165. ازاي تستفيد من صناديق الاستثمار؟ (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
ناس كتير نفسها تستثمر في البورصة ولكن مش عارف تبدأ ازاي! وديماً بيجلنا اسئلة زي ابدأ ازاي؟ اروح فين؟ أفتح إيه؟ إيه الخطوات؟ ولأن الموضوع معقد جداً بنتكلم في حلقة النهاردة عن صناديق الاستثمار واحنا تعمدنا نعمل الحلقة دي بعد إعادة حلقة التقاعد عشان نربط الأتنين ببعض لأن صناديق الاستثمار من الأدوات الاستثمارية المهمه جداً واللي هتقدر تستفيد منها في خططك الاستثمارية سواء في الادخار أو في التقاعد
: في هذه الحلقة
00:44 المقدمة
01:33 الفرق بين حساب شركة السمسرة وصناديق الاستثمار؟
02:43 البُعد ورا صناديق الاستثمار
02:58 ما هو صندوق الاستثمار؟
03:24 نشرة الإكتتاب
04:35 أنواع صناديق الاستثمار؟
07:02 هستثمر في إيه؟
09:25 4 أدوار رئيسية داخل أي صندوق استثماري
13:05 نسبة المصروفات اللي بيتحملها المستثمر
15:00 هل الصندوق الاستثماري ده هيحقق لك هدفك الادخاري؟
16:40 توقع الأرباح والخسارة
18:27 ازاي اشتري أو ابيع صندوق الاستثمار؟
21:08 نصايح عامة
26:29 الخاتمة
وفي النهاية متسمعش لحد أو متبنيش قرارك بناءاً على رآي حد ، اعمل مجهود بنفسك وأقتنع ، اسأل ودور واتأكد من كل حاجه بنفسك.. ولو في حاجه واقفه قدامك ابعتلنا وإن شاء الله ربنا يوفقك في خطواتك الاستثمارية اللي هتاخدها.. ولوعندكم معلومات تانية أو اسئلة ليها علاقة بالموضوع ياريت تبعتولنا على صفحتنا على الانستجرام
:رابط صناديق الاستثمار
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
المقدمة
اهلاً بيكوا في حلقة جديدة من بودكاست كلام ينور
حلقة النهاردة هتبقى عن صناديق الاستثمار واللي خلاني أعمل الحلقة دي إني بلاقي ناس كتير جداً بتسألني احنا نفسنا نبتدي في البورصة ، نفسنا نستثمر في البورصة ولكن أنا مش عارف ابتدي ازاي
ممكن يكون السؤال ده جه على دماغك مش عارف ابتدي ازاي.. اروح فين ، أفتح إيه ، إيه الخطوات ، ايه الأسهم أصلاً.. الموضوع معقد جداً
01:15
هنلاقي إن صناديق الاستثمار هي الأداة أو الحاجة المعمولة للناس اللي معندهاش وقت تتابع استثماراتها أو تختار أسهم معينه ، هو عبارة عن توكيل لإتخاذ القرار بالنيابة عني كمستثمر لحد بيشتغل في المجال
01:33
الفرق بين حساب شركة السمسرة وصناديق الاستثمار
طيب إيه فايدته عن إني أفتح حساب شركة سمسرة واخلي السمسار يشتريلي ويبيعلي! الفرق الكبير المهم ديماً بين نوعين دول إن السمسار ديماً بياخد عموله من التنفيذ يعني كل ما يبيع ويشتري ياخد عموله ، ولكن صندوق الاستثمار بيبقى شوية عنده أهداف طويلة المدى أكتر إن هو مع العميل اللي عاوز يعمل فلوس على المدى الطويل اللي هو أنا هعمل فلوس لما العميل يعمل فلوس ، هشارك العميل أرباحه لما اعمل فلوس معاه غير انه بياخد حاجه سنوية ثابتة لتغطية تكاليفه
02:20
أكيد انت سمعت عن ناس فاتحه في شركة سمسرة فلانية وفلان بيدورلي حسابي في شركة السمسرة أو بيديني نصايح أو بيقولي أعمل إيه ولكن هنلاقي الطريقة دي بتاخد وقت ومجهود فالناس اللي مش عاوزة تتبع الطريقة دي ممكن تتبع طريقة صناديق الاستثمار وتروح تحط فلوسها في صناديق الاستثمار
02:43
البُعد ورا صناديق الاستثمار
طيب احنا النهاردة هنغطي كذا حاجه من الاسئلة اللي ممكن تبقى وارده على الموضوع ده ونحاول مع بعض نفهم البُعد ورا صناديق الاستثمار
02:58
أول حاجه صندوق الاستثمار ده عبارة عن إيه؟
عبارة عن شركة بتتأسس زي أي شركة في العالم هدفها الوحيد انها تستثمر مثلاً في الأسهم – هناخد مثلاً صندوق استثمار في الأسهم – يبقى هي شركة انشأت ، هدفها الأساسي الاستثمار في الأسهم ، يبقى هي ورقياً زي اي شركة فكرة جت لحد قال أنا عايز اعمل صندوق استثمار في الأسهم.. هي كده الشركة بتنشأ
03:24
نشرة الإكتتاب
طيب ، بعد كده بيتعملها حاجه اسمها نشرة إكتتاب ، نشرة الإكتتاب بتاعة الصندوق ده بتطلع في أول يوم بتقول يا جماعة أنا عمر شمس طرحت الصندوق الفلاني ، والصندوق ده هيشتري الأسهم الفلانية في الدول الفلانية ، بنعمل كذا وبنفكر في كذا.. كل الحاجات اللي ليها علاقه بالصندوق نفسه ، استراتيجية الصندوق ، مين هيدوّر الصندوق كل الحاجات اللي هنمشي فيها في الحلقة دي هتبقى مكتوبة في نشرة الإكتتاب فحضرتك هتمسك نشرة الإكتتاب تقراها هتعرف سريعاً إيه هو الصندوق ده
04:02
يبقى دي أول خطوة في طرح الصناديق بأسس شركة ورقها القانوني زي اي شركة تانية ولكن بتبقى مرخصة مثلاً من هيئة استثمار معينه وبعدين بحدد أنا هعمل إيه في الصندوق ده بالظبط زي اي شركة في العالم بيبيع مثلاً ادوات تجميل ، بقالة.. أيا كان النشاط التجاري بتاعي ، في صندوق الاستثمار أنا بستثمر في الحاجات الفلانية ، وبعدين أخر حاجه نشرة الإكتتاب دي فدي أول التأسيس بتاع الصندوق
04:35
تاني حاجه ايه هي أنواع صناديق الاستثمار؟
احنا عارفين اننا لو أسسنا شركة ، لو أنا أسست شركة دي حصة معينة ، أنا بقول عمر هيأسس شركة فيها 100 ألف جنية مثلاً أو 100 ألف دولار ، الـ100 ألف دولار دول هيتوزعوا على محمد وإسماعيل وحسين بالنسب الفلانية طيب هل صناديق الاستثمار بتبقى نفس الحاجه؟ آه
04:58
أول نوع صندوق الاستثمار المغلق
ودي أول نوع من صناديق الاستثمار اسمه صندوق استثمار مغلق ، صندوق الاستثمار المغلق ده هاجي أقول يا جماعة أنا هلم 100 مليون جنية أو دولار وهستثمر في الفكرة الفلانية.. مين عايز يخش؟ محمد وإسماعيل وحسين دخلوا ده بقى اسمه صندوق استثمار مغلق ، قفلت أنا الصندوق على الـ 100 مليون بتاعتي مدخلتش وخرجت حد خالص من الناس ده أول نوع من صناديق الاستثمار صناديق الاستثمار المغلقة
05:32
تاني نوع صندوق الاستثمار المفتوح
إيه الفرق بينه وبين المغلق؟ اننا في أول يوم هقول يا جماعة أنا عايز 100 مليون جنية / دولار ، جالي الـ 100 مليون دولار محمد وإسماعيل وحسين نفس الناس جولي ، بعد شهر في ناس تانية عايزة تخش سماح وحسين ورضوى جايين عايزين يخشوا بصدر لهم وثائق جديدة فالصندوق بقى حجمه 110 ، طيب بعد شهر كمان في ناس عايزة تيجي بفضل أصدر لها ، والصندوق ده مفتوح إلى ما لا نهاية ممكن يقعد يكبر زي ما يكبر وده تاني نوع من صناديق الاستثمار صناديق الاستثمار المفتوحة
06:21
تالت نوع الصندوق المتداول في البورصة
تالت نوع اللي هو صندوق استثمار بيبقى مفتوح برده بس مقيد على البورصة معينة اسمه صندوق متداول في البورصة ده بيبقى الصندوق المفتوح بس زيادة عليه انه محطوط على بورصة تقدر تشترية على طول من على البورصة ، ده بيبقى في أمريكا في لندن ، مصر يمكن فيها واحد ، السعودية فيها كتير ، الإمارات فيها اتنين تلاتة ، هنلاقي انها صناديق استثمار برده بس مرخصة من الهيئة ومحطوطه على البورصة
فيبقى دي أنواع صناديق الاستثمار مفتوح ، مغلق ، متداول في البورصة
07:02
هستثمر في إيه؟
بعد كده هنروح نبص على تالت حاجه في صناديق الاستثمار هنبص على إيه الاستراتيجية بتاعتي ، أو إيه اللي أنا هستثمر فيه؟ يعني في صندوق أسهم ده نوع ، في صندوق أدوات دخل ثابت اللي هو بيشتري سندات أو حاجات حكومية فبيديني دخل ثابت كل شوية ده نوع تاني ، في صندوق اللي هو بتسمع اليومين دول الشركة الناشئة الفلانية لمت 5 مليون دولار ، الشركة الناشئة العلانية لمت 2 مليون دولار بيبقى اللي بيستثمر فيهم ده صندوق شركات ناشئة ده النوع التالت من الصناديق ، ممكن صندوق سلع صندوق بيستثمر بس في القمح والدرة وفي البترول والدهب والحاجات دي ده نوع من الصناديق ممكن صناديق تانية في التشفير صندوق معمول في دولة ما المستثمرين بيحطوا فيه فلوس ومدير الصندوق بيستثمر في التشفير ، وممكن نلاقي نوع تاني صندوق مختلط هاخد حتة أسهم على حتة دخل ثابت واعملك صندوق ، هاخد صندوق أعملك توزيع لفئة الأصول كلها ، أو على الأسهم شوية ، أدوات الدخل شوية ، التشفير شوية ، السلع شوية ده صندوق مختلط ، ده صندوق متوازن محفظة متوازنة ما بين أفكار مختلفة ده نوع كمان
يعني معنى كده إن صندوق الاستثمار عنده القدرة إن أنواعه لا نهائية ممكن واحد يصحى الصبح يعمل فكرة ويحطها في صندوق استثمار فلو حضرتك بتدور على حاجه معينة لازم تعرف نفسك ما هو العالم المسموح بيه في الاستثمار في الصندوق ده؟
08:50
برده من خلال نشرة الإكتتاب هنلاقي إن كل الحاجات دي مذكورة وممكن تقولي لو ده مثلاً صندوق أسهم أخره ممكن يشتري 10% في سهم واحد التركز بتاعة معين بحاجه معينه ، واحد تاني يقولي لأ التركز بتاعي ممكن أطلع لحد 20% اشتري بـ20% من الصندوق حاجه واحده او 20% تشفير أو 10% عقارات أو أو أو… زي ما انت عاوز بقى ، فحضرتك هتقرا في نشرة الإكتتاب اللي عندك كل الحاجات دي وبسهولة جداً هتفهم الصندوق ده بيستثمر في إيه
09:25
رابع حاجه هنتكلم عليها النهاردة الناس اللي بيشتغلوا على الصندوق
الناس اللي بيشتغلوا على الصندوق دول زي موظفين كده الصندوق أتعمل هنقول عمر هو صاحب الصندوق هو اللي طرح الصندوق ، هيعين أول واحد مدير الأصول ، بمعنى إن عمر هيعين محمد انه يدور صندوق الاستثمار ، محمد ده شغتله إيه؟ انه هياخد قرارات شرا وبيع بالنيابة عن الناس اللي جوه في الصندوق ، يبقى دور عمر هنا هو صاحب الصندوق ومحمد هو مدير الاستثمار
هيروح رايح لحد تاني مثلاً نقول هالة ، هالة هي مديرة الصندوق ، الشخص اللي بيعمل الحسابات للصندوق دي جهه تانية غير محمد خالص بتعد لحضرتك الفلوس اللي جوه الصندوق ، جهة مستقلة مرخصة تابعة لهيئة معينة واخده رخصة بتقول أنا دوري بس اني اعد الفلوس اللي جوه الصندوق.. ليه؟ عشان محمد ميعملش حاجه وحشه في المستثمر اللي جوه الصندوق ، فهالة جت عشان تراجع على محمد
بعد كده هنروح مثلاً أستاذ حسين هو مجلس إدارة الصندوق وده المنصب التالت في الصندوق ده ولا هو مدير الاستثمار ولا هو مدير الصندوق اللي بيعد الفلوس ده واحد تالت قاعد كده يقول يا محمد يا هالة إيه الأخبار ويشوف الأرقام ويراجع عليهم
أخر حاجه في الدور الرئيسي للصندوق ان انا عندي موزع للصندوق ، طب انا لو عاوز أشتري الصندوق ده اشتري منين؟ هنا بيجي السمسارة ، بيجي البنوك ، بيجي مراكز معينة بتقدر تروح تشتري منها الصندوق نفسه لو حضرتك حابب تستثمر
: يبقى دول الـ4 ادوار الرئيسيين الموجودة عشان أي صندوق أصلاً يبتدي
هشتريه منين ، ايه المحل اللي بيبيعه؟ وبالنسبالي هنا البنك أو شركة السمسرة -
مين مجلس الإدارة اللي قاعدة بتراقب بالنيابة عن المساهمين -
لأن أنا كمساهم مش هشوف كل يوم فمحتاج أعرف مين مجلس الإدارة بتاعة الصندوق بتاعي اللي بتراقب على الحاجات
مين مدير إدارة الأصول فلان الفلاني-
مين المراقب أو مدير الصندوق ، المراجع اللي بيراجع على كل الحاجات اللي جوه الصندوق فلان الفلاني -
يبقى أنا كده اتأكدت من الـ4 حاجات دول
12:07
طيب لو لا قدر الله الراجل اللي بيدير الصندوق بقى اللي هو مدير إدارة الأصول (استاذ محمد) أختفى من على وش الأرض المفروض إن الحاجه اللي جوه الصندوق ملهاش علاقة بمحمد ، محمد عنده بس زي توكيل إداري على الصندوق ، يعني الشركة الفلانية اللي بتدير الصندوق ممكن انا (استاذ عمر) صاحب الصندوق يرفد (محمد) ويجيب مدير إدارة أصول تاني عادي خالص مفيش اي حاجه
يبقى المخاطرة هنا مش فمدير إدارة الأصول لأنه ممكن يتغيرممكن يحصل اي حاجه ، الصندوق نفسه بيبقى عنده كيان قانوني مستقل تماماً فيه أسهم وفيه فلوس حضرتك فلو أي حد من الناس دول وقعوا المفروض ميحصلش أي حاجه ليه؟ لأن الفلوس عندك في كيان لوحده اسمه صندوق كذا للفرص الاستثمارية مثلاً عشان كده المخاطرة هنا بتبقى واطيه إني استثمر في الصندوق ده
13:05
نسبة المصروف اللي بيتحملها المستثمر
طيب أنا النهاردة وانا داخل في نشرة الإكتتاب ده لازم اخد بالي من حاجه ودي النقطة رقم 5 اللي انا عايز أتكلم فيها ، اللي هو كمستثمر (مصطفى مثلاً) داخل في الصندوق ، فأستاذ مصطفى عايز يعرف هو معين الناس دي بكام % ، انا أديت لحضرتك 100 دولار دخلتهم الصندوق أنا المصروفات عندي إيه اللي بتحملها كمستثمر؟
ففي حاجه اسمها نسبة المصروف ، نسبة المصروف دي بتبقى نسبة مئوية سنوية بتتحسب عشان تدفع للاستاذ محمد مدير إدارة الأصول ، والأستاذة هالة مديرة الصندوق ، واللي بيراقب عليك ، والموزع بتاع الصندوق ، فالصندوق بيبقى عنده حاجه اسمها نسبة المصروف ، نسبة مئوية كاملة بتطلع لحضرتك مثلاً 1% ده هو المصروف ، فحاول أعرف إيه هو المصروف بتاعك وطبعاً لو في صندوقين تلاته بيقدموا نفس الخدمة الصندوق اللي مصروفه أقل أحسن لأن ده بيأثر في الأخر على العوائد بتاعتك
يعني النهاردة لو في صندوق تكلفته 1% في السنة وصندوق تكلفته 2% في السنة والصندوقين طالعين 10% قبل المصروف هنلاقي إن الصندوق رقم 1 بيديك 9% في جيبك ، والصندوق رقم 2 بيديك 8% في جيبك اللي بيوصلي في الأخر هو بعد المصاريف ودي هنتكلم عليها في حلقة تانية وهنتكلم أكتر على حاجه زي الصناديق المتداولة في البورصة
فبرده حضرتك من نشرة الإكتتاب أعرف إيه هو الصندوق ، وإيه مصاريفه وهل هي عالية ولا لأ والكلام ده كله
15:00
هل الصندوق هيحققلك هدفك الادخاري؟
وأنا بأختار الصندوق أهم حاجه تعرف حاجات معينه اللي هي هل ده اصلاً هيحققلك الهدف الادخاري اللي انت بتعمله يعني أنا مثلاً محفظتي فيها 100 دولار ، كل اللي امتلكه 100 دولار ، أنا عايز أحط 20% في الأسهم طيب أسهم إيه؟ في أنهي بلد؟ في أنهي قطاع؟ حضرتك محتاج تختار الحاجات الكبيرة دي مش محتاج بقى تختار الأسهم اسمها إيه ، وبتعمل إيه وبتكسب ازاي والكلام ده كله ، لكن ممكن حضرتك تختار البلد يعني حضرتك عاوز تحط الأسهم بتاعتك في أسهم أمريكيه ولا أسهم في منطقة الشرق الأوسط ولا في أوروبا ولا فين!! لازم تحدد أنت كمستثمر انت عايز الأسهم بتاعتك فين؟ ممكن تقولي عاوز أحط في شركات تكنولوجية بتاعة أمريكا ، ممكن تقولي عاوز أحط في شركات صناعية في الحته الفلانية زي ما حضرتك تحب.. فممكن تلاقي الصندوق اللي بيحقللك الهدف ده ، فأعرف التوزيعه بتاعة الـ100 دولار بتاعتك اللي هتروح في الصندوق دي هتتوزع ازاي ودي بتبقى منشورة برده احنا هنستثمر في السوق الفلاني والكلام ده كله
16:10
تاني نقطة لازم اتأكد منها لو في دولة فيها مشكلة اقتصادية كبيرة وحضرتك مش عاوز تدخر فيها متحطش فيها ، يعني مثلاً في دولة فيها مشاكل في العملة او في دولة بتنهار إقتصادياً أو التوقعات بتاعتها وحشه فممكن حضرتك متخترش الدولة دي وتختار دولة تانية يبقى هنا القرار بسيط هو قرار من منظور أعلى حضرتك مش هتخش في تفاصيل
16:40
توقع الأرباح والخسارة
تالت نقطة أنا عاوز اقولها هنا احنا لازم يبقى عندنا توقع للأرباح يعني لو أنا حاطط في صندوق عقاري مثلاً بيديني 3 أو 4% في السنة توزيعات ، وبيديني 3 أو 4% في السنة زيادة في رأس المال ، يبقى أنا بعمل 6 أو 7% مينفعش توقعاتي تبقى عاوز أعمل 15 أو20%.. يبقى أفهم جداً من أول يوم الصندوق اللي حضرتك داخله ده توقعات العوائد بتاعته عامله ازاي
لو حضرتك داخل أسهم ممكن تعمل 10 - 15% ، لو داخل صندوق استثمار ليه علاقة بالعملة المشفرة ييبقى توقعات الارباح عالية أوي وفي نفس الوقت التوقعات بتاعة الخسارة ممكن تبقى في المدى القصير كبيرة
فحضرتك أعرف اللي أنت داخله ده داخله ليه وإيه التوقعات بتاعة في الأرباح والخسارة تبقى فاهم ده كويس ليه؟ عشان لما يحصل إن حضرتك تحط فلوس متنصدمش بالواقع اللي هو يااه انا كنت متوقع أعمل مثلاً 80% عملت 3% لأ ما هو التوقعات كانت غلط ، يبقى أعرف جداً جداً وانت بتشتري الصندوق إيه المتوقع يحصل منه
زي ما حضرتك بتروح السوبرماركت وبتشتري أزازة لبن حضرتك متوقع إيه أزازة اللبن دي هتعملهالك هشربها كده ، هحطها على الشاي ، هفطر بيها.. في توقعات من الحاجه صندوق الاستثمار نفس الحاجه بالظبط والتوقعات دي مش لازم تبقى بعد شهر أو شهرين لأ أنا قصدي توقعك مثلاً بعد سنتين تلاته هعمل كذا بعد 5 سنين هكون بعمل كذا وهكذا
18:27
ازاي اشتري صندوق الاستثمار؟
الحاجه التانية لازم تبقى عارف أنا ازاي اشتريه وابيعه ، يعني أنا هروح اشتري صندوق استثمار منين؟ عرفت ان البنك الفلاني بيبع صندوق التقاعد أو صندوق الأسهم في الحته الفلانية خلاص أنا عرفت ، طيب إيه الخطوات هفتح حساب في البنك ، هبعت فلوس فالبنك ، هكلم فلان الفلاني (استاذ محمد مثلاً) أقوله نفسي اشتري الصندوق ده.. حاضر ابعتلي الورق ده وهكذا يبقى اعرف الطريقة اللي انت هتشتري منها الحاجه ، اشتريت الحاجه نزلت طلعت أعمل الخطة بتاعتك على مدار السنين هتعمل ايه بالصندوق ده
وتاني أنا مش عاوز انسى الهدف اصلاً من الحلقة ، هدف الحلقة اني عايز أحط جزء في الأسهم أو في أنواع صناديق الاستثمار الأخرى عايز أحطهم بس مش عايز أضيع وقتي إني أعمل الحاجات دي فانا بستغل صندوق الاستثمار ده كمنطقة مجمعة كلنا كمساهين بنحط فلوس مع بعض وبندي فلان الفلاني ياخد قرار بالنيابة عننا
طيب عرفت اشتريه منين وهعمل ايه والكلام ده كله ، مليت الورق ، دخلت فلوسي ، بعته للراجل واستثمرت.. طيب عاوز أتعلم دلوقتي وأشوفه فين – يا أستاذ محمد أنا اشتريت الحاجه دي ومش فاهمها أبعتلي كشف حساب ، أو ابعتلي رصيد حسابي أنا عندي كام وثيقة.. أتكلم مع استاذ محمد خليه يعلمك هو إيه صندوق الاستثمار ده طب أنا حطيت فلوسي فين؟ طب هسحبها ازاي؟ طب أنا هعمل إيه؟
ممكن استاذ محمد - ودي نقطة مهمه - يقولك الصندوق ده الأسترداد والإكتتاب فيه كل مثلاً إسبوع أو شهر أو كل 3 شهور أو كل يوم ممكن برده في صناديق يوميه ، يعني إيه الكلام اللي انا رصيته دلوقتي ده؟ يعني بيسمحلك أنك تسترد فلوسك كل يوم أو كل إسبوع أو كل شهر مثلاً فأعرف برده الصندوق ده إيه الإطار الزمني بتاعة
والصناديق عموماً كسيولة هي من أحسن الأدوات اللي بتديك سيولة لأن مفيش حاجه بتقدر تسيلها في يوم أو في إسبوع أو في شهر من الادوات الاستثمارية في حاجات تانية ممكن تقعد شهور وسنين عبال ما تبيعها فصناديق الاستثمار تعتبر من احسن الحاجات اللي أنت ممكن تستخدمها كتوفير سيولة
21:08
نصايح عامة
نصايح عامة عايز أقفل بيها الحلقة النهاردة لما حضرتك تبتدي تستثمر في صناديق الاستثمار ، وتبتدي تتعلم إن الحاجه ممكن تطلع وتنزل وقتها أنا من وجهة نظري تقدر بعد كده تحط شوية وقت إنك تتعلم ازاي تشتري أسهم معينة ، الأسهم دي بعينها هتطلع ، الأسهم دي عليها أخبار.. ليه؟ لأن وقتها هيبقى أنت اصلاً عندك أساس محوشه في صناديق الاستثمار ، اساس كويس بيعلمك يعني إيه بورصة ، التجربة كلها اللي أنا قولتلك عليها دي هتفهمك حاجات كتير فالنص انا نفسي مش فاهمها حضرتك هتكتشفها لما تعمل الموضوع ده
بعد كده ابتدي افتح وحاول اشتري الأسهم بنفسك واشتري وبيع وأعمل الكلام ده كله ، يعني ممكن مثلاً الـ 100 دولار اللي حضرتك بتستثمرهم في الصندوق دول يبقوا بعد كده 80 جوه الصندوق و20 بتلعب بيهم بتختار الأسهم اللي أنت عايزها ، بتخش وتخرج وبتاخد مخاطرة عليهم أكبر من صندوق الاستثمار
بس أنا ديماً مع إن الكتلة الكبيرة تتحط في حاجه واحد غيرك يدورهالك ويستثمرلك بالنيابة عنك والحاجه الصغيرة هي اللي انت بتتحرك بيها.. حتى لو أنت محترف؟ حتى لو أنت محترف ، حتى لو أنت فاهم بتعمل إيه؟ حتى لو انت فاهم بتعمل إيه.. ليه؟ لأن الموضوع بياخد وقت ووقت كبير حضراتكوا كلكوا اللي بتسمعونا غالباً بتشتغلوا في حاجات أخرى غير المجال المالي فمش محتاج تضيع كل الوقت في حياتك انك قاعد تتابع ومش عارف تنام ومش عارف تصحي وهوبا الين نزل وطلع وكل الكلام اللي بنشوفه في الأفلام والناس بتقعد تحكيه ده فحضرتك مش محتاج تعمل الحاجات دي خالص
23:00
العوائد بتيجي من استثمارك في المدى الطويل
لازم تفهم حاجه كمان العوائد بتيجي من استثمارك في المدى الطويل بكررها في كل حاجه بقولها ديماً بمعنى إيه ان انا مش هيجيلي حاجه في شهرين تلاته هتغيرلي حياتي ، ممكن تحصل ، وممكن تسمع عن قصص ناس عملوا كل حاجه في الدنيا والكلام ده كله بس ده زي ما بتسمع عن واحد كسب في اليانصيب نفس النسب يعني الأغلبية العظمي مبيحصلهاش كده فمدورش على الامثله اللي نجحت في وقت قصير وتقول إيه ده في ناس بيلاقوا المغارة ، حد خرج بليل فلقى مغارة على بابا فكسب لأ هي الحياة مش كده في الاستثمار خالص ، حضرتك بتجيلك العوائد بتاعتك من فترات زمنية طويلة لازم يبقى عندك النفس والقدرة ان انت تقعد
فلو حضرتك ابتديت نظام ادخاري في صندوق استثمار معين والصندوق ده نزل عليك 10 ، 20 ، 50% أيا كان الرقم وخطة حضرتك إنك تحط الفلوس فيه كل شهر أو كل ربع شهر لمدة 5 أو 10 سنين كمل وحط فلوسك واتأكد إنك مع الوقت هتطلع كسبان ليه؟ لأن مثلاً في أمريكا من سنة 2000 لسنة 2010 قعدنا 10 سنين الأسواق الأمريكية وخاصةً في القطاع التكنولوجي مبتطلعش خالص خالص فحضرتك مثلاً ابتديت تحوش سنة 2002 قعدت 8 سنين لحد 2010 مبتعملش فلوس خالص على القطاع ده ولكن في العشر سنين اللي فاتوا من أحسن القطاعات اللي فالعالم هو قطاع التكنولوجيا زي ما حضراتكوا عارفين فيسبوك وجوجل وأبل وكل الأسهم دي كلها بتطلع كتير لأنها أبتدت تسيطر على حياتنا كلنا بالكامل فالأرباح بتاعة الشركات بتاعتها بالطبيعي غيرت العالم فالمستثمرين طبعاً حالهم أتغير جداً
اللي أنا عايز أقوله إيه لو حضرتك حطيت خطة استثمارية معينة والأسواق نزلت عليك وأووه أنا خسرت وانا نازل وطالع متفرقش خالص ليه؟ لأن مع الوقت السوق بيصحح نفسه أهم حاجه بالنسبالي إن اختياراتك الرئيسية اللي احنا قولنا عليها هستثمر في أنهي دولة ، هستثمر فأنهي فئة أصول ، هستثمر فأنهي قطاع كمان لو دخلت في الأسهم القرارات التلاته دول أهم حاجه في اللي هيحصلك بعد كده المجهود بقى العضلي ، النفسي جوه الموضوع واللي هيحصل جوه ده حضرتك مش هتعمله خالص ده حد تاني بتديهوله يعملهولك فألتزم بخطتك وأعرف أنت عايز إيه ونفذها حتى لو حصل حاجات تانية في طريقك
وهنلاقي في نظام مثلاً زي أمريكا معظم أو كل خطط التقاعد مربوطه بصناديق استثمار فأحنا تعمدنا اننا نعمل الحلقة دي بعد إعادة حلقة التقاعد عشان نربط الأتنين ببعض إن دي من الأدوات المهمه جداً جداً إن انت تربطها بخطة التقاعد بتاعتك
26:29
الخاتمة
أنا يمكن مكنش غطيت كل حاجه النهاردة ليها علاقة بصناديق الاستثمار ، ممكن اكون نسيت حاجه ممكن أكون غلطت ، ولو حد عنده معلومات يزودهالي حتى ياريت يبعتلي ، لو في سؤال ليه علاقة بالموضوع ده ياريت تقولولنا وهنحاول نحط في الشو نوتس شوية أماكن ممكن تطلع فيها على صناديق الاستثمار ممكن يكون مرجع لحضرتك أهم حاجه متاخد رأي حد ، اعمل أنت المجهود بتاعك وأقتنع متسمعش أصل فلان قال ده حلو أو وحش ، اصل مش عارف مين بيعمل كده، حضرتك أعمل مجهود في الإدارة بتاعة فلوسك اسأل ودور واتأكد بنفسك من كل حاجه ولو مش عارف أبعت لنا اسألنا لو في حاجه واقفه قدامك وخد قرارك واستثمر وإن شاء الله ربنا يوفقكوا في الخطوات اللي انتو هتاخدوها وأشوفكوا الإسبوع الجاي شكراً جداً على وقتكوا معانا النهاردة في كلام ينور
Translation of some words and terms:
Long Term مدى طويل
Topic موضوع
Open-End Fund صندوق مفتوح
Listed on Exchange مقيد على البورصة
Exchange Traded Fund – ETF صندوق متداول في البورصة
Directly مباشرة
Startup شركات ناشئة
Venture capital – VC رأس المال الاستثماري
Crypto Fund صندوق التشفير
A Blend Fund صندوق مختلط
Fixed income دخل ثابت
Asset Allocation توزيع للأصول
Asset Classes فئة الأصول
Commodity السلع
Universe العالم
Real Estate العقارات
Owner مالك
Fund Admin أمين الصندوق
Board مجلس
Risk مخاطرة
Expense Ratio نسبة المصروف
Fund Director مدير الصندوق
Returns عوائد
Macro كُلي
Statementكشف حساب
Time Frame الإطار الزمني
Lottery اليانصيب
Short Term مدي القصير
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #صناديق_الاستثمار #البورصة #إعادة