191. ما يسأله المستمعون - الجزء 16
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
في الجزء الـ 16 من حلقات ما يسأله المستمعون، بنجاوب على أهم الأسئلة اللي وصلتنا من مبادرة #كلم_عمر، اللي كنا أعلنا عنها من فترةد، الأسئلة غطت مواضيع مهمة زي التمويل الشخصي، الاستثمار، التقاعد، تكوين الثروة، وازاي ننقلها للأجيال اللي جاية، جمعنالكم في حلقة النهاردة اهم الأسئلة اللي ممكن تفيد الكل، ولو لسه عندك سؤال متجاوبش عليه تقدر تححجز مكالمتك مع عمر شمس
https://www.kalamyenawar.com/callomar :احجز من هنا
:أسئلة الحلقة
(01:47) أنا مرتبي بيكفي مصاريفي بالظبط، إزاي أقدر أحوش فلوس؟ -
(05:00) ادفع ديوني الأول ولا أستثمر؟ -
(06:55) لسه مبدأتش استثمار إزاي ابتدي ولا ما أبتديش خالص؟ -
(09:05) المفروض أكون محوش قد إيه عشان أقدر أعمل خطة تقاعد؟ -
(10:08) إزاي ممكن أعمل ميزانية مثالية؟ -
(12:22) إزاي أزود دخلي؟ -
(14:28) إيه اكبر الغلطات اللي الناس بتقع فيها في رحلتهم لبناء ثروة؟ -
لو لسه عندك استفسارات أو عايز تعرف إجابة سؤالك تقدر تبعتلنا أسئلتك من خلال صفحتنا أو تحجز مكالمة مباشرة مع عمر، استنونا الأسبوع الجاي إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
أهلا بيكم في حلقة جديدة من بودكاست كلام ينور كنا عملنا الفترة اللي فاتت كده يعني حاجة إن إحنا الناس تقدر تتكلم معانا من خلال إن هي تحجز ميعاد معايا لمدة ربع ساعة فأنا النهارده جمعت معظم الأسئلة أو يعني الأسئلة المهمة اللي أنا شايفها ممكن تفيد الناس أحاول أجاوب عليها بشكل عام
المكالمة دي كانت يعني للناس اللي متعرفش هي لسه موجوده يعني أنا سايبها يمكن كمان ممكن أسبوعين تلاتة لو حد عنده استفسار معين في مشكلة معينة مالية أو بيفكر في حاجة ومحتاج مساعدة فهو يقدر من خلال اللينك الموجود في الشو نوتس يحجز الميعاد
الأسئلة كانت في مواضيع كتير فى التمويل الشخصي عموما، في حاجات ليها علاقة بالاستثمار حاجات ليها علاقة بالتقاعد والميزانية وتكوين الثروة نفسها وازاي ممكن تعديها للناس اللي بعدك وهكذا يعني فهبتدي كده واحده واحده
(01:47)
أول سؤال مثلا معانا النهارده في واحد كان بيسأل أنا عايش مصاريفي تقريبا قد مرتبي أو قد دخلي فعايز إزاي أقدر أبتدي أحوش فلوس أو إزاي أقدر أعمل سيفينج؟
ده سؤال بسيط بس مهم وهو بداية كل حاجة لو انت عايز تكون ثروة لازم يكون عندك مدخرات، فأول حاجة دايما إحنا بنقولها إن الناس لازم تتابع المصاريف بتاعتها أو على الأقل تعمل ميزانية تبقى شايفة الفلوس دي رايحة فين وجاية منين لو أنت مش عارف أصل المشكلة أو مش عارف تقيسها أنا مش قادر أحلها أو مفيش حد قادر يحلها لك يعني أنت بتقول لي أنا باخد 100 دولار وبصرف 100 دولار في الشهر طيب إحنا ما عرفناش ال100 دولار اللي عندك دي بتتصرف ازاي وهل فيه حاجة أنت تقدر تبدلها أو تتصرف بشكل أحسن ولا إيه أول حاجة لازم أعمل ميزانية والمصاريف لازم ابقى فاهم الدنيا ماشية أو أنا بصرف إزاي
بعد ما بعمل الميزانية بتاعتي بيظهر لي حاجة اللي هو إيه ده هو أنا بجد بصرف ع البند ده الرقم ده ده البند ده مثلا ملوش لازمة أو مش اساسي أو أنا أقدر أعيش من غيره فهبتدي أقول أنا محتاج من هنا أغير إيه في حتة المصروف أنا هنا ببص على المصروف بعد ما عملت التعريف هأبتدي أحاول أمرن نفسي إن أنا من الشهور الجاية إن البند ده يبتدي يقل تدريجيا مش لازم نعمل ودي دايماً بقولها في الميزانية مش لازم أعمل تغيرات دراماتيكية سريعة بسرعة كنت بصرف على الحاجة دي كده فهشيلها بالكامل لأ أنا ممكن أبتدي تدريجيا أنزلها
بعد كده لما ابتدينا أنزلها لازم أبتدي أحوش ثابت 5% من دخلي يعني أول خطوة لازم أعملها اللي أنا لازم أبتدي على الأقل بـ 5% من دخلي الـ 5% دي هاخدهم أحطهم بعيد عني هأحطهم في مكان مصرفوش هحطهم في جمعية هحطهم في حساب ملمسوش أيا كان الطريقة اللي أنت هتاخدها كان بيها التحويش فالـ 5% دي هتعملها والـ 5% دي فقط البداية، البداية عشان بس تعلمك بعد ما باخد الـ 5% دي بحاول أطلع مثلا بعد تلات شهور أو بعد ست شهور أحاول أطلع لـ 7% لـ 10% لـ 15% دايما فكر بالنسب التفكير بالنسب أسهل بكتير وخاصة كمان لو واحد مثلا ربنا كرمه بعد سنين طويلة مثلا مرتبه زاد أو دخله زاد فهو النسب دي هتبقى مهمه لازم أفكر دايما بالنسب يعني في الأول لو أنا معايا 100 أنا بأحوش 5 لو أنا معايا 10 أنا بحوش 500 يعني يعني 10,000 أنا بأحوش 500 منهم هنلاقي الأرقام فجأة بتزيد معاك
بعد كده الخطوة الأخيرة اللي أنا هنصح بيها إن أنت أتوميت التحويش ده بمعنى إيه إن أنت مرتبك لما ينزل أول حاجة بتنزل أو دخلك لو أنت حتى ما عندكش دخل ثابت أول حاجة بتخرج منه هي المدخرات الأتوميشن إن أنا بعمل قانون في البنك بتاعي وبحط له قاعدة طلع الفلوس دي على طول وديها في حتة معينة فده يعني للناس اللي هي مش عارفة تحوش أو تحوش إزاي ممكن واحده واحده بخطوات بسيطة يمكن أربع خطوات اللي هو نتابع المصاريف بتاعتي من خلال الميزانية وهأعرف نفسي إيه الحاجات اللي هي مش مطلوبة وبعدين هبتدي حوش 5% وبعدين هعمل أوتوميشن أو هعمل قانون إن هو يبعد عني الفلوس دي على طول
(05:00)
بعد كده السؤال اللي بعده بيقول أنا عليا ديون أدفعها الأول ولا أستثمر؟
يعني أنا النهارده عندي دين وعندي دخل ابتدى يبقى فيه عندي فائض فأنا هعمل إيه أول حاجة هقولها دايما خاصة الديون دي لو الفوائد بتاعتها عالية أول حاجة تدفعها يعني دايما بنفكر في إيه إن أنت النهارده عليك مثلا فوائد قرض بفوائد 10% أوفوائد بـ 20% أو أيا كان الرقم لما أنت بتدفع القرض ده أنت بتعمل لنفسك عائد 20% وعائد ثابت خلاص أنت عارف أنت كنت هتدفع 20% في القرض ده فلو دفعته أنت كأنك عملت عائد على الاستثمار في نفسك بـ 20% فأنا دايما أفضل إن أنت تدفع الدين بتاعك، الاستثمار بشكل عام هو حاجة طويلة الأجل يعني مفيش استعجال إن أنا أستثمر دلوقتي حالا أنا ببص على البلانشيت بتاعي أو ببص على الثروة بتاعتي بشكل عام أنا عندي ديون وعندي استثمارات مش مهم إن أنت يبقى عندك استثمارات كتير في الأول مهم إن أنت تبقى بتعمل عوائد عالية طب مين العائد بتاعه أعلى لو القرض بتاعك العائد أو الفايدة اللي بتفرق أعلى ادفعه الأول دي صريحة وطبعا بنبتدي بحاجات زي كريديت كاردز اللي هي بتبقى أعلى حاجة وبعدين بنخش على القروض الشخصية وبعدين بنخش على القروض اللي بعديها اللي هي بتاعت مثلا قدام أصل أو حاجة فطبعا هدفع الأول وبعدين واحده واحده هبتدي أعمل الاستثمارات بتاعتي
طب في حد تاني مثلا بيقول لي طب أنا في فرصة إن أنا أدمج القرض بتاعي أنا عندي مثلا 3 4 قروض كل واحد بفايدة معينة أنا ممكن اخد قرض تاني من حتة تانية وادمجهم مع بعض وأدخلهم مع بعض وأقلل الفايدة بشكل عام طبعا دي خطوة صح لأن لو أنت مجموع الفوائد بتاعتك مثلا المتوسط بتاعهم 15% وأنت تاخد قرض وهتعمل دمج وتدفع مثلا 10% فقط يبقى أنت عملت توفير الفايدة اللي أنت بتدفعها فبرضه يعني ممكن أعمل دمج وبعدين أدفعها وبعدين أبتدي أستثمر
(06:55)
السؤال اللي بعده اللي هو مقرر دايما له علاقة بالاستثمار أنا ما ابتديتش استثمار خالص معرفش حاجة عن السوق المالي أو الأسهم أو الكلام ده كله أبتدي إزاي أو ما ابتديش اصلا؟
أنا دايما بنصح الناس حتى لو هي ما عندهاش معلومات عن اللي بيحصل ما عندهاش أي فكرة إيه اللي ممكن يكون بيحصل إيه هي البورصة والكلام ده كله أنا بنصح إن الناس تبتدي والناس تبتدي بحاجات بسيطة زي صناديق المؤشرات اللي هم موجودين على البورصات ده بيبقى صندوق استثمار متداول تقدر تشتريه وتبيع كل يوم له سعر متوزع نبتدي بالحاجات اللي هي المخاطرة بتاعتها واطية زي مثلا الإس اند بي 500 اللي هي مثلا صندوق فيه أكبر 500 شركة في أمريكا وأبتدي أحط فيه أجزاء صغيرة لازم أبتدي بحاجات صغيرة لإن أنا ما ابتديتش أنا عمري ما هأبتدي استثمار فأنا لازم أبتدي فأبتدي بإيه هأبتدي بحاجة عشان أنا مش فاهم قوي ما عنديش وقت ومش محتاج أحط وقت في الأسواق لإن أنا راجل بشتغل دكتور أو صيدلي أو أيا كان فأنا لازم أبتدي فأبتدي بأرقام صغيرة جدا أبتدي بحاجات متنوعة أبتدي في حاجات مثلا ده اس اند بي 500 مثلا نص الشركات بتدخل دخلها من أمريكا والنص التاني بتدخل من العالم لإن فيه شركات جلوبال زي جوجل أبل مش عارف إيه كل الشركات دي بس مش ملهاش علاقة بالإقتصاد الأمريكي ليها علاقة بالإقتصاد العالمي وفيها قطاعات مختلفة فيها تكنولوجيا فيها صناعة فيها طاقة فيها حاجات كتير فالإس إند بي 500 نفسه بيبقى متوزع في قطاعات مختلفة فبتدي أه أبتدي، الحاجة التانية اللي أنا مفروض أعملها إن أنا أبتدي اعلم نفسي اللي هو اقرأ كتب أسمع بودكاست أشوف كورسات لو أنا عايز اخدها للمرحلة اللي بعديها يعني أو عايز أشوف أنا أروح بيها فين ولكن البدايات دايما بتبقى بسيطة وصغيرة ولازم تبقى مستمرة يعني لو ابتديت النهارده حتى بحاجة صغيرة الاستمرارية بتاعتك مهمة فمش هبتدي فقط ان أنا مثلا أجرب مرة وأشوف إيه اللي بيحصل الكلام ده كله لا هي لازم تبقى حاجة متكررة
(09:05)
السؤال اللي بعده له علاقة بقد إيه أنا المفروض لو أنا عايز أعمل خطة تقاعد المفروض أكون محوش قد إيه؟
إحنا عملنا حلقة كاملة يمكن حلقة رقم 13 دي ليها علاقة بالادخار بتقيسلك إنت المفروض يبقى معاك قد إيه في كل سن سواء أنت مثلا في العشرينات في الثلاثينات في الأربعينات الخمسينات الستينات المفروض يبقى معاك قد ايه وده معيار بيخليك تقيس أنت مفروض واقف فين لو أنا عايز أعمل تقاعد مظبوط كام مرة من دخلي السنوي أنا بكون محوشه مثلا على سبيل المثال عند الـ 40 سنة تقريبا تلات مرات من دخلك لو أنت بتعمل 100 دولار في الشهر يعني بتعمل 1000 دولار في السنة مثلا يعني انا بقول أي أرقام فأنت المفروض يبقى معاك تلات أضعاف الـ 1000 دولار اللي هما 3000 دولار في سن الـ 40 ده اللي هو بيخليك مع الاستثمار بتاعهم بيخليك إن أنت تعرف تعمل تقاعد مظبوط يبقى عندك دايما فلوس للطوارئ وكل الحاجات اللي احنا بنتكلم عليها فالناس ممكن ترجع للحلقة دي اللي هو زي أنا ممكن أقيس انا ماشي صح في طريق الادخار والتقاعد والاستثمار ولا لأ
(10:08)
سؤال تاني تنفيذ الميزانية إزاي ممكن أعمل ميزانية مثالية؟
مفيش ميزانية مثالية أو مفيش حاجة حتنفع الناس كلها بيبقى خطوط معينة زي ما قلنا مثلا زي ميزانية بتاعة الـ 50 30 20 الـ 50 بتاعت الحاجات الأساسية الـ 30 بتاعة الحاجات اللي شوية فيها رفاهية و20% ادخار
ده بشكل عام بشكل الميزانيات بتاعة الناس، لما اتكلمت مع الناس دايما بيبقى الموضوع مختلف يعني في ناس تقولي أنا مش محتاج 50% أساسيات لأني مثلا أنا لسه عايش في البيت مع أسرتي أنا لسه صغير أقدر أحوش أكتر مبصرفش مثلا غير 50% فعندي الادخار 50% فيه واحد تاني بيقول لأ أنا السيفينج بتاعي واطية جدا لإن أنا داخلي يادوب بيقضي أنا في مرحلة بصرف كتير فدي بس إرشادات يعني الميزانية زي ما نقول دايما هو حاجة مش مثالية ولكن الناس ممكن تبقى حوالين الأرقام دي لو دخلنا في كل من جوا ممكن نلاقي مثلا الاساسيات بيبقى قد إيه في منها سكن قد إيه منها مواصلات الكلام ده كله لو أنت بتأجر بيت لو أنت بتجيب عربية لو أنت بتعمل أي حاجة من الحاجات دي أنت ممكن تاخد ارشاد يعني الشكل عامل إزاي المفروض أصرف قد قد إيه
وبعدين تاني أنا هرجع للناس إن أنت كل واحد غير إن هو له علاقة بحالته أنت برضو ممكن تجوجل وممكن تعمل موجود بحث مع وجود الذكاء الاصطناعي ممكن تسأل أسئلة أيا كان الموديل اللي أنت بتشتغل بيه لو أنت عايز تشرح حاجة ليه مثلا وتتكلم مع الآلة أو مع الإيه اي اللي أنت بتستخدمه تقوله أنا وضعي كذا كذا كذا تنصحني أعمل إيه والكلام ده كله أنا بنصح الناس إنها تجربه وتحاول هتلاقي نتائج كويسة جدا فقط مش من البودكاست يعني من إن أنت تبتدي تعمل بحث بنفسك يعني إحنا برضو كنا عملنا حلقة مفصلة عن الميزانية تقدروا ترجعوا لها ممكن برضه نسيب لينك في الشونوتس رقم الحلقة بنتكلم برضه بتفاصيل أكثر لو حابب تسمع حاجة أو مسمعتش الحلقة دي أو سمعتها ونسيتها يعني بقالها شوية ممكن ترجع لها تقدر تشوف إيه الخطوات واحده واحده نمشي إزاي والإكسل ده موجود ع الويب سايت بتاعنا برضو لو حابب تنزله
(12:22)
سؤال تاني موضوع الدخل بقى إزاي أقدر أزود دخلي؟
وده بيبقى برضه يعني بنتكلم في الميزانية دائما إن أنت ما تحاولش بس تقلل من المصروف بتاعك أنت كمان محتاج تزود دخلك فدايما بننصح الناس إن هي تزود دخلها أول حاجة دايما إن أنت تستثمر في نفسك سواء في الكورسات اللي أنت بتاخدها في المعلومات في القراية في المجهود اللي أنت بتعمله في شغلك ودايما تبقى بتتفاوض مع الجهة اللي أنت بتشتغل فيها إن أنت إزاي تزود دخلك تسألهم المفروض أعمل إيه تحط مجهود أكتر فده أول حاجة سريعة و صريحة إزاي الناس ممكن تزود دخلها انها تستثمر في نفسها وتحاول تزوق الشغل بتاعها اللي هي بتشتغل فيه لأن الناس ساعات مبتطلبش أو ساعات ما بتتكلمش أو مدرينها فأنا بنصح الناس دايما إن هي تتكلم تشوف إيه اللي ممكن تعمله إن هي تحاول تزود دخلها دي أول حاجة
الحاجة التانية إن أنت ممكن تبتدي حاجات جانبية حتى لو بسيطة أنت عندك مهارة معينة ممكن تعمله فريلانسنج وممكن تمرن ناس تعمل لهم حاجات ليها علاقة بالتعليم أي كان بقى المجال بتاعك أنت ممكن تعمل حاجة جانبية مش لازم تحط فيها وقت كبير ولكن بدايتها وتشوف هل هي تنفع ولا وهل هي ممكن تقلب بزنس في مرحلة ما ولا لا ممكن طبعا تعمل الكلام ده مع مجموعة أو لوحدك يعني مش لازم تكون حاجة لوحدكى ممكن يبقى في جروب أو إنتم مجموعة بتقدموا خدمة معينة ممكن في يوم من الأيام الحاجة دي تقلب كشركة يعني
الحاجة طبعا اللي بعديها ودي يمكن بتيجي قدام شوية من الناس إن أنت يبقى عندك حاجات بتجيب دخل أو بتعمل حاجات إنك اشتريت مثلا وحدة إجارية بتأجرها فابتدت بعد مثلا خامس سنة سادس سنة إيا كان بعد ما استلمتها ابتدى يبقى عندك دخلك إكس والوحدة دي جاب لك واي فأنت الاكس + واي ده بقى دخلك النهارده مع الوقت ابتديت تكون الأصول اللي هي تقدر تجيب لك دخل ثابت أو حتى مش لازم دخل ثابت ممكن يكون في محافظة أسهم متنوعة مع الوقت بيجيب لك دخل فدي الطريقة بس لحظية، الطريقة دي مش الحاجات الأولانية اللي إحنا اتكلمنا عليها دي بتبقى حاجات بتحصل على طول ممكن تزق بيها دخلك النهارده ولكن الحاجات دي بتيجي مع الوقت
(14:28)
سؤال تاني كان حد سألني إيه أكبر غلطات الناس بتعملها يعني من خلال اللي أنا شوفته في الكارير بتاعي أو من خلال الناس اللي بتتكلم على الموضوع المالي يعني إيه أكبر الغلطات اللي بتعملها لما هما بيحاولوا يبنوا ثروة يعني؟
أول غلطة وأهم غلطة إن أنت مش بتبتدي الاستثمار بدري إن أنت خايف إن أنت معندكش معلومات إزاي أستثمر فعمرك ما بتبتدي فأنا بعتبر إن دي أكبر غلطة إن أنت ما بتبتديش بدري البداية بدري حتى لو بحاجات صغيرة هتخلي عندك خبرة أنت مش قريت كتاب فبتسمع، الخبرة إن أنت تخش جوه السوق والسوق يطلع بيك وينزل بيك وهكذا مهم جدا جدا حتى لو بنتكلم في حاجات سلبية أو حاجات زي صناديق الاستثمار هتكون فكرة اشتريت ذهب اشتريت عقار اشتريت أي حاجة أنت بتكون خبرات وأنت بتعمل الموضوع ده إن أنت ما تبدليش أبدا دي أكبر غلطة بالنسبة لي يعني خلاص أنت عمرك ما هتعمل حاجة لو ما ابتدتش فالبداية حتى لو صغيرة متخافش لو ما عندكش المعرفة، المعرفة بتيجي مع الخبرة
تاني غلطة بأشوفها ال أو الناس اللي هي بتصرف مصاريف ملهاش دعوة بالعوائد أو مبتفكرش اللي هو أنا مثلا أخدت قرار فجائي إن أنا هأقوم على حاجة معينة ما كنتش أعملها حسابي بشوف دي برضه الصرف الزيادة بتاعي دايما مش مظبوط إن أنا مش عارف أنا بعمل إيه دي أكبر غلطة في بناء الثروة لأنك أنت لما بتصرف النهارده جنيه أو دولار أنت بتخليه يفقد كل العوائد اللي كانت ممكن تحصل منه في المستقبل مش بنقول دايما إن الناس تبطل صرف وتعيش زعلانة أو مش في المستوى اللي هي عايز تعيش فيه ولكن في نفس الوقت ما تبقاش العكس برضو إن هو انا مش بعمل اي حاجه خالص يعني إحنا ما بننصحش من ناحيتين في حاجة وسط كويس قوي إن أنت تبقى عايش كويس وفي نفس الوقت يبقى عندك سيفينج وعندك استثمارات والكلام ده كله اللي بيبوظه هنا الصرف الزيادة فناخد بالنا ونرجع نشوف إيه النقاط اللي المفروض نبقى واقفين عليها
تالت غلطة بشوفها دايما إن الناس بتعملها اللي هو بتبقى مدمرة يعني اللي هو أنا عايز أبقى غني بكره الصبح أنا عايز أعمل فلوس كتير قوي بكره الصبح الناس بتوقع في الغلطة دي لأنك بتبقى متخيل بتشوف قصص حواليك قصص مثلا إيه ده أشتري دي وعمل فلوس كتير أوي مرة واحدة إيه ده أنا عايز أكسب اليانصيب ايا كان بقى اللي أنت بتحاول تعمله المشكلة اللي أنت بتقع نفسيا في المصيدة دي بتاعت اللي أنا عايز أبقى أعمل فلوس بسرعة وهي الموضوع ما بيبقاش كده أنا لو قدامي فرصتين في وحدة بتعمل مثلا مكسب عالي ولكن نسبة نجاحها واطي وحاجة نسبة نجاحها عالي بس بتعمل عائد واطي مع الوقت العائد ده هيتضاعف فأنا هستخدم الوقت هنا في مصلحتي فاللي بشوفه بيدمر تكوين الثروة إن الناس بتروح تعمل إيه ده مشروع بسرعة يلا ده إحنا هنعمل كده إيه ده أنا هشتريه مش عارف فيها يعمل كذا الحاجات دي ما بتحصلش والتاني قلناها قبل كده في كذا حلقة لو حصلت مرة مش هتحصل مرتين وثلاثة وأربعة إحنا هنا بندور على نظام نقدر نكرره عبر 10 15 20 سنة صعبة جدا إن أنت تلاقي الحاجات دي كل سنة وتعملها صح وتبقى ناجح فيها فدي تالت حاجة بالنسبة لي بتبقى مدمرة للثروة يعني مهمة جدا يعني ودول أعتبرهم أكبر تلات غلط
(17:54)
آخر سؤال يمكن معانا النهارده واحد كان بيسأل عن إن هو بيشتري بيت وخاصة للإيجار يعني إزاي ممكن يحدد الطريقة اللي هو يشتري بيها البيت؟
أول حاجة بالنسبة لي الموقع يعني دايما بيقولك اللوكيشن بتاع العقار مهم جدا مش الموقع فقط مكان المشروع نفسه مكانك فين جوه المشروع، مكانك فين جوه المشروع ده بتسهل عليك جدا في طريقة البيع بتاعه يعني ممكن نلاقي نفس الوحدة دي موجود ليها 3 4 اسعار ولكن بيختلف أسعارها بناءاً على الفيو بتاعك ومكانك وسهولة الدخول والخروج وحاجات كتير قوي فمهم قوي قوي إن أنت بتحاول تنقي أعلى لوكيشن من خلال القدرات بتاعتك المالية يعني توصل لآخر قدرتك المالية مع أحسن مكان تقدر تجيبه على المدي البعيد بيزود العوائد وبسهوله جدا أقدر أبيعها يعني غالبا مش هتلاقي لو الوحدة دي موجود منها 100 وحده هتلاقي منها فقط 5 هما المميزين وبعدين 5 وراهم مثلا أو 15 وراهم مميزين أقل شوية وبعدين هتلاقي الباقي كله شبه بعضه لما تكون شاري وحدات كلها شبه بعض مشكلتها إن أنت لما بتجي تبيع في السوق ما أنت فيه زيك كتير ولكن لما بتبقى في الوحدات المميزة بتبقى سهلة إن أنت تطلب أسعار أعلى وتبقى برضو سهلة قوي إن أنت تبيعها دي واحد
تاني حاجة بتاع التدفق النقدي بتاع الدخل اللي جايلك من الوحدة نفسها لازم تتأكد إن المنطقة دي بتتأجر وبتتأجر إزاي إيه المصاريف بتاعتها البيت ده مثلا قد إيه حدفع إيه صيانه، هدفع مصاريف ضرائب أيا كان فأنا لازم أبقى عارف الشكل العام للموضوع هيدخلي فلوس قد إيه فلازم ابقى متأكد إن الوحده الايجارية دي العوائد بتاعتها مناسبة للي أنا عايز أجيبه
تالت حاجة لما أبص على العقار ده ببص على الكونديشن بتاعه هل هو متسلم هل هو هيتسلم هل هو حالته هل هو قديم أنا محتاج أحط فيه فلوس ولا لأ فمحتاج أعرف بشكل عام كل الحاجات دي تتحط في التصور بتاعي وأنا بشتري العقار
الحاجة الأخيرة اللي أنا ببص فيها في العقار الترند بتاع المنطقة دي أو السوق ده هل هو سوق قوي ولا لأ بشكل عام طب أنا في المكان ده بقى كمان هل هو مطلوب ولا لأ هل الناس عايزاه هل تاريخيا يعتبر من الأماكن مميزة كل مطلع في حتة التميز يعني أنا ممكن أجيب مثلا مثلا بالفلوس اللي معايا بيت 200 متر أو بيت 70 متر كمثال يعني أنا أفضل المميزين أعلى لو هو وحدة عقارية كده كده أنا بجيبها للإيجار أنا هتفضل دايما إن أنا أجيب أعلى حاجة للحاجات اللي إحنا اتكلمنا عليها اللوكيشن في الحالة في ال الكاش فلو بتاعها في المنطقة اللي فيها ترند عالي يعني ممكن تكون المنطقة الشقة الصغيرة دي موجودة في مكان مطلوب أعلى بكتير جدا من الشقة الـ 200 متر فدايما أحاول أوصل لأعلى حاجة كجودة ومع الوقت الحاجات دي بتترجم في ارتفاع قيمة الاستثمار بتاعها وشوفنا الكلام ده مثلا يعني حتى لو شفنا لو أنت عايش في سوق معين حتلاقي إن في أماكن معينة مثلا اسعارها بتعلى أكتر بكتير جدا من أماكن تانية ودي بترجع للنقط دي إن أنت بتبقى في حاجات معينة هي اللي بتخلق الطلب على الحاجات دي وبتذق الأسعار بشكل أعلى على المدى الطويل
هستنى برضو الأسئلة بتاعتكوا لو حابين تبعتوا حاجة تانية تبعتوا ع الصفحة أو من خلال المكالمة اللي إحنا بنعملها مع بعض وميرسي جدا إن أنتوا وصلتوا معانا للحتة دي وأشوفكوا إن شاء الله الأسبوع الجاي
Translation of some words and terms:
Personal finance: التمويل الشخصي أو إدارة الفلوس الشخصية
Retirement: التقاعد أو المعاش
Budgeting: إعداد الميزانية
Nonessential: غير ضروري
Identification: تعريف أو هوية
Significant: مهم أو كبير
Consolidate: يدمج أو يوحد
Index fund: صندوق المؤشر
ETFs: صناديق الاستثمار المتداولة
Benchmark: المعيار أو المرجع
Guideline: إرشادات أو تعليمات
Overspending: الصرف الزايد أو الإنفاق المبالغ فيه
Cash flow: تدفق النقدية أو حركة الفلوس
Rental property: عقار للإيجار
Capital appreciation: زيادة رأس المال أو ارتفاع قيمة الاستثمار
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #ما_يسأله_المستمعون #الجزء16