39. خطوات إلى الاستقلال المالي (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
في الحلقتين اللي فاتوا أتكلمنا عن الميزانية ، ليه وازاي تعمل ميزانية وعملنا ملف إكسل تقدر تحمله وتطبق ميزانيتك عليه كل سنة عشان نسهل عليك الموضوع
ولأن الاستقلال المالي بيبدأ بميزانية مظبوطة تقدر تنفذها وتلزم نفسك بيها فحبينا نعيد النهاردة تشغيل حلقة "خطوات إلى الإستقلال المالي" عشان تبدأ تربط الكلام كله ببعض والدنيا توضح أكتر
في حلقة النهاردة بنرد على أكتر سؤال بيجلنا على صفحة الانستجرام بتاعتنا وهو "ازاي ابدأ؟" أنا مش قادر ابدأ ، أنا مش عارف إيه الطريق الصح ، هدف الحلقة هو إن بخطوات بسيطة جداً تبدأ تحوش للوصول للاستقلال المالي الموضوع مش محتاج أي مجهود كل المطلوب خطة ونظام تلزم نفسك بتطبيقه
: في هذه الحلقة
00:45 المقدمة -
03:19 ازاي ابتدي؟ -
06:12 ازاي تبعد عن الشراء الإندفاعي؟ -
07:07 أهداف واضحة للادخار -
07:38 صندوق الطوارئ -
08:00 دور صندوق الطوارئ ؟ وحجمه قد إيه؟ -
08:42 لو عندي قرض بفوايد عالية وعندي حساب استثمار هل أكمل استثمار؟ -
09:34 خلي الموضوع لذيذ -
10:00 7 خطوات إلى الاستقلال المالي -
10:58 استراتيجية واقعية لتنفيذ خطة الادخار بتاعتك -
11:50 ازاي سهولة التنفيذ؟ -
13:03 سهولة الوصول للحساب والتحويل من حساب للتاني جزء كبير من نجاح الخطة بتاعتك -
16:20 ازاي أقيس نجاح النظام بتاعي؟ -
17:35 ليه المقياس مهم؟ -
17:50 الندم مش هيخليك تبدأ لسه عندك سنين كتير.. ابدأ -
18:40 متقارنش نفسك بحد.. قارن نفسك بنفسك -
20:23 الخاتمة -
ديماً البدايات بتكون صعبة ، بس لازم تعرف إن إدارة الحياة المالية عبارة عن روتين زيه زي أي عادة أو مهارة جديدة بتكتسبها محتاجة منك تطبيق مستمر عشان تتعود عليها
أبعتولنا على الصفحة بتاعتنا على الانستجرام لو عندكم اي استفسارات خاصة وشاركونا خطواتكم وازاي ابتديتم وازاي بتطوروا خططكم مع الوقت ابعتولنا احنا ديماً هنرد عليكم
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:45
المقدمة
اهلا بيكوا في حلقة جديدة من بودكاست كلام ينور.. الحلقة دي جاية كلياً من ردود أفعال الناس يعني بحس ديماً في الاسئلة بتاعة الناس اللي بتجلنا على الصفحة اللي هو أنا مش عارف أبتدي ، أنا مش قادر أبتدي ، مش عارف إيه الطريق الصح فأنا قررت أعمل الحلقة دي رداً على الاسئلة دي ورداً على حاجه بتحصل لمعظم الناس اللي بيسمعونا ، وبتحصلي أنا شخصياً يعني أنا في بداية حياتي كنت ديماً بقول أنا عاوز أعمل الحاجه الفلانية دي ازاي أعملها ، لو أنا رايح أتعلم مهارة جديدة معرفش عنها أي حاجه ، أفتراضاً يعني عاوز أتعلم حاجه ليها علاقة (بالترميز) أنا معرفش أبتدي ازاي
ديماً البدايات بتبقى صعبة
في ناس مثلاً تركز في موضوع الأكل فيركز أوي ويعمل دايت أوي ويبقى ملتزم بيه جداً ، فكره معينة أنت مقتنع بيها تبتدي تعملها وتقول لأ أنا هعملها وتبقى الروتين بتاعي وكده.. في إدارة الفلوس والحياة المالية نفس الكلام هو الموضوع عبارة عن روتين أنت محتاج تطبقه بأستمرار ، وديماً تحفز نفسك أنك تعمله
المشكلة في الحاجات المالية أنها بتتعب المخ ، الكلام كتير أوي أنا سمعت الحلقات ولقيت حاجات كتير أوي وابتديت أتوه ومش عارف أروح فين وأبتدي منين؟َ! أنت محتاج وقتها تقف مع نفسك وقفه لازم تعمل نظام بطريقة أنت تستمتع بيها وتتحمس لما تتكلم مع الناس عليها وتساعد نفسك بيها وتخليها جزء من حياتك دي الحاجه اللي هتخليك تبقى مركز وملتزم وبتفكر فيها ومقتنع بيها وتحاول تقولها للأخرين لو أنت مش مقتنع بالحاجه مش هتعملها.. يبقى هدفي في حلقة النهاردة أنك تقتنع أن انت تبتدي تحوش تبتدي يبقى عندك حرية مالية واستقلال كفكر. مش هقولك على الطريقة اللي هي بكره الصبح هتخليك غني أو معاك فلوس بسرعة لأن دي حاجه أنا مش مقتنع اصلاً أنها موجودة وحتى لو وصلت للحاجه اللي أنت عايزها بسرعة جداً لو أنت مش عارف أنت بتعمل إيه أنت بسهوله جداً ممكن تخسرها.. فتعالوا معانا كده نشوف من خلال الحلقة دي ازاي ممكن تبتدي ازاي ممكن تحوش بحاجات بسيطة جداً مش محتاجه أي مجهود كل الموضوع هو تنظيم تفكير واستراتيجية مش أكتر
03:19
أول سؤال النهاردة.. ازاي؟؟ ازاي ابتدي؟
قبل ما تبدأ في التفكير إيه أفضل نظام أنا عايزك تبتدي بحاجات بسيطة يعني تبتدي تجبر نفسك على حفظ طريقة معينة ، الطريقة المعينة دي ممكن تكون زي الطريقة بتاعة الضرايب اللي هي الحكومات أو الأنظمة المختلفة بتطبقها علينا ، أحنا مع الأسف بنلتزم لو علينا ضرايب بنلتزم لو علينا مصروفات معينة شهريه ديماً بنلتزم ولكن لما بنيجي عند الادخار احنا مبنلتزمش فالنهاردة أول نقطة أنا عاوز أتكلم فيها احنا ممكن نعمل نظام ضريبي داخلي على نفسنا بمعني إيه؟ ان أنت تبدأ مثلاً بتطبيق ضريبة معينة على دخلك مثلاً نقول 20% من دخلك دي هتكون ضريبة شهريه أنا هدفعها لحساب التوفير بتاعي الحساب ده أنا مبقدرش ألمسه ابداً فأنا كل شهر بينزلي مرتبي باخد 20% وأحطها
طب لو جالي حاجه زي علاوة أو حاجه مفاجئة أو أنا عندي عمل جانبي بيعمل أي حاجه تانية ممكن أطبق ضريبة أعلى شوية ممكن تبقى 70 أو 80% من العلاوة دي مش محتاجه أنا لأن دي حاجه أنا مش عايش بيها فهطبق على نفسي 70% ضريبة بحولها لحسابي الادخاري.. يبقى دي أول طريقة بنصح بيها الناس تفكر بيها فإزاي تبتدي تحوش
04:54
تاني حاجه لما بيبقى عندي سلعة كبيرة عايز اشتريها زي عربية أو تليفون ، أي حاجه استهلاكية فوق مثلاً نقول 500$ أنا ممكن أعمل نسبة مئوية من الانفاق ده جانبي أحطه على جنب في حساب التوفير بتاعي بمعنى إني رايح اشتري تليفون مثلاً التليفون ده بـ 1000$ رايح اشتري ايفون أو اي حاجه التليفون ده تمنه 1000$ ، أنا هاخد 200$ ضريبة على نفسي وأحطها في حساب التوفير بتاعي يعني هجبر نفسي لما أعمل أي شرا كبير إني أحط عليه ضريبة تانية داخلية أوديها لحساب التوفير وده ليه؟ ده لسببين لأن أنا وأنا بعمل الميزانية اني اشتري التليفون ده نفسياً مش هتفرق أوي لو أنا بشتريه بـ1000 أو 1200 أنا كده كده بدفع رقم كبير فليه مجنبش جزء من الرقم الكبير ده داخلياً على طول في حساب التوفير ، وفي حاجه تانية برده أنها بتخليني أأكد إن أنا بجد محتاج الحاجه الكبيرة دي فأنا النهاردة عملت الـ 20% على السلعة الكبيرة ودي تاني طريقة اني اجبر نفسي عليها
06:12
الحاجه التالتة اللي بنصح بيها ديماً لو أنت واقف في حتة حاسس إن عندك شراء إندفاعي جرب بدل الشرا ده بإنك تحوله لحساب التوفير ، يعني مثلاً أنا واقف هشتري حاجه ملهاش أي لازمه بس هاخد ثانية كده مابيني وبين نفسي وأقول طيب أنا هخش على الحساب بتاع البنك بتاعي أونلاين وأحول الفلوس دي بدل ما أروح اصرفها في المحل ده أنا هحولها لحساب التوفير بتاعي جرب يمكن كل 10 مرات في مرتين أو تلاته تتبسط وتعملها يبقى أنت هنا عملت نفس الرقم ده اللي كنت هتصرفه ، أنت كنت مطلع 100 جنية / درهم / دولار في الحاجه اللي أنت كنت هتشتريها دلوقتي حالاً لأ أفتح التطبيق وحولها لنفسك جرب الطريقة دي لو لقيت الطريقة دي ريحتك نفسياً خلاص أنت بعدت عن الشراء الإندفاعي اللي كنت هتعمله دلوقتي وفي نفس الوقت شيلت فلوس على جنب ودي تالت طريقة أنا انصح بيها في ازاي نعملها
07:07
رابع حاجه لازم يبقى عندك أهداف واضحه لو أنت بتعمل كل الكلام ده ومتعرفش بتعمله ليه ملهاش لازمه ، لازم تبقى واضح في أهدافك أنا مثلاً بحوش عشان التقاعد ، أنا بحوش للولاد عشان يخشوا جامعة معينة ، أنا بحوش عشان لو جالي أي حاجه طوارئ في صندوق الطوارئ أيا كان الحاجه اللي أنت بتحوشلها لازم يبقى عندك أهداف واضحة في دماغك لأن ده اللي بيشجعك وبيديك تحفيزديماً إن أنت تحوش دي رابع نقطة
07:38
خامس نقطة لازم يبقى عندك حاجه اسمها صندوق الطوارئ بتاعك ، وده حاجه نفسياً يعني في ناس بيبقى عندها وناس معندهاش ، اللي بيعرف يدور فلوسه ممكن يبقى عنده السيولة سهل إنه يجيبها من حسابات الاستثمار بتاعته فمفيش مشكلة بس حضرتك لو بتبتدي أنا بنصح إن ديماً يبقى عندك صندوق طوارئ
08:00
إيه هو صندوق الطوارئ ده؟ هو صندوق بتقدر تمد إيدك فيه لو حصل أي حاجه ، طيب الصندوق ده بيبقى حجمه قد إيه؟ الناس اللي بتنصح في المجال يعني بيتكلموا من 3 لـ 6 شهور فحضرتك هتقول أنا مرتبي كذا أنا محتاج من 3 لـ 6 شهور في حساب معين اسمه صندوق الطوارئ أنا بحطهم على جنب ليه؟ لأن ده نفسياً بيخليك ديماً مطمن إن لو جالك أي حاجه فوجائية لا قدر الله سبت شغلك حصل اي حاجه أنت عندك سيولة تكفيك من 3 لـ 6 شهور وده بعيداً عن الاستثمار أو التقاعد أو الحسابات التانية المختلفة يبقى خامس حاجه خلي عندك صندوق طوارئ
08:42
سادس حاجه لو أنت عندك قروض كبيرة بتدفع عليها فوايد كبيرة بمعنى إن عندك ديون بطاقة ائتمان أو قرض أو أي حاجه بتدفع عليه فايدة كبيرة جداً مع الوقت أنا عايزك تدفع أصل القرض ده وتقفل عشان الفوايد الكبيرة دي العوائد اللي ممكن تعملها في الاستثمار ممكن تكون أقل منها يعني إفتراضاً أنا عندي بطاقة ائتمان بدفع عليها 30% في السنة وانا حاطط فلوسي في استثمار بيجيب 5 أو 10% في السنة فملهاش معنى إني استثمر دلوقتي اللي ليه معنى اني لازم أقفل القرض ده الأول.. يبقى في السؤال بتاع أنا عندي قرض وعندي حساب استثمار هل أكمل استثمار ومقفلش القرض؟ لأ ، لو الفوايد عالية أوي على القرض لازم تقفله ده برده ليه؟ عشان ده بيساعدك على تكوين العادة بتاعة الادخار
09:34
سابع نقطة لازم تخلي الموضوع ده لذيذ ، متخليش اليوم اللي أنا هقعد أعمل فيه حساباتي وأحول فيه فلوسي والحاجات دي كلها ده يوم غلس بالنسبالي أو مش عايز أشوفه يبقى أنت كده بتعمل حاجه غلط يبقى أخر نصيحة السابعة خلي عندك عادة ممتعة وتتطلع للقيام بيها متخليش الحاجه دي غلسه بالنسبالك
10:00
دلوقتي بقى هتجيب ورقة وقلم أو ملف أكسيل أو حاجه على الكلاود بتكتب عليها أو أي أداة انت بتستخدمها عشان تكتب حاجتك
: وأقعد جاوب السبع اسئلة دول الاسئلة هما
هبتدي أعمل ضريبة على نفسي ، ضريبة على الدخل وضريبة على أي علاوة إضافية -
لما هشتري حاجه كبيرة هدفع ضريبة عليها قد إيه؟ 10 ، 20 ، 30% على حسب مانت عاوز -
هبدل الشراء الإندفاعي بتاعي بحاجه ليها علاقة بالادخار -
الاهداف الادخارية بتاعتي هكتبهم -
صندوق الطوارئ بتاعي حجمه قد إيه؟ هحوش 3 شهور ولا 6 شهور أيا كان -
عندي ديون ولا لأ؟ وهدفعها في فترة قد إيه؟ -
ازاي هتخلي العادة دي عادة جميلة -
10:58
طيب لما كتبت السبع حاجات دي على الورقة لازم تقنع نفسك اصلاً أنك تقدر تعملهم ، يعني إيه تقنع نفسك إنك تقدر تعملهم يعني متكتبش حاجات ملهاش علاقة بالحياة.. يعني أنا هحوش 50% من دخلي وأنا مقدرش لأني عايش بـ 90% من دخلي مينفعش! يبقى أنت لازم تبقى مقتنع وتقنع نفسك إن الحاجه دي ينفع تطبيقها ليه هنكتبها على ورقة أو هتبص عليها علشان احنا ممكن نقعد نتكلم وتقعد تسمع وتشوف بس لما تيجي تطبق تلاقي الحاجه دي متعرفش تطبقها ايه اللي بيخليك تركز فإن الحاجه ينفع تطبق ولا لأ؟ إن حضرتك تقعد تكتبها بالورقة والقلم وتشوف إيه نسب حدوثها في الحياة إيه إحتمالات تنفيذ الحاجة دي فلازم تبقى واقعي في كتابة الحاجات دي عشان كده احنا عايزين نكتبها على ورقة ونشوف هل هي واقعية ولا لأ
11:50
نقطة تانية مهمة جداً في أي نظام بتحاول تبنيه هو السهولة في الوصول للنظام وسهولة التنفيذ ، يعني لو أنا قولت لحضرتك تعمل حاجه صعبه ، هي فكرة جميلة جداً بس صعبة في تنفيذها ، استحالة تنفيذها يبقى ملهاش معنى. النهاردة لما تعمل السبع نقط دول لازم تقولي ازاي هو سهل في تنفيذه ودي النقطة التانية الكبيرة بعد ازاي ننفذ ، النقطة التانية ازاي سهولة التنفيذ من الحاجات اللي أنا ديماً بقولها إنك لازم تشرحلي النظام بتاعك في 10 – 20 ثانية أنا بعمل 1 ، 2 ، 3 ، 4 فهو سهل فأنا فهمته ، وازاي تقنعني أنا كعمر لما تكلمني مثلاً تقولي أنا بعمل النظام ده وأنا بقنعك ازاي اننا نعمله. يبقى الحاجتين دول مهم جداً جداً في سهولة التنفيذ انك تعرف تشرحه في 10 - 20 ثانية بعد ما كتبته على ورقة وفكرت فيه في عشر دقايق ، ربع ساعة ، ساعة أيا كان أنت جيت شرحتهولي في 10 لـ 20 ثانية وبعد كده أقنعتني بيه
13:03
الحاجه اللي بعديها انه مينفعش يكون محتاج مجهود كبير للتطبيق بمعنى إيه؟ اننا لازم أروح افتح حسابات تسهلي تطبيقه ، يعني مثلاً أنا مرتبي بينزل في حساب معين فلوس البيت هوديها في حساب تاني ، فلوس التحويش بتاع التقاعد هوديها في حساب تالت ، مثلاً بستثمر في حساب السمسرة بتاعي في حساب رابع ، عندي كارت ائتمان بدفع بيه مثلاً حاجات دورية ده الحساب الخامس ، الخمس حاسابات دول موجودين أونلاين أقدر أخش في مكان واحد اشوفهم كلهم مع بعض أقدر اعمل تحويلات ما بين الحسابات في 5 ثواني الموضوع مبقاش مرهق بالنسبالي لأن الموضوع لو مرهق مش هيتعمل لازم تقتنع ان الموضوع لو بالنسبالك مرهق وصعب في فهمه انت مش هتعمله فمتضحكش على نفسك من الأول يبقى تأسيس الحسابات والسهولة في الوصول للحساب وسهولة التحويل ده جزء كبير جداً انك اصلاً تنجح في النظام بتاعك
فبعد ما حضرتك كتبت السبع نقط اللي اتكلمنا عليهم هتروح عامل خطة التنفيذ بتاعتك ، الحساب الفلاني أنا عامل فيه كذا ، والحساب ده هدفه كذا وهكذا ، ممكن تقسم حساباتك دي عن طريق الأهداف اللي أنت عايزها زي ما اتكلمنا لما يبقى عندك أهداف واضحة في النظام ده ممكن تقسم أو تنشئ الحسابات بتاعتك دي بناءاً على الأهداف دي
النقطة اللي بعديها في السهولة هما 3 نقط هتكلم عليهم النهاردة ، النقطة التالتة أنك تقدر تنفذه في يوم أو يومين بعد ما مرتبك ينزل وده عشان يثبت الروتين بتاعك ، يعني مثلاً حضرتك بتقبض يوم 25 في الشهر يوم 26 أو 27 أنا هخش اقعد ساعة واحده على الحسابات بتاعتي دي هعمل كل اللي احنا قولنا عليه ده ، هعمل إيه؟ هخش احول فلوس البيت ، هحول فلوس الفواتير بتاعتي ، هودي فلوس في الادخار ، هحط الضريبة بتاعتي على جنب ، هستثمر في الحاجه الفلانية وهكذا.. الموضوع كله هياخد ساعة في الشهر مش أكتر من كده ومينفعش وقته يكون عشوائي لما حضرتك تفتكر أو تصحي من النوم تفتكر تعمله مينفعش ليه؟ لأن ده برده بيصعب الموضوع العشوائية في التنفيذ بتصعب الموضوع جداً فأنا هعمل إيه انا عارف مرتبي ثابت بينزل في اليوم الفلاني هقعد في اليوم ده أو بعديه بيوم أو اتنين هنفذ كل اللي اتفقنا عليه ده فبرده في خطتك وأنت بتكتبها أنت هتكتب مرتبك بينزل امتى ، في ناس معندهاش مرتب ثابت بتشتغل حر أو بالقطعة يبقى أنت هتتكلم انك عارف ان كل 3 شهور بتقبض رقم معين يبقى هتقعد كل 3 شهور تعمل الحاجات دي ، كل شهر ، أو بتقبض بالإسبوع أيا كان المهم تبقى محدد وقت واحد انك تنفذ فيه الحاجه دي
طيب أنا عملت النظام وعملت الاستراتيجية بتاعتي ، وبعدين عرفت سهولة التنفيذ وأقنعتك بيه وكتبته في ورقة وحسيته واضح ، وكل ما النظام كان بسيط وسهل جداً في فهمه كل ما هيكون أحسن لجميع الأطراف
16:20
طيب بعد ما عملت الحاجات دي ازاي أقيس نجاحي؟ أنا ناجح ولا مش ناجح
أولاً انت بتعمل النظام ده عشان توصل لأهداف معينة خلاص أنا عرفت النقطة دي ، طيب من هنا لحد ما أوصل للهدف ده ازاي في النص أقيس؟ لو رجعت للحلقة 13 احنا اتكلمنا على أنظمة بتقيس حساب التقاعد بتاعك التطور بتاعه الشكل بتاعه بقى ازاي فحضرتك هتنقى نظام معين هتقيس نفسك عليه بمعنى اننا مفروض إن حساب التقاعد بتاعي يبقى شكله عامل كده وانا عندي 30 سنة ، 40 ، 50 ، 60 سنة فأنا هعرف أقيس وقتها فحدد المقياس بتاعك لنجاح النظام بتاعك حضرتك قولت مثلاً انا هدفع ضريبة 20% في الشهرلمدة سنة على مرتبي يروحوا في حساب التوفير بتاعي هتيجي بعد سنة تشوف حضرتك نفذت كام في المية من الوقت في الموضوع ده ، هتشوف حضرتك بتمد إيدك في حساب التوفير ولا لأ؟ لأن دي كارثة كبيرة جداً الناس بتقعد تحوش في حتت معينة وبعدين يحصلها حاجه يقوموا واخدين كل اللي هما حوشوه وعملوا بيه حاجه تانية خالص يبقى أعمل لنفسك حاجات اللي هتحاسب يبها نفسك في أخر السنة
17:35
ليه المقياس مهم لأن مع الوقت هو ده الحافز والمشجع الأساسي في انك تكمل النظام لو حضرتك مبتقسش مش هتعرف أنت ناجح ولا لأ فهتبتدي تزهق بعد شوية
17:50
النقطة اللي بعديها اننا بحس ديماً من الناس لما بتكلم معاهم كتير أنهم ديماً عندهم ندم انهم مبتدوش فيقولك أنا مبتدش مش مشكلة بقى خلاص أنا متأخر وكده ، طيب حضرتك النهاردة عندك 30 سنة او 35 أو 40 أو 60 ومبتدتش ماشي اللي فاضل إن شاء الله في حياتك وقت كافي جداً انك لسه تعمل حاجه ، يعني لو انت 30 وهتتقاعد عند الـ 60 وده قولناه كذا مره انت لسه عندك وقت أنت مش محتاج تندم على أي حاجه ، أنت 45 انت مش محتاج برده تندم على أي حاجه أنت لسه عندك عدد كبير من السنين ودخلك غالبا بإذن الله بيكون بيزيد في الوقت ده فليه ديما تقعد تندم أنك مبتديتش؟ لأن الندم ده ديماً مش هيخليك عمرك تبتدي يبقى دي حاجه طبيعية هتحصلك
18:40
الحاجة التانية اللي ديماً بتأخرك إنك ديماً بتقارن نفسك بالوضع الحالي مع الناس اللي جنبك ، يعني النهاردة جاري عنده عربية عاملة ازاي وبيته كبير وعنده 17 بيت في كل حته فأنا النهاردة بندم إني مبتدتش ومعملتش طيب لو قعدنا بنفس جارك ده اللي هو ربنا ماشاء الله كارمه وحضرتك عملت نظام وخطة استثمارية مع الوقت أنا عايزك تقارن نفسك بعد 20 ، 25 سنة بيه وحتى لو انت مش قادر وعايز تقارن نفسك بالناس يعني أوكيه معنديش مانع بس قارن نفسك بالناس بعد ما تطبق الحاجه دي بعد ما يبقى عندك الأداة المالية اللي هي توصلك لحاجه قدام فقعد فكر مع نفسك لو أنا عملت الخطوات دي وقعدت 10 ، 15 سنة بعمل الحاجه دي طيب انا مكاني هيبقى ازاي أو حاجتي هتبقى فين وقتها انت ممكن تبص للدنيا بطريقة مختلفة تماما لأن ديما الحال متغير واللي انت شايفه النهادردة مش معناه انه هيفضل كده كمان 10 أو 15 سنة فلو حضرتك بتقارن نفسك بالآخرين وأنا بنصح ديماً انك ملكش دعوة بأي حد لأن كل واحد عنده حاجه مختلفة في الحياة أنت لو حابب تقارن قارن نفسك قدام لما تطبق الحاجات دي
أنت لازم تفهم كويس جداً جداً إن كل واحد عنده وضعه الخاص ، كل شخص ليه نظامه في الصرف كل واحد عنده اهداف مختلفة في الحياة أفهم المكان اللي أنت فيه النهاردة وأعمل الخطوات اللي توصلك للحاجات دي بعد فترات طويلة على المدى البعيد
20:23
الخاتمة
وفي النهاية أحب أشكر كل الناس اللي سمعونا لحد دلوقتي وعايزكوا تبعتولي على الصفحة بتاعتنا على السوشيال ميديا صفحة الإنستجرام لو أنت عندك اي استفسارات ليها علاقة بحالتك الشخصية ورينا برده الخطوات بتاعتك ازاي ابتديت تتطور مع الوقت ابعتلنا احنا ديماً هنرد عليك وأشوفكم في حلقة جديدة من كلام ينور
Translation of some words and terms:
Totally كلياً
Feedback ردود أفعال
Skill مهارات
Coding الترميز
Saving الادخار
Fees مصروفات
Bonus علاوة
Business عمل
Tickets تذكرة
Items عناصر
Budget ميزانية
App تطبيق
Retirement التقاعد
Motivation التحفيز
Emergency Fund صندوق الطوارئ
Credit Card Debt ديون بطاقة الائتمان
Loan قرض
Notepad مفكرة
Tool اداة
Tax ضريبة
Probabilities إحتمالات
System نظام
Access وصول / مدخل
Goals أهداف
Create تنشئ
Based on بناءاً على
Billing فواتير
Pay مرتب
Freelancing عمل بالقطعة
Basic اساس
Benchmark معيار
Measure مقياس
Long Term المدى الطويل
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوّر #بودكاست #بودكاست_عربي #بودكاست_بالعربي #خطوات_الاستقلال_المالي #ابدأ_ازاي #إعادة