93. وهم السيطرة
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
موضوعنا النهاردة ممكن تكون قرأت عنه في كتب علم النفس ولكن احنا النهارده بنتكلم عليه من منظور عملي اكتر وهو "وهم السيطرة" ، حلقة لطيفة للناس اللي بتحب تفهم نفسها وبتحب تفهم آلية اتخاذ القرارات ، ازاي تحيز زي ده بيأثر على اتخاذ القرارات وخاصة القرارات الاستثمارية
01:32 وهم السيطرة -
02:44 تجربة من الواقع -
06:47 شعور زائف بالثقة المفرطة -
07:50 ازاي "تحيز السيطرة" بيحصل في الاستثمار؟ -
08:49 ازاي اعالج الموضوع ده؟ -
10:37 خطوات عشان "تحيز السيطرة" ميتغلبش على تفكيرك؟ -
10:55 مبدأ "عدم الوضوح" في الاستثمار -
11:49 الاعتراف بالتحيزات النفسية -
12:12 النتائج عشوائية مش ابيض واسود -
12:44 متدخلش الاستثمار بالعاطفة -
13:20 شيل نفسك من الموضوع انت مش السبب -
13:53 أكتب قراراتك على ورق وحللها -
15:15 استشير الناس واسمع ارائهم وتقبل النصيحة -
وقت اتخاذ القرارات سواء قرارات استثمارية أو أي قرار بتاخده في حياتك أعرف الأول ايه المعطيات اللي في أيدك ولو المعطيات دي كتيره وغير مؤكدة خلي بالك النتائج بقت خارجة عن سيطرتك
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكوا في حلقة جديدة من بودكاست كلام ينور
النهارده هنتكلم عن حاجات معينة بشوفها في الكارير بتاعي ممكن الناس تكون قرأت عنها في كتب لها علاقة بعلم النفس أو تحليل الشخصيات والكلام ده كله ولكن انا هاتكلم عليها النهارده من منظور عملي اكثر وازاي بتأثر على اتخاذ القرارات بتاعتك خاصة في القرارات الاستثمارية وحاجات تانية كثير
فـ الحلقه دي لطيفة للناس اللي بتحب تفهم نفسها وبتحب تفهم آلية اتخاذ القرارات زي ما قلنا وهاتكلم على نوع معين من الاوهام اللي احنا بنصدقها والأوهام دي بتأثر جامد جدا على الناتج بتاع عملية اتخاذ القرار بتاعنا
01:32
اول حاجه في حاجه اسمها وهم السيطرة اني مسيطر او الافعال اللي انا هعملها هتأثر في النتيجة وبنشوف الوهم ده في أفراد بيبقى عندهم ثقه زائده أن قراراتهم دي هتؤدي الى نتائج ايجابية مثلا ولكن في الطبيعي أن الحاجات اللي بتطلع النتيجه بتاعه الحاجات دي هي مش من السيطرة بتاعتهم هي من عوامل تانية في البيئة المحيطة بالمشكلة دي بمعنى ايه
بمعنى ان انا في موقف معين النتائج بتاعته عشوائية ، يعني ايه النتائج بتاعه عشوائيه يعني ممكن يحصل حاجات كتيره جدا نطاق النتائج بتاعته واسع قوي ونطاق المشكله اللي انا بحاول احلها واسع يا هتكسب يا هتخسر لا ، ده ممكن اكسب واخسر ، ممكن تكسب وتتعور ممكن تكسب وتبقى قوي.. فـ العمليه او الناتج بتاعي عشوائي جدا وعدده كبير ومش مش مؤكد إيه اللي هيحصل لي ، مقدرش اقعد اقول احتمالية حدوث حاجه عاليه زي كده بسهوله ولا لأ
02:44
وهديكم مثال من الحقيقة حصلت تجربة معايا كنت انا واحد صاحبي مره في البحر وكان في مركب نزلتني انا وهو جوه والأجواء كانت كويسه جدا والبحر كان هادي جدا ومفيش مشكله وقاعدين بنستمتع باليوم والكلام ده كله وانا لو حد عارف المعلومة دي عني انا كنت بعوم كتير وانا صغير كنت بلعب سباحة ومعنديش مشكله خالص في العوم يعني
صاحبي مستوى السباحة بتاعه كويس لكن هو مش سباح وبعدين قاعدين عادي اللي حصل ان البحر قلب علينا جامد فجأه يعني سرعة قلب البحر بالنسبالي انا عمري ما شفت حاجه كده قبل كده ، الدنيا كانت شمس جدا ومكنش في اي مشكلة وفجأة قلب علينا جامد
اللي حصل هنا اننا كنا نازلين وفاكرين اننا هنطلع بسهوله ، انت نازل والبحر هادي فجأة ، التغيير المناخي اللي حصل في هذه الدقائق بسرعه غيّر تماماً النتائج بتاعتنا وهنا مع ان انا سباح ومع اني بعرف اعوم ولكن التحكم هنا مبقاش في يدي! اول ما نزلنا السيطرة كانت معايا انا ممكن انزل اعوم وارجع بسهوله جدا لان البحر سهل ولكن زي ما احنا عارفين ان البحر مالوش كبير حتى لو انت سباح حتى لو انت بتعرف تعوم والكلام ده كله
فأنت دلوقتي بقى عندك اختيار ازاي تعرف ترجع المكان اللي انت نزلت فيه ، والمركب اللي نزلتنا واقفه جنبنا على بعد 30 / 40 متر المسافة مش كبيره ولكن بعد ما البحر قلب مهما حاولنا احنا مش بنتحرك من مكانا وخاصة صاحبي
طيب الموقف ده هنحله ازاي؟
النتائج بتاعتي هنا اتغيرت تماماً ، انت مخك هنا المفروض يحسب انت عندك سيطرة ولا لا فالإجابة لا معنديش سيطرة.. والنتائج بتاعتي كبيرة جداً دلوقتي احنا ممكن احنا الاتنين نغرق ، ممكن واحد فينا يغرق ، ممكن احنا الأتنين نعرف نرجع.. والنسبة بتاعت حدوث كل موقف أنا مش عارف احسبها لان الموقف عشوائي جدا واحنا ما كناش عاملين حسابنا
لو انا عندي وهم السيطرة على الموقف في الوضع ده ايه اللي هيحصل؟
هحاول انا وصاحبي نقعد نعوم جامد جامد جامد لحد ما نوصل وهنبقى فاكرين ان ده هيحصل ولكن مع الاسف ده مش هيحصل لان البحر كان قلب علينا جامد جداً خلاص
فـ الحل العادي هنا انك المفروض تقف ما بينك وبين نفسك وتفكر هل انا المفروض اعوم بسرعه واخلص كل طاقتي ويا هنوصل يا منوصلش!
ولا أقف واشوف مين المسيطر هنا؟ هنا المناخ هو المسيطر ، طب مين بقى اللي عنده قدرة اعلى من المناخ في الوضع اللي احنا بنتكلم فيه "المركب" ؛ لأن المركب بالنسبالها الظروف اللي هي اتوجدت فيها النهارده مش وحشه اوي يعني المركب هتعرف تتحرك وتجلنا
فاللي حصل ان انا اتكلمت مع صاحبي قلتله خلاص احنا مش لازم نعوم اهدى كده وخلينا نهدى وخلينا بالراحة ومفيش اي مشكله وشاورنا للمركب ان احنا مش عارفين نيجي ، وفعلا المركب بدأت تتحرك وتقربلنا لأن المركب هنا البحر مقلبش عليها لدرجه انه يتعبها هي مجهزة انها تعوم في حاجه زي كده.. فراحت المركب جيالنا وقربت مننا ابتدينا نستخدم قدرتنا بالراحة اننا نرجع للمركب وخلاص اليوم الحمدلله عدى والنتائج كانت كويسه
06:01
اللي بيحصل بقى في النماذج اللي انا بشوفها ناس مثلا لا قدر الله بتغرق أو بيحصلها مشكله ايه؟
ان هو مش بيحسب القدرة بتاعته هو ممكن يخلص الطاقة بتاعته مع انه ممكن مثلا يهدأ ويطلع راسه من على المايه وميعومش قوي لحد ما النجدة تجيله أو حاجه كده
لكن اللي بنشوفه بيحصل ان الناس بيجلها حالة من الذعر أو بيحصلها حزن من النتيجة ، هو كان فاكر ان هو مسيطر ولكن الظروف اتغيرت فهنلاقي النتائج هنا شكلها اتغير تماماً
هنلاقي وهم السيطرة هنا اللي انت تعرفها عن نفسك ممكن تخليك تاخذ قرار احسن من اللي انت كنت هتاخده لو انت مش عارف الوهم ده لان الوهم ده مع الأسف موجود في شخصياتنا وموجود في طريقة تفكيرنا وموجود في طريقه التعرف على الأنماط بتاعنا
06:47
الوهم ده بيدينا احساس غير حقيقي بالثقة وممكن كمان تكون الثقة المفرطة أنا أكيد هعرف اتصرف في الموقف ده ولكن ده مبيحصلش
هنا كمان بيخليني ما اخدش الحذر في اتخاذ القرار زي ما قلنا في المثال بتاع المركب انا لو مش حذر انا هاخد بالي اني لازم أعوم جامد وخلاص ، لأ أنا لازم احذر ولازم احسب ولازم اهدى ولازم افكر
برضه بتخليك تبالغ في قدرتك اني اكيد هعرف اطلع اكيد ليه لان انا النهاردة جوه الموضوع أكيد هطلع وأكيد هعدي من المشكلة والكلام ده كله ولكن لا المتغيرات تغيرت عليك
وبنشوفها طبعا في حاجات كتير جداً زي مثلا الأعاصير زي فيضانات حاجات كثير جدا بتحصل معناها هنا أن القدرة بتاعتك أو السيطرة انتقلت لحاجة تانية فلما الحاجه دي تتنقل من عندك لحد تاني خلي بالك ان كده الموضوع مبقاش في يدك
07:50
طب بنشوفها كمان في الاستثمار؟
اه بنشوفها في الاستثمار وكل التمهيد ده عشان اعرفك ازاى ان انت تفكر في الاستثمار بهذه الطريقة
بمعنى إن الناس متخيله ان هي عندها القدرة على توقع اسعار الاسهم واسعار الذهب وأسعار الفائدة وأسعار كل حاجه في الدنيا وده انا شوفته في كاريري تماما عندهم الوهم بتاع التوقع
ان انا ممكن اتوقع حاجه هتبقى شكلها عامل كده بعد شوية ولكن مش حقيقي ليه لان هنا انت مستثمر الصغير هتحط كام هتحط 5000$ ، 1000$ ، 100000$ ، مليون دولار ، مليار دولار حتى
أنت حجمك صغير لا تؤثر على النتائج النهائية بتاعه السهم ده طلع او السوق ده طلع أو الدهب طلع او حاجه انت صغير جدا في بحر كبير فالناس بيبقى عندها وهم أننا عشان حطيت ده فاكيد أنا اخترت احسن حاجه ولكن دي حاجة خاطئة
08:49
بنعالج الموضوع ده ازاي؟
بنعالج الموضوع ده ان احنا بنحط افتراضات او حاجات على المدى الطويل انا ممكن اتوقع سنه سنتين ، بشوف حالات ممكن ناس تنجح في سنه او سنتين او في اسبوع او اسبوعين ، حاجة هتطلع مثلا في الاسبوع الجاي او الاسبوع اللي وراه
انا بحاول ابني كارير على 10 15 20 سنة في التحويش واعيد استثماره ، فمينفعش اخش في البيزنس بتاعي وانا بعرف اتوقع سنه او سنتين مينفعش مش هتعملى حاجه وبعدين المجهود اللى انت هتعمله في سنه وسنتين كل سنه وسنتين محتاج تغير رأيك ومحتاج تدور وفي الاخر ممكن شوية يصيبوا وشوية يخيبوا فالنتيجة في الاخر تبقى وحشة
فاللي انا بعمله هنا وانا بافكر في الاستثمار ان انا ببص على حاجات طويلة المدى متوقع أرباحها في نطاق معين مش هاقول ان الحاجه دي بنسبه %100 هتحصل ولكن بقول احتمال تطلع كذا واحتمال تطلع كذا واحتمال تطلع كذا وبحاول ادور على الفرص الاستثمارية اللي على المدى الطويل تحققلي العوائد بشكل واضح نسبيا مش هقول واضح بنسبة %100 لان مفيش حاجه بنسبة %100
09:59
وهنلاقي معظم المستثمرين الكبار اللي مع الوقت ثرواتهم كبرت في البورصة وسمعنا عنهم إنهم مشهورين كـ رجال اعمال او كده بيفكروا في المنطلق ده
إن انا عايز اعمل بيزنس يقعد لفترات طويلة يجيب نفس العوائد وتوقعه نوعا ما سهل لان انا هنا سلمت وتاكدت ان الحاجات اللي بتأثر على استثماراتي هي مش في يدي ممكن تيجي أزمة إقتصادية في البلد ويحصل مشكله ، ممكن يغيروا في قانون في تشريع ، قطع يطلع بره ، القطاعات اللي هي بتبقى سخنه والناس كلها حباها وفجأة بتختفي تماماً دي حاجات كلها بره ايدي تماماً كمستثمر مقدرش أأثر عليها
10:37
تعالوا نرتب بقى كده ايه الخطوات اللي انا ممكن اخدها عشان مخليش الوهم بتاع السيطرة ده - انا مسيطر- يتغلب عليا في تفكيري ويتغلب عليا في اتخاذ القرار ويبوظلي حاجات كتيرة جدا من اللي انا بعملها
10:55
اول حاجه لازم اسلم بإن في حاجه اسمها "عدم الوضوح" في الاستثمار في الحياة في حاجات كتيرة جدا لازم اعرف ايه العوامل اللي بتأثر في النتيجه بتاعه قراري
عمر ذاكر فـ عمر نجح ده مثال مفيهوش الحاجات دي ليه لان عمر هيتحاسب على قد عدد الساعات اللي هو حطها ، ولكن عمر نازل والجو قلب عليه ده مش بأيده ، عمر استثمر ده مش بأيده دي حاجات فيها عدم وضوح عالي يبقى انا لازم اعترف ان انا فى مجال فيه عدم وضوح عالي
لما عدم الوضوح ده يبقى عالي لازم توقعي للنتيجه يبقى مختلف عن عمر ذاكر عمر نجح مينفعش مينفعش الوضعين يبقوا بنفس المعلومات
يبقى اول خطوة اعترف بوجود الحاجات دي وأسلم بوجودها وابتدي اتعايش ان هي حاجات عشوائية بتحصل لازم ابقى عارف
11:49
تاني حاجه لازم اعترف ما بيني وبين نفسي برضه ان انا عندي تحيزات نفسية دايما هتزقني اننا احس ان انا مسيطر ، فلازم اعترف بالموضوع ده ولازم ابقى فاهم ولما احس ان انا بحاول اعاند نفسي في حاجه النتائج بتاعتها عشوائيه وانا فاكر إن أنا مسيطر على الموضوع ارجع افكر نفسي بالموضوع ده
12:12
ثالث حاجه ممكن يبقى عندي الوان كتير جدا من زي ما بيقولوا النتائج ، ان انا ابقى مصدق ان النتايج دي حقيقي ممكن اخسر فلوس ممكن مخسرش فلوس ، ممكن أخرج بدون مكاسب أو خسائر ممكن اعمل فلوس كثير جدا ، عندي الالوان كلها شايفها عندي النتائج بتاعتي انا فاهم انها مش
هتبقى حاجه واحده بس ، لو ده محصلش يبقى انا زعلان جدا ولو ده حصل يبقى انا مبسوط جدا.. لا هي مش ابيض واسود لان تاني النتائج عشوائية
12:44
رابع حاجة متبقاش عاطفياً مستثمر في الموضوع قوي يعني متبقاش اللي هو لو محصلش كده انا عمري ما هستثمر تاني او لو انا خسرت مش عارف إيه
طول ما انت عارف ان الخسارة هي جزء من المعادلة اللي انت بتعملها فانت فاهم وقابل يالنتائج بتاعتها يبقى متستثمرش مشاعرك قوي في الحاجه اللي انت بتعملها
هو مصنع انت بتحاول تعمل ادخارك وبتحاول تستثمره وبتحاول تطلع عليه نتيجة معينة آخر السنة متبقاش داخل بالموضوع عاطفيا جدا لازم العاطفة تقل بشكل كبير
13:20
خامس حاجه تعالى نقول كده فكر في الموضوع ان هو كده كده هيحصل سواء انت موجود فيه او مش موجود فيه يعني ايه يعني الجو قلب النهارده والدنيا باظت سواء عمر كان في الحدث ده او مش في حدث ده هو كده كده كان هيحصل الاستثمارات طلعت 20% في السنة لمدة خمس سنين جايين عمره موجود فيها أو مش موجود فيها الاستثمار كان هيطلع
شيل نفسك من الموضوع وشيل نفسك انك سبب من الاسباب ان الاستثمار ده نجح او لأ انت ممكن اصلا تكون مستثمر سلبي مبتعملش اى حاجه ولكن تستثمر وبتعمل فلوس
13:53
سادس حاجه خلي عندك زي نوته او ورقه او اي حاجه سجل فيها قراراتك يعني ايه يعني انا النهارده حصل حاجه كذا كذا ، المعطيات بتاعتي كانت واحد اثنين ثلاثه واخدت القرار بناءاّ على خمسه سته سبعه وكتبت وبعد سنه والله انا شفت الحاجات دي وكتبت انا اخدت قراري بناءا على كذا
لما بتحط الحاجه على ورق وبتفكر فيها الموضوع بيختلف عن لما بتفكر فيها جوا دماغك لما بتحطها على ورقة وتشوف الحاجات دى مكتوبه قدامك تبتدي تحلل هل انا بجد مقتنع باللي انا باقوله ده او اللي انا لسه كاتبه ده ولا هو جوه دماغي حلو وعلى الورق بقى شكله وحش
يبقى اول حاجه تتأكد ان انت عرفت الحاجه اللي بتطلع النتائج وحللتها واخدت قرار لما نيجي بقى السنه اللي وراها هنبص على السنه اللي قبليها انا كتبت ايه والسنه اللي بعدها واللي بعدها وهكذا
في خلال العمليه دي هتتعلم ومخك هيحاول يلاقي والله انا بستثمر في الحاجه دي لما بتبقى نازله 20% والله انا بستثمر في الحاجه دي لما تبقى نازله 50% انا مش هلمس الحاجه دي عشان الأداء بتاعها كان الحاجة الفلانية
أنت كتبت أسبابك وبعدين الوقت عدى عليك فأنت بس متعلمتش انت اتعلمت وسجلت وابتديت تقرا الحاجات دي في المستقبل هتساعدك في اتخاذ القرار
15:15
اخر حاجه هقولها في الحته دي ، النقطه السابعه بتاعتنا ان انا لازم اسمع ولازم يبقى عندي تقبل لردود أفعال الناس يعني انا النهارده النهارده رحت لحد قلتله الفكره اللي انا بعملها واداني نقد قالك لا والله اللي انت بتعمله ده ملهوش لازمه أو دي حاجه وحشه او حاجه غلط او كده فـ لازم في تتقبل الرأي الآخر
جزء كبير من الموضوع ان الراي الاخر ساعات بيشوف حاجات في المشكلة اللي انت جواها او في الحاجه اللي انت بتحاول تحلها وتتخذ فيها قرار بتلاقيه باصص من منظور آخر تماما غير اللي انت جايله بيه
فـ اسمع واستشير الناس واسمع ارائهم وانت عارف ان فلان الفلاني ده مثلا قوته كذا في الحاجه الفلانيه وهتاخد رأيه في الحاجه دي وهتسيبك من الحاجات الثانيه في رأيه وهكذا بس تاني انت ممكن تبقى بتكلم الناس وغير متقبل للنصيحة ، لازم تبقى متفتح ومتقبل للرأي الآخر
الحاجات دي انت بتعملها عشان تشيل وهم السيطرة من دماغك وعشان تسيب نفسك ، الحاجه دي مش بيدك ، النتائج بتاعتك مش بيدك
الاستثمار من الحاجات اللي الناتج بتاعها مش في يدك لان في حاجات كثير جدا بتزقها وبعد كل ده ما تزعلش أو تتبسط او تفرح.. تاني انت بتحاول تعمل بزنس ناجح وبتحاول تبني محفظة معينه بطريقه معينه بطريقه ذكيه عايزها تعمل الأداء بتاعك ممكن تكون انت في فترة معينة مبيحصلش فيها النتائج دي وعلى لكن على المدى الطويل باذن الله هتتحقق وهتيجي دورات اقتصاديه لو انت باني قرارك صح وباني فكره صح على المدى الطويل ما تقلقش حتى لو شفت فترات وحشه في النص زي ما فرقه بتمر في مراحل في الدوري بتاعها سنه سنتين تلاته وحشه ولكن هي بتكون بتبني حاجه جامده لقدام
يا رب يكون الموضوع واضح ، ويا رب يكون ساعد الناس انها تفكر في موضوع وهم السيطرة أو تحيز السيطرة ويكون ساعدكم أكتر في انكم تاخدوا قرارات مش في الاستثمار بس حتى في الحياه لما تخش على مشكلة عرّف ايه المعطيات لو عي غير مؤكده وكتير خلي بالك الموضوع مش في ايدك الموضوع في ايد الحاجة الناحية التانية
شكرا جدا جدا على وقتكم النهارده واتمنى تكونوا انبسطوا من الحلقه دي واشوفكم ان شاء الله الاسبوع الجاي
Translation of some words and terms:
Outcomes نتائج
Illusion Of Control وهم السيطرة
Range Of Outcomes نطاق النتائج
Certain متأكد
Calm Down اهدأ
Panic ذعر
Trustation الثقة
Decision قرار
Pattern Recognition التعرف على الأنماط
False Sense Of Confidence شعور زائف بالثقة
Overestimate المبالغه
Involvement المشاركة / تورط
Environment وسط / بيئة
Uncertainty شك
Steps الخطوات
Factors العوامل
Random عشوائي
Bias تحيز
Break Even يخرج بلا مكسب أو خسارة
Passive income دخل سلبي
Criticism انتقاد
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #وهم_السيطرة