168. رحلة داخل شركات السمسرة (الجولة الثانية) - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنكمل الجزء الثاني من لقائنا مع أ/ مصطفى غنيم، مدير المبيعات والتداول في شركة أبوظبي التجاري للأوراق المالية
ADCB Securitie التابعة لبنك أبوظبي التجاري
(MBA) حاصل على درجة البكالوريوس المزدوجة في التسويق والأعمال الدولية وماجستير في إدارة الأعمال
خبرة أكثر من 10 سنين في قطاع السمسرة
https://www.linkedin.com/in/mostafa-ghoneim-mba-99a8088b/ :تقدروا تتواصلوا مع أ/ مصطفى
:الجزء الثاني
(00:54) كلمني على الصناديق المتداولة الموجودة في الإمارات، من ناحية التطور والاتجاه والفايدة؟
(08:12) بتشتري الصندوق بعملة البلد اللي هو فيها مش بتحتاج تغير عملة، مظبوط؟
(09:57) الجهة المنظمة للبورصة نفسها دورها إيه في حماية المستثمر؟
(10:46) هل شايف إن في يوم من الأيام الأسواق العربية هيبقى فيها صناديق متداولة ليها علاقة بقطاعات معين بدل ما أنا أروح أعمل محفظة في القطاع ده؟
(13:09) لو رجعت لمصطفى زمان، لسه بيبتدي في المجال ده كمستثمر هتنصحه بإيه بعد الخبرة العملية اللي مريت بيها؟
(17:56) من خلال ملاحظتك لسلوكيات العملاء بتوعك في أي حاجة تنصح بيها الناس إن هي تكون في فكرها الاستثماري أو الاستراتيجي؟
استنوا حلقة جديدة الأسبوع الجاي إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور النهاردة هنكمل في الجزء التاني مع مصطفى فهسيبكوا مع الجزء التانى ويارب تستمتعوا بيه
(00:54)
عمر: طيب من ناحية بقى السوق نفسه، كنا تكلمنا كده ودردشنا على موضوع التطور بتاع الأسواق من حيث فيه أسهم جديدة بتنزل فيه أسهم في قطاعات ما كانتش الناس عندها أكسس عليها، زي ما قلنا مثلا الشركات إللي بتقدم الخدمات، زي الكهربا والحاجات دي، كلمني بقى على صناديق الاستثمار المتداولة، يعني مثلا الإمارات أنا شايف إن فيه مجهود من جهات معينة إن هي تصدر صناديق استثمار متداولة عملنا عليها حلقات قبل كذا، فبرضه من ناحيتك أنت بتشوف إيه من ناحية السمسرة، يعني بتشوف التطور بتاع الموضوع ده إزاي؟ والاتجاه بتاعه، وهل هو فايد الناس؟ يعني كلمني كده على الصناديق المتداولة إللي موجودة في الإمارات
مصطفى: خلينا نقول القطاع بتاع الصناديق المتداولة إللي هنحطهم كلهم في قطاع واحد بما انهم شبه بعض يعني القطاع ده فيه فيه نمو كبير جدا في الإمارات، يمكن يكون أكبر وتيرة أو أسرع النمو شفناه في المنطقة في موضوع الصناديق المتداولة، إحنا بنتكلم يمكن مش متذكر يمكن بس أنا بتكلم من 8 سنين مثلا كنا شفنا أول صندوق نزل، وبعدين كان قفل ومكملش، بس من بعدها لو قلنا في آخر مثلا 7 سنين أو حاجة زي كده أو 6 سنين ، شفنا نمو كبير جدا النهارده إحنا عندنا 15 صندوق تقريبا، وفيه صندوق كمان العرض الأولي بتاعه دلوقتي
بس هو الفكرة مش في العدد، الفكرة في الاختلاف إللي موجود ما بين الصناديق بس ده برضه مش بس الإمارات في صناديق برضه تانية في المنطقة أفتكر فيه يمكن حوالي 9 صناديق كمان في السعودية، برضه باشكال مختلفة وأحجام مختلفة، في صندوق أو إثنين كمان في قطر وفي صندوق في مصر أعتقد إللي هو تابع لبلتون، بس رجوع للإمارات التطور اللي باين دلوقتى، وافتكر بيستفيد منه المستثمر بالذات المستثمر إللي هو ما عندوش قدرة استثمارية كبيرة، هو إن بقى فيه أنواع مختلفة من الصناديق، الأول كنا محدودين في الصناديق إللي بتغطي الأسهم فقط، وابتدينا نشوف فيها تنوع في التغيطة يعني بتلاقي صندوق مثلا بيغطي الأسهم إللي بتنطبق عليها الشريعة الإسلامية في الإمارات، أو صندوق تاني بيغطي أسهم الإمارات، بس هو مش شريعة وبعدين ابتدينا نتطرق لصندوق بيغطي أمريكا في صورة أو صندوق بيغطي أمريكا، صندوق بيوزع ارباحه وصندوق ما بيوزعش ارباح
ابتدينا نشوف صندوق بيغطي باكستان، ابتدينا نشوف بعديها صندوق طبعا مش بقولهم بالترتيب، ولكن انا بوريك التنوع يعني شفنا صندوق بيغطي الكويت، شفنا صندوق بيغطي تركيا، ففيه تنوع كبير جدا، وإللي شفناه حديثاً كمان من الطروحات الممتازة برضه منطقة ما فيهاش تغطية كبيرة من هنا خالص صندوق متداول بيغطي الأسواق اليابانية وده سوق يعتبر من الأسواق الأولى في الأسواق المتطورة يعني ومؤخراُ بقى ابتدينا نشوف ترند جديد، وده بيفتح بوابة كبيرة جدا للمستثمرين بالذات المستثمرين إللي ما بيقدروش يوصلو للحد الأدنى من قيم الاستثمار في فئة الأصل دي وهو الصناديق المتداولة اللي هي الأصول الأساسية بتاعها بيكون اي أدوات الدخل ثابت، اي على سبيل المثال في سوق أبو ظبي في صندوق اسمه بونداي أو بوند اي اي المكون الأساسي بتاعه عبارة عن سندات وأدوات دخل ثابت، سواء حكومية أو شبهة حكومية في الإمارات بعائد متوسط تقريبا 5.5% على سعر الطرح وقتها يمكن هو دلوقتي يعني تحت سعر الطرح
طبعاً المشكلة في الدخل الثابت دايما ان المستثمر الصغير ما بيقدرش يروح يشتري سند، لأن الحد الادنى للاستثمار بتاعه بيبتدي تقريبا من 200 الف دولار فطبعا بيكون في حواجز كبيرة للدخول فهنا إنت قللت الحاجز ده أو شلته بالكامل، إنت ممكن من أول درهم واحد تقدر تشتري الصندوق المتداول ده وتاخد كل الأصول الرئيسية فطبعا بتكون شيء كويس جدا، وحاليا في صندوق تاني إللي هو فيه الطرح دلوقتي اسمه
صكوك إي وهو من اسمه بيتتبع مجموعة كبيرة من الصكوك برضه بعائد قريب من نفس النسبة يعني 5.5% برضه بس متوافق مع الشريعة ككجزء من الدخل الثابت يعني
(06:00)
عمر: الصناديق دي متداولة على البورصات يعني موجودة على أبو ظبي موجودة على دبي ولا يعني أنا عارف هنا في الإمارات في سوقين، فهي هي موجودة أغلبيتها على أبو ظبي ولا على دبي
مصطفى: أغلبيتها على سوق أبو ظبي وبتشتريها زي ما بتشتري أي سهم طبيعي، الأسهم دي كمان متوفر بما إن كل سهم تحتيه في باسكت، أنت كل ما بتشتري وحدة في الصندوق ده بتكون كإنك بتشتري هنفترض إن هما مثلا 15 سند مالي كأنك بتشتري أجزاء من السندات المالية دول، فبالتالي السيولة اللي ورا الصناديق كبيرة جدا كل الصنادق دي متعين عليها موفرين للسيولة، فبالتالي أنت لو عندك أي كمية حابب تبيعها أو حابب تشتريها السمسار بتاعك يقدر يبيع لك أي كمية أو يشتري لك أي كمية، أو لو الكمية مش متاحة يقدر يعملك خلق لوحدات جديدة موفرلك أمان في موضوع السيولة، موفرلك إن هو شايل لك الحواجز بتاعة الاستثمار في فئة الاصول ده بصراحة هو استثمار هايل بالذات للمستثمرين التجزئة اللي هو ما عندوش القدرة على اختيار الشركات بشكل دقيق زي المديرين الاستثمار، يعني إنت بتاخد انكشاف بتاع صندوق الاستثمار ده وشفنا فيهم يعني في ناس بيبقى عندها فكر إن الصندوق المتداول مثلا ممكن يكون مبيطلعش بقدر الكافي بما إنه عندهم تنويع للمخاطريعني بشكل ما، ولكن إحنا شفنا السنة دي صناديق متداولة مثلا زي شايميرا اللي بيغطي شريعة أمريكا، يعني طالع 21 % لما تيجي تقارنه بالأسواق الأمريكية فهو في بيتتبع السوق بشكل كبير جدا
برضه في باكستان من الأسواق إللي فيها السنة طلوع كبير جدا، النهاردة الصندوق طالع تقريبا 38% فدي طبعا أرقام كبيرة بخصوص لما تيجي تتكلم على صناديق متداولة فدي فرص كلها المستثمرين بتستفيد منها
(08:12)
عمر: الحاجة إللي هي متداولة في الإمارات ، يعني أنا دلوقتي عشان أشتريها، يعني الصندوق ده برضو بيساعدني إن أنا ما بدبرش العملة، صح؟ يعني أنا مثلا اللي أنا شايفه مثلا الصناديق دي متداولة بالدرهم، بما إنها موجودة على بورصة أبو ظبي، فهي متداولة بالدرهم مظبوط؟
مصطفى: صحيح، الصناديق دي كلها متداولة بالدرهم بغض النظر العملة بتاعو السهم اللي جواها إيه؟
عمر: تمام، فأنا كمستثمر أنا والله راجل عايش في الإمارات، أو بقبض بالدرهم أو عندي دخل بالدرهم، أو أنا في السعودية عندي دخل سعودي والصندوق ده متداول على البورصة، فأنا بشتريها بعملة الدولة إللي أنا عايش فيها مظبوط، مش محتاج بقى أدبر دولار أو أدبر ليرة تركي، أو أعمل أي حاجة، صح؟
مصطفى: لأ أنت بتشتريها بالدرهم والتسوية بتاعة العملية بتحصل بالدرهم، ومفيش أي تدبير عملة بيحصل من ناحية المستثمر، الشيء الجدير بالذكر برضه عمر إن الأسهم دي أغلبيتها أو مش أغلبيتها كلها بيكون متعين عليها جهات تالتة غير الشركة المصدرة للصندوق بتساعد أو بتكون هي حاطة الحدود بتاع اختيار إللي موجودة جوا الصندوق على سبيل المثال مثلا بيكون منهم فيه مثلا شركة (أس اند بي) مشهورة في أمريكا، بتحدد إيه الأسهم إللي هتكون جوا الصندوق وبيحصل إعادة الاوزان بتاعت الصندوق ده بشكل دوري، فحتى المستثمر إللي بيشتري الصندوق مش لازم يرجع يتأكد مثلا من الأصول اللي جواها، هو عملية التوازن دي بتحصل تلقائيا من غير ما المستثمر يا يتدخل في الموضوع يعني
(09:57)
عمر: هايل الرقابة بقى على الكلام ده، برضو أنا هأرجع أقول دايما إن دور الرقابي ومين إللي بيراقب على الحاجات دي، لما الصندوق ده يبقى متداول على البورصة نفسها الجهة المنظمة بقى للبورصة نفسها سواء هيئة سوق المال بتاعة الدولة إللي أنت فيها أو كده دورها إيه بقى في حماية المستثمر؟
مصطفى: يعني خلينا نقول إن الأسواق بمجرد ما الصندوق ده بقى متداول على السوق، فهو بيرجع يخضع للقوانين بتاعة السوق، سواء قوانين التداول أو المراقبة على التداول، يحمي المستثمرين سواء كبار مستثمرين أو صغار مستثمرين من أي تلاعب يكون بيحصل بنفس القواعد الموجودة يعني في السوق بتطبق سواء على الأسهم على صناديق التداول زي بعضها بالظبط
(10:46)
عمر: تمام، طيب أنت شايف أنا مثلا من الحاجات اللي بشوفها الصناديق الاستثمارية، مثلا المهمة اللي بأشوفها في أمريكا مثلا اللي هي صناديق الاستثمارية إللي على المؤشر بس على القطاعات، هل أنت شايف إن في يوم من الأيام الأسواق العربية دي هيبقى فيه مثلا صناديق متداولة ليها علاقة بقطاع معين مثلا عايز أستثمر في القطاع الطبي مثلا بدل ما أنا أروح أعمل محفظة في القطاع الطبي، أنا مش عارف أصلا أشتري إيه، مش عارف عايز أعمل مثلا القطاع العقاري، شايف فيه دولة معينة مثلا فيها قطاع عقاري أنا بشوف في أمريكا مثلا فيه صناديق استثمار متداوله بكميات رهيبه، يعني في كل قطاعات، هل إنت شايف إن ده مثلا هيتغير في ال مع الوقت؟أو دا التطور بتاع السوق بتاعنا؟
مصطفى: والله يا عمر بالوتيرة إللي إحنا ماشيين فيها في النمو في القطاع ده أعتقد إن إحنا ماشيين في الاتجاه ده الصناعة دي بالذات في السوق الأمريكي متطورة جدا بنتكلم يعني تريليونات من القيمة السوقية في الصناديق المتداولة، إحنا نعتبر لسه في بداية نتكلم على 15 صندوق فقط لا غير، وفي الوقت الحالي يمكن الصناديق المتداولة بتغطي بلاد ولكن إحنا برضو المنطقة لسه بتبني ثقافة الصناديق المتداول، بس المفروض وحسب، طبعا ما بنسمع من الناس إللي بتشتغل في المجال ده إن جاي في المستقبل هيكون في صناديق بتغطي أدوات تانية، زي مثلا ما موجود في السعودية موجود دلوقتي صنوق متداول بتاع بنك البلاد بيغطي الدهب، بيديلك نفس الانكشاف من غير ما تروح تشتري ذهب
عمر: في مصر برضه أعتقد فيه صناديق استثمار مش متداولة مش متأكد مش متداولة، بس ف فيه سنة دي
استثمار، دلوقتي برضو بتغطي مثلا دهب في مصر كقطاع جديد ما كانتش موجودة قبل كده
مصطفى: صحيح، فلو قدرنا نبص من خلال التطور إللي بيحصل ده وسرعته أنا بتوقع، وبتمنى إن يكون في الفترة اللي جاية يكون فيه صناديق بتغطي حاجات زي الذهب أو تكون فيه صناديق بتغطي قطاعات يعني مثلا زي ما إنت قلت الرعاية الصحية أو البنوك أو حاجات زي كده تانية بحيث إنها تتيح للمستثمرين برضه فرص تانية لأن طبعا في بما إنه سوق كبير وفي مستثمرين كتير، كل شريحة مستثمرين بيكون
عندها اهتمامات بقطاعات معينة أو بأدوات معينة يعني
(13:09)
عمر: هرجع أسأل برضو السؤال بتاع إللي هو يمكن هو سؤال بحب دايما افكر فيه كده، لو أنت رجعت بقى لنفسك بعد الخبرة العملية دي ورجعت تقول لنفسك في الأول بقى تدي نفسك نصيحة، أو تدي نفسك طريقة في الاستثمار، لو انت لسه بتبتدى هترجع تقول لنفسك إيه يعني بعد الخبرات هترجع تقول لنفسك إيه من خلال برضه نظرتك على أنواع المستثمرين مختلفين، أنت عندك عملاء كبيرة وعملاء صغيرة بتشتغل في بنك، شفت ناس كتير عبر السنين ترجع تقول لنفسك إيه بقى لمصطفى لو مصطفى لسه بيبتدي المجال ده كمستثمر هتنصح نفسه إيه؟
مصطفى: ابتدي صغير، الاستثمار في الأسهم مش زي اللي بتشوفه في الأفلام شراء الأسهم مش عشان الثراء السريع، شراء الأسهم واحدة من الأدوات إللي الناس بتستخدمها علشان تبني محافظ استثمارية، تقدر تدر منها عائد بعد عمر طويل يعني
غير إنك تبتدي صغير دايما حاول يكون فيه تنوع في المحفظة بتاعتك، بحيث إنه يكون المخاطر متوزعة، شراء الصناديق المتداولة ده واحد من الحاجات إللي بيوزع المخاطر بشكل بشكل كبير جدا على قد ما تقدر حاول تشتري للمدى البعيد، متشتريش لمجرد إن إنت عايز مكسب واحد ولا إتنين ولا خمسة % حتى وحاولت أستثمر بشكل مستمر يعني أنا بحط مبلغ معين كل فترة معينة وأحافظ على العملية دي إن أنا كل شهر كل تلات شهوربقطع جزء معين من دخلي، بستثمره في الأدوات إللي أنا اخترتها سواء صناديق متداولة أو أسهم وكل ما الفترة دي بتيجي أنا بكون ملتزم ومنضبط إني أنا أطلع المبلغ ده وأستثمره بالشكل ده، في ناس تقعد تحاول تدور إنها عايز أشتري بأقل سعر، وأبيع بأعلى سعر عمرك ما هتعرف تتايم الماركت، يعني صعب جد ا إنك تتعمل تتايم ماركت، حتى الناس المتخصصين والبروفيشنال في السوق ما بيعرفوش يتايم الماركت، ولكن إنت لو بتشتري بشكل دوري كل شهر كل تلات أشهر، كل أيا كان الفترة قد إيه إنت بتاخد بالطريقه دي بإنضباطك بتاخد المتوسط بتاع الأسعار في الفترة دي، طالما بتشتري نفس الحجم ممكن تكون تحاول تكون أشطر شوية، لو شفت مثلا في نزول بسبب حدث معين عايز تكبر مثلا بدل ما كنت بتشتري بـ100 بدولار مثلا هتشتري بـ 200 دولار أو 100 درهم أو أيا كان العملة، إيه يعني بسبب حدث معين حاصل زي مثلا ما كان حاصل في كوفيد أو زي ما كان حاصل قبلها في 2008 يكون في انهيار للسوق يعني بالعكس أنا أحاول أستخدم ده بدل ما أنا اتوتر أحاول أستخدم ده لصالحي، لأن ده يحسن لك في المستقبل المتوسط بتاع السعر بتاعك
عمر: هيحسن لك العوائد
مصطفى: صحيح
عمر: يعني نقول لو لخصنا الكلام ده إن أنت نقول لو خطوات تنفيذية تفتح حساب، أو تدور على السمسار المناسب بالنسبة لك تعود نفسك إن أنت تحوش جوا الحساب ده، وتعود نفسك إن أنت مش بس تحوش تستثمر فيه، أيا كان بالظروف الموجودة في السوق، وتنوع استثماراتك، أعتقد أنت برضو ذكرت إن التنوع مهم، وما تخافش من الانهيارات يعني دي النصائح إللي أنت ترجع تقولها لنفسك وأنت صغير
مصطفى: لازم تعود نفسك تشوف لما بيكون فيه نزول حاد في الأسواق بسبب حدث معين، إن أنا أعود نفسي إن أنا أشوف ده فرصة أكتر من إن أنا أشوفه كأزمة، وإن أنا ما أعرفش أتصرف فيه عبر السنين شفنا طبعا زي ما انت كنت بتقول انه نشتغل مع مستثمرين من كل الأشكال وكل الأحجام، ومن الانماط اللي بنشوفها أغلبية المستثمرين إللي بتشتغل بالشكل إللي إحنا كنا بنشرحه إن هما بيستثمرو بشكل دوري بيستثمروا بشراء الأصول الكويسة أو الأسهم الكويسة أو بيشتروا حاجات متنوعة زي صناديق التداول بشكل دوري مش بهدف البيع دلوقتي ولا كمان سنة ولا كمان سنتين دي النماذج اللي بنشوفها بتكمل وبتعمل أرباح كويسة، جدا على المدى الطويل
مقابل عملاء تانيه ممكن تكون بتشتري وبتبيع في فترات قصيره جدا عشان تعمل ربح ما بين التحركات السعرية اليومية أو الأسبوعية أو كده، ممكن تكون النماذج دي بتكون أقل نجاح من الناس إللي بتستثمر على المدى الطويل
(17:56)
عمر: فيه أي حاجة تانية حاسس إن أنت شفتها مثلا وأنا ما سألتش عليها، يعني بتشوفها في العملاء بتاعتك أو خصائص معينة تنصح بيها الناس إن هي تكون في فكرها الاستثماري أو الاستراتيجي أو حاجة كدا وأنت بتعمل من خلال ملاحظاتك لسلوك العملاء في أي حاجة تانية
مصطفى: حاجتين مهمين، أنا كنت قلت من ضمن النصايح يعني ابدأ صغير ابدأ صغير ليها هدف معين، بما إن التداول أو الاستثمار ده بيكون مبلغ بتاعك وأنت بطبيعة الحال كبني ادم بتكون خايف على فلوسك لما بتكون بتبتدي صغير وبتشوف المحفظة بتاعتك دي النهارده نازلة درهم أو نازلة جنيه وبكره طالعة جنيه أو جنيه مبيكونش عندك الإحساس بالخوف أو بتتحمس أو كده لإن المبلغ بيكون في الآخر بسيط، لما بتكون إنت بتعمل الاستثمار بشكل دوري وكل ما المحفظة بتاعتك بتكبر الجنيه إللي كنت بتشوفه طلوع أو نزول بيبقى إتنين بيبقى تلاتة بيبقى خمسة سيكولوجيك مخك بيكون اتعود على إنه يشوف الموضوع ده، اتدرب إن هو يشوف الطلوع والنزول في القيمة بتاعت المحفظة، عقبال ما بتوصل ان المحفظة دي بتكون طالعة ألف أو نازلة 5000 أو طالعة 10000 بتكون إنت عقلياً متعود إن إنت تشوفها كده، فبيقل موضوع الطمع أو الخوف بيقل نسبيا، لأن إنت تعودت في فترة طويلة شهور طويلة بتشوف المحفظة بتطلع وتنزل وشفتها بتطلع مبالغ صغيرة وبتنزل صغيرة الأول بعدين شفتها مبالغ أكبر وهكذا ده جزء من الحاجات اللي الواحد اتعلمها
عمر: التمرين اللي انت بتمرن بيه نفسك
مصطفى: بتفرق معاك جدا في رد الفعل بتاعك لما بيكون فيه أو زي ما قلتلك مثلا تكون بتدرب سيكولوجيكلي لإن أنت لما يكون فيه هبوط بشكل كبير في أسعار الأسهم أو في أسعار المحفظة بتاعتك، يعني إنك ما تتفعلش معاها بشكل بشكل فيه خوف أو فيه طمع يضرك في المدى الطويل
الجزء التاني إللي يمكن ما تكلمناش فيه أو يعني اتكلمنا فيه بشكل مختلف هو جزء إللي له دعوة بالرافعة أو إن إنت تكون بتشتري أسهم من خلال حساب بالتداول بالهامش أو حساب الرافعة، المستثمرين الصغيرين للأسف هو بيكون عنده مبلغ صغير وبيكون شايف إن هو ما بيقدرش يكسب مبالغ كبيرة أو يكبر المحفظة بتاعته دي فبيحاول ياخد المساعدة بتاعه أو ان هو يتداول في حساب تداول بالهامش أو في رافعة ولكن الشيء إللي هو بيكون مش شايف هو طبعا بيكون شايف جزء واحد بس إن هو هيقدر يكسب أكتر، لكن هو ما بيكونش شايف الجزء التاني إللي هو أرجح إن هو يحصل بما إنه هو لسه مستثمر أصغر فبالتالي خبرته في الغالب هتكون أصغر إن الرافعة دي برضه يقدر يبوظلك خطتك بالكامل، ويخسرك مبالغ أكتر بكتير ممكن تكون أكتر من المبالغ إللي إنت استثمرتها في الأساس فالرافعة هي سلاح ذو حدين ما أنصحش بيه تماما تماما المستثمرين إللي لسه بتبتدي رحلتها الاستثمارية، ما تستخدموش غير لو أنت عارف كويس قوي، أنت بتعمل إيه وعارف بتستخدمه في أنهي وقت وحذر جدا في استخدامه كمان
عمر: طيب أنا برضه يعني مش عارف أقول لك قد إيه يا مصطفى والله الكلام بتاعك يعني بيبقى ممتع وإحنا بنلغي وبنتكلم دايما حتى برة إن أنت برضو واحد من الناس اللي مطلعة جدا على المجال بتاعها، وعارفة بشكل دقيق إللي بيحصل في الصناعة لو فيه حد عنده أسئلة، إحنا دايما بنسيب إزاي تقدر الناس تتواصل معاك من خلال وسائل التواصل بتاعتك سواء على السوشيال ميديا ولا لينكد إن أو إن كان مكان الناس تقدر تبعتلك عليه بنسيب الكلام ده في الشو نوتس ممكن اسيبك أنت تقفل في الحلقة بتاعت النهاردة ما أعرفش يعني كتغيير أنا بقفل الحلقة كل مرة أنت اديتنا نصائح بصراحة لطيفة جدا عايز أشكرك جدا وأسيبك تقفل الحلقة النهاردة بدالي
مصطفى: متشكر ليك يا عمر، أنا كمان سعيد جدا إن أنا معاك للمرة الثانية وبرضو كنت سعيد جدا بعد الحلقة اللي فاتت مستمعين كتير من كلام ينور حاولوا يتواصلوا معايا على لينكد إن أكونت بتاعتي هتكون موجودة في الشو نوتس أي حد عنده أسئلة يقدر يتواصل معايا ويسأل أنا أكون مبسوط جدا لو بساعد أي حد، متشكر ليكو جدا إن أنتو سامعينا، ونشوفكم ان شاء الله في الحلقة الجاية
عمر: ميرسي جدا مصطفى
Translation of some words and terms:
Utilities خدمات
Sector قطاع
IPO طرح أولي
Coverage تغطية
Recently حديثاً
Minimum Investment Values الحد الأدنى من قيم الاستثمار
Asset Class فئة الأصول
Underlying Assets الأصول الأساسية
Constituent مكونات
Bonds سندات
Barriers حواجز
Security سند مالي
Liquidity سيولة
Retail تجزئة
Exposure انكشاف
Diversification تنويع
Irrespective بغض النظر
Parameters حدود
Weights الأوزان
Market Cap قيمة سوقية
Behavior سلوك
Mentally عقلياً
Leverage رافعة مالية
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي # #رحلة_داخل_شركات_السمسرة #الجولة _الثانية #الجزء_الثاني