68. الفرق بين الموظف ومؤسس الشركة - الجزء الثاني
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
حلقة النهاردة هي الجزء الثاني من لقائنا مع أمين الخولي ضيفنا اللي مشرفنا في كلام ينور بنكمل حديثنا عن الشركات الناشئة والأفكار الجديدة ، واللي بيحصل من تطورات في المجال الشركات الناشئة
أمين هو الرئيس التنفيذي للعمليات بشركة Modus Capital
شركة بتهتم بالشركات الناشئة ، وعندهم برامج دعم الشركات الناشئة والاستثمار في الشركات الناشئة
تقدروا تتواصلوا مع أمين من خلال الرابط : Elkholy @LinkedIn
ازاي بتنصح الناس تفكر في العائد على الوقت بتاعها من ناحية الشركة؟
لو أنا رائد أعمال هل لازم أبقى محدد فكرتي دي محتاجه رأس مال كتير ولا؟
إيه أغرب الأفكار اللي شوفتها بتتعمل في الفترة الأخيرة؟
هل في الفترة الأخيرة شوفت فكرة سهلة زي ما بيقولوا فكرة بمليون جنية وبعد ما بدأت تتطبق منجحتش؟
هل التنفيذ عليه عامل كبير جداً في نجاح أي فكرة؟
توقع القدرة التنافسية للمنتج بتاعك في المستقبل شيء مهم
في نهاية لقائنا مع أمين هدفنا تعرف إن كل واحد عنده شخصية وتركيبة فكرية معينة وظروف مختلفة لكن الحاجه المشتركة اننا نفكر ونحط الأرقام بتاعتنا ونحاول نعرف العوائد سواء أنا في وظيفة أو هفتح شركتي وبعدين أخد القرار من ناحية علمية مش من ناحية عاطفية
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:46
اهلاً بيكوا في حلقة جديدة من بودكاست كلام ينور النهاردة هنكمل حديثنا ويارب تتبسطوا بحلقة النهاردة
00:53
عمر: طيب لو روحنا تاني لناحية الشركات ، أنا راجل فتحت شركة وقدرت أعدي الناحية التانية وعرفت أجيب الفريق وعملت الحاجات دي .. أنت من أكتر الناس في المنطقة هنا قابلت فرق مختلفة في قطاعات مختلفة في أعمار مختلفة في مراحل شغل مختلفة أنت إيه النصايح اللي المهمه اللي بتديها للناس ازاي بتخلي الشركة تفكر في العائد على الوقت بتاعها بقى من ناحية الشركة؟
01:24
أمين: هنرجع تاني سريعاً لحاجه تانية كنا قولناها في البودكاست اللي فات .. حسب نوعية الشركة فلنقل إنك قررت إنك مش هتبقى شخص لوحدك ، أو مجموعة منكوا فاتحين عيادة مثلاً لأ هتعمل شركة اللي هي كيان قانوني بيقولوا عليها شخصية إفتراضية دي أول ما أخترعوا فكرة الشركات دي كان أي حد بيتعاقد بيتعاقد مع شخص وبعدين أخترعوا فكرة الشركات اللي هي ذات مسؤولية محدودة يعني من غير ما نخش في تفاصيلها أصبح كيان أعتباري الشركة ممكن تشتري شركة تانية ، الشركة ممكن تخش في تعاقد ما بينها وبين شخص وما بين شركة ودي حاجه أصبح معترف بيها في القضاء ده الشق القانوني مش عايزين نركز فيه ده ليه مميزات معينة للناس اللي بتعمل شركة وبتدفع ضرايب حاجات كلها مش عايزين نخش في تفاصيلها لأنها مش مهمه أوي
الأهم لما الجزء المالي لما تبقى أنت محتاج تستثمر أستثمارات مالية مش موجودة عندك لوحدك محتاج تدخل معاك شريك مش هيخش يدير معاك ولكن هيستثمر معاك لأنك محتاج الفلوس اللي هو هيديهالك عشان تنمي الشغل بتاعك
ناخد مثالين
مثل ناس عملت شركة إستشارات مش مكتب محاماة فلنقل حاجه فيها مغامرة أكتر شوية ناس متخصصين في المجال المالي أو في مجال التسويق عملوا شركة إستشارات وأصبح عندهم 40 عميل من كبرى الشركات العالمية بيستشيروهم نعمل تسويق ازاي ، نعمل إعلانات ازاي فعملوها كشركة
الشركة دي محتاجه أصول وإستثمارات ولا معظم استثماراتها في الناس اللي فيها؟ ممكن الناس تحط شوية فلوس من جيبها ويأجروا مكتب ويعملوا لوجو يجيبوا محامين ففي نوع من الاستثمار ولكن في النهاية الأصول اللي فيها مش محتاج يعمل برمجة ، مش محتاج يصرف على الإعلانات جامد أوي لأنه ليه علاقات مع العملا بتوعه مش محتاج يدخل مستثمر فهو مش محتاج راس المال هيفضل محتفظ بأسهم شركته والعائد يجيله وده ممكن يبقى بيعمل أضعاف اللي بيعملوه الموظفين ويكون عنده موظفين في الشركة كمان بس مش محتاج بالضرورة يدخل مستثمر معاه لأنه مش محتاج رأس المال للاستثمار .. ممكن يكون عنده أسباب تانية إنه يدخل ناس يكون ابتدا الشركة دي كل واحد حط من جيبة كام ألف دولار وعملوا الشركة وبعد 20 سنة أصبح عندهم عائد بالملايين وعايزين يتقاعدوا مثلاً فالشركة دي بقى فيها قيمة وبتجيب عائد يبقى في مستثمر مهتم فيبيعوا حصتهم فيبقى عنده القيمة المتوفرة عنده في الشركة دي يقدر يحطها على جانب يبقى زي نوع من المدخرات يعمل بيها اللي هو عاوزه
ده غير إنك شركة ناشئة في مراحل معينة من حياتك عشان تنموا محتاج إستثمار ساعتها الشركة مهمه عشان زي ما قولنا انت مجموعة من الناس محدش يقدر يشتريك إنما لو عملت شركة أنت بتشتغل فيها وبتنمي قيمتها ممكن تبيع حصة منها أسهم لحد في سبيل إنه يحطلك كاش والكاش ده يخش في الشركة فيساعدك أنك تستثمر فده الجزء اللي نبتدي ندخل فيه إننا نتكلم على الشركات الناشئة اللي بتطلب تمويل
خد بالك في فالأول التمويل اللي بيجيلك مش عشان تبيع شركتك ، شركتك لسه موصلتش مرحلة إنها بتعمل فلوس كتير فأنت مش عارف تكبر وتنمو مجرد ، إفرض إنك فتحت شركة عملت تطبيق وشغال في الإمارات حطيت فلوسك أنت ودخلك إستثمار بسيط وعاوز تتوسع تروح مصر أو السعودية محتاج تفتح مكتب مثلاً فأنت في الحالة دي محتاج استثمار لو حد إدالك فلوس مش هتخش في جيبك هتخش في الشركة وفي راس المال العامل بتاعك غير لما أنت تكون عملت الشركة وكبرتها ونمتها وعايز تتخارج منها فبتبيعها جاهزة فالفلوس اللي هتيجي دي هتخش في جيبك وحد هيشتري حصتك أنت لأ في الشركات الناشئة لو أنت بتدور على فلوس عشان تخش في رأس المال العامل وتستثمرها في الشركة دي بتبقى من أموال الشركة واللي بيخش معاك شريك بينقص حصتك انت في سبيل أنه حط فلوس في الشركة أنت هتستثمر فيها وده اللي احنا بنتكلم فيه في موضوع الشركات الناشئة اللي ابتدينا نتكلم فيه الحلقة اللي فاتت أنا ازاي أدور على مستثمرين
05:35
عمر: يعني كده لو أنا رائد أعمال لازم أبقى محدد من الأول وأنا بفكر في فكرتي هل فكرتي دي محتاجه رأس مال كتير ولا لأ ، لأن أنا ممكن أعمل نفس الفكرة بس بطريقة أزكى شوية محتاجش فيها رأس مال ومحتاجش مستثمر من أول يوم
أمين: ولو أنت بعد ما تعمل الحكاية دي من غير رأس مال من بره شركتك هتسوى 10 مليون بعد ما تخلص ولو جبت رأس مال من بره برده هتسوى 10 مليون انت لسه بتملك الشركة كلها يبقى الـ 10 مليون كلهم بتوعك ، لو دخلت مستثمر معاك بالنص وأنت مكنتش محتاجه هيبقى انت حصتك تسوى 5 بدل 10 مثلاً
عمر: يعني مش ديماً رأس المال كويس
أمين: لأنه بيخش معاك شريك فبياخد جزء من شركتك في مقابل انه يوفرلك حاجه مكنتش عندك فدي من وجهة نظرك أنت كشخص بيجيب مستثمر معاه محتاج رأس مال بتاعه عشان تنمو مقابل إنه أصبح يملك حصة معاك فأياً كانت القيمة اللي هتوصلها فأنت لازم تبقى متأكد إن راس المال اللي هيجيلك ده هيزود قيمة الشركة بما يكفي إنه يعوضك الحصة اللي أنت هتديها للمستثمر وإلا هترجع موظف في الأخر عندك 1% من الشركة وأنت شغال فيها بمهية والعائد هيجيلك على قد مهيتك يبقى معملناش حاجه فده جزء لازم الناس تفكر فيه
خد بالك الناس بتفكر هدخل ناس معايا في الشركة فهيبقى عملت فلوس لأ الشركة لما بتكبر وبتتباع ويشتروا حصتك يبقى عملت فلوس إنما في الأول الناس دي بتشتري حصة من شركتك وتخش تزاحمك أنت في الملكية ، فكتير أوي من اللي بيبتدوا شركات ناشئة بيبقوا ديماً حساسين لفكرة أنا عايز أدخل اكبر قدر برأس المال عشان يساعدني وأديله أقل نسبة من الشركة عشان احتفظ بالملكية ففي توازن هنا لازم نفكر فيه
07:30
عمر: طيب هسألك برده سؤال من الفترة اللي فاتت إيه أغرب الأفكار اللي أنت شوفتها بتتعمل ، هل شوفت مثلاً فكرة غريبة مكنتش متخيل إن حد يعملها؟
أمين: أحنا بنط من حاجه لحاجه بس احنا عملنا ارضية للي بنتكلم فيه حددنا يعني إيه شركة ناشئة ، طيب أنت بتعمل شركة لازم تكون بتدي قيمة لحد ففي نوعين في بتحل مشكلة أولها مثلاً فكرة أوبر أنا مش بنزل أدور على تاكسي هي التاكسيات موجودة والعملا موجودة فده حللهم مشكلة ألقى التاكسيات فين
هقولك حاجه في جيلنا احنا مكنتش تخطر على بالنا اللي أخترع فيسبوك هو كان بيحل مشكلة إيه؟ مكنش في مشكلة اصلاً مكناش نعرف إننا ناقصنا فيسبوك فدي فكرة غريبة في حد ذاتها ولا اليوتيوب أنا لما حد قالي أياميها عملوا موقع مكنش لسه تطبيق أياميها والناس بتحط الفيديوهات بتاعتها بيحطوا فيديوهات قطط ، كلاب ، أصحاب طب وأنا مالي .. يعني مش لازم تبص بعيد عشان تشوف أفكار غريبة الحاجات اللي بنتعامل معاها يومياً أفكار غريبة وحاجات مكنتش تخطر على البال
08:50
عمر: هل أنت في الفترة الأخيرة دي حاجه يمكن بقى لسه مبقتش يوتيوب أو مبقتش حاجه كبيرة ومش لازم تكون فكرة هتنجح .. بس هل من الناس اللي أنت بتشوفهم شوفت حاجه غريبة أنا بسأل السؤال ده لأن بحاول أفتح الأفاق بتاعة التفكير يعني احنا قاعدين بندردش مع بعض ممكن لما حد يسمع فكرة بشكل معين يفتح فكرة في دماغه
أمين: أنا بحاول أفتكر حاجه شوفتها قريب مفيش حاجه خاطرة على ذهني بس أنا أديتك مثالين لحاجتين أول ما ابتدت الناس مكنتش لسه مفهومه ولكن بعد ما تشوفها تقول إيه ده كان لازم نعمل كده ازاي مفكرتش فيها أو ازاي محدش فكر فيها قبل كده
عمر: وبرده الأفكار دي ساعات مبتبدأش زي ما بنشوفها النهاردة يعني ممكن تبقى باديه بشكل مبسط أكتر
أمين: أمازون كان بيبع كتب أنا مش فاكر أخر مره اشتريت كتاب من أمازون أمتى مثلاً ، بس الأفكار المبتكرة أوي دي بطبيعتها كل مره بتتغير يعني فكرة الشبكة الاجتماعية واحد عملك لينكيدإن للمحترفين بقى فيها نوع من التكرار فالأسهل اللي تتوقعه اللي بشوفه معظم الوقت واحد بص على أوبر او على يوتيوب فجه قالك أه مانا عندي مشكلة في يعني مثلاً وديماً رائد الاعمال أو اللي بحاول يطلع بفكرة جديدة بيكون بيحاول يحل مشكلة سواء موجودة بيعملها أحسن أو بيعمل حاجه جديدة
هديك مثل وده أنا مشوفتوش في الشركة بس أعتقد أبتدى يتطبق أنت رايح المول وهتقعد تلف على باركينج واحد عملك تطبيق قالك أحجز الباركينج قبل ما تروح حل مشكلة بسيطة جداً فدي مشوفتهاش بس أعتقد سمعت عن حد بيعمل حاجه زي كده انما معظم الحاجات اللي بشوفها ناس بتشوف مشاكل موجودة والناس متأقلمه ومتعايشة معاها وفي نفس الوقت قالك لأ ممكن نشوفلها حل أحسن أي حاجه ممكن تحجزها بدل ما تروح تتكلم بالتليفون تحجزها أنت ومجموعة صحاب عندك عايزين تلعبوا كورة كلم بقى شوف مين واحجز ممكن حد وانا شوفت الفكرة دي اي حاجه من الساحات الرياضية دي تشوفها من التطبيق وتحجزها ، غرف الإجتماعات في الفنادق اروح ألف على الفنادق اقولهم انتو غرف الاجتماعات عندكو فاضية في دبي مثلاً في فنادق كتير جداً أنا لا يمكن اكون سمعت بيها كلها ولكن ممكن يكون عندهم غرفة إجتماعات مناسبة فواحد راح حطها على تطبيق والتطبيق ده موجود وتروح تقول أنا عايز اجتمع مع 10 اشخاص وعاوز اعمل تدريب مثلاً لمدة كذا يوم هروح أكلم فندق فندق هتعب بس خد بالك دي فكرة مشتقة من حاجه زي أوبر وكريم فمعظم اللي بنشوفه حلول مبتكره لمشاكل موجودة دي أسهل حاجه
انت كشخص إيه اللي بيضايقك في حياتك شايف أنه ممكن يبقى له حل ويساعدك دي أحسن طريقة تطلع بيها بفكره
12:11
عمر: هل مؤخراً شوفت أي حاجه بالعكس فكرة بقى بمليون جنية وسهلة جداً وبعدين لما ابتدت تتطبق حسيت أو شوفت ان الفكرة نفسها منجحتش برده أنا عايز أخلي الناس تفكر معانا بالعكس ان مش ديماً ان الفكرة تبقى واضحة اوي ده هينعكس في النتيجة اللي في الاخر فهل شوفت حاجه زي كده؟
أمين: بص أنا شوفت أفكار كنت شايف انها كويسة بس متابعتش عرفت نجحت ولا لأ مفيش مثل في ذهني لحاجه كانت شكلها كويس في الأول وبعدين مامشيتش أكيد بتحصل أو ساعات ناس بتخش في مجال معين بتلاقيه صعب يعني أنا شوفت أكتر من شركة بيحاولوا يعملوا موضوع أن انت عايز تشحن حاجه يعني أفرض إن أنت مصنع لحاجه صغيرة في الصين مثلاً وعايز تصدرها على ما تكلم شركات الشحن وتاخد كونتينر كامل وبتاع صداع فشوفنا في المجال ده كذا شركة كان عندهم حلول انه يعمل تطبيق ويلم من الناس كذا حاجه ويشحنها والكلام ده بس هي الفكرة كويسة ولكن المنافسة في المجال ده صعب اوي حتى طريقة التنفيذ خلته مش قادرين يعملوا فلوس مثلاً
13:28
عمر: وهو ده اللي أنا عايز أجيبك فيه التنفيذ ، النهاردة التنفيذ عليه عامل كبير جداً جداً في نجاح أي مشروع أو أي فكرة
أمين: طبعاً فاحنا بنتكلم في المخاطر عشان كده لأن أنت ممكن يبقى عندك فكرة هايلة فالجزء اللي قولتلك عليه عايز تعرف إيه اللي هينجح وإيه اللي مش هينتجح في بعض الحاجات ممكن تعملها بالتجارب زي ما أديتك مثل الشخص اللي كان عايز يعمل حلاق فممكن تجرب وتلاقي الموضوع مش ماشي لو أنت كنت روحت بقى وعملت عقود مع مثلاً 40 محل حلاقة وعملت موقع وكلفت فلوس وفي الأخر مجلكش تمويل هتقع في الغلطة دي فدي واحده تم تداركها بدري جربت لقيتها مش ماشية احياناً بيحصل العكس ده من ناحية القبول بتاع الفكرة ممكن التنفيذ ميمشيش صح وممكن التنفيذ يمشي صح وتبقى ناجح جداً ومتعملش فلوس على فكرة أنا لغاية دلوقتي معرفش أوبر بيعمل فلوس ولا لأ
عمر: لأ أنا معتقدش أنه بيعمل فلوس
أمين: فشوف أنت كام مرحلة أنت ممكن الأمور ما تمشيش فيها بالنسبة للمستثمرين أو بالنسبة للشخص اللي هيحط فلوسه أو وقته حتى اللي هو المستثمر مش بالضرورة الراجل اللي دخل معاه بالفلوس في كذا مرحلة ومن ضمنها التنفيذ مجالات كتير أوي الفكرة ممكن تكون كويسة والمشروع ممكن يكون ناجح لكن التنفيذ نفسة بيقع بيبقى فيه غلط
هقولك بعض الأمثلة مش بشركات محدده ساعات الناس بتعمل فكرة كويسة مع تطبيق وكده وبعدين يقولك مثلاً أنا هنفذه ازاي هروح لشركة أخليها تكتبلي البرنامج لو هو اصلاً بيروح لشركة تكتبله البرنامج ليه مهواش متخصص في البرمجة وده معناه بالطبيعة مهواش عارف الشركة اللي هتعملة البرنامج ده الجودة بتاعتها كويس ولا لأ
احنا شوفنا عدد من الشركات بيروح مش عارف يقرر ما بين العروض اللي قدامه بيختار الأرخص وبعدين لما يجي يزود حاجه على التطبيق ويلاقي انه مش قادر لأنه من تحت مش مكتوب صح فبقى غلط في التنفيذ فأولاً في الفكرة نفسها تجربها تشوف مناسب للسوق ولا لأ دي ممكن تفشل إن الفكرة حلوة وبعدين تيجي تجربها في السوق تلاقي إن في حاجه صغيره فيها مش هتمشي مع العميل أو مفيش عليها قبول هتلاقي لما تيجي تنفذها تكلفتها أعلى فبرده بحاول أفكر في أمثله
آخر مثل بقى بالكلام على أوبر أو كريم التنفيذ هايل واحنا بنستعملهم لكن مادياً أو كا تسعير لحد دلوقتي مش عارفين يعملوا فلوس هل ده معناه انهم فشلت لأ ولكن احتمال يكون مع حجم معين محدش عارف لسه هيتحولوا للربحية واحتمال الفكرة ككل كويسة بس لازم السعر يزيد وإلا مش هنعرف نعمل فلوس فالتنفيذ مهم ومش بس التنفيذ مهم انت ممكن تقسم مراحل للتنفيذ وأماكن اللي ممكن تحصل فيها مشكلة لمراحل معينة الفكرة نفسها ، التنفيذ ، البرنامج ، السوق ، اللوائح ، القانون اتغير مثلاً
16:46
عمر: في حاجه كمان انت قولتها عجبتني جداً .. التنافسية ، القدرة التنافسية بتاعة المنتج بتاعك لأن مع الأسف الناس ساعات بتقولك آه دي فكرة جديدة محدش عملها فانا معنديش منافسين وهفتح أول ما بتفتح بتلاقي بعديها بيومين تلاتة شهر شركات تانية بتعمل اللي انت بتعمله بالظبط وابتدى حتى ينافسك في الجودة فأنت خسرت
أمين: أنا شوفت الحكاية دي فعلاً على مدار الكام سنة اللي فاتت
عمر: إن التنافسية مش بس تنافسية بتاعة النهاردة السوق فيه ايه وانا لوحدي وأنا هاخد الحصة السوقية لوحدي وهحسب في الأرقام وكده لأ لازم يبقى عندي توقع للتنافسية المستقبلية لما افتح ويبقى عندي حد قدامي في المجال ده بيعمل كده ازاي هتصرف معاه وإيه خطط الدفاع بتاعتي
أمين: فعلاً فكرة مهم فكرة أني لما ابقى شوفت مشكلة محتاجه حل أو شوفت حاجه ناقصة في السوق انت غالباً في غيرك فكر فيها ممكن يكون 1000 فكروا فيها و900 صرفوا نظر و50 فكروا شوية وصرفوا نظر والـ 50 التانيين حاولوا يجيبوا مستثمرين ومعرفوش لو هما ابتدوا في نفس الوقت انت على ما تبتدي يعني وانت ماشي بتشوف على الأقل إعلانين لتطبيقات تعمل خدمات للعربية بتاعتك احياناً بيكون واحد ابتدي والتاني كان عنده الفكرة وقال لأ ممكن أحسن عليها واحيانا بيبقى ده ابتدى وده ابتدى وبيبصوا لقوا نفسهم في وش بعض مكانوش عارفين بتحصل والحقيقة إنه بص على الشركات والأفكار اللي بتيجي تقدم للمستثمرين فكرة بنشوف تكرار لأن المشكلة بتكون موجودة فأكتر من شخص بيفكر فيها ومعظم الاوقات بنشوف إنه فترة الشركات الناشئة لما بتبتدي بتسمع 1 او 2 او 3 طالعين بفكرة قريبة من بعض وابتدوا فعلا وبعدين يبتدوا ينافسوا بعض غير بقى حاجه تانية خالص انك بتخش في مجال هتنافس فيه حد موجود دلوقتي وهو يقولك مانا ممكن اخش في المجال
انت مثلاً عايز تعمل توصيل للبقالة مثلاً هتعمل شركة بتبعت للناس الطلبات بتاعتها تلاقي السوبر ماركتس الموجودة تقوم عامله تطبيق ويقولك أنا هعمل توصيل للمنازل فيجيلك منافسة من مصدر موجود ممكن ياخد فكرتك ويحاول يعمل زيها فالتنافس والسوق شكله إيه دلوقتي غير السوق هيبقى شكله إيه لقدام الدنيا بتتغير باستمرار فدي أحد العوامل المهمه برده إن الواحد يفكر فيها لما يفكر في فكرة جديدة
19:33
عمر: أنا وأنا اصغر شوية لما الأنترنت دخل في مصر الشارع أتقلب كله سايبر كافية واحد فتح وبعدين اللي جانبه قلب وبعدين اللي جانبة وبعديها بمرحلة شوية لما الموبايلات ابتدت تنتشر أعتقد الانترنت كان بدأ قبله يعني ابتدت المحلات تتحول لسنترالات اللي هو أنت تخش تعمل تليفون وده كان منتج موجود وفجأه الأتنين أختفوا
أمين: الأنترنت دخل البيت وبقى عندك واتساب للمكالمات وبقى عندك موبايلات في البيت وأتحلت المشكلة ورخص الموبايل
عمر: رخص الموبايل وسعر الدقيقة نزل فخلاص مبقاش عندك إحتياج فبرده دي حاجه أعتقد أتعلمتها الاستمرارية بتاعة الفكرة استمرارية المشكلة هل المشكلة دي هتفضل مشكلة لمدة 10 ، 15 سنة ومع الاسف الدورات الإقتصادية بقت سريعة جداً والمشاكل بقت بتتحل بسرعة جداً فانت ممكن النهاردة تبقى حاجه تعتبرها من الاحتياجات الاساسية اللي متقدرش تعيش من غيرها وبعد شوية متبقاش موجودة أصلاً ومتفتكرش انها كانت موجودة
أمين: بس أنا مش عايز كلامنا ده كله هو مهم ان الواحد يدرك ان الموضوع كبير وكل حاجه ولكن كل الحاجات تقدر تفكر فيها وتدرسها وتستشير ناس وتعملها دراسات عشان تحسب المخاطرة برده فمش عايز حاجه زي كده تخلي الناس تقول لأ انا الموضوع ده صعب لو انت مفكرتش في الحاجات دي خالص يبقى آه حقك تفكر فيها قبل ما تكمل انك تعمل شركتك ولكن احتمال برده الفكرة بتاعتك حتى لو قدامها مصاعب ومخاطر تبقى برده قابله للتنفيذ وهتعملك فلوس بس المهم انك تاخد الحاجات دي كلها في الاعتبار وتعرف تكلم مين وتروح فين وتدرس الموضوع ازاي قبل ما تعمله
فاولاً مهم انك تبقى شغال في حاجه إلى درجة كبيرة أنت عارف السوق ده أو عندك فكرة عنه متبقاش داخل كده معندكش فكرة إيه اللي بيحصل في العادة ان الناس بتخش في حاجه يا اشتغلوا فيها كإستشاريين يا عارفين السوق يا درسوه كويس يا إما هما اصلاً خبرتهم تحليل فعرف يدرس الموضوع
بشوف كتير ناس كانوا شغالين استشاريين في مجال معين وبيحاولوا يفتحوا شركة طبعاً احياناً الناس دي بيبقى ناقصها القدرة على التنفيذ إنه عايز يشتغل استشاري بقى حاجه تانية هل هو فعلاً من النوع اللي بيبتدي شركة رائد أعمال بجد ولا متعود يبقى في شركة كبيرة بس ده مجال تاني بس عموماً يبقى عندك فكرة عن المجال اللي انت داخل تتنافس فيه وتكون دارسه كويس عشان تعرف هتعرف تكمل فيه ولا لأ وتستشير مين ومين اللي يخش معاك كشريك مؤسس عنده خبرات مش عندك كلها حاجات مهمه في المرحلة كالأولانية دي
22:25
عمر: أنا عمري ما بنصح واقول انت المفروض تبقى موظف أو تفتح شركة أنا مش هدفي اني اوجه الناس ان دي احسن من دي أو دي اظرف من دي زي ما احنا ديماً بنقول كل واحد عنده شخصية معينة ، تركيبة فكرية معينة
أمين: ظروفه الحالية والإلتزامات اللي عليه
عمر: الحاجه المشتركة في كل الحاجات اننا نفكر ونحط الارقام بتاعتنا ونحاول نعرف العوائد بتاعتنا سواء انا في وظيفة او هفتح شركتي وبعدين أخد القرار من ناحية علمية مش من ناحية عاطفية يعني هو ده اللي احنا بنحاول نعمله لكن انا زي ما بخوف الناس من مخاطر معينة في الفكرة زي ما في عوائد جميلة ورهيبة وامثله ناجحه كتير اخدت الخطوة وعملتها فأنا ديماً بقول احنا كل اللي بنعمله هنا اننا بندردش مع بعض
أمين: بنوضح الصورة ، بنشوف الناس ممكن تروح تدور فين وتسأل فين وتستشير مين انك تفكر في كل العناصر اللي بتخش في الموضوع
عمر: بالظبط .. انا في النهاية يا أمين النهاردة أنا بشكرك جداً تاني على وقتك معايا النهاردة وانا مبسوط وديماً بنستناك في البودكاست ان شاء الله في حلقات جايه وشكراً على وقتك معايا
أمين: انا استمتعت جداً بالمقابلة دي وبعد ما حطينا خلفية للموضوع ممكن نكمل في حلقة جاية طيب انت عندك فكرة تروح فين والمستثمر ده متوقع إيه والكلام ده ممكن نبتدي نخش فيه بتفصيل أكتر لو حبيت بالنسبة للمستمعين اللي عندهم فكرة حاسين انها ممكن تكمل فعلاً دي حاجه ممكن نتكلم فيها لو حبيت
عمر: إن شاء الله .. ميرسي جداً جداً يا أمين على وقتك وشكرأً جداً على وقتكوا لو بتسمعونا لحد دلوقتي واشوفكوا ان شاء الله الاسبوع الجاي
Translation of some words and terms:
Team فريق
Business شركة
Consulting company شركة استشارية
Marketing تسويق
Assets أصول
Investments استثمارات
Software برمجة
Advertising spend إنفاق الإعلان
Clients عملاء
App تطبيق
Capital رأس مال
Social network الشبكة الاجتماعية
Training تدريب
Quality جودة
Market fit تناسب السوق
regulations أنظمة
Market share حصة سوقية
delivery توصل
consultant مستشار
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر#بودكاست #بودكاست_عربي #بودكاست بالعربي #الموظف #مؤسس_الشركة #الجزء_الثاني