72. ما وراء القطاعات
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة مهمه جداً للناس اللي عايزة تستثمر ، الناس اللي عايزة تبتدي شغل ، الناس اللي عايزة تستثمر مع أصحابها ، أو حتى المديرين اللي قاعدين بيخططوا لمستقبل الشركة لأننا بنتكلم النهاردة عن القطاعات والقطاعات هي من أهم الحاجات اللي أنت لازم تفهمها في مجال الأعمال بصفة عامة
01:48 ليه لازم أفهم القطاع بتاعتي؟
02:56 عندي فكرة وعاوز المستثمرين يمولوني
03:37 ليه المستثمرين بيهتموا بالقطاعات؟
04:40 معايا فلوس وعاوز أفتح مشروعي أو فكرتي
05:37 معايا فلوس وعاوز أستثمر مع واحد صاحبي
06:08 المدير عنده وظيفة ومش محتاج يفتح مشروع!
06:35 المستثمر في البورصة
07:30 ما هي القطاعات؟
08:56 المعيار العالمي للقطاعات؟
12:00 القطاعات المتداولة في البورصة
13:55 ليه معرفة القطاعات مهم؟
15:37 كل قطاع بيتصرف بطريقة ليها علاقة بالأداء بتاعه؟
17:02 القطاعات المنتجه للأساسيات والرفاهيات
17:31 القطاعات الدفاعية
18:23 القطاعات ذات المؤسسات العمالية
18:42 القطاعات الإستراتيجية
19:10 التنافسية بين القطاعات
20:18 الهدف من الحلقة إيه؟
حلقة النهاردة ممكن تكون سهلة / صعبة بالنسبة للناس ومش هدفنا خالص إنك تروح بكره الصبح تستثمر في قطاع معين احنا بس بنفتحلك طريق انك تقرأ وتفهم الموضوع أكتر
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:46
اهلاً بيكوا في حلقة جديدة من بودكاست كلام ينور
في بداية الحلقة كده عايز أفكر الناس بالحساب بتاعنا على تويتر احنا بنزل تويتس كده كل يوم من الحلقات القديمة لو عاوز تنعش نفسك كده بمعلومة خلال اليوم لو عايز ترجع تبص على تاريخ الحلقات بتاعتنا ، هتلاقي تويتر من الأماكن اللي أنا بحبها جداً وبتاخد منك ثواني إنك تقرأ وممكن تبقى معلومة مركزة بشكل أكتر وبرده دي طريقة تانية بنحاول نساعد الناس إنها تستهل المحتوى بتاعنا بس بشكل تاني يعني
01:19
برده مؤخراً ابتديت أجرب أعمل سيشن لايف مع ناس كنا بنجرب تويتر سبيسيس للناس اللي عندها اسئلة أو أي حاجه وبرده أنت لو موجود وعاملنا فولو على الحساب في أي وقت لو حصل وروحنا لايف يعني هيجيلك إشعار
وبرده للناس اللي مش عارفه هتلاقوا الحساب بتاعنا اسمه كلام ينور على تويتر موجود على الرابط موجود على الموقع وموجود برده في البايو بتاعنا على إنستجرام
01:48
حلقة النهاردة أنا حاسس إنها مهمه جداً لكل الناس ، الناس اللي عايزة تستثمر ، الناس اللي عايزة تبتدي شغل ، الناس اللي عايزة تستثمر مع أصحابها ، أو حتى المديرين اللي قاعدين في الشركة اللي بيخططوا لمستقبل الشركة والكلام ده .. ليه لأن النهاردة احنا هنتكلم عن القطاعات والقطاعات هي من أهم الحاجات اللي أنت لازم تفهمها في مجال الأعمال
يعني النهاردة أنا لما أروح أفتح مطعم ، المطعم ده هو بينتمي لقطاع جوه الإقتصاد ، يعني إيه قطاع يعني مجموعة من الأنشطة بتعمل نفس الحاجه
هنلاقي مثلاً لو روحت فتحت سوبر ماركت فأنا مرتبط هن بقطاع التجزئة مثلاً ، فتحت مثلاً المواد الغذائية يبقى ممكن تبقى تصنيع أو زراعة يبقى هنا التصنيع حاجه والزراعة حاجه تانية خالص
ليه لازم أفهم القطاع بتاعتي لأن ده هيأثر على قرارات كتير جداً في طريقة الإستثمار ، حجم الإستثمار بتاعي ، محفظتي .. حاجات كتير جداً هنحاول نغطيها النهاردة في الحلقة أنا بس ببتدي كلامي بقول إن الحاجه دي غصب عنك بتأثر عليك .. القطاع اللي أنت عايش فيه بيأثر عليك
02:56
تعالوا كده ناخد واحد واحد من اللي أتكلمنا عليهم دول
هبتدي بالراجل المستثمر اللي عايز يلم فلوس ، عنده فكرة جميلة رايح للمستثمرين يقولهم يا جماعة هاتوا فلوس
أول حاجه هو بيعملها إنه بيعرض فكرته على المستثمر ، هنلاقي إن الجزء الأول والمكرر في أي فكرة إستثماريه بتطرح على المستثمرين هو .. القطاع بتاعك شكله عامل ازاي؟ الـ بتاعتك عامله ازاي؟ الناس هتستهلك حاجتك دي ازاي؟ النمو الإقتصادي؟ حاجات كتير جداً جداً جداً
03:37
ليه المستثمرين بيحبوا يشوفوا الحاجات دي؟
عشان ديماً الناس بتدور على القطاع الواعد أو القطاع اللي هيغير مثلاً حاجه في حياة الناس وهنلاقي مثلاً في الفترة الأخيرة هنلاقي القطاع التكنولوجي مثلاً كان مسيطر على الإستثمارات .. ليه لأن الناس شايفة أهمية القطاع ، حاجه تانية زي البايوتيك (التكنولوجيا الحيوية) اللي هو الصناعات الدوائية أو الصناعات اللي فيها تحليل بيانات كتيره دوا مثلاً بيتصنع بيقضي على نوع معين من أنواع السرطان اللي هو الخلطة بين التكنولوجيا والطب يعني ، هنلاقي قطاعات زي الفينتك (التكنولوجيا المالية) اللي هي القطاعات المالية المرتبطة بالتكنولوجيا
يبقى هنا النهاردة المستثمرين بيدوروا على القطاع الواعد زي ما قولنا القطاع الواعد ده بيتعرف بحاجات كتير لازم الراجل وهو بيقدم العرض بتاعه يذكرها عشان المستثمر يقتنع .. يبقى ده كده أول واحد في الناس
04:40
تاني مثال بقى لو أنا رايح أنا شخصيا بقى مش عاوز مستثمرين ولا حاجه أنا معايا شوية فلوس عاوز أفتح بيهم مشروع بتاعي فكرتي ، مشروع صغير من المشاريع الصغيرة والمتوسطة أياً كان
في مثل معروف كده متروحش تبيع الماية في حارة السقايين معلش يعني أنا بستخدمه لسبب إن هو بيقول اللي أنا عايز أقوله المثل ده هو منطقي جداً جاي منين؟ جاي من إني مينفعش أروح أنافس في قطاع السوق فيه ناس كتير جداً بتبيع نفس الحاجه دي وأنا لسه راجل جديد داخل في الموضوع يبقى أنا قبل ما أعمل اي فكرة أنا لازم بديهياً أزاكر القطاع اللي أنا فيه ، أذاكر الشارع اللي أنا هعمل فيه المشروع بتاعي ، هل دي فكرة صح ولا لأ ، هل في مشاكل في الإجراءات ولا لأ .. وهكذا يبقى معرفة القطاع مهم جداً جداً وأنا بفتح فكرتي
05:37
طيب لو أنا بقى مستثمر وعايز أحط فلوسي مع واحد صاحبي ، واحد صاحبي قالي تعالى استثمر معايا انا هنا هرجع للمثال الأول بس بطريقة معكوسة أنا المستثمر فصاحبي ده لازم يجبلي المعلومات بتاعتي اللي أنا لازم اشوفها اللي تقنعني إن القطاع ده نفسه مع الوقت أو في الـ 10 سنين الجايين القطاع ده ممكن نعيش فيه ونعمل فلوس
05:59
هنتكلم برده من زوايا مختلفة على الحاجات دي بس أنا بحاول أفكر معاكو ازاي الوظايف المختلفة والناس المختلفة هتبص على القطاعات بشكل مختلف
06:08
طيب آخر واحد الراجل المدير اللي هو قاعد عنده وظيفة ولا عاوز يفتح مشروع ولا عاوز يعمل أي حاجه ، ده قاعد في مكتبة بس المفروض يعمل الأهداف بتاعة السنة الجاية وأرقام المبيعات ، أو واحد بيعمل التوريدات اللي هو أنا عايز أصنع كام زجاجة ماية السنة الجاية ، كام مشروبات غازية اياً كان .. لازم يبقى فاهم حركة القطاع
يبقى هنا هنرجع ونقول تاني القطاع مهم جداً جداً جداً
06:35
طيب المستثمر بقى ، الراجل اللي هو ولا ده ولا ده ولا ده وهيحط فلوسه في البورصة ، زي ما قولنا مثلاً واحد قرر انه يشتري صندوق إستثمار معين ، وصندوق الاستثمار ده سواء هو صندوق استثمار متداول أو صندوق استثمار عادي هو معرض لقطاعات مختلفة ومخاطرات معينة يعني لو قولنا مثلاً راح أشتري السوق الأمريكي وهيحط فيه 100$ كام دولار هيروحوا في القطاعات المختلفة يبقى لازم ابقى عارف وانا مستثمر القطاع الأمريكي ده السنادي التكنولوجيا بتاعته عالية جداً ، من 10 سنين كان قطاع الطاقة بتاعي كان عالي جداً يبقى أنا عارف أنا معرض في محفظتي لمخاطرة إيه
ولو روحنا لأي صندوق إستثمار أو أي صندوق تداول في البورصة أو اي موقع هتجيب من عليه معلومات هنلاقي القطاعات دي هي أول حاجه بتتحط تحت صندوق الاستثمار
يعني هيقولك صندوق الاستثمار ده مستثمر في بلد إيه أو بلاد إيه والمستوى التانية على طول هو القطاعات
07:30
طيب أنا ازاي أعرف إيه القطاعات اصلاً يعني مين عرّف القطاعات ، هنرجع هنا تاني للقصه اللي احنا ساعات بنرجعلها اللي هي شركات التصنيف الائتمانية أو شركات التصنيف بشكل عام
قولنا قبل كده إن في شركة اسمها أم اس سي ايف، ستاندارد أند بور ، فوتسي دول 3 شركات للتصنيف الائتماني ، الشركات دي بيعملوا مؤشرات والمؤشرات دي احنا أتكلمنا عليها في حلقة قبل كده بس النهاردة هنبص على الشركات دي في حته تانية انهم ازاي بيعملولنا القطاعات وازاي بيعرّفولنا القطاعات وهناخد في المثال النهاردة كبداية حاجه اسمها المعيار العالمي للقطاعات أو الجيكس
الجيكس دي قطاعات أتفقت عليها شركتين من الشركات الكبيرة وفي أواخر التسعينات أتفقوا على إن يا جماعة لو هنتكلم على القطاعات هنتكلم عليها بالطريقة الفلانية ، الطريقة الفلانية دي هما عندهم التحليلات بتاعتهم بيخشوا يقعدوا يبصوا الشركة دي بتعمل إيه يعني مثلاً شركة إتصالات يقول آه بتعمل أتصالات ، طيب الاتصالات دي بيبيع موبايل بس ولا بيبيع إنترنت يعني هو بيعمل كل الكلام ده ويديك ورقة فيها كل التصنيفات اللي احنا قولنا عليها
08:56
فالجيجكس دول عملوا إيه؟
عملوا 11 قطاع هما بشكل عام كبير وبعدين في حاجه اسمها مجموعة الصناعة
هننزل بقى لمستوى تاني اللي هو خلينا نقول Sector في القطاع الصناعي مثلاً هنلاقي 3 تصنيفات مختلفة حاجه اسمها مجموعة الصناعة
السلع الرأسمالية ، خدمات التجارية والمهنية ، النقل
وبعد مجموعة الصناعة هنلاقي حاجه اسمها الصناعة ودي تركيز أكتر شوية على هو بيعمل إيه جوه المواصلات مثلاً
وبعدين في الصناعة الفرعية ده المستوى الرابع من التركيز
09:37
انا هنا مش عايز أعقدلك الموضوع أنا عايز أقولك إنه بيقولك القطاع المالي لأ ماهو القطاع المالي ده في 4 درجات من التخصص ، لما نتكلم على القطاع المالي لازم نشوف مجموعة الصناعة اللي جواه إيه وبعدين الصناعة اللي هي بشكل بشكل أصغر شوية ، وبعدين الصناعة الفرعية اللي هي مركزه جداً جداً جداً
زي مثلاً لو أخدنا كمثال لو أنا مشيت على التصنيع وبعدين فيه جواه النقل ، هننزل بعديها هنلاقي ، الخدمات اللوجستية ، الخطوط الجوية ، البحرية ، الطرق ، تعليمات النقل بشكل عام
لو دخلنا تحت دول هنلاقي كمان تصنيفات أعلى اللي بنقول عليها الدرجة الرابعة من التصنيف ، عشان معقدش الموضوع وانت ممكن تكون سامعني وشايف المعلومات كتير جداً أنا هحطلكوا لينك من ويكيبيديا فيه المجموعات الصناعية وهتفتحها هتلاقيها بمنتهى السهولة الموضوع واضح جداً
10:44
بشكل عام التصنيف ده فيه 11 قطاع ، 24 مجموعة صناعية اللي هو المستوى الثاني ، وفي 69 صناعة اللي هي الصناعات نفسها ، وفي 158 صناعة متخصصة جواهم يبقى دي التقسيمة بتاعة الـ 4 مستويات
11:05
الكلام ده مطبق على الشركات اللي موجودة على البورصات في العالم كلها يعني ، يعني كل شركة في العالم بتنزل البورصة المؤسسات الائتمانية دي بتحطها في واحدة من 158 اللي في الأخر خالص لأنك لو عرفت المستوى الرابع بتاعها هتعرف التالت والتاني والأول هي زي شجرة برده لو فتحت اللينك هتلاقي الموضوع سهل جداً
11:30
طيب مين بيعمل تصنيفات آخرى مؤسسة تانية زي فوتسي دي مؤسسة إئتمانية عندها تصنيف اسمه
(ICB) معيار التصنيف الصناعي
فهما عندهم حاجه باسم تاني أنت لو استخدمت ده أو ده مفيش مشكلة انت بس لو حابب تعرف انت شركتك فين أو محفظتك معرضة لإيه من المخاطر تقدر تستخدم التصنيف ده
12:00
لو انا روحت بقى النهاردة الاسهم بتاعتي اشتريت صندوق متداول في البورصة أو محفظة متوزعة كبيرة أنا محتاج أعرف القطاعات بتاعتي الـ 11 قطاع في المستوى الأول الأسهم بتاعتي متوزعة شكلها عامل ازاي جوه الـ 11 قطاع؟
يعني أشتريت الأس إن بي 500 قالي والله أنت أكبر قطاع القطاع التكنولوجي مثلاً – أي أرقام – 25% يبقى أنا كده عرفت 1 من 11 اللي هو قطاع التكنولوجي 25% طب القطاع رقم 2 و3 و4 و5 .. ليه أنا بقول الكلام ده عشان تبقى بس عارف أنت فلوسك محطوطه فين النهاردة
طيب واحد تاني قالي على فكرة دي فكرة جميلة جداً أنا بقى عايز استثمر في القطاع ده بعينة مش عايز استثمر في الأس إن بي ، أنا بصيت على الأس إن بي لقيت في قطاعات معينة أنا مش عاوزة مثلاً استثمر في التكنولوجيا انا مثلاً بشتغل في شركة تكنولوجية وحياتي كلها تكنولوجيا فلما أعوز استثمر عاوز أوزع استثماراتي ومستثمرش في التكنولوجيا هقوله طيب تمام يبقى أنت ممكن تروح تشتري صناديق استثمار بتستثمر في قطاعات بعينها
هنلاقي إن في سلسلة مثلاً من الصناديق دي زي مثلاً
بتاع قطاع الطاقة في أمريكا (XLE)
بتاع قطاع المواد (XLB)
ده القطاع الصناعي (XLI)
قطاع المستهلك (XLY)
قطاع المواد العذائية الإستهلاكية(XLP)
قطاع الرعاية الصحية (XLV)
القطاع المالي (XLF)
قطاع شركات الإتصالات (XTL)
قطاع المرافق (XLU)
القطاع العقاري (IYR)
انا هنا بقولكوا اسامي صناديق التداول اللي أنت ممكن تشتريها وبرده هنحطها في الشو نوتس وهنحطها على الموقع برده
13:55
أنا ليه بقولك الكلام ده؟ لأن أنت ممكن تقولي أنا حابب أشتري استثماراتي في قطاع الرعاية الصحية أنا حابب القطاع ده وشايف إنه بعد 10 / 20 سنة هو قطاع جميل وأنا عايز أحط فيه فلوسي شايف الاستثمار بتاعي هيبقى احسن من لو استثمرت في مؤشر متوزع هقولك مفيش مشكلة ده أختيارك وأنت عملت التحليلات بتاعتك وحطيته
طيب هنبص على قطاع الرعاية الصحية ده احنا قولنا لو دخلنا بقى في المستوى التاني هنلاقي فيها مستشفيات ، صيدليات ، مصنعين أدوية .. كده أنا بشتري صندوق استثمار متداول اللي ليه علاقة بالمجال بشكل عام
لو نزلنا أكتر هنلاقي في ناس بيصدروا صناديق على مستوى الصناعة يعني حاجه جوه الحاجه يعني يطلع صندوق استثمار متداول بستثمر بس في الصيدليات مع إن الصيدليات هي من قطاع الرعاية الصحية لكن الشركة دي أختارت ولقوا مستثمرين معينين عندهم إهتمام بالصيدليات فعملولهم صندوق استثمار متداول للصيدليات أو عملولهم صندوق استثمار متداول لشركات الطيران .. وهكذا
فأنت تقدر تبص على التنصينفات كلها وتحاول تدور على صندوق استثمار لو انت حابب لقطاع معين وتحط فيه فلوسك وتاني أنا مش بنصح إنك تخش وتقعد تغير وتخرج وتطلع وتعمل تداول لأ أنا مقتنع أكتر بإنك تحوش في حاجه زي كده فأنت محتاج يبقى عندك قناعة بقطاع معين على المدى الطويل تقدر تحط فيه فلوس وانت مستريح لو أنت اخترت انك تخرج بره المؤشر الرئيسي
15:37
حاجه تانية برده عايزك تبقى واخد بالك منها إن كل قطاع بيتصرف بطريقة معينة ليها علاقة بالأداء بتاعه يعني إيه الكلام ده؟
يعني مثلاً في قطاعات ثابتة على طول الأرباح بتاعتها واضحة مفهاش تذبذب كتير ، في قطاعات تانية الظروف السنوية بتاعتها بتختلف الشتاء غير الصيف الربيع غير الخريف
مثلاً قطاع زي السياحة في دول معينة هنلاقيه بينتعش فترة معينة وبينزل في فترة آخرى لكن قطاع زي الكهربا أو الاستهلاك عموماً ده بنلاقيه ثابت لأن فاتورة الكهربا بتاعتك آه بتطلع في الصيف وبتنزل في الشتا ولكن هي عبر السنين هي واحده مش بنلاقي انها بتختلف يعني الصيف ده قرب الصيف اللي فات طبعاً مع التضخم والكلام ده بس توقعات الأرباح بتاعتي واضحة لكن قطاع السياحة عنده حاجات تانية البلد جاذبة للسياحة ولا لأ؟ ممكن تخش في حاجه غير مستقره ولا لأ؟ ممكن يحصل أي حاجه تذبذب جامد في الأرباح فالتوقع بتاع قطاع السياحة مقابل توقع الأرباح في قطاع الكهربا طبعاً توقع أصعب بكتير فخلي بالك برده إن في قطاعات كده وقطاعات كده
17:02
الفرق التاني في قطاعات بتنتج حاجات أساسية وفي بتنتج حاجات رفاهية زي مثلاً القطاع الطبي يعتبر من الأساسيات بتاعتي ولكن قطاع اللبس أو الحاجات اللي ليها علاقة بالإستهلاك بتختلف على حسب حالة الإقتصاد ممكن يبقى في موجة تضخم جامدة فالمستهلكين يقللوا من الصرف بتاعهم ولكن مش هيقدر يقطع أوي من الحاجات الطبية
17:31
الفروق التالتة في قطاعات دفاعية وقطاعات مش دفاعية .. يعني إيه قطاعات دفاعية يعني لو حصل أزمة عالمية في العالم في قطاعات الأداء بتاعها بيبقى أهدى وأحسن وبتحمي فلوسك أكتر في الفترات دي
وهنا أنا بطلب من الناس برده ممكن تبعتلي عاوزك تعمل كده شوية بحث إيه القطاعات اللي تعتبر دفاعية وإيه القطاعات الـ لأ..
17:55
الفرق الرابع القطاعات دي ممكن تبقى فيها أفراد كتير أوي يعني بتعين ناس كتير أوي زي قطاعات الإنشائات دي محتاجه تعين ناس كتيره جداً عشان ينشؤا طريق وفي قطاعات أخرى مبتبقاش عندها ناس كتير جداً فالخطر بتاع زيادة المرتبات مثلاً بيبقى أقل على الشركات دي ودي القطاعات اللي ممكن تكون أكتر ناحية التكنولوجيا
18:23
في قطاعات بتبقى فيها مؤسسات عمالية بتسيطر على القطاع وفي حاجات لأ يعني مثلاً زمان سكك الحديد اللي فيها الرابطة بتاعة العمال بتاعتها اللي بتتحكم في مجلس الإدارة وهكذا فأنت تبقى فاهم إيه القطاعات اللي عندها كده وإيه القطاعات اللي معندهاش
18:42
الفروق الخامسة هل في قطاع إستراتيجي لدولة ما يعني مثلاً الكهربا ده قطاع إستراتيجي الحكومات هي اللي بتعملها وبتدي المستثمرين جزء يستثمروا فيه وفي دول لأ تقولك الكهربا دي حاجه خاصة مش بتاعتي أي حد ممكن يعملها أدي الرخص لناس تعملها فأنت بتشوف إيه القطاعات لو في دولة فيها قطاع زي الكهربا وفي حكومة بتلاقي المخاطرة أقل شوية لأن الحكومة ديماً بتسند القطاعات دي
19:10
أخر فرق اللي هو التنافسية في قطاعات بيبقى فيها شركة واحدة بتقدمها وده بيبقى احتكار وديماً الحكومات بتحاول تبعد الناس عن الشركات الإحتكارية بس ساعات مع الأسف بيبقى في إحتكار أو بيبقى فيها منافسين قليلين اتنين او تلاتة او السوق بيبقى متقسم على منافسين كتير جداً
هنلاقي مثلاً المثال المشهور جداً القطاع العقاري ديماً من اكتر الحاجات اللي فيها ناس كتير اوي بتلاقي أكبر واحد عنده حصة سوقية 1% أو 2% من البلد والباقي كله بيبقى مقاولين كتير أو مطورين تانين كتير
19:50
بنقول الخطورة أعلى فين أكيد في القطاع المجزأ الخطورة أعلى شوية لأن أي حد ممكن يجي بكره جديد ياخد منك حصة سوقية ولكن في نفس الوقت في فرصة انك تكسب حصة سوقية لو عرفت تعمل الإستراتيجيات الصح فهو المخاطر والمكافأت في القطاع المجزأ أعلى بكتير ، الحاجات اللي فيها صعوبة في دخول المنافسين أكيد كمستثمر بتبقى عليك أقل خطورة
20:18
ده بشكل عام أنا محتاج أعرف ايه عن القطاعات الهدف من الحلقة دي زي ما قولنا للناس اللي فالأول ازاي هما ممكن ياخدوا قرارات ، ازاي ممكن يحطوا استراتيجيتهم ، ازاي ممكن يبصوا على المشروع .. مينفعش واحد يروح الشغل ميعرفش هو في أنهي قطاع ميعرفش أخبار القطاع بتاعه بينمو ولا لأ ، مينفعش محفظتي تبقى معرضه لمخاطرة معينة من غير ما ابقى واخد بالي أنا معرض لإيه
لأن ممكن تقولي لأ أنا عايز أشتري مؤشر إس إن بي 50% وعايز اشتري قطاع تاني جنبه 50% أو مش عايز اشتري الإس إن بي خالص واشتري القطاعات دول عشان دول اللي أنا بحبهم ودول اللي أنا عايزهم
20:57
جوه الصناديق بنلاقي في توزيعه كاملة أو عدد الأسهم بتاعك بيبقى مش قليل متوزع ما بين شركات كتير عشان تشيل مخاطرة إن شركة – لا قدر الله – يحصلها مشكلة أو تفلس أو أي حاجه ولكن القطاع نفسه هو اللي يبقى مسيطر على أداء المحفظة
21:17
احنا لسه أول مره نتكلم في الحته دي ممكن تكون سهله / صعبه بالنسبة للناس مش متأكد بصراحة فياريت تبعتولنا ديماً زي ما بنقول اسئلتكوا ومش لازم تسمع حلقة زي دي كده وتروح بكره الصبح تستثمر في قطاع معين هو بس بيفتحلك طريق انك تقرأ في الموضوع أكتر او تدور أو تلاقي معلومات عن الموضوع وكل مره بقول المعلومات موجودة اونلاين كتير جداً
بشكركوا شكراً جزيلاً لو أنتو وصلتوا معانا للحتة دي وإن شاء الله اشوفكوا الاسبوع الجاي
Translation of some words and terms:
Account حساب
Refresh ينعش
Throughout خلال
Notification إِشعار
Business مشروع
Belong ينتمي
Presentation عرض تقديمي
Dynamics الديناميكا
Population السكان
Growth نمو
Biotech التكنولوجيا الحيوية
Data Analysis تحليل البيانات
Cancer سرطان
Fintech التكنولوجيا المالية
Logic منطق
Saturation التشبع
Angles زواية
Targets الأهداف
Supply chain الموردين
ETF صندوق المؤشرات المتداولة
Rating Agencies وكالات التصنيف
GICS المعيار العالمي للقطاعات
Industry group مجموعة الصناعة
Sector قطاع
Capital goods السلع الرأسمالية
Commercial and professional service خدمات التجارية والمهنية
Transportations النقل
Sub Industry الصناعة الفرعية
Industrial صناعي
logistics الخدمات اللوجستية
Airlines الخطوط الجوية
Marine البحرية
Roads طرق
Transportation instruction تعليمات النقل
Materials خامات / مواد
Consumer مستهلك
Health Care رعاية صحية
Conviction قناعة
Luxury رفاهية
Construction بناء
Privet خاص
Competition تنافسية
Monopoly إحتكار
Market Share حصة سوقية
Developers مطورين
Fragmented مجزأ
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #القطاعات