19. ما وراء اقتناء حيوان أليف
ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
أتكلمنا في حلقات سابقة عن مصطلح الشراء الإندفاعي
والشراء الإندفاعي هو إني بندفع للشراء بالإحساس أو بالعاطفة بدون التفكير في هل أنا محتاج الشيء ده فعلاً؟ أو هل ميزانيتي تسمح بده؟
في حلقة الاسبوع ده بنتناول الشراء الإندفاعي بس في حالة اقتناء حيوان أليف ، الشراء الإندفاعي ده بيأثر عليا مادياً ونفسياً ولكن لما بندفع لاقتناء حيوان أليف هنا مش بيأثر عليا أنا بس ده بيأثر على كائن حي له إحساس وله حياة تانية
: في هذه الحلقة
00:46 مقدمة
01:30 الشراء الإندفاعي لاقتناء حيوان أليف
03:25 تأثير الكورونا على اقتناء الحيوانات الأليفة
04:38 اسأل نفسك هذه الاسئلة قبل اتخاذ قرار اقتناء حيوان أليف
04:47 كم من الوقت سيعيش هذا الحيوان؟ (متوسط العمر المتوقع) -
05:37 ماذا يأكل؟ -
06:04 مقدار التمرين الذي يحتاجه؟ -
06:34 كيف سيتغير حجمه؟ -
06:49 تكلفة الرعاية البيطرية؟ -
07:18 هل لدي الوقت الكافي لرعايته وتنظيفه بشكل صحيح؟ -
07:43 ما نوع الموطن الذي يحتاجه ليكون بصحة جيدة؟ -
08:20 ما نوع التمرين الذي يحتاجه إليه؟ -
08:35 هل مسموح باصطحاب الحيوانات الأليفة إلى منزلي أو شقتي؟ -
08:49 هل هناك أطفال أو كبار السن أو أشخاص يعانون من ضعف في جهاز المناعة بالقرب منه؟ -
09:25 بنود المالية لاقتناء حيوان أليف
10:26 زيارات الطبيب البيطري الجراحية -
10:52 الأكل -
10:58 المأوي أو المبيت -
11:18 الرعاية البيطرية الروتينية -
11:35 النظافة -
11:50 الألعاب والحلوى والفيتامينات -
12:14 متوسط التكلفة السنوية -
12:35 متوسط التكلفة لمدة 10 سنوات -
13:45 تكلفة الفرصة البديلة في 10 سنوات
15:08 تكلفة الفرصة البديلة في 15 سنة
15:50 الاستثمار في صندوق التقاعد أفضل أم اقتناء حيوان أليف ؟
16:16 الرابطة بين الإنسان والحيوان الأليف وفقاً لدراسة أجرتها (جمعية مستشفيات الحيوانات الأمريكية)
16:53 الفوايد الصحية لاقتناء حيوان أليف
19:22 الخاتمة
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:46 مقدمة
اهلاً بيكوا في حلقة جديدة من بودكاست كلام ينور
Impulsive spending في حلقة النهاردة أنا عاوز أتكلم على موضوع مهم جداً له علاقة بالـ
الشراء الإندفاعي حاجة أتكلمنا عليها في الحلقة رقم 2 وعملنالها إعادة في الحلقة رقم 16 لو حابب تسمعها تاني ممكن ترجع تسمع الحلقة دي
01:07 Impulsive Spending
بمنتهى البساطة هو الشراء الإندفاعي اللي هو أنا ببقى ماشي في مكان ما شوفت حاجة عجبتني إندفعت في شراءها ودي مكنتش حاجه موجوده عندي في الميزانية بتاعتي أو أنا مكنتش عاوز أصلاً اشتريها ولكن جالي إحساس أو عاطفة بدون تفكير عملت شراء إندفاعي
01:30 الشراء الإندفاعي لاقتناء حيوان أليف
النهاردة أنا هتكلم كمان لما بتحصل إنها بتأثر على كائن غيري ، يعني الشراء الإندفاعي ده بيأثر عليا مادياً وبيحطني في مشاكل وكل الحاجات دي ولكن لما بعمل شراء إندفاعي لاقتناء حيوان أليف في البيت ده هنا مش بيأثر عليا أنا بس ده بيأثر على كائن حي له إحساس وله حياة تانية ممكن بالسالب ليه؟ لأن الشراء الإندفاعي من الحاجات اللي بتميزه إن أنت بعد ما بتقتني الحاجة خلاص متعتك منها بتروح فمبتفكرش فيها تاني وده بنشوفه بيحصل كتير جداً في اقتناء الحيوانات الأليفة يبقى أول حاجة بتخلي الشراء الإندفاعي ده يحصل في شرا الحيوانات الأليفة طبعاً العاطفة إن أنت عاوز تقتني كلب أو شايف صحابك أو قرايبك أو اي حد عنده الإحساس بتاعة جميل ومبتفكرش مبتعملش بحث وتنزل تشتريه يبقى أول مشكلة إن أنت بتفتقر للبحث الصح في ازاي أشتري كلب أو قطة أو أياً كان الحيوان الأليف اللي أنت عاوزة فده غصب عنك هيؤدي ليه؟ إن أنت مش هتقدم الإحتياجات الأساسية للحيوان ده
02:51 بحث
مثلاً في إنجلترا عملوا بحث لقوا إن في 5.02 مليون عندهم حيوانات أليفة في المملكة المتحدة ، هنلاقي إن في البحث ده 1 من كل 4 من أصحاب الحيوانات الأليفة دي في المملكة المتحدة معملوش أي بحث على الإطلاق هنا دول بالنسبالي المصنفين اللي عملوا شراء مندفع مدام أنت معملتش أي بحث واشتريت بس واقتنيت ده معناه إنك عملت شراء إندفاعي
03:25 تأثير الكورونا على اقتناء الحيوانات الأليفة
هنلاقي إن السنتين اللي فاتوا حصل طفره كبيرة جداً في شرا الحيوانات الأليفة يعني لو أنت ماشي في الشارع أو روحت جنينة هتلاقي الكميات اللي أنت بتشوفها النهاردة أعلى بكتير وده بسبب إن حصل لما الناس قعدت في البيت وقت الكورونا السنتين اللي فاتوا كان من النشاطات الظريفة اللي بتساعد الناس على تقضية الوقت هي اقتناء الحيوانات الأليفة فأنا أعتقد إن حتى النسبة دي ممكن تكون عليت جداً في السنتين الأخيرة
03:58
في كام واحد راح قعد مع دكاترة بيطريين أو حد بيفهم في الحيوانات قبل ما يشتري لقوا في الدراسة 5% فقط من الناس قعدوا مع أطباء بيطريين قبل ما يشتروا ودي كمان نسبة أقل بكتير جداً من اللي مفروض تحصل إن أنت تقعد تتكلم مع خبير قبل ما تعمل الاقتناء ده.. بصراحة مفيش أي نوع من أنواع الأسباب اللي تخليني اقتني أي حيوانات أليفة غير إن أنا أعمل بحث كبير قبل ما أشتري
04:38 اسأل نفسك قبل اتخاذ القرار
أنا النهاردة هحاول أقول معاكوا شوية اسئلة بحيث إن أنت لو نص القرار ده تقدر تفكر معايا وتسأل نفسك الاسئلة دي قبل ما تاخد الخطوة دي
04:47
1. قد إيه الحيوان ده بيعيش )متوسط العمر المتوقع)
يعني في حاجات بتعيش 6 سنين 8 سنين 10 سنين 15 سنة ليه محتاج أعرف متوسط العمر المتوقع بتاعته طبعاً الأعمار بيد الله في كل حاجه بس أنا ليه لازم اسأل نفسي السؤال ده عشان وانا بعمل ميزانيتي أنا بعملها لعدد سنين معينة ، لفلوس معينة فلازم يبقى عندي رقم أحطه لمتوسط عمر هذا الحيوان لأن السلالات المختلفة لحاجة مثلاً زي الكلاب كل سلالة بيبقى عنده متوسط عمر متوقع قد إيه فمثلاً لو قولت 10 سنين يبقى أنا لما أعمل ميزانية هعمل لل10 سنين الجايين ده السبب اني بسأل نفسي السؤال ده
05:37
2. الحيوان ده بياكل قد إيه؟ وإيه نوع أكله؟
لسبب إن برده على حسب الحيوان الأليف ده أنت ممكن تجيب كلب بياكل 100 جرام وممكن تجيب كلب بياكل كيلو أو كيلو ونص في اليوم فده بيفرق جداً جداً في النتيجة بتاعتي أنا محتاج أعرف قد إيه بياكل
06:04
3. التمرين اللي بيحتاجه الكلب ده أو القطة أو الحيوان اللي أنت بتشتريه
ليه محتاج أعرف التمرين بيحتاج قد إيه لأن أنا لازم أديله من وقتي جزء يتمرن فيه يعني لو بيتمشى في اليوم نص ساعة غير لما بيتمشى ساعة غير ساعة ونص فمحتاج أدي جزء من وقتي للموضوع ده
06:34
4. قد إيه حجمه هيكبر
لأن أنا ممكن اشتري حيوان صغير مثلاً 10 كيلو مع الوقت ألاقيه وصل 40 كيلو فأنا لازم أبقى متوقع
06:49
5. الرعاية البيطرية بتاعته
هل الكلب في مشاكل معينة بتظهر في سنين معينة وراثياً معروف عنه حاجه وهكذا فأحاول أعرف التكاليف البيطرية بتاعه
قدام في الحلقة كمان هنتكلم تقسيم كل بند من البنود دي مالياً ازاي ولكن أنا بقولك دلوقتي اسأل نفسك الاسئلة دي
07:18
6. عندي وقت للرعاية والتنضيف وإن أنا اديله حقه بشكل صحيح ولا لأ
أنت النهاردة لو خلفت هتقدر تدي ابنك او بنتك اللي أنت تعملهم رعاية ونظافة وكل الحاجات دي ، فتسأل نفسك هل أنت هتقدر تعمل كده ولا لأ
07:43
7. مكانه هيبقى فين؟
أنا عايش في شقة أنا عايش في فيلا أنا عايش في الصحرا أياً كان المكان اللي أنت عايش فيه هل ده يصح أن أنت تقدر تجيب الحيوان ده وهل هو هيعتبر في بيئة صحية ولا لأ ليه؟ لأن أنت ممكن تكون بتحب نوع معين من الكلاب ولكن هو مينفعش يعيش في شقة فهتضطر أن أنت تغير النوع ده بنوع تاني يقدر يتأقلم على البيئة دي ومتحاولش تجيب حد وتجبره يعيش في مكان لا يصح أنه يعيش فيه
08:20
8. إيه أنواع التمارين نفسها بقى
يعني في كلاب بتحتاج تمارين عنيفه جداً وفي كلاب بتحتاج تنام طول اليوم لازم تبقى فاهم البعد ده
08:35
9. هل مسموح انك تاخد الحيوانات في عمارتك أو شقتك ؟
ولا أنت عايش في بيت لا يسمح فيه بدخول الحيوانات لازم تسأل السؤال ده
08:49
10. الناس اللي هيعيشوا معاه
هل عندهم أمراض مناعية أو كبار سن أو أطفال صغيرين جداً يبقى في خطوره على وجود الحيوان الأليف ده جمبهم ولا لأ
يبقى أنا النهاردة سألت نفسي مجموعة الاسئلة دي وجاوبت عليها واحده واحده وعرفت أنا عاوز منه إيه وهو عاوز مني إيه أنا النهاردة لو جاوبت على الاسئلة دي ولقيت أن العملية متنفعش يبقى أنا مفروض معملش الشراء المندفع ده
09:25 بنود اقتناء حيوان أليف
طيب لو أتكلمنا كده على البنود اللي أنت لازم تفكر فيها قبل ما تقتني حيوان أليف خلينا نقول مثال كلب أو قطة في الحالتين دول في بنود لازم تعملها ، احنا جبنا شوية أرقام كده من الجمعية الأمريكية لمنتجات الحيوانات الأليفة الدراسة دي أتعملت سنة 2020 دراسة استقصائية بيكلموا الناس اللي بيمتلكوا الحيوانات دي وسألوهم البنود دي إيه اللي بيحصل فيها فطبعاً الأرقام دي متوسط في حيوانات بتبقى أعلى بكتير وفي أقل ولكن احنا بنتكلم على المتوسط. عاوزين برده نفكر مع بعض ازاي تفكر في البنود نفسها ، ازاي تقسم البنود وده برده جزء يتعلق بالميزانية اللي أنت هتعملها للحيوان بتاعك
10:26 زيارات الطبيب البيطري الجراحية
طيب هنلاقي أول حاجة فيها زيارات الطبيب البيطري الجراحية اللي هو مثلاً بيحتاج عمليات حاجه طارئة حصلت بس ده في الحاجات اللي بتحتاج تدخل جراحي ، هنلاقي المصاريف اللي احنا بنتكلم عليها هنا احنا هنتكلم بالمصاريف السنوية هنلاقي للكلب 426$ وللقطة 214$ ده أول بند
10:52 الأكل
تاني بند ، بند الأكل هنلاقي 259$ للكلب و 228$ للقطة
10:58 المأوي أو المبيت
إنك تروح تسيبه في حتة سواء يقضي يوم أو يتمرن أو أنت مسافر هنلاقي للكلب 229$ و 120$ للقطة احنا كده برده بنتكلم على المصاريف السنوية
11:18 الرعاية البيطرية الروتينية
إن أنت بتاخد الكلب أو القطة بتاعتك تعملها الفحوصات بتاعتها برده اللقاحات والحاجات الوقائية اللي ممكن تعملها من غير ما يظهر عليها أي امراض هنلاقي 212$ للكلب و 160$ للقطة
11:35 النظافة
أو اللي هو الغسيل ، الحاجات الصحية بتاعة نضافة الكلب نفسها ممكن تبقى 73$ للكلب و 43$ للقطط
11:50 الألعاب والحلوى والفيتامينات
حاجات كده جانبية ممكن مثلاً نتكلم في 58$ للكلب ، للقطة 54$ يعني مجموع الحاجات دي تقريباً في السنة 150$ كمان
12:14 متوسط التكلفة السنوية
الدراسة دي بتقول إن المعدل السنوي بتاع الكلب ممكن يكون عند 1381$ عند القطط 908$ ، وعمره لو الكلب أو القطة عاشت 10 سنين هنلاقي 13810$ للكلب و 9080$ للقطة
12:35متوسط التكلفة لمدة 10 سنوات
احنا ليه هنا بنتكلم عن البنود دي عشان أنت لازم تفكر في كل البنود دي قبل ما تعمل أي حاجه لازم تراجع نفسك ان عندك القدرة المادية إن أنت تقدر تستحمل تصرف 13810$ في 10 سنين على الكلب بتاعك أو 9080$ على القطة بتاعتك لو أنت القدرة المادية بتاعتك لا تسمح أنا هرفض تماماً إنك تخش في القرار نفسه ، لو أنت الأرقام دي مش هتقدر تستحملها ودي أرقام متوسطة بناءاً على اختيارك لو أخترت حاجه معينة حصلك ظروف طارئة ممكن الأرقام دي تعلى أكتر من كده
13:25 البنود تاني سريعاً
(الزيارة الجراحية – الأكل – المأوي/المبيت – الرعاية الروتينية – النظافة – الفيتامينات – حلوى – الألعاب) دي البنود اللي شملتها الدراسة ودي الأرقام
13:45 تكلفة الفرصة البديلة في 10 سنوات
طيب لو أخدنا الأرقام دي بقى وحطينا عليها التكلفة بتاعة الفرصة البديلة بمعنى إيه إن أنا بدل ما اشتري كلب أنا هستثمر الفلوس دي فالكلب مثلاً هحطله بناءاً على الدراسة دي 1380$ أول سنة ، وبعدين هحط 115$ كل شهر في مدة 10 سنين لو استثمرت الفلوس دي بنسبة 7% أنا قولتلك في الأول التكلفة بتاعه الإجمالية هتبقى عليك 13810 لما هحط الحسبه بتاعتي دي في مضاعفة حسابية علشان أعرف لو أنا استثمرتهم هعمل إيه ، هلاقي إن التكلفة بتاعتي بقت 21781 بمعني ايه إني بدل ما اشتري كلب أنا هستثمر الفلوس دي ، طيب أنا هستثمر الفلوس دي في حاجة بتجيب 7% بعد 10 سنين هلاقي الاستثمارات بتاعتي دي وصلت لـ 21781 يبقى أنا بفكر في تكلفة الفرصة البديلة بتاعتي مش بفكر بس في المصروف اللي أنا صرفته علشان دي حاجه مهمة جداً لازم لما أفكر دي حاجة هتقعد معايا 10 سنين لازم أفكر في تكلفة الفرصة البديلة بتاعتي ، يبقى الكلب التكلفة الحقيقية من الاقتناء في 10 سنين هي 21781$
15:08 تكلفة الفرصة البديلة في 15 سنة
طيب لو الكلب أو القطة أو أيا كان الحيوان الأليف اللي عندك عاش 15 سنة تكلفة الفرصة البديلة هتعلى أكتر بكتير لأن المضاعفة هتحصل على 15 سنة يبقى بنفس الأرقام اللي احنا قولناها 13810 اللي هي متوسط التكلفة اللي هدفعها من جيبي لو عملتلها مضاعفه في 15 سنة على 7% 38485$ يبقى دي التكلفة الحقيقية اللي أنت هتفقدها من اقتناء الكلب ده
15:50 الاستثمار في صندوق التقاعد أفضل أم اقتناء حيوان أليف ؟
طيب احنا اتكلمنا على التكاليف وعرفنا إيه ده دي أرقام كبيرة جداً ، طب أنا ممكن أخد الأرقام دي واحطها في صندوق التقاعد بتاعي أحسن يعني مثال أنا النهاردة لو الكلب ده عاش معايا 15 سنة زي ما قولنا هيطلع 38000$ لو عملت نفس الاستثمار ده بس في البنك هيطلع أرقام أحسن
16:16 الرابطة بين الإنسان والحيوان الأليف
طيب ليه الناس بتشتري الحيوانات الأليفة ، ماهو أكيد أنا بحط الاستثمار ده كفلوس لسبب معين وبرده انا هتكلم من خلال الدراسات يعني مش هتكلم بإحساسي هو بيعمل ايه أو مبيعملش إيه هنلاقي إن الدراسات بتلاقي إن الرابطة بين الإنسان والحيوان الأليف اللي هو يعيش معاك بتزود اللياقة البندنية وبتقلل التوتر وفي نوع من أنواع السعادة بتحصل لصاحب الحيوان الأليف ده
16:53 الفوايد الصحية لاقتناء حيوان أليف
من الدراسات برده لقينا إن الناس اللي عندهم حيوانات أليفة بينخفض ضغط دمهم عن المستوى العادي ، إنخفاض مستوى الكوليسترول ، إنخفاض مستوى الدهون الثلاثية ، قلة الشعور بالوحدة ، زيادة الفرص في ممارسة الرياضة ، وزيادة الفرص في إن أنت تعمل علاقات إجتماعية أكتر لأنك بتقابل ناس كتير.. فبنلاقي إن 31% تحسن لياقتهم البدنية ، 76% قل مستوى التوتر عندهم ، والصحة العقلية أتحسنت عند 65% من الناس اللي بيمتلكوا الحيوانات.. جمعية مستشفيات الحيوانات الأمريكية هي اللي عملت الاستطلاع ده والدراسة دي
17:46 هل فوايد اقتناء حيوان أليف تعادل الفلوس المصروفه عليه ؟
دي الفوايد الصحية اللي أنا بجيبها طب هل الفوايد دي قد الفلوس اللي أنا بحطها في استهلاك الحيوان وبحط من وقتي وبحط من مجهودي والكلام ده.. دي ترجع لكل واحد ، يعني كل واحد هيسمع الحلقة دي هيعرف هل الفوايد هل أنا صحتي النفسية ، وصحتي البدنية ولياقتي ، ممكن واحد يقولي لا يا عم أنا بتمرن كده كده كل يوم أنا مش فارقة معايا لياقتي.. أنا بس كل اللي بحاول أقولهولك ولا بقولك أمتلك ولا بقولك متمتلكش أنا بقولك قبل ما تاخد القرار محتاج تعمل بحث مظبوط عن الموضوع لأن القرار ده بيأثر على كائن غيرك اسأل نفسك الاسئلة حط الميزانية بتاعتك ، البنود بتاعتك وبعدين أعرف الفوايد من القرار ده وخد القرار بناءاً على احساسك الصح والجميل بقى إن النهاردة موجود أونلاين كل الحاجات اللي احنا اتكلمنا فيها دي لكل نوع من أنواع أو الفصائل في القطط أو الكلاب أو الأرانب أو أي حيوان أليف كل البنود دي موجودة أونلاين يعني تقدر تخش تعرف الفرق ما بين كل فصيلة عن الأخرى تقدر تقرا عليها تقدر تقرا أبحاث يعني المعلومات كلها موجودة بس إن أنت تستخدم جوجل بمنتهى السهولة هتقدر تعرف معلومات كتيرة جداً وهتفرق معاك جداً في إتخاذ القرار
19:22 الخاتمة
خد القرار بتاعك بعد بحث في الحياة عموماً مش في الموضوع ده بس وأحب أشكركم جداً جداً النهاردة على وقتكم معايا ولو عندكم اسئلة ليها علاقة بالموضوع ده ياريت تبعتولي ممكن برده نتكلم في الموضوع ده من منظور أخر في يوم تاني.. شكراً جداً على وقتكم
Translation of some words and terms:
Impulsive Spending الشراء الإندفاعي
Budget الميزانية
Research بحث
Life Expectancy متوسط العمرالمتوقع
Breeds سلالات
Outcome نتيجة
Allocation حصة (جزء من الوقت)
Genetically وراثياً
Hygiene النظافة
Environment البيئة
Force يجبر
Survey استطلاع
Owners أصحاب / مالكين
Pet حيوان أليف
Boarding مبيت او مأوى
Checks فحوصات
Vaccines لقاح
Grooming الرعاية
Averaged متوسط
Food Treats حلوى
Compounding يضاعف
True Cost التكلفة الحقيقة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #الشراء_الإندفاعي #ماوراء_اقتناء_حيوان_أليف