171. صناديق التقاعد المقيدة بزمن Target-Date Funds
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
استكمالاً لسلسلة الحلقات اللي بنتكلم فيها عن صناديق الاستثمار المختلفة وخاصة المتداولة، اتكلمنا قبل كده عن صناديق المؤشرات المتداولة والصناديق القطاعية، النهارده بنتكلم عن نوع مميز من الصناديق المتداولة وهو صناديق التقاعد المقيدة بزمن أو Target-Date Funds
في هذه الحلقة :
المميز في صناديق التقاعد المقيدة بزمن؟ -
إزاي الصناديق دي بتشتغل؟ وليه هي مناسبة للتقاعد؟ -
:أسماء الصناديق وسنة التقاعد المستهدفة -
ITDA بيستهدف سنة 2025 -
ITDB بيستهدف سنة 2030 -
ITDC بيستهدف سنة 2035 -
ITDD بيستهدف سنة 2040 -
ITDE بيستهدف سنة 2045 -
ITDF بيستهدف سنة 2050 -
ITDG بيستهدف سنة 2055 -
IDTH يستهدف سنة 2060 -
ITDI بيستهدف سنة 2065 -
نسبة المصاريف لكل صندوق؟ -
إيه الفرق بين الصندوق المستهدف لسنة 2025 والصندوق المستهدف لسنة 2065؟ -
إزاي بيتغير توزيع الأصول داخل الصندوق مع مرور الوقت؟ -
نظرة عامة على أداء الصناديق -
أنواع الأسهم والسندات الموجودة في كل صندوق -
ببساطة، صناديق التقاعد المقيدة بزمن هي التطور لنظام المعاشات، بتستهدف شريحة من المستثمرين عندهم وضوح في سن التقاعد بتوفر لهم استراتيجية تقاعد سهلة وبتكلفة أقل..
لو عندك أي سؤال أو حابب تعرف تفاصيل أكتر عن الموضوع ابعتلنا على صفحتنا
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلا بيكم في حلقة جديدة من بودكاست كلام ينور
تكملة كده للحلقات اللي بتتكلم على صناديق الاستثمار المختلفة وخاصة المتداولة بالنسبة للناس اللي عايزة تعمل خطة التقاعد بتاعتها ممكن تعمل إيه في الإستراتيجيات بتاعتها، ممكن تشتري إيه صناديق أو إيه الأفكار المختلفة، أحنا بنحاول نقدم من خلال البودكاست ده أفكار مختلفة بحيث إن دايما أنا بقول كل واحد بيبقى عنده خطة اللعبة بتاعته أو المتطلبات بتاعته بتختلف عن طريق السن عن طريق تحمل المخاطر بتاعك اتكلمنا مثلا عن الصناديق المتداولة العامة على الأسواق اللي هي مثلا بتشتري حاجة زي الـ S&P 5oo أو مؤشر في سوق عام، تكلمنا برضه على القطاعات
النهاردة هتكلم على حاجة مختلفة شوية بتستهدف شريحة معينة من المستثمرين إللي عندهم وضوح مثلا في سن التقاعد، يعني مثلا أنا عندي مثلا هنقول عندي 40 سنه وعايز أتقاعد بعد 25 سنة، فأنا عارف بالظبط أنا عايز أتقاعد كمان كام سنة أو واحد تاني يقول لا أنا لسه صغير عايز اتقاعد بعد 40 سنة، المفروض أعمل إيه؟
في حلقة النهارده هنتكلم على أنواع من الصناديق المتداولة بيبقى فيها وضوح شوية في الوقت أنا عارف إمتى أنا عايز اتقاعد أنا عارف إمتى أنا عايز فلوسي شبه فكرة المعاشات إن هي عارفة سنك فعارف أنت هتتقاعد إمتى عارفة الألتزام بتاعتها إن هي تديك فلوسك إمتى بنفس الطريقة دي إنت ممكن تعملها لوحدك مش محتاج شركات أو حاجة أنت ممكن تعملها من خلال صناديق الاستثمار متداولة، في الحلقة النهارده هنذكر أنواع صناديق موجودة على السوق الأمريكاني وممكن يكون في صناديق في دول تانيه، يعني هنلاقي النظام ده موجود في الدول ممكن يبقى موجود في البنوك، فاحنا بس هنستخدمها هنا عشان بشكل عام إن هي تبقى متداولة على البورصة إن هي أي حد يقدر يشتريها
حاجة اسمها Target Date Fund (صناديق التقاعد المقيدة بزمن معين) إيه الميزة بتاعته زي ما قلنا إن أنا ببقى عارف الوقت إللي أنا أتقاعد فيه، طب لما أنت بتديني المعلومة كمدير استثمار على الوقت اللي أنت عايز تتقاعد فيه زي ما المبدأ بتاع المخاطرة بنعليها لما أكون صغير ولو كل ما أكبر بحاول أقلل المخاطرة الصندوق المقيد بزمن بيعمل بالظبط الموضوع ده هو بيغير في توزيع فئات الأصول زي ما بنقول إن فيه فئات أصول تعتبر مخاطرة بتاعتها عالية وفيه فئات أصول تعتبر مخاطرة بتاعتها واطية، فلو أنا عندي وقت طويل لسه في الاستثمار لو أنا مثلا عندي 40 سنة في الاستثمار المفروض أنا أنصحك تاخد مخاطرة أعلى ليه؟ عشان عندك وقت أطول فلو حصل نزول في الأسواق لسه عندك 38 سنة، 36 سنة للتعويض، 20 سنة للتعويض، فعندك وقت طويل غير لما واحد مثلا هيكون يتقاعد كمان خمس سنين، لو واحد هيتقاعد كمان خمس سنين وهو مش حيعرف ياخد مخاطرة عالية لأنه هو محتاج الفلوس دي يسيلها وياخدها كمان خمس سنين
يعني افتراضا برضو في المثال إللي إحنا بنقوله واحد عنده 60 سنة النهارده، وهيتقاعد بعد خمس سنين مش هنصحه كمدير استثمار إنه يأخذ مخاطرة عالية في الخمس سنين دي لإن ده وقت قليل، بمقابل مثلا واحد تاني عنده لسه 40 سنة في التقاعد، تارجيت ديت فند ده أوتوماتيكلي بيعمل إيه؟ بيغير في نسبة المخاطرة بتاعتك ما بين الأسهم والسندات، وبيعتبر هنا السندات هي المخاطرة القليلة، والأسهم هي المخاطرة العالية، كل ما يكون عنده وقت طويل فهو بيحط فلوس أكتر في الأسهم، وفلوس أقل في السندات أو أدوات الدخل الثابت، كل ما يكون الوقت قصير بيحط فلوس أكتر في أدوات الدخل الثابت، وأقل في الأسهم دي الطريقة اللي بيشتغل بيها صناديق التقاعد المقيدة بزمن معين، لما هنخش على أمثلة دلوقتي هنفهم الموضوع أكتر هيتبسط أعتقد بطريقة أفضل
ميزة الصناديق المقيدة بزمن كده اللي هو زي Auto Pilot (القيادة الآلية) بتاع الطيارة كده إللي انت بتحطه على القيادة الآلية وخلاص هو بيتصرف لو قدامك 40 سنة هو هيقعد يتصرف في ال40 سنة انت مش محتاج تعمل حاجة، بمعنى إيه؟ إن أنا مثلا لو أنا هتقاعد 2040، وأنا النهارده 2024 أو 2025 فأنا قدامي 15 سنة للتقاعد هنلاقي إن كل سنة سنة 24 هو عنده نسبة أسهم معينة ونسبة سندات السنة إللي وراها هيقلل الأسهم، السنة إللي وراها هيقلل أسهم وهيودي الفلوس فين في السندات لحد ما قرب التقاعد هيبقى تقريبا 50-50 أو 40-60 40% أسهم 60% سندات لحد ما أوصل للتقاعد فيبتدي يديك الفلوس
طيب هو بيعمل إيه هو بيعمل هنا تعديل تلقائي اللي هو أنت مش محتاج تتداول على الصندوق، مش محتاج تغير أو تبيع أسهم وتشتري سندات أو العكس مش محتاج تعمل الحاجات دي خالص، هو متنوع في حتة التنوع إنه هو هيشتري محفظة أسهم متنوعة أوتوماتيك وهيشتري محفظة سندات متنوعة أوتوماتيك، سهل الفهم، البساطة دي من مميزات، والحاجة التانية إن هو فعال من حيث التكلفة، نسبة المصاريف بتاعته بنلاقي فيه حاجات منها خاصة صناديق المتداولة نسبة المصاريف بتاعها واطي
هناخد كده مثال يفهمنا أكتر على النوع ده من الصناديق وهناخد النهارده أمثلة من ishares دي زي ما قلنا دايما مثلا فانجارد، في بلاك روك يمكن دي تاني أكبر شركة عاملة صندوق متداولة على البورصة، وبرضه هنحط الكلام ده في الشو نوتس عشان لو في حاجة مثلا أنا بقولها مش مفهومة أو حاجة ممكن تقدر تشوف الأسماء بتاعة الصناديق دي من الشو نوتس، وتقدر تعمل بحث في جوجل عليها عادي هتلاقي فيه معلومات موجودة عن الصناديق دي وهتلاقيها طبعا في حساب السمسرة بتاعك موجودة
فالصناديق دي كلها بتبتدي بتلات حروف اللي هي ITD دي أول 3 حروف في كل الصندوق، الحرف الرابع هو ده التاريخ بتاع السنة يعني ITDA ده صندوق تقاعد للناس اللي تتقاعد في 2025، يعني ده الصندوق ده هيتسيل السنة الجاية وهيرجعوا الفلوس للناس بتاعته السنة الجاية هنلاقي الصندوق إللي بعده ITDB يعني هو ابتدى بـ A وبعدين الصندوق إللي وراه B، الصندوق ده زمن الاستهداف بس 2030، كل الصنادق طبعا دي بلاك روك بعدين هنخش على الصندوق اللي بعده اللي هو ITDC اللي هو 2035 يبقى هو كل خمس سنين بيديك نهاية عمر الصندوق، فالصناديق دي ليها نهاية عمر تختلف عن الصناديق الاستثمارية التانية إن هو بيرجع للمستثمر في تاريخ التقاعد بتاعه الفلوس بالكامل إللي موجودة في أصوله يعني مش هيرجع لك إن أنت حطيته طبعا هيرجع لك أنت حطيته + العوائد إللي حصلت خلال السنين كلها
بعد كده ITDD ده 2040 وITDE ده 2045 وITDF ده 2050 وITDG ده 2055 وITDH دخ 2060 وITDI ده 2065 يعني حضرتك لو هتتقاعد في 2065 يبقى لو أنت هتستخدم إستراتيجية التارجيت ديت هتاخد ITDI
طيب تعالوا نشوف نسبة المصاريف اللي احنا بنتكلم عليه دايما إن هو من الحاجات مهمة هنلاقي إن الصناديق دي كلها المصاريف بتاعتها من 9 لـ 11 نقطة أساس يعني على كل 100 دولار الصندوق بياخد 9 سنت في السنة أو 10 سنت أو 11 سنت على حسب الصندوق، فدي تعتبر صناديق المصريف بتاعتها تعتبر كويسة وما تعتبرش غالية، وتعتبر إن أنت مش بتدفع فيها فلوس كل إللي أنت هتدفعه عليها كمان عمولة التداول إن أنت بتشتريها من السمسرة بتاعتك، في سمسارة تقريباً قرب الصفر عمولة أو في عمولة واطية، فأنت لو عندك حساب شركة سمسرة من الحسابات اللي بيدفعوا عمولات قليلة فأنت التكلفة بتاعتك لاقتناء النوع ده من الصناديق دي تعتبر تكلفة كويسة
طب تعالوا نشوف الفرق إحنا قلنا في الأول الصندوق المدد القصيرة اللي هي 2025 بالمقارنة مثلا 2065، نسبة الأسهم بتاعته المفروض تبقى أقل عشان المخاطرة تبقى أقل، عشان الراجل بتاع 2025 هيتقاعد السنة الجاية، الراجل بتاع 2030 هيتقاعد بعد 6 سنين، الراجل بتاع 2035 هيتقاعد برضه قريب ولكن 2065 ده في وقت طويل، فده هنعكسه وهنتكلم دلوقتى على نسب فئة
الأصول زي الأسهم الصندوق ده عنده كام % أسهم والصندوق ده عنده كام% أسهم
وده اللي هنقول عليه الطريقة إللي هو بيقلل أو بيزود المخاطر، كل ما الوقت بيزيد زي ما اتفقنا كل ما المخاطر بتاعتنا أعلى، مش معنى المخاطر أعلى إن دي حاجة وحشة لأ هو أنت معاك وقت فالنظرية بتاعة توزيع فئات الأصول بتقولك كل ما يكون عندك وقت في الاستثمار، حاول استثمر في فئة الأصل إللي فيها مخاطرة أعلى عشان بيبقى دايما فيها عائد أعلى فهنلاقي في 2025 نسبة الأسهم وقت تسجيل الحلقة 42%، هنلاقي في الصندوق التقاعد بتاع 2030 نسبة الأسهم 55%، هنلاقي في التقاعد بتاع 2035 نسبة الأسهم 66% يعني تقريبا التلتين، 2040 نسبة الأسهم 77%، 2045 نسبة الأسهم 87% 2050 95% وبعدين الصناديق اللي هي 2055 2060 2065 كل ده تقريباً من 98 لـ 99% فدول يعتبر لو انت بتتقاعد من 2050 لـ 2065 انت غالباً مستثمر كل فلوسك في الاسم الميزة بقى هنا إيه زي ما قلنا إن لو لاحظنا مثلا إن 2025 41% زي ما قلنا و2030 في 55% أسهم، معنى كده إن إحنا كل سنة السنة الجاية هو هيرجع فلوس للناس بتاعة 2025، خلاص أنت راجل تقاعدت خد فلوسك، طب الراجل بقى بتاع 2030 اللى هو النهارده عنده 55% أسهم في خلال كل سنة هينزل ال55% دي مثلا ال52% وبعدين ال50% السنة اللي وراها وبعدين مثلا ل44%، وبعدين مثلا ل42% قبل التقاعد بتاعك بسنة فهو هنا أوتوماتيكلي قاعد عمال ينزل الأسهم طب بينزل الأسهم دي بتروح فين فلوسها بتروح في أدوات الدخل الثابت
طيب أداء الصناديق ده بشكل عام إزاي؟ في سنة زي السنة دي 2024 لحد وقت تسجيل الحلقة، الأسهم مثلا طالعة كويس فهنلاقي الصناديق التقاعد بتاعة 2065 و2060 و2055 أدائهم السنة دي مثلا طالعين 12% السنة مقابل لصندوق إللي 2025 و2030 طالعين بس 5 أو 6% ليه لإن السنة دي تعتبر سنة كويسة للأسهم قدام السندات فالناس اللي عندها قرب ال100% بتاعتها في الأسهم العوائد بتاعتها أعلى الصناديق السنة دي اللي هي هيتقاعدوا قدام أدائها أحسن من الصناديق إللي هي أقل مخاطرة وده المتوقع يعني ده المفروض دي سنة كده عادية إن الأسهم أدائها احسن من السندات، فيه سنين تانية هنلاقي افتراضا واحد مثلا لسه هيتقعد السنة الجاية والأسهم نزلت جامد فالصندوق ده هيحميه لأن النزول بتاعه أو الهبوط هيبقى أقل لأن نسب الأسهم بتاعته أقل
يمكن بس الموضوع ممكن الناس تكون اتلخبطت يا رب يعني بس أكون بسطته، بس هو الموضوع ببساطة أنت سنك قد كده التقاعد بتاعك مثلا عند 60 أو عند 65 سنة لقيت نفسك هتتقاعد في 2044 هتروح شاري صندوق 2045 مثلا يعني وهتحط المساهمات بتاعتك شهريا أو نص سنوي أو ربع سنوي أيا كان بتحطه في الصندوق والصندوق زي ما قلنا هو أوتوماتيكلي بتشتري فيه سهم 2 3 اتفقت مع نفسك هيشتري مثلا 10 أسهم كل شهر 3 أسهم كل شهر أيا كانت تقدر تعمله وينزلك في حساب السمسرة بتاعك الصندوق ده اسمه وعدد الأسهم بتاعت هو كل شهر أو كل يوم هو بيتداول على السوق فأنت هتشوف سعره كل يوم وهو أوتوماتيكلي مدير الصندوق من جواه هيقعد يغير توزيع الأصول كله أول سنة وأنت مش محتاج تعمل أي حاجة غير اللي أنت عند 2035 أو 2040 تقدر تأخد فلوسك
طيب الراجل ده بيشتغل إيه بقى، إيه أنواع الأسهم اللي بيشتريها هنا وإيه أنواع السندات هنا غالبا كل صناديق دي بتشتري حاجات شبه المؤشر بتاع S&P 500 أو إجمالي سوق الأوراق المالية الأمريكي، يعني بيشتر مؤشرات فيها توزيعة للأسهم كبيرة فأنت مش محتاج برضه تعمل أي حاجة فيها، بس فده بشكل عام كلامنا النهارده عن الصناديق التقاعد المقيدة بزمن معين، تاني هي تطور بتاع نظام المعاشات، أنت النهارده لو كنت مشترك في نظام المعاشات غالبا هيئة المعاشات بتاعتك بتعمل نفس الكلام ده في الخلفية بس أنت متعرفش فا أنت هنا بتعمله لوحدك بشكل مباشر على البورصة بمصاريف واطية ودي الميزة بتاعة التطور بتاع الاستثمار بشكل عام إن الأدوات دي بقت موجودة في الأسواق بشكل متاح للناس فأنت مش محتاج شركة مش محتاج وسيط يدفعك 1 و2 %
في السنة عشان يعملك نفس الخدمة انت ممكن تروح تشتري الصناديق دي على طول من البورصة هنسيب دايماً زي ما قولنا في الشو نوتس أسامي الصناديق دي أو تاكيرز بتاعتها تقدر تدور عليها إزاي ودايماً زي ما بقول لو في اسئلة، لو حد عايز يعرف اكتر عن الموضوع ده، يبعتلي على صفحتنا بشكركم شكرا جزيلا، و أشوفكم إن شاء الله الأسبوع الجاي
Translation of some words and terms:
Retirement تقاعد
Risk Tolerance تحمل المخاطر
Liability الالتزام
Target Date Fund صندوق التاريخ المستهدف
Asset Allocation توزيع الأصول
Auto Pilot القيادة الآلية
Automatic Adjustment تعديل تلقائي
Simplicity البساطة
Cost Effective فعالة من حيث التكلفة
Expense Ratio نسبة المصروفات
Rewards عوائد
Contributions مساهمات
Total Stock Market إجمالي سوق الأوراق المالية
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #صناديق_الاستثمار #Targetdatefunds