20. ما يسأله المستمعون - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
النهاردة الحلقة رقم 20 وزي ما اتفقنا كل 10 حلقات هيكون في حلقة رد على اسئلتكم واستفساراتكم اللي بتبعتوهالنا من خلال صفحتنا على السوشيال ميديا وحلقة النهاردة رد على اسئلة جتلنا من استاذ نور الدين مدحت هو بعتلنا كذا سؤال مهمين على صفحتنا في الانستجرام بنرد عليهم في الجزء التاني من حلقة ما يسأله المستمعون
: اسئلة هذه الحلقة
00:44 المقدمة
01:30 السؤال الأول
هل يمكنني الوثوق التام بمستشار مالي تابع لمؤسسة مالية؟
05:54 السؤال التاني
هل إمتلاك صندوق استثمار مشترك يوفر التنويع الكافي؟ وفي أبحاث بتقول ان الفوايد بتاعة التنوع بتاع الاستثمار بتبقى ضئيلة بعد السهم الـ20 جوه الصندوق فهل هناك خطر على وجه التحديد لوضع معظم محفظتي في صندوق أسهم واحد تديرة شركة واحدة؟
07:36 السؤال التالت
كنت أرغب دائماً في التنويع خارج مصر ولكن المشكلة أنني لا أعرف من أين ابدأ وكيف ابدأ؟
10:39 السؤال الرابع
سمعت ان الأسواق الأمريكية على وشك مواجهة تصحيحات قاسية ، أي نصيحة في هذا الشأن؟
12:58 السؤال الخامس
صناديق أدوات الدخل الثابت تغلبت على صناديق الأسهم في مصر من حيث العوائد على مدى الـ 6 سنين اللي فاتوا ، هل ده معناه أن الاستثمار في الأسهم فكرة سيئة في مصر؟
15:03 السؤال الأخير
هل لديك نصيحة حول كيفية توفير الطريقة الأكثر فاعلية لعملية الشراء الكبيرة زي اللابتوب أو الموبايل اللي هي حاجات فوجائية بتبقى أنا عايز اعملها ومعنديش الكاش بتاعها أو السيولة بتاعتها؟
17:47 الخاتمة
في النهاية عاوزين نشكر استاذ نور على تفاعله معانا ومشاركتنا بالاسئلة المهمة دي وإن شاء الله تكون الإجابات وافية وكافية وتكون مفيدة ليكم جميعاً ، ومتنسوش تبعتولنا اسئلتكم سواء مكتوبة أو مسجلة صوتياً في رسالة على صفحتنا في الانستجرام علشان نشغلهم في الحلقات القادمة إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
المقدمة
اهلا بيكوا في حلقة جديدة من بودكاست كلام ينوّر.. النهاردة الحلقة رقم 20 بنجاوب فيها على اسئلة المتابعين بتوعنا من خلال صفحتنا على السوشيال ميديا في كذا حد بعتلنا اسئلة احنا اختارنا النهاردة مجموعة من الاسئلة هنجاوب عليها احنا ديماً هنشجع الناس انها تبعت على الصفحة بتاعتنا من خلال رسالة مباشرة على السوشيال ميديا ، ممكن تبعتولنا الاسئلة مكتوبة أو من خلال رسالة صوتية بحيث إننا نشغلهم في الحلقات القادمة إن شاء الله حلقة النهاردة هتكون رد على اسئلة جتلي من استاذ نور الدين مدحت هو بعتلي كذا سؤال على صفحتنا في الانستجرام الاسئلة دي مهمة جداً فخلونا نشوف الاسئلة ونرد عليها
01:30
نبدأ بأول سؤال بيقول هل يمكنني الوثوق التام بمستشار مالي تابع لمؤسسة مالية؟
الأول لازم نفرق ما بين حاجتين المستشار المالي دي شغلانة ، والسمسار دي شغلانة تانية ، ومدير الأصول دي شغلانة تالتة. طيب بيحصل حاجة وده اللي السؤال جاي من خلال استاذ نور انه بيقولي إن المستشار المالي تابع لنفس المؤسسة اللي بيعمل فيها مدير الاستثمار بتاعه ، فهل في تعارض؟ ممكن أثق فيه؟ بشكل عام أنا مبحبش الطريقة دي يعني مبحبش إن المستشار المالي بتاعك يبقى تابع لمؤسسة مالية لسبب إن نصيحته غالباً هتكون أشتري نفس الصندوق بتاع المؤسسة المالية بتاعتي وفي طبيعة الأمر مش بيكون ده أحسن اختيار هو هيجبرك تشتري الصناديق بتاعتهم ولكن في حقيقة الأمر ممكن يكون في صناديق أخرى أو استثمارات أخرى في شركات أخرى أحسن كفكرة استثمارية ولكن الأسواق بتاعتنا مفهاش مستشارون ماليون مستقلون بشكل كبير بمعنى مش هتلاقي مستشار مالي مستقل متوفر ، لكن في الأسواق المتقدمة أمريكا و أوروبا بتلاقي إن في شركات فاتحة بس إن يبقى عندها مستشار مالي فحضرتك تروح تقوله أختار لي من السوق كله إيه الموجود كأستثمار أحسن وأنا اشتريه ، وبيقعد بقى يتكلم معاك الشركة دي بتعمل كذا ، الصندوق ده بيعمل كذا وهكذا.. ولكن في بعض الأحيان مبنلقيش الحاجة دي بسهولة ، طيب لو ملقتش الحاجة دي بسهولة وأنا مجبر إني استثمر من خلال المستشار المالي ده أنا بقول ابتدي.. ابتدي لو أنت معندكش خيارات كتير ليه لأن عدم البداية أخطر بكتير جداً من إن أنت متبتديش أصلاً. فأنا عاوزك برده تدور. طيب لو الأتنين تابعين لبعض محتاج اسأل إيه؟ محتاج اسأل إن هيكل الرسوم على الأقل ميبقاش مرتين.. مدفعش رسوم مرتين مره للمستشار المالي ومره داخل صندوق الاستثمار.. فمهم جداً جداً أعرف وده أول حاجه بسألها هل بدفع مرتين ولا بدفع مره واحده. الحاجة التانية إن أنا ديماً اسأله وأبص على صندوق الاستثمار ده هل هو بيتتبع الاستثمار المطلوب بشكل كويس ولا لأ بمعنى ايه؟ إن أنا مثلاً أخترت صندوق استثمار على الأسهم المصرية أرجع اشوف العوائد اللي حصلت في الـ 5 سنين اللي فاتوا أو في الـ 3 سنين اللي فاتوا والسنتين و السنة مثلاً هل هم مطابقين للعوائد اللي بتحصل في السوق العادي ولا لأ ، والسوق العادي ده ممكن أقيسه بمؤشر الرئيسي بتاع البورصة ، يعني ممكن أشوف مثلاً مؤشر (إيجي إكس 30) في مصر كمثال طلع في الـ 5 سنين 50% مثلاً يعني أنا بقول أي أرقام وأشوف صندوق الاستثمار اللي هو بيحاول يبيعهولي ده هل طلع بنفس القيمة ولا لأ لو هو مش بيتتبع بطريقة مظبوطه يبقى في مشكلة تانية في إدارة الصندوق ده فدول السؤالين اللي هبدأ اسألهم ، طيب بعد كده مفروض أعمل ايه؟ لو عرفت ألاقي مستشار مالي مستقل في يوم من الأيام ممكن وقتها ابتدي أنقل استثماراتي للمستشار المالي المستقل اللي ملهوش دعوة بأي شركة وهو يكونلي محفظتي بشكل أحسن بعد كده
05:54
السؤال التاني من أستاذ نور هل إمتلاك صندوق استثمار مشترك يوفر التنويع الكافي ولا لأ؟ وهو بيقول برده تكملتاً يعني إن الأبحاث بتقول الفوايد بتاعة التنوع بتاع الاستثمار بتبقى ضئيلة بعد السهم الـ20 جوه الصندوق فهل هناك خطر على وجه التحديد لوضع معظم محفظتي في صندوق أسهم واحد تديرة شركة واحدة؟
أنا من وجهة نظري البسيطة لو الصندوق اللي حضرتك أخترته بيعملك المطلوب ممكن استثماراتك كلها تبقى في صندوق واحد بمعنى إيه إن في مثلاً واحد عاوز محفظة متوازنة ، محفظة متوازنة يعني المثال المشهور جداً اللي هو محفظة الـ 60 40 ، اللي هو 60% أسهم و40% سندات لو في صندوق استثمار بيديني الاتنين مع بعض أنا ممكن أحط استثماراتي في صندوق واحد بدل ما أروح اشتري صندوق أسهم 60% وصندوق أدوات دخل ثابت 40% ، فلو الصندوق اللي حضرتك شايفه بيوفرلك التنويع المناسب أنا أنصح إنك ممكن تحط في صندوق واحد مفيش مشكلة. يبقى هنا أنا أهم حاجه أعرف أهداف الصندوق بتاعي اللي مدير الطرح بتاعه بيقول أنا هعمل كذا وكذا ، هل في تنوع في الأسهم كويس هل في تنوع في الأستراتيجية بطريقة كويسة ولا لأ فأنا معنديش مشكلة إن استثماراتك كلها تبقى في صندوق واحد مش لازم تبقى في 10 أو 15 صندوق
07:36
السؤال التالت بيقول كنت أرغب دائماً في التنويع خارج مصر ولكن المشكلة أنني لا أعرف من أين ابدأ وكيف ابدأ؟
طيب.. إنت لو مقيم في أي دولة النهاردة وعاوز تستثمر عالمياً أنت مش محتاج تسافر في أي حته أو تروح تفتح في أي حته حسابات أو كده أنت ممكن من خلال سماسرة على الإنترنت بيبقوا سماسرة وممكن ترجع لحلقة السماسرة اللي عملناها قريب تعرف يعني إيه شركة سمسرة بتفاصيل أكتر ، ولكن الأونلاين دي نوعية من السماسرة هم بس متواجدين على الأنترنت تقدر تخش على الموقع بتاعهم ، تقدر تقدم على فتح حساب ، تملى الورق ، تحط البيانات بتاعتك ، تبعت المستندات المطلوبة كلها معمول لها سكان (مسح ضوئي) ، تمضي عقدك أونلاين وهو بيفتحلك حساب في الأسواق العالمية ، من خلال الحساب في الأسواق العالمية دي تقدر تبتدي تحول فلوس من الدولة اللي أنت قاعد فيها لحساب السمسرة ده ، بيظهرلك رصيد على حساب السمسرة بتاعك ده وبتقدر وقتها تشتري سواء صناديق استثمار أو أسهم أو أي حاجة من الحاجات اللي أنت عاوزها. طيب ازاي تبدأ؟ تبدأ تعمل بحث على السماسرة الأونلاين ، هم في شركات كبيرة معروفه تقدر تعرف الحصة السوقية بتاعهم ، أنا مش برشح حد عن التاني بس أنا ديماً بحب افتح مع السماسرة اللي عندهم الشركة بتاعتهم شركة السمسرة دي نفسها موجودة على بورصة ، يعني أسهمها متداولة على بورصة ما لسبب لأن الأسهم لما تبقى متداولة على بورصة بيكون في نوعاً ما رقابة أعلى من الرقابة العادية لو هي شركة خاصة ، فتقدر تشوف ميزانية الشركة ، تقدر تشوف هي بتكسب أو بتخسر لو في أخبار حلوة أو وحشة بتطلع بشكل عام. فأنا لو هختار حاجة هختار سمسار مرخص في دولة معروفه كبيرة الأسهم بتاعته مقيده على بورصة كبيرة في إفصاح كويس وقتها أنا هحس بأمان أكتر إن الفلوس بتاعتي محفوظة لأن في رقابة أعلى تقدر تعمل البحث بتاعك وتقارن بين مصاريف التنفيذ بتاعة كل شركة والتانية والخدمات اللي حضرتك بتاخدها كمستثمر مين أحسن من التاني ودي الطريقة اللي أنصحك تبتدي بيها ، تبتدي تعمل البحث بتاعك تبتدي تشوف المزايا والعيوب وتحاول تدور على سماسرة مقيدة على البورصات
10:39
السؤال اللي بعده بيقول سمعت ان الأسواق الأمريكية على وشك مواجهة تصحيحات قاسية ، أي نصيحة في هذا الشأن؟
معنى السؤال ده إن هو عاوز يستثمر في السوق الأمريكي وخايف إن السوق الأمريكي يحصله إنهيارات بسبب ارآء لناس معنية كاتباه أونلاين إن الأسواق هتنزل طيب أنا إجابتي في الحته دي بسيطة جداً حضرتك لو بتحط جزء كل شهر أو جزء كل 6 شهور أو كل سنة في سوق معين واستثمراتك دي هتقعد 10-15 سنة أنا وجهة نظري أن حضرتك عمرك ما هتعرف تنقى الوقت الصح إن أنت تحط فيه استثماراتك فلو حصل إنهيارات ، لو ابتديت النهاردة مثلاُ 2021 ابتديت و 2022 – 2023 حصل انهيارات أو حصل نزول في الأسعار حضرتك في الفترات دي كلها انت لسه بتضخ فلوس لأنك "مستثمر سلبي" فأنت هتحط فلوس كل شوية فمش هيفرق معايا أوي لو الأسواق نزلت وحصل تصحيح بالعكس أنا عاوز الأسواق تنزل في الفترات الأولانية من استثماراتي علشان أقدر اشتري أسهم أو أحط استثمارات بشكل أرخص من اللي موجود عليه النهاردة ، فلو حضرتك قلقان لو خطتك طويلة المدى وأنت بتشتري كل شوية وبتعدل المتوسط بتاعك في الشرا كل ما الوقت بيعدي فأنا بالنسبالي التصحيح ده أو هبوط الأسواق ده ممكن يكون في مصلحتك على المدى الطويل مش ضدك فابتدي وبمجرد ما تبتدي هتتعلم وتشوف مواقف مختلفة ممكن في الإنهيارات دي تضخ فلوس أكتر فتبقى حاجة مفيدة أكتر كمان فأنا لو "مستثمر سلبي" على المدي الطويل مش هتفرق معايا أوي لو في تصحيحات في الأسواق والكلام ده شوفناه في وقت الكورونا حصل نزول جامد في الأسواق في شهر 3 و 4 2020 واللي ضخ فلوس أكتر في حسابات الاستثمارات بتاعته النهاردة بعد سنة ونص عمل فلوس أكتر من العادي بسبب وجود الإنهيارات دي
12:58
السؤال اللي بعده بيقولي أنا مش عارف لو أنت تعرف ولا لأ بس صناديق أدوات الدخل الثابت تغلبت على صناديق الأسهم في مصر من حيث العوائد على مدى الـ 6 سنين اللي فاتوا ، هل ده معناه أن الاستثمار في الأسهم فكرة سيئة في مصر؟
تاني لو حضرتك بتستثمر لمدى طويل في فترات معينة ممكن تقعد حتى 10 سنين، الأصول واحنا اتكلمنا يعني ايه أصول قبل كده زي مثلاً أدوات الدخل الثابت يبقى أداءة أحسن من الأسهم والعكس في فترات الأسهم بتبقى أحسن كتير من أدوات الدخل الثابت طيب لو أنا واحد مش متخصص وأنا بحط فلوسي في دولة زي مصر الفوايد فيها عاليه أنا ديماً بنصح المحفظة المتوازنة هي حاجة أحسن بكتير ، المحفظة المتوازنة زي ما قولنا ممكن تبقى 50% أسهم و50% أدوات دخل ثابت أو 60% أسهم و40% أدوات دخل ثابت ليه؟علشان لو جالنا فترات معينة من الزمن واحد أحسن من التاني الأداء بتاع المحفظة بالكامل يبقى شكلة متوازن ولكن مبنصحش أن مثلاً السنادي هخش أسهم والسنة اللي وراها هخش دخل ثابت وبعدين أرجع تاني أسهم لأ أنا بشوف على المدى الطويل المحفظة المتوازنة في دولة زي مصر الفوايد بتاعتها عالية هتحميني لو الأسهم في فترة معينة مبتشتغلش وبعدين لو أشتغلت والعوايد بتاعة الأسهم أنت ممكن يجيلك في السنة عوايد جامدة جداً يحصل 50 – 60 – 70 % تعوضلك السنين اللي كانت واقفه فيها قبل كده مبتشتغلش ، فالمحفظة المتوازنة في رأيي البسيط على المدى الطويل هي أأمن وخاصة إن حضرتك انسان مش متخصص أو مش بتشتغل في المجال ده وفي استثمارات جانبية إنت عايز تقلل فيها المخاطرة
15:03
السؤال الأخير من استاذ نور بيقول أعرف ان القاعدة الأساسية 50 30 20 _دي أعتقد قاعدة الناس ممكن تقرأ عليها في التمويل الشخصي أو عمل الميزانية_ هو بيسأل هل لديك نصيحة حول كيفية توفير الطريقة الأكثر فاعلية لعملية الشراء الكبيرة زي اللابتوب أو الموبايل اللي هي حاجات فوجائية بتبقى أنا عايز اعملها ومعنديش الكاش بتاعها أو السيولة بتاعتها؟
أنا أول حاجة أنصح بيها النهاردة مع وجود التمويل متناهي الصغر أو بنلاقي شركات بتمول شرا الموبايلات أو شرا اللابتوب فأحيان كتير بلاقي الحاجات دي بتتمول بدون فايدة تقريباً يعني مثلاً سعر الموبايل 15ألف جنية / 20ألف جنية أيا كان الرقم بيقولك أنا هديهولك على سنة أو سنتين أو على 3 بفايدة قرب الزيرو يبقى دي أول فكرة إن أنت تحاول تمول الحاجات دي من خلال المورد بتاعها يعني مثلا شركة أتصالات عاملة عرض على ايفون أو عاملة على سامسونج أو أيا كان يبقى دي أول طريقة تفكر فيها مع الخطة الموبايل بتاعتك بتحط رقم معين شهرياً يمولك التليفون دي حاجه مش هتأثر على السيولة بتاعك مش هتأثر على نسب التحويش بتاعتك ، أنا ديماً حتى اتكلمنا في حلقة قبل كده إن أنا مبحبش اشتري كاش لو الكاش بتاعي أنا بوجه لاستثمار ديماً بحاول أوجهه للاستثمار ماخدوش واشتري بيه سلعة استهلاكية قيمتها مع الوقت هتقل فإزاي ممكن أعمل كده إن أنا ادور على خطط الدفع اللي بتعمل تقسيط ونحاول على قد ما نقدر يكون بدون فوايد ، في الدول غير مصر بنلاقي الحاجات بالدولار أو في الخليج بنلاقي إن الحاجات دي متوفرة أكتر لأن قيمة السلف على الدرهم أو الريال أو العملات الخليجية أو حتى الدولار السلف بتاعها الفوايد بتبقى أقل فممكن تلاقي خطط دفع بـ 1 2 3 % بتمولك الحاجات الفوجائية او عمليات الشرا الكبيرة اللي أنت مش واخد بالك منها أو مش مجهزلها أو مش محوشلها بس تاني ياريت ميبقاش التمويل بفوايد عالية دي أهم حاجة في الموضوع
17:47
الخاتمة
في النهاية أحب اشكر جداً استاذ نور على الاسئلة يعني هي اسئلة بصراحة كلها مهمة جداً وبتأثر على معظم الناس اللي بتسمعنا أنا متأكد ، وياريت كل الناس اللي عندها اسئلة تبعتلنا اسئلتكوا واستفسراتكو واشوفكوا في حلقة جديدة إن شاء الله من كلام ينوّر
Translation of some words and terms:
Direct Message رسالة مباشرة
Voice Note رسالة صوتية
Investment Bank بنك الاستثمار
Financial Advisor مستشار مالي
Broker سمسار
Asset Manager مدير الأصول
Conflict تعارض
Markets اسواق
Financial Advisors Independent مستشار مالي مستقل
Double Fees رسوم مضاعفة
Track تتبع
Returns عوائد
EGX 30 اقرأ عن مؤشر
Online Broker وسطاء عبر الإنترنت
Documents مستندات
Scanned ممسوح ضوئياً
Research بحث
Exchange بورصة
Market Share الحصة السوقية
Passive Investor مستثمر سلبي
Dollar-Cost Average متوسط التكلفة بالدولار
Once بمجرد
Asset Class فئة الأصول
Risk مخاطرة
Personal Finance تمويل شخصي
Budgeting ميزانية
Zero Interest بدون فوايد
Offer عرض
Cash Flow السيولة أو التدفق المالي
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #ما_يسأله_المستمعون #الجزء_الثاني