130. الوعي وقت الأزمات
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
نظراً للاحداث اللي بتحصل حوالينا، حبينا في حلقة النهاردة نعلق على الموقف والأحداث اللي بتحصل بس من منظور مختلف
على مر التاريخ بنمر بفترات بيحصل فيها أزمات وضغط جامد ومع الأسف جوه الأزمات دايماً بيبقى صعب نشوف أي أمل والعواطف بتبقى غالبة، حزن وزعل وبتبدأ تشكك في الحاجات انت مصدقها وبتبقى متلخبط بشكل عام
: تصنيفات اتكلمنا عليها في الحلقة
أكبر 100 صندوق ثروة سيادية حسب إجمالي الأصول -
https://www.swfinstitute.org/fund-rankings/sovereign-wealth-fund
أفضل الاقتصادات في العالم (1980-2075) -
https://www.visualcapitalist.com/top-economies-in-the-world-1980-2075/
تابعوا حلقتنا واكتبولنا آرائكم بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلاً بيكوا في حلقة جديدة من بودكاست كلام ينور
حلقة النهاردة من غير إنترو نظراً للاحداث اللي بتحصل حوالينا هحاول اخلي الحلقه قصيره، فكرت كتير قبل ما اسجلها هل ده الوقت المناسب اني اسجل حاجه ولا لا، الناس كلها مشغولة بالاخبار اللي بتحصل حوالينا بس حبيت اتكلم عن الموضوع من وجهه نظر مختلفه شويه كل الناس اللي بتشتغل في شغلها بشكل عام بيجيلها فترات بيحصل عملية ضغط
مش معناه انك مضغوط أو زعلان لأ بيحصل إن النظام نفسه بيتكسر او بيتضغط عليه بشكل جامد قرب الانفجار في اللحظات دي بتبقى العواطف بتبقى عالية بيبقى في حزن بيبقى في زعل وفي مشاكل كتير دماغك بتشكك في حاجات انت مصدقها بتبقى متلخبط بشكل عام
يمكن انا في شغلتي اللي بشتغلها بشوف الموقف ده بيحصل انهيار جامد في الأسواق خلال السنين اللي انا اشتغلتها كلها وفي الاخر احنا بنى ادمين فبتتضغط فبتحس بأزمة بتحس بمشكلة بتخاف ولا ما بتخاف ممكن تغلط جامد
تاني انا بحاول اعلق على الموقف والأحداث اللي بتحصل الايام دي بس من وجهه نظري من وجهة نظر شغلانتي نفسها انا متركب كده او خبراتي متركزه حوالين المجال ده، فهحاول اجاوب زي مثلا واحد دكتور بيجاوب عن طريق فكرته على العمليات أو واحد في الجيش بيجاوب عن طريق الحرب أو الكلام ده فكل واحد غصب عنه
اللي احنا بنعمله لما يبقى فيه ضغط جامد علينا وتاني الضغط هنا مش نفسي، الضغط يعني ازمه كبيره شبه انفجار يعني في النظام المالي ينكسر البلد هتفلس ايا كان اللي احنا بنمر بيها
اللي بيحصل في الموقف ده ان احنا بنحاول نحول تركزنا من المدى القصير الاحداث اللي بتحصل حوالينا ونحاول نبص لقدام سنه سنتين خمس عشر سنين.. ليه بنحاول نضحك على مخنا بالطريقة دي عشان لو ما عملناش كده احنا هنركز على دلوقتي حالاً ومن كتر الاخبار ومن كتر الزعل والحزن على اللي بيحصل احنا هننفجر، احنا شخصياً هننفجر وانفجار ده مش هيفرق مع القضيه اللي انت بتبص عليها خالص بالعكس ده هيضرها، عدم وجودك في المستقبل هيضر القضيه اللي انت بتحاول تدافع عنها النهارده
فاول حاجه بنحاول نعملها اننا نزق نفسنا لقدام طب لو خرجت من اللي احنا فيه ده والوضع أتحسن إيه اللي ممكن يحصل قدام، إيه الأمل الموجود اللي ممكن نستغل هذا الموقف الوحش اللي احنا فيه النهاردة ونغير في نفسنا حاجات معينة عشان لو يحصل الموقع ده قدام نبقى مستعدين بشكل أكبر.. انا مش بتكلم والله كلام نظري الحاجات دي أنا بعيشها وبتحصلي وبفكر فيها فبحاول انقلها للناس اللى بيسمعونا
النهاردة كل حاجه للاسف كل حاجه بقى ليها علاقة بموازين القوة، موازين القوة بتبقى جاية من قوتك الإعلامية قوتك العددية قوتك المالية، الاقتصادات بتاعة الدول اللي بتتحكم في العالم اقتصادات قوية
هرجع وأقول أن الاقتصادات القوية دي ممكن تكون مبنية من ناس أصلاً قوية يعني عبر التاريخ هنلاقي نماذج كتير من الاقتصادات الكبيرة كانت في فتره معينه دول مفلسه أو ناس عايشين تحت خط الفقر او الكلام ده كله
مثال كبير قوي الصين، وامريكا يوم ما اتعملت كانت عباره عن حروب اهليه وناس بتاخد اراضي من بعضها وبعدين عملوا الدولة الكبيرة بتاعتهم، نفس الكلام احنا دول قديمة في المنطقة بقى لنا سنين كتير موجودين ولكن اللي بيتغير الايام دي من وجهة نظري وهرجع لتقرير طلع قريب جولدمان ساكس بنك استثماري هنحط اللينك في الشو نوتس
ازاي الاقتصادات بتتغير، والمفاجئ إن في دول عربية مكنتش موجودة على الخريطة كأكبر 15 اقتصادات في العالم مثلاً، في 2050 وده توقع البنك مش توقعي بلد زي مصر هتبقى الـ 12 على العالم في الاقتصاد كحجم الاقتصاد بتاعها، رقم 13 السعودية ده في 2050
https://www.visualcapitalist.com/top-economies-in-the-world-1980-2075/
في 2075 متوقع إن مصر هتبقى رقم 7 في العالم وفي دول أخرى موجودة إسلامية عربية اقتصادها هيكبر
في تقارير بتقول ان الأرقام دي حتى ممكن تبقى متواضعة لأن ممكن يحصل تطورات في أسعار البترول والطاقة والكلام ده كله هتخلي الاقتصادات دي تنمو بشكل أسرع
القوة بتاعتنا اعتقد موجودة في ديموغرافية بتاعتنا احنا من أصغر الشعوب في العالم واحنا اتكلمنا عليه قبل كده في حلقة قديمة، الشعوب دي هي المستقبل، كسن صغير أو النمو في الاقتصادات بيجي من متوسط عمر الإنسان في هذه الدول فده معناه أنه هيبقى قوة منتجة في المستقبل والاقتصادات دي هتكبر
حاجتين مهمين أوي بقى لو الأرقام دي طلعت حقيقية غالباً أوضاعنا المالية والاقتصادية هتبقى أقوى فازاي احنا نشارك في موضوع ده، هنلاقي الدول دي لو مكانها اتحقق سواء في 2050 و 2075 وهنا انا فاهم ان الكلام ده بعيد وقدامه كتير ولكن ازاي من النهاردة احنا كشعوب نبقى عارفين ان المكان ده المفروض يبقى بتاعنا ان احنا لازم اصلاً نستعد، نستعد من الناحية الفكرية من الناحية التجهيزية، نستعد ان لو حد وصل لمناصب في الحكومات أو كان قائد يقدر يقى عادل يقدر يعرف ياخد الثروة اللي تكونت في البلاد دي ويستخدمها بطريقة صحيحة دي اول حاجه جت في دماغي
تاني حاجة المواطن العادي اللي مش هيبقى جزء من الحكومات دي او جزء من الإدارة هو عليه دور إنه ينمي ذاته وينمي نفسه، البودكاست هدفه ان الناس تستقل مالياً أو تعرف يعني إيه إستقلال مالي لو انا عرفت يعني إيه استقلال مالي غالباً هيبقى عندي القدرة اني اغير حتى لو تغيرات صغيرة لو عملت ثروة انا ليا الحق كفرد استخدمها بالطريقة اللي انا عايزها، استخدمها بطريقة اللي تساعد قضية انا شايف محتاجه تتساعد
انا دايماً بدعي دايماً إن الحكومات او الناس اللي بتدير وفي نماذج بصراحة مبشرة جداً على المستقبل اختلفت معاها أو اتفقت معاها بس هي نماذج ناجحة فالناس اللي بتدور دي عليها دور والناس اللي هي جزء من الشعب او ملوش علاقة بالسياسة أو الإدارة هو برضه عليه دور انه يساعد لأن احنا كتير الناس كتير ودورك إنك تساعد.. تساعد واحد صاحبك، أو تساعد واحد نفسيته تعبانه وتقف جانبه.. في حاجات كتير بتعمل فايدة للناس بآلاف الطرق.. لما تستقل مالياً انت نفسياً هتبقى احسن من وجهة نظري هتبقى قادر تفكر هتبقى قادر تاخد قرار هتبقى صاحب قرارك، ووقتها هيحصل التغيير
حاجه كمان مبشرة ودي معلومات منشورة تقدر تبص عليها عادي في حاجه اسمها الصناديق السيادية، الصناديق السيادية دي بتبقى صناديق الحكومات هي اللي عاملاها، الحكومات بتطلع دخل من حاجات معينة وبدل ما تصرفهم بتحطهم في الصندوق والصندوق ده ليه إدارة مستقلة بتصرف الفلوس دي على مشاريع تنموية ومشاريع استثمارية وبتحافظ على الاستثمارات بتاعة الأجيال
احنا في العالم المصطلح ده اعتقد ابتدي في الثمانينات أو التسعينات لكن النهاردة بقى في مجموعة كبيرة جداً من الصناديق السيادية - طبعاً هنحطلكم لينك للمعلومات المتاحة أي حد ممكن يشوفها
https://www.swfinstitute.org/fund-rankings/sovereign-wealth-fund
الحاجة المبشرة في الموضوع ده ان في صناديق سيادية من المنطقة، يعني لو قولنا أكبر 10 صناديق سيادية هنلاقي 4 من 10 من المنطقة ودي نسبة مش قليلة، احنا اقتصاداتنا في المنطقة كلها على بعضها بالنسبة للعالم هي اقتصادات صغيرة حجم اقتصادنا مش كبير ولكن لما يبقى عندك في السباق بتاع التنافس بتاع صناديق السيادية 4 من 10 في أكبر 10 صناديق دي حاجه مبشرة اوي الصراحة
لو بصينا على أكبر 20 صندوق هنلاقى عندنا 8 وأحجام الصناديق دي مش صغيرة والمشاريع اللي بتعملها مش صغيرة والاستثمارات اللي بتعملها مش بس بتعملها في دولها بتعملها في استثمارات عالمية ودي برضه من الحاجات اللي انا شايفها مبشرة جداً جداً للمنطقة
وتاني أنا برجع اشوف الأمل موجود فين دول الـ 3 حاجات اللي فكرت فيهم بصراحة يمكن في حاجات احسن من كده وأكبر من كده تديني امل ولكن انا ببص عليها من منظور بتاعي وبتاع شغل الحاجات المالية فعلى مستوى الفرد وعلى مستوى الحكومات على مستوى الديموجرافيك بتاعنا شكل النمو بتاعنا اللي ممكن يحصل، حجم اقتصادنا، أحجام الصناديق السيادية بتاعة المنطقة انا عندي أمل في المستقبل كبير ومش معنى ان انت بقالك 50 أو 100 سنة عايش بطريقة معينة أو طريقة وحشة والكلام ده كله معناه أن المستقبل هيبقى هو هو
انا مش شايف كده خالص احنا النهاردة في ناس كتير جداً من المنطقة في مراكز قيادية في العالم، الانترنت فتح قدامنا الشكل ده و ابتدينا نشوف الناس وابتدينا نعرف قصص نجاحهم وابتدت الناس تحاول تقتدي بيهم فبالعكس انا شايف ان في امل وأمل كبير ومع الأسف جوه الاحداث دايماً بيبقى صعب والعواطف بتبقى عالية انا مش خبير سياسي أو تاريخي عشان اتكلم في التاريخ او السياسة او أحلل حاجات انا مش قادر افهمها انا بحاول انقل لكم وجهة نظري
وانا اسف لو طريقتي النهاردة مش زي اللي انتو متعودين عليها انا بعتذر بس نظراً للظروف الواحد متأثر انا حاولت اسجل على قد ما اقدر وبعتذر لو مقولتش حاجات معينة الناس كانت منتظراني اقولها او اتكلمت على حاجات بمنظور مختلف شكراً جداً على وقتكوا
Translation of some words and terms:
Stress ضغط
Stress Testing اختبار الإجهاد
Emotions العواطف
Growth نمو
Leader قائد
Concept مفهوم
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي #الوعي_وقت_الأزمات