12. هل أنت غني ام ثري
كلام ينوّر أول بودكاست عربي مبسط عن الحياة المالية
linktr.ee/Kalamyenawar : في اللينك ده هتلاقوا كل الروابط الخاصة بكلام ينور تقدروا تتواصلوا معانا وتسمعونا من خلالها
يعني ايه راجل غني ويعني ايه راجل ثري؟
بناقش في حلقتنا الاسبوع ده مفهوم كلمة (غني) و كلمة (ثري) من المنظور المالي وايه الفرق بين المفهومين دول؟
الترجمة الحرفية للكلمتين في المعجم ممكن تكون مختلفة شوية عن اللي بنقوله في الحلقة ولكن كلامنا خاص بالمتعارف عليه في المجال المالي
! يا ترى انت عايز تكون غني ولا ثري
النوعين أكيد بينهم شيء مشترك وهو توافر مبالغ مالية أعلى من المعدل العادي واللي بتخلي شكلهم في المجتمع أعلى من العادي
ولكن الفروقات بينهم كتيرة وهو ده محور حديثنا هذا الأسبوع
ليه أكبر مستثمرين في العالم لو شوفتهم ماشين في الشارع مش هتعرف تفرقهم عن اي راجل عادي طبيعي؟
هل الصرف معناه تحقيق السعادة؟
هل الثراء في المال فقط؟
لو انت غني أو بيدخلك دخل كويس جداً وحابب تنتقل من فئة الأغنياء لفئة الأثرياء ممكن تعمل ايه؟
اكتبولنا آرائكم في التعليقات بعد سماع الحلقة
: للأسئلة والأقتراحات
: تابعونا على موقعنا الإلكتروني
👇 وصفحتنا على
Omar Shams @ Clubhouse Omar Shams @ LinkedIn : تابعوا شمس على
Transcript:
اهلا بيكوا في حلقة جديدة من بودكاست كلام ينور
في حلقة النهاردة هناقش مفهومين اتنين بس مش هطلع براهم
المفهومين دول كلمة غني وكلمة ثري وايه الفرق بين المصطلحين دول
..خلينا بس نقول أن الترجمة الحرفية في المعجم او القاموس ممكن تختلف شوية ، بس ده المتعارف عليه في المجال المالي
..يعني ايه راجل غني ويعني ايه راجل ثري؟ عشان المفهومين دول بيختلفوا شوية
! طيب انت اول ما قولتلك المفهومين دول يا ترى ايه اللي جه في دماغك؟ انت عايز تبقى راجل غني ولا عاوز تكون راجل ثري
..هنمشي مع بعض في الحلقة وهنعرف الفروقات ما بينهم ونحاول نقارن بين اختيارك في اول الحلقة واخر الحلقة وهل فارق ولا لأ
الأتنين أكيد فيهم حاجة مشتركة انهم معاهم مبالغ مالية تخلي شكلهم في المجتمع أعلى من العادي شوية
المستوى المادي في الحالتين أكيد هيكون أعلى شوية من العادي ولكن الغني ديما بحس او المتعارف عليه انه ديما بيحب يبين للناس قد ايه مظهر الغنىبتاعة شكلة عامل ازاي ، يعني عربيتي ، بيتي ، ساعتي ، لبسي.. ده مش عيب ولكن بحس ديما ان الراجل الغني بيحاول يعمل كده ، لكن الراجل الثري وهي جاية من الكلمة نفسها اللي هي الثراء ، الثراء ده مش بس في الفلوس ممكن يكون في الفكر ، في التفكير ، في الدراسة ، في حاجات كتير في مخه هو نفسه محتاج يعجب بالحاجة قبل ما يصرف فيها او يشتريها او يعمل حاجه . يبقى اول فرق ان في واحد بيحب يوري الناس وواحد يبحب يشوف هو ويقتنع الأول قبل اي حاجه
هنلاقي الغني دخلة بيبقى عالي ديما ممكن يكون موظف كبير ، ممكن يكون بيقبض دخل كويس جدا ولكن الفرق بين مصروفة وإراداته ديما بيبقى واطي ، مفيش إدخار كبير بس هو عايش كويس جدا ، لكن الراجل الثري ديما بيبقى عايش بفائض في ميزانيته ، يعني ديما بيبقى عنده فائض كل شهر ، كل سنة ، بيبقى خارج من السنة عنده فائض في ميزانيته وهو ده اللي بيحقق له الثراء على المدى الطويل
ده برده أختلاف واضح جدا الراجل الغني مهما زودتله دخله هو هيصرفه. هو بياخد 10 الآف هيعيش بيها ، بياخد 50 ألف هيعيش بيها ، بياخد 100 ألف هيعيش بيها ، بياخد 150 ألف هيعيش بيها برده ، هيبقى الفائض ما بين الدخل والمصروف قليل جدا ، وده حاجه مهمه جدا جدا
وده بيخلينا نروح للنقطه اللي بعديها ان الراجل الغني عنده ديما خوف انه يخسر وظيفته او يتسرح من وظيفته ، ليه؟ لأنه معندوش إدخارات في الماضي حصلت في الوقت الحلو اللي هو أشتغل فيه ، معندوش أي إدخارات تحميه لو حصله حاجه ، ولكن الراجل الثري معندوش نفس المشكلة دي لأن هو ممكن مع الوقت بيقرب من الحرية المالية واحدة واحدة ، يعني ممكن بعد 5 سنين من حياته في العمل حوش 30% من المطلوب عشان يعيش لوحده ، وبعد 10 سنين حوش 60% فكل ما الوقت يعدي عليه إعتمادة على الشغل او الوظيفة بيقل وفي نفس الوقت هو مازال لسه محافظ على مستوى معيشته وده الفرق ما بين الأتنين الغني ديما بيصرف اللي داخل زي اللي خارج مهما زودتله دخله ، الثري هو ديما اللي بيبقى عنده فائض
برده حاجه تفرق ما بين الغني والثري ان بعد شويه الراجل الغني هو قاعد بيصرف ، بيشتري استحواذات مادية عربيات / بيوت بعد شوية مستوى الدخل العالي ده مبيحققلوش سعادة يعني مازال هو بيعمل فلوس كتير وبيصرف فلوس كتير ومش حاسس بالسعادة ، ليه؟ لأن ديما عنده في الخلفية حاجات في النفسية مخلياه قلقان معندوش نظرة مستقبلية واضحة للدخل بتاعه ولكن الراجل الثري بيحاول يخطط ، بيبقى عارف بعد 5 سنين/ 10 سنين/ بعد 20 سنة ايه اللي ممكن يحصل ولو لا قدر الله حصله حاجه في الطريق هو بيبقى مجهز نفسه فدي حاجه بتفرق برده ما بين النوعين ان مهما كنت بتصرف مش معنى كده انك هتحقق السعادة لسبب انك بتتعود التعود ده حاجه مهمه جدا لازم نكون عارفنها
وده هيوصلنا للنقطة التانية ان الراجل الغني برده ممكن يكون غني لاسباب كتير ممكن يكون وظيفي.. عنده وظيفة كويس ، ممكن يكون عنده ورث عائلي ، ممكن بالصدفه يكون دخل في مشروع معين او اي حاجه حصلت خلته غني ، لما السبب ده بيزول الراجل الغني ممكن ما يعرفش يكمل تكوين الثروة بتاعته يعني ميعرفش يزودها ، ميعرفش ينميها ، ميعرفش يحافظ عليها ، ولكن الراجل الثري هنا بيختلف في حاجه ان هو كون الأصل ده أو هو جمعه عن طريق شغل او عن طريق استثمار بطريقة معينة في الحالة دي هو اخد وقت طويل علشان يعمله ، فاللي بياخد وقت طويل ممكن يكون صعب انك تغيره او تبوظه كمنهجية في الفكر.. ليه؟ لأن انا اتعلمت وشوفت غلطات كتير ، جربت كذا حاجه ووصلت للمعادلة اللي بتخليني أعرف أحافظ على الأصل ده ، فالراجل الثري ميزته ان لو جينا بعد 20/30 سنة أخدت منه كل حاجه وقولتله ابتدي من الاول هو عنده فرصة تاني انه ينجح ، ليه؟ لأنه شاف الطريق ، وده اللي بحاول أعمله في البودكاست ده ، بحاول أخلي الناس تتحرك من ناحية اللي هو متبقاش مبسوط اوي انك تشوف الغنى شوف الثراء حاول دور على الثراء ، الثراء ده ممكن يكون فكرياً ، مالياً ، معنوياً وفي حاجات تانيه كتير
برده في حاجه تانيه بتختلف ما بين الحالتين الراجل الغني بيشتغل طول حياته عشان يعمل الفلوس ، ولكن الراجل الثري بعد شوية الفلوس بتشتغل عشانه ، يعني انا عندي حسابات معينة ، عندي أصول ، الأصول دي بتقعد تنمو مع الوقت وتدخلي دخل ، فالفلوس هي اللي بتشتغل عندي ، فالراجل الغني بيشتغل عند الفلوس لكن الراجل الثري الفلوس هي اللي بتشتغل عنده وده برده فرق واضح ما بين الحالتين
ولو جبتلي الميزانية بتاعة الأتنين ، كل واحد بياخد في الشهر رقم معين وبيصرف مصاريف معينه وانت جيت قولتلي بص يا عمر الراجل ده بيعمل ايه والراجل ده بيعمل ايه ، لو لقيت واحد نسبة المصروف عنده قرب 100% من دخله ده هعتبره في الفئة بتاع الراجل الغني او اللي هو بيصرف 100% من دخله ، ولكن الراجل الثري غالباً هلاقي بنود في الميزانية بتاعتة مختلفه تماما عن الراجل الغني ، البنود دي غالبا هتبقى إدخار / استثمار / شرا أصول ، وغالباً الحاجات دي مش هنلاقيها في الميزانيات فانت بتقولي هتقدر تفرق بين ميزانيتهم؟ أكيد لو شوفتها.. زي نتايج التحليل كده بتبص نتايج بتاعة واحد ونتايج بتاعة واحد هتعرف تفرق ما بينهم بسهولة جدا
هل ممكن لو نزلنا الشارع نقدر نعرف الراجل الغني والراجل الثري ، هل لو جبنا صورة 100 واحد وحطيتهم قدامك هل هتعرف الفروق؟ هتعرف تطلع مين ثري ومين غني؟
غالبا الغني هيبقى بيحاول يبين هو مين فممكن تشوف حاجات ظاهريه فيه ، ولكن الراجل الثري انت مبتعرفوش لان انت بتقول بص ده راكب عربيه ازاي ده أكيد معندوش فلوس ولكن في طبيعة الأمر أكبر مستثمرين في العالم معظمهم لو شوفتهم ماشين في الشارع مش هتعرف تفرقهم عن اي راجل عادي طبيعي ، فدي حاجه برده في الشكل ، ولكن في اثرياء برده بيهتموا بشكلهم مش قصدي انهم كلهم كده ، ولكن بنسبه كبيرة جدا انت مابتعرفش الراجل الثري ده بيبقى شكلة عامل ازاي
..طيب
لو انت لسه بتبتدي حياتك او لو انت بتعتبر نفسك عندك دخل كويس جدا ، بتعتبر نفسك غني ، بس انت عايز تتحول من الغنى للثراء ممكن تعمل حاجات بسيطة جدا تبتدي بيها بس الأول تحطك بس على الطريق ، ومش لازم استعجال جرب بس ابتدي وبعد شوية هتتعلم تعملها ازاي وهتكبر فيها وهتبقى محترف فيها وهكذا
..لو انت عاوز تتحول من راجل غني لراجل ثري
اول حاجه لازم ابتدي احوش جزء من دخلي الجزء ده ممكن يبقى 10 /15 /20 /30% من دخلي حسب مقدرتك مينفعش تعيش بنسبه عاليه في الصرف بالنسبة للدخل
تاني حاجه لازم تدفع كل الديون اللي عليك بالذات اللي بتدفع عليها فوائد ، مش لازم تقترض لو انت مش محتاج لأن بردة انا ممكن أكون غني وبقترض علشان أسافر واتفسح وأبين واعمل صور يعني ممكن أعمل حاجات كتير جدا ملهاش معنى بس عشان ابين اننا مبسوط ، فأبعد عن القروض أو الأستدانه او انك تعمل حاجات زي دي لأنها فالاخر سلع استهلاكية
الحاجة اللي بعديها انك تبتدي تستثمر على طول يعني ايا كان نوع الأستثمار اللي انت هتعمله مع الوقت برده في الحلقات بتاعتنا هنناقش حاجات مختلفه ولكن ابتدي ، ابتدي بحاجات بسيطة ابتدي في الودايع ، ابتدي بشهادات الأستثمار ابتدي في الحاجات اللي انت تفهمها مش لازم تصعب الدنيا على نفسك
الحاجه اللي ممكن نعملها برده انك تحاول تبعد عن اي مصروف ملوش معنى ، يعني انت صحيت من النوم حاسس انك عاوز تصرف النهاردة مش لازم ممكن تروح تشتري بيها حاجه استثمارية أحسن بس متمنعش نفسك 100% واحده واحده
الحاجه الاخيره ان انت لازم يبقى عندك أهداف واضحة على المدى الطويل ، يعني مينفعش أبقى بعمل كل الحاجات دي بدون أي هدف ، انا هدفي التقاعد / هدفي تعليم ولادي هدفي اي حاجه ، المهم يكون عندك هدف لو معندكيش هدف وبتحاول تعمل حاجات تحولك من حالة لحالة يبقى انت بتعمل حاجه غلط
وزي ما قولنا في حلقات قبل كده الاهداف دي ممكن تبقى متغيره يعني مش لازم اللي انت هتقوله النهاردة سنة 2021 في سنة 2027 هيبقى هو هو ، لأ اهدافك بتتغير ، بس حدد على الأقل أهداف معينة بسيطة
لو انت من أول الحلقة كنت حاسس ان اجابتك كانت صح ، ده مش معناه انك عارف الطريق.. ولو انت اجابتك كانت غلط ده مش معناه ان معندكش امل ، لو قولت انا عاوز ابقى غني او ثري او ايا كان.. انا مش هدفي انك تكون جاوبت صح في أول الحلقة انا هدفي انك في أخر الحلقة تكون عرفت الفرق ما بين الطريقين وانت عاوز تكون مين فيهم وواحده واحده تحاول تتحرك من واحد للتاني.
Translation of some words and terms:
Rich: غني
wealthy: ثري
Impressed: معجب
Long term: طويل الأجل
Layoff: تسريح
Visibility: رؤية
Creation: خلق او تكوين
Wealth: ثروة
Formula: معادلة
Interest: فائدة
تنويه هام: جميع الآراء التي تم التعبير عنها من قبل شمس وضيوف البودكاست هي آراؤهم الشخصية ولا تعكس رأي أي كيان ينتمون إليه. هذا البودكاست مخصص لأغراض تعليمية فقط ولا ينبغي الاعتماد عليه في القرارات الاستثمارية. أي اعتماد على المعلومات المقدمة يتم على مسؤوليتك الخاصة
#كلام_ينور #بودكاست #بودكاست_عربي #بودكاست_بالعربي #غني #ثري #السعادة #حرية_مالية