9. يوفوريا
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
ضيف حلقتنا الأسبوع ده هو مصطفى عبد العزيز
ACT Financial مصطفى هو شريك إداري ومؤسس لشركة
خبره أكتر من 18 سنة في أسواق رأس المال في مصر والشرق الأوسط وشمال إفريقيا
حاصل على بكالوريوس في الاقتصاد والعلوم السياسية من جامعة القاهرة عام 2002
2019 ماجستير إدارة الأعمال التنفيذي من جامعة شيكاغو عام (EMBA)و
كتاب (يوفوريا) تأليف مصطفى عبد العزيز ، الكتاب في مرحلة الإعداد ولم ينشر بعد
(في حلقة النهاردة مصطفى بيحكلنا على مشروع الكتاب اللي هو بيكتبه حالياً بعنوان (يوفوريا
.يعني ايه يوفوريا؟ وإيه علاقة اليوفوريا بالمجال المالي وازاي اليوفوريا بتأثر على حياتنا
.بنتكلم كمان عن المراحل اللي بيمر بيها السوق المالي
.وازاي ضغط الأسعار بيأثر علينا نفسياً
.اسباب تقلبات السوق وازاي يبقى عندنا وعي بالمراحل النفسية للاستثمار
.إدمان البورصة ، وازاي أفرق بين الاستثمار و المقامرة
ولو انا مستثمر غير متخصص ألجأ لمين عشان يساعدني اختار الاستثمار المناسب ليا؟
..وفي نهاية الحلقة نصيحة مهمة جداً للمقبلين على الاستثمار
.تابعوا حوارنا مع مصطفى واكتبولنا آرائكم في التعليقات بعد سماع الحلقة
Mostafa Abdel-Aziz @ LinkedIn : تقدروا تتواصلوا مع مصطفى على
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
أهلاً بيكوا في حلقة جديدة من كلام ينوّر. في الاول قبل ما نبدأ حلقتنا حابب اشكركم جدا جدا على تفاعلكم الجميل معانا اللي وصلنا على حلقة الاسبوع اللي فات وان شاء الله نقدم لكم ديما محتوى محترم ومفيد ينول اعجابكم وتستفيدوا منه.
في حلقتنا النهاردة هنتعرف مع مصطفى على مصطلح اليوفوريا ، علاقة اليوفوريا بالاستثمار المالي ، هنتكلم كمان عن المراحل اللي بيمر بيها السوق المالي. وازاي ضغط الأسعار بيأثر علينا نفسياً ، تقلبات السوق معناها إيه؟ هنتكلم كمان عن إدمان البورصة وهل البورصة ساعات بتوصل لمرحلة المقامرة ولا لأ؟ ولو انا مستثمر غير متخصص ومعرفش حاجات كتير وعايز ابتدي ألجأ لمين عشان يساعدني اختار الاستثمار المناسب ليا؟ وفي نهاية الحلقة هيبقى في شوية نصايح للمقبلين على الاستثمار.
خلوني أعرفكم على ضيف حلقتنا النهاردة : مصطفى عبد العزيز
ACT Financial مصطفى هو شريك إداري ومؤسس لشركة
، عنده خبره أكتر من 18 سنة في أسواق رأس المال في مصر والشرق الأوسط وشمال إفريقيا. آراء مصطفى ديماً بتعجبني يارب تستفيدوا منه وكالعادة هتلاقوا في الشو نوتس الروابط اللي هتقدروا من خلالها تتواصلوا مع مصطفى لو حابين.. وفي الأول أحب ارحب بمصطفى ، ازيك يا مصطفى
مصطفى: اهلاً بيك يا عمر
0:06
عمر: انا عارفه احنا اول مرة يعني نتكلم بودكاست وكده فـعاوز الأول اسألك حاسس بأيه؟
مصطفى: حاسس ان الصوت حلو ، مختلف عن التليفون ومختلف عن الواقع بس ممتع يعني
0:24
عمر: احنا بنتكلم النهاردة بسبب انك اخترتني من مجموعة ناس قليلة شاركتني مسودة الكتاب بتاعك اللي بتكتبه ، فأول ما انت بعتلي قولتلي انا بكتب كتاب انا توقعت انك ممكن تكون بتكتب كتاب عن مجالك حاجه ليها علاقة باللي انت بتعمله بس انا فوجئت بالموضوع بتاعه ، ممكن في الأول تكلمنا ايه مشروع الكتاب اللي انت بتعمله؟
مصطفى: بص هو كتاب (قصة) سميها بقى رواية سميها حدوتة سميها أياً كان بس هي قصة فيها أفراد وأشخاص بيعيشوا مرحلة معينه في الحياة فيها مشاكل وفيها حاجات بس هي مبدأتش – انا مش كاتب روائي مليش خالص في الأدب والكلام من ده – بس كان عندي أفكار وخواطر وطوارد يعني حاجات في دماغي كلها وديما كنت باخد الافكار دي ، بأكتب افكار مجردة فحسيت انها لو اتجمعت ممكن يبقى فيها محتوى بس حسيت لو اتجمعت كده كأفكار مجردة مش هتبقى مممتعه فحسيت انها لو اتحطت في سياق حياة وأشخاص بتمثل الأفكار دي ممكن تبقى ممتعة أكتر فجربت التجربة دي وكانت مختلفة تماما بالنسبالي.
01:53
عمر: من أكتر الحاجات اللي شدتني عنوان الكتاب "يوفوريا" وده بردة عنوان الحلقة بتاعتنا رجوعا إلى الكتاب ، ليه يوفوريا ويعني ايه يوفوريا في الأول بالعربي؟
مصطفى: بص يوفوريا بالعربي معناها النشوة او السعادة الزائدة يعني حاجه فيها حماس زيادة. وهو زي ما قولت في الأول كده صحيح هي قصة ورواية واشخاص وحياة وكل حاجه بس هي في الاخر مش بعيدة عن المجال اللي هو مجالي الاستثمار والاسهم وبرصه وحاجات كده.
اليوفوريا ديما مصطلح بنستخدمه لما السوق او المستثمرين يكونوا في مرحلة النشوة او الحماسة الزائدة اللي بتخليهم يبقوا متحمسين زيادة فيشتروا الأسهم بشكل عنيف جدا فتلاقي الاسعار بتطلع بشكل مبالغ فيه ، تفاؤل زيادة عن اللزوم ، هي دي المرحلة اللي بنسميها اليوفوريا او الحماسة الزائدة.
يمكن الكتاب مش متناول اليوفوريا من معناه الاستثماري فقط لكن من معناه المطلق وتأثيرة على حياة البشر بشكل عام ، القرارات اللي انت بتاخدها تحت ضغط أو ظروف عاطفية.
3:29
عمر: طيب انت قولت كلمة مهمه جدا ، ان اليوفوريا مرحلة من مراحل السوق تقدر تكلمني أكتر على المراحل المختلفة اللي السوق بيمر فيها؟
مصطفى: بص هو السوق ممكن تقسمه لـ5 أو 6 مراحل ، خلينا متفقين ان اللي بيقرر حالة السوق او وضع السوق طلوع السوق او نزول السوق او حماسة السوق اوالسوق دمه تقيل كل الالقاب اللي ممكن توصف بيها حركة الاسعار في السوق هي فالاخر قرارات المستثمرين احنا بنشتري ولا بنبيع دي الحاجه الوحيدة او الاساسية اللي بتحدد اتجاه السوق ، فلو الناس بتشتري السوق بيطلع لو الناس بتبيع السوق بينزل دي القاعدة العامة المعروفة في الحياة كلها عموما يعني ولو الناس بتشتري أوي السوق هيطلع اوي ولو الناس بتبيع اوي السوق هينزل اوي ف في الاخر في مراحل بتعدي بعواطف المستثمرين بتخليهم ياخدوا قراراتهم الاستثماريه بناءا على العواطف دي فبيحدد مراحل السوق
ممكن نقسم المراحل دي مثلا "مرحلة الهدوء" دي مرحلة ترقب مفيش حاجه بتحصل الناس مش متفائلة ومش متشائمة فبتلاقي السوق بنسميه راكد كده او ملوش طعم كده ، الاسعار مبتتحركش مفيش حد بيعمل حاجه احجام التداول قليلة شوية وهكذا..
خلينا نفترض للتبسيط النظري ان اللي بيجي بعد المرحلة دي "مرحلة التفاؤل" الاسعار بدأت تطلع الناس متفائلة شوية وشايفة ان المستقبل احسن شايفة ان في فرصة استثمارية أكتر فالناس بتبدأت تشتري اكتر فالاسعار بتبدأ تطلع اكتر واكتر فتلاقي الناس بتكلم بعض انت مبتستثمرش ليه ده البورصة طالعة ، دانا الشهر اللي فات حطيت فلوس الشهر ده كسبان 10% في شهر واحد ده انت فايتك كتير. فتلاقيك انت دخلت فابن خالتك ودخل وصاحبك دخل وقريبك دخل كل الناس دخلت مرة واحده تحصل "مرحلة اليوفوريا" اللي كنا بنتكلم عنها ان بقى في حماس بقى اللي هو الناس بتعمل حركات مش مفهومه السهم يبقى بـ 10جنية فجأة يبقى بـ 20 جنية بـ 30 جنية وبعدين تلاقي واحد بيكلمك يقولك السهم رايح لـ 200 جنية طب ازاي فين المنطق ، بتبقى مرحلة اللا منطق في الحماسة الزائدة ، فبتلاقي الاسعار وصلت لمراحل غير منطقية بالمرة في الطلوع لان الشرا بيبقى عاطفي جدا وفي حماس جدا
يجي بعد مرحلة اليوفوريا ولأن الاسعار بتوصل لمرحلة غير منطقية فبعض الناس بتسيطر على عواطفها وتبدأ تبيع ، فيبدأ يحصل نزول وتشاؤم فتبدأ الاسعار تنزل شوية بشوية وبعدين تقف شوية في "مرحلة الترقب" اللي هي كانت قبل مرحلة التفاؤل بس دي بقى مرحلة الترقب اللي بعد التشاؤم عشان الناس مش عارفه هل السوق هيكمل نزول ولا هيطلع تاني للمراحل العاليه محدش بيبقى مصدق كله في مرحلة الرفض لحد ما تخش في مرحلة عكس اليوفوريا "مرحلة الهلع" اللي هو أجري أبيع ، السهم بـ 10 /5 / 3 جنية انا عاوز أبيعه بأي سعر ومحدش بيسأل السهم ده سعره كام ، فتلاقي الناس بقى زي ما كانت بتجري تشتري الحاجه بأي سعر من غير ما تسأل هي تساوي اللي هي بتدفعه فيها ده ولا لأ فتلاقي الناس بتبيع من غير ما تفكر، دي ببساطة كده اللفه اللي بيلف بيها مراحل السوق ولو تلاحظ كلها مرتبطة بنفسية المتعاملين في السوق.
7:52
عمر: كل شوية نشوف في الاخبار عناوين زي "انتعاش السوق" أو "إنهيار الاسواق" هل المصطلحات دي بتبقى في نفس المراحل ، بنلاقي العناوين دي والميديا نفسها بتحاول ترسم نفس الصورة مظبوط؟
مصطفى: بالظبط ، يمكن بس المراحل دي بتبقى مراحل أطول من التعليقات اللي بتيجي على الميديا لأن الميديا التغطية بتبقى تغطية يومية فممكن في يوم السوق منتعش تاني يوم السوق ينهار لكن لما تيجي تبص على مرحلة بتبقى على فترة اطول عشان تسميها مرحلة للسوق ، فبتلاقي السوق ممكن يقعد في مرحلة اليوفوريا دي سنة ، انا مش بكلمك في مرحلة بتحصل في نص ساعة وخلاص ، ممكن تلاقي سنة من اليوفوريا الناس بتشتري وبس ف دي المراحل الأطول شوية.
8:44
عمر: كنت بتقول واحد بيكلم واحد واحد بيشوف ابن خالته عمل ايه ، صاحبه وهكذا فهل نقدر نقول خاصة في البورصة او الاستثمار العام ان الناس بتأثر على بعض؟ ولكن في حاجه زي العقارات او الاستثمارات الخاصة الموضوع بيكون مختلف؟
مصطفى: بص هي البورصة عموماً مشكلتها الأساسيه في موضوع المشاعر ان انت بتشوف سعر استثمارك بيتحرك قدامك كل دقيقة ، والسعر ده حقيقي يعني لو انت حابب تشتري او تبيع السهم على السعر اللي انت شايفه ده قابل للتنفيذ ، عكس الاستثمار الخاص انت مثلاً اشتريت حتة أرض أو بيت أو شقة انت عارف سعرها في السوق تقريبا كام بس متعرفش النهاردة سعرها بقى كام وبكره كام وبعده كام لانها ملهاش سعر، وبعدين ممكن واحد يقولك البيت ده تقريبا كذا بس هل تقدر تنفذ البيع او الشرا على اللي تقريباً كذا في أي وقت انت عاوزة! لسه بقى هدور وتشوفلك سمسار يشوفلك حد عاوز يشتري بيت وبعدين يجي يقولك لأ انا مش هدفع السعر ده ، فالسعر انت مش عارفه.
مش عارف السعر فمبتاخدش قرارات عنيفه او متحركة بشكل كبير في الاستثمارات الخاصة ، فتلاقي لو عندك شقة جايبها استثمار عمرك ما هتاخد فيها قرار انك تشتريها وبعدين تقول السعر دلوقتي عالي فانا هبيعها ومتوقع ان سعر العقارات هينزل في الشتا فهشتريها تاني في الشتا ، محدش بيعمل كده في استثماراته ولو حد عمل كده بتبقى مره مبيعملهاش بشكل متكرر.
الفرق الاساسي في البورصة انك شايف سعر استثمارك كل يوم ، فده بيأثر على نفسيتك فتلاقي واحد يقولك يا نهار ابيض انا خسران يا نهار ابيض السهم نازل ده شكله هينزل اكتر فتلاقي نفسك مضطر وتحت ضغط نفسي انك تاخد قرار استثماري سواء بالشرا او البيع ، فتلاقي نفسك ديما عليك الضغط النفسي انك تاخد قرار مع ان عادي جدا مش مضطر تاخد قرار استثماري كل يوم.
في ضغط المجتمعي وضغط الشاشة نفسها انك شايف اسعارك قدامك بتتحرك وانت عارف القيمة ، طول ما انت عارف القيمة فأنت عليك ضغط نفسي جواك انت من نفسك انت اللي بتقولك ألحق بيع او ألحق أشتري.
11:36
عمر: هل في طريقة معينة الواحد يقدر يسيطر بيها على مشاعره دي؟
مصطفى: الوعي ، انك تبقى واعي بده ، طبعا مفيش حد بيقدر يسيطر على مشاعرة بشكل كامل ، ومتهيقلي ده مش في البورصة بس ، حتى قراراتنا في الحياة كلها قرارات عاطفية انت بتاكل عشان الاكل بيبسطك حتى لو عارف انه هيضرك وهيوجعلك بطنك بتاكل ، حتى لو سيطرت شوية بتلاقي في وقت بتضعف ، وممكن تشتري حاجه عجباك وانت عارف انها مفهاش قيمة بس بتشتريها عشان هي بس عجباك ، ففكرة ان تروض نفسيتك بنسبة 100% مستحيل في الحياة مش بس في الاستثمار.
بس وعيك ان الاستثمار ده مش حاجه بتحبها وتكرهها انت بتحب حاجه واحده بس هي العوائد ، اي حد بيستثمر عشان العائد معندوش اهداف اخرى ، فأنت مش بتستثمر عشان بتحب الشركة دي ، انت بتحب الشركة دي عشان العائد لكن انت معندكش اي هدف تاني استثماري في حياتك غير انك تعمل عائد.
فمتحبش الاستثمار ومتكرهش الاستثمار ومتحبش البورصة ومتكرهش البورصة ومتسخنش على السوق ومتقفلش من السوق كل اللغبطة النفسية اللي بتحصلك دي حاول تسيطر عليها وتفكر نفسك بيها.
زي فكرة اما بتروح مثلا السوبرماركت ومعاك طفل تقوله متشبطش في كل حاجه بتشوفها ، لأنك لو مشيّت طفل وقولتله هات اللي انت عاوزة هياخد حاجات طول ما هو ماشي حتى لو مش محتاجها وحتى لو مضره اي حاجه ملونه وشكلها حلو هياخدها ، حتى احنا الكبار ساعات بنسخن ونشبط في حاجات ، تلاقي واحد شبطان في عربيه هو عارف انها مش كويسه بس شكلها عجباه ، ممكن واحد يشبط في جهاز يشتريه وبعدين يكتشف انه ركنه ومبيستعملوش ، كل الحاجات دي اللي بيسيطر عليها هو وعيك وانك تعامل استثمارك بعيد عن انك تشبط فيه ، تحبه او تكرهه لان زي ما اتفقنا الاستثمار هو عائد ، دي مش حاجه انت بتجبها عشان تبسطك او تضايقك انت بتعمل منها فلوس بس.
14:33
عمر: يعني لو قدامك 3 – 4 شركات ممكن تشتريهم مش هتختار بناءاً على الشركة اللي انت حاسس انها احسن انت بتشتري بعد دراسة معينة انت عرفت ان العائد بتاع الشركة رقم 1 كذا رقم 2 كذا رقم 3 كذا وبتحاول تشتري العائد الأعلى ، مظبوط؟
مصطفى: مظبوط ، ومش بس في الداخلة ، يعني الداخله انت طبعا لازم بتدرسها بناءا على العائد ، في النص في 3 مراحل نفسية في الاستثمار : مرحلة الاختيار ، أختيار انا هستثمر ، اللي انت بتقوله ده صحيح اني باختار اللي هيعملي العائد بعد دراسة مش اللي صاحبي قالي عليه او اللي شكله حلو انهاردة او اللي انا حاسس ، كل ده تحريف. في ايه مرحلة الخروج من الاستثمار ، انا قررت أخرج من الاستثمار فهل هخرج عند اللقطة دي عشان انا عامل عائد كويس ولا هطمع واقعد. وفي مرحلة اللي فالنص كله ، كل اللي فالنص ده دوشه ، فأنت لازم تسيطر على مشاعرك ونفسيتك وقت الاختيار ومن ساعة ما تدخل لحد ما تقرر تخروج كل التقلبات والتغيرات اللي هتحصل في ظروفك وظروف السوق وفي ظروف السهم اللي انت شاريه وفي ظروف البورصة وفي ظروف المستثمرين اللي حواليك وفالنصائح المالية اللي هتجيلك كل ده محتاج تسيطر على نفسيتك في هذه المرحلة ومحتاج تسيطر على نفسيتك في وقت ما تخرج إدارة عملية خروجك من الأستثمار. الـ 3 مراحل محتاج تسيطر على وعيك في النفسية دي.
16:18
عمر: طيب انت قولت حاجه في موضوع الشبطان او انك تتعلق بالحاجه بدون سبب ، هل انت شوفت في مجالك ناس معينه بتوصل لمرحلة الإدمان ، يعني مبقوش يستخدموا البورصة للعائد بقوا بيستخدموها كعادة متعود عليها ومدمن ، زي مثلا مرحلة القمار ، هل شوفت النماذج دي؟
مصطفى: بص خلي بالك ان البورصة ممكن عادي تقلب قمار في حالة واحده لو انت مش عارف انت بتشتري ايه وبتبيع ايه ، وانا في رأيي قولا واحده لو انت بتشتري اسهم وتبيعها وانت مش عارف انت بتشتري ايه وبتبيع ايه هو ده تعريف لنوع القمار. في الاخر انت بتحط رقم على حاجه انت مش عارفها وبالحظ يمكن تطلع.
17:25
عمر: ده تعريف القمار ، طيب لو العادة دي أتقلبت لإدمان ، هل بتشوفها بتقلب لإدمان؟
مصطفى: آه ، القمار بيقلب لإدمان لانها بقت لعبة ، مبقاش دراسة مبقاش استثمار مبقاش اي حاجه ، هي فالاخر بقت بالنسبالك لعبة ، انت بتجرب اكنك قاعد بتلعب كوتشينا انت مرة بتكسب ومره بتخسر ، فاللعبة انت ممكن تدمنها ، وخلينا نفتكر تاني ان انت بتستثمرعشان تطلع عائد مش عشان تلعب ومش عشان الحماس بتاع انا هجرب وهخسر مرة واكسب مره هي مش كده ، فالقمار بيقلب إدمان.
وطبعا اه شوفت ناس كتير جدا مدمنة بورصة هو مش عارف هو بيعمل ايه بيشتري في ايه وبيبع في ايه الموضوع قلب معاه ادمان ، مش إدمان الاستثمار ولا إدمان المكسب او الخسارة وفي بعض الاوقات كمان مش بيكون فارق معاه هو كسبان ولا خسران على قد ما هو فارق معاه انا عاوز اشتري اسهم وعاوز ابيع اسهم ، مش قادر اعيش من غير ما اشوف الحركة دي في حياتي. فطبعا ده خطر جدا ، وزي ما قولت لو انت بتشتري شركات مش بتشتري اسهم او اي حاجه انت مش عارفها ، انت عارف انت بتشتري ايه عمره ما هيقلب إدمان ، انت بتبقى عامل دراسة وعارف انت بتشتري شركة ايه وعارف هي تساوي كام وعارف انت هتخش بكام وتخرج بكام ، فصعب جدا ان الاستثمار الحقيقي يقلب إدمان. فإنت لو مدمن اعرف انك مقامر مش مستثمر.
19:14
عمر: أنا ديما بقعد أفكر هي البورصة أصلاً معموله ليه؟ يعني البورصة هدفها ايه؟ البورصة هدفها انك بتاخد راس مال بتاع شركة بتقطعه لحصص صغيرة إن الناس تقدر تشارك فيه ، انت انهاردة لو روحت لواحد صاحبك عنده مشروع معين وإديتله فلوس انك تاخد حصة في المشروع بتاعه هل انت كل يوم هتشتري وتبيع اسهمه ؟ لأ ليه انت غالبا داخل عشان تقعد مع صاحبك عنده فكرة كويسة فبتستثمر معاه زي ما انت قولت بالظبط موضوع السعر اليومي للاسهم ده بيخلق مشاكل كتير جدا واعتقد احنا الاتنين على نفس الفكر اللي هو انت لازم تتجنب الأسعار اليومية كمستثمر
مصطفى: احنا حتى ساعات بننصح الناس واقوله أقفل الشاشة متشوفش الاسعار مش لازم تعرف قيمة استثمارك كام النهاردة.
عمر: بس لازم تعرف ايه " انت شاري ايه "
مصطفى: لازم تعرف انت شاري ايه لان دي مرحلة الدخول ، عشان كده بقولك لازم تسيطر على مشاعرك في مرحلة ما بين الدخول والخروج ، في النص قولا واحده مفيش سوق فالدنيا مفهوش تقلبات لان التقلبات دي بتحصل لاسباب كتيره اوي ممكن النهاردة يكون في خبر وحش عن البلد ، ممكن يكون في صندوق بيبع شوية اسهم ، صندوق بيشتري اسهم النهاردة ، بغض النظر عن المؤثرات اللي بتغير وضع السوق على المدي القصير اللي بيخلق تقلبات كتيرة ، انت عادي جدا ممكن تقرر انك تتجاهلها ومتعرفهاش ، مش مهم على فكرة مش مهم تعرف. انت مش شغلتك كمستثمر انك تعرف كل حاجه بتأثر على البورصة كل يوم ، أه بتحتاج تكون متابع شركتك اللي انت مستثمر فيها
21:32
عمر: مين يقدر يساعدني انا كمستثمر ، انا النهاردة لسه ببتدي ، مين يقدر يساعدني ان انا أختار الشركات؟ ومين يقدر يساعدني خلال الرحلة نفسها ما بين اني دخلت وخرجت؟
مصطفى: انت عندك نوعين من الاستثمار يا إما استثمار انت ليك دور فيه ، خلينا نقول اننا بنتكلم على مستثمر غير متخصص ، يعني المتخصص خلاص هو بيدير استثماراته ، احنا بنتكلم عن المستثمر غير المتخصص هو عنده حاجه من اتنين يا اما استثمار هو هيبقى جزء من عملية اتخاذ القرار ، او في استثمار هو مش جزء من عملية اتخاذ القرار ، لو هو مش جزء من عملية اتخاذ القرار فهيروح لحاجه من اتنين يا اما هيروح لمدير اصول (شركة إدارة أصول) هي بدير له الفلوس بتاعتة دي سواء بيشتري في صندوق استثمار او لو محفظة كبيرة شوية ممكن يعين مدير استثماري يديرله محفظته ، بس فالاخر انا مليش دعوة انا معرفش فلوسي دي انا بشتري بيها ايه وببيع ايه ، انا بس عينت مدير استثمار شاطر وهو بقى بيدرس وبيذاكر وبيدير الاستثمار ده نوع من انواع الاستثمار ، في نوع تاني الشائع شوية الفترة دي هي التحليل الكمي للاستثمار هو ان مدير استثمارك ده هو الكمبيوتر ، انت فالاخر في إدخال محطوط بـمعايير معينه هي اللي بتاخد قرارات الاستثمار ، وده يمكن لو عاوزين نربطة بما اننا بنتكلم على نفسية المستثمر في الحلقة دي فيمكن ده أكتر حاجه بعيده او عكس تماما الاستثمار العاطفي ، لانك لو بتدي فلوسك لمدير استثمار او سمسار في الاخر احنا كلنا اشخاص ممكن تتأثر ممكن يبقى في أخبار وحشه مأثرة على نفسيته ، زي ما حصل مثلا وقت الكورونا كل الناس كانت متشائمة بزيادة فتلاقي قرارات غير متزنه ومتضاربه عشان فالاخر اللي بياخد القرارات اشخاص ، فاالتحليل الكمي للاستثمار بيخلي القرارات هي فالاخر بتطلع بدون اي تأثير نفسي.
لو انت قررت كمستثمر غير متخصص ان انت تعتمد على حد بس في نفس الوقت تكون متواجد في القرار الاستثمار تكون عارف انت بتعمل ايه فبيبقى عندك اول حاجه الحد الأدني من المعلومات والفهم للاستثمار والشركات اللي انت بتشتري فيها تاني حاجه ان بيبقى عندك يا إما مستشار مالي بيساعدك ، بيديك افكار ، بيساعدك في اتخاذ القرار وانت بتذاكر معاه وبتناقشة في القرار ده او سمسار بحيث السمسار ده عنده ابحاث عنده معلومات بيساعدك بيقولك افكار وفالاخر انت اللي بتاخد القرار بس بمساعدة الغير.
25:13
عمر: المستشار الروبوت اللي هو بيديني محفظة مثالية انا ممكن اشتريها وانا بحول فلوس للمستشار الروبوت وهو بيستثمرهالي ، مستشار مالي آلي. بما اننا بنتكلم انهارده على نفسية المستثمرين ، ممكن تدينا مثال وحش عن العملا اللي شوفتهم في حياتك؟
مصطفى: طبعا في غلطات كتيره المستثمرين بيعملوها ومع الوقت الواحد شاف نماذج كتير من الناس وردود أفعالهم على المشاكل المختلفة في طلوع السوق او في نزول السوق او في خسارتهم او في مكسبهم وزي ما بيقولك ديما الواحد في الفلوس بيبان احسن واسوء ما فيك بتلاقي نسخة تانية خالص من شخصيتك بتبان لانه حقيقي جدا
يعني مثلا كان في واحد كنا بهزار بنقوله انت ملك المتوسطات ، فكرة انك تعمل متوسط سعري ، فكرة انك بتدمن الشرا وكل اللي فارق معاك عشان يهون عليك خسارتك – انت اشتريت سهم بـ 5 جنية مثلا وشايف السعر عمال ينزل فالسعر بقى بـ 4 جنية مثلا فانت مش قادر تاخد قرار ان انت تبيع بـ 4 جنية وانت شاري بـ 5 جنية وهتخسر جنية فيقولك طب خلاص انا هشتري ضعف الكمية اللي بـ 4 فيبقى متوسطك 4 ونص فانت كده عملت متوسط سعري – متوسط محاسبي – بس هي الفكرة كلها اللي انت مش قادر تفهمه ان انت لازلت عندك نفس الخسارة في المطلق ، صحيح انت كنت خسران جنية بقيت خسران نص جنية بس انت كنت مستثمر 1000 جنية بقيت مستثمر 2000 جنية فهو فالاخر خسارتك واحده ، ففي ناس بتبدأ تدخل في ادمان المتوسط السعري دون دراسة هو اصلا السهم اللي انا عمال اشتريه وهو بينزل ده هيطلع ولا هو كان قرار استثماري غلط اصلا ، فده مثال للتعلق بحاجه معينه وانك بتاخد قرار كله بناء على العواطف ملوش دعوة بحالة الشركة
28:25
عمر: لو النهاردة حد لسه بيبتدي وداخل المجال لأول مرة تقدر تقوله كلمتين يلخصوا كل اللي قولناه في الحلقة النهاردة تقوله ايه؟
مصطفى: هقولك حاجه اساسية في الاستثمار بالذات في البورصة عشان التقلبات والتغيرات كتير بتخليك ترجع في كلامك كتير وتندم كتير لو انت واثق من قرار الدخول كل اللي بعد كده تفاصيل وكل اللي بعد كده هيصلح نفسه بالوقت ، يعني حتى لو حصل مشاكل في النص في الرحلة مابين نقطة الدخول ونقطة الخروج لو نقشطة الدخول صح ومعموله على دراسه والاختيار اللي اتعمل على استثمارك كان محسوب صح والقيمة محسوبه صح فعلا بالوقت حتى لو حسيت فالنص بأن القرار كان غلط الوقت هيصلحلك كل ده والنتيجة ديما ان شاء الله هيكون فيها عائد كويس.
31:46
عمر: تمام ، مصطفى أنا مش قادر أشكرك على كمية المعلومات اللي أنت اديتهاني النهاردة إن شاء الله هنشوفك معانا في حلقة قدام أكيد هتعودنا انك تيجي تاني وعايز الناس تبعتلنا على صفحتنا على السوشيال ميديا آرائهم شكراً جداً وكلام ينور
Translation of some words and terms:
Setup إعداد
Interesting ممتع
Draft مسودة
Content محتوى
Levels مراحل
panic فزع
Emotions عواطف
peer pressure الضغط المجتمعي
value قيمة
Distortion تشويه / تحريف
Noiseضوضاء
Trending شائع
Quantitative investing التحليل الكمي للاستثمار
Input إدخال
emotional investing الاستثمار العاطفي
Robo Advisory مستشار روبوت
Average متوسط
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي #يوفوريا #مراحل_السوق #ضغط_الأسعار #تقلبات_السوق #البورصة #إدمان_البورصة