35. من وراء كلام ينور - مزيكا

---

كلام ينوّر أول بودكاست عربي مبسط عن الحياة المالية

linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها

---

موضوع حلقة النهاردة ده مش مالي كالعادة موضوعنا النهاردة فني شوية لأن معانا ضيف يعتبر صاحب مكان .. واحد من فريق كلام ينور .. بلال علي ضيفنا اللي منورنا النهاردة هو منتج موسيقي ومؤلف أغاني خبرته في المجال الموسيقي أكتر من 10 سنين وهو صاحب المزيكا اللي كلنا بنسمعها في بداية الحلقات

Belal Ali @Instagram : تقدروا تتابعوا بلال وتتواصلوا معاه من هنا

بندردش النهاردة مع بلال في المزيكا وتجربته مع كلام ينور

أحكيلنا قصتك مع كلام ينور؟ -

إيه الخطوات اللي بتعملها عشان تنتج تراك؟ -

العلاقة ما بينك وبين العميل بتاعك بتبقى عاملة ازاي؟ -

مين بلال؟ -

هل بتعمل حفلات خاصة بيك؟ -

ما بين الإنتاج الموسيقي والحفلات والشغل اللي بيطلب منك إيه أكتر حاجه أنت بتحبها؟ -

إيه أصعب تجربة عدت عليك؟ -

كفنان أو صانع محتوى أو متابع للسوق الفني عموماً إيه اللي انت شايفه من وجهة نظرك ممكن نعمله لتحسين كلام ينور؟ -

هل أنت شايف إن البودكاست ده ممكن يفيد الوطن العربي بالذات؟ -

شايف انك ممكن تكون بتعمل إيه بعد 5 سنين مثلاً؟ -

حبينا في حلقة النهاردة نعرفكم على التجربة اللي مرينا بيها عشان نطلع البودكاست ده أملاً منا أنها تكون حلقة ملهمة لأي حد بيسمعنا وحابب يبدأ حاجه خاصة بيه أيا كان نوع المحتوى اللي أنت حابب تقدمه أنت مش محتاج يبقى عندك شركة كبيرة عشان تنتج حاجه شكلها متميز أنت ممكن تستعين بناس تانية في أماكن تانية في تخصصات مختلفة تساعدك وهي دي ميزة التكنولوجيا الحديثة انها سهلت التعاملات وانك تقدر توصل لأي حد في أي مكان

---

.اكتبولنا آرائكم في التعليقات بعد سماع الحلقة

: للأسئلة والأقتراحات

📧 Kalamyenawar@gmail.com 

: تابعونا على موقعنا الإلكتروني

🌐 www.kalamyenawar.com

👇 وصفحتنا على

Omar Shams @ Clubhouse Omar Shams @ LinkedIn : تابعوا شمس على

---

Transcript:

عمر: اهلا بيكوا في حلقة جديدة من بودكاست كلام ينور النهاردة هي حلقة مختلفة هنتكلم مع حد من الناس اللي ساعدونا اننا نعمل البودكاست ده هدف حلقة النهاردة أنها تديك فكرة أن البودكاست ده في فريق وراه والنهاردة هنستضيف أول واحد من الفريق ده برده يشجعك على انك لو عاوز تبتدي حاجه ازاي ممكن تبتدي وتعرف التجربة اللي احنا بنمر بيها عشان نطلع البودكاست ده يارب تكون حلقة ملهمه لأي حد بيسمعنا أو حاجه تلهمك تبتدي حاجتك سواء بتعمل محتوى أو عندك فكرة عاوز تطبقها واستخدام الغير يعني مش لازم يبقى عندك شركة كبيرة أو عندك فريق كبير عشان تنتج حاجه شكلها متميز أو محطوط فيها مجهود ممكن تستخدم ناس في الخارج فيارب الحلقة دي تنول حسن رضاكم وهنكرر الموضوع ده مع ناس تانية ساعدتنا في البودكاست

النهاردة أنا معايا بلال علي ، بلال هو اللي عامل الإنترو بتاع بودكاست كلام ينور المزيكا اللي كلنا بنسمعها في بداية الحلقة وأول مره أقابل بلال فعلياً النهاردة .. ازيك يا بلال أخبارك إيه؟

بلال: الحمدلله تمام أنت عامل إيه

عمر: القصة بتاعة التراك بتاع كلام ينور أنا عايز أسمعها منك مش لازم أنا أحكيها .. إيه اللي حصل؟

بلال: أنت كلمتني في وقت مكنتش شغال فيه على مزيكا ولا أي حاجه بسكنت بشتغل فريلانس (مستقل) وكنت لسه قبلها شغال على بودكاست بتاع صديق ليا فبتعهولك كمرجع وبعدين قولتلي البودكاست بيتكلم عن إيه وقعدنا نتكلم شوية وقعدت اسألك على رؤيتك وشايف البودكاست ده عامل ازاي ، وكان يفرقلي جداً ذوقك في الموسيقى علشان برده هيساعد أكتر البودكاست نفسه والموضوع كان سهل أوي في 3 أيام كنا خلصنا الموضوع كله وآه المزيكا بالنسبالي حاجه ممتعة اني أحاول  أحلل الشخص اللي قدامي عايز إيه وازاي أنا أوصله للي هو عاوزة بس بالطريقة اللي أنا بحب أعملها فأنا بستخدم حاجات في المزيكا بتاعتي ، أصوات معينه مش هستعملها لعملاء أو ناس تانية ، فهي كانت عملية ممتعة بالنسبالي أوي احس اني وصلت لحاجه في النص أوي بيني وبينك

عمر: طيب ، أنا طبعاً اول مرة في حياتي يبقى ليا علاقة بالمزيكا كإنتاج ممكن عادي زي أي حد بسمع مزيكا والكلام ده كله ولكن أول مره ابقى مشارك في حاجه اننا ننتج مزيكا حتى لو 30 ثانية مش طويلة ولكن أنا استغربت حاجه برده وتاني أنا معنديش أي فكرة ، أنا بعتلك  قولتلك إيه انواع المزيكا اللي بحبها أو متخيل المزيكا هتبقى عامله ازاي أنت بعتلي حاجه أنا سمعتها وقولتك لأ هي بعيده أوي عن اللي أنا متخيله قولتلي طب أستناني نص ساعة كده وبعدين عملت حاجه غريبه جداً وبعتلي حاجه هي بالظبط اللي أنا عايزها فإيه اللي حصل في النص ساعة أو الساعة دي؟ عشان برده أنا مش فاهم انت قولتلي أنا اخدت من نفس الخامة بتاعة الحاجه الأولانية وعملت بيها الحاجه التانية لكن هما ملهمش علاقه ببعض للودن العادية اللي زيي يعني

بلال: الموضوع بكل بساطة انا لما بعتلك أول حاجه أنا كنت قلقان شوية اني مكنتش متأكد من الحاجه اللي انا ببعتها دي ولكن أنا اتفقت معاك على ميعاد فأنا هبعتلك مسودة أوليه تسمعها وانت أكدتلي انه مش عاجبك لأني كمان مش متأكد منه أوي ، عاجبني اجزاء منها وعجبني اجزاء من اللحن ، لكن الأصوات مكنتش حاسس اني وصلت للحته اللي احنا عايزنها فأخدت نفس الفكره وعدتها من الأول بس على الأقل عندي الموسيقى نفسها ،  كأصوات كترتيب كإنتاج محتاج يكون مختلفة تمامًا .. الفكرة هي نفسها بس في شكل مختلف خالص

عمر: يعني هل مثلاً التراك بتاع المزيكا ده بيبقى متقسم حاجات معينه فوق بعض فأنت أخدت حتت منها غيرتها ولا الموضوع ازاي يعني لواحد مش فاهم أي حاجه

بلال: هو أعتبره زي تصميم يعني أي خطوات للتصميم بتبقى عندك مشكلة بتحاول تحلها فأنت دلوقتي الأغنية أي أغنية بيكون فيها أجزاء زي ما قولت فيها "الدرامز" فيها "الباس" فيها لحن فيها التوابل اللي هتملى بيها الفراغات فيها أي حاجات في النص تخلي الموضوع مش ممل للي بيسمع الحاجات اللي هتترمى كده مش هتتعاد تاني فأنا كان عندي الهيكل بس بألوان مش عجباني أنا وأنت

عمر: يعني الرسمه موجودة  بس الألوان نفسها مش حلوة

بلال: فانا أخدت معايا الهيكل ومعايا أفكار للطبلة فكرة للبييت عندي اللحن حتى اللحن الأساسي او اللي بيشد مكنتش لسه ظبطه اوي بس أنا عارف أنا رايح في أنهي مساحة مثلاً أو أنا رايح في لحن عامل ازاي فأخدتها تاني وعيدتها من الأول خالص أنا عارفها لأنها مكتوبة عندي على اللابتوب بس أكني بشتغل من الأول مسكت حاجه حاجه وقعدت أشتغل عليها من الأول

الدرامز طيب أيه المشكلة اللي فيها طب لو عملتها كده أعملها ازاي طب لو عملتها كده هتبقى حلوة ولا لأ أزود عليها درامز تانية في الحتة دي ولا لأ وهكذا "الباس"  بدل ما كان واحد بقول تلاتة اللحن حطيتلها شوية تأثيرات مختلفة غيرت في الصوت شوية عشان يفيد الحته اللي احنا اتفقنا عليها في حتة انها تكون شوية شرقي بس مش تماماً وفي نفس الوقت يكون فيها الحته المودرن الحديثة أكتر فابتديت ألعب بالتأثيرات وهكذا كل طبقة لوحدها

عمر: انت قولت أن أنا عميل .. طيب أنت لما تعاملت معايا هل مثلاً أنت بتشوف الناس كلها بتبقى جيالك باختيارات معينه ولا أنت بتحاول ديماً تديهم أختيار يعني العلاقة ما بينك وبين العميل بتاعك بتبقى عاملة ازاي في العموم؟

بلال: الموضوع بيكون مختلف أوي على حسب العميل يعني في ناس بتبقى عارفه بالظبط هي عايزة إيه بس مش عارفه تشرحلي فده بيكون الصعب بالنسبالي أني أحاول أوصل للي الشخص ده عاوزة وفي الغالب ساعتها مش هيقبل أوي أفكاري فوقتها هحاول أقرب للي هو عاوزة أكتر حاجه ، يعني أنت لما أتكلمت معايا انا جمعت ان الشخص ده واضح وصريح وصادق فالحاجه اللي هو بيعملها ونفسه يعمل حاجه معينه وشغوف بيها

عمر: بس يمكن مكنتش عارف أنا عايز إيه

بلال: صح وده بالنسبالي حلو عشان في مساحة ان احنا نتعاون ، حتى أول حاجه قولتهالك إيه مش عايزها كام ثانية احكيلي عايزين نتكلم أنا هعرفك أكتر هعرف دماغك أكتر هعرف أفكاري هتبقى قريبه للي أنت عايزه وهيكون في المساحة ان احنا نعمل حاجه قوية بس في ناس بتبقى عايزة العكس في ناس بتبقى عملتله حاجه واحده معجبتهوش ويفكس خالص ميكلمنيش تاني فالموضوع مش ثابت وبيختلف جداً من شخص لشخص

عمر: طيب السؤال اللي مفروض كنت اسئلهولك أول سؤال زي أي مقابلة مين بقى بلال؟

بلال: أنا منتج وموسيقي ومؤلف أغاني بقالي أكتر من 10 سنين بس بخبط يعني طول الوقت بغير وبجرب حاجات تانية بس أنا مدرستش موسيقى أنا تخرجت من عمارة فنون جميلة جامعة اسكندرية وبعدين سبت اسكندرية وروحت القاهرة وقررت اني امتهن الموسيقى لسه مكنتش عارف أعمل إيه بالظبط وده اللي لسه بحاول أعمله

Fussy Little brain وبعمل مزيكا بتاعتي

حاجه بعيد خالص عن اللي عملتهالك بس دي المزيكا اللي بكتبها لنفسي بعتبره بتاعي بدون فيه أفكاري ، ده غير الحاجات اللي بعملها كشغل بيطلب مني يعني بس

عمر: وهل بتعمل حفلات؟

بلال: أه كتير في القاهرة

عمر: طيب ما بين الإنتاج والحفلات والشغل التجاري اللي بيطلب منك لو هما دول الـ 3 حاجات اللي أنت بتعملهم إيه أكتر حاجه أنت بتحبها؟

بلال: أكتر حاجه بحبها المزيكا اللي بعملها لنفسي بصراحة اللي هي جزء منها حفلات علشان دي اكتر حاجه ممكن أكون نفسي 100% اللي هو انا هعمل الحاجه وهنزلها على الإنترنت أو لايف اللي عايز يسمعني هيسمعني واللي مش عايز مش مشكلة مش خسران حاجه بالنسبالي بيبقى عندي حاجات أقولها بقولها وبشوف اللي بعدها إيه وبعملها والموضوع بالنسبالي هو تدوين كل كام سنة بمر بحاجات معينه بطلعها في شكل فن

طيب الحاجات اللي أنت عملتها للعملا زي مثلاً كلام ينور.. إيه أصعب حاجه عملتها أو أكتر تجربة كانت غريبة عليك مثلاً؟ 

بلال: هما في 2 كانوا صعبين بس لأسباب مختلفة أصعب حاجه كان في "ثيرابي كلينك" شركة وكانوا طالبين حاجه لإعلان هينزل بإجزاء  مختلفة جداً لبودكاست وللإعلان نفسه على نسخ تانية للإعلان

عمر: يعني زي هوية موسيقية للعرض كله كده؟

بلال: بالظبط ، وهما كانوا لسه بادئيين كمان فهما نفسهم مش عارفين هما عاوزين ايه الميعاد النهائي كان قريب جداً وحاجه أنا معملتهاش قبل كده أنا معظم حاجتي فيها طاقة ده بنكلم في عواطف وحاجات كده وكان وقت كورونا فأنا اصلاً متصفي فدي بالنسبالي كانت صعبه ان انا أحقق التوقعات المطلوبة بره المساحة اللي بستريح فيها

تاني حاجه صعبة كانت عملت مزيكا لفيلم أزياء ده كان صعب في حتة اني كنت موديل في الإعلان والتصوير كان في بورسعيد فكنت بروح بورسعيد أسجل في المصنع واستعمل الأصوات اللي أنا بعمل بيها المزيكا والأصعب من كل ده اني كنت شغال مع ناس صحابي ودي بتبقى أوحش بكتير عشان التوقعات بتاعتهم في حته أعلى بكتير والموضوع بيكون فيه مشاكل شخصية عشان شغال مع ناس عندهم توقعات معينة فلو حصل مشكلة في الشغل ودي كانت صعوبة تانية دول كانوا اصعب حاجتين لكن الباقي كله حد عنده فكرة بيعمل حاجه بشتغل عليها كام يوم ، اسبوع والموضوع خلص

عمر: أنا برده في حاجه بحبها في الزمن ده احنا عملنا مشروع مع بعض ، عملنا إنتاج واحنا متقبلناش كلها حاجات مبعوته أونلاين والموضوع خلص بسرعة جداً يعني ممكن من 10 ، 15 سنة مكناش نعرف نعمل الحاجه دي فبرده احنا لازم نشكر التكنولوجيا يعني بعتلك الحاجه رديت عليا الدنيا كانت سريعه جداً بصراحة انا ديماً بتفاجئ من الشغل عن بعد وقد إيه الموضوع بقى لطيف وعلى فكرة الفريق بتاع كلام ينور في حاجات كتيرة جداً معمولة بالطريقة دي وأنت أول واحد نتكلم معاه يعني من الفريق اللي أشتغل على البودكاست بالكامل .. طيب أنت مكنتش تعرفني قبل البودكاست ، أو متعرفش انا بعمل إيه في البودكاست وانا نفسي مكنتش عارف بس من ناحية كفنان أو صانع محتوى إيه اللي ممكن نعمله أحسن من وجهة نظرك الفنية

بلال: انا بصراحة من اللي سمعته لحد دلوقتي  وحتى من أول ما بدأت أنا مكنتش حاسس إن في مشكلة عندك خالص بالعكس أنا اول مرة أكلمك كنت حاسس انك متوتر عشان لسه بتبدأ حاجه بس لما بسمع البودكاست بلاقي التوتر ده مش موجود

عمر: يمكن بحاول أخبيه 

بلال: لأ يعني كان في حتة القلق ودي منطقية جداً عند أي حد بيبدأ حاجه بتاعتهم لأن في الاخر المشروع ده حته منك فالقلق اللي بيجي مع الموضوع ده متوقع وصحي لكن لما بسمع البودكاست مش حاسس بالتوتر بالعكس حاسك مرتاح أكتر بكتير من اللي أنا كنت متخيله عشان أنت بدأته ، هي بس البداية لكن انا مش بحس ان في مشكلة في البودكاست خالص محتاج تحسن منها علشان هو بجد واقعي وفي نفس الوقت انت صريح في حاجتك وبتوصلها بطريقة سهلة جداً مش محتاج حاجه أكتر من كده وفي تواصل بينك وبين المستمعين بتوعك فتمام

عمر: والناحية الفنية انت بتشوف حاجات تانية يعني أنت متابع للسوق؟

بلال: آه

عمر: طيب أنت النهاردة مثلاً شايف بعد 5 سنين أو 10 سنين كصناعه للبودكاست من وجهة نظرك وإنك شوفته معايا أو ابتديت تركز أكتر هل شايف ان في حاجه في البودكاست يفيد ممكن الوطن العربي بالذات يعني إيه رأيك في الموضوع ده

بلال: أنا شايف إن الموضوع هيكبر علشان معظم الناس لو مش كل الناس بتسمع راديو وخصوصاً في مصر فالموضوع شبه كده بس بدل ما بيكون راديو للجمهور وفيه حاجه مزيفه شوية أكن حد بيحاول يبيعلك حاجه ، البودكاست هو بيكلمك انت بشكل مباشر في محادثة حتى لو انت مش بتتكلم يعني اول ما سبوتيفاي دخل مصر كان الناس اللي اعرفهم في الدواير اللي حواليا يعني مكنش لسه البودكاستس موجودة في الأول بس أول ما البودكاست ابتدت تشتغل كذا حد كان بينصحني بيه ، الناس بتحب تسمع الحاجات دي وفي ناس بتتعلم حاجات كتيرة جداً حتى لو هما مش مركزين مثلاً 50% بتفرق معاه في الحياة اليومية وبيرجعلها تاني

عمر: أنا يمكن أتكلمت الكلام ده في الحلقة الأولانية أو عبر الحلقات ان أنا مستهلك للبودكاست عموماً ، أنا بعمل بودكاست عشان أنا استفدت كتير من حاجات تانية وشايف قد إيه الأهمية ودي جزء من الرسالة ان انا عايز أخلي الناس مش بسمع تسمع بودكاست كلام ينور انا عايزهم يسمعوا حاجات تانية عشان أكيد في حاجات تانية أحسن مني بكتير وممكن يتعلموا منها والألوان كلها مختلفة

طيب هسألك سؤال أخير بعد مثلاً 5 سنين أو 10 سنين شايف أنت ممكن تكون بتعمل إيه انا عارف انه ممكن يكون سؤال صعب اوي أنا عارف انه يمكن بره المجال بتاع الحياة عشان برده بعد 5 / 10 سنين نسجل معاك تاني

بلال: ولو موصلتش للي أنا عايزة مش لازم نعمل ده تاني أنا اتسألت السؤال ده كذا مره قبل كده وردي هو هو نفسي شغلي يكون هو الموسيقى واني بترجم أفكاري في شكل موسيقى وأيا كان شكله بقى مزيكا ليا او لرؤية حد تاني ، حتى لما بعمل مزيكا ليك أو لفيلم أو اي حاجه أنا بحط جزء مني في الحاجه دي فهي شخصيتي فأنا مش هقولك رؤيتي كمان 5 / 10 سنين انا نفسي وده ممكن يكون كلام روحاني أوي بس نفس في حياتي دي أسيب ورايا حاجه أنا عملتها تعبر عني أحسن ما انا بعبر عن نفسي كبني آدم في مراحل حياتي المختلفة

عمر: الموسيقى عموماً هي أداة من ادوات التعبير ، الحاجات الفنية عمتاً هي كلها حاجات بترسل رسالة بس مش بالكلام أنا فاهم قصدك ، احنا برده هنسيب في الشو نوتس بتاعة الحلقة النهاردة الطرق اللي الناس تقدر تتواصل معاك بيها  

بلال: أنا موجود على انستجرام ، سبوتيفاي ، الإيميل بس آه انا هحط الحاجه كلها بطريقة متناسق أكتر

عمر: هنحط كل حاجه في الشو نوتس عشان الناس برده تقدر تتواصل معاك وتقدر تسمع المزيكا بتاعتك على سبوتيفاي أو انغامي او اي حاجه من الحاجات دي ويقدروا يبعتولك رسايل على طول على السوشيال ميديا .. ميرسي جداً يا بلال وإن شاء الله مش هيبقى أخر تعامل يعني بإذن الله يبقى في حاجات تانية نعملها مع بعض في البودكاست إن شاء الله ميرسي جداً على وقتك النهاردة وهنتكلم تاني نشوف أنت عملت إيه بعد شوية إن شاء الله ميرسي جداً يا بلال

---

Translation of some words and terms:

• Physically جسدياً  

• Freelance مستقل

• Reference مرجع

• Vision رؤية

• Taste ذوق

• Smooth ناعم

• Dissect تحليل /شرح

• Clients عملاء

• a Fun Process عملية ممتعة

• As a Production كإنتاج

• Involve شارك

• Draft مسودة

• Reached وصل

• Arrangement ترتيب

• Production إنتاج

• Package شكل

• Design تصميم

• Drums طبول

• Bass صوت عميق

• Melody لحن

• Cords حبال

• Skeleton هيكل

• Baseline أساسية

• Catchy جذاب

• Scale مقاس

• Layer طبقة

• Effects تأثيرات

• Modern حديث

• Consistent ثابت

• Struggle كافح

• Honest صادق

• Passionate شغوف

• Cooperate تعاون

• Interview مقابلة

• Producer منتج

• Musician موسيقي

• Song Writer مؤلف أغاني

• Pursue تعقب

• Journal دفتر اليومية

• Commercial تجاري

• Live Performance حفلات

• compromise مرونة / حل وسط

• Art فن

• Soundtrack الموسيقى التصويرية

• Deadlines الموعد النهائي

• Professional محترف

• Therapy Clinic عيادة علاجية

• Cut out قطع

• Music Identity هوية موسيقية

• Energy طاقة

• Emotions عاطفة

• Expectation توقعات

• Remote work العمل عن بعد

• content Creator صانع محتوى

• Down to Earth بسيط / واقعي

• Connection اتصال

• Audience جمهور

• Industry صناعة

• Recommend يوصي

• Scope مجال

---

تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة

#كلام_ينوّر #بودكاست #بودكاست_عربي #بودكاست_بالعربي #من_وراء_كلام_ينور #مزيكا