167. رحلة داخل شركات السمسرة (الجولة الثانية) - الجزء الأول
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة بنجدد لقائنا للمرة لتانية مع أ/ مصطفى غنيم، من أوائل الضيوف اللي شرفونا في كلام ينور.. في لقائنا السابق مع أ/ مصطفى (رحلة داخل شركات السمسرة) اتكلمنا على إيه هي شركات السمسرة، بتعمل ايه وازاي تستفيد منها في خطتك الاستثمارية.. النهارده بنتكلم على التطورات اللي حصلت في قطاع شركات السمسرة خلال الـ 3 سنين اللي فاتوا
ADCB Securitie أ/ مصطفى غنيم، مدير المبيعات والتداول في شركة أبوظبي التجاري للأوراق المالية التابعة لبنك أبوظبي التجاري
(MBA) حاصل على درجة البكالوريوس المزدوجة في التسويق والأعمال الدولية وماجستير في إدارة الأعمال
خبرة أكثر من 10 سنين في قطاع السمسرة
تقدروا تتواصلوا مع أ/ مصطفى: https://www.linkedin.com/in/mostafa-ghoneim-mba-99a8088b/
:في الجزء الأول
(01:25) ايه اللي اتغير في قطاع السمسرة عن آخر مرة اتكلمنا؟
(03:50) هل بتشوف زيادة في الشريحة بتاعت الناس اللي أول مرة يستثمروا؟
(04:30) كشركة بتقدم خدمات عبر الإنترنت، إزاي بتحمي بيانات المستثمر بتاعك؟
(05:22) هل في تطورات حصلت في أنظمة التداول الموجودة سواء عندك أو عند المنافس أو في السوق عموماً؟
(08:17) رأيك في سوق الطروحات الأولية للناس اللي أول مره تستثمر لأنها من الحاجات اللي أنا شايفها تطورت جامد خاصة في الـ 3 سنين اللي فاتوا؟
(10:46) البيع العابر ما بين البنك وبين العميل والطرح الجديد، هل بتسهل للناس بالذات اللي متعرفش اي حاجة من خلال الطروحات دي انهم يكتتبوا؟
(14:00) هل ممكن أربط حساب البنك بتاعي بحساب السمسرة؟
(15:51) لما بشتري الأسهم من عندك كبنك، هل أنت اللي بتحفظ لي الأسهم؟
(16:28) هل في مميزات من وجهة نظرك انك تبقى فاتح حساب سمسرة مع بنك؟
(19:43) هل فتح حساب سمسرة تابع للبنك مقتصرة على عملاء كبار ولا العميل الصغير يقدر يفتح حساب؟
(20:30) هل ممكن يبقى عندي كذا حساب سمسرة؟
استنوا الجزء الثاني من لقائنا مع أ/ مصطفى غنيم الأسبوع الجاي إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
عمر: أهلا بيكم في حلقة جديدة من بودكاست كلام ينور، النهاردة بعد أكتر من 3 سنين يمكن عن آخر مرة تقابلنا في البودكاست معايا الأستاذ مصطفى غنيم مدير تداوله ومبيعات في شركة أبو ظبي التجاري كان من أوائل الناس اللي جم معانا، وكلمونا عن السمسرة والعالم بتاع السمسرة، من الحلقات إللي كانت كويسة جدا، ودايما بنصح الناس إن هما يسمعوا الحلقات القديمة بتاعتنا فا برحب بيك يا مصطفى النهارده معايا وشكرا جدا على وقتك في كلام ينور
مصطفى: أهلا بيك يا عمر مبسوط إن أنا معاكم مرة تانية
(01:25)
عمر: هبتدي معاك كده في الأول، 3 سنين، يمكن ما اتكلمناش أكيد بنتكلم ممكن بره البودكاست يعني بس حأسألك أول حاجة، إيه اللي حصل في القطاع بتاعك من التغيرات الكبيرة اللي أنت شفتها عن ما تكلمنا، قطاع السمسرة، ناس كتير يمكن من إللي بيسمعونا يعني من خلال الرسائل إللي بتجيلي من خلال العلاقة مع المستمعين بتاعنا، فتحوا حسابات في شركات سمسرة، شركات سمسرة هي جزء كبير جدا ومهم من تحقيق الأهداف بتاعتك المالية، إن أنت عايز تعمل محافظ استثمارية وتبني مثلا محفظة التقاعد بتاعك فالعالم بتاع شركات السمسرة، هو عالم مهم دايما، ودايما بيجي لي أسئلة على كتير، ودايما الناس بتسألني عايز إيه من السمسار والكلام ده كله إللي هو الأسئلة إللي أنت أكيد بتشوفها في حياتك اليومية العادية مع العملاء بتاعتك بس هأبتدي معاك عايز أعرف الأول إيه إللي اتغير عن آخر مرة مثلا اتكلمنا أو أكبر حاجات شايفها أو ترندز في القطاع بتاع السمسرة
مصطفى: أوكيه، بما إن الفترة إللي عدت هي مش كبيرة أوي، يعتبر 3 سنين فتره مش طويلة، ولكن التطور في الأسواق هنا يعتبر سريع شويه مقارنتا بالمنطقه، تطورات كتير حصلت بخصوص حسابات التداول وبخصوص الطرق إللي بيتفتح بيها حسابات التداول، أنا كنت برضه سمعت الحلقة بتاعتنا إللي عملناها من 3 سنين وخدت بالي إن وقتها كان الطريقه إللي بيتفتح بيها حساب التداول كان لسة بالطريقة البدائية لازم المستثمر يوصل لشركة التداول ويمضي الأوراق بتاعت فتح حساب التداول، الأمور دي كلها دلوقتي بقت موجودة ومتاحة مش في كل الشركات، بس في بعض الشركات بطريقة ديجيتال بتقدر يجيلك لينك أو بتخش على الويب سايت بتاعة السمسار ده تقدر تملي الأبلكيشن دي ديجيتلي وكله متوصل بالأجهزة بتاعت الهوية والجنسيه والأمور دي تقدر تأكد شخصية العميل ويفتح الحساب، ويعمل خلق للرقم المستثمر بتاعه لغاية لما يقدر يمول الأكونت بتاعه يبتدي يتداول من غير ما يوصل للشركة خالص، من غير ما حد يشوفه طبعا ده مكنش موجود من 3 سنين ده على الناحية نقول يعني طريقة فتح الحساب
(03:50)
عمر: فده طبعا أكيد ساعد إن شريحة جديدة من الناس إللي هي مثلا عمرها ما فتحت حسابات تقدر توصل لها أكتر، فاتح مثلا لشريحة عمرية أصغر كمان إللي هما الناس إللي عندهم اهتمام بالتك أو بيعرفوا يتعاملوا مع التكنولوجي الكلام ده كله إللي أنت من خلال الموبايل والكلام ده كله صح؟ يعني هل أنت شايف في زيادة في الشريحة اللي هي بتاعت الناس؟ هنقول أول مرة يستثمروا نشوف زيادة في الناس دي
مصطفى: صحيح ده عمل فعلا قفزة كبيرة في أعداد المستثمرين إللي هي أول مرة تنشأ أرقام مستثمرين في الأسواق، بس بمجرد إن فتح الحساب بقى أسهل بكتير من الأول
(04:30)
عمر: حلو قوي مع العالم التكنولوجي، دايما هسأل هل ده بيخليكوا كشركات وأنتوا بتقدموا الخدمات إللي هي عبر الإنترنت، والكلام ده كله كسايبر سكيورتي بقى إللي هو بيسموه الأمان المالي إللي أنت مثلا حسابك محمي أون لاين، البيانات بتاعتك، الكلام ده كله، هل أنتوا كشركات بقى بتبتدي تصرف أكثر على الحتة دي يعني إزاي بتحمي المستثمر بتاعك بشكل عام؟
مصطفى: طبعا بما إن هو حساب يتعلق بالاستثمارات بتاعة العميل، والأمور المالية بتاعته بيكون فيه درجة عالية من الأمان على الحساب، سواء هو مفتوح ديجيتالي أو حتى مفتوح بالطريقة القديمة يعني بالورق فطبعا بيكون نفس المعايير متاخدة بحيث إن يكون فيه حماية كاملة للخصوصية وللبيانات بتاعت العميل، طبعا إلى جانب استثماراته والمبالغ المالية الموجودة في الحساب
(05:22)
عمر: طيب من ناحية بقى الأدوات المالية هل في تطور يعني من ناحية فتح الحساب احنا شايفين إن في تطور في فتح الحساب، أنا فتحت الحساب، الكلام ده كله، هل الانظمة نفسها متطور؟ قبل ما نخش في العنوان؟ المنتجات المعروضة بس الانظمة نفسها هل شفت برضو تطور في الأنظمة نفسها، في طريقة التداول؟ سواء عندك في الشركة أو في المنافسين بتوعك، السوق نفسه اتجاهه، الكلام ده كله، هل المنصات نفسها بتتحسن؟
مصطفى: أكيد فيه منصات بتتحسن، بتبتدي مش من شركات سنسرة كمان بتبتدي من الأسواق نفسها، الأسواق في تحسن دائم، دايما بيكون فيه خطط إزاي انظمة البورصة تتطور وتكون أفضل ده موجود، شفناه في البورصات المحلية هنا في الإمارات، زي سوق أبو ظبي مثلا بيتغير النظام بالكامل للنظام بتاع بورصة نيويورك في أمريكا
شفنا كمان سماسرة، يعني بيستخدمو انظمة أفضل وسماسرة بتطور في الانظمة بتاعتهم، بيبتدي فيها إمكانيات، يعني ما كانتش موجودة قبل كده، زي مثلا دلوقتي يبقى في سماسرة بتوفر خدمات )البيع على المكشوف المنظم (إزاي تقدر تستلف أسهم تبعها قبل ما يكون عندك مركز فيها وتكسب من الحركة السعرية العكسية يعني وأمور تانية كتير بخصوص الأنظمة يعني الأنظمة بتتطور بإستمرار لمواكبة التطورات إللي موجودة، بحيث تنقل للمستثمر تجربة أفضل ويكون فيها إمكانيات أكتر للعميل تسهل عليه عملية الاستثمار في الأسواق المالي
(07:06)
عمر: يعني هي بتبتدي من الأسواق، يعني أنت رأيك إن جزء كبير من التطور بيبتدي نفسه من السوق بتاع الدولة نفسها؟
مصطفى: بص تطور في الأسواق ما بيكونش كتير لإن التطور لما بيحصل في الأسواق بيكون حجمه كبير، نظام بيتغير مثلا في الأسواق مش بيتغير كل يوم بيتغير كل فترة طويلة بس بيكون التغير نفسه كبير يغطي التغيرات إللي بتحصل في المجال نفسه لفترة طويلة، ولكن كل فترة بكون في تطور في ميزات معينة، يعني مثلا في دي الوقت حاليا في تداول ممكن تتداول على المشتقات، مش بس الأسهم في دلوقتي ممكن تتداول على الصناديق المتداولة في البورصة ده بجانب الأسهم ده بجانب أدوات الدخل الثابت كمان، فالتطور ممكن يكون في الحاجات المدرجة، الأدوات المدرجة يعني، أو في الميزات الموجودة في الانظمة بتاعة البورصة ومنها السمسار بيبني في النظام بتاعه ميزة تواكب التطور إللي موجود في الأدوات أو في الميزات اللي بتطرحها البورصة بيسمح بيها للسمسارة يستخدموها يعني
(08:17)
عمر: طيب في الفترة إللي فاتت وخاصة في سواء الإمارات لقينا طروحات كتير، يعني يمكن الواحد ممكن يكون شايف الأسواق مثلا العربية بقى لها مثلا يعني في آخر مثلا 15-20 سنة مفيش كمية الطروحات إللي مثلا في دولة زي الإمارات، وشركات كمان معروفة تقدر تشوفها زي مثلا سالك زي مجموعة شركات في أبو ظبي، شركات استثمارية، لقينا شركات زي باور إللي هي بتاعت الكهرباء، يعني لقينا في قطاعات مختلفة لقينا شركات جديدة نازلة في السوق، فبرضو عايز من وجهة نظرك رأيك للناس بالذات إللي لسه جديدة إللي لسه بتستثمر، السوق بتاع الطروحات الأولية إللي هي بتحصل يعني دي برضه حاجة من الحاجات إللي أنا شايفها تطورت جامد خاصة في التلات سنين إللي فاتوا
مصطفى: صحيح التلات سنين إللي فاتوا فعلا كان فيهم آ زخم شديد جدا في الطروحات الأولية ابتدى الموضوع برؤية معينة كانت في سوق أبو ظبي إن هو يرفع القيمة السوقية بتاعة السوق بالكامل من خلال الطروحات
الطروحات طبعا بتزود زي ما بنقول عمق للسوق إن أنت يبتدي يبقى عندك كل قطاع يكون فيه أعداد كبيرة من الشركات المدرجة تدي إمكانية للمستثمر إن هو يبقى عنده اختيارات أكتر في الاستثمار، شركات أكتر بقوائم مالية مختلفة، ممكن تكون الشركات دي بتبص على صناعات معينة أو بتبص في تفاصيل صناعة معينة يبقى عندك فيها اختيارات أكتر، شوفنا طروحك كتير جدا في ثلاث سنين إللي فاتو دول في سوق أبو ظبي، وكمان في سوق دبي، زي ما إنت قلت كان في طروحات في دبي مثلا زي سالك زي شركة الكهرباء والمية، دبي تاكسي، مؤخراً كمان شفنا سبنيز، فده كله بيخلق اختيارات أكتر للمستثمرآ، وبيخلي كمان فيه سيولة جديدة في السوق في منها قطاعات مكنش موجود منها قبل كده كمان أسهم مدرجة يعني، فبالتالي بيحسن السيولة في العموم في السوق
(10:46)
عمر: طيب أنا في حاجة برضه لاحظتها وخاصة على البنوك، وبما انك بتشتغل في شركة تابعة لبنك، بلاقي مسجات أو حاجة مثلا بتيجي يقول مثلا فيه طرح معين في الشركة الفلانية، أنا ممكن أبقى مين البنك ما عنديش فكرة قوي عن البورصة مثلا، فالطرح ده بيقول لي مثلا سالك نازلة في الطروحات ف برضو كنت عايز أعرف البيع العابر ما بين البنك وأنت مثلا كعميل بنك والطرح الجديد، هل بتسهل للناس اللي هي بالذات ما تعرفش أي حاجة من خلال الطروحات دي انهم يكتتبوا؟ لأن الاكتتاب مثلا بيبقى أصعب شوية كدورة فتح الورق بتاعها والتنفيذ بتاعها عن أنت هتشتري سهم عادي مدرج فأنت معايا يعني شوفت الحملات إللي هي بتشوفها حتى على تويتر بتشوفها في كل حتة، ممكن تلاقي إعلانات في الشارع إن فيه طرح، يعني أنا حاسس إن برضو دي حاجة لما كنت أشوفها قبل كدا
مصطفى: للأسف الموضوع ده ليه جزء كويس وجزء وحش، الجزء السئ في الموضوع إن فيه ناس بتستخدم الزخم إللي موجود في سوق الطرحات إنها تحاول تعمل عمليات مش صحيحة لجذب أموال من المستثمرين، بحيث الاستثمار فيها عن طريق إعلانات، يعني حتى لغاية النهاردة وسالك تم إدراجه من فترة طويلة بتشوف إعلانات مثلا في السوشيال ميديا يقول لك استثمر في سالك، وخد دخل شهري آه مبلغ فلاني يعني بيذكروه في الإعلان، ولكن ده كلام مش صحيح، الطرح بتاع سالك حصل من فترة طويلة وإللي حابب يشتري سالك بيشتريه من السوق، لكن في الشق الصحيح منه البنوك كلها بتحاول تتنافس على إنها تاخد أدوار في الاكتتابات دي، سواء دور بنك مستلم، وده بيكون على شريحة الأفراد فقط، أو يكون عنده أدوار أكبر من كده زي مدير طرح او مساعد مدير طرح أو أدوار أكبر كمان بحيث إن أنت تغطي الاكتتاب بالكامل
عمر: مدير طرح أو مساعد مدير طرح، كبنك بيساعدني، الشركة نفسها تطرح
مصطفى: صحيح، وفي الحالتين سواء أنت بتغطي الشريحة الأولى فقط إللي هي بتاعة الأفراد أو الشريحة التانية بتاعة المستثمرين المؤهلين بتكون مسهل للعميل بتاع البنك إنه يقدر يكتتب في السهم إللي عليه الاكتتاب، يعني وبتقدر تعمل عملية الكتاب بشكل سهل جدا لإنه بيكون فيه بوابة الإلكترونية ده جزء من التطور يعني بيكون فيه بوابة تقدر تخش عليها من البنك بتاعك اونلاين وتقول أنا عايز اكتتب في السهم ده وعايز أحط مبلغ معين تقدر تسحبه مباشرة من حسابك تحطه في الاكتتاب يتاخد يعني يتخصم من حسابك ويتعمل بيه طلب الاكتتاب وبمجرد ما يجيلك التخصيص، بيرجعلك بقية المبلغ في حسابك والأسهم كمان بتختار تقول أنا عايزها تروح عند حساب السمسرة بتاعي في الشركة سواء الشركة إللي تابعة لنفس البنك أو شركة تانية وبيحصل التخصيص بي بالطريقة دي
(14:00)
عمر: طيب أنت بما إنك في بنك فيه ميزة عن شركات السمسرة العادية إن أنت ممكن أشتري مثلا أسهومي من خلال حساب البنك بتاعي على طول، صح، يعني أنت ممكن أربط حساب البنك بتاعي بحساب السمسرة مظبوط، يعني ده لو أنا فاهم صح؟
مصطفى: الإمكانية موجودة كل بنك بيشتغل بالطريقة إللي هو شايفها أنسب فيه بنوك بتربط أي حساب جاري عندك أو أي حساب توفير بحساب السمسرة، وفي بنوك بتفضل إنها تنشئ لك حساب بنكي تاني منفصل عن حساباتك إللي مثلا بيجي لك عليه مرتبك أو استثمارات تانية، أو كده يفصل لك الحساب ده يبقى عندك حساب بنكي مخصص لعمليات تسوية بتاعة عملياتك في البورصة، بحيث إنه يكون في فصل ما بين ده، وده تقدر تراجع الحساب ده بشكل أسهل يعني
عمر: أنا بسألك ليه كده لإن إحنا اتكلمنا قبل كده في حلقات مع شركات تانية مع شركات سمسرة، يعني ممكن تكلمنا مع مثلا ثاندر في مصر مثلا اتكلمنا مع ساكسو في الإمارات هنا قبل كده كمثال يعني كشركتين تكلمنا معاهم قبل كدا، دي شركات منفصلة دي مش بنوك دي شركة سمسارة، فأنت بتحاول من حسابك البنكي اللي أنت بتاخد فيه مرتبك، ده لازم تحول لشركة سمسرة، بعدين من خلال شركة سمسرة تبتدي تشتري أسهمك، أنا هنا بسألك ليه كده؟ لأنك أنت بتشتغل في حاجة تابعة للبنك، فبرضو للناس إللي هي ما تعرفش إن ممكن يبقى البنوك فيها شركات سمسرة، يعني عايز بس أوضح إنه في جزء من القطاع ده موجود تبع البنوك، فزي ما أنت بتقول أنا ممكن أخصم من حسابي، بتعملي حساب واحد ده للمرتب وحساب إتنين ده بتاع الأسهم وكده
مصطفى: صحيح
عمر: فأنا عايز أشتري أسهم النهارده، فهحول من حساب واحد لحساب إتنين، ومن حساب إتنين يخش ياخد منه الأسهم بتاعته، أو يخصم فلوس الأسهم، مظبوط كده؟
مصطفى: صحيح
(15:51)
عمر: طيب هنا برضه أنت كبنك بتحفظ لي الأسهم، يعني أنت لما بشتريها من عندك بتبقى الحفظ عندك؟
مصطفى: صحيح، شراء الأسهم زي ما قلت بيكون خصم المبالغ المخصصة للتسوية بتاعتها من الحساب إللي اتعمله ربط مع حساب السمسرة سواء كان حساب منفصل زي ما إحنا بنعمل مثلا أو شركات تانية مثلا تابعة لبنك بتعمل على نفس حساب يكون موجود عندك حساب جاري أو حساب توفير والحفظ بتاع الأسهم بيكون في حسابك بتاع السمسرة مع السمسار يعني
(16:28)
عمر: طيب وأنت كملاءة مالية أو طرف ثالث بقى اللي هو بنتكلم عليه أنت ككيان بنك، أنا برضه ببص على المميزات بتاعة مثلا أنت تبقى فاتح مع بنك، هل فيه فيه مميزات مثلا كمخاطرة يعني من وجهة نظرك برضو، يعني أنت بقالك كتير في قطاع وشايف نوعين الشركات دي
مصطفى: هو أنا مش هقدر أقول إن فيه مخاطرة لإن في كلا الحالات سواء حسابك تابع لبنك أو مع شركة سمسرة خاصة مش تابعة لبنك، في الحالتين الأسهم بتاعتك موجودة تحت رقم المستثمر بتاعك، حتى لو الشركة دي قفلت حصلها مشكلة، الأصول بتاعتك في أمان تام، المبالغ المالية كمان في البنوك بتبقى في حسابك البنكي فمفيش خوف عليها خالص
عمر: البنك المركزي بيبقى شايفها
مصطفى: هي في حساب باسمك من الأول، فمفيش أي قلق عليها خالص، وكمان لو هي في شركة سمسرة خاصة بتكون في حساب بيكون الحساب ده معموله ترميز إن دي أموال تابعة للعملاء حتى لو جه مثلا لقدر الله تفليس للشركة دي أو أي عقوبات جت عليها الحساب ده ما بيكونش من ضمن الحسابات إللي يحصل عليها حظر أو حاجات زي كده
ولكن لو جيت تشوف المزايا الأخرى مثلا إللي ممكن ما تكونش موجودة في شركات سمسرة خاصة إنك بتاخد الخدمات التانية اللي بيقدمها البنك بجانب خدمة السمسرة ممكن تكون تستفيد بيها في حسابك الاستثماري ده ممكن تكون من خدمات تمويل مربوطة بالأسهم، أو تكون بتقدر تشتري أصول تانية أو أدوات تانية مش موجودة في شركات سمسرة التقليدية مثلا زي السندات أو في العملاء بقى إللي هما بيسموهم مستثمرين مؤهلين، ممكن تكون تشتري اسهم خاصة، ممكن تكون بتشتري ستركتشر برودكتز، ممكن تكون تشتري حاجات معقدة أكتر، أو تكون بتتطرق لمثلا طرق تمويل ليها علاقة بالأسهم زي التداول بالهامش طبعا الشركات اللي تبع البنك بيكون عندك قدرة أكبر
عمر: للتسليف او للتمويل
مصطفى: صحيح، وكمان التسعير بتاعها بيكون أفضل من ناحية السعر، بما إن الشركات الخاصة بتستلف من البنوك وده بيكلفها، طبعا البنك بيحط عليها رسوم والرسوم دي هما كمان بيحطوا عليها رسوم لكن لما بكون بالفعل جوا المؤسسة البنكية، بتكون الأسعار دايما، يعني إحنا دايما بيكون عندنا تنافس أكبر بكتير أو أفضلية في السعر بخصوص التمويل المربوط بالأسهم
عمر: يعني لو عميل مثلا بيحتاج تمويل على الأسهم، تمويل بمعنى إن هو بيعمل رافعة مالية بيبقى البنوك متنافسين اكتر أو في التسعير بيبقوا أحسن، لو حد محفظته بالشكل ده بيبقى اتجاه للبنوك أكتر، مظبوط كده؟
مصطفى: أغلب الوقت صحيح
(19:43)
عمر: طيب البنوك هل هي مثلا مقتصرة على عملا كبار؟ ولا العميل الصغير إللي هو لسه بيبتدي يقدر يفتح حسابات شركة سمسرة إللي هي تابعنا البنوك؟ يعني هل بيبقى فيه حد أدنى في البنوك مثلا أعلى من الشركات العادية ولا دي بتبقى حاجة عادية إللي إنت ممكن تفتح حساب في أي حاجة؟
مصطفى: على الأقل في الإمارات، مفيش حد أدنى عشان يبقى عندك حساب تداول، أنت ممكن تفتح حساب تداول من غير ما تعمله تمويل ويفضل موجود مفيش شرط معين نقدر نفرضه على العميل إن هو يحط مبلغ معين أو يستثمر مبلغ معين
(20:30)
عمر: طيب لو أنا عندي برضه عشان يمكن الناس بتنسى الموضوع ده، إن أنا ممكن يبقى عندي كذا حساب سمسرة صح؟ يعني ممكن مثلا حساب سمسرة مع مصطفى ممكن اعمل حساب سمسرة مع عمر مع أحمد، بيبقى عندي تلات حسابات سمسرة عادي، يعني صح، يعني السوق ما بيمنعنيش إن أنا أفتح أو الدولة ما بتمنعنيش إن أفتح كذا حساب، مظبوط؟
مصطفى: أنت بيكون عندك رقم مستثمر واحد، وده بتستخدمه عند كل الوسطاء، أو كل شركات سمسرة، ولكن بيكون عندك رقم تداول مختلف عند كل سمسار، تقدر تفتح حساب سمسرة عند كل سمسار موجود مرخص في السوق ده، مفيش حد أو مفيش حد أقصى للحسابات اللي تقدر تفتحها، بس في الآخر أنت ما بين 30 شركة أنت بتنقي الأفضل، يعني مفيش داعي إن يكون عندك حسابات كتير لإن المتابعة بتاعتهم بتكون ليها برضو كل فترة معينة لازم تعمل تحديث للبيانات بتاعتك، طبعا دي إجراءات من المنظم بتاع الإمارات كل فترة لازم تحدث بياناتك، فبيكون طبعا يعني في عبء على العميل وعلى الشركات إن هما يحدثو الحسابات دي، فمفيش داعي إنك تفتح حسابات كتير ولكن مفيش فعلا حد معين متقدرش تفتح أكتر منه
عمر: طب وهل في العملاء بتوعك يعني أنت بتشوف أجزاء من العملاء بتاعتك عندهم مثلا جزء من محفظتهم عندك وجزء مع حد تاني يعني هل بتشوف الموضوع ده؟
مصطفى: صحيح فيه عملاء بيكون عندها أكتر من حساب بالذات العملاء مثلا إللي بتكون بتاخد تمويلات كبيرة فمش عايز ياخدها كلها في مكان واحد، فبياخد جزء في شركة معينة، وجزء تاني في شركة تانية، ممكن يكون برضو من ضمن الفروقات بيكون كل شركة سمسرة بيكون عندها ليستة بتاعت أوراق مالية معتمدة إللي هما بيبقو عندهم الارياحية إنهم يسلفو لسة دي طبعا بتختلف من سمسار للتاني، كل واحد حسب إدارة المخاطرة بتاعه بتختلف النسب التسليف بتخلتف برضه من سمسار لتاني، فطبعا دي بترجع تاني للعميل والاهتمام بتاعه في أي أسهم والأسهم دي أي سمسار بيغطيها بشكل كامل بيدي فيها مالتبلز مضاعفات أعلى وهكذا
عمر: وبكده نكون وصلنا لنهاية الجزء الأول بشكر كل الناس جدا إللي وصلت معانا للجزء ده من الحلقة، أو خلصت الحلقة معانا وإن شاء الله نكمل اللقاء الجميل ده الأسبوع الجاي، وأشوفكوا إن شاء الله الأسبوع الجاي
Translation of some words and terms:
Trends اتجاهات
Broker سمسار
Verify تأكد
Creation خلق
Fund يمول
Competitors المنافسين
Platforms المنصات
Short Selling البيع على المكشوف
Regulated Short Selling البيع على المكشوف المنظم
Position مركز
Features ميزات
Exchange-Traded Funds الصناديق المتداولة في البورصة
Equities الأسهم
Fixed Income الدخل الثابت
Vision رؤية
Ipos الاكتتاب العام
Sector قطاع
Market Cap القيمة السوقية
Recently مؤخراً
Industries صناعات
Liquidity سيولة
Cross Selling بيع عابر
Receiving Bank البنك المستلم
Online Portal البوابة الإلكترونية
Third Party طرف ثالث
Tagging ترميز/ تعليم
Margin Trading التداول بالهامش
Capacity سعة / قدرة
Leverage رافعة مالية
Regulator منظم
Approved Securities أوراق مالية معتمدة
Multiples مضاعفات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي # #رحلة_داخل_شركات_السمسرة #الجولة _الثانية #الجزء_الأول