158. التحيز للاستثمار المحلي (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
التحيزات من الحاجات اللي بتخلينا ناخد قرارات عشوائية أو عاطفية مكنتش المفروض ناخدها، بنتكلم النهاردة على تحيز الاستثمار المحلي أو تحيزي للاستثمار في البلد اللي أنا عايش فيها، والتحيز ده موجود في الأسواق الناشئة وفي الأسواق المتطورة الكبيرة زي امريكا وانجلترا واليابان واستراليا وبنأكد إحصائياً على وجود التحيز ده عالمياً
(03:00) التحيز للاستثمارات المحلي -
(05:03) إزاي تستثمر خارج الدولة اللي عايش فيها؟ -
(06:05) تحيز اللي نعرفه احسن من اللي مانعرفوش -
(07:25) العولمة فتحت حدود الدول ما بينها وبين بعضها -
(11:29) لما تستثمر بالعملة الأجنبية مخاطرة العملة عندك هتقل -
(12:50) الثقافة واللغة من عوائق الاستثمار في الدول الأخرى -
(15:55) بنختار الأسهم عشان البيانات دي موجوده و نقدر نقيسها -
(17:36) ملخص الموضوع ان احنا دايما بنحاول نوزع المخاطرة بتاعتنا -
بنفكركم تتابعوا حسابنا على تويتر ، احنا بنزل مقتطفات من الحلقات لو حابب تقرأ المحتوى بتاعنا وبرضه بيرجعك للحلقات القديمة لو في معلومة او حلقة معينة حابب ترجع تسمعها تاني
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
عايز افكر الناس يتابعوا حسابنا على تويتر، احنا بننزل كده مقتطفات من الحلقات لو حابب يعنى تقرأ المحتوى بتاعنا هنسيب لينك تويتر في شو نوتس بتاعتنا وبرضه بيرجعك للحلقات القديمة مثلا لو معلومة معينة او حلقة معينة زمان عايز ترجع تسمعها بنفكرك دايما بالمحتوى بتاعنا القديم
01:10
النهاردة انا عايزه اتكلم على موضوع له علاقة بالتحيزات في الاستثمار، التحيزات تعتبر مخاطرة لصانع القرار في محفظته، وانا النهارده بعمل المحفظه بتاعتي التحيزات دايما بتخليني أخد قرارات عشوائية أو عاطفية مكنتش المفروض اخدها
النهارده هتكلم على التحيز اللي له علاقة بالبلد اللي انت عايش فيها، بنلاقي ان الحاجه دي عالميه مش موجوده بس في دولة معينة، بنلاقيها في الأسواق الناشئة وبنلاقيها في الأسواق المتطورة الكبيرة زي امريكا وانجلترا واليابان واستراليا هنتكلم على شويه إحصاءات بتأكد وجود نوع التحيز ده
01:57
انا النهارده واحد عايش في دولة معينة قلتلك تعالى مثلا استثمر في الأسهم بنسبة كبيرة جدا هتستثمر في الأسهم في الدولة اللي انت عايش فيها وده راجع لطريقة تفكيرنا وطريقة نشأتنا، مثلا في عاطفة تجاه الدولة اللي احنا فيها ولكن المستثمرين وخاصة المستثمرين الكبار لو هو عنده القدره انه ويختار استثماراته بناءاً على العائد المتوقع طريقة الاستثمار بتاعته هتمنعه شويه أنه دايماً يستثمر في الدولة اللي هو عايش فيها الموضوع في العائد انا عايز اروح اشتري العائد ده سواء في الدولة دي او في الدولة دي، احنا كأفراد الموضوع ده بالنسبه لنا بيبقى صعب الحاجات بتبقى عاطفية ومرتبطة بمكان النشأة بتاعتنا، الدولة اللي احنا عايشين فيها بتخلينا ناخد قرارات
03:00
هنلاقي الكلام ده كله موجود في الأصول كلها ولكن بالنسبة للأسهم عشان هي اكتر حاجه فيها معلومات هتلاقي الإحصائيات والدراسات يعني تقدر تعمل بحث على Home Bias Investments جوجل : التحيز للاستثمارات المحلي
هتلاقي ابحاث كتير وورق كتير على الموضوع ده كله بيأكد أن الناس غصب عنها بتعمل نوع معين من التحيز بيخليها تستثمر في الدولة بتاعتها
03:30
الفكره في الاستثمار زي ما قولنا إن أنا بدور على العائد ولكن في حاجه جميلة بتحصل لما بتطلع من البلد اللي بتعيش فيها بس وبتستثمر في دول أخرى وخاصة في الأسهم إن انت بتمنع عن نفسك مخاطر الدولة ده
يعنى انت النهاردة راجل عايش في غانا أياً كانت الدولة، دولة في أوروبا عايش في رومانيا، عايش في ألمانيا أي حاجه وانت استثماراتك كلها في هذه الدولة وكلها في هذا السوق لو حصل مشكلة اقتصادية في الدولة دي آه أنت موزع استثماراتك في أسهم كتير ولكن المخاطرة بتاعة الدولة الواحدة مازال هيأثر على أداء محفظتك
أداء محفظة الأسهم بتاعتك هتبقى مرتبطة بأداء الدولة نفسها، الدولة نفسها لازم تنجح عشان اللي جواها ينجح وبالتالي محفظتك تعمل عائد لكن لما بنخرج شويه بره فكرة الدولة الواحدة بيحصل انك بتوزع المخاطر بتاعه الدولة على الدولة كلها وقتها هتقولي ان ممكن يبقى في أزمة عالمية، والأزمة العالمية دي ممكن تضرب كذا دولة في نفس الوقت آه ممكن ولكن تكرار حدوث الأزمات العالمية بشكل عام بتبقى أقل بكتير من الأزمة الاقتصادية اللي بتحصل في دولة واحدة يبقى اول حاجه وميزة من أنك تعرف يعني ايه التحيز للدولة اللي انت عايش فيها ان انت هتوزع استثماراتك على كذا دولة
05:03
طيب ازاي ممكن اعمل كده؟ هرجع واقول دايما موجود صناديق مقيدة على البورصة، الصناديق دي ممكن تكون بتتبع مؤشر كذا دولة مع بعض محطوطين في مؤشر MSCI world واحد زي مثلا
اياً كان اسم المؤشر ده، صندوق استثمار بيستثمر في جميع دول العالم ممكن تلاقي في دولة كبيرة زي امريكا مثلا الوزن النسبي بتاعها كبير ولكن هنقول مثلا 50% في أمريكا و50% في باقي أنحاء العالم هنا انت موزع استثماراتك
ممكن مثلاً تقولي لأ انا عايز استثمر في المنطقة الأوروبية انا عايز مؤشر الأسواق بتاعه الدولة الأوروبية، ممكن تقولي عايز استثمر في أسواق الدول العربية، الدول الافريقية أيا كانت المنطقة انت بتبتدي تحط جزء من محفظتك خارج الدولة الاصليه اللي انت عايش فيها وانت هنا بتستثمر في الدولة الاصليه اللي انت عايش فيها فقط عشان انت عايش فيها
06:05
برضه في نوع تاني من التحيز غالبا ده بيزقنا أننا نستثمر في الدولة اللي احنا عايشين فيها هو تحيز اللي نعرفه احسن من اللي مانعرفوش زي المثل المشهور اللي اعرفه احسن من اللي مانعرفوش يعني ايه الكلام ده يعني انا عارف وفاهم الدولة بتاعتي وبخرج في شوارعها وشايف المصانع والشركات وعارف العلامة التجارية الفلانية فرضاً مثلا بشتري ماركة اكل معين أيا كان بقول مثلا بشتري أسهم بيتزا هت مثلا في الدولة اللي انا عايش فيها انا عارف ان العلامة التجارية دي وعارف هي بتعمل ايه الكلام ده كله لكن لو انت جيت قلتلي تعالي نشتري المثيل الياباني لبيتزا هت هتقولي لا انا معرفش انت بتقول ايه اصلا يعني هما اكيد معندهمش بيتزا هت عندهم حاجه تانيه انا معرفش اسمها ايه مع الاسف ده برضه بيخلينا نتحيز خلاص اللي اعرفه احسن من اللي معرفوش استثمر في المؤشر او في البلد اللي انا فيها او في سلسلة المطاعم الفلانية في الدولة فهنا المعرفه اللي ممكن تضرك اصلا هي اللي خليتك تاخد قرار تستثمر في دولتك ومتستثمرش في دولة أخرى لكن انت ممكن تروح الدولة الاخرى دي مش لازم تشترى بيتزا هت لا انا عايز اشتري مجموعه من المطاعم موجوده في مؤشر ما فاشتريته
07:25
في حاجه كمان لطيفه ممكن تعملها زي في السوق الامريكي ان السوق الامريكي ممكن بطبعه لو اخدت مثلا مؤشر الاس اند بي 500 اللي هما أكبر 500 شركة في أمريكا أن 25% منه مثلا ممكن يكون 6 / 7 شركات اللي هم مش بالترتيب بس مثلا ابل، مايكروسوفت، أمازون، جوجل، فيسبوك وتسلا مثلا هنلاقى ان الـ 7 شركات دول طبعا مش بيبيعوا كلهم في أمريكا ممكن نص الأرباح جايه من امريكا والباقي جاي من العالم أو 30% من الأرباح جايه من امريكا والباقي من العالم أيا كان والناس دي كلها بقى عندها حاجات فيها عولمة كتير زي مثلا الحوسبة السحابية الموجود في جوجل وموجود في امازون وموجود في مايكروسوفت اللي هو السيرفرات اللي الناس شغاله عليها زي كلاود اللي كلنا بنتعامل معاه الايام دي أرباحه جايه كلها من دول العالم هتلاقي من الهند، من أوروبا، من أمريكا اللاتينية، من الدول العربية، أرباح الشركات دي جايه من كل الدول دي انت النهاردة اه انت مش عارف الشركات دي لكن انت عارف ان هما مبقوش بيبيعوا فقط جوه أمريكا فمؤشر زي الاس اند بي 500 هنلاقي جزء كبير جدا من ارباحه جاي من خارج امريكا فانا لو عايش بره امريكا وعايز استثمر في شركات عالمية انا ممكن حاجه زي مؤشر الاس اند بي 500 او ممكن مثلا اشتري نيزك 1000 اللي هو في برضه صندوق استثمار بيتداول في البورصة وابتدي احوش فيه فلوسي
طيب انا مثلا عاوز استثمر في قطاع معين، قطاع المستشفيات مثلا فممكن اروح على صندوق متداول بيستثمر عالميا في أسهم المستشفيات، انا كنت هستثمر هنا في بلدي في قطاع المستشفيات طب ما انا هنا ممكن اروح لدولة تانية اشتري مؤشر أو صندوق استثمار استثمر في نفس القطاع، انا مش محتاج اعرف حاجه واللي نعرفه احسن من اللي مانعرفوش هنا مش فارقه معايا لأن صندوق الاستثمار عملي مجموعة من الأسهم المتنوعة في القطاع اللي انا عايزه او في الدولة انا عايزها عالميا أيا كانت فأنا مش محتاج اعرف اي حاجه اصلا انا بس محتاج احط فلوسي واستثمرها فمهم جدا جدا ان انا ابقى فاهم ان انا مش لازم اعرف كل حاجه، مش لازم دايما استثمر في الدولة اللي انا عايش فيها، أنا كمستثمر مع وجود العولمة الكلام ده كله اتفتحلي أسواق كتير اقدر استثمر فيها، اتفتحلي ان انا بدل ما بتستهلك جوجل كل يوم، بدل ما بتستهلك فيسبوك كل يوم انا ممكن اكون مستثمر فيهم عن طريق صناديق الاستثمار دي واي حاجه من الحاجات المشهورة الكبيرة هتلاقي فيها اسهم
الناس مثلا اللي بتتبع الفاشون والموضه هنلاقي ان معظم العلامات التجاريه الكبيره اللي بنسمع اساميها اللي بيبيعوا لبس أو شنط أو جزم أو اللي بيبيعوا الحاجات دي كلها هنلاقي ان الاسهم دي مدرجة في بورصات عالمية تقدر انت تاخد حته صغيره منها بأرقام صغيرة جدا مش لازم تستثمر في نفس الدولة مش لازم تبقى فاهم قوي ايه الحاجات لان التوزيعة اللي بتحصل جوه صناديق الاستثمار دي مهم جدا وطبعا احنا كلنا لازم نستفيد زي ما قلنا من العولمة اللي حصلت يعني دي من الفوايد فتح الحدود وأن الناس تقدر تستثمر في الدول ما بينها وبين بعض مهم جدا
11:02
نفس الكلام ده هنطبقه على فئات الأصول الأخرى زي السندات والعقارات ده كله انا ممكن استثمر في صناديق استثمار عالمية استثمر مثلا في الصكوك الإسلامية أو استثمر في السندات أو استثمر في عقارات دي برضه حاجه انا مش بس بتكلم على أسهم الشركات انا بتكلم على الاستثمار في كل القطاعات عن طريق توزيع استثماراتي عالمياً
11:29
برضه في ميزه مهمه في الموضوع ده زي ما اتكلمنا الحلقة اللي فاتت على موضوع العملة والتضخم الكلام ده كله ان انت لما بتستثمر في حاجة عالمية بتستثمر في حاجه هتكون دايما مطلوبة بالعملة الاجنبية فطبيعي أن مخاطرة العملة عندك بتقل
يعني انا النهارده بشتري مثلا صندوق استثمار بالدولار في دولة اخرى الصندوق ده زي مثلا الاس اند بي 500 أكبر 500 شركة في امريكا انا النهارده اشتريت الحاجه دي ب 100 دولار الـ 100 دولار بتاعتي في الصندوق ده والاستثمار ده شغال لمدة 10 / 15 سنة لما اجي ابيع الاستثمار ده هبيعه بالدولار فهقدر أحوله لحاجه تانيه فئة اصول اخرى او ارجعه تانى للبلد بتاعتي ايا كان
12:20
الميزه في استثمار العالمي ده ان المخاطرة على العملة يعتبر اقل من ان انا استثمر في دولة ناشئة بالعملة المحلية بتاعتها، فلما نبص على درجات المخاطرة هنلاقي الاستثمار ده نسبة مخاطرته أقل والميزه برضه في طريقة الاستثمار دي ان انا بوزع الدول وممكن اوزع القطاعات ممكن برضه اوزع المخاطره بتاعه العملة المحلية بتاعتي
12:50
ممكن برضه من الحاجات اللي ما تخلينيش استثمر في الدول الاخرى وتخليني دايما استثمر في الدولة بتاعتي أو اللي عايش فيها الثقافة بتاعتي او اللغه بتاعتي، يعني انا واحد عربي ازاي ممكن اروح استثمر في الصين مثلا عشان اروح افتح مصنع في الصين لازم اعرف اتكلم صيني لازم أكون بعرف أعين عمال ولكن من خلال الاستثمار في الأسهم أو في أدوات الدخل الثابت لدولة زي الصين او ايا كان هشتريها في صندوق استثمار انا مش محتاج ولا اني اتعلم اللغه ولا اتعلم الثقافة انا مستثمر صامت عايز العوائد اللي جايه من الاستثمارات دي برضه اللي كان بيخلي الناس زمان ما تروحش تستثمر بره الدول بتاعتها زي الثقافة أو اللغة مع وجود الاستثمار أو العائق بتاع اللغة مش موجود خلاص انا اقدر استثمر
وزي ماقلت انت مش محتاج تبقى عارف كل التفاصيل جوه صندوق الاستثمار الشركات دي ايه بالظبط ان في مدير استثمار وراها بيساعدك تختار الشركات دي، وفي راجل بيعمل المؤشر نفسه فهو بيساعدك تختار الشركات فالعائق ده اتشال مع وجود التداول عبر الانترنت مع وجود امكانية وصول الأفراد أن أنها تستثمر في الحاجات دي
14:22
طبعا لو قلنا برضه الشركات الكبيرة وهرجع تاني للأمريكية اللي هي في الوقت ده مسيطرة على الاقتصاد العالمي زي مثلاً فيسبوك ففيسبوك هو عنده 3 او 4 منتجات كبار زي فيسبوك نفسه، واتساب، إنستجرام الـ 3 حاجات دول موجودين في كل الدول وموجودين بكل اللغات انت كمستثمر فيه انت مش محتاج تتعلم أي حاجة عشان تعمل البيزنس ده أنا عارف ان الحاجات دي ممكن تكون بديهية جداً ولكن الناس مش بتبص عليها أنت هنا شلت كل العوائق دي وأنا قدرت كمستثمر من بيتنا اقدر اشتري هذه الشركة
15:00
تاني هرجع وأقول لازم الاستثمارات دي تبقى بالتدريج وتبقى بالراحة ولو حتى بحاجات صغيرة ومع الوقت أنت هتستريح ان انت تقدر تستثمر في أسواق جديدة مش لازم تاخد كل الفلوس بتاعتك وتستثمر كل حاجه في دولة جديدة انت ممكن تكون النهارده 100% من محفظتك في الدولة اللي انت عايش فيها كمان سنه عندك خطه انها تبقى 5% خارج هذه الدولة، كمان سنتين هيبقى عندك 15% بعد كده عندك 25% أياً كانت النسب اللي انت تستريح ليها
فالموضوع بالتدريج لازم يبقى عندك نظرة طويلة المدى انا عايز بعد 10 سنين محفظتي شكلها يبقى عامل ازاي وناخدها بالراحة ونحط خطة طويلة المدى ازاى اوزع استثماراتي خارج البلد الأساسية اللي انا عايش فيها
15:55
يعني لو قلنا مثال رقمي هنتكلم مثلا على دولة زي اليابان الشعب الياباني نفسه دي إحصائية انا جايبها يمكن مش إحصائية جديدة بس بتبين قد ايه حجم الفرق ما بين الاستثمارات داخل اليابان وخارج اليابان الإحصائية دي بتقيس كام % من محفظة الرجل الياباني او السيدة اليابانية جوه الأسهم اليابانية وقد ايه من محفظتهم خارج اليابان
ليه بنختار الأسهم هنا عشان البيانات دي موجوده و نقدر نقيسها اسهل من الحاجات التانيه زي العقارات والحاجات دي مش سهل ان انت تقدر تحسب الارقام دي
فلقينا هنا مثلا أن 55% من محفظة الرجل الياباني داخل الأسهم في اليابان و 7% فقط خارج اليابان، لو بصينا على استراليا 66% داخل استراليا 2% خارج استراليا اكن الناس معندهاش اي حاجه بره البلد بتاعتها، لو بصينا على انجلترا مثلا 26% داخل إنجلترا 7% خارج، 59% داخل كندا 3% خارج كندا
فالنسب كبيرة جدا، الفروقات كبيرة جدا، الاتجاه واضح عالميا قد ايه الفروقات والتحيز للدولة نفسها موجود ومأثر على القرارات الاستثمارية، انا لو عندي محفظه فيها 100$ في 59 $ جوه الأسهم الكندية و 3% فقط في أسهم خارج كندا، كمستثمرين هنلاقي ان النسبة العظمى محفظتها كلها تقريبا جوه الأسهم الكندية طبعا بقيت ال 100$ بتاعتي ممكن تبقى في بيوت ممكن تبقى في ودايع ممكن تبقى في حاجات كده
17:36
ملخص الموضوع ان احنا دايما بنحاول نوزع المخاطرة بتاعتنا، بنحاول نحزو في اتجاه ان دي احسن طريقه استثمار مش لازم استثمر جوه البلد اللي انا عايش فيها انا عايز أوزع مخاطرة الدولة، عايز أوزع مخاطرة العملة، عايز أوزع مخاطرة القطاعات جوده الشركات
كمان ممكن في دول أخرى تكون في جودة أعلى من الشركات الموجودة في الدولة اللي انت عايش فيها لو بأرقام صغيرة ممكن تبتدي، التحيزات دي موجوده في كل الناس موجودة في الدول الناشئة والدول المتقدمة.. شكرا جدا ان انتوا سمعتونا النهارده اشوفكم ان شاء الله الاسبوع الجاي
Translation of some words and terms:
Risk مخاطرة
Based On بناءاً على
Home Bias Investments التحيز للاستثمار المحلي
Etfs صناديق الاستثمار المتداولة
Exchange البورصة
Index مؤشر
Region منطقة
Globalisation العولمة
Cloud Computing الحوسبة السحابية
Currency Risk مخاطرة العملة
Vehicles وسائل
Index Provider مزود المؤشر
Online Trading التداول عبر الانترنت
Gradual بالتدريج
Trend اتجاه
Data بيانات
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #التجيز_للاستثمار_المحلي #إعادة