156. ما وراء صناديق الاستثمار المتداولة (ETF) (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
أتكلمنا قبل كده عن صناديق الاستثمار العادية.. مين بيبعها، ازاي تقدر تشتريها والتفاصيل دي كلها وأكتر في حلقة 26 تقدر ترجع تسمعها تاني من هنا episode-26
في حلقة النهاردة بنتكلم عن نوع تاني من الصناديق الإستثمارية وهي الصناديق المتداولة على البورصة أو صناديق المؤشرات وبنقارن ما بينها وبين الصناديق الاستثمار العادية
: من حيث
نشرة الإكتتاب -
سهولة المتابعة والتقييم -
المصاريف الإدارية -
الحد الأدني للإستثمار -
الضرايب -
وقت الشراء والبيع -
تكلفة الشراء والبيع -
الهدف من إنشاء الصناديق المتداولة -
الهدف من حلقة النهاردة هو إنك تعرف الفروق أو المميزات ما بين صناديق الإستثمار المتداولة على البورصة وبين صناديق الإستثمار اللي بيقدمهالك البنك كواحد مش خبير وبتحاول تستثمر.. إيه المناسب ليك وهيحققلك هدفك بطريقة سهلة ومن غير تعقيدات
ياريت تشاركونا لو عندكم آراء مختلفة أو تجارب في الموضوع ده على صفحتنا على السوشيال ميديا
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
ETFs النهاردة موضوعنا متعلق بصناديق الاستثمار وعايز أتكلم على الصناديق المتداولة على البورصة اللي بتتسمى
احنا أتكلمنا في حلقة قبل كده عن صندوق الاستثمار مين بيبعه ، ازاي تقدر تشتريه التفاصيل دي كلها ممكن تقدر ترجع للحلقة اللي فاتت وتسمع أكتر عن صندوق الاستثمار ولكن احنا النهاردة هنزود ونقارن بين صندوق الاستثمار العادي المتعارف عليه بحاجه اسمها صناديق المؤشرات أو الصناديق المتداولة على البورصة
هنلاقي إن تكوين الصندوقين بيكون بنفس الطريقة يعني في الأخر أنا بكون صندوق إستثمار كل صندوق استثمار له نشرة إكتتاب سواء متداول على البورصة أو لأ.. نشرة الإكتتاب دي بتقولك حضرتك هتستثمر في الصندوق ده وهيحصل كذا وكذا والصندوق ده بيحاول يعمل 1 2 3 4
هنبص على صندوق المؤشرات هو جاي من اسمه هو مكان تداول الصندوق ده بيبقى على البورصة يعني الهيئة اللي بتصدر الصندوق ده بتروح للسوق الفلاني اللي في البلد الفلانية بتقول احنا عايزين ندرج الصندوق ده ومن هنا جه اسمه ومن هنا عرفت مكان أنا ممكن أشتريه منين هشتريه من على البورصة
طب علشان برده زي ما اتكلمنا قبل كده ازاي لما اعوز أشتري حاجه من على البورصة ازاي ممكن اشتريها؟ لازم يكون عندي حساب شركة سمسرة وحساب شركة السمسرة ده بيبقى الوسيط بتاعي ما بيني وبين السوق أنا بحول فلوسي لشركة السمسرة وشركة السمسرة دي بحط أمر الشراء بتاعي أو البيع من عندها وهي بتخش تشتري الحاجه دي
يبقى شركة السمسرة حولتلها فلوس ، قولتلها يا شركة أنا عايز أشتري الصندوق المؤشر الفلاني المتداول في البورصة الفلانية اشترتهولي وحطتهولي في محفظتي بتاعة السمسرة وأنا أقدر اشوفه كل يوم وأقدر اقيمه كل يوم لأنه متداول على البورصة ده أول فرق ما بين صندوق الاستثمار العادي اللي احنا اتكلمنا عليه قبل كده وقولنا لازم تشتريه من البنك أو تشتريه من شركة الأصول نفسها المصدرة للصندوق لكن هنا أنا هروح للصناديق المتداولة هشتريها من على البورصة
هو كان التطور بتاع صندوق الإستثمار العادي إن كان في شركات طلعت بالفكرة دي وقالت احنا بدل ما نجمع آلآف من المساهمين ونقعد نصدرلهم وثائق في صندوق الإستثمار الموضوع طويل طب ما تيجي نحطه على البورصة ونخلي الناس تحط أوامر بيعها وشراها عادي والموضوع هيبقى أسهل إني أديله الأسهم بتاعته أو حصته في الصندوق مباشرة في محفظة السمسرة بتاعته فدي كانت الفكرة إني عايز أشيل الوسيط اللي في النص اللي هو البنك اللي بيبيعلك الصندوق ولما هشيل البنك اللي فالنص هعمل حاجه مهمه جداً جداً بتميز الصناديق المتداولة على البورصة إن المصروفات الإدارية للصندوق بتبقى أرخص ، ليه بتبقى أرخص لأنه بيعتمد على الكمية الكبيرة يعني هو عايز يبيع على البورصة فالبورصة عندها مساهمين بالآلافات الناس اللي عندهم حسابات في البورصة نفسها بيبقى كمية كبيرة جداً من الناس ففجأة اتفتح عليهم سوق جديد يقدر يبيع في الصندوق فحجم الصندوق نفسه هيكبر فهو قدر يضغط مصاريفة.. يضغط مصاريفه انه مفيش مصاريف للبيع أو للتسويق دي حاجه يقدر يضغط مصاريفة لأن حجم الصناديق المتداولة أكبر بكتير جداً من الصناديق اللي مش متداولة عشان زي ما قولنا الناس الموجودة أكتر فقدر ينزل المصروف اللي حضرتك بتدفعه عشان تمتلك حصة من الصندوق ده فدي تاني ميزة تميز صندوق المتداول في البورصة عن صندوق الإستثمار العادي
تالت ميزة ودي جايه برده من الحجم إن مفيش حد أدني في الإستثمار يعني لو في صناديق متداولة على البورصة سعر السهم أو الوثيقة 20 دولار سعر يعني انت الحد الادني بتاعك انك تشتري سهم واحد أو حصة واحده في الصندوق ده ولكن بنلاقي في صناديق الاستثمار العادية الموجودة في البنوك بنلاقي إن الحد الأدني بيتحدد 1000 جنية/دولار ، 5000 جنية/دولار ففي حد أدنى
والحد الأدنى هنا جاي من الحجم عشان يطلعلك الورقة ويعمل الإجراءات والكلام ده كله على الأقل الراجل يكون ضمن حته معينه جايه من المصروف اللي هي خلينا نقول مثلاً 5000$ كحد أدنى فلما أخد مصاريف الإدارة بتاعتي على الأقل هي كده غطت الموضوع
يبقى الصندوق المتداول أنت لو مش معاك مبلغ الحد الأدنى في الصندوق العادي أنت ممكن تلاقي على الصناديق المتداولة حد أدنى أقل
في برده حاجه بعد كده يمكن مش موجودة في دول كتير ولكن موجودة في دولة زي أمريكا اللي هي الضرايب ، الضرايب على صناديق المتداولة بتبقى أقل من الضرايب على صناديق الإستثمار العادي
المعاملة الضريبية مش عايز أخش في تفاصيلها أوي ولكن الناس اللي بتمتلك صناديق المتداولة على البورصة بتبقى عندها محاسبة ضريبية أحسن لأنهم كانوا بيحفزوا إصدار الصناديق المتداولة مثلاً في فترة معينة وبيعتمد طريقة البيع والشرا بتاعه مش زي الصناديق العادية فبتاخد معاملة ضريبية فلو حضرتك في بلد معينة فيها ضرايب عالية على الإستثمار ممكن تكلم المستشار المالي بتاعك أو الراجل اللي بينصحك بالإستثمار وتقارن ما بين الصندوق العادي والمتداول وتشوف مين ضريبياً أنت هتستفيد أكتر لما هتبقى مستثمر فيه
في حاجه كمان الميزة او الفرق اللي بعد كده ان الصندوق المتداول على البورصة أنت تقدر تشتريه وتبيعه في أي وقت في اليوم ، يعني البورصة مثلاً بتفتح الساعة 9 الصبح وبتقفل الساعة 3 ففي الـ 6 ساعات دول في سعر متداول للصندوق ده كل ثانية في سعر جديد لأن الناس بتقدر تتداول عليه فلو الأسهم مثلاً اللي في الصندوق ده بتطلع خلال اليوم هتلاقي الصندوق بتاعك طلع ، لو نزلت هتلاقي السعر نزل فأنت عندك مختلف الأسعار يومياً أنت ممكن تشتري عليها ولكن صندوق الإستثمار العادي احنا بنلاقي أن أنت بتشتريه على سعر الإغلاق اليومي كل يوم يعني لو الصندوق متداول يومي البنك بيديك سعر واحد بتخش وتخرج عليه فكل المساهمين اللي هيخشوا النهاردة هيخشوا على سعر واحد وكل المساهمين اللي هيخرجوا هيخرجوا على سعر واحد فدي تعتبر ميزة تانية للصندوق المتداول إن أنت تقدر تشتريه في أي وقت في اليوم وأسعارة بتختلف وكمان بيشجع الناس اللي هما المضاربين إنهم يقدروا يخشوا ويخرجوا في ظرف ساعات أو أيام قليلة جداً دي حاجه مش موجودة في الصندوق العادي
برده من الحاجات اللي الصندوق المتداول على البورصة عملها إنه ازاي احنا قولنا هو قطع الوسيط اللي في النص اللي هي المصاريف بتاعة تسويق الصندوق والدعاية وانهم يشجعوا الناس فهو موجود على البورصة المصروف الوحيد اللي حضرتك بتدفعه هنا هو إيه عشان تخش وتخرج بتدفع عمولة السمسرة بتاعتك اللي انت متفق مع السمسار بتاعك تدفعها وتشتري الصندوق على طول
ولكن في النظام القديم بتاع صناديق الاستثمار العادية إيه اللي بيحصل البنك ساعات بيقولك والله وانت داخل هدفعك 1% ووانت خارج هدفعك 1% ماهو الوحيد اللي بيبعه يعني هو عنده سيطرة على الدخول والخروج أنت متقدرش تخش وتخرج إلا من خلال الراجل ده
ولكن في الصناديق المتداولة أنت ممكن تخش وتخرج على أي سمسار مرخص وفي بلاد فيها مئات من السماسرة ففي تنافس ما بين السمسارة دول فعرفوا ينزلوا عمولات اللي هو إقتصاديات الحجم كل ما الحجم بيكبر بتاع الصندوق بيقدروا يضغطوا المصاريف فهنا أنت عندك الحرية أنك تدخل وتخرج من خلال مئات من السماسرة من مختلف انحاء العالم كمان في بورصات عالمية ممكن تشتري من أي دولة في العالم نفس الصندوق بس تدفع العموله اللي متفق مع السمسار ولكن الناحية التانية أنت غصب عنك هتروح للراجل المصدر السمسار فدي ميزة تانية مهمه جداً جداً التكلفة بتاعتي وأنا بشتري ووأنا ببيع
في برده حاجه مهمه إن في صناديق معينة بتقولك أنت لازم تقعد 3 شهور، لازم تقعد شهرين قبل ما تبيع الوثيقة بتاعتك ولكن في الصندوق المتداول على البورصة مفيش الكلام ده خالص أنت حضرتك بتخش تشتري وتبيع وزي ما قولنا انت ممكن تبيعه بعد ساعة بعد دقيقة بعد سنة زي ما تحب فالميزة دي ميزة مهمه جداً جداً إن مفيش فترة معينة أنت محبوس فيها متقدرش تخرج من الصندوق بتاعك.. تاني الراجل زمان بتاع صندوق الاستثمار العادي كان عامل فترة الحبسه دي عشان يضمن إن الفلوس لو دخلتله على الأقل يقدر يعمل منها عمولات معينة
وخلي بالكم إن الصندوق المتداول ده كان الهدف في إنشاءه إنه يخلي الناس البسيطة اللي قاعدة في البيت يبقى عندها القدرة إنها تشتري صندوق من غير وسيط ده الهدف الأكبر الأسمى اللي أتعملت عليه الصناديق المتداولة
هنلاقي كمان إن صندوق الإستثمار المتداول على البورصة أول ما ابتدى كان صندوق مؤشرات يعني إيه صندوق مؤشرات يعني قالك أول صندوق هعمله مثلاً إني أتبع صندوق مؤشر بتاع (إس إن بي 500) مثلاً في أمريكا كمثال المؤشر ده بيمثل أكبر 500 شركة في السوق فعملوا أول صندوق وطرحوه على المؤشر ده فقط هو الراجل بيخش يشتري نفس النسب اللي عاملة (إس إن بي 500) وحطها في صندوق استثمار
ليه عمل كده؟ عشان يشجع الناس إنها تشتري المؤشر على طول مش محتاج مدير استثمار يجي يقولي والله انا هشتري مين وهبيع مين وهاخد مخاطرة فين مفيش الكلام ده أنا هشتري المؤشر نفسه لما المؤشر يطلع الصندوق هيطلع لما المؤشر ينزل الصندوق هينزل
وبعد فترة من الزمن لما الفكرة دي نجحت ودخلت الناس وخلت الناس اللي هي قاعدة في البيت تقدر تشتري صناديق جاهزة بسهولة وبعملات بسيطة ابتدوا ينوعوا أكتر فابتدت صناديق المؤشرات دي توسع نشاطها مش بس (إس إن بي 500) ابتدى يروح لمؤشرات أخرى وممكن يكون راح لمؤشرات قطاعات يعني مثلاً عمل صندوق استثمار بيشتري في الأسهم اللي ليها علاقة بشركات الأدوية، عمل مثلاً واحده لشركات البترول وهكذا ابتدت يحصل ثورة من صناديق المؤشرات نفسها إنها تبتدي تتابع قطاعات معينة مختلفة بمؤشرات معينة مكنتش متغطية قبل كده كنت أنت في البيت عشان تعمل صندوق بيشتري مثلاً مجموعة من المستشفيات مع بعض في صندوق استثمار ده شبه مستحيل لأن حضرتك عايز تشتري 500 شركة أو 200 شركة أو 100 شركة على حسب المؤشر ده شكله عامل ازاي فمصاريفك هتبقى عالية جداً لكن هو النهاردة جه وحطهولك كله في صندوق واحد وحطلك صندوق واحد على البورصة فأنت بضغطة تقدر تخش تشتري الصندوق ده فهو النهاردة يعتبر من الحاجات اللي سهلت على الناس الدخول والخروج وسهلت عليهم الحد الأدنى مفيش مصاريف بتدفعها كبيرة على صندوق المؤشرات كل اللي انت محتاج تعمله إنك تحدد أنا عايز أشتري أنهي قطاع ، أنهي مؤشر ، أنهي فكرة واحط فيها فلوسي وزي ما بقول ديماً إن انت مش لازم وأنت بتستثمر في الحاجات دي انك تحط فلوسك كلها مرة واحدة أنت ممكن تحط جزء في الأول وكل شهر أو كل 3 شهور بتحط جزء تاني وبراحه مع الوقت انت بتحاول تاخد الأداء بتاع القطاع ده أو المؤشر ده وعلى مدار الـ 5 / 10 سنين قيمة الصندوق هتعلى معاك لأن الشركات اللي جوه هي من أكبر الشركات عشان كده هي دخلت هذه المؤشرات
فدي الميزة اللي مش موجودة مثلاً عند الناس من 30 سنة يعني كان زمان عشان تخش تستثمر في البورصة فأنت محتاج تعرف الشركات وتعمل محفظة وتشتري وتبيع ولكن المؤشرات اللي أتعملت دي والصناديق اللي أتعملت عليها إنك تقدر تشتريها سهلت عليك الحياة جداً جداً إنك مش محتاج تبقى فاهم أو دارس أو عارف أنت بتشتري وتبيع إيه أنت ممكن تشتري محفظة منوعة من الفكرة اللي أنت قولت عليها أول يوم عايز تحط فيها فلوسك
وهنلاقي برده طلعت بعد كده صناديق إستثمار متداولة على البورصة الإصدار الإسلامي يعني لو حضرتك عايز تشتري مؤشر أمريكي من الشركات الإسلامية اللي هي وفق الشريعة الإسلامية تقدر تحط فلوسك في حاجه زي كده
ممكن تلاقي كمان حاجه اسمها (إي جي سي) نوع معين من الصناديق اللي بتهتم بالبيئة والمجتمع والحكومة فالشركات بيجمعها هنا حاجه معينة أنها شركات بتحاول تحافظ على البيئة بتحاول تحافظ على المجتمع بتحاول تحافظ على الحوكمة اللي موجودة جوه الشركات موجودة بشكل كويس فده نوع معين من الاستثمار هما حطوه في صناديق وحطهولك على البورصة قطاعات كتيرة مختلفة ممكن تبص فيها فالأختيارات لا نهائية كل اللي انت محتاج تعمله تاني تحدد أهدافك وتحط فلوسك في الصناديق دي بالطريقة اللي أنت شايفها هتحققلك الهدف الاستثماري بتاعك
هو عموماً الهدف من الحلقة دي إن انت لو في دولة وعندك الفرصة إنك تشتري صناديق الإستثمار المتداولة وبتقارن ما بينها وبين صندوق استثمار في البنك بتاعك والأتنين بيحققوا نفس الحاجه الأتنين بيحاولوا مثلاً يتابعوا المؤشر الرئيسي بتاع البورصة أنا ديماً بنصح إنك تاخد الصندوق المتداول لأن أحنا اتكلمنا على مزايا كتير جداً تقدر تستفيد منها وهي السهولة في الدخول والخروج والحد الأدني للاستثمار والحاجات اللي أتكلمنا عليها ببساطة
مش عايز أقولك إن صندوق الإستثمار العادي ملهوش لازمة في الحياة ولكن هو ممكن يكون بيتعمل أكتر في الوقت ده بتاعنا لناس معينة لشركات معينة وبيشتغل بطريقة معينة أنت كواحد قاعد في البيت بتحاول تستثمر أنت ممكن تتجنبه لو لقيت صناديق المتداولة المتوفرة البديلة
برده في حاجه صناديق المؤشرات دي عملتها فقط هي مش بس صناديق في الأسهم ولكن لقينا بعد كده إن أدوات الدخل الثابت ابتدي يتعملها صناديق متداولة بنفس الفكرة بدل ما الصندوق بيشتري أسهم في الحالة دي هو بيشتري سندات دي موجودة جوة الصندوق ممكن تكون مئات السندات ودي ميزة كبيرة جداً جداً لأنك في العادي أنت متقدرش تروح تشتري السندات دي لوحدك في صعوبة للوصول ليها نوع الحساب نفسه صعب وهكذا ولكن أنت من حساب السمسرة بتاعك ممكن تروح تشتري الصناديق المتداولة دي اللي فيها أدوات دخل ثابت
برده ده حققلي ميزة لذيذة إني لو عايز أعمل محفظة متنوعة نصها مثلاً أسهم ونصها أدوات دخل ثابت أنا ممكن أشتري صندوقين متداولين انا بحط مثلاً 1000 جنية أو دولار كل شهر هاخد 500 دولار هحطها في الصندوق رقم 1 اللي هو بيعمل الأسهم وصندوق رقم 2 اللي هو بيعمل أدوات الدخل الثابت وبكده أنا عملت بسرعة محفظة صغيرة فيها محفظة متوازنة ما بين الأتنين
بعد كده برده لقيناهم اصدروا صناديق على الدهب على السلع لقينا صندوق بيشتري دهب ، صندوق بيشتري بترول حاجات كتيرة جداً الصناديق دي برده هو راجل بيشتري بالنيابة عنك الدهب ، بيشتري بالنيابة عنك البترول أو أياً كان السلعة الموجودة جوه صندوق الاستثمار ده وأنت كل اللي بتعمله تاني أنك بتروح تشتري الوثيقة دي
فلو أخدنا نفس المثال إني عايز أعمل محفظة متنوعة ممكن أخد شوية أسهم ، شوية دخل ثابت وشوية دهب ولقينا مؤخراً ابتدي العملات المشفرة ينزلوا صناديق استثمار متداولة ولكن لسه برده ولكن لسه في مقاومة ان يبقى في منهم كتير ولكن مع الوقت هنلاقي العملات المشفرة برده من الحاجات الموجودة على البورصات المتداولة فأنت ممكن بالطريقة دي تكون محفظتك المتنوعة اللي احنا ديماً بنقعد نتكلم عليها اللي هو أنا عايز جزء منها كاش ، عايز أسهم ، عايز سلع وهكذا بالطريقة دي أنت ممكن تنقي 3 أو 4 صناديق متداولة وتحطهم في محفظتك وتتابعهم من خلال حساب السمسرة بتاعك
هي دي بمنتهى البساطة القصة بتاعة الصناديق المتداولة الموضوع مبتداش كده زمان هو ابتدى مع التطور التكنولوجي كان محتاج البورصات تتطور كان محتاج الأنظمة تكبر كان محتاج إن انت تعرف تنظم الموضوع بقوانين في كل دولة واحنا النهاردة القطاع ده من الحياة المالية هو قطاع كبير جداً جداً في الـ 10 / 15 سنة اللي فاتوا وأعتقد لسه هيبقى عنده نمو كبير السنين اللي جاية كمان لأن الناس الصغيرة بالذات اللي بتبتدي حياتها بتبقى مهتمه جداً بالسهولة في الدخول والخروج ، بعدم وجود احتكاك بالراجل اللي موجود في النص ، التطبيقات اللي موجودة في موبايلك ، السرعه إني عايز أخش بسرعة وأخرج بسرعة مش عايز ورق كتير ، مش عايز أملى حاجات زي صندوق الاستثمار القديم كنت محتاج تملى ورق كتير ومحتاج تقدم حاجات لكن الصناديق المتداولة سهل جداً تفتح أكونت وتخش تشتريه على طول مفيش مشكلة
أنا بحاول على قد ما أقدر أغطي الموضوع من وجهة نظري يعني أنا شايف إيه في صناديق الإستثمار المتداولة لو أنا فاتني حاجه أو لو أنت شايف وعندك تجربة في الموضوع ياريت تشاركونا على الصفحة بتاعتنا على السوشيال ميديا واشوفكوا إن شاء الله الإسبوع الجاي
Translation of some words and terms:
EFTs (Exchange-Traded Funds) الصناديق المتداولة في البورصة
Orders أوامر
Exchange البوورصة
Market سوق
Mutual funds
Size حجم
Minimums حد أدني
Marketing تسويق
Competition منافسة
Cost تكلفة
Lockups الإقفال
Version الإصدار
Shariah compliant متوافق مع أحكام الشريعة الإسلامية
Environment بيئة
Society مجتمع
Government حكومة
Flavor نكهة
Options خيارات
Fixed income دخل ثابت
Cryptocurrency عملة مشفرة
Resistance مقاومة
Systems الأنظمة
Sectors قطاع
Growth نمو
Friction احتكاك
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #صناديق_المتداولة_في_البورصة #إعادة