25. التقاعد (إعادة)
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
التقاعد واحد من أهم المواضيع وأكبر المشاكل اللي بناقشها ديماً في بودكاست كلام ينور ونظراً لأن بفضل الله وبفضل تفاعلكم معانا صفحتنا بتكبر وبينضملنا ناس جديدة كل يوم حبينا النهاردة نعيد تشغيل الحلقة 7 لأهميتها وعشان الناس الجديدة اللي بتسمعنا لأول مرة وعشان نشجعك كمان ترجع تسمع الحلقات القديمة تاني
هدف الحلقة هو تغيير فكرنا ونظرتنا لمرحلة التقاعد على انها مرحلة بعيدة مش مضطرين نفكر فيها من دلوقتي وازاي تكون فاهم ومستعد مالياً لفترة التقاعد
: في هذه الحلقة
00:44 مقدمة الحلقة 25
02:11 مقدمة الحلقة 7
03:50 هناقش في الحلقة دي 5 اسئلة اساسية
04:29 دي ليه لازم نفكر في التقاعد اصلاً؟
07:24 أبعاد المشكلة في المنطقة العربية؟
09:38 ما هو متوسط العمر المتوقع للإنسان وازاي بيتحسب؟
12:33 احنا جاهزين لمشكلة التقاعد فكرياً ولا لأ؟
13:13 إيه اللي بيحصل في التقاعد وإيه اللي الناس بتمر بيه؟
14:53 تأثير التقاعد على حالتك النفسية
16:05 اهتمامك بنفسك هيحميك أنت وأولادك في سن التقاعد
18:35 الدول المتقدمة عملت إيه وحلت موضوع التقاعد ازاي؟
21:54 التكافل التأميني البديل الإسلامي
23:40 بند التقاعد مصروف إجباري مش رفاهية
26:09 ملخص الحلقة
28:15 الخاتمة
التحويش للتقاعد مش رفاهية ولا أنانية منك بالعكس أنت هتحمي نفسك وأولادك من مشكلة كبيرة ممكن تحصل في المستقبل
: روابط
https://data.un.org/Data.aspx?q=egypt&d=PopDiv&f=variableID%3A68%3BcrID%3A818
.اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
00:44
مقدمة الحلقة 25
اهلاً بيكوا في حلقة جديدة من كلام ينور النهاردة احنا هنعمل إعادة تشغيل لحلقة للحلقة رقم 7 اللي كان عنوانها (التقاعد) سبب الإعادة النهاردة إن الحلقة دي بالنسبالي من أهم الحلقات كهدف من البودكاست يعني انا ديماً بحب الحاجات اللي هي طويلة الأجل ، الحاجات اللي هي بتغير تفكيرك في حاجات كبيرة وفي نفس الوقت بتخليك تعمل حاجات صغيرة من سن صغير تديك تأثير كبير في حياتك أنا عارف إن في مواضيع تانية ممكن تبقى شيقة أكتر ، لذيذة ، ممتعة وانت بتسمعها لكن موضوع التقاعد ده بالنسبالي من أهم الحاجات والحلقة دي أنا بحبها جداً ومن أحلى الحلقات المعمولة ، فمبا إن الصفحة الحمدلله بتكبر مؤخراً وفي ناس جديدة كتير بتسمعنا لأول مرة فتعمدت إني احط الحلقة دي تاني في طريقهم وده برده يشجعك ترجع تسمع الحلقات القديمة لو في موضوع معين مسمعتوش ممكن ترجع تبص على الحلقات القديمة كلها لو في حاجه عجباك تسمعها.. فهسيبكوا مع حلقة التقاعد وأشوفكوا تاني الاسبوع الجاي
02:11
مقدمة الحلقة 7
اهلاً بيكوا في حلقة جديدة من بودكاست كلام ينور.. الحلقة دي ممكن يكون عنوانها كبير ومعقد تقاعد أنت ليه بتكلمنا في حاجه بعد 30 سنة ، 50 سنة احنا كلنا شباب هنا اللي بنسمع بنسبه كبيرة بناءاً على البيانات اللي بشوفها متوسط العمر هنا من 25 لـ 45 سنة ، ليه بتكلمنا في حاجه بعد سنين طويله! عايز أقول حاجه الحلقة دي من أهم الحلقات اللي ممكن تتعمل في البودكاست من ناحية انها لازم تغير فكرك في الحته دي يعني في حاجات بسيطة صغيرة تأثيرها في حياتنا بتكون صغير الحلقة دي ممكن تأثيرها كعدد سنين معين ممكن تفرق كتير والمجهود اللي انت محتاج تعمله ممكن يبقى أقل بكتير لو عرفت بدري. يعني في حاجات معينه كده لو عرفتها بدري في الحياة المجهود بتاعها بيبقى أقل بكتير انك تعرفها متأخر فعشان كده الحلقة الحلقة دي مهمة جداً جداً
الحلقة دي طويلة الأجل بشكل غير عادي ، مش بنتكلم في حاجه هتحصل السنادي أو السنة الجاية احنا بنتكلم في حاجه هتحصل كمان 20 - 30 سنة فمتفتكرش انها مش موجه ليك أو لسه بدري اوي.. اسمع تقاعد ليه!! لازم اسمع التقاعد قبليها بـ5 سنين بس.. لأ بالعكس خالص أنت لو سمعتها وانت عندك 20 سنة احسن ما تسمعها وانت عندك 30 حتى.. كل ما تسمع بدري كل ما يكون أحسن
03:50
هناقش في الحلقة دي 5 اسئلة اساسية
ليه لازم نفكر في التقاعد بدري؟ -
أبعاد المشكلة في المنطقة العربية؟ -
إيه اللي بيحصل في التقاعد وإيه اللي الناس بتمر بيه؟ -
الدول المتقدمة عملت إيه وحلت الموضوع ده ازاي أو شافوا إيه الحلول؟ -
شوية استنتاجات كده وأفكار نقفل بيها الحلقة -
فخليكوا معانا النهاردة حاولوا تسمعوا الحلقة دي ، والحلقة دي هيبقى ليها بواقي قدام يعني مش هتكون بتحل المشكلة بالكامل النهاردة
04:29
أول سؤال معانا النهاردة عاوز أجاوبه في الحلقة دي ليه لازم نفكر في التقاعد اصلاً؟
ليه محدش بيفكر التقاعد.. محدش علمنا في المدارس أو الجامعات ازاي نفكر في التقاعد! محدش بيتكلم في الموضوع ، وده بسبب ان التركيبة المجتمعية خاصةً في البلاد العربية كلها شباب فأنتت لما تلاقي المجتمع كله شباب غالباً الحاجات المسيطرة على الفكر وعلى الإعلام أو على السلع اللي مفروض تتباع بتبقى متوجهه لأغلبية المجتمع فصعب تلوم إن الناس مبتفكرش في التقاعد لأن التركيبة السكانية نفسها متخليكش تفكر في التقاعد
في حاجه كمان مستويات الدخل في بعض الدول العربية يادوب بتغطي الإحتياجات اليومية يعني بلد زي مصر أو اليمن أو بعض من الدول العربية مستويات الدخل يادوب وفي دول اللي تعتبر عندها موارد زي دول الخليج معندهاش لسه تركيبة سكانية قديمة أوي لدرجة ان احنا نشوف أعداد كبيرة من الناس اللي في سن التقاعد.. فدي شكل التركيبة السكانية في المجتمعات العربية
06:08
برده محدش هيبقى بيفكر في قد إيه حجم المشكلة هيبقى كبيرة في المستقبل يعني المشكلة دي بعيده لسه ، وانا صغير أنا إيش يعرفني إيه هيحصل وانا عندي 65 سنة أو 75 سنة ، فالمشكلة بعيدة واللي ديماً بعيد مبفكرش فيه
06:30
في بعض الدول الحكومات والشركات بتلعب دور كبير انها تخليك تفكر في التقاعد ، بتحطلك برامج معينة من التقاعد بتدخلك في نظام معين تحوش فيه جزء من مرتبك مع شغلك انه يديهولك في التقاعد ، المعاشات ، التأمينات ، الحاجات دي كلها.. فدور الحكومة مهم جداً جداً لزيادة الوعي عند الراجل العادي اللي مبيفكرش في الموضوع وده انا شايف في جهود كبيرة جداً من الدول العربية كلها انهم يوفروا معاشات أحسن ، يوفروا أنظمة أفضل ودي من الحاجات اللي مكنتش بتخلينا نفكر في الموضوع أوي لانه دور من أدوار الحكومة و المؤسسات
07:24
تاني حاجه عايز أغطيها النهاردة أبعاد المشكلة ، إيه هي أبعاد المشكلة اللي بنتكلم فيها؟
المجتمع النهاردة أغلبيته صغير، في الدول العربية معظم الناس صغيرة زي ما قولنا ولكن لو جرّينا الشريط لقدام هنلاقي إن جزء أكبر من المجتمع ابتدى يخش في سن التقاعد كمان 20 أو 30 سنة
يعني كمثا حسب المعلومات الموجودة على صفحة الأمم المتحدة ان في 2050 هيبقى 1 من كل 6 في العالم أكبر من 65 سنة بالمقارنة النهاردة 1 من كل 11 في العالم أكبر من 65 سنة فمعنى كده إن النسبة هتفرق جامد جداً من دلوقتي لقدام.. في 2050 في أوروبا وأمريكا برده هيبقى 1 من كل 4 لأن الدول دي أكبر منطقة مقارنة بالمنطقة العربية
في 2018 أول مره في التاريخ إن الناس اللي فوق الـ 65 سنة تبقى عددها أكتر من الأطفال اللي تحت 5 سنين ودي حاجه كبيرة ، يعني تخيل الهرم السكاني شكله بيتغير القاعدة في الهرم ديماً بتبقى أكبر اللي هي الأطفال والقمة اللي هي الناس اللي فوق 65 سنة دول أصغر حاجه دلوقتي الهرم ابتدى شكله يتغير ومع الوقت هيتغير أكتر وأكتر.. أنا ليه بقولك الكلام ده لأن احنا بنحاول نوضح التركيبة السكانية الموجودة النهاردة في العالم أو في الدول العربية في 2050 اللي هو سن التقاعد لمعظم الناس اللي بتسمعنا النهاردة
زي ما قولنا سن معظم الناس اللي بتسمعنا النهاردة مابين 25-45 سنة على حسب البيانات اللي بشوفها ، احنا كتركيبة في المجتمع معظمنا هيبقى دخل في سن التقاعد وهيبقى عددنا أكتر بكتير مقارنة بالنهاردة
09:38
طيب في حاجه تانية اسمها العمر المتوقع للإنسان ، والعمر المتوقع للإنسان ده بيتحسب ازاي؟ بتروح كل دولة وتاخد الإحصائيات بتاعتها من سجل الوفيات بتاعتها وبيعرفوا قد إيه العمر المتوقع للإنسان
البيانات بتاعة العمر المتوقع للإنسان موجودة أونلاين تقدر تبص عليها في الموقع بتاع البنك الدولي وصفحة الأمم المتحدة وهنحط روابط للمعلومات دي في الشو نوتس
لو بصينا على البيانات هنلاقي اننا من 1940 لـ 1950 في النطاق ده كان متوقع عمر الناس من 40 لـ 45 سنة ، في الخمسينات كان العمر المتوقع هو 45 سنة ، هنلاقي النهاردة انه راح لـ 72 سنة
يعني إيه 72 سنة؟؟ أنا بكررها معلش إنه إيه المتوقع اللي ان احنا نعيشه ، 72 سنة في 2020 لو روحنا لـ2050 العمر المتوقع راح قرب 78 سنة.. ليه العمر بيطول؟ لأن بيحصل طفرات طبية ، تكنولوجية ، بتسيطر على أمراض معينة ، زمان مثلاً سنة 1850 تقريباً كان كل 6 بيتولدوا 2 بس بيعيشوا لأن النظام الصحي مهم جداً وقت الولادة مكنش موجود وهكذا.. فليه العمر حصله إطاله؟ بسبب الطفرات الطبية والتكنولوجية
طب في 2050 هل الرقم اللي هو 78 ده حقيقي؟ لأ ممكن يحصل طفرات طبية والعمر المتوقع يزيد أو يقل الله أعلم يعني.. طبعاً الأعمار بيد الله بس احنا بنتكلم على الموضوع من ناحية إحصائية بحته
11:42
طيب أنا ليه بناقش الرقم ده لأن لو احنا بنتكلم في 2050 المتوقع 78 سنة مثلاً وانت سن التقاعد في دولتك مثلاً 60 سنة فانت عندك 18 سنة في التقاعد ده لو انت عشت المتوسط ، في ناس صحتهم كويسة وبيقدروا يهتموا بنفسهم بطرق معينة فممكن يحصلهم مد فوق الـ 78 سنة فأنت ممكن تعيش 20/25 سنة في التقاعد
وهدف الحلقة دي إن انت الـ20 / 25 سنة اللي هتعيشهم في التقاعد يبقى مالياً انت فاهم إيه اللي بيحصل فيهم وبتجهزلهم من بدري ، كل ما تبتدي بدري في التجهيز كل ما الحل هيبقى أسهل عليك بكتير
12:33
احنا جاهزين للمشكلة دي فكرياً ولا لأ؟
مع الأسف انا مش شايف إن الناس بتتكلم في مشكلة التقاعد من بدري يعني أنا عمري ما شوفت حد عنده 20 - 25 سنة مهتم وخاصة في الدول العربية اللي هو أنا عايز أحل مشكلتي وانا عندي 65 سنة محدش هيبقى بيفكر بالبعد البعيد ده ودي أكتر حاجه غلط لأنها بتخليك عمرك ما تبتدي مع إنك كل ما تبتدي بدري كل ما يوفر عليك مجهود رهيب إنك تحقق الهدف بتاعك في التقاعد
13:13
طيب السؤال التالت بقى إيه اللي بيحصل في التقاعد؟
يعني لوعايزين نعمل تخيل أو تصور لإيه اللي بيحصل في التقاعد.. أنا طبعاُ مش في التقاعد فمعرفش بس أنا بتخيل أو بحاول اقرأ واجيب معلومات
الدخل بينزل بنسبة كبيرة لأن الناس بتعتمد على المعاشات وده مش بيبقى كافي إنه يوفر حتى الإحتياجات الأساسية لأن الدخل ممكن ينزل 70/75/80% في بعض الأحيان ليه؟ لأنك مفكرتش في مشكلة التقاعد بتاعتك ومعتمد تماماً إنك هتاخد معاش من الحكومة أو هتاخد معاش من الشغل وبعدين تكتشف إن بعد 20 أو 25 سنة إن الرقم اللي انت كنت هتاخده في وقت التقاعد وشايفة كبير مكفاش
الدخل بتاعك مع التضخم اللي بيحصل في المجتمع والأسعار والمصاريف وكل الكلام ده لقيت إن المعاش بتاعك معاش بسيط
يبقى دي أول مشكلة بشوفها في اللي بيحصل في التقاعد إن الدخل بتاعك ممكن ينزل
14:20
المشكلة التانية اللي بتحصل ساعات هي المصاريف المفاجئة مع الأسف لما سنك بيكبر وإحتمالية التعرض لمشاكل صحية كبيرة.. تعبت ومحتاج عملية كبيرة لا قدر الله ، حصلك تدهور صحي أيا كان.. ده بند المصاريف المفاجئة أو المصاريف العلاجية دي حاجه كبيرة بتحصل لازم نبقى فاهمين ان احتماليه حدوثها اكتر من حد عنده 15/20/25 سنة
14:53
تالت حاجه في اللي بيحصل في التقاعد ممكن الحالة النفسية نفسها تتأًثر.. وقت الشغل انت ديماً بتكون مشغول وعندك أهداف عايز تحققها وعندك ولادك بتكبرهم ، وفي ضغط في الحياة وبتجري من هنا لهنا وديماً مشغول.. في التقاعد أنت بتبقى أفضى بيبقى عندك وقت ولو مش موجه وقتك ده بطريقة صحيحة بتأثر على حالتك النفسية كل الحاجات دي انا بشوفها بتحصل في التقاعد
15:30
ممكن كمان لو انت مفكرتش في الموضوع ده بدري أو معرفتش انت مفروض تعمل فيه إيه في حالات كتير اوي انا ممكن أضغط على أولادي
انا النهاردة في سن التقاعد عندي 65/70/75 سنة أنا ممكن غصب عني أضغط على أولادي ، أضغط على أولادي ازاي؟؟ أضغط عليهم بالمصاريف المفاجئة أو أضغط عليهم انهم محتاجين ياخدوا بالهم مني
طبعاً مش بقول انك لازم تكون مخطط إنك تحل كل المشاكل دي بس دي من الحاجات اللي بتحصل في التقاعد
16:05
الحاجات دي كلها بتسبب ضغط على الأسرة بالكامل.. ممكن تبقى أنت بتضغط على الجيل اللي تحتك وبتعمل مشاكل ما بين الأسرة نفسها.. يعني أنا راجل ومراتي عايشين وعندنا أهلنا ربنا يديلهم طولة العمر ، أهلنا دول محتاجين مننا حاجات طيب أنا كرب أسرة بحاول أخد بالي من ولادي وأهلي وهكذا لكن لو أنت مفكر في التقاعد كراجل متقاعد أو عندك حساب مدخر فيه فلوس انت بالعكس ممكن تشيل نفسك
يعني زي ما احنا كلنا بنحاول نربي أولادنا اننا نعملهم أحسن حاجه ونجيبلهم أحسن حاجه في الدنيا ، أنت برده لازم تكون واخد بالك من نفسك لأنك ممكن تقعد تعمل كل حاجه صح وتخش في التقاعد وتتحول لعبء عليهم
أنا كل اللي انا عايزه ان انت تبقى واخد بالك ان اهتمامك بنفسك هيفرق مع أولادك برده وتوفير موارد معينة انت بتشيلها لسن التقاعد من بدري من وانت صغير بتشيلها انها تحميك في سن التقاعد ده بيحمي أولادك
الموضوع مش موضوع أنانية أو هعملها لنفسي وبس أو أنا عايز أخد بالي أو يبقى معايا فلوس لأ هو أنت بتشيل ضغوط بتحصل عليك وعلى أولادك في سن معين كبير وخاصة إن ولادك بيكونوا في سن أكتر وقت مطلوب منهم حاجات مادية ، انت خلفت ولادك وانت عندك 30 سنة ودخلت في التقاعد وانت عندك 60 / 65 سنة ابنك النهاردة في سن بيربي أسرة وبيكبر أولاده وهكذا فان انت تبقى عبء مالي عليه ده برده حاجه بتضغط عليه
ده بشكل عام اللي بيحصل في التقاعد لو أنت مش مخطط ليه، لو مش عامل حسابك إن دي مشكلة ، مش واخد بالك انك المفروض تشيل جزء من دخلك من بدري جداً من وانت صغير وتحطها في حساب توفير وحساب التوفير ده بيكبر مع الوقت وبيوفرلك موارد تقدر تصرف منها في التقاعد
18:35
السؤال اللي بعده الدول المتقدمة عملت إيه في الموضوع ده؟
يعني احنا هنحاول نبص الدول المتقدمة فكرت في الموضوع ده ازاي و ازاي حلته هنلاقي أول حاجه في أنظمة للتقاعد
أول نظام اسمه نظام التقاعد العام ، نظام أمريكا عملته من سنين طويلة اسمه 41k ده نظام تقاعد عامل زي المعاشات كده في الدول العربية ده نظام انت بتقدر تخش فيه من خلال المرتب بتاعك.. انت بتقبض رقم معين بتقدر تقول انا عاوز جزء من مرتبي ده يروح في المعاشات وساعات في معظم الوقت الشركات كل ما تحط دولار تحطلك قصادة 50 سنت أو دولار
برده بيشجعوا الناس أنهم يخشوا انهم بيدوهم إعفاءات ضريبية لو دخلوا في حاجات شبة دي بيحاولوا يشجعوا الناس من أول يوم انهم يشتغلوا ويعرفهوهم ، يعني وانت رايح تشتغل ولسه متخرج بيبتدي يقولك لازم تخش نظام التقاعد ده حتى لو هتحط 3% من دخلك 5% من دخلك
الميزة في الحاجات دي بالنسبالي بصراحة ان هي بتعلي الوعي في ثانية ، انت وانت خارج من الجامعة انت عرفت انك لازم تبتدي تحوش للتقاعد فدي أكبر ميزة بالنسبالي في نظام التقاعد العام انه يعلمك من بدري ازاي ممكن تفكر في مشكلة 30/40 سنة قدام وممكن متكونش واخد بالك اصلاً انها ممكن تحصل
20:12
الحاجة التانية في نظام تقاعد خاص وده برده في الدول المتقدمة ، النهاردة انت حطيت نظام التقاعد العام وحطيت مساهمة أكتر لأنه بيبقى نسبة معينة بحد أقصي كذا ، انت قدرت تحط أكبر رقم ممكن تحطه في نظام التقاعد العام ولما أقعدت تحسب حساباتك بعد 20 / 30 سنة مش مكفيك مش هيديك نسبة الدخل اللي انت عايزها فبتتجه لحاجه اسمها نظام التقاعد الخاص ودي بتبقى بنوك معينة أو بنوك استثمارية بيكونلك محفظة استثمارية بتحط فيها فلوس بتطلب تعرف هي فيها ايه بتقعد مع المستشار المالي بتاعك بيشرحلك هي فيها ايه والمتوقع منها قد ايه وهكذا
ده مش تأمين عشان بس ميحصلش لخبطه مابين التأمين ومابين التقاعد ، انا بتكلم هنا على التقاعد فقط التأمين ده حاجه تانية عشان في بعض الدول العربية التقاعد والتأمين مع بعض بس أنا هنا بتكلم على التقاعد فقط.. فأنا بحوش وجزء من دخلي بحطه في حساب خاص بتاعي والحساب ده غالباً مبقدرس اسحبه منه لمده معينة عشان يمنعني اني اتحرك فيه
21:35
الدول المتقدمة برده عملت إيه تالت نقطة عملت نظام تأمين صحي مش إجباري ولكن نظام تأمين صحي عام ، أنا ممكن أروح أشتري بوليسة تأمين صحية واروح اتعالج بيها أيا كانت التكاليف بتاعتي عالية أو واطية
21:54
في الدول العربية برده الأنظمة دي ابتدينا نشوفها كتير لسه مش إجبارية 100% في كل الدول ولكن مع الوقت أعتقد احنا في الإتجاه لكده ، ونظام التأمين الصحي ده البديل الإسلامي بتاعة بيطلق عليه التكافل التأميني وده بيكون اننا بنحط قسط شهري كلنا مع بعض واللي محتاج يتعالج بيروح بالكارت بتاعة للمستشفى المعينة المتفق عليها مع شركة التأمين وبيدفعوا بالنيابة عنه وده برده عشان يعملوا إدارة للمصاريف المفاجئة اللي بتحصل في سن +65
22:39
رابع حاجة الناس بتعملها إن يبقى عندهم نوع من أنواع الدخل الجانبي اللي بيجيلي من غير ما أعمل مجهود كبير أوي زي مثلاً عندي بيت ، عندي أرض ، عندي حاجه صغيرة بأجرها ،عندي أسهم ، سندات ، وديعة في البنك أي نوع من أنواع الأدوات اللي بتدخلي دخل ودي الحاجه الرابعة اللي الناس بيعملوها عشان يحاولوا يعملوها عشان يحموا نفسهم في التقاعد.. أصل بيدخلي دخل ثابت
23:18
ممكن يكون عندي أفكار كتيرة متكلمتش عليها ، ممكن يكون عندي حصة في شركة ، ممكن واحد بيشغلي فلوس ، بس انا بتكلم على أكتر 4 حاجات أنا بشوف الناس بتعملهم نظام التقاعد العام والنظام الخاص ، التأمين الصحي ، وأصول معينة بشتريها عشان تجيبلي دخل
23:40
خلينا برده نبقى معرّفين حاجه إن التحويش للتقاعد هو مصروف ، لما هبص على الميزانية بتاعتي البند بتاع التقاعد ده مصروف عليا ده حاجه إجبارية لازم أدفعها متفتكرش انها رفاهية أو حاجه ممكن اعملها وممكن ماعملهاش إنت حياتك هتفرق بشكل كبير جداً جداً قدام لو انت عندك حساب تقاعد محترم تقدر تصرف منه
أنا قصدي انك متاخدش الموضوع انه ياريتني عندي ، او دي حاجه كويسة وجميلة ولطيفة أنها تبقى عندي.. لأ هو مصروف تعمله لأنه هيفرق في حياتك ومكانه مهم في الميزانية بتاعتك
وبعدين حسابات التقاعد دي حاول على قد ما تقدر إنك تبقى قافل على نفسك فيها يعني في بعض الدول بيحطوا غرامات على اللي بيسحبها عشان يمنعوا الناس انهم يسحبوها ، حاول تاخد حاجات هتاخدها بعد 20 / 30 سنة متفكرش فيها اصلاً ليه لأن ديماً بيبقى إيه ده انا محوش كذا في البنك عشان اعمل بيه كذا فأنا ممكن أروح أخده لو أتزنقت لأ هو مصروف عليك أنت بتطلعه عشان تحمي نفسك في وقت قدام
أنا عارف إن الموضوع صعب إني أفكر بعد 20 / 30 سنة ، وعارف إننا ممكن اصلاً منفكرش بكره الصبح هيحصل إيه أنا فاهم الكلام ده كويس جداً لأن انا لو متأخر وأكلت أكله تقيله هصحى تاني يوم مضايق وتعبان بس هاكل برده عشان أنا مبفكرش في الإنسان بتاع بكره ولكن بكره ده هو إنت ، بعد 20 سنة ده هو إنت.. وده إختيارك إنك ممكن تبتدي بدري وتبتدي صغير ، اللي بيبتدي صغير وصغير ده في أي وقت انت مازلت لسه بعيد عن الـ65 كل ما تبتدي بدري كل ما المجهود بجد هيبقى أسهل بكتير وده هناقشة بالأرقام في حلقة قريبة إن ازاي تحوش وفين وقد إيه بالظبط وازاي تقيس نفسك والكلام ده كله هنقوله بس أنا النهاردة كل اللي عاوز أبينه قد إيه المشكلة دي كبيرة وقد إيه المشكلة دي مهمه
26:09
طيب إيه الملخص بتاعة الحلقة دي؟
الملخص بتاع الحلقة دي إني عاوز أعرفك إن في مشكلة اسمها التقاعد
عايز اشوف المناطق العربية شكلها عامل ازاي وعايز أقنعك إن بعد 30/40 سنة الشكل العام هيتغير في الدول دي ، يعني اللي أحنا شايفينة النهاردة في المجتمع كأجيال هيتغير لأن التركيبة السكانية كلها هتتغير ولو التركيبة السكانية هتتغير معناها مشكلة التقاعد هتبقى أكبر بكتير لأن الناس أكتر بكتير أنا محتاج أوفر موارد أكتر بكتير للناس فلو أنت بادي بدري لوحدك ومركز إنت عارف بتعمل إيه أنت ممكن يبقى عندك مميزات عن الإنسان المتوسط في المجتمع
بصينا برده على الدول المتقدمة عملت ايه والحلول اللي كانت هناك عشان برده نفكر مع بعض ازاي نعمل حلول فأنت قولتلي في 4 حاجات الدول دي بتعملها لو انت عندك في المجتمع بتاعك تأمين عام ممكن تشترك فيها لو عندك حاجه خاصة ممكن تشترك فيها برده لو فكرت في التأمين الصحي تشوف أنظمة معينة تغطيك تمام برده فاحنا بنشوف الدول المتقدمة عملت إيه وبنشوف عندنا إيه في دولنا العربية ونشوف برده لو في حياتنا اللي جاية الـ 5 / 10 سنين اللي جاية لقينا تطورات من الحكومة في الإتجاه ده أبقى فاهم إن الحكومة بتعمل كده عشان تعمل حاجه وتأثر عليا فأنا ابقى واخد بالي ومتابع الأخبار في الأتجاه ده
برده عرفنا في الحلقة دي إيه بيحصل في التقاعد عشان ميبقاش في حاجه مفاجئة ليك ، إيه غالباً اللي بيحصل والضغط المالي بيجي منين وهكذا
والحل بتاعي إني ابتدي لوحدي وابتدي بدري وابتدي على قد ما اقدر أحوش وأحطها كمصروف وزي ما وعدتكوا اننا هنتكلم في الموضوع ده بالتفصيل بالأرقام في كل حاجه
28:15
الخاتمة
وفي أخر الحلقة أنا حابب أشكر كل الناس اللي بتبعتلنا على الصفحة بتاعة الانستجرام يعني التفاعل بتاعكوا الحمدلله جميل جداً ويفوق توقعاتي.. يارب الفايدة ديماً تعم من الحلقات دي وديماً مستني تعليقاتكوا واقتراحاتكوا لو في اي حاجه محتاجين نغيرها احنا ديماً كبرنامج بنسمع كل ردود الأفعال اللي جيالنا.. شكراً جداً جداً واشوفكوا الاسبوع الجاي
Translation of some words and terms:
Replay إعادة
Impact تأثير
Recently مؤخراً
Topic موضوع
Title عنوان
Based on Data بناء على البيانات
Super Long Term طويل الأمد للغاية
Conclusions الاستنتاجات
Products سلع
Resources موارد
Demographics التركيبة السكانية
System نظام
According to Data حسب البيانات
Life Expectancy متوسط العمر المتوقع
Range نطاق
Health Care الرعاىة الصحية
Extension تمديد/إطالة
Average متوسط
Target الهدف
Simulation محاكاة
Resources موارد
Contribution مساهمة
Maximum الحد الأقصى
Financial Advisor المستشار المالي
Managementإدارة
Passive Income (الدخل السلبي (دخل جانبي دون عناء
Assets أصول
It’s good to Have من الجيد أن يكون لديك
Advantage ميزة
Expense مصروف
Feedback ردود الفعل
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينوَر #بودكاست #بودكاست_عربي #بودكاست_بالعربي #التقاعد #التقاعد_الوظيفي # إعادة