8. هل للوقت تأثير على الفلوس؟
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
..حلقتنا الأسبوع ده مختلفة شوية
وده لأن ولأول مرة يشاركنا في النقاش ضيف مميز
مروان حايك ضيفنا اللي منوّرنا الأسبوع ده في كلام ينوّر
Introspect Capital مروان هو شريك مؤسس لشركة
.وخبرة طويلة في المجال المالي
"Time Value of Money" بنتناقش مع مروان في فكرة الـ
“أو "القيمة الوقتية للمال
ما هو الوقت؟ وهل الوقت عامل في تحديد قيمة الفلوس؟ -
التضخم – وما هي أسباب حدوثه؟ وهل التضخم متصل بأداء الدولة؟
.دور الودائع البنكية -
ليه الفوايد البنكية في دولة زي مصر مرتفعة مقارنة بدول الخليج وأمريكا؟ -
.ما هي تكلفة الفرصة البديلة وازاي اقارن بين فرص الاستثمار المتاحة و أقدر أختار الفرصة اللي هتحقق لي أعلى عائد -
.تابعوا حوارنا مع مروان واكتبولنا آرائكم في التعليقات بعد سماع الحلقة
Marwan Hayek @ LinkedIn : تقدروا تتواصلوا مع مروان على
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
اهلا بيكوا في حلقة جديدة من كلام ينور حلقتنا الاسبوع ده مختلفة شوية النهاردة معانا ضيف عزيزعليا انا شخصياً.. صديقي وشريكي "مروان حايك"
Introspect Capital مروان هو شريك مؤسس لشركة
وعنده خبره طويلة في المجال المالي
النهاردة هو هيساعدني إننا نتناقش في مصطلح مهم أنا تعمدت إننا نتكلم فيه في بداية الحلقات بتاعتنا لأنه هيأثر على مواضيع كتير في المستقبل من خلال البودكاست ده.. تقدروا تتواصلوا مع مروان في الروابط الموجودة في الشو نوتس
Time Value of Money في حلقة النهاردة هنتناقش مع مروان في فكرة الـ
القيمة الوقتية للمال! ازاي الوقت بيكون عامل في تحديد قيمة الفلوس؟
هنتكلم كمان عن مصطلح التضخم، وليه في تضخم من الاساس؟ وهل التضخم متصل بأداء الدولة؟ هنتكلم عن دور الودائع البنكية ، وليه الفوايد البنكية في مصر عاليه جداً مقارنة بدول الخليج وأمريكا؟ ايه هي تكلفة الفرصة البديلة؟ وازاي اقارن ما بين الفرص المتاحة وأقدر أختار الفرصة اللي هتحقق لي عائد أعلى.
هدفنا من الحلقة دي انك تعرف ان الـ 100$ قيمتها بعد 5 سنين مختلفة ، بعد 10 سنين مختلفة
في البداية خلونا نرحب بمروان.. مروان ازيك
02:03
مروان: بخير ماشي الحال يا عمر
عمر: أنا عارف أنها تجربة مختلفة ، بس احنا أتناقشنا في كذا حاجه احنا ممكن نتكلم عليها واحنا أخترنا النهاردة إننا نتكلم على حاجه اسمها Time Value of money ترجمتها بالعربي إيه؟
مروان: ترجمتها بالعربي صعبه! في الأساس الفلوس قيمتها دلوقتي غير بعد سنة أو سنتين ، يعني الـ 100$ اللي معاك دلوقتي قيمتها غير الـ 100$ اللي هتكون معاك بعد سنتين فالوقت هو عامل بتحديد قيمة الفلوس
03:03
عمر: أنت النهاردة لو بتقيس بكلمة الوقت ، أول حاجه إيه هو الوقت اصلاً؟
مروان: لو فكرنا ليه بيقولوا الوقت قيّم؟ لأن أنت كإنسان وقتك بالحياة محدود ، يعني في إمداد معين للوقت ولذلك هو قيَم ، وده سبب إنه كل ما يعلى الطلب كل ما يعلى القيمة بتاعته لأن الإمدادات مش بتعلى معاه.. الوقت نفس الشي ، كل ما يمر وقت أكتر خلاص وقتك المتبقى بيخف وده السبب إنه قيّم ده مفهوم الوقت في العموم
بس لو جينا ليه الوقت ليه قيمة بتقيم الفلوس لأن في حاجه اسمها تضخم.. ليه الـ 100$ اليوم قيمتها أكبرمن الـ 100$ بعد سنتين ، يعني اذا أنا بعطيك خيار من اتنين بعطيك 100$ اليوم أو بعطيك 100$ بعد سنتين! المنطق إنه تنقي الـ 100$ اليوم لأن الـ 100$ بعد سنتين هتكون قيمتها أقل ، وكيف بتحدد قيمة الـ 100$؟ بالقدرة الشرائية للـ 100$ بمعنى ان لو أديتك اليوم 100$ ممكن تشتري بيها طاولة بعد سنتين يمكن مقتدرش تشتري نفس الطاولة لان سعرها هيكون 105 دولار بسبب التضخم كل شي سعره بيغلى لذلك الـ 100$ قيمتها هتكون أقل بعد سنتين وهو ده معنى مفهوم القيمة الوقتية للمال.. كل ما يمضى الوقت كل ما العملة هينزل قيمتها .. هي دي القاعدة
عمر: لأنها مبتقدرش تحفظ قيمتها عبر التاريخ بسبب التضخم
05:24
عمر: طيب التضخم هل هو عامل من أداء الدولة نفسها؟ يعني خلينا نقول إن في عملات كتيرة في العالم في الدولار والاسترليني واليورو والحاجات دي ، مش لازم كل سنة بسنتها بس خلينا نقول في الـ 10 سنين اللي فاتوا هل التضخم مربوط بأداء الدولة نفسها؟
مروان: أكيد التضخم بيتغير من بلد لبلد بس هو التضخم ليه موجود؟ لو أنا عارف إن بعد سنتين الـ 100$ اللي معايا قيمتها هتبقى أكتر مش هصرفها دلوقتي! لو أنا عارف إن الـ 100$ دلوقتي هتجيبلي طاولة بس بعد سنتين هتجيبلي طاولتين هخليها معايا ومش هصرفها فهيبقى في ركود إقتصادي لأن مفيش استهلاك
ولذلك الدولة ديماً هدفها تخلي في مستوى معين من التضخم وعشان كده المصارف المركزية بتستهدف تضخم معين للسنة.. متكونش كتير عالية عشان ميبقاش في تضخم زيادة فالناس متقدرش تصرف ولا كتير واطي عشان الناس تفضل تصرف وميحصلش ركود ، لأني لو عارف إن الفلوس اللي معايا قيمتها هتبقى أكبر بعد سنتين هخليهم معايا وأشتري أكتر بعد سنتين
فديماً في تضخم مستهدف ، بين دولة ودولة أكيد بتفرق حسب كل دولة يعني ليه مثلاً الأسواق الناشئة بيكون التضخم كتير عالي لأن الطلب بيعلى بسرعة والإمداد مش بيغطي فالأسعار بتزيد فهيبقى في تضخم
07:20
عمر: في دولة زي مصر مثلاً هل الـ 14% اللي البنك بيديهالي النهاردة على شهادات الإستثمار هل ده القيمة الوقتية للجنية المصري في الوقت ده؟
مروان: صح ، لأن لو معاك أنت 100 جنية دلوقتي بتاخد عليها 14% هتبقى بعد سنة 114 جنية يعني التضخم تقريباً في مصر بالنسبة دي لأنك محتاج تحط فلوسك فحاجه تحفظلك قيمتها فلو التضخم 10 أو 11% والبنك هو الأختيار الأأمن ولو ده أقل عائد ممكن تاخده من كل الأختيارات المتاحة لأنه تقريباً بيوازي التضخم فلو عاوز تحفظ قيمة الفلوس اللي معاك بتحطها بالمعدل ده
08:28
عمر: أنا بالنسبالي لو عندي 100 جنية في مصر وحطيتهم في البنك والسنة الجاية بقوا بـ 114 لو القيمة الشرائية بتاعة الجنية نزلت بنفس القيمة 14% أنا غالباً هشتري نفس السلعة هي هي السنة اللي وراها
مروان: صح وعشان كده التضخم بمصر عالى أكتر من أمريكا لسبب ده انت عشان تحفظ قيمة فلوسك محتاج عائد عالي عشان تقدر تحفظ القدرة الشرائية لأن مصر بلد بيستورد معظم حاجاته عشان كده محتاج عائد عالي لأن العملة المصرية هتنزل ، التضخم بيوازي قد إيه العملة هتنزل لازم يوازوا بعض على المدى الطويل
لانه زي ما قولنا لو هتشتري حاجه في أمريكا بـ 100$ بيوازي 2000 جنية ، من دلوقتي لسنة الجنية هيتراجع بنسبة 10% فبقت الـ 100$ بتساوي 2200 جنية فعشان أنت تفضل قادر تشتري الحاجه اللي سعرها 100$ لازم السنة الجاية يبقى معاك 2200 جنية عشان كده الفايدة في البنك تقريباً بتوازي قد إيه العملة نزلت فأنا السنة الجاية يبقى معايا 2200 جنية بقدر أشتري نفس الحاجه من أمريكا اللي تمنه 100$ بما إن الجنية دلوقتي سعره أوطى
عمر: يبقى دور الودايع دي بس تحفظلي قيمة الجنية بتاعي مظبوط؟
مروان: صح
10:10
عمر: طيب عشان أنا بشوف المثل ده كتير أوي في مصر لو انا معايا 100 جنية وباخد 14 جنيه آخر السنة ، الناس بتعيش على الـ 14 جنيه دي يعني بتحاول تاخدها أكنها الدخل بتاعها وتصرفها على مصاريف معيشتها السنة اللي وراها هبتدي تاني بـ 100 جنية بس الـ 100 جنيه دي مش هتشتري اللي كانت بتشتريه السنة اللي فاتت ، يبقى هنا أنا عشان صرفت الـ 14 جنيه ومعدتش أستثمارهم تاني السنة الجايه فأنا فالواقع بخسر فلوس بالنسبه لعدد السلع اللي ممكن أشتريها؟
مروان: صح لأن كان معاك 100 جنيه بتسوي مثلاً 10 دولار واحنا بنقارن بالدولار لأنه العمله العالمية تاني سنة معك 100 جنيه بس بتسوي 9 دولار ، تالت سنة الـ 100 جنيه هتسوى 8 دولار فهنا قيمة الجنيه بتقل
عمر: تعالى نفترض مثلاً الدولار نسبة التضخم بتاعته قد إيه؟
مروان: نسبة التضخم المستهدف غالباً 2%
عمر: خلينا نقول مثلاً 3% على المدى الطويل طيب هل أنا المفروض أروح انصح واحد لو أنا باخد 14% على الجنيه المصري وعلى الدولار التضخم الحقيقي 3% انصحه يصرف بس 3% من الفايدة ويعيد إستثمار الـ 11 بحيث إنه على الأقل يبقى حفظ قيمة الـ 100 جنيه بتاعته الأصليه.. هل ده ينفع؟
مروان: فكر فيها بغض النظر عن الأرقام .. مهم تصرف وفي الاخر المدخرات بتاعتك يكونوا قد إيه العمله قيمتها هتنخفض ففي الحالة دي أنت بتاخد 14% فايده وفي أمريكا التضخم 3% يعني في مصر التضخم هيكون 11% مثلاً فأفضل حاله إنك تصرف ومعاك 11% مدخر وتعيد إستثمارهم تاني ، يعني تبدأ أول سنة معاك 100 جنيه تخلص السنة معاك 111 جنيه والـ 111 جنيه ترجع تستثمرهم تاني
عمر: أنا بشوف الغلطة دي الناس بتقع كتير فيها معرفش الكلام ده موجود في لبنان مثلاً أنا بحاول أتكلم بره الإمارات او بره السعودية او الحاجات دي لأنها عملات مختلفة يعني
مروان: لبنان غير ، مش مقارنه بمصر وأقرب للخليج
عمر: نقدر نقول مصر أقرب لمين؟
مروان: تركيا ، الهند ، البرازيل ، جنوب أفريقيا .. كل دولة ناشئة بتنمى بـ 4 - 5% بالسنة وعملتها مش ثابته
عمر: أنا ليه ذكرت المثل ده بالذات لأني بشوف ناس كتير جداً بتبقى عايشه على الفايدة ، حاطت 100 دولار وبياخد 14% خلينا نقول للتسهيل يعني بياخد جنيه كل شهر وبيروح يصرفه على معيشته بيجي بعد 10 – 15 سنة بيلاقي الـ 100 جنيه المحطوطه في البنك دي كأنه مش حاطت حاجه فأنا أعتقد لو هنقول نصيحة أو هنسهل نقول لو أنت بتاخد فوايد ممكن تصرف بس تلتها مثلاً وتعيد إستثمار التلتين
مروان: صح إنه هيفضل قيمة الفلوس اللي معاك بالبنك تقل بس أحسن من انك تصرفهم كلهم يعني تصرف جزء وتسيب جزء أحسن من أنك تصرفهم كلهم
14:33
عمر: ليه الكلام ده مش معروف للمواطن العادي يعني تفتكر ليه الموضوع صعب على الناس تفكر فيه؟
مروان: مش عارف بس حسب البلد ، البلدان اللي التضخم فيها واطي الناس مش بتفكر فيها يعني لو بقولك أوكي التضخم 1 أو 2 % فالـ 100 دولار هتكون 99 دولار بعد سنة فده رقم صغير أوي فالناس مش بتفكر فيه
عمر: يعني لو أخدناه في دول الخليج مثلاً
مروان: مش بتفكر فيها لأن التضخم واطي 1 أو 2% فمش بتفكر فيها يعني أنا اذا حطيت فلوسي بحساب جاري وعارف إني مش باخد فايده عليه وعارف إن في تضخم وعارف إني بخسر فلوس بس مش بعمل الجهد إني اروح أحطهم في حساب توفير عشان التضخم ،
الناس بتكون بمنطقة الراحة إنه خلاص أنا مش هروح أقفل الحساب ده وأفتح حساب تاني عشان 1% في السنة لأنهم مش بيقدروا قيمة المضاعفه إنه أنا باخد 1% بالسنة بس سنة على سنة بيجمعوا الفلوس وبياخدوا 1% على الـ 101 يعني الناس مش بتفكر فيها بالطريقة دي بيقولك 1% هتعملي إيه ، اذا معي 1000 دولار بتعمل 10 دولار بالسنة مش كتير مهمه .. فبعتقد انه إهمال أكتر من إنه عدم معرفه
16:26
عمر: أنا النهاردة لو أنا راجل عادي بسيط مش متوغل في الإقتصاد بالطريقة اللي احنا بنتكلم فيها لو أنا كل أول سنة عايز أشوف نسبة مئوية معينة أتابعها بحيث إني اعرف السنادي أصرف قد إيه
أنا عندي 100 جنية في البنك في دولة زي مصر أو السعودية أو الإمارات أياً كان وعندي أسعار الفايده معلنه وعندي نسب التضخم معلنه مثلاً أديني مثال رقمي نعمل إيه أنا عايز برده أسهل على الناس لو حد مش عايز يخش في تفاصيل
مروان: المفروض إنك تشوف مصروفك.. يعني أنت معاك 1000 جنيه مفروض تشوف لو هتحطها في البنك قد إيه هيطلعلولي فلوس لو بحطلهم 10% بيطلعلولي 100 جنيه وقارنها بالتضخم اللي هو 6 او 7% مثلاً يبقى أنا بعمل 3% فرق وبعدين هشوف أنا مصروفي بس هدفي بآخر السنة يكون معايا الـ 100 جنيه + التضخم كده انا بخلص السنة معي على الأقل بالدولار نفس الكم مثلاً ده الهدف الأمثل يعني لو أنت عاوز تسيب صافي القيمة يكون بالدولار زي ما بدأت السنة
18:13
عمر: تمام طيب في حاجه تاني برده أنا بسمع عنها كتير إن أنا مثلاً بحوش كل شهر 100 جنيه من ناحية التحويش لما الدولة السنة التانية في التحويش بتاعي تقولي إن التضخم 10% هل ده معناه إن أنا بدل ما أحوش 100 جنيه السنة اللي وراها أحوش 110 أو أكتر؟
مروان: المفروض ، 110 أو اكتر بس الحد الأدني 110 لأني بقولك إن الـ 100 دي بتشتريلك مثلاً تليفزيون بعد سنة الـ 100 دي مش هتشتريلي نفس التليفزيون هتشتريلي تليفزيون أصغر فإذا أنا عاوز أحافظ على القدرة الشرائية مفروض أحوش الـ 100 + التضخم
تاني احنا بنتكلم في بلدان مستوردة بتستورد كل حاجه مش بنصنع كتير عشان كده بنقارن بالدولار لأن اذا كل شي بنستورده بيكون مسعر بالعملات الصعبه بالدولار أو اليورو أو غيرهم فعشان أحافظ وافضل قادر أصرف على نفس مستوى الحياة لازم يكون معايا بالدولار على الأقل نفس القيمة
عمر: ولو أنا عايش في أمريكا أو دول الخليج اللي هي أسعارها مربوطه بالدولار لو جت حكومة السعودية قالتلي نسبة التضخم السنادي 3% أحاول أزود بدل ما بحط 100 ريال أحط 103 ريال
مروان: نفس الفكرة بس بالبلدان دي بتكون اوطى من البلدان الناشئة زي مصر أو غيرها
عمر: انا بتكلم عن مصر لأن وأنا صغير كنت عايش في مصر ومازال عندي صحاب وعندي ناس بتكلم معاهم ديماً وبيجيلي ديماً اسئلة على الجنيه وإيه معنى الفايده وليه الفايده 14% وأنا بحاول أغطي معاك النهاردة ليه الفوايد في مصر عاليه جداً مقارنة بالخليج وأمريكا وده يرجع للقيمة الوقتية للمال اللي هو عنوان الحلقة النهاردة
20:33
عمر: طيب في أي حاجه تانية تقدر تشرحهالنا أو نتكلم فيها على القيمة الوقتية للمال في أي حاجه مغطنهاش في الحته دي؟
مروان: في حاجه ناس كتير مش بتعمل حسابها وهي تكلفة الفرصة البديلة إن لو أنا عاوز أختار بين استثمارين أو اعمل استثمار معين أنا ديماً ببص على الاستثمار ده ومش بشوف غيره
مثلاً الاستثمار ده هيديني 3% ازاي أعرف اذا ده حاجه كويسة أو لأ انا الـ 100 جنيه أو 1000 اللي معايا لو حطيتهم هيدوني 3% أو 4% ازاي اعرف لو الاستثمار ده كويس أو لأ أنا بنسي أو بتغاضى عن تكلفة الفرصة البديلة بدل ما أحط الـ 1000 جنيه اللي معايا في استثمار (أ) ممكن أحطها في استثمار (ب) أو (ج)
يعني اللي بيقولك أنا هحط فلوسي في البنك مش هاخد عليهم فايده بس خلاص هما بأمان وكده طيب أنت عندك أختيار تاني لأن أنت لو حاطتهم ومش بتاخد عليهم فوايد أنت كده بتخسر أن بتفكر انك مش بتخسر لأنهم لسه معاك في البنك بس أنت بتخسر انك ممكن تحطتهم في مكان تاني
فديماً لازم اشوف تكلفة الفرصة البديلة انه انا لو حطتها هنا هضيع عليا فرصة تانية فديماً لازم تقارن الفرص ببعضها مش كل فرصة لوحدها
22:40
عمر: انا النهاردة لو جيت قولتلك أنا هديك مشروع يعملك 10% في دولة زي مصر والبنك بيديني 14% يبقى أنا ببساطة احسنلي أروح أحط فلوسي في البنك هنا تكلفة الفرصة البديلة هي الوديعة بتاعتي في البنك
مروان: ولو محطتهمش في البنك وحطتهم في المشروع تكلفة الفرصة البديلة بتاعتي هي الـ 4%
عمر: 4% بالسالب فالمفروض إني أرفض المشروع
مروان: صح
عمر: يبقى انا القيمة الوقتية للمال بيعلمني كمان إني ابص على الحاجه بالنسبية مش بس ابصلها هي بتجيب كام في المطلق بتخليني اروح ابص على الحاجه بطريقة تانية
أعتقد دول حاجتين مهمين جداً ، تاني أنا البودكاست ده أنا نفسي بحاول افهم الحاجات بطريقة أفضل لأن المفاهيم دي لو كانت بسيطة مع الوقت انت بتضطر تراجعهم أو تسمع عنهم تاني او تناقشهم بطريقة مختلفة فأنا عايز أشكرك جداً جداً يا مروان النهاردة والله على وقتك معانا واحنا مبسوطين جداً ومحتاجينك تيجي تاني معانا في البودكاست ده
انا بس عايز تقولي بسرعة تجربتك النهاردة انت حاسس بإيه؟
مروان: تجربة حلوة.. غريبة بس حلوة
عمر: احنا عمرنا ما قعدنا أتكلمنا بالشكل ده قبل كده احنا طبعاً بنتكلم على طول أكيد
مروان: لأ تجربة حلوة وحظ سعيد وأكيد نعمل جلسة تانية
عمر: أكيد والناس اللي بتسمعنا لو في عندك أي اسئلة ليها علاقة بالقيمة الوقتية للمال أو اي حاجه احنا اتكلمنا فيها ياريت تبعتولنا على صفحتنا على السوشيال ميديا او على الإيميل وهنستناكوا الأسبوع الجاي في كلام ينور شكراً جداً
Translation of some words and terms:
Time Value of Money القيمة الوقتية للمال
Links روابط
Environment بيئة
Basically في الأساس
Factor عامل
in determining في تحديد
Commodity سلعة
Valuable قيّم
Supply عرض
Demand طلب
Concept مفهوم
in general في العموم
Inflation تضخم
Rule قاعدة
Linked متصل
Best Case أفضل حالة
Consumption استهلاك
Characteristic صفة مميزة
Currency Depreciation انخفاض قيمة العملة
Comparable قابلة للمقارنة
Effort جهد
Comfort Zone منطقة الراحة
Optimal Target الهدف الأمثل
Net worth صافي القيمة
Opportunity Costs تكاليف الفرصة البديلة
Relativity النسبية
in Absolut في المطلق
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي #الوقت #القيمة_الوقتية_للمال #التضخم #الودائع_البنكية #تكلفة_الفرصة_البديلة