام
زي ما اتكلمنا قبل كده، إحنا في كذا حلقة بنتكلم على المحفظة المتنوعة منها الـ 60 أسهم، 40 أدوات دخل ثابت أو المحافظ المتنوعة، عملنا حلقة على أنواع المحافظ متنوعة بشكل كامل، إعادة توازن محفظة بيجي بقى يكمل الموضوع ده
يعني إيه إعادة توازن المحفظة إن أنا برجع المحفظة للأوزان الأصلية بتاعتها اللي اتفقت مع نفسي أول يوم إن هما يبقوا كده، يعني إيه الكلام ده؟ أنا النهارده حطيت مثلا اخترت كمثال بسيط، محفظة ال60، 40 و حطيت 60% من فلوسي أسهم و40% أدوات دخل ثابت، يعني أنا معايا 100 دولار، حطيت 60 دولار هنا و40 دولار هنا، طيب بيجي مثلا بعد سنة، بعد سنتين الأسهم اتحركت وأدوات داخل الثابت اتحرك فلما ببص لقيت محفظتي للتسهيل يعني بقى قيمتها 110 هيطلع 10% بشكل عام ولكن لقيت إن ال60/ 40 الميكس ما بين الإتنين اختلف، يعني كانت 60/40 عند المية كان عند 60 دولار، هنا 40 دولار هنا، لكن النهارده بقت ب110 طيب إيه اللي بيخليها تختلف إن الأداء بتاع الأصل ده بيختلف عن الأداء بتاع الأصل ده، من النادر إن أنت تاخد أصلين معينين أو فئات وصول، هيطلعوا بالظبط 10% هما الإتنين، فالأداء بتاع المحفظة بتاعتك هيبقى 10% بشكل عام، لإن لو قلنا إن الأسهم طلعت 10% فال 60 بقت 66 وال40 بقت 44، فمعنى كده الوزن النسبي هنا 60/40 دي نسب ما زالت محافظة على نفسها، ليه؟ لأني طلعت 10% هنا وطلعت 10% هنا، فبالتالي كنت 60 بقت 66 فاكسبت 6 في ده و40 كسبت 4 في ده، وبعدين المجموعة الاتنين بقوا 110%، فكده بشكل عام وبشكل بسيط أنا طلعت 10% المحفظة كلها، ولكن الأصل رقم أ اللي هو الأسهم طلعت 6 وب طلعت 4، فبشكل عام أنا طلعت 10%
لو حصل السيناريو ده أنت مش محتاج تعمل إعادة توازن ليه؟ لإن المحفظة ما زالت عند أوزانها الأساسية، يبقى إحنا بنقول إعادة التوازن هو إيه من أنت بترجع المحفظة لأوزانها الأساسية، ففي الحالة دي انت مش محتاج تعمل حاجة، الأسهم طلعت 10، أدوات الدخل الثابت طلعت 10 فمبروك أنت مش محتاج تعمل حاجة
طيب فيه بقى سيناريو تاني، بنلاقي إن الأسهم هي اللي طلعت مثلا من 60 ل70، أنا كنت حاطط 60 دولار وبقت 70 دولار الأسهم، بصيت على أدوات الدخل الثابت لقيتها 40 زي ما هي، حصل بقى في اختلاف يعني أياً كان الأسباب إيه اللي حصل اللي مخلهاش تطلع طبيعي إن أنت ممكن ما تكسبش على أدوات الدخل الثابت في المحفظة اللي فيها سندات يعني، بس خلينا نقول للتسهيل محصلش الطلوع ده
فأنا النهاردة طلعت من 60 ل70 في الأسهم، 60 دولار مش وزن 60 دولار، طلعت ل70، وأدوات الدخل الثابت بقت 40
المفهوم بتاع إعادة التوازن بيقولك ايه؟ بيقولك أنا عشان أدير المخاطرة هنا مش عشان أدير العوائد، عشان أدير المخاطرة على المدى الطويل يعني إيه أقلل المخاطرة بتاعتي متخليش أصل من الأصلين يكبر قوي، فيسبق الأصل التاني رجعهم للأوزان الأساسية بتاعة اللي أنت اتفقت عليها من اليوم الأول، عشان فيه أصل منهم طالع جامد، وفيه أصل منهم مش طالع، فأنت بتبيع من اللي طالع وبتشتري في اللي مطلعش، فمعنا كده إيه أنا هاخد ال 110 اللي معايا دول قلنا 70 أسهم و40 ما زالوا اللي هما الأساسين بتوع أول يوم ما زال في أدوات الدخل الثابت، أنا محتاج أرجع للأوزان الأساسية، فعشان أرجع 60 / 40 هأرجع بقى ل66/ 44، فهروح بايع 4 من الأسهم، وأروح داخل شاري بيهم أدوات داخل سبت 44، طب أنت بتقولي هنا ان أنت زودت المخاطرة بتاعك في أدوات الدخل ثابت، أه، بس في نفس الوقت قللت الأسهم بتاعتي، أنا عملت الحركة دي ليه؟عشان أدير المخاطرة، ببيع حاجة طلعت ممكن تنزل بعد شوية ممكن لا، بس أنا بأبيع حاجة طلعت وبشتري الحاجة اللي ما طلعتش في محفظتي وبرجع للاستراتيجية بتاعتي، وبرضو أنت هنا بتلتزم بالألتزام اللي أنت متفق مع نفسك إن أنا هو ده المخاطرة اللي أنا عايزه من أول يوم، فلو المحفظة حصل لها انحراف أو حاجة كبرت عن حاجة، أنا بعمل اعادة توازن، يبقى هنا أنا بعمل إعادة توازن ليه؟ عشان أحافظ على المخاطرة بتاعتي إن أنا مفيش حاجة تكون طلعت زيادة عن اللزوم وأنا ماستفدتش منها
طيب لو على مدار وقت قليل قوي بنت بتكلم عن الناس السلبية اللي هو كل مثلا أسبوعين تلاتة، ببص ع المحفظة وكده، فده هيبقى بالنسبة لي إعادة توازن سريع جدا ومش هتستفيد من الطلوع، ومحتاج تسيب وقت وهتعمل تكلفة تداول trading cost كبير وهكذا، فالناس دايما بتتجه عشان بيبقى فيه عمولة أو بتعمل أي حاجة من الحاجات دي، فأنت لأ الأفضل إن أنت ممكن تأخذ وقتك، تخلي الاستراتيجية بتاعتك تشتغل، تخلي الأسهم تكبر أو الأصول تكبر واحدة تكبر عن التانية، فتديها فرصة إنها تطلع وهكذا، الناس بتروح أكتر ناحية التوازن ممكن مثلا كل 3 شهور كل 6 شهور أو كل سنة، وفي المحافظ اللي هي السلبية قوي، الناس بتم بتروح أكتر كل سنة، بحيث إن تدي فرصة للفكرة بتاعتك إن هي تشتغل خلال السنة
طب ممكن واحد تاني يقولي أنا عندي أصلين ساهمين مثلا أو أيا كان نوع الأصل وفي حاجة جريت منهم جامد قوي في واحد طلع مثلا مرتين ثلاث مرات وأنا ما بقتش قادر أستحمل إن هو طلع تلات مرات مثلا إعادة تدوير جامد فمحتاج أعمل توازن آه ممكن ده حاجة اسمها إعادة التوازن الديناميكي إن أنت في ظروف السوق حصل خلاك تضطر انك ترجع الأوزان بتاعتك للأوزان الأصلية
طيب إمتى بيبقى إعادة التوازن ده حاجة كويسة جدا جدا، يعني إيه أكتر حالة أنت ممكن تشوفها وممكن هنا نتكلم بمثال رقمي، إيه أكتر حالة ممكن تشوفها تحس إن التوازن ده فعلا فعلا افاد الراجل اللي بيعمله وإمتى مبيفتش الناس اللي بتعمله وبناءاً على الموضوع ده، أنت ممكن تفكر هنا أنت محفظتك ممكن تعمل حاجة بالشكل ده ولا لأ؟
فهناخد مثال رقمي كده لأصل الأول أ وب، أنا عندي أصلين، والأصلين دول بيعملوا حاجة غريبة، يعني هناخد مبالغة شوية إن إحنا نعمل الموضوع عشان نفهم ونفهم قد إيه الفايدة بتاعته لما حتحط الأرقام المبالغ فيها دي، طيب أنا عندي سهمين أو عندي أصلين أيا كان هم إيه، ابتديت أول يوم 50 هنا و50 هنا بحط 50 دولار هنا و50 دولار هنا، هنحط الأداء بتاعهم إن هو شوية إن أنا في الأصل الأولاني، أنا أول سنة هضاعف فلوسي هعمل 100% هطلع مرتين، وفي السنة التانية هخسر نص فلوسي، السنة التالتة هعمل دبل، السنة الرابعة هأخسر نص فلوسي، سنة خمسة هعمل دبل، السنة السادسة هأخسر نص فلوسي، السنة السابعة هعمل دبل والسنة الثامنة هخسر نص فلوسي فهنا الأصل ده عنيف جدا جدا اللي هو إيه هو بيضاعف، والسنة اللي وراها بيخسر نص الفلوس
طيب الأصل التاني بيعمل إيه بقى، أول سنة بيخسر نص فلوسك، العكس بقى، بيخسر نص فلوسك، وبعدين السنة اللي وراها بيضاعف، يطلع 100% طب السنة اللي وراها بيخسر نص فلوس، وبعدين بطلع الضعف وهكذا لحد السنة الثامنة برضو، فأول واحد هو بيضاعف أول سنة وبعدين بيخسر نص فلوسه، والتاني بيخسر نص فلوسه الأول، وبعدين بيضاعف، لو أنا محطيتش أي توازن وقعدت 8 سنين في الموضوع ده مش هعمل حاجة بمعنى إيه إن أنا اللي هأكسبه في الأصل الأول هخسره في الأصل التاني ليه؟ لإن أنا حطيت 50 والـ 50 بقت 100 وبعدين خسرت نص ال50 اللي هي الأصل التاني خسرت نص ال50 بيبقى 25 في محفظتي بقت 125 ده أول سنة أنا آه كسبت عشان الأصل الأول اضاعف والتاني نزل النص والنص ده 25 بس الدبل 50 بقيت عندي 125 أنا مش عايز بس الأرقام تتوهكوا، بس خلينا نقول إن أنا هنا كسبت 125، بقيت عندي محفظتي بقى فيها 125 معملتش توازن معملتش أي حاجة
السنة التانية الأصل بتاعي الأولاني، خسرت كان عندي 50%، فخسرت دلوقتي نصهم، رجعت تاني لل 50 ، والأصل اللي هو الفئة التانية كانت 25، عملت لها مضاعفة بقت 50، فرجعت تاني لل 100، فمن الأخر حأقعد ال 8 سنين، أكسب أول سنة، وبعدين أخسرهم كلهم ثاني سنة، أكسب أول سنة وبعدين أخسرهم ثاني ثاني سنة وهكذا، لحد ال8 سنين ما تخلص معملتش أي حاجة مع إن هنا كان في حركة جامدة في الأسهم أو في الفئة الأولى أو الفئة التانية، مرة تانية بنقول بنضاعف وبعدين بنخسر نص الفلوس وبعدين بنضاعف وبعدين بنخسر نص فلوس، والتانية العكس، لما أنا برضو ممكن أحط لكم إكسيل شيت في الحلقة دي يبين لكم الأمثلة دي لإن أنا حاطتها قدامي وشايفها فالموضوع بالنسبة لي بسيط
طب لو عملت إعادة توازن بقى اننا هاخد نفس الأداء بتاعت المحفظة دي بس هعمل حاجة واحدة هاجي كل اخر سنة وهأعيد توازن المحفظة ممكن الكلام يكون معقد وممكن يكون صعب ولكن هو بسيط جدا
فإيه اللي حصل اول سنة كان عندي ال50 في الفئة الأولى وعملت فيها الضعف فالخمسين دي بقت كام يا جماعة بقت 100، طيب الفئة التانية 50 خسرت نص فلوسي فيها فبقت 25، فمجموع الأصليين النهارده بقت كام 125 أنا ابتدت بـ100 واخر السنة دي بقى عندي 125 في محفظتي، فعملت إيه رحت مكلم الراجل بتاعي السمسار بتاعي أو المحفظة أو النظام الإلكتروني اللي أنا بشتغل عليه، والله أنا عندي 125 دلوقتي أنا محتاج أعمل إيه محتاج أعمل إعادة توازن يبقى أنا هرجع الأصول بتاعتي للأوزان الأصلية بتاعتها إيه هي الأوزان الأصلية؟ 50/50 في الحالة دي حلو، أخدت ال 125 دي قسمتهم على إتنين اللي هو هيطلع كام 625، طب أنا معايا كام في الأصل الأول يا جماعة إحنا عملنا الضعف فالـ 50 بقت 100 فرحت بايع ونازل لـ 625، عملت إيه بعت 375 من الفئة الأولى خدت الرقم ده واشتريت بيه الفئة التانية طلعتها لها 625 فبقى معايا 625 هنا و625 هنا، الكلام ممكن يكون معقد وصعب وتقيل، ولكن الموضوع أسهل من ما أنت متخيل لما تحطه كده على ورقة تكتبوا أو تكتب ورايا هتلاقي الموضوع سهل
فالفئة التانية هتبقى فيها كام 62 الفئة الأولى بقى فيها كام 62 حلو العوائد بتاعتي بقى هعملها زي ما اتفقنا، تاني سنة إيه اللي حصل؟ الفئة الأولى بتخسر نص فلوسها، والفئة الثانية بتعمل الضعف، الـ 625 دول اللي هم الفئة رقم واحد بقوا 3125 طيب الفئة التانية عملت الضعف إحنا قلنا الفئة الأولى بتعمل ضعف وتخسر نص وبعدين تضاعف وبعدين وبعدين تخسر نص التانية بالعكس، فإحنا في السنة الثانية الفئة الأولى بتخسر نص فلوسها، الفئة التانية بتضاعف عندي فيها كام عندي 625 إن أنا عملتهم إعادة توازن فالنسبة بقت 125 الضعف لما هاخد ال 125 وهجمعها على ال 3125 اللي أنا عملتهم في الفئة اللي هي بقى حجم محفظتي بعد الخسارة نص فلوسي بقيت عندي 156 فأنا اتحركت من 125 ل 156
السنة اللي وراها خدت 156 دول قسمتهم على إتنين عملت إعادة توزيع لما أحفظ فبقى عندي 78 و كده 781 781 وان حطتها في الأصل الأول وال 78 حطيتها في الأصل التاني عملت توازن
الأولاني بيضاعف والتاني بيخسر النص الضعف بتاع ال 78 بقى 156 78 لما خسرت النص بقت 39 وشوية لما جمعت الإثنين لقيت عندي 195، إيه ده أنا ضاعفت فلوسي من أول يوم، ده أنا كنت بدي ب100 إزاي وصلت ل195؟ يعني أنا كنت بادي بـ 100 النهارده وصلت 195 لإني عملت إعادة توازن للفئة اللي طالعة جامد واشتريت الفئة اللي نازلة جامد في المحفظة بتاعتي
بس ده مثال مثالي perfect إن هو يشتغل، يعني إيه مثال مثالي؟ يعني أنت عندك أصلين بيمشوا عكس بعض السنة اللي ده بيطلع فيها جامد، التاني بينزل جامد وهو ده أحسن نموذج ممكن يشتغل فيه إعادة التوازن أنا بديهولك كده كمثال رقمي عشان أوريلك كذا حاجة، إن لما الأصلين يبقوا ماشيين عكس بعض ده مفيد جدا لمحفظتك لإن فيه واحد بيطلع وواحد بينزل وأنا بقلل وبزود في ده فبستفيد من هذه الحركة ده واحد، إتنين، إن أنت موزع مخاطرتك هنا وتوزيع المخاطرة هنا بيقلل المخاطرة إن أنت بتاخد قرار كمان بعد التوزيع إن أنت تعمل توازن، فلو أنت طلعت غلط في واحد من الإتنين ما عندكش مشكلة، لإن المجموع هو المهم بالنسبالك، تلاتة لما يكون الأصلين بيطلعوا أو بينزل جامد وأنت قعدت سنين من غير ما تعمل إعادة توازن زي المثال الأول أنت ال 100 بتاعتك بعد ال 8 سنين كانت ما زالت الـ 100 لإن اللي بتخسره هنا بتكسبه هنا، ولكن في المثال ده أنت في تالت سنة طلعت من مية ل 195
طب لو رحنا للسنة الثامنة لما تمشي معايا في الحسبة كده هتلاقي نفسك وصلت ل 596 يعني أنت ابتديت الفلوس 100 النهارده أنت معاك قرب 600 والعائد على الاستثمار بتاعك 25% في السنة طب إزاي العائد على الاستثمار بتاعك 25% في السنة أه ما أنت بتكسب في واحد 100% وبتخسر في واحد تاني 50% كل سنة، ولكن لما بنتجمع وبتعمل إعادة توازن وبتعمل إعادة توزيع المخاطربتاعتك بتلاقي إن العائد المتوسط هو تقريبا على المثال اللي احنا ادناه الرقم ده 25%
طيب دي الحالة اللي إعادة التوازن فيها بيشتغل كويس قوي، يبقى أنا لو لقيت في يوم من الأيام أصلين مختلفين بيمشوا عكس بعض واحد بيطلع واحد بينزل أحلى ليه لإنهم ممكن الإتنين يطلعوا ولكن واحد يطلع أقل من التاني شوية، فأنا هبيع من ده وأشتري في ده بس الإتنين طالعين، إيه الأحسن إن واحد يطلع وواحد ينزل، بمعنى إن أنا عندي أصول بتحمي بعضها مش الإتنين يطلعوا مثلا فأعمل إعادة توازن أو الاتنين ينزلوا فأعمل إعادة توازن لأ، فالاظرف عشان كده بنلاقي الناس المحترفين اللي بيدوروا دايما بيدوروا فئات أصول مفيهاش ارتباط ليه؟ لإن هو عايز حاجات تحميه لو طلع غلط في الإستراتيجيات التانية حاجة بتحمي حاجة وحاجة بتحمي حاجة وهكذا، فالمثال ده يبينلك لو قعدت 100% من الوقت بنفس الوزن، أنت ما عملتش أي حاجة، وبالعكس أنت ممكن تكون بتضيع وقتك وبتخسر فلوس ولكن نفس الأداء بتاع نفس الأصل أنت ممكن تاخده في مصلحتك بهذه الطريقة بتاعة إعادة التوازن
طيب ده المثال اللي بيشتغل 100%، امتى بقى المثال اللي مابيشتغلش 100% أو مش هنلاقي إن هو ممكن يأثر معاك لو واحد الوقت بتاعه طويل قوي يعني مثلا واحد بيستثمر 10 - 15 - 20 - 30 سنة وفيه فئة معينة معروفة عنها مثلا زي الأسهم اللي هي على مدار 20 - 25 سنة بيحصل أداء أعلى للأسهم عن السندات مثلا، الراجل اللي بيعمل دي إعادة توازن ممكن يكون بيأثر في النتائج بتاعته أه هو بيقلل المخاطرة عشان ممكن الإتنين بيمشوا عكس بعض في أوقات معينة فالمخاطرة بتاعته هتقل، ولكن العوائد ممكن تقل بهذه الطريقة، لإن أنت بتعمل إعادة توازن، أه هي بتقلل المخاطرة بس برضو في نفسه تقلل العوائد ليه، لأن معروف إن الأسهم في مدار 20 سنة بتعمل أداء أعلى من السندات Up Performs مثلا، فأنت بتبيع الحاجة اللي هي بتعمل أداء أعلى وبتشتري الحاجة اللي متوقع إن هي تعمل أو أخر سقفها أوطى بكتير من الأسهم
طب في الحالة دي ممكن نعمل إيه؟ ممكن هنا نستخدم شوية ديناميك، بمعنى إيه؟ لو الأسهم مثلا لقيتها طلعت بنسبة كبيرة زيادة عن اللزوم، وحاسس ان انت مش قادر تستحمل المخاطرة دي ده ممكن تعمل إعادة توازن وقتها وبالعكس تماما إن أنت تبقى أكثر على الجانب الديناميكي side مش بالوقت اللي هو حصل كوفيد حصل مشكلة كبيرة في الأسواق، تروح رايح ومزود الأسهم بتاعتك جامد قوي في فترة فيها أزمة كبيرة لأنك عايز تستغل الموضوع ده، فده ممكن الطريقة الوحيدة اللي أنت تتجنب بيها الأداء الأوطى على مدار المدة الطويلة بسبب قصة التوازن دي لو أنا متأكد من اللي أنا بعمله
طيب هل ممكن مثلا اخد خطوة كمان زيادة إن أنا مثلا كنت ابتديت 60/ 40 ولكن دلوقتي السوق متبهدل جامد قوي مثلا في الأسهم والعوائد بقت واطية قوي في السندات وهكذا، فعايز أطلع من 60/ 40 أطلع ل 70/ 30 ممكن، ممكن أطلعك 80/ 20 ممكن مفيش حاجة اسمها غلط أو صح إن أنت لازم تبقى مستريح بتوزيع الأصول بتاعك
فالمفترض إن أنت النهارده ألتزمت وقلت أنا السنة دي هعمل إعادة توازن 80/ 20 بسبب مثلا إن الأسهم واطية جدا جدا جدا، ومتستاهلش تبقى واطية كده على مدار مثلا خمس سنين قدام هنندم إن إحنا مشتريناش في الوقت ده، فأنا خدت القرار اللي أنا هعمل إعادة توازن بس أنا هعمل إعادة توازن بوزن أعلى، إعادة التوازن إن أنت ترجعه لأصله، وأصله دلوقتي اتغير من 60/ 40 ل80/ 20، مثلا او حد يقول بالعكس أنا خلاص أنا بقرب من التقاعد ومش قادر اخد مخاطرة وكده، ف حيحصل لي كل سنة إن أنا عايز أزود الأصول الثابتة وأقلل أسهم عشان أنا مش عايز عشان عايز يجيلي دخل ثابت عشان أنا مش عايز أستثمر، خلاص أنا عايز أصرف، الفلوس دي هبتدي أتحول من 60/ 40 لمثلا 50/ 50 وبعدين 40/ 60 أسهم هنا 40 وبعدين هنزل مثلا 30/ 70 وبعدين 20/ 80 وبعدين 10/ 90 مثلا يعني، فأنا بتحرك هنا في إعادة التوازن بتاعي ولكن أنا عندي إستراتيجية وعارف أنا بعمل إيه
ملخص الحلقة دي أنت لازم تبقى عارف أنت بتعمل إيه؟ لازم عندك استراتيجية في التكوين بتاع المحفظة الاستراتيجية دي هتتغير مع الوقت، مش اللي أنت هتبتدي بيه هتفضل عايش بيه طول حياتك، أنت مع الوقت هتكتشف نفسك وهتكتشف إيه اللي أنت مستريح فيه، هتاخد أداة زي إعادة التوازن وتفهم هي بتعمل إيه؟ اقرأ عنه، اعمل جوجل، اقرأ أبحاث عنه أو اقرأ مراجع أو حاجات تانية غير اللي أنا بقوله برضه عشان تبقى فاهم، إيه هو إعادة توازن ولكن عايز افهمك من الحلقة دي إن أنت ممكن تبقى تعمل إستراتيجية معينة على حاجات هي هي إحنا الإتنين بنشتري نفس الأصل ولكن نتائجنا مختلفة، عشان بس واحد بيعمل قرار بطريقة معينة سواء النتيجة دي أوحش أو أحسن، بس إحنا الإتنين كنا بنستثمر في نفس الحاجة، والنتائج بتاعتنا كانت في الحلقة الأولانية صفر على مدار 8 سنين، وفي الحاجة التانية كانت 25% سنويا، بس عشان أنا بأتحرك وبعمل إعادة توازن ، ممكن تلعب بالأرقام، ممكن تحطها على شيت، ممكن تشوف العوائد بتاعت فئة الأصول دي تاريخياً، تجرب الحسبة وتشوف لو عملت إعادة توازن كان فادك ولا لأ، إيه عيوبه إيه مميزاته لو حد يعني طبعا عايز يبحث في الموضوع أكتر
دي كده كان على مقدمة عن موضوع إعادة التوازن و إزاي نقدر نستخدمه يا رب بس أكون بسطت الموضوع، أنا عارف الموضوع معقد ولكن هو في نفس الوقت مش معقد بصراحة أنا بحسه إن هو الموضوع سهل لو الواحد فهمه، لو كان عندك مشكلة في السرعة بتاعة الحلقة دي مفهمتش اي حاجة ممكن تحاول ترجع تسمعها تاني بالراحة، هنسيب على الموقع إكسيل شيت بتاع الحلقة دي وبشكركم شكرا جزيلا، وإن شاء الله أشوفكم الأسبوع الجاي
Translation of some words and terms:
Rebalancing: إعادة التوازن
Manage risk: إدارة المخاطر
Manage return: إدارة العوائد
Passive: استثماري غير نشط (أو سلبي)
Cost of Rebalancing: تكلفة إعادة التوازن
Recycling: إعادة التدوير
Dynamic rebalancing: إعادة التوازن الديناميكي
Market conditions: ظروف السوق
Extreme: متطرف
Aggressive: استثماري جريء (أو هجومي)
Correlations: الارتباطات
More on the dynamic: المزيد عن الديناميكي
Asset Allocation: تخصيص الأصول
Investigate: التحقيق (أو الفحص)
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #إعادة_توازن_المحفظة