135.Trading Errors 404 - الجزء الثالث
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة برعاية ساكسو بنك - بنك استثماري أوروبي بيقدم منصة تداول للأفراد
عشان تعرف أكتر عن المنصة اسمع الحلقة 128 و 129
Home.Saxo :زوروا منصة ساكسو بنك من خلال الرابط
(Trading Errors 404) بنكمل النهاردة الجزء الثالث والأخير من لقائنا مع لارا أحمد سُليمان مدربة التداول ومؤسسة برنامج التدريب على أخطاء التداول
خبرة أكثر من 16 سنة في الشركات مرنت الآلاف من السماسرة و مديرين الحساب على التداول في الأسواق المالية
Lara A. Soliman @LinkedIn :تقدروا تتواصلوا مع لارا هنا
Trading Errors 404 @LinkedIn :اعرفوا اكتر عن البرنامج هنا
:في الجزء الثالث
هل في أدوات بتستخدميها نقدر نحطها ارقام نقدر نشوفها نترجم الكلام ده؟ -
الهدف الحقيقي القابل للتنفيذ هو المحرك الرئيسي للنجاح -
الاستثمار من المجالات القليلة اللي ممكن تنجح فيها بمجهود قليل ولكن ذكي -
بالمعلومات دي اضمنلك تعمل فلوس، لكن مقدرش اضمنلك البركة في رزقك -
البورصة قايمة على خلق الفرص وقت الأزمات -
اعترافك بالغلط بيخليك تلتزم قدام نفسك بعد كده -
وبكدا يكون لقائنا مع لارا خلص، 3 حلقات مهمين يارب يكونوا نالوا اعجابكم و استنونا الأسبوع الجاي إن شاء الله
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكوا في حلقة جديدة من بودكاست كلام ينور
النهارده ميعادنا مع الجزء الثالث والاخير من حلقتنا مع لارا احمد، الناس اللى مسمعتش الحلقتين اللي فاتوا ولسه بتسمعنا لاول مره النهارده انصحكم ترجعوا تسمعوا الحلقتين اللي فاتوا لان هي تكملة للحديث اللي اتكلمنا فيه مع لارا انا اتبسطت جدا وبكرر تاني اعجابي باللقاء وان شاء الله هتيجي معانا في المستقبل ممكن نبقى نركز على موضوعات معينة، حتت معينه سألتوني عليها فهسيبكم مع الحلقه ويا رب تستمتع بيها
عمر: احنا اتكلمنا في أفكار وزي استراتيجية بتاعه البرنامج بتاعك هل في أدوات بتستخدميها اكسل فايلز حاجات نقدر نحطها ارقام نقدر نشوفها نترجم الكلام ده؟
لارا: اه طبعا اه، مبدئيا الكورس تطور بشكل كبير
عمر: وهيتطور مع الوقت
لارا: في حاجات فى دماغى بس لسه مش عارفه تتعمل ازاي بس اه طبعا في اكسيل شيتس خليني احكي لك على التطور تطور هو معايا من البدايه للنهايه وفي النص كده بخليه يحط هدف مالي في المستقبل بنبقى عارفين محتاجين قد ايه من السوق
عمر: انا عايز مليار
لارا: ما هو ده بالظبط بقى اللي هو عايز مليار ومحفظته 200 الف تخيل طب ده هيعرف يوصل لهدفه، هتقدر تزود؟
عمر: لا انا مش عايز مليار، انا عايز 10 مليار
لارا: لا ماهو لازم برده نبقى عارفين ان الهدف حقيقي، هدف نقدر نحقق، لأن أنت لما بتشوف هدف هتقدر تحققه هتعرف تكرر النجاح غير لما تشوف ان الهدف ده بعيد قوي مش هقدر احققه ودي اهم حاجه على فكره دي اهم حاجه خالص بقى ده المحرك.. خليني اقول ليه الاول قبل ما اقول لك هم لما بيوصلوا فين يبدأوا يهملوا الحته الاولانيه اللي هي اهم حاجه
انت قبطان عندك باخرة هل الباخره دي من غيرك هتعرف تروح في حته
عمر: لا
لارا: خالص، ليه لانك محتاج تحط لها واجهه ممكن من غيرك ما تطلعش بره المينا
عمر: صح
لارا: لو انت دورتها وخليتها دايرة خليتها ماشيه كده بقوة دفع عادي لو هي مكان مقفول هتخبط في الصورة وهترجع ممكن ما تعرفش يعني ممكن بعد شوية كتير جدا ما تقدرش اصلا تعدي من البيت لان انت يبقى عندك هدف ده اهم عامل عشان نعرف نوصل له ازاي فالناس بتبقى جايه لي بمعلومات غلط من السوق اللي هو اهم حاجه يبقى عندي اشاره اهم حاجه اطلع اشاره ازاي ومش مهم اي حاجه يبقى تاني معلومه مهمه بالنسبه له ازاي المحافظ بتبوظ هستخدم قد ايه من الأرقام، حجم، بعد ما بيوصل المعلومتين دول بينسى الهدف فأنا بشيل مسؤولية الأهداف خلي بقى الكلام ده معايا علشان اضمن ان انت فعلا عامله فبقى في اجتماع معايا لان لقيت الناس مش عارفه تعمله الهدف مش كل الناس بتعرف تحقق الهدف تقول انا عايز الهدف ده وهي دي الطريقه اللي انا هعرف انجح بيها فلما بيوصل ازاي للمحافظ بتبوظ بيبتدي ينسى الهدف ايه ده خلاص انا اتعلمت ازاي المحافظ بتدوس فانا اصلا عمري ما هوصل 50% خسارة
عمر: عمر المحفظه مهتبوظ مني
لارا: صح بس انت لو مش حاطط هدف مفيش حاجه هتجري عليها
عمر: مش هتطلع لقدام اه مش هترجع لورا بس هنفضل واقفين في مكاننا
لارا: بالظبط هنفضل واقفين في مكاننا فلما لقيت ان يعني الفعل المشترك انهم بينسى الحته الاولانيه اللي هي الاهم، فشيلت انا مسؤوليتها وبقيت بعمل مع العميل اجتماعين في نص الكورس بس عشان خاطر ابقى عارفه ان الهدف بتاعه حقيقي ولا لا هو يقدر عليه ولا ما يقدرش عليه بنظبط الحته دي مع بعض وبعدين بنعمل قعده ثانيه للتوزيع في النهايه اوكي احنا عرفنا ايه اللي مش هيبوظ، الحجم اللي مش بيبوظ،عرفنا الحجم اللي انت تقدر عليه وبرده انا بمشيه بحجم هو يقدر يتمرن بيه بعدين بنتكلم في حجم أكبر لما هو بيبقى متمرن كفايه ما هو الاستراتيجيه اللي انا بقول لك اشتغلت بيه من 2013 فعلا تاريخيا عامله ثلاث مرات مرتين أو ثلاثة في أي سنة من السنين من 2013 لحد دلوقتى فبمرونة بحجم هو يقدر عليه
وبعد كده بقى بسيبه هو يرقي نفسه لما يشوف ان هو بقى قادر ينفذ الاستراتيجية من غير تحفظ، من غير تفكير، من غير وجع نفسي لان الوجع ممكن يخليك متعرفش تنفذ، بمجرد ما بيوصل لكده مبيبقاش عنده مشكلة، هو بيقدر بعد كده يرقي نفسه بيبقى عارف اوكي لا انا مهما رقيت نفسي انا ما اقدرش على الدرجه دي من المخاطرة فبلاش فهي برضه انا مين في كل ده لان مفيش استنبه واحدة لكل الناس
عمر: مفيش اي حاجه
لارا: خالص، يعني أنا شايفة برضه حاجه عالمية بقى، لو ما تقدرش استحمل ولا حتى 10% خساره ما تدخلش البورصه لان عادي انها تحصل لا في خساره انت تقدر ترجع منها لوحدك من غير اي مساعده من غير ما ترجع لخبير يعني فانت لو بتتجنب الخسارة اوي يعني لدرجة انك متقدرش تخسر%10
يبقى بص أبعد خالص بقى حط فلوسك بقى في صندوق معرفش تعملها ازاي بس لازم يدي نفسه براح انه يخسر، وتعالى نتكلم في الخسارة.. امتى تخاف وامتى متخافش برضه لازم يبقى عندك الرؤية بتاعة انا لو خسرت %15
يعني في واحد محدد جالي بيتكلم انا جامد جداً وانا الخسارة متفرقليش ومتهمنيش وبصي انا معاكي 40% خسارة تعالى اسمع صوته عمل حاجات يعني برضه خليني برضه ارجع حته هو معندهوش من امكانيات عشان يعرف يفلتر كلامي أنا يعني أنا وسط الناس اللي هي عندنا خبرات هو مش هيعرف ينقي من كلامي فأنا بمشيه على طريقة بحيث انه ميقدرش يعني بالنظام لحد ما يخلص الكورس مينفعش مثلاً يكون واصل انه عامل 30 عملية تداول ده كتير اوي استحالة في فترة البرنامج يعني فهو كان عامل أكتر من كده بكتير مش سامع كلامي وجه في النص يقولي أصل طريقتك وطريقتي يعني هو ممشيش على اللي أنا بقوله وخسر 16% ففي النص بقى لأ تعالى انت عملت إيه طبعاً اخد عمليات تداول كتير مش تبعي انا خالص، هو بقى بيختار بقى بمزاجة بقى هو فاكر يقدر يختار ما بين كلامي ايه اللي ينفع وايه اللي مينفعش وده برضه تحيز مهم انه شايف نفسه أذكى عشان هو بيفهم ارقام انت عندك من ده كتير قوي بقى اللي هو انا باخد مكالمات انت ازاي واحده ست وفاهمه في البورصه
عمر: اصلا
لارا: ده بقى ما بنكملش المكالمة اصلا، طب هو بنفس الفكر ازاي انت راجل ومش فاهم يعني لو هنتكلم كده
عمر: وثاني انا باكد تانى اللى بيسمعونا واللي موجودين بجد حتى الرسايل الأذكى بتيجي من البنات من الستات انا عامل حلقة كاملة بالأرقام اصلا مديري الصناديق الستات احسن من الرجاله مش كلامي انا
لارا: اه طبعا انا براهن اصلا ان هم أكثر انضباط ده حقيقي، انا اشتغلت مع واحده ست سنين اتعلم كل حاجه منها تقريبا الانضباط انا قولتلك انا ضعيفه فيه انا اخدته من غادة القاضي
عمر: اه، مديري الصناديق، صغار المستثمرين في بحث طلع من شركة فيها ملايين من العملاء فيديليتي او شواب او حد كده كان بيعمل تحليل برضه ما بين رجال والستات بأكد على كلامك أنا مقتنع انكم عندكم صَرَامَة عني مثلاً يعني
لارا: بس مفيش أفضلية صدقني هو برضه الستات بتخاف من الأرقام، الرجالة مبتخافش من الأرقام فهي لو فهمت ان دي حاجه متخوفش، ودي حاجه نفسيه على فكرة يعني انا ليا صحاب كتير بنات تقولك انا لما يجي الرقم، يعني النتائج بتاعتهم ممكن تبقى أحسن بكتير بس في حاجز نفسي لازم يتكسر الأول
عمر: بالظبط
لارا: نرجع تاني للحته بتاعته انه اختار يسمع ايه من كلامي وميسمعش ايه من كلامي فهو وصل المحفظة لـ 16% خسارة مبدأياً لحد 20% خسارة انت تقدر ترجعه لوحدك بس قولتله لأ خلاص أنا هحط أيدي بقى في القصة وهنرجع تاني المهم رجعنا الخسارة لكن الفكرة كلها هنا انت معندكش الفلتر اللي يفلتر ايه الصح وايه الغلط في متزودش من عندك، يعني احنا جيبينلك أفضل الممارسات
عمر: خد النظام زي ما هو
لارا: آه احنا جيبينلك أفضل الممارسات فأمشي عليه ولما يبقى مينفذش تعالى راجع علينا لكن أفضل الممارسات موجود فالرجالة برضه فيها الحته دي أوي عشان عارف يحسب ارقام لواحدة من غير حاسبة أو نموذج فيقولك أنا عارف او فاهم اكتر منك وهو في حاجات مسقطها مش حاجه واحده
عمر: الاستثمار هرجع اقولها تاني وقولتها في حلقات كتير قبل كده، الاستثمار مش هتقعد قد إيه وقت في الجيم او في المذاكرة هتخليك مستثمر احسن ده من المجالات القليلة اللي ممكن تنجح فيها بمجهود قليل ولكن ذكي في مجالات معينة مينفعش انا لو طيار لازم اطير عشان اكون الخبرة لازم مينفعش لو انا دكتور هعمل عمليات مينفعش ابقى ناجح لازم اعمل عدد ساعات، الاستثمار ميزته وبنشوف نماذج صغيرة جداً عملاء ومستثمرين كبار بداياتهم كانت بسيطة جداً، عائق الدخول للاستثمار واطية جداً اي حد ممكن يستثمر الصبح في واحد عنده سيطرة على شخصيته او عارف هو عايز يعني ايه او دخل في برنامج زيك، او سمع لمحترفين مقتنع وعرف ينقي ارائهم المظبوطة اياً كانت الطريقة اللي هتنجح فيها بس ممكن تتعمل بجد من غير عدد ساعات الطيران اللي الطيار بيعملها انا مقتنع بكدا
لارا: خليني أأكد على كلامك باللي عنده ثروات عالية مصانع او 3 / 4 شركات ليه بيفضل في وقت معين انه يبقى موجود في البورصة لان شلغه الطبيعي في المصنع محتاج يدفع للعمال، محتاج تشغيل، محتاج نقل محتاج حاجات كتير جداً يصرف عليها عشان يعمل العائد وممكن العائد ميحصلش في نفس السنة على عكس البورصة بتكة موس فهو انت هتلاقي اللي عنده بالشركتين او بالمصنعين تلاتة حاطط فلوس وفلوس مش قليلة قد صندوق ليه؟ لانه عارف يعمل بيها العائد التراكمي اللي يقدر عليه اكتر من المصانع بتاعته الحقيقة اللي قاعده على الأرض هنا التكلفة عاملة ازاي وهنا عاملة ازاي فهو اكيد بالنسبالة البورصة ارخص كمان عشان يحقق نفس العائد لأن انا كنت بسأل السؤال ده ايه اللي يخلي حد مثلاً عدة ملايين يدخل البورصة لان نفس الملايين دي في العملية الطبيعة هتكلفة عشان تطلع عائد وممكن ميطلعش في سنة واحدة يطلع في كذا سنة على عكس البورصة ممكن تطلع في سنة واحدة فده بيفسر ليه الناس الكبيرة اوي موجودة في البورصة انت بتقول اه الصغير خالص يقدر يطلع والكبير خالص اوي بقى اللي حاطط قد صندوق بحالة فهو ده كمان موجود لأنه عارف ان بخطوات بسيطة مش محتاجه تكة موس يقدر يعمل ويعمل كتير لكن الفكرة انا قد إيه اقدر من خسارة في النص مخافش واترعب هي دي القصة كلها
عمر: مع ان الراجل كان داخل ومقتنع انه ممكن يخسر 40% بس من أول 15% ابتديتي تشوفي حاجات
لارا: تعالى اسمع صوته، بانيك وهو 16%، بانيك هستيري وابتدى بقى يخوني طب ما انت تعالى بقى انت عملت ايه انت عملت اكتر من 45 عملية تداول طب عملتهم ازاي وريني الإشارة مفيش ميوصلهوش بقولك لو عمل 25 عملية تداول يبقى حلو جداً يبقى لقى فرص اساسا كتير، فلأ هو كان عامل غلطات بس بمزاجه هو شايف ان طريقتي وطريقتك
عمر: وبرضه مش عايزين ننسى عامل الرزق انه مش بأيدينا ومش عايز ننسى عامل في ناس بيسموه حظ انك موجود في المكان الصح في الوقت الصح
لارا: في ناس عايزة ضمان للمخاطرة، طب خليني اقولك حاجه بقى يا عمر لأن الحتة دي انا بحبها جداً هل انا ضمنالك ان بالمعلومات دي تنجح 100%
تعمل فلوس 100%، هل أنا ضمنالك البركة في رزقك اللي هيجي؟ لأ في سنة من السنين عملت رقم عمره ما كان هدف بالنسبالي السنة اللي بعدها اتصرف بالكامل على علاج حد من العيلة عندي احكيلي بقى عن الضمان، عملنا فلوس اه اتصرفوا راحوا كده بالكامل فأنت متقدرش تقول زي ما بيقولوا مثلاً للمستثمرين مانت لو عارف الكلام ده كنت عملت بيه طب برضه تكلفة المعيشة بتاعتك عامل ازاي وبتاعي عامل ازاي؟ البركة في الرزق انت تقدر تضمنله يكسب بس تقدر تضمنله ربنا هيباركله في رزقه ده ازاي استحاله ممكن يروحوا في شهر
عمر: ممكن يكونوا جايين عشان يحموه في الشهر ده يعني ممكن يكون هدف الفلوس اللي انت عملتها وانت مش متخيل هو ربنا بعتهالك لسبب انت هتشوفه كمان شهر او شهرين سنة او سنتين او ممكن تشوفه بعد 20 و30 سنة انت ممكن تشوف ان الفلوس دي جت عشان محتاج عملية لا قدر الله محتاج حاجة معينة فهي جايه للسبب ده بس هي بعيد عننا
لارا: انا كتير جداً بيقولوا طب لارا اصل انتي لو كنتي عارفه الكلام ده كنتي عملتيه لنفسك.. يا نهار ابيض بص بقى اولاً بقى امتى نورت في سنة كام، إسقاط لخلفي يشوفوا بقى انت مولود عارف الكلام ده محصلتش احنا اتعلمنا وغلطنا انا خسرت محفظتي مرتين بجرب في حاجات موجودة في الكتب خسارة بالكامل وابني نفسك تاني من الأول وابني نفسك تاني انا كنت موظفة في شركة امتى بقى سيبت الشركات لسه 2020 لكن لحد 2020 موظفة يا حبيبي زيي زيك فمتقوليش مانتي عارفه الكلام مانا عارفه الكلام بس مكنش عندي جرأه يعني مثلاً الاستراتيجي اللي بعلمها للناس دي اتعملت 2013 عندي بيها تتبع شوية سنين مقدرش اطلعه لأني مش متفقة مع الشركة دي، وشوية سنين بتاعة الشركة التانية متفقة معاهم ومعنديش مشكلة قالولي مفيش مشكلة طلعيهم، واخر شركة كنت طلعاهم عام، ودي حاجه من الحاجات انا كنت ببني رقم قياسي كنت فهماها غلط برضه اني محتاجه ابني رقم قياسي عشان اللي ميعرفنيش يصدقني طب ما اللي مش هيصدقني عمره ما هيصدقني مهما تعبت عشان صح ولا غلط؟ فكفاية 10 سنين انا برضه غيرت اسلوبي اني لو كنت بعرض نتائج الاستراتيجية يومياً عن طريق شركات من جوه الشركة عشان خاطر اقول بصوا يا جماعة البورصة كانت مراقبة علينا وهيئة سوق المال عشان تصدقوا ان الكلام ده بيحصل فدي كانت مهمه جداً في بداية البرنامج بعد كده خلاص مش مضطرة اتكلم بالنتائج بتاعتي انا لأول مره من 10 سنين بتكلم بنتائج العملاء
هل مثلاً انا بتكلم انك تقدر تعمل، هل كل الناس اللي داخله هتعمل زي بعض لأ لأننا مش نفس النظام خالص مش توزيع واحد مش نسب واحدة في واحد جبان وواحد جرئ
عمر: مش معلبات
لارا: اه بالظبط في نفس الشهور في ناس عملت أكتر مني أنا بديك معلومة تقدر تعمل بيها اكتر مني في شهور معينة في اوقات انا هعمل اكتر منك على حسب كل واحد بيوظف الفلوس ازاي على حسب تأثير ودي حاجه بتكلم فيها على استحياء نظراً للاحداث اللي حاصلة دلوقتي في غزة، ان انت مستقل من الحروب والأوبئة انا اكتر حاجه عملتها في حياتي كان في الوباء 2020، ساعتها الناس كانت بتموت في المستشفيات وانا كنت ناجحة نجاح عالمي انا عملت اكترمن مايكل بيري طبعاً انا مصدقتش ومكنتش اقدر اشارك النجاح ده لأن الناس بتموت انتي كده معندكيش دم
طيب لما حصل دلوقتي حرب انت ممكن في حاجات مدام انت حددت القرار انت تقدر تاخد قرارات مع نفسك مش ضد نفسك، في حد ممكن يقولك لأ بعد الحرب خالص بقى، بعد ما نشوف القصة دي تخلص هبقى ادخل وهو مش عارف ان مع كل كارثة أو مصيبة أو كل حاجه مهمه جداً ممكن تحصل تغير مفاهيم اللعبة انت كمان في فرصة بتتخلق معاها انت بقى حاطط فلوسك في اتجاه الفرصة ولا قاعد بره مستني؟ لأن البورصة قايمة على المصايب بتاعتنا
عمر: بتخلق، ممكن يجي مستثمرين يخافوا وينزلوا اسعار الاسهم وتبقى فرصة شراء في وقت مش احسن وقت
لارا: يعني في مستثمر كده انا مسمياه الباشا، عارف لما البورصه تبقى واقعة بال 20% انت ما بتسمعش صوته غير في الوقت ده باشا اشتري لي 20 الف 200 سهم على النازل، فده باشا ده بيستنى السوق لما يقع وقع جامده جدا وبعدين نشتري هل الاستراتيجيه دي على المدى الطويل احسن حاجه ما هي دي على فكره ناس كتير جدا بتقول لك دي الإستراتيجية احسن حاجه فانت احسن حاجه لا هو محتاج يعرف حاجات تانيه كتير هبيع امتى على كام هتشغلها بقد ايه من المحفظتي ازاي فهتلاقي ان في حاجات كتير هو مش مقفلها لكن هو جايب صح دي حته
عمر: جزء من الصوره مش الصورة بالكامل
لار: بالظبط
عمر: لأن دايماً يقولك اشتري لما يبقى في دم في الشارع فتنزل تشتري ده احسن اسعار بس هو فعلا انت لازم انت بعد مشتريه قد ايه وحجم وهقعد فيه قد ايه وهخرج امتى والكلام ده كله زي ما انت قلتيه ممكن سهم يطلع 10 أضعاف
لارا: أو هتعطلني امتى اشتريته ما اتحركش هسمح له يعطلني قد ايه
عمر: لازم المنظومة تبقى متكاملة ومتكرره يعني اقدر اعملها الفين خمستلاف مره لو عملتها مره متبقاش فرصة
لارا: ومن غير ما يخاف، افرض عدى بخسارة زي ابو 16% ده كان هيعيط مع انه تكلمه انا معاكي لحد 40% خسارة
عمر: المهم انه ميسمعش الحلقة بس
لارا: حتى لو سمعها، مانت خلاص بقى بتديله درس
عمر: جبنا سيرته كذا مرة خلال الحلقة
لارا: لأ ما هو احنا لازم نتعلم دي غلطة، غلطات لازم احنا مبنتعلمش غير من الغلطات ودي حاجه برضه في تعليم المدرسة أنت في المدرسة بنعقد الدنيا لما بتغلط وبنعاقب لما بتغلط لكن في الحياة احنا مبنتعلمش غير من الغلطات
عمر: مظبوط
لارا: إنت لازم تتعلم من الغلطات، بس هل عندك 10 سنين تغلط فيهم؟ بنعقد الدنيا لما تغلط وبنعاقب لما تغلط بس في الحياه احنا ما بنتعلمش غير من الغلطات
عمر: لا انا اتعلمت كمان ان هو لما بترفع ايدك وتقول بجد انا غلطان انت بتحط لنفسك حتى لو بتقول انا غلطان في العلن كمان يعني مش لازم ما بينك وبين نفسك بس سواء بتقولها بينك وبين صحابك او في العالم انت بجد بتحط لنفسك ليفل جديد من ان انت هتبقى قدام نفسك مش مش هتحاول بجد تغلط الغلطه دي
لارا: انت لازم تتعلم من الغلطات يعني ما فيهاش ما تغلطش بس هل عندك 10 سنين تغلط فيهم
عمر: مظبوط
لارا: يعني حتى لو ما عرفتش والموضوع محتاج منك مجهود خامس مره سادس مره بس تبقى حاططها في حجمها صح يعني هتبقى حاططها في حجم مظبوط ما تبقاش بكل فلوسك لان كل فلوسك دي اكيد يعني خلاص كده احنا داخلين نخسر الحساب مش جزء من الحساب
عمر: احنا هنحط في الشو نوتس بتاعه الحلقه دي الناس تقدر تتواصل معاكي ازاي يا رب لو حد هيتكلم من ناحيتنا يبقى مشرف كمعلومات نحس ان احنا عملنا الجزء بتاعنا في تثقيف و تنمية الوعي المالي
احنا ممكن نقعد نتكلم 20 ساعه عادي ونسجل لان الحلقه جميله جدا بجد والله وحقيقيه يعني انا عشان اعرفك من زمان كمان عارف قد ايه انت بتعملي الحاجات دي بحب وتحمس وشايف البرنامج بتاعك ده هيكبر في طريقته وفي الرساله اللي هو عايز يوصل الكلام مش هيخلص
لارا: عايزه اقول حاجه كمان الناس بتشك في انت ليه بتساعد ما هو عارف لما انت بتبقى عارف ان رزقي ورزقك لا يتعارضوا خالص فايه المشكله لما كلنا نعرف ما هو انت بتساعد ناس مش عارفه، يعني ايه انا لو جيت قلت لك انا عايزه ابني بيت ما انا هروح للمهندس عشان يبني لي بيت طيب لو عايز بيت شكله حلو انا هعين مهندس وهعين حد بتاع ديكور هل هيعلموني ازاي اعمله بنفسي في فعلا ممكن بتاعه ديكور يدي لك رقم كبير جدا ويقول لك اعمل ده بنفسك هل حد يقدر ان هو يجي يقول لي طيب لارا خدي فلوسي ديريها لي ما هو انا ليا رقم ممكن ما تقدرش تستحمله وفي رقم معين انا ما اقدرش اخد اقل منه يعني فاهم ممكن ابقى غاليه جدا عليك وممكن يبقى الرقم بتاعك صغير قوي على اني انا اضيع وقتي معاه
عمر: مظبوط
لارا: فما تعمل انت لنفسك خد اهي المعلومات فيد نفسك بنفسك ودي حاجه برده من الحاجات اللي انت في واحد ممكن اول ما يبقى معايا 50 الف جنيه يحط رجل على رجل ويقول لك انا عايز حد يديرها لي انا خلاص كبرت وبقيت مستثمر، يعني برده في محترفين معندهاش الوقت للـ50 الف والـ100000
عمر: زي الراجل اللي مرني في الجيم يعني لو بصينا مثلا للراجل بتاع الجيم ده انا ممكن ابقى واحد عمري ما اتمرنت في حياتي وعايز حد يمرني ممكن اكون راجل بيجهز نفسه للاولمبياد محتاج حد محترف يمرني ممكن ابقى نجم كوره او نجم باسكت او نجم كبير جدا وعندي راجل بيمرني يعني مش معنى ان انا كبرت في الحاجه ان انا مش محتاج استشير او اخذ راي اخر او مش محتاج مرايه بنلاقي لعيبه كبيره عشان بتابع مثلا باسكت كثير جدا فبلاقي فيه لعيبه بتصرف ملايين سنويا على جسمها عشان بس تاكل
لارا: بالظبط
عمر: فمش معنى ان انا صرفت ده ان الراجل نفسه اللي بيمرني ما يعرفش يعمل اللي هو بيعمله ده لنفسه لا هو ممكن يكون عامله لنفسه
لارا: وممكن يكون عامل اكثر منه بس انت ما تعرفش او عامل اقل منه انت برده ما تعرفش
عمر: بالظبط هو عنده فائض من وقته ان هو يساعد بالمعلومه دي سواء ان هو يعمل منها كرير او لا
لارا: وهو برده انا مثلا هقدر ادير كام صندوق في وقتي على حسب ما انا اعمل له بروجرام للافراد اقدر اساعد بيه كم فرد يعني هنا وقتي محدود هنا لا هنا في عدد محدد
عمر هنا تقدري تساعدي اكتر مظبوط
لارا: تقدر تساعد اكتر كان نفسي لما لقيت الاستراتيجيه تنفع قوي كان نفسي انها يتبناها حد زي شركات تامين كبيره في رجليا جابتني بالصدفه هناك يعني ما كنتش عامله حسابي بس لقيت نفسي في اجتماع مع اكبر شركه تامين في مصر وعايزين ناخد منهم صفقه وبنتكلم في رقم كبير فلما لقيت الكوادر ومش بس الكوادر البيروقراطيه في التعامل في الشغل استحاله وده كان يمكن اكثر يوم في الكارير بتاعي الكلام ده كان صيف 2019 ده كان اكثر نقطه احباط لما انا قابلتهم انا راجعه من الاجتماع ده مش شايفه قدامي لان كل اللي فات كان علشان يبيع للناس دي فلما الناس دي تبقى بيروقراطيه الى هذا الحد مش هتتعمل على مستوى الدوله مع انها كان ممكن بس مش هتتعمل لان احنا مش زي بعض
عمر: وعلى فكره هو ممكن ما تكونش اتعملت في صيف 2019 ممكن تتعمل في صيف 2029 ممكن 2039
لارا: اه بالظبط
عمر: يعني هو دايما اللي ممكن يبقى عنده رؤيه معينه او فكره معينه يعني انا متخيل الفور زيرو 1 كي اللي هم نظام التقاعد الامريكاني ده ممكن يكون كان عندهم محاولات من الفشل قبل كده بكثير
لارا: طبعا، بس انت لو تفكر في مصر ما فيش خالص
عمر: صح بس مع الوقت ده هيحصل
لارا: انت عندنا هنا سن التقاعد كام وهي دي كل حاجه هي دي كل حاجه ان انت عندك حد ممكن يبقى اكثر من 65 سنه وبيضطر ينزل يشتغل حتى لو صاحب شركه
عمر: مظبوط، ثاني انا كل اللي بقوله ان انا مش بلغي احتماليه حدوثها في المستقبل لو هي ما حصلتش النهارده مش معناها ان هي مش هتحصل في المستقبل يمكن فيه محفزات معينه زي مثلا انظمه معينه زي التامين الصحي زي الحاجات دي الدول ما بتتولدش فيها الدول بتطلع في اولوياتها الوقت ده فبيحصل لو النهارده الحكومه او البلد او الدوله اللي انت عايش فيها مش بتعمل لك ممكن انا عايش في دوله ما فيهاش نظام تقاعدي عادي واحد عايش في دوله متقدمه والمعاملات المصرفيه العالميه بتاعتهم كبير ما عندهمش نظام تاميني كويس ان هو يعمل لك التقاعد فمش معنى ان الدوله نفسها مش عندها ان انت مش لوحدك
لارا: انت اعمل لنفسك وفيد نفسك ومش سبوبه ومش اشوف فلوسي واخرج في افكار ما ينفعش وهو ده تاني هدف البودكاست ان احنا بنشفت الفوكس بتاع الناس من السنه دي والسنه اللي جايه لان انت تحاول تشوف نفسك وانت عندك 60 سنه وانت طالع واعتقد ان في اهتمام دلوقتي عشان الناس برده ما كانتش واخده بالها
عمر: ما عندهاش الوصول للمعلومات اللي كانت موجوده النهارده كميه المعلومات الموجوده النهارده
لارا: صح بس برده هرجع واقول لك ما كانوش واخدين بالهم من القيمه الوقتيه بتاعه الفلوس انت لما حصل تعويم تعويم تعويم الناس اتخضت فكله بقى متجه اه ده ايه ده الاستثمار
عمر: وفي حاجه كمان يا لارا المنطقه العربيه من اكثر المناطق اللي في العالم اللي الشعب فيها صغير
لارا: ده حقيقي
عمر: الديموجرافيكس بتاعتنا احنا لسه كلنا نوعا ما صغيرين مقارنه بالعالم احنا كمنطقه صغيرين
لارا: ده حقيقي
عمر: الموضوع ده هيتغير اولوياتنا في التقاعد هتبتدي تبان على جيل قريب
لارا: هقول لك برده معلومه جالنا دراسه من بنك كبير في دبي ان اكثر تعاملات حصلت صدق او لا تصدق من سن 15 سنه ل 21 سنه وكانت برقم اضعاف اللي حصل من الناس الاكبر سنا اضعاف فطبعا الرقم وقف البنك
عمر لا الجيل الجديد احسن من جيلنا
لارا وعندهم اجتهاد اكتر
عمر: ايوه عندهم اجتهاد اكتر وبيسمعونا اكتر ورسائلهم احلى
لارا: وعلى فكره اسهل انك تحركهم عن ما تحرك الكبير يعني اللي عنده 30 سنه مش سهل الحركه اللي عنده 40 سنه اصعب شويه اللي عنده 50 سنه صعب جدا ان هو يتحرك
عمر: مظبوط
لارا: بس الصغيرين على طول هتقول له داخل يعمل كده هتلاقيه واخد اكشن معاك لكن 30 هتلاقيه قاعد بيفكر اذا كان ده احسن قرار حبيبي انت اصلا جاي متاخر انت على الاقل يجري ورايا اصلا انا هاخدك ونطلع نجري احنا مش هنقف نفكر اذا كان ده احسن قرار ولا مش احسن قرار
عمر: 100% ودايما انا متفائل ان الاجيال اللي اصغر احسن دايما دايما
لارا: ده حقيقي
عمر: اللي عندهم فرص اكتر اتعلموا تعليم احسن مننا عندهم وصول على الانترنت النهارده اي حد عايز يبقى خبير هيفتح اليوتيوب او هيفتح اي حاجه عايز تكون محفظتك عايز تتعلم لوحدك عايز تسمع خبير
لارا: واسهل انك تقول لهم انك محتاج تبص على الكمبيوتر كل يوم
عمر: اه واسهل اكلمك النهارده احنا بنتكلم بمنتهى السهوله زمان كان صعب جدا
لارا: لاي حد في العالم في اي وقت
عمر: رسالتين تلاته
لارا: مش لازم نكون فاضيين في نفس الوقت
عمر: مش لازم نكون فاضيين فالقوه الموجوده النهارده ما اعتقدش اننا شوفناها قبل كده في الدنيا يعني او في التاريخ الحديث يعني في موضوع نقل العلم ونقل الكلام ده وهو مساله وقت يعني انا بشوف نفسنا كانظمه اقتصاديه يمكن في السبعينات او الثمانينات بتاعه امريكا بس مع الوقت الوقت هيجري اسرع بكثير هنا عندنا بسبب التطور التكنولوجي وهنوصل لحاجات النهارده في ناس ممكن تطرح شركتها بسهوله بقى في بورصات بقى في تمويل بقى فيه حاجات كثيره قوي ما كانتش موجوده من 10 سنين
لارا: خليني اقول لك حاجه برده القدره بتاعه ان انت تطور ذاتك ده برده مش عند اي حد يعني مثلا انا بنبهر جدا بتوماس درسي ورالف اكمبره هم خلاص ناس بعد التقاعد تبع شركته وده خلاص بطل يشتغل وتلاقيهم قاعدين مواكبين العملات المشفره بيحصل فيها ايه وايه اللي ينفع للاستراتيجيات وايه اللي ما ينفعش فلما تلاقي ان الناس دي اللي هم خلاص اكبر من جدي وجدك يعني في السن ده ولسه بيطوروا نفسهم ولسه بيطوروا الحاجات اللي هم عملوها ده يقول لك ان ما فيش سقف للتطور انت هتقعد كل شويه تتطور على اللي انت بتعمله لا الدنيا مش هتقف مش هتجيب سقفها اللي بيشتغل النهارده ما بيشتغلش زمان
السوق دلوقتي اسرع بكثير بسبب نقل المعلومات فاللي كان بينفع زمان كاستراتيجيه مش نافعه دلوقتي مع السوق بالسرعه دي يعني هم فضلوا ناجحين لحد ما بطلوا ينجحوا انت محتاج تعرف امتى بطل انجح هغير ده ازاي
عمر: هغير النظام بتاعي عشان كده بقولك الاهداف متغيره الانظمه متغيره انا ممكن اخلق عمل روبوت معين او سيستم معين يشتغل فتره معينه من الزمن وبعدين يموت لو انا مش فاهم المعلومه دي يبقى انا عندي مشكله في الفهم نفسه
لارا: لو انا مش عارف مش عارفه انا محتاجه اوصل لايه لو انا ما عنديش قيمه ممكن اخسر الفلوس كلها في يومين حاجات كثير
عمر: حاجات كتير جدا وعمرها ما هتخلص وده اللي بيخلي المجال جميل وده اللي بيخلي المجال اللي احنا غالبا بنشتغل فيه اللي هو لا ينتهي في التغيير
لارا: في بس حاجه الناس بتفتكر ان احنا على طول قاعدين بنشتغل وده مش صح احنا مش على طول قاعدين بنشتغل الناس بتفتكر ان احنا يعني الافلام يعني برده نظرا للافلام اللي بتحصل اللي هو انت بتلاقيهم مشغولين لا ممكن اصلا عشان تسلي نفسك تضطر تشغل فيلم
عمر: اه في كل الحاجات اللي مفهومه غلط لما تشيلها من دماغك فتبتدي تتصرف بطريقه طبيعيه
لارا: بالظبط هو مش محتاج تفرغ مش محتاج يعني انا باكد بس على كلامك
عمر: ميرسي جدا جدا يا لارا
لارا: ميرسي جدا يا عمر انا حقيقي استمتعت بالكلام معاك
عمر: بس انا هقول لك حاجه يعني اعتقد محتاجه تيجي معايا مره او اثنين وثلاثه وعشره و15
لارا: معنديش مانع خالص يلا بينا
عمر: لان هي جلسه جميله من العلاج النفسي للمتداولين
لارا: الفكره انهم فاكريني دكتوره بجد وانا بحل مشاكل نفسيه بس فعلا فاكريني دكتوره في فعلا بيتعاملوا معايا على هذا الاساس
عمر: في ناس من صحابك بتعتبرهم دكاتره لان انت بتستريح لما تتكلم معاهم فانت بتعملي نفس اللي بتعمليه بس في حاجه صعبه او خطره زي الاستثمار
لارا: ازاي تخليها مش خطر بقى ازاي تخليها امان ده اللي انا بعمله ان انت فاكر انها كلها مخاطر وهتدخل تحط رجلك في الطين والثانيه هتحطها في النار وواحده ثانيه هتحطها في وهتدوس على زلط وعلى قزاز
عمر: هي مش كده
لارا: لا هي مش كده مش كده خالص
عمر: انا مقتنع انها مش كده خالص
لارا: هي مش كده تماما انت لو شايف الارقام خلاص ايه اللي هيمنعك ان انت تنفس حالا مفاهيم كثير غلط محتاجين نصلحها
عمر: هتيجي معايا تاني ان شاء الله لو وقتك يسمح ربنا يوفقك في اللي انت بتعمليه وشكرا على وقتك
لارا: ميرسي شكرا يا عمر
عمر: شكرا على وقتكم معانا ونشوفكم ان شاء الله الاسبوع الجاي
Translation of some words and terms:
Realistic حقيقي
Drive المحرك
Neglect أهمل
Destination وجهة
Harbour ميناء
Momentum القوة الدافعة
Ownership Of Goals ملكية الأهداف
Common Practice ممارسة شائعة
Allocation توزيع
Historically تاريخيا
Graduation الترقية
Reservation تحفظ
Global عالمية
Risk Averse تجنب المخاطر
Panic ذُعر/ رُعب
Specific محدد
Experiences خبرات
Trades عمليات التداول
Biase تحيز
Fund Managers مديري الصناديق
Discipline الانضباط
Retail Investors صغار المستثمرين
Edge صَرَامَة
Best Practices أفضل الممارسات
Barrier To Entry عائق للدخول
High Net Worth الثروات العالية
Operation تشغيل
Multi Millions عدة ملايين
Cost Of Living تكلفة المعيشة
Backward Projection الإسقاط الخلفي
Track Record رقم قياسي
Capacity قدرة
time excess فائض الوقت
top down approach نهج من أعلى إلى أسفل
Trigger محفز
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست بالعربي #TE404 #الجزء_الثالث