170. ما يسأله المستمعون - الجزء 15
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة الجزء 15 من حلقات من ما يسأله المستمعون اللي بنجاوب فيها على الأسئلة اللي بتوصلنا من مستمعين كلام ينور، احنا في الحلقات بنحاول نختار الأسئلة اللي ممكن تفيد أكبر عدد من المستمعين
:أسئلة الحلقة
(01:27)
السؤال الأول من مستمع عنده شغف بريادة الأعمال، فتح البزنس بتاعه لكن لسه دخله مش ثابت، ومش عارف يوفق بين بناء ونمو البزنس وتحقيق هدف زي الحرية المالية، وقلقان من أن عدم وجود دخل ثابت هيخليه غير قادر على وضع خطة تقاعد أو تجنيب مبلغ للطوارئ؟
(09:13)
السؤال التاني من مستمعين متزوجين عندهم أهداف زي السفر وتحقيق الحرية المالية، ولكن بيواجهوا تحديات في التوفير بسبب المصاريف الثابتة و الديون والأقساط، الاتنين بيشتغلوا دوام كامل واللي جاي على قد اللي بيتصرف كل شهر فإزاي يوصلوا لأهدافهم المالية؟
احنا ديماً مستنينكم تبعتولنا أسئلتكم واستفساراتكم، وممكن كمان ترجعوا تسمعوا الحلقات السابقة من ما يسأله المستمعون لأن ديماً التساؤلات أو المشاكل اللي بتواجه الأخريين ممكن تخلق أفكار جديدة ومختلفة وتسهل المشوار أكتر
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلا بيكم في حلقة جديدة من بودكاست كلام ينور، النهاردة حلقة بتاعت أسئلة المستمعين، احنا متعودين دايما ناخد أسئلة منكم سواء على صفحتنا في الإنستجرام او على فيسبوك، ومن وقت للتاني كده بنحاول نشوف الناس بتفكر في إيه، لو فيه أسئلة مباشرة بحاول دايما أختار الأسئلة إللي هي ممكن تفيد أكتر المستمعين بشكل عام، لأن ممكن يكون ده موقف مثلا مكرر مع ناس كتير وبرضه في العادي ساعات برد على المسجات فدايما لو عندكم رسالة من فضلكم ابعتولنا دايما
(01:27)
هبدأ بأول سؤال، مش هأذكر اسم المستمع بس هو كان بيقول إن هو عنده شغف في حتة ريادة الأعمال، وابتدى مؤخرا إنه هو فتح البزنس بتاعه، البزنس بيكبر ولكن لسه الدخل مش ثابت وعنده تحدي إن هو إزاي في الوقت اللي بيحاول يبني فيه البزنس بتاعه انه يوفق ما بين ده وما بين إن هو يبقى عنده زي هدف الحرية المالية، فهو مش عارف يوفق ما بين الحاجتين، برضه هو قلقان إن هو ما عندوش مرتب أو دخل ثابت فطبيعي إن هو برضه مش عارف يحط خطة للتقاعد مظبوطة، بيقول برضه على المدى القصير إزاي يبقى عنده زي مبلغ مثلا للأزمات أو يشيلوا يعني لو حصل لا قدر الله حاجة من غير ما يؤثر على النمو بتاع البزنس بتاعه، يعني إزاي يقدر يشيل فلوس على جنبه وفي نفس الوقت يحافظ على النمو إللي موجود بالبزنس
طيب أول حاجة جت في دماغي كده اللي هو إزاي تفصل البزنس والمالية بتاعك يعني دي أول نقطة لازم نوضحها للناس إن أنت لازم تفصل مينفعش تخلط فلوس البزنس بتاعتك مع فلوسك الشخصية دي أول غلطة أنا بحس الناس بتعملها إن هو مثلا كل الفلوس اللي جاية لهم البزنس بتاعه يعيد استثمارها أو ياخدها ويطلعها من البزنس يعني، الاتنين وحشين بالنسبة ليا
فأول حاجة لازم أفرق ما بين الإتنين حساباتك لازم تبقى واضحة إللي هي الحسابات الشخصية و حسابات البزنس مينفعش تخلط ما بين الحسابات، فلو أنت مش فاتح حسابات للبيزنس لوحدة لازم تبتدي تفتح حسابات عشان تبتدي تعرف أو تعمل ميزانيات بشكل أوضح الفلوس ما تتخلطش بالفلوس الشخصية لإن ده مش هيخليك ماليا واعي إيه إللي حصل دي أول حاجة أنا أنصح بيها المستمع إن هو لازم يبقى عنده حسابات
برضو لو عنده كردت كارد لازم يبقى عنده كردت كارد شخصية و كريديت كارد للبزنس لو أنت يعني عايز حاجات مدفوعات إلكترونية أو الكلام ده كله فلازم تفصل الإتنين بشكل واضح جدا
تاني حاجة في حتة الفصل بين البزنس والحياة الشخصية إن أنت لازم تدفع لنفسك مرتب، أنا بشوفها غلطة كبيرة من رواد الأعمال إللي هو يقول لك أنا هشتغل بدون مرتب مشكلتي في الموضوع ده إن أنت لما بتشتغل من غير مرتب كرائد أعمال أنت ما يبقاش عندك استقرار نفسي واضح إن أنت تعرف تصرف منين دايما ممكن تبقي الشغل أو تيجي على نفسك عشان الشغل تيجي ع على عيلتك عشان الشغل، فده بالنسبة لي حاجة خاطئة جدا رواد الأعمال بيعملوها عشان يقلل المصاريف إللي في البزنس بتاعته
فلا أنا مع حتة إن أنا النهارده عارف تقريبا أنا بصرف نقول مثلا بصرف 100 دولار في الشهر لازم تحاول تجيب مرتب مش لازم تجيب الـ 100 كلهم ولكن مرتب يكون جزء كبير من مصروفاتك ممكن تضغط مصروفاتك الشخصية خلاص أنا فصلت الإتنين من بعض عرفت أنا بصرف قد إيه في شغلي كبزنس وعرفت قد إيه انا بصرف على حياتي الشخصية لازم يبقى عندك مرتب ثابت حتى لو مرتب ده مش 100% اللي أنت بتصرفه كل شهر ولكن على الأقل مثلا نقول لو مثلا خد 60% 65% مع ضغط مصاريفك طبعا مش لازم تبقى موسعها قوي لأنك أنت برضو بتحاول تبني البزنس بس على الأقل أنا عندي رقم أنا عارف إن هو جايلي كل شهر عشان يحطني مكان نفسي معين مستريح نفسيا على الصعيد الشخصي إن أنا أعرف أبذل جهد كويس في هذا العمل
وبعدين انت ممكن الـ 65 إللي أنت بتاخدهم دول من 100 أصل المية ممكن أصلا دورك في السوق ده لو أنت نزلت تحاول تجيب حد مكانك يبقى أصلا هياخد 200 أو 300، أنا بقول بس أي أرقام بس بحاول أقول إن أنت بالفعل موفر في مجال وظيفتك مشكلتي إن أنت بتحط صفر، مشكلتي إللي أنت بقى هتروح تستلف من أهلك أو من صحابك، وتخش في دوامة دين على نفسك بره ودي حاجة غلط
طيب لو أنت مش قادر تدفع مرتب لنفسك على الأقل يكفي حياتك، يبقى أنت الهيكلة بتاعة البزنس بتاعك فيه مشكلة، يبقى أنت محتاج هنا شركاء محتاج تزود رأس مالك، محتاج تجيب ناس تساعدك عشان برضه تحقق جزء من الثبات النفسي اللي هو انا جايلي حاجة كل شهر دي نقطة مهمة جدا جدا أنا بشوف رواد الأعمال من وجهة نظري الكلام ده ممكن يكون فيه ناس عندها أراء مختلفة بس مهم جدا جدا إن أنت يبقى عندك دخل ثابت كرائد أعمال، محدش قال رائد الأعمال لازم ياخد صفر ويحط مجهود ويبهدل نفسه والكلام ده كله لإن ده تمام هينعكس على البزنس نفسه مش هتعرف تشتغل كل واحد عنده قدرة فعلى الأقل يعني لازم نوفر جزء كبير من الموضوع ده
ممكن تكون في حالة فردية، لو أنا مثلا مش متجوز أو مش مخلف، ممكن الموضوع يبقى أسهل عليك شوية، ولكن واحد متجوز ومخلف وبيحاول يوزن ما بين الحاجات دي لو أنت مش عارف توزن دي ولا دي في بيتك أنت مش تعرف توزن شغلك، يبقى أنا كده معناها إن أنا ممكن أكون توصلت لأ ده أنا محتاج شركاء وهنحط فلوس في الشغل ده، وهطلع نفسي مرتب، لو أنا ما عنديش
بالنسبة بقى للبزنس بتاعك لازم طبعا تعمل تدفق نقدي مظبوط وخطة مالية كويسة على الأقل في الـ 12 الجايين، يعني بعد ما فصلت بين الإتنين شخصية والبزنس لازم أرجع أحط خطة تدفق نقدي واضحة للبزنس أبقى عارف إيه هي المتطلبات المادية إللي أنا محتاجها في البزنس لو أنا مثلا مبيعات شوية أو حصل وتبتدي تقعد تعمل رؤية السنة الجاية كلها الظروف الاقتصادية اتغيرت، حصل مشكلة مش عارف إيه، يبقى عندي خطة عمل واضحة، لو أنت ما عندكش خطة عمل واضحة برضه هيبقى عندك مشكلة في إدارة البزنس بتاعك
ريادة الأعمال مش بس هو شغف، مش بس هو حبك للفكرة أو مش بس اللي أنا عايز ابقى رائد أعمال رائد الأعمال الشاطر هو اللي بيبقى عنده تخيل للوضع المالي، وإزاي يقدر يحققه
مش دي شخصيتك أو مش عندك القدرة دي لازم يبقى عندك حد في الفريق بتاعك يعرف يفكر بالطريقة دي
حاجة كمان ممكن تعملها في البزنس بتاعك زي ما إحنا بنعمل في الحسابات الشخصية صندوق الطوارئ برضو في البزنس بتاعك أنت ممكن تعمل مخصص بتشيله على جنب كل سنة 5% من المبيعات بتاعتك 10% من المبيعات بتاعتك أيا كان الرقم بتحطه على جانب في حتة الطوارئ دي لو حصلك أي حاجة لو جالك مطالبة ضريبية عالية وأنت مش واخد بالك الكلام ده كله يبقى عندك برضه جزء زي صندوق الطوارئ كده في الشخصية العادية أنت بتعملها برضو للبيزنس بتاعك ده برضو بيخليك نفسيا تبقى مستريح إن البزنس بتاعك لا قدر الله لو وقع كام شهر أنت ما زال عندك الأمان إن أنت تكمل
على الصعيد الشخصي، طبعا هنرجع نقول نفس الكلام اللي احنا بنحاول نكرره في كل وضع، نرجع بقى هنا مش البزنس ده هنا فتحت هنا الحساب بتاعي الشخصي اللي أنا فتحته في الخطوة الأولى، أحاول أبني فيه لحد 6 شهوريعني دايما نقول من 3 لـ 6 شهور في صندوق الطوارئ وتحاول تعمل حساب توفير أو حساب بعيد شيل فيه الفلوس دي تحاول أنك متلمسهاش، وبعد كده الخطوه اللي وراها ربنا كرمك عرفت بقى تطلع فوق الـ 100 اللي احنا اتكلمنا عليها، أنا كنت بصرف 100، كنت بتقبل بـ 65، ربنا كرمك وابتديت تكبر وابتديت تزود مرتبك، وابتدا يجيلك حاجة ثابتة أكتر تبتدي تطلع فوق الـ 100 هنبتدي بقى نعمل العادي اللي هو هتستثمر في التقاعد بعد ما تخلص صندوق الطوارئ هنخش على الخطة بتاعة التقاعد، وخطة الادخار اللي هي على المدى الطويل عادي مفيش أي مشكلة، ربنا كرمك أكتر الخطوة اللي وراها إن أنت تبتدي جنب شغلك الأساسي جبت مثلا عقار، جبت أسهم، جبت اي حاجة، جبت تعمل دخل سلبي فالدخل بتاعك بعد ما إن شاء الله طلع فوق 100 بقى 150 بقى 200 فأنت عندك فائض، ابتديت تشتري عقار، العقار ده بعد شوية استلمته طبعا دي مش بتحصل في يوم وليلة دي مع الوقت والعقار ده مثلا بيتأجر وبيجيب لك دخل ثابت، فأبتدي أنوه من مصادر الدخل السلبي بتاعي،
فده بشكل عام الخطوات كلها بالنسبة لي هي خطوات تنظيمية في مخك، وفي طريق تفكيرك، وفي طريقة تنفيذك للخطة الاستثمارية، بس هنا تاني انا هعامل الشخص ده على انه عنده ملاءتنين ماليتين، الملاءة الأولى بتاعة الشركة، والملاءة التانية الشخصية بيبقى عندي توقع للحتتين وأظبط حالي بهذه الطريقة
(09:13)
سؤال تاني جاي من اتنين متزوجين هما عندهم أهداف زي مثلا السفر زي إنهم يتفسحوا أو يلفوا العالم أو حاجة من هذا النوع، وفي نفس الوقت عايزين يعملوا حرية مالية أو يبقى عندهم خطة للمدى الطويل، بس هم عندهم كالعادة مصاريف ثابتة وعليهم ديون سواء من أو أقساط مثلا زي أقساط العربية الكلام ده كله الاتنين بيشتغلوا دوام كامل وعايشين بشكل يعني يعتبر اللي جاي بيتصرف كل شهر، فإيه الخطوات اللي إحنا ممكن ناخدها عشان نحقق أهدافنا ونوصل للأهداف المالية بتاعتنا
السؤال ده طبعا سؤال عام وأعتقد ناس كتير بتبقى عايشة بنفس طريقة اللي جاي بيتصرف كل شهر، هو ده سؤال أعتقد مكرر، وممكن يكون لامس ناس كتير، إحنا هنا برضو عايزين نجاوب بطريقة عملية يعني بشكل خطوات إزاي ممكن يعملوها يعني حاجات تتنفذ على طول
أول حاجة أعتقد يعني برضه ممكن تكون جت في بالي اللي أنت لازم تقعد مع مراتك، أو يعني حضرتك تقعدي مع جوزك، ولازم تعملوا حاجة زي ميزانية مجمعة بمعنى إيه؟ إن أنتم بتجيبوا الدخل بتاعكم بشكل عام أنتم الإثنين بتحسبوا المصاريف بتاعتكم أنتم الاتنين سواء مصاريف شخصية أو مصاريف جوه البيت، وبتعرفوا إيه بجد اللي بيتصرف يعني دايما بقول عشان تحل المشكلة لازم نقيس المشكلة أصلا يعني أنت بتقول أنا عايش اللي بيجيلي بيروح، طيب الأول لازم أكتب الحاجات دي ولازم أعد الدخل، أنا ساعات بسأل ناس كتير دخلك إيه؟ مش بيجاوبني إجابة صحيحة يعني يقول لي مثلا باخد مرتب كذا لأ، هو الموضوع مش مرتب، أنت ممكن يبقى عندك دخول أخرى، ممكن يكون عندك مدخرات قديمة، الكلام ده كله أه أنت ممكن تكون عايش أنتوا إتنين بتاخدوا رقم وتصرفوا، ولكن أنت أصلا عندك حاجات ثانيه موجودة حاجات ثانية بتجيب فلوس يعني فلازم الأول أكتب الحاجات دي ولازم أبقى عارف بالظبط هي إيه وفي نفس الوقت زي ما قلنا إن نجمع كل مصاريفنا
لما أنا هبتدي أبص على مصاريفي هنبتدي إحنا إتنين مع بعض نقول طيب في حتة من الميزانية بتاعي ممكن مثلا أستغنى عن المصروف ده، المصروف ده أنا بصرفه ومش حاسه ليه معنى قوي، فدي أول خطوة في المناقشة ما بينكوا، يعني الموضوع صعب أكيد لما الواحد بيقعد يتكلم ماليا وخاصة مع مراته، ولكن لما بتقعدوا تتكلموا هل بجد إحنا محتاجين المصروف ده، هل إحنا بنصرف مثلا حاجة زي دي، طب إحنا عايزين نسافر في وقت معين قدام، هل ممكن نضحي بحاجة دلوقتي فبتبتدي تعلم في بتاعتك على إيه إللي أنا ممكن أستغنى عنه، بقول كده ليه أنا بستغنى عن حتة معينة من المصروف عشان دي بتبقى أوضح حاجة وأسرع حل، ده أول حل اللي أنت تقول إيه ده أنا مش عارف أزود دخلي بسرعة، بس مثلا هأعرف أقطع المصروف ده بسرعة، فده بيبقى أول وأسرع حل، الحل ده ليه عشان إحنا بناخد إحنا الاتنين 100 وأنا عايز أنزل لـ 95 ده مثلا أول هدف إن أنا عايز أنزل أعمل فائض 5 أو أعمل فائض 10 فلازم أبتدي أقطع من مصاريفي
تاني حاجة هبتدي اركز كل مجهودي في الفترة القصيرة الأولانية إن إحنا ندفع الديون إللي علينا وخاصة الديون اللي بفوائد عالية، لو أنا عندي دين مستلف مثلا العربية برقم عالي وعندي مثلا حاجة تانية متسلفها مثلا أقل هبتدي أركز على الديون العالية، ليه كمان لأن أنا لو أنا مثلا قطعت من مصروفي 5 زي ما اتفقنا على الحاجات اللي أنا مش مهتم بيها أوي، فابتدي اشيلها فأنا كده قطعت 5 وبعدين لما لقيت الأقساط بتاعة الدين بتاعتي مثلا 10 15، وركزت في أول 5 6 7 شهور، سنة إن أنا أدفع الحاجات دي، السنة التانية هيبتدي يظهر لي في الميزانية بتاعتي، فائض جاي من الأقساط اللي أنا كنت أدفعها على الديون، فدي بتبقى حاجة بتشجع الناس جدا إن هي والله ايه ده انا وفرت 5 النهاردة كمان وفرت 15 السنة التانية، فبقى عندي 20 كاملين ممكن أبتدي أوجهم في حتة تانية
كمان فيه ناس بتعمل حاجات معينة، وكلامنا برضو على حلقة كاملة على موضوع الديون ده إن هو بيدمج الديون دي كلها في حاجة مثلا بدفع عليها فوائد أقل، يعني خدت قرض سيارة وخدت الكريديت كارد، وخدت الكلام ده كله رحت عملت قرض شخصي فايدته أقل عشان فيه في السوق مثلا عرض معين، فعملت دمج للديون بتاعتي وطولت مدته، الطريقة دي بتبقى برضو طريقة سريعة إن أنا ممكن يظهر لي فائض من الحركة دي،
حيجي بعد كده للأهداف، الأهداف مثلا هم عايزين يسافروا أو عايزين يتفسحوا أو أيا كان الهدف، فهو هيبتدي يعمل حساب مخصوص للسفر مثلا، أو هيعمل حساب مخصوص للأولاد إن هو مثلا عايز يبتدي يحوش للجامعات أو للمدارس أو أيا كان، ويبتدي يعمل تحويل تلقائي من الحساب بتاعه أو الحساب بتاعها مباشرة آخر الشهر، يعني أنا كل ما بقبض يوم 28 بيتخصم مثلا 5% من دخلي رايح لحساب السفر أو رايح لحساب أيا كان الاهداف اللي انا عايزها فتحت حساب متخصص للهدف اللي انا هعمله
انا هنا عملت ايه في الأول قطعت 5 مصروف وبعدين قطعت 10 كان مثلا الأقساط بتاعتي اللي هي كنت بروحها ناحية القرض، فبقي عندي 15 ممكن أوجههم لحتة تانية أو وجهت منهم 10 راحوا مثلا في الحساب ده، هنا لما بتبتدي توجه بتبتدي تحسس نفسك إن أنت ابتديت تحقق أهدافك، الفكرة في الحرية المالية أو في أي حاجة مالية، انت عايز توصللها إن أنت بتاخد خطوات صغيرة كتير ورا بعض، بتخليك تحاول تحقق الهدف ده، عشان كده بتاخد الخطوة إللي وراها إللي أنت تفتح حسابات ليها علاقة بأهداف معينة
نيجي بقى للهدف اللي إحنا كنا بنتكلم عليه في الأول إللي هو صعب تحقيقه شوية، دي الخطوة مثلا هنقول للرابعة إن أنا أبتدي أركز على الدخل بتاعي من ناحيتين أنا وهي نبتدي نشوف هل إحنا ممكن نزود دخلنا من الشغل ولا لأ؟ هل ممكن اخد شغلانة جانبية؟ هل ممكن عندي وقت أعمل حاجة؟ هل ممكن أدور على مج في مجالي في نفس الدولة؟ بتدي مثلا رقم أعلى، أنا ممكن أكون عندي القدرة أتحرك وأخد مرتب أعلى أو اغير الدولة وأسافر وأروح حتة تانية، فالدخل بتاعي يحصله زيادة، فدي خطوة الرابعة إللي أنا هعملها إن أنا أحاول أزود دخلي، عندي بيت مثلاً ومأجره مثلا بطريقة معينة، هل ممكن لو رحت مثلا وضبطته شوية وحطيته بطريقة تانية ممكن يتأجر أعلى أيا كان طريقة زيادة دخلك زي ما قلنا أنت بتعد في أول خطوة، أنا عندي أصول إيه وإزاي ممكن مثلا أستخدمها بشكل أعلى
كده خلصت الحاجات دي وبقى لسه عندي فائض ربنا كرمني وظبطت الدنيا، تاني الخطوات دي والخطط دي مبتبقاش في يوم وليلة دي بتاخد وقت طويل، الخطوه اللي وراها هبتدي بقى أرجع للأهداف الطويلة اللي أنا كنت عايز تبقى ماشية في أي وقت وفي أي سيناريو اللي هو أحوش للتقاعد استثمر مثلا في صندوق استثمار مثلا المصروف بتاعه واطي، محفظة متنوعة، أيا كان فابتدي هنا أعمل بقى الخطوة الأكبر كمان ده إحنا مش بس وفرنا ومش حوشنا عشان هدفنا إللي إحنا عايزين نعمله، وزودنا دخلنا ده إحنا كمان هنبتدي نستثمر على المدى الطويل، بمجرد اني ابتديت استثمر على المدى الطويل كده خلاص أنت وصلت لأول نقطة في الطريق للحرية المالية على المدى الطويل فده بشكل عام ردي على السؤال ده
أنا آسف على الإطالة النهاردة، بس أنا حاولت أختار سؤالين كبار، فيهم أبعاد مختلفة وفيهم حالات مختلفة لاتنين متجوزين وواحد تاني بيفتح شركته وحاولت أجاوب عليهم بطريقة مفصلة شوية وبطريقة عملية إللي هو أعمل إيه كخطوات 1 2 3 فا يعني أتمنى يكون الإجابات مفيدة ممكن تاخد الكلام ده وتظبطه على طريقة حياتك دايما بقول أنا ممكن أكون صح وممكن أكون غلط، أنا بس بحاول أجاوب من وجهة نظري من خلال إني أنا شفت خبرات في المجال المالي برضه أنا معنديش أي مشكلة لو إجاباتي غلط، او مثلا ممكن تكون شغالة بس في إجراءات أحسن مني مثلا، فدايما بحاول اجتهد وأقول اللي توصلت له، ولو قدام آرائي اتغيرت برضه بحاول دايما اشارككم إن آرائي مثلا كانت غلط في الحتة الفلانية والموضوع مثلا أتغير لكذا عشان مثلا في معين أو في رأي طلع عكس رأي، فاعتبروني يعني بس باجتهد واجتهادي ده يحمل الصواب والخطأ، وشكرا جدا جدا على وقتكوا، وإن شاء الله أشوفكم الأسبوع الجاي
Translation of some words and terms:
Challenge تحدي
Long Term Goal هدف طويل المدى
Financial Independence الحرية المالية
Retirement Plan خطة للتقاعد
Safety Net
Growth نمو
Separate تفصل
Stabletiy استقرار
Steady ثابت
Structure هيكلة
Cash Flow تدفق نقدي
Visibility رؤية
Business Plan خطة عمل
Saving Accountحساب توفير
Emergency Fund صندوق الطوارئ
Financial Goals الأهداف المالية
Combined Budget ميزانية مجمعة
Consolidate دمج
Car Loan قرض سيارة
Personal Loan قرض شخصي
Automatic Transfer تحويل تلقائي
Assets أصول
Cases حالات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #ما_يسأله_المستمعون #الجزء15